جيهان و المعفر الجزء الثالث

قتليها علاش ؟ .. قاتلي غي قولي كيدرتي حتا طيحتي غالي .. قتليها شكون قالها ليك .. قاتليا راه قتليك خطيبي راه صاحبو .. والبارح جا كيعاود ليا على غالي عرف شي بنت ما بنت و عرفتها غادي تكوني غي نتي .. قتليها أشنو عاود ليه .. قاليه واحد البنت زلزلات ليا الكيان ديالي تلفاتني .. وأنا ظلمتها حيت قلت راها بحال كاع البنات .. ولكن هي مختاالفة عليهم كاملين .. و معندها مدير بيا وأنا عندي هاد العقلية .. قتليها كنت تمنيتو يكون مبدل .. قاتليا وا جيهان آش كتسناي من واحد عاش طفولتو ففرنسا و جا المغرب وعاود رجع كمل قرايتو تما و تخرج تما .. ولباس عليه .. وكيخرج غي مع بنت شكون و شكون .. كل سبت وحد كيدوزو فبلاد .. ممولفش على العقليات بحال ديالك .. قتليها صافي سدي هاد الموضوع بغيت نساه .. أكبر خطأ درت هو هدرت معاه .. وتعلقت فين نتفلق .. قاتليا مهيم راك خليتي ليه بصمة فحياتو .. دازت اليام وأنا كنحاول ننساه .. ومزيان جاتني مع الإمتحانات شغلت بيهم راسي .. سلات القرايا .. ومشيت وسافرت مع الدار .. وغالي ممشاش من بالي .. دازت شي 8 أشهر ومعندي حتا خبار عليه .. جا نهار عيد ميلادي مكنتش معولة نحتفل بيه .. عيطات ليا أمال قاتليا .. ألو جيهان جي عندي ضروري للقهوة فين كنجلسو .. قتليها ياك لاباس قاتلي غي أجي .. قتليها واخة أنا جايا .. كان كيسحاب ليا عندها شي مشكيل مع خطيبها و بغات تشكي عليا .. مشيت وصلت القهوة وتمة لقيت المفاجئة .. دايرين ليا حفلة كبيرة فرحت وبكيت و عنقت أمال وقلت ليها شكرا بزاف .. داكشي داز راااائع .. فرحنا و نشطنا واكشي كان غزال .. سالينا الحفلة .. بقيت جالسة مع أمال و خطيبها و أصدقائنا لوخرين كلشي مشا .. أمال جبدات واحد السنسلة غزاااااااالة ديال الذهب و فيها قلب كبير ولكن مقسوم كاين نص ونص لا .. قتليها أووووو غزاااالة ولكن فين هو النص لاخر .. قاتليا عندك قلب .. قتليها آه .. قلتليا واش كتحسي بيه كامل ديالك .. قتليها لا قلبي تقسم على جوج .. قاتليا معامن قسمتيه .. قتليها راك عارفة .. قاتليا بغيتي تقولي زعمة مع غالي .. قتليها آه .. قاتليا إذن نص لاخر ديال هاد القلب راه معاه .. قتليها كيفاش .. قاتليا هادا الكادو ديال غالي .. والنص ديال القلب راه بقا معاه .. صدماااتني .. لدرجة عينيا دمعو .. قتليها و علاش مجاش .. قاتليا كان خاصو يمشي لفرنسا ضروري ماماه مريضة شوية .. وراه هو لي فكر يدير ليك هاد الحفلة .. هو كان ديما كيسول عليك .. ومؤخرا قلت ليه راه اليوم عيد ميلادك وهو لي دار ليك هادشي .. عجبنيي الحال بزااف و عرفتو منسانيش إذن حتا أنا مكاين علاش ننساه و مغاديش نبقا نحاول نساه و غادي نبقا ديما نفكر فيه .. وغادي نتسنا الأيام شنو غادي تورينا .. دازت 5 أشهر و هو ففرنسا مدخلش المغرب .. ومعندي عليه خبار .. حتال النهار لي كنت جالسة ماعليا مابيا .. حتا عيطات عليا أمال .. وصدماتني بواحد الخبار .. قاتلي بيلا الأم ديالو توفات .. وغادي يبقا مزال تما وغالبا غادي تدفن تما .. طلبتها باش تقول لخطيبها يعطيها النمرة ديال فرنسا .. قاتلي صبري عليا واحد 10 دقايق ونسيفطها ليك .. بقيت كنتسنا حتا سيفطاتها .. وعيطت ليه وأنا قلبي كيزدح بالخلعة واحد الإحساس  عجيب .. قال ألو .. ألو غالي .. هادي جيهان .. وي جيهان .. غالي البركة فراسك .. شكرا جيهان .. مهيم تهلا فراسك وإيلا حتاجيتي شي حاجة تاصل بيا .. شكرا أجيهان .. بسلامة غالي .. بسلامة جيهان .. جيهان .. وي .. كنحس براسي بحدي .. متخافش أنا معاك .. وقطعت .. هاد الجملة اللخرة قطعاااتني فقلبي .. بقيت ساعة وأنا كنفكر حتا قررت أني غادي نمشي لفرنسا آه غادي نمشي .. عندي الفيزا الوالد ديالي عندو الجنسية الفرنسية ويالله كنت خديت الفيزا وباقي مخرجتش بيها .. ولكن محال يخليوني .. ولكن ضروري نلقا السبة .. عيطت لخالتي لي هي عايشة ففرنسا و لي هي بماثبة صديقتي المقربة واخا بعيدة عليا .. عاودت ليها كلشي و طلبتها أنا تلقا ليا شي سبة .. وفعلا تاصلات ببابا .. وقاتلو سيفط جيهان لفرنسا راه كاين شي امتيحانات ديال واحد الكلية كبيييرة ومعروفة .. وإيلا نجحت فيهم غادي نقرا فيها بمنحة .. الوالد ديالي وافق .. و مشا قطع ليا الطيارة .. من بعد 3 أيام غادي نمشي .. عيطت لأمال .. عاودت ليها شنو غادي ندير وقالت ليا راكي هبيييلة .. قتلييها سمعي حاولي تسولي ليا على العنوان والمدينة .. ومتقولي لحتا حد بيلا غادي نمشي لفرنسا .. جابت ليا العنوان.. من بعد 3 أيام مشيت .. وهادي كانت أول مرة نسافر بحدي .. مشيت وصلت تلقات ليا خالتي .. مشيت للدار بدلت وخرجت .. العنوان فيدي وغادة .. وصلت للعنوان لي مكتوب عندي .. طلعت دقيت .. خرجات ليا وااحد المرة وقيلة الخدامة .. قاتليا مكاينش راه مشا يفطر فواحد القهوة .. عطاتني العنوان ومشيت .. بقيت كنسول حتا لقيتها .. جيت داخلة مع باب القهوة .. مغادي تجي عيني غي فعينو .. متخيلوش كيف كانت الصدمة ديالو .. بقا كيشوف مصدقش بيلا جيت حتال عندو .. وقف وجا جاي .. حتا وقف قدامي .. بغا يعنقني ولكن مقدرش حيت عرفني مغاديش نخليه .. ورك على يديه و ضبط راسو .. قالي ميمكنش جيتي حتال لهنا !! .. قتلو آه جيت مبغيتش نخليك بحدك .. جيتي على قبلي ؟ .. آه على قبلك .. ولكن .. صافي بلا ولكن .. أنا بغيت نكون بجنبك هاد الفترة عندي شهر غادي نبقا هنا .. وغادي نكون بجنبك إيلا حتاجيتي شي جاجة .. جيهان هادشي بزااااف عليا .. صافي بدل الموضوع .. بقينا جالسين كنهدرو عاود ليا على ماماه و المرض لي داز عليها وكانت عزيزة عليه .. حاولت نواسيه .. دازت 15 يوم و حنا كنتشاوفو يوميا كندورو وكنفوجو .. حاولت نحسسو أني بجنبو ومعاه و مكنتش كنتسنى حتا مقابل .. و مدرتش هادشي باش نجدبو عندي .. نهار 16 قالي واش تمشي معايا لواحد الحفلة نقية . بديت كنضحك قتليه بدينا عاوتاني .. قالي صافي على خاطرك .. قتليه فين كاين هاد الحفلة .. قالي هافين هافين .. قتلو سير بصحتك .. وصل الليل سيفط ليا ميساج قالي أنا فالحفلة و تلفوني غادي يطفا حتا نرجع للدار ونهدرو .. قتلو واخا .. ولكن قلت غادي نمشي نطل عليه غي من بعيد و نشوف هاد الحفلة كيدايرة .. خصوصا منين عندي العنوان وكلشي .. مشيت ودخلت وتخبيت فواحد القنت .. حتا بان ليا .. جالس هو و شي وحدة فواحد الوضعية ماشي حتال الهيه .. خرجت بحالي ومشيت للدار . وعرفت بيلا عمرو مغادي يتبدل .. تخلطو عليا بزاف ديال الأحاسيس معرفت واش نغير ولا شنو .. قررت باش نرجع بحالي .. طفيت التلفون و غي فقت فالصباح مشيت باش نحاول نغير موعد الطيارة وخلصت الخطية و من بعد يومين عاد نقدر نمشي .. يومين مهدرتش معاه و أكيد غادي يكون كيعيط ولكن التلفون طافي .. دازت هاديك اليومين دغيا .. النهار لي غادي نمشي فيه .. جات خالتي هازة تلفون ديالها .. هاكي أبنتي صاحبتك أمال عيطات ليا راه لقات التلفون ديالك طافي .. جاوبت ألو أمال .. وا فييييين أصاحبتي فين ما مشيتي تابعاك الروينة .. مالك أ أمال ياك لاباس ؟ .. غالي غادي يحماق .. علاش طفيتي التلفون .. صافي مبغيتش نهدر معاه .. وأنا من هنا 3 سوايع عندي الطيارة ومتقوليها لحد .. قاتلي واخة كوني هانية حتا ترجعي وعاودي ليا .. هزيت حوايجي و مشيت المطار .. يالاه غادي ندخل المطار .. وأنا نحس بشي حد شدني .. درت لقيتو غالي .. قتليه أووووووووف أمال لي قالها ليك .. قاليا جيهان تزوجي بيا

يتبع...