قصتي مع آية الجزء السادس

هادشي لغنعاود لك كيوقع غي فالأفلام نصاب كون غي كان فيلم احسين انا ملي كنت صغيرة خوتي كانو كيضربوني وكيتكرفسو عليا وكيسفطوني لديور باش نخدم عليهم وانا كنت باقا صغيرة وكيسيفطوني باش نخدم خدامة فديور دعيباد الله وواحد لمرة سيفطوني لكازا باش نخدم عند واحد المرا كيعرفها خويا لكبير مرا كبيرة فالعمر ومزوجة ولكن معندهاش لولاد انا مكنتش باغا نمشي مي سيفطوني بزز مني وخرجوني من قرايتي وبا مكانش معنا كان فمدينة خرا بحكم انو كينتاقل بزاف ومي ماتت وهو كل سيمانة كيتاصل بخويا باش يطمأن علينا ولكن خويا كان ديما كيكدب عليه مهم احسين سيفطوني لكازا وانا باقا صغيرة ومعارفة والو وكانت هاديك اول مرة نخرج فيها من مدينتي. خدمت عند ديك المرا شهر وكانت كتعاملني معاملة الحيوان كنت كنعس فالكوزينة وكنأكل شياطة ويلاا غي تعطت عليها كانت كتعطيني قتلة ديال العصا وكتسب ليا مي وخا هي عارفة بلي انا يتيمة وكتعدا عليا وانا مكناخد والو كل شهر كتسيفط لفلوس لخويا وهو عمرو سولو عليا ولاا جا يشوفني كيفاش عايشة وكيفاش كتعاملني وكنت ديما كنقول ليها لالة وكنحاول نديرها بحال مي وخا هي كضربني ومخلاات مدارت ليا ولكن مرة مرة كنبقا فيها وكتخوي عليا قلبها وكتعاود ليا بلي تاهي عاشت شحال من حاجة وبلي راجلها كيعاملها معاملة خشنة شويا حيت مقدراتش تولد ليه وهوا ديما كيفكرها فداكشي وكيعدبها نفسيا .وراجلها سميتو "عمر" وتاهوا كيعاملني معاملة حيوانية مخلاا ماقال ليا وكيسبني وكيدير فيا شي شوفات وديما كيضيقني ولكن مبغيتش نقولها لمراتو حيت يلاا قلتها غاتقول ليا بلي انا لبغيت نتقرب منو وخا انا بقا صغيرة مي دوك ناس احسين مكيعرفوش لصغير ولي كبير قالتها وزادت بكات وسكتات وباقا كتبكي بجهد (هنا عرفت بلي داك سيد دار ليها شي حاجة لخلااتها توصل لهاد الحالة نفسية وتعقد فحياتها ) حاولت نواسيها ونقص من ثوثر لفيها ودرت يدي فوجها بلا منحس ومسحت ليها دموعها وقلت ليها كملي اية عاودي ليا عتابرني بحال باك مغنقولش لك بحال خوك حيت هداك وحش ماشي انسان ... قالت ليا غنعاودلك احسين حيت وخا مكنهضروش بزاف مي نتا انسان ضريف وعارفاك كتبغيني را من الأول دالعام وانا كنشوفك كتقرب مني مي انا حسين منستاهلكش انا حسين مبقيتش بنت انا حسين ضيعو ليا مستقبلي (طاحو عليا هاد الكلمات بحال شي صاعقة غير محدودة القوة تجمدت وانا كنشوفها كتبكي وهاد الجملة لقالتها باقا ليومنا هدا كتردد ليا فودنيا ) قلت ليها عاودي ليا ا اية اشدارو لك ؟ حاولات تمسح دموعها وقالت ليا فواحد نهار كانت المرا لخدامة عدها خارجة مشات عند صحباتها وخلااتني فدار كندير شغالاتي ومع 12:00 دخل راجلها "عمر" ولقها مكيناش فدار وجا عندي لكوزينة وبدا كيضحك وكيبتاسم وقاليا واش نتي بقا مقابلة لكوزينة ؟ مرديتش عليه وحدرت عينيا وهو جا تقرب مني ودار عليا يديه وحيدت ايديه وقلتلو بعد مني وهو مبغاش يبعد وبدا كيضحك ودار يديه فوجهي مرة خرا وحيدت ليه يديه تاني وقلتلو ياغاتبعد مني يا غنعاود كلشي لمراتك تعصب وشدني من شعري وانا كنغوث دخلني لبيت ولااحني فوق ناموسية وبدا كيضرب فيا وانا كنغوث وقطع عليا حوايجي احسين و. و... اية سكتات وبدات كتبكي وانا فهمت البلان فهمت بلي داك ولد الحرام تعدا عليها وغتاصبها اشمن نوع ديال الحيوانات هدا اشمن نوع ديال البشر يقدر يتعدا على درية صغيرة ويتيمة ..وتيقو بيا هادي اول مرة تبكين درية هبطات دمعة من عيني بلا منحس وكحزت عند اية وعنقتها وقلت لها الله ياخد فيهم الحق صاف ا اية قدر الله ماشاء فعل وهانتي را باقا الحياة طويلة قدامك مسحي دموعك وديها فقرايتك وانا حداك وان شاء الله يكون خير