نور: تهناي ...ماغاديش توصل، غير اجي انا نسيفط ليك شي واحد يعاونك اوك
غيثة: اهاه اوك 😍
نور: يالاه سيري تنعسي ، نتلاقاو غدا بيزو (قطع وخلاها مبلوكيا عاد ما كيزيد يكمل عليها وهي على سبة ، بقات جالسة ماجاهاش النعاس الليل كامل وهي كتبلاني و تخايل راسها ، ولاكن مالاحضاتش ان لانيف اللي غاتمشي ليه هوا نفس لانيف اللي كانت غتمشي ليه مع حمزة، تلفات وهمها هوا تكون مع نور وصافي وتنشط ، بقات كتفكر فشنو تلبس ومنين غاتجيب الحوايج وشكون يسلفها وطالعة نازلة فريبيرطوار تا نعسات
فاقت فالصباح كاطير واول واحد طاح ليها فبالها هو نور ، كاتبات تحلم بيه وتصبح على صورتو فبالها، مابقات كتفكر فحتى حاجة من غيرو ، طاحت طيحة وحدة وهي كتموت على الزين و الحبة ، الزين لقاتو والحبة غادي تكمل ليها لباقي حيت مزال ماعارفة عليه والو ، ناضت كدوش وتفرك وتعاود فالشومبر مع 8 د الصباح ، ضرباتها الفيقة بكري بحال الدراري الصغار فاش كايقولو ليهم غدا العيد الكسول حتى هوا كيفيق بكري ، وهي عمرها فاقت بلا منخاز وهاد المرة فاقت بلا ماكانة وبلا مايفيقها شي واحد، دوشات وفركات تا ولات كضوي وبردات الدقة اللي فوجها وطلقات داك الصوت كتغني رااشقة ليها ، ومن المواهب اللي عندها هوا الغناء كتعرف تغني والصوت عندها جداب وكيبورش اللحم بلا موسيقى ، جلسات تغني ودندن وتقلب فريبيرطاوار على شي وحدة تعطيها ماتلبس غيثة: (كتغني وتقلب فالتيلي مربعة فوق البياص) كن منصفا يااا سيدي القاااضي ...ياااخونونييي لغتي والفاضي ...ان اللذي امامك الان ...اشبعني ضلما وحرمااااانا ...انا حااالة فعلا لها يرثى ...حتى نسيييييت بانني انثاااا (دخل الطبيب كيفرنس)
بدات غيثة كتغني و تلحن وهي جالسة و الطبيب كيعبر ليها الطونسيون ويدوز ليها الصناطات وهيا كادندن وهوا كيفرنس ، بدل ليها السيروم و كيتسنط ليها تا دخلات الفرملية بالفطرو اللي كيفرقو على المرضى ، وغيثة خدامة كتغني
غيثة: (فاضل شاكر ) ياااا حيااااتي الرووووح ...البي ماداق النوم ولا يوم ولا حرتاااااح ... راح تنسى او تهواني او تلاقيني كلي جراااااح ...
فطرات وعايشة مع الاغنية كتغني والطبيب كيضحك والفرملية تا هيا كيتسنطو واللي داز حدى الشومبر كيوقف يتسنط ، كيسحابهم شي فنانة ناعسة تما ، كل مرة يقول ليها الطبيب غني ليا هادي وغني ليا هادي وهيا كتغني و تقلب فالتيليفون على اللي يعاونها فالحوايج تا دخلات مها وباها وهي تصقل ، شافها باها ماعجبوش الحال وخلا الطبيب تا خرج و بدا يسب وينكر عاوتاني
عبد المالك: فين ما مشيتي دايرة الشوهة الله ينعل والديك ، يخخ على بنت عطاني الله، مشيت ندير ليك شهادة طبية فالمدرسة لقيت ماكاتقراي ما كتزمري ، عمرك دخلتي ...ولاكن عمرك تزطمي تما ، شي قراية ماكتقرايها وماكدخليش ، اللهم تجلسي فالدار تا يجي شي واحد اللي يديك
غيثة: 😢(كتشوف فيه وتبكي فصمت ولات حمرة وتزيرات )
ملاك: (جالسة شادة راسها ) لا حولى ولا قوة الا بالله العلي العضيم
عبد المالك: غادي ندي باباك لشاون ، نتي المدينة ماتصلاحش ليك وماصالحاش ليك القراية؛ كاتمشي غير باش تهربي من الدار ، ولاكن انا غنجلس باباك فيها لا خروج لادروج، انا عند بالي كادخلي قولي نتي كاتمشي تسلكطي مع الزوافرية، راه عاودو ليا كلشي فالادارة، وهاد المسخوطة تا هيا كتستر عليك، غانديكم للشاون ونتهناااا انا فدماغ ديالي ، ونخدم خدمتي فخاطري تا نشد تاقاعد ونرجع للشاون
غيثة كتسمع وكتغدد وكتندب من لداخل وصابرة وكتشوف فيه
عبد المالك: واشوفي فيا 😡 (هز يدو) غادي نصمك باباك تفوووو (دفل عليها) الله ينعلها ترابي فيك ، جالسة ضحكي علينا زعما كتمشي تقراي ، كن متي حسن ونتهنينا فخطرة منك ومن المشاكل ديالك ديما ... (خرج طالع ليه الدم )
يالاه خرج بدات غيثة كتفركل فبلاصتها وضرب راسها وتعض يديها وتنهج تا ولات حمرة كتخرج السم بالضرب فراسها وكتكره باها فاش كيقوليها نديك للشاون حيت عندو تما الدار فالعروبية وكيهددها ديما يدها ويخليها تما ويبقى هوا فتطوان تا يشد تقاعد ، فين ما يقولها هاكاك كتجنن وتبدا ضرب فراسها وماكتقدرش ترد عليه، بقات كتغوت وترد الحر بالعضن فيديها ومها كتبكي وتشد فيها تا تعوجو يديها وصبعانها بالاعصاب و تيليفون كيصوني (نور) مرمي فالفراش حداها دايرة ليه فيبرور ماسمعاتوش وهي كتغوت وتصعر ، عيا يصوني وهي والو ضربو ليها الشوكة باش ترخى ويتطلقو اعصابها وترخات ونعسات، دخل الطبيب كيسول مالها ولقى مها كتبكي وعاودات ليه ، بقات فيه غيثة وبقا كيشوف فيها وهيا يديها مطبعين بالعضان و وجها رضاتو حمر بالتسرفيق و مرمية فوق الباياص حالة فمها وعينيها مدمعين ماحاساش براسها بالشوكة اللي ضربو ليها
بقات معاها مها جالسة تا عيات و مشات خلاتها ناعسة والطبيب وكاع الفرمليات اللي كيدخلو عندها بقات فيهم ، فديك الاثناء دخلو شي اشخاص عندها لاشومبر ، بنت وجوج ولاد ...: حنا من طرف مسيو سقراط
الطبيب: مرحبا ...ولاكن هانتوما كاتشوفو حالتها، موحال تقدر تخرج؟
...: تسناوها تا تفيق ونشوفو
الطبيب: (تنهد) اوك مرحبا
خرج وخلاهم جالسين هضرات معاه البنت وضلات ليه شنو كاين وصوروها كيما هيا سيفطو الصورة ليه حالتها حالة ناعسة والدموع نازلين من الجناب وكتنخصص فالنعاس وجلسو مقبلينها تا فاقت والكعادة اول واحد طاح ليها فالبال هوا نور ، يالاه حلات عينيها بدات تفرنس ، عقل الصغر دغيا كتقلب وتابعا داكشي اللي كترتاح فيه ، بدات كتفرنس و هي فشلانة ماكتقدر حتى تحرك وفمها ناشف بزز باش حركات لسانها ، ضورات وجها لقات الشباب جالسين حداها كيتسناوها تفيق، ضهشرات مافهمات والو تا ناضت البنت عندها وحطات يدعا على جبهتها بقات فيها
البنت: كي بقيتي احبيبة ؟ شوية؟
غيثة: ؟؟؟ (غير كاتشوف مافاهمة والو)
البنت: جينا على قبل لانيف ديال هاد الليلة، سيفطنا عندك مسيو نور
غيثة: 😍😍😍😍 (ترفعات تا لسما ورجعات للارض وناضت باغا تجلس بزز واخا ماقادراش مابغاتش تبين بللي مساليا و ماعندها جهد
غيثة: علاش سافطكم?😄
البنت ههه باش نديوك معانا السهرة، حنا غنتكلفو بيك من مكياجاك و لباسك وكلشي
غيثة: 😲 (اواعدي واش كنحلم؟ مابقيتشي فاهمة والو؟ واش فقت ولا باقي ناعسة؟) اختي واش د بصح كتهضر ؟
البنت: ههه بصح، تقدري تنوضي؟
غثية: اه (نوض بزز مني واخا نكون كنموت)
ناضت جلسات وخلاوها تا كلات شوية وغسلات وجها وهي فرحانة مرفوعة ، ضربات 7 دالعشية ، وعيطات مها للطبيب طمأنهنا عليها باش ماتجيش ، وجلسات غيثة والفرحة فعينيها نسات كلشي وكتسنى الوقت اللي تلاقا فيه بنور وتجرب السهر ولاول مرة تسهر بالليل ، الفرحة اللي فرحانة عمرها حسات بيها حيت غتجرب الخروج دالليل اللي كتسمع عليه البنات كايعاودو و الزديح والرديح والبنات والولاد والحيحة وهي كتموت على داكشي بمجرد ماكتسمع عليه، كتسنى بفارغ الصبر امتى توصل
طلعوها فاللوطو ورشات ليها البنت بارفان وغيثة غير كتشوف فجنابها غاتسطى ونطالقو فالطريق وهي كترعد بالفرحة غير كتشوف وترمش ...
الطريق كاملة وهي فرحانة تا دخلو لطنجة واول مرة تركب فكاط كاط وتعيش هادشي وهي ماعمرها تا شافتو مباشرة تطبق عليها دقة وحدة ، الطوموبيل كتمشى فشوارع طنجة وغيثة قابها غيسكت وعينيها مغرغرين بالفرحة تا وقفات الطوموبية فالباب ديال الاوطيل غيثة: 😍😍 (اوااااحعدي يانا على طوموبلات كي دايرين وعلى اوتيل كيف عامل 😍)
شافت الطونوبيلات مصافين حدا الباب الرءيسي غير الحديد الواعر ، الجاgوار والفيراري ومازيراتي ...الحديد اللي عمرها شافتو فالتلفازة شافتو مسطاسيوني قدام عينيها ، تا طونوبيل عادية ما واقفة تما ، بقات مخؤجا عينيها وفمها محلول وكانشوف فالناس نازلين من الطونوبيلات و الدراري والرجال بالكوستيمات والنساء بأبهى حلة ، كاتشوف فليكوبل داخلين غير شكون وشكون وهي مصمكة حاللة فيهم فمها
البنت: يالاه نزلي هههه
غيثة: ها!!!!!😮 (دارت بيها الدنيا)
شداتها البنت من يدها نزلاتها وهي كتقفقف بالبرد واخا مخشية فالفيرور دخلاتها للاوطيل ، وهي داخلة كاتشوف فجنابها وفالسقف وحاللة فمها فالناس فاللي داخل واللي خارج وليكارد مورد معمرين المكان والنوضفين كيستقبلو فالناس اللي داخلين باللباس رسمي ، داتها البنت للاسانسور طلعو الفوق وغيثة كاتشوف فالمراية ماقدراش تجمع الضحكة تا وصلو وتحل الباب للطابق الاخير وخرجو غادين فاتجاه القاعة فين كاينة الحفلة وهي تشوف نور جاي جيهتها زربان وشاد تيلي كيكتب فيه مي ماشافهاش
بقات متبعا ليه لعين تا دخل للقاعة وبقات هي مبندة كتسنى نور ودافعة كبير زعما حتا هي من الناس الالبة ، اللي زوين فيها ماكتحشمش راسها وكادير راسها من المستوى ديال الالبة وكتقلدهم فحركاتهم وضحكتهم وجلستهم باش ماتبانش قل منهم وعندها مع البروطوكول حيت داكشي اللي كتقيل مقابلة النهار ومطال وكتبان على صحاباتها ودابا لقات مابغات وطلقات العنان للعياقة التبجاق واخا ماتكساب ما تعلام اللي شافها يقول هادي بنت الرءيس .بقات حاضيا بنادم تا رجع عندها نور شافتو جاي وقفات وحشمانة من التفزيبة اللي ضاربة وهوا عندو عادي كيشوف البنات فالبحر بلا سوتيامات كاع،
نور: يالاه مشينا 😃
غيثة: 😍
شد ليها فيدها وغادة كفرفر وتعوج فالمشيا والبنات اللي عينيهم فنور كيخنززو فيها وهي عاجبها الحال لاسقة فيه لسقة خايفاه يطير حيت بوكوص وفرحانة حيت كلشي حاضيها تا دخلو القاعة كانت مضلمة شوية فيها اضواء رمنسية مطلق الوان مختلفة وفوطويات بالطبلات معمرين القاعة بحال شي بواط دو نوي وزديح والرديخ شي كيشطح شي جالس كلشي مبعكك وهي غير شافت داكشي خرجو عينيها تاضربو فالحيط ورجعو، كل واحد فاش ملهي وكل كليكة مجمعة فقنت والصداع ديال الديدجي والحيحة نايضة
بقات مبلقة عينيها ونور غادي بيها تا جلسها فبلاصة v i p الطبلة الرءيسية جلسة ومع فليبواط ماكاتكونش الهضرة بزاف كيكون كلشي مستمتع بالجو والزديح كيهلي بنادم يتحرك لزز منو بقات جالسة ماقاداها فرحة غير حالة فمها ونور جلس حداها ، كانت الطبلة خاوية جلسو غير هنا بجوج وتكا حداها نور مسرح عينيه فالاجواء و هوا يقرب لودنها يهضر معاهانور: تشربي شي حاجة ؟🎵🎶🎶 (الصداع دالموسيقى)
غيثة: اللي بغيتي 😄😁🎶🎶🎵🎵🎵
كانت الطبلة عامرة بالفواكه الجافة والديسير مقطع فطبيسلات والشامبانية قد غيثة فالطول محطوطة وسط واحد البانيو ديال الزاج عامر بالثلج ودايرين بيها القراعي ديال الشراب اشكال وانواع وسط الثلج و السربايا واقفين على نور حلو ليه القرعة دالويسكي وعمرو ليه الكاس وطلب لغيثة باناشي جابوه ليها ، واخا محطوط قدامها الديسير وتلفواكه جافة مامداتش يديها ليهم بالعياقة والنفخة ، بقاو جالسين و كيشوف فيها ويضحك معاها تا دخلات بنت زعرة وشعرها طويل كتقلب بعينيها لابسة كسوة زرقة معرية و دايرة فيست بيضاء من الفوق وشعؤها بوكلي وعينين رماضيين وبشرة بيضاء...شافتهم ومشات عندهم نيشان وقفات عليهم ، غيثة شافتها بقات غير كتشوف ونور دار يدو مور ضهر غيثة
نور: (الحوار بالانجليزية) مرحبا ...على السلامة عاد وصلتي؟
...: هههه نور فين ما مشيتي ماكتبقاش بلاش (تحنات سلمات عليه من لابيز وسلمات حتى على غيثة ، غيثة كتسمع وماكتفهم والو وعجبها الحال فاش عنقها نور وجلسات معاهم البنت كتشوف فيهم وكضحك
نور : غيثة ...هادي بنت حبيبو فرنسا ميساء
غيثة:(شافت فيها وضحكات) 😄 متشرفين
ميساء : ؟؟؟
نور: قاتلك متشرفين
ميساء: اااه ههه متشرفين احبيبة
نور: هههه غنولي مطرجيم انا هنا ، قتلك متشرفة حتى هيا...ا حبيبا ههههه
غيثة: 😄😄 (فرحات )
بقاو جالسين وميساء كل شوية تشوف فيهم وضحك مع غيثة فاش كيتلقاو العينين، ميساء كتشرب هي ونور و جبدات كارو طويل ورقيق من بواطة مدهبة عندها وحطاتو فمها وشعل ليها نور البريكة ، هادو حركات الناس اللي لاباس عليهم هاكا كيتعاملو مع الجنس اللطيف بقات هيا وياه وغيثة عاجبها داك الهيت غير كتشوف تا وقفات عليهم وحدة اخرى كتفرنس بالشعر اسود طويل وعينين رماديين تاهيا والفم مطراسي وفورمة حوتة ولاغوب عريانة من الضهر كلها محجرة بالدهبي وقصيرة فوق الركبة ودايرة تاج دهبي صغير وهازة بوكي د فلور احمر فيدها وليزاكسيسوار والطالون جات جلسات نيشان حدا غيثة فالفوطوي بلا متحاشيها لشيواحد وهزات الكاس كتشرب وتشطح فبلاصتها شافتها غيثة بقات مصدومة حيت ديجا شافتها فالمجلة، تقلب نور عند غيثة كيهضر فودنها باش تسمعو
غيثة: 😍😍😍😍 (اوعدي انا جالسة وسط هاد الناس اللي لاباس عليهم وهاد البنت اللي كنشوفها غير فالمجلات😍😍 على زهر عندي 💓)
غيثة تصمكات تصميكة مصمكة بقات غير كتشوف فيهم باعجاب وطلع وتهبط فيهم ودور كل شوية تشوف فنور مامتيقاش راسها ، اما هما كاع ممسوقين للعالم ..نور شاد تيلي كيخربق فيه وغيثة حاضياه شكايدير وميساء و وعد مرة يجبدو تيلي مرة يعزو راسهم يشطحو وهما جالسين، وكل شوية كايجي شي واحد كيعطي الور لوعد ويبارك ليها ، شوية تم جاي الشاب اللي داز من قدامها قبيلة وشاد فوحدة آجي وطويلة وعامرة بحال شكل هيفاء وهبي وشعرها كحل بوكلي وعوينات رمادين ولابسة الاسود كسوة لاسقة طويلة تا للارض مغطية شوية من السدر والضهر عريان والفتحة فالجنب وشاد ليها فيدها وجايبها معاه تا جلسها حداهم وبقا واقف كيشوف فغيثة بنص عين بحال الى كيتأكد و حط السيgار فمو و ودار حركة بالبريكة شعلو بيها وكيحرك راسو ويفرنس ويشوفيها
غيثة كضحك هي و نور تا هزات راسها حاللة فمها اللي اصلا ماتسدش مللي دخلات...غيثة: 😍 (هادا اللي داز حدايا قبايلة ، مزويين كيحمق )
هوا واقف مسرح عينيه فالناس وكيضخك بوحدو ورجع جلس حداهم جيهت ميساء وكل شوية يشوف فغيثة وكيضخك باستهزاء
نور: (ضار عند غيثة)هادي الواليدة مروى وهاداك اخي العزيز حشاك ع.. (قاطعاتو*
غيثة: هاديك ماماك😱 مابايناش عليها 😍 كتشبه الهيفاء
نور: هههه فالفورمة اما الوجه لا ، تاهي كانت بحالك فاش كانت صغيرة وصغيرة على هيفاء ، واش عارفة هيفاء شحال فعمرها؟ راه شبعانة عمليات التجميل
غيثة: ماماك فنة ، كتشبهو ليها😍
نور: لا ههه كنشبهو ليها فالعينين اما انا كنشبه للواليد ، راه اللي كيشبه ليها (نعت ليها بصبعو)
غيثة: خوك هادا 😄
نور: توام هوا وعد
غيثة: شكون لكبير فيكم 😄
نور: هوا كبر مني ب 3 سنين
غيثة: (غتعواج بالفرحة) ههه كتبانو قد قد
نور: طلعنا للواليد تاهوا طويل وعامر
في جهة اخرى ضارت ميساء
ميساء: عهد؟ مالك كتفرنس بوحدك؟
عهد: (ضار شاف فيها) نفختي شفايفك؟؟
ميساء: 😳 ماكتزكل تاحاجة يا ربي السلامة (كتكمي وتهضر)
ميساء : هاهاها ، مالك هاكا مالك؟ اففف كتعصبني ، ماعرفت كي غندير معاك!
وعد: فين بابا مالو ماجاش؟
مروى: دابا يجي ، تاتبغي تقطعي لاطارط ويجي
وعد: افففف ...تعطل
غيثة كاتشوف فيهم كل واحد معامن كيهضر وهي ماكاتفهم والو غير كتشوف فيهم ، جاها داكشي غريب كيفاش كيكميو ويشربو قدام مهم وميساء تاهيا و وعد مرة مرة كتهز كارو قدام خوتها
مروى: شكون هاد البنت اللي مع نور ؟
وعد: ماعرت خليني (مشطونة كتسنى باها)
مروى: كحزي نجلس حداه
ناضاطت وعد جلسات فالطرف ومروى حدا نور شافها نايضة تجلس حداه وشد ليها فيدها بطريقة راقية خلات غيثة غير كتشوف وجلسها حداه ودار يدو موراها باسعا فحنكها
مروى: شكون هاد البنت، (كتشووف فيها) باينة فيها صغيرة
نور: آمي ديالي الواليدة ، سي باقة صغيرة بزااف مي زويونة
مروى: حتى انا احبيبة مغربية ، نور فين تعرفتي عليها؟
قلبوها دارجة بيناتهم وعهد وميساء و وعد ما كيقفلو تا لعبة ما كيفهموهاش اصلا ، عهد كيشوف فيهم كيضحكو و معبس حيت مكيفهمش وبغا يفهم و غيثة مزال ماعرفات سميتو يالاه عرفات بللي خوه والاهتمام ديال نور دوخها غير كتشوف فيه مزعوطة
نور: الى قلت ليك مني جبتها غاتجري عليا هههه
مروى: ههه منين جبتيها؟ نور: من الكلينيك، تلاقيتها تما فاش دينا الميمة للكلينيك، راه غاتسالي الحفلة نرضها للكلينيك حيت مريضة
بدات كتشطح على الغربي ودور على راسها وتكسول غير بشوية شطيح انثوي وتحرك كتافها وخصرها مع الموسيقى ونور واقف كيتحرك بشوية معاها وكيسد عينيه غادي مع الموسيقى وهيا كادور كتعطيه بالضهر كيعنقها ويشطح معاها وترجع الضور ويشد ليها فيدها وهيا عاجبها راسها كتزيد تقرب ليه كتر ودير حركات ونضرة مغرية وكتعض فشيفايفها ، مروى كاتشوف فيهم وكتبتاسم وعهد شاد تيلي فيدو دخل ديبلوكاها من الفايسبوك و رجع قرى الكونفيرساسيون ديالهم و كيهز عينيه يشوف فيها ويرجع يقرى عاود تا ناضت عندو مو نوضاتو صحة يشطح معاها ، يالاه ناضو تبدلات الاغنية وطلقو اغنية هادءة كلاسيكية، تعنقو بداو كيتحركو على انغام الموسيقى وعهد ساد عينيه وحاط جبهتو على جبهت ماماها وهيا فرحانة بيه وكدوز يدها على عنقو لانه هوا اقرب واحد ليها و كيحماق عليها، كذلك نور وغيثة نفس الشىء كيشطحو فهدوء تا واحد اللحضة وقف نور وجر مو عندو يشطح معاها وعهد جر غيثة عندو وغيثة مافاهمة والو تا لقات راسها بين يدين عهد تلاسقو الاجساد و شادها بيديه بجوج من خصرها وهيا حاطة يديها على صدرو و هي كترعد فبلاصتها تلفات ليها الشطحة وهوا كيحركها ويمشيها
غيثة:(اوعدي شنو كنعمل انا،خدامة نشطح مع هادا و غنخسر نور😟 اففف فوقاش نجلسو حسن ولا نشطح مع نور )عهد: (بقا ليا غير الشطيح مع البراهش ، اففف)
كيشطحو وكل واحد فين قالب وجهو وغيثة كتشوف فنور ماحيداتش عينيها عليه ومارتاحتش فالشطحة مع عهد وهوا ماكيشوفش جيهتها كاع قالب وجهو للجهة الاخرى وجبهتها يالاه واصلة لفمو وهوا هاز راسو وراسها تحت الفك ديالو بقات هاكاك والموسيقى كاتجيب النعاس تا نسات راسها وحطات وحطاتو على سدرو وغمضات عينيها ومشاات ، حس بيها ويغا يهبط راسو ماصلاحش ليه ، بقا هاكاك معلق هاز راسو لفوق تا غمض عينيه ومشا مع الموسيقى ، ترخاو مع الجو تا داز الوقت والاغنية كانت طويييلة ،جلسات مروى ونور و كايشوفو ف فعهد و ميساء بغات تنوض تشطح معاه وجراتها مروى ماخلاتهاش تفيقهم وبقاو جالسين مجمعين
مروى: بقات فيا مسكينة، باقا صغيرة وهازة الهم من دابا
نور: اودي ...هزيت معاها الهم تا انا والله ، بقات فيا ، كن شفتي حالتها كي كانت فاش تلتقيتها مسكينة فالجردة مكمشة كتبكي والشوكة فيدها ومعنقة السيروم تبقا فيك (جبد التيلي والصورة اللي سيفطو ليه فاش صوروها فالكلينيك مرمية على البياص و راها لمو) شوفي حالتها
مروى: (شدات تيلي) 😱 مسكييينة! ويلي وجها كي كان؟
نور: باقي هاكاك غير مضرق بالمكياج، داكشي علاش جبتها تبدل الجو وراها باقة مريضة و عيانة
مروى: باينة فيها، نعساات عند عهد ! (كيشوفو فيهم)
نور: لعجب ليه تا هوا شتو داه النعاس!
مروى: ميك عليه راه عيان جبتو غير بزز، بلا ماتنوضو تناكرو ليا عاوتاني ، كن ماكانش لانيف ديالي معاهم ماكانش غيبغي يجي ليا ، اما هوا ممسوقش لا لانيف لا والو
نور: وصافي ونتي كادافعي عليه بحال الى عندك غير هوا
مروى: وراك احبيبي عارف طبعو كي داير كفس من باك ، باباك كنلقى معاه السلاك وهادا لا داكشي علاش كندير ليه الخاطر
نور: تاهوا عارف طبعي كي داير ، يبعد مني نبعد منو
مروى: خليو هاد السهرة دوز على خير ، غاترونو ليا لانيف ديالي والله لا باقي هضرت مع شي واحد فيكم 😠
نور: واايلي الواليدة مالكي تعصبتي دغيا ، راه غير داويين (عنقها)
عنقها كيراضيها كي ديما ماكيقدروش يخصرو ليها الخاطر ، اما غيثة وعهد باقين ناعسين مع الموسيقى تا سالات عاد حل عهد عينيه لقاها معنقاه ووحيد ليها يديها عاد حلات عينيها مدوخة لان الدواء اللي كتشرب ديما كيدير ليها تأثير دالنعاس فهاد الوقت وبقا المفعول ديالو شاد فيها داكشي علاش ترخات هزات راسها لقات نور جالس و مو وهيا تبعد على عهد ، سمح فيها واقفة ومشا جلس وهي دايخة رجعات الطبلة دارت ليها مروى بلاصة حدى نور وجلسات كتشوف بنص عين فعهد حشمات ، دؤعها نور بيدو وحط راسها على كتفو وهي ترجع ليها الضحكة
غيثة: 😍 (صافي وليت كنبغي نور ، كنحس بقلبي كيزدح وحتى هوا يمكن كيحس بحالي )
الاهتمام دنور خلى غيثة تبغيه زيادة على انه زوين ولات كتبغيه وفكل د جيست دارو معاها زوين كيخليها تعلق بيه كثر ، جات وعد كتعوج جلسات حداهم
وعد: دودو ،فين الكادو ديالي؟
عهد: غنضرب ديلمك الى عاودتي قلتي دودو سمعتي ، وبربي وعاودت سمعتك قلتيها تا نفرشخ ديلمك وكاين الزبل ماشي الكادو
مروى: شحال من مرة كنقولك ماتبقايش تعيطي ليه هاكاك، 😡
غيثة كتشوف فيهم كيتغاوتو بيناتهم مافهمات والو حشمات بلاصتهم وعهد كيشكش ماكيهمو تاواحد اللي بغا يسمع يسمع وجاب الله الموسقى مجهدة والحوار غير بناتهم
وعد: نور ونتا شنو جبتي ليا؟ 😔
نور: من بعد 😉
وعد: ميساء فين الكادو؟
ميساء: منقردش ننساك ابب 😄 جبدات الكادو مغلف عطاتو ليها قدامهم غيثة شافت الكادو وهي تزير حيت جايا بلا كادو وميساء غارت منها فاش شطحات مع عهد وبغات تجبدها
ميساء: جات نوبت حبيبت القلب نشوفو دوقها؟
نور: من بعد حيت الكادو بقا فالطوموبيل
غيثة حسات بشي حاجة وعرفاتهم كيهضرو عليها حيت كيشوفو فيها كاملين واخا مافهماتش وهي تقول لنور
غيثة: نور عطيني الميكرو
نور: علاش
غيثة: غنهدي لختك اغنية حيت ماجبتش معايا الكادو
نور: وااايلي، غتغني ؟
غيثة: اه 😄
شير بصبعو لواحد جا هضؤ ليه فودنو ومشا جاب ليه الميكرو وعطاه لغيثة وبقاو كيشوفو فيها شنو بغات دير وعهد عاقد شوكتو وقالب وجهو شاد السيكار و معبس تا تقطعات الموسيقى فمرة وبقا شي كيشوف فشي مافهموش شنو واقع وطفى الضوء فخطرة ووجهو ليها الضوء غير هي بوحدها جالسة وشادة الميكرو....
بعد ماوجهو الضوء وهيا جالسة بين مروى ونور الوسط طلقات سوتها ولدات كتغني بالاسبانية اغنية جد جد هادءة ورمانسية بلا موسيقى بلا حتى حاجة ، فقط بصوتها وغمضات عينيها وبقات كتغني بكل احاسيسها تا كلشي وقف كيطلو عليها ملي سمعو صوتها العذب الحنين الرقيق والطفولي ، بقا نور مخرج عينيه مصدوم ومروى كضحك عجباتها و وعد بقات غير كتشوف هي وميساء اما عهد كان قالب وجهو تا طاح ليه الصوت فودنو ودور وجهو جيهتا بشوييية مستغرب وكيشوف فيها وهيا سافرات مع الاغنية وسادة عينيها وكتعبر بملامحها وحجبانها ، فلحضة تطلق معاها صوت البيانو ساعدها ومشات كتغني باحاسيسها وصوتها سكت كلشي خلاهم كيتمايلو فبلايصهم و العشاق كيتباوسو واللي كيبغي شي وحدة عنقها واللي عينو فشي وحدة راه كيشوف فيها واللي عينها فشي واحد راه تغرغرو عينيها ، غيثة كتغني بالاسبانية لانها كتعرف ليها بحم انها من مدينة تطوان لهجتهم مخلطة بالاسبانية وكيفهموها واغلبيتهم كيهضرو بيها (تحية لناس تطوان) ، فجو رمانسي واضواء خافتة كلشي هز شمع شمعة وسط الضلام فكاع الحضور اللي حاضرين وخلقو جو راءع تحت انغام البيانو والصوت الجذاب ديال غيثة وهي كتغني ، كلشي فهم كلمات الاغنية واثرات عليهم خلاتهم ساهيين واللي عندو شي ذكريات رجع ذكرهم ومنهم مروى اللي سهات وشادة فيد نور وهو كيتسنط وكيبتاسم وكيشوف فيها ، اما عهد سهى فواحد الكاس قدامو وكل شوية يهز عينو فيها بشوية ويرجع يسها فالكاسغيثة: regàlame tu risa
(اعطيني ضحكتك هذية )
Enseñame a soñar ...
(علمني ان احلم مع عناق ).(.التتمة استمعو الى الاغنية في الصورة )
Y tú , y tú , y tú y solamente tú
(و انت ، و انت ، وانت وفقط انت...التتمة في الاغنية)
حتى سالات الاغنية بطريقة جمييلة وصوت البيانو كينقص وغيثة كتخفض صوتها تا سكتات وحلات عينيها
غيثة: !! (اوعدي حشمت 😳 كلشي كيشوف فيا ، شنو عملت وااعدي يانا على فضيحة 😳)
تزيرات تا بدا نور كيسفق هوا الاول تسفيقات متفرقة وتبعاتو مروى وموراها وعد فرحانين وتبعهم الحضور و الفرقة الموسيقية وملشي كيسفق عليها وهيا مزنكة عاد هز عهد يديه كيسفق كيدير صواب وصافي حيت بقا بوحدو كيشوف فيها وهي فاش شافتو كيشوف فيها بطريقة متكبرة زادت تحرجات وبقات كدور فعينيها تا عنقها نور بيدو وكيضخك
غيثة: (شافت فيه ) 😍 ههه شكرا 😄 (باستو فحنكو بلا متشعر وكضحك ونور رد ليها البوسة لحنكها وكيعنق فيها وهي حشمانة قدامهوم وكل شوية دور جيهت عهد كتشوف فالشوفت ديالو اللي معبس كيحرجوها
مروى: 😍 براااااافووووووو 👏
وعد: ميرسي بب (باستها فحنكها)
غيثة داخت لقات الاهتمام تا شاط عليها تلفات غير كدور فعينيها والقلب كيرفرف 💓
ميساء: برافو (ضحكة صفرة)
غيثة وسطهم غاطير او بالاحرى طارت وعهد ناض عهد قاتلو العكز جلس حدا مو فوق السد ديال الفوطوي وجرها عندو وتكلقات الموسيقى والزديح من جديد
فهاد الصفحة كاين الجزء الثالث للقصة , إلا كنتي كاتقلب(ي) على الفصل الثالث (الموسم الثالث) شوف(ي) أنا أحترق الفصل الثالث
أنا أحترق الجزء الثالث
محتوى القصة
التنقل بين الأجزاء