قصتي مع آية الجزء الرابع

دازو شي ثواني وجاوباتني هدى : اه فهمت احسين مي را شحال من واحد قبلك حاولو يتقربو منها ولكن بلا فايدة شوف را اية انا لكنعرفها معدهاش مع داكشي وراك كتشوف حالتها درية وحدانية وكتبغي العزلة طاح عليا هاد الميساج بحال شي قنبلة نووية جربتها امريكا فقلبي ووصل صدا ديالها تالدماغي وجميع اجزائي قلت مع راسي نستسلم ونرد عليها بأني تفهمت ونطلب منها تسمح ليا ونسى داك الموضوع مي شي حاجة لداخل ديالي كتزعمني باش نقنع هدى بلي انا ماشي بحال دراري لخرين وبلي حبي خالص لأية وكنبغيها من قلبي مهم هي هاديك حاولت نقنعها وزعمت وقلت ليها بلي كنبغيها من البدية دالعام غي مزعمتش نقول لها شي حاجة وبلي انا مبغيتش نستاغلها ولا نضحك عليها وبعد حديث طال لساعات طويلة قررات هدى تعطي ليا الكونط ديالها مي قالت ليا منقولش لها بلي هي لعطاتو ليا ونقلب على شي كذبة خرا وخا ايكون صعيب عليا نكدب على اية مي ضروري باش نكمل معها ونوصل لداكشي ليبغيت ماعليناش مصبرت تا دقيقة خرا مشيت ديريكت دخلت لبروفايل ديالها وليقتو فشكل صراحة داكشي لزاد خوفني وزاد شجعني نعرف مالها هاد البنت .. لقيت اخوتي تصويرة دبروفايل ديالها فيها واحد البنت شعرها مشعكك وحادرة راسها ودم كيسيل من عينيها وهازا واحد نونوس فيديها لونو كحل وعينيه حمرين وصورة كتبان بحالاا قديمة شويا مهم ستايل ديال رعب ماعليناش سيفط ليها انفيت وقلت مع راسي اتعرفني وغتقبل ضغيا مي للأسف دازت نص ساعة مقبلااتش صبرت ساعة وحدا خرا مقبلاتش فقدت شويا دالأمل وكنصبر راسي "غي مداخلاش .. يمكن مشفتهاش . يمكن ناعسة وكتحل غا فليل .. " ماعليش اخوتي شفت فساعة لقيت 17:45 نضت هزيت ليكيت درتهم وخرجت نضور مع عشيري تسركلنا شويا وحاولت نسا موضوع اية وخا غا مؤقتا مهم ضحكنا وتسركلنا ومبغيتش نهضر فداك الموضوع مع عشيري وخا انا باغي نخوي قلبي على شيواحد ولكن هذا ماشي الوقت المناسب خلي تالشي نهار اخر ونعاود ليه حيت مكنخبي عليه والو ماعليناش رجعت غا وصلت لدار دخلت ثاني لفايسبوك دخلت ضغيا لإشعارات مي مرة خرا لقيت اية مقبلااتنيش وقلت مع راسي هانية دبا تقبل مشيت صليت تفرجت فتلفازة تا طاب العشا وقصيت ومشيت لبيتي هزيت تاني طيلي دخلت لقيت اية قبلااتني متصوروش شحال فرحت قلبي كان كيطير بالفرحة دخلت سيفط ليها سلام لقيتها اون لاين جاوباتني وبقينا داويين عادي وانا كل مرة كنطرح عليها شي سؤال باش نتعرف عليها كثر وفغيمون اية دخلاات ليا لخاطري وخا هي وحدانية فالواقع مي ففايسبوك هضرات معيا ومحاولاتش تهرب مني مهم بقينا هكاك كنهضرو غا ففايسبوك ومبقيتش كنهضر معها فلايف حيت هي طلبات مني منبقاش نهضر معها فالمدرسة ولا فطريق وانا خليتها على خاطرها وخا كنشوفها يوميا فالمدرسة مي مكنهضرش معها كنشوف فيها وصاف ماعليناش بقينا على نفس الحالة شي شهر تقريبا وحنا كنهضرو غا فطيلي وفهاد المدة تعرفت عليها كثر ولكن الحاجة لكانت فدماغي باقا فيه ومزال ملقيت لها سؤال علاش اية كتبان ديما خايفة ومنعزلة عن المجتمع ؟ مهم واحد نهار فليل كنت كنهضر معها وقلت ليها بلي غدا غتعطيني شويا من وقتها فإستراحة باش نهضر معها فموضوع مهم ومقلتش ليها اشمن موضوع حيت خفت يلاا قلتلها الموضوع متبغيش تهضر فيه مهم وفقات بصعوبة مي حمد الله قدرت نقنعها فلخر وفرحت حيت لغد ليه غنتعرف على سر لمخبياه هاد البنت وتانتا غتعرف عليه...