أنا أحترق الجزء 44

من تأليف Ghazal trust
2017

محتوى القصة

رواية أنا احترق ل Ghazal trust الفصل الثالث

طلعات غيثة لبيت اللي نقشات فيه لقاو الحنة باقة فبلاصتها هي والشوكة ديالها وجلسو فالارض وهزات الزلافة حطاتها قدامها وهزات الشوكة بدات كتخطط وتزوق لميساء وميساء فرحانة نقشات 
غيثة: نكتب ليك السمية دنور؟
ميساء: ههه اه اه كتبيها ليا
غيثة: واخا ، غندير ليك واحد الزواقة مزييييونة 
خرمزات ليها يديها وكتبات ليها سمية دنور بالعربية ودارت ليها القلوبة والورد وجمعات وطوات
ميساء: ههه شكرا
غيثة: شتي ...جاتك فننة ...يالاه نهبطو 
ميساء: ااه عرفتي شنو...انا قلت لنور يجيب ليا بحااااال طوموبيلتك
غيثة خرجو عينيها وكمشات وجها 
غيثة: شنييي....علااااش ؟ دابا تينا وانا غيكونو عندنا نفس الطوموبيرات !!! لالا قولو يشري ليك شي طوموبير اخرى
ميساء: لا ...بحال ديالك...انا عجباتني 
غيثة : اففف قولو بعدا يشري لك وحدا فشي لون اخر
ميساء: نو بب صافي دابا شرااها ليا وغيديوها ليا لندن ماشي لهنا
غيثة: بالزعفة) ايوا سميها تا تينا صوفيا
ميساء: نو بلاش سميهم غير نتي
غيثة: صافي انا مابقاش عاجبني داك اللون ..عنقولو يبدل ليا اللون
ميساء: اللي بغيتي...مهم يالاه نهبطو 
نزلو بجوج وميساء فرحانة غادية وهازة يديها تا وصلات عند نور شافها وهوا يتخلع
نور: اش هادشي؟
ميساء: زواق...شوف سميتك فين كتبتها
نور: هادا زواق هادا؟ هادا راه الجدول الضرب اللي دايرة هنايا!!!
ميساء: بحزن) يااك..واخا شكرا
بغات تمشي وهوا يجرها عنقها 
نور: شوو صافي ...ماكنتش عارف ماين بحال الزواق داكشي علاش ...جاك زوين احبيبة 
شافت فيه بحزن و نسات راسها وعنقاتو بالحنة طلات ليه الجبادو كاملة من الضهر وسخاتها وتجلخات ليها فيديها وهي تحل عينيها على كبرهم
ميساء: ويييلي تخسرات ليها!!
نور: وراه مسحتيها فيا...بففف اميساء شوفي كي رجعتيني ، سيري غسلي يديك دابا انا غنطلع نبدل هاد الحالة
مشا بدل حوايجو ورجعو دوزو العشية مجموعين طانزين على نضال والكرشة اللي كلا ، واها عافها جاتو بنينة و خلاهم طانزين عليه ، الليل كامل وهما برى فنفس البلاصة مع الشواية وقطبان اللحم والضحك والنشاط بينما كانت اعين ترااغلى شرفة البيت اعين تدمع بلا صوت ، غدير نهار كامل وهي مراقبا ضحكاتهم والفرحة دعهد ودلهو لغيثة وبنتو ذهب ، كل مرة كانو يطلعو يطلو عليها وهي ساكتة مكتهضرش غير كتشوف ، ساهية بعيون حزينة تا ناضو ومل واحد مشا لبيتو وحتى هيا ستسلمات للنوم فهدوء ، من بعد نهار دالعيد بداو التحضيرات للعرس دغيثة وتخطيط ليه من طرف العاءلات بجوج وقررو يتبعو تقاليد دغيثة كما ينبغي وخلاو ليها الحرية التامة دير مابغات فالعرس بشرط اللي شرطة عليها عهد ومقدراتش تقبلو وكل نهار كتبكي على مها ...دخلات مالعادة بحال العجلجة لبيت مها لقاتها شادة ورقة وستيلو كتقيد عاءلتها اللي تعيط ليها للعرس
غيثة: وشني دابا انا واش نبرز بلا عريس؟ اوااعدي مستحيل نبقى بواحدي فالبرزة
ملاك: شششت خليني نكنل هاد الورقة كل صباح كنفيق ناسيا شي واحد...طبختي لي راسي ...حمدي الله اللي محرمش علينا الشعبي وشحال ديال الطليب والرغيب ونعار والليل ونتي تزاوكي فيه عاد باش خلا ليك الحرية طلقي الشعبي و الموسيقى ، راه كاينين العرايسات اللي كيبرزو بوحدهم مالكي شنو بغيتي كتر؟
غيثة: اوااعظي ياتا على شووهة...عيقولو مزوج بيها بزز منو وماباغيشي يبرز حداها
ملاك: غيقولو والد معاها بنت وزادها حمل من الفوق وداير ليها عرس على حسابو ومعيشها فالنعيم ...ماتبقاش تشوفي غير الحوايج الخايبين ، شوفي حتى الخوايج الزويني...هوا مقال عيب ؛ قاليك العيلات بوحدهم والرجال بوحدهم وهادشي راه عادي ، راه غيبرز مع الرجال ماشي غيهرب ويخليك بوحدك
غيثة: اففف اهننهنخنن وانا قلت زعما يجلس حدايا 
ملاك: قولي بغيتي طرطقي العينين لعاءلت باك...ماتخافيش راه غيتصدمو ...(شافت فالورقة) انا بعدا معرضتش لكلشي ، عرضت غير على هادوك اللي يحمرو ليا وجهم ، غنكتبو ليهم ممنوع الاطفال والبراهيش فالدعوة ، هاااوييلي حي الى جا كل واحد يجيب معاه 3 دولادو غنوليو فرحلة مدرسية ماشي عرس اسطوري
غيثة: انا ماشي شغلي ...انا المهم عندي يجلس حدايا
ملاك: سيري اختي بينك وبينو ماتخربقينيش انا...خلييييني نتكونسونطرا مع راسي ونشوف شنو كندير...ميجس فين يوصل العرس تا يدخلو عيني بالسعير والتخمام...كنقيل نشوف فاليوتوب المكياج والمشطة اللي ندير ليك 
غيثة: عندااك غير تعملي شي فضيحة فوجهي
ملاك: سيري دابا الليل هادا خليني نفكر ونشوف شنو ندير سيري عند باك قولي ليه ميجمعش عاءلتو كاملة ويشوهنا راه الى جينا نحسبوهم غير هما راه موسم التبوريدة هادا ماشي عرس ، و مزال عااد غنشوفو عاءلت راجلك وسلالتهم وبااااينة غنتشوهو 
غيثة: غتشوهوني يانا قدامهم ، وتشوهو عهد يقولو مزوج عروبية 
ملاك: ها عار الله سيري غبري خليني نشوف شغلي، بقات ليك سيمانة وغدا غنعطي الورقة لتريتور ديال الناس ومابقا الوقت
غيثة: افففف ها هيا غاادا ...نمشي نعاود نرغبو ادا بغا يبرز معايا
رجعات لبيتها كتفكر وهي دخل لقاتو خارج من الدوش لابس بيجامة ديال النعاس ، سروال ابيض طويل مخطط بالازرق و الاسود وتيشورط ديالو زرقة ديال القطن مشات كتحلون عليه وعنقاتو وهوا يهز يديه فالسما مهرب وجهو
عهد: طلقي خليني نصلي ، حتى كنبان ليك موضي كنقلب عالقبلة عاد كتجي تبوسي وتعلقي فيا 
غيثة: خليني ...بغيت نعنقك
عهد: موضي اغيثة الله يرضي عليك خاصني نصلي العشاء وديك الساعة اجي بوسي فينما بغيتي...تحركي نتي براسك توضاي واجي تصلي ، يالاه طلقي راسك
جرها دخلها للدوش وهي كتسوط ، توضات وخرجات عندو لبسات حوايجها دالصلاة وصلة بيها وختم الصلاة كالعادة بدعاد وسلم وناض عندها جرها من يدها فبل متحيد حوايجها
عهد: اجي دابا ، باغا غير تبوسي ...يالاه اجي عنداك غير تبداي تبكي عليا بحال ديما 
غيثة: بدلع) وا انا بغيت غير نبوسك ماشي داكشي لاخر
حيد ليها حوايجها خلاها بدو بياس فوق الناموسية وحيد تيشورط بانو عضلاتو وجسمو المغري 
عهد: انا بغيت كلشي ، بغيت المعسل
غيثة: بتحلوين) ههه واخا (حطات يدها على وجهو) انا ديما كنطلبك باش تجلس حدايا فالعرس و...
قاطعها بقبلة ولمسات حنينة وبدا كيهضر بابتسامة ساخرة وكيبوس
عهد: اممم عليها نزل عليك الحنان ! كتجي عندي غير فاش كتبغي حاجتك
غيثة: اااي ...وبلاتي...بلاتي خليني نهضر 
عهد: هانا يالاه هضري
غيثة: عافاك جلس حدايا واش انا غنجلس بواحدييي!!! اواعدييي! مكيناشي شي عروسة كتعمل العرس بلا عريس
عهد: بلاش من هاد العرس ، غنديرو حفلة بسيطة بين لافامي ديالي وديالك ونجلس حداك بلا ميتزاد شي واحد اخر
غيثة: هيييه!! لا انا بغيت العرس ودابا عرطنا العاءلة وقولنا ليهم العرس وغيجيو
عهد: بجدية) صافي اغيثة ...بغيتي العرس مرحبا الرجال بوحدهم والنساء بوحدهم وممنوع منعا كليا شي راجل كيما بغا يكون يدخل سواء بابا ولا باباك ، مانعاوظش هاد الهضرة والا مكاين لا عرس لا واالو
ناض وقف مشا لتيليفونو وخلاها جالسة مغبونة، جلس بعيد عليها شاد تيليفون وهي كتسناه يرجع يدلعها ساعة والو ، شافت تاعيات وناضت عندو بدو بياس كتمسكن وهوا كيشوف فالتلي جلسات ليه فحجرو بطريقة سلسة ومابغاش يشوف فيها ، باستو فحنو كتمسكن وهوا يهز راسو فيها عاقد حجبانو ؛ شافيها ورجع شاف فالتيليفون بلا مبالات ومحطش يدو عليها واخا جالسة فحجرو ، مرضاتش وبدات كدمع عليه وهوا يشدها عنقها 
عهد: يالاه صافي...وصافي هانتي عاوتاني كتعصبيني ، شوو صافي متبكيش
غيثة : هء هء...صافي غتبرز حدايا؟
عهد: تنهد) وراه هضرنا اغيثة واش نبقا نعاودو نفس الهضرة؟
غيثة: ياك قلتي ليا صافي
عهد : ههه قلت ليك صافي من البكى
غيثة: كتبكي) تبدلتي مابقيتيشي كتبغيني ...شو كيفاش رجعتي وليتي كتهضر معيا فشكل
عهد: بلعكس انا مابغيتش نجلس حداك نبقى نشوف ها اللي عريانة ها اللي طالقة الشعر ها اللي كتشطح...نخاف نتزعط فشي وحدة منهم وماتبقايش تباني ليا ديك الساعة نتي
غيثة: ياااك...دابا نتينا هايدا كتفكر؟ عينك غير فالبنات؟ شني زعما عمرك شوفتي البنات فحياتك كيشطحو
عهد : شفتهم مي المغربيات عندهم سحر خاص كيجدبو الراجل عندهم...بغيتي تعجبني شي وحدة نبقى حاضيها وننساك نتي؟
غيثة: لا صافي بلاش ... (بدات تهضر بوحدها) حنا اصلا عندنا البنات كيطيرو مع الطيور خاص غير اللي يضحك معاهم...(شافت فيه) لالا ...صافي نبرز بواحدي بناقص كاع من هاد العرس بالعريس اللي يرجع لي انا بالندامة ، براكة غير شرشابيل اللي واحلة ليا ونزيدو حتا وحدين آخرين...هه تعملها تينا الله اودي مدام تزوجتي شرشابيل راه بااينة تقدر تعجبك وحدة اخرى وتزوجها تا هيا ونبقى يانا منفية
عهد: هاااا شتي...هانتي فهمتي دابا، اويا حسن بلا منشوف البنات وانا عيني زايغة كنشوف الزين كنتلف
غيثة: ناضت) يخخ صافي زول مني خليني نمشي نعس
عهد : هي اللولة
هزها وهي معصبة منو داها لفراش كتف ليها يديها وهي كتغوت وهوا كيضحك عليها ..

مرمدها فوق الناموسية تا بدات كتبكي باش يتفرق معاها وفآخر الامسية صبحات معنقاه وناعسة فأحضانو كالعادة ، نفس الروتين الصباحي ، خرجات عند مها تشوف فين وصلات لقاتها كتوجد وتعاود وتعضر مع طريطور هي ومروى مناكرين، وحدة كتجر من جيه وحدة كتجر من جيهة، وقفات بيناتهم عيثة
غيثة: شني واقع عاود؟ ياك لاباس
مروى: شوف ابنتي ..واش نتي غتلبسي 8 دلبسات كاملين؟
غيثة: لا
ملاك: كيفاش لا...راه 8 دلبسات اللي كتلبس العروسة
غيثة: بزاااف...واصلا عهد مغيكونشي معايا...وانا غنلبس غير 4 صافي
مروى: هااا...ايوا هادشي اللي كنقول انا من صباح...مالنا على عرض الازياء بلا فاءدة ، شنو الفرق بين 4 داللبسات و 8
ملاك: اففف..صافي ...مهم دابا ها عاءلتي انا
عطاتعا الورقة
مروى: هيييه!! 82 واحد؟؟؟
ملاك: هادوك غير عاءلتي مزال عاد غنشوفو عاءلت باها
غيثة: اه ..باقي عاءلت با
مروى: ولاكن بزااف...حنا عندنا 15 لطبلة وكل طبلة فيها 6
ملاك: علاه ماغاديروش 10 فالطبلة؟
مروى: اوييلي على 10 فين عمرك شفتي هادي؟ راه غير 6 فالطبلة
ملاك: مهم انا ماشي شغلي ...هادو عاءلتي وماعيطش على كولشي ...غير شي وحدين حتى نمشي لكازة وندير ليهم حفلة تما لهادوك اللي معرضتش
مروى: تنهدات) واخا سيري اغيثة جيبي الورقة من غند لاباك
غيثة: واخا
مشات عند باها جابت الورقة ورجعات وجها حمر حشمانة تعطيها ليهم ، عطاتها لمروى بزز وهي حشمانة، مروى حلات الورقة وكانت غتسخف
مروى: هييه!!!!! اويييلي شحال من واحد! 102 وبولادهم؟
ملاك: اري ليا ديك الورقة انا عارفة شغلي معاها(شدات الورقة كتشوف فيها) هاي هاي هاي ، منسى تا واحد ! حتى من عبد القادر البركاك عرض عليه!! واخا السي عبد المالك هانا نفرجك ...اولا البراهش ممنوع ، والجيران تا يرجع ويدير ليهم الخيمة فالسطح
مروى: اففف ايوا هاكاك...مالنا على هاد الفضيحة كاملة
ملاك: اتتي صبري مزااال غنفرجك فالسيك عبد المالك...مهم خواتاتو ومو خلييهم يجيو نييت عندي بيهم الغراض ، اما هاد الشوراف اللي مزكل تا واحد فيهم هادو بلاش منهم كيتعشاو وكيلواو غينعسو لينا فوق الكراسة
مروى: كاين فوطويات ماشي كراسة...مالنا فقهوة؟
ملاك: مهم غينعسو هادشي الى مجاتهمش تبوريشة وطلبو الكواش وتقنتو مع الحيوط وحللو فامهم وعطاوها للشخير وجات لاللة الكاميرة صوراتهم نحشمو حتى نوريو السيدية للناس
مروى: اه بصح...عندك الحق ، اويلي العكايز اش غيديرو فالعرس
ملاك: غييثة ...سيري جيبي ليا ستيلو نضرب على هاد الفضيحة اللي داير لينا باك وبغا يشوهنا
مروى: هاكي اختي ها الستيلو هازاها معيا...ضربي وعنداك تنساي شي واحد
شدات ملاك الورقة بقات تخطط وتقاد وجمعات الوراق عطاتهم للطريطو اللي واقف حداها بالكوستيم مصدوم
ملاك: هاك اسيدي .
مروى: شوف دير ليا فيها ممنوع ليزونفون و الليفيو (الشراف) كل دعوة دير فيها جوج دالناس
ملاك: لالا يدير 3 ولا 4...راه عاءلتي فيهم اللي عندهم البنات كبار
غيثة: بلااش كاع من البنات شني غنعملو بيهم
ملاك: سكتي نتي ...شباقة كديري هنايا، تحركي لبسي خوايجك نمشيو نشوفو النكافة
مروى : لالا ها الطريطور راه عندو شركة ديال تموين الحفلات وحتى تزيين العراءس...طلبت ليها اشهر وحدة اللي كدير للفنانات الكبار المكياج وغتجي من لبنان
ملاك: صافي تافقت معاها انا نديرو ليها
غيثة: لالا لاعساك غير جيبي ديك اللبنانية
ملاك: ايوا يعطيك الدل، انا اللي مشحفة معاك راسي ...سيري حيدي عليا خاندوز يخخ
مشات ملاك كتنكر وبقات مروى كتقاد الامور مع التريتور
مروى: عرس ولدي منبغيش شي حااجة تنقص...الرجال خلاص غيجلسو فالدخلة الاخرى من القصر ...راه تما صال كبيرة فالدخلة مفرشة حيدو الفراش وديرو ليا احدث ديكور فالقعة دالقصر و الجردة ، ايوا والنساء راه عندهم باب خاص هوا هادا وغادي يكلسو لداخل ماشي برى فالجردة وحتى هنا بغيت الديكور يكون اخر مكاين ...اهر مكاين فالمأكولات و اخر مكاين فالمغنيات بالنسبة للنساء ، مخصنيش شي راجل يدخل عند النساء هادا امر من العريس، كلشي اللي يسربيو ويصورو ويقادو يكونو نساء
التريتور: واخا امدام الله اودي واش حنا نقدو نقولو لا ...احدث مكاين فالعراسات الشرقية والغربية غادي نجيبوهم ...ختارو المغنيات اللي بغيتو وماعلينا غير نجيبوهم
مروى: بغيت الدبكة تكون فالعرس و اشهر مغنيين الشعبي والشرقي ..
بقات مروى كتقاد الامور مع التريتور وغيثة وتقفة كتحرك راسها بالفرحة وتسمع عاجبها الحال ، اسبوع كامل داز ديال الترتيبات والتوجاد و وصل النهار دالحنة و كلشي كيوجد شي طالع شي هابط وغيثة فالبيت كترعد مستريسة لاقصى درجة غيرر كتفتف مخلوعة ، دخلات عليها ملاك لابسة فراشة فالصفر ولايحة الشال على راسها جاتها زوينة مع عامرة وطويلة ويديها بيضين بحال الصحراويات ودايرة فيديها نبالة ديال الدهب وخاتم غليض ويدها الاهرى سرتلة فيها 12 وخاتم وصايغة دفارها بالحمر وسنسلة فالعنق ديال الدهب كضوي وباين عليها الخير والخمير

دخلات لقات غيثة واحلة كتقلب على حوايجها وهي معميا ليها البصيرة ومحطوطين قدام عينيهاملاك: يا مالي اخيتي شفتك مقطوع ليك الراس مالكي تالفة؟
غيثة: قلبي كيضرب بالجهد ماعرفتشي مالي حاسة براسي كنترعد والدم كيجري بالجهد ، فيا الجوع وماعنديشي الشهية و باغا شي حاجة وماعرفاشي شني هيا
ملاك: غا بشوية عليك ابنيْتي ونتي غادا تموتي قولي مالك وعلاياش كتقلبي دابا
غيثة: البلغة اللي نلبس فرجلي فاش نكون هوادة فاين هيا
ملاك: دارت يدها على جنبها) عاااهيا قدام كتقولي هنا قربات تبوسك في فمك
غيثة: هااا؟ ااه صافي شتها..ايوا شني نلبس؟ تكشيطة ولا القفطان ولا ....ماعرفتشي حاسة براصي عنسخف
ملاك: لبسي الجلابة ....وتي دخلي دوشي ضربيها بشي فركة دخلي بيها للتاريخ باش تزيدي تشعلي وخرجي ندير ليك سوان دفيزاج لداك الوجه
غيثة: عملتو لبارح السوان ولاسيغ وكلشي ...وديما كنعملوم اصلا
دخلات مروى لقات غيثة بوحدها وسط الكراطن ديال الحوايج الجداد كل حاجة فكارطونتها وكلشي محطوك وهي واقفة تالفة
مروى: غيثة خاصك مساج ضاروووري باش ترخاي ...يلا بقيتي هاكا موحا واش نكملو هاد العرس
غيثة: بلاتي ! فين ذهب؟
مروى: ذهب مع باها خرج هوا وياها ونور ورياض خرجو مشاو للجديدة للبحر
غيثة: هاا!!
مروى: ايوا معندهم مايديرو معانا والرجال ممعروضينش ليوم حتى لغدا ويجيو والحنة معرضناش على كلشي
ملاك: ايوا خوتاتي وبناتهم ومي وبا راهم جايين وحتا خواتات باها وبناتهم تا هما جايين
مروى: افففف فراااسي وغيباتو تا لغدا ...مهم دبا جلقي راسك راه الحمام واجد وستيتيسيانات كيتسناو فيك...سربي راه مغنديروش الحنة بالليل وغنساليو مع 12 يالاه تنعسي وتصبحي مرتاحة لغدا
سيفطو غيثة كركبوها للحمام وبقات ملاك ومروى مناكرين
مروى: الحوايج خصهوم يتستفو فالطيافر ...وغتلبس تكاشطها اللي شرات والنكافة غدير ليها غير ليزاكسيسوار صافي
ملاك: مهم دابا غنحطوهم فالطيافر ندخلوهوم فالدفوع من بعد تلبسهم
مروى: بعصبية)علاااش اصلا عندها التكاشط اللي غيدخلو فالدفوع مالنا على هاد التخربيق
ملاك: لا خلي حوايج بنتي ندخلهم كاملين
مروى: ماقلناش لا ولااااكن اللي غتلبس بووحدهم...شنو دابا غتلبس للحنة؟
ملاك: قفطانها دجوهرة هاهوا مذهب بالرنادة بسروالو فيهم غتنقش وبلغتها هي هادي ديال الصم
مروى: عييت ...غادي نمشي ندوش
ملاك: تا واحد ميدخل ليا لهاد البيت اختي من عاءلتك
مروى: هه وراه نتي اللي متخلي تا واحد يدخل...هادا بيت ولدي ومغيحمل حتا واحد يدخل ليه
ملاك: ايوا المهم انا غير قلت. الساروت غيبقا عندي
مروى: وانا ايلا بغيت شي خاجة نجي نقلب عليك نتي تحلي ليا؟ !!
ملاك: ايوا شنو ...راه حوايج بنتي اللي هنا
مروى: ااوووووف صافي الى بقيت معاك غنمرض

خرجات مروى و وصلا الربعة دالعشية والصالون الكبير اللي غدير فيه غيثة الحنة عمر بالناس المودعويين ، جلسو عاءلت عهد غجهة وعاءلت غيثة فجهة ، الفرق شااسع بين الطرفين ، واخا عاءلت غيثة مقادين ولابسين احسن ماعندهم وعارفين راسهم جايين لقصر وكل وحدة دارت اللي فجهدها باش تبان الا وعاءلت عهد باينة عليهم فهضرتهم والجلسة وحراكتهم انهم من الطبقة الراقية وحتى ملابسهم البلدية وقفاطنهم وتكاشطهم من الطراز الرفيع ومجوهرات وحلي من ارفع المجوهرات ، تمنعو الخدم والرجال يدورو فالجناح اللي فيه غتجلس العروسة و العيالات داخلين خارجين من الرجال وبقاو بعد كيوصلو السخرة حتى للنص ويكملوها الخادمات بزي موحد وانيق وكلشي متول ومقاد وراقي ، فبيت العروسة جالسة غيثة فطرف نموسيتها بقفطانها الجوهرة اللي غتحني فيه وصايبو ليها شعرها بوكلي وجمعوه ليها ودارو ليها زيف دحياتي ابيض وكحلو ليها عينيها ودارو عليها توب ابيض مشبك غطاو ليها وجها ومروى كتشوف مروى: مغاديرش المكياج وطلق شعرها؟
ملاك: لا حتى تسالي الحنة وبليل عاد غنقادو ليها..هادو التقاليد دباها وهي كتمشي عليهم كدير الشد ابيض بحال الى خارجة من المام وتجمعو اللور بلا مكياج ولا والو
مروى: اااه...ايوا صافي مزيان
وقفوها لابسة قفطانها تا للارض وبلغتها وديارة الدرة دحياتي للور ومن غير مكياج ، جبدات ليها مها بواطة فيها ذهب دارت ليها براسلي فيدها وسنسلة وعقيق ديال اللوبان خضر فعنقها فيه عمارة بلدية مذهبة ونزلوها النكافات بالزغارت وهي غادة وموراها ليزار لمشبك كيتجر موراها ومها وقفا بجنبها لابسة تكشيطة فالحمر من داكشي الرفيع وطالقة الشعر مصايب بوكلي ومجوهرات وصندالة عالية ومروى فجهة هابجة معتها تا هيا لابسة تكشيطة فالخضر ملكي وطالقة شكرها ملوي فالجنب طويل و ودايرين مكياج ومقادين الحالة ونازلين معاها ، لان الرجال ممنوع ديخلو داكشي علاش لقاو راحتهم وطلقو الشعر ولبسو اللي بغاو ، نزلوعا دخلين بيها وسط الصالة الكبيرة وكلشي كيشوف بابتسامة تحت نغمات اغاني شمالية لفرقة نساءية فجنب الصالة مع الاتها الموسيقية وزغارت النكافات ، جلسوها فبرزة عبارة عن فوطوي انيق ابيض مغطينو بتوب ناعم اخضر مطروز بالذهبي وحدا طبلة مذهبة كبيرة محطوط فيها الحمة والورد ومزوقة بالشمع مشعول مزين الطبلة ونقاشة بلباس اخضر انيقة ، قادو ليها الجلسة وهي حشمانة كترعد مقاداش تهز راسها فالناس وجميع الانضار عليها ، وقفات ملاك كتشالي بيديها فرحانة غطير والاناقة والشياكة قالت لعاءلت عهد مكتعرفوش ، متزعزعاتش من حدا بنتها والضحكة مافارقاتهاش وغير غادا جايا بالنخوة خلات عاءلت عبد المالك غير كيشوفو حاللين فامهم لاهما لاعاءلتها ماعرفو فين يشدو واش فيها ولا فعاءلت عهد اللي جالسين معاهم ولا فغيثة اللي بارزة ولا ام العريس اللي كتبان بحال هيفاء فهضرتها ومشيتها وفورمتها بابتسامة فرحانة كتشير بصبعها بصوت خافت باش حتى حاجة متخرج على السيطرة ، مشات جابت ميساء من بيتها لقاتها باقا واحلة شنو تلبس وماعارفة والو فالبلدي لا هي لا وعد بجوج حايرين ، وقفات عليهم مروة وراتهم شنو اللي دارج عالموضة فاللباس التقليدي ولبسات وعد تكشيطة نصها الفوقاني على شكل غوب رومية ومنبتة كلها فالاخضر والتحتاني سامبل ومضوبل توب الساتان فوقو شبكة منبتية فالاخضر بنفس الشكل والعقيق اللي منبت بيه النصف الاعلى وكلخا كتبري وضهرها عريان وصندالة عالية وشعرها مطلوق للجنب مع ميكاب من يدين اللبنانية اللي صايبات لغيثة ، ميساء كذلك لبسات غوب فالاسود بحال الحوتة مزيرة حتى للتحت عاد وساعت وعندها فتحة لقدام حتى للركبة وصرها عريان و وتوب اسود شفاف لاسق فكتاف لاغوب وطويل مع الضهر حتى لارض كيتجر معاها ويديها عرياني وطالقة الشعر ومكياج وصندالة عالية فالاسود جاو بحال الاميرات ، نزلاتهم مروى لتحت بقاو بنات عاءلت غيثة حاللين فمهم وفلباس واناقة ولباقة دوعد وميساء بحال شي ملكات جمال خرجو من التلفازة

جلسات غيثة طالقة يديها ورجليها للحنة والنقاشة كتنقش ، كشي فرحان وحتى المحسادة ناشطين ، شي كيشطح شي كيتفرج وكل واحد فاش ملهي ، وحتى من عاءلت مروى ناضت شطحات بالعقل وكذلك عاءلت غيثة كاملة دارت عقلها ملي شافت الناس كلاص ومتولين ، دازت الحنة ونقات غيثة نقش خفيف انيق ومروى حتى هي دارت صبع هي وعد ، اما ميساء لسقاتهم يديرو ليها بحال غيثة وجلسات فوق واحد السداري قريب من غيثة نقشو ليها يديها ورجليها وفرحانة ، تبتات حتى نشفات ليها الحنة وتفرقو الحلويات والعصاءر وتمنع التصوير بالتليفون ، وقفو الخدامات بالكوستيمات بحال ليكارد كورد كل وحدة فبلاصتها رادين البال باش اللمور تمشي مزيان، سالات العروسة ونشفات حنتها ونوضوها بالزغارت والنكافات طلعوها لبيتها ، وتفرقات العاءلة كل واحد فين مشا وكاين اللي بقا حيت مراسيم النهار دالحنة مزال مسالا، طلعات غيثة وكلوها وقشرو ليها الحنة وخلاوها ترتاح تا أدن العشا وبداو الناس كيجيو عاوتاني بلباس اخر وتفركيسة اخرى وعمرات الصالة بالناس واللي مجابوش بناتهم جابوهم وبداو كيصايبو لغيثة فبيتها ومروى جالسة كتشوفمروى: واش مزال غتعاود تهبط؟
ملاك: اه...قبيلة درنا ليها الحنة النقش ودابا بالليل "النبيتة" غنديرو ليها الفال دالحنة والبوجة
مروى: كيفااش؟
ملاك: هادو تقاليد باها وضاروري خصها تمشي عليهم واللوجة هي واحد الصندوق كبير بحال العمارية منقوش ديال الخشب ، كدخل فيها وماكابقاش تبان وكيدوها للجامع دق فيه ويدوها
مروى: ايوا غيهزوها الرجال ويخرجوها برى !! مابغيش عهد
ملاك: واييه ومغاديش نديروها اصلا هاديك غنحدفوها غنديرو ليها الحنة دالفال وتلبس الشدة وتجلس بلاصتها
مروى: هاحنا غنشوفو كيفاش هادشي داير
ملاك: مهم هانتي شوفي ...راه حتى انا مكنتش كنعرف تقاليدهم ولاكن عجبوني
مروى: اممم...بلاتي تيليفون كيصوني، الو وي...اااه نتا لتحت؟ قولها طلع لفوق يجيبوها عندنا...واش نتا مع نضال؟ ااه مزيان قولو ليهم يطلعو. (قطعات وشافت ميساء) جا بابا وماماك
ميساء: بالفرحة)بصح!! فين ..وصلو
مروى: هاهيا ماماك طالعة
دخلات عليهم كلارا بكسوة طوييلة وباليدين ودايرة الشال وكضحك ، شافتها مروى وبدات كضحك، تسالمو وتعانقو وميساء غطير بالفرحة، شافت مروى فكلارا وضحكات
مروى: ههههه حتى نتي دارو ليك الشال؟
كلارا: الحوار بالفرنسي ) قالها ليا صابر ، قلي لبسي هاكا راه غتلاقاي بعهد ميسلمش عليك
مروى: غير سكتي كنت تشوفي حنا كي ولينا كنمشيو قدامو ...مهم بدلي عليك ولبسي اللي بغيتي دابا حيت كاين غير العيالات
كلارا: راه الدنيا عااامرة برى بالرجال جالسين فالجردة فوق الفوطويات ...تلاقيت بعهد يالاه جاي هوا ونور هازين الدراري وسلم عليا عادي
مروى: لا انا قلت ليك الى شافك مقزبة مغيسلمش عليك..ونتي عمتو راه غيسلم...ايوا على سلامتكم واخا تعطلتو وفتت عليكم الحنة وحتى رانيا ماعرفت مالعا تعطلات ، سيري لبسي حوايجك راه غنهبطو دابا
ميساء: اجي مامي نوريك بيتك
خرجو وبقات ملاك ومروى و4 دالنكافات واللبنانية اللي غتصايب ليها مع غيثة فالبيت ، دارت ليها مشطة انيقة ومكياج خيالي بانت غيثة بحال شي اميرة وعينيها كيبريو ، لبسوها تكشيطة ديال حرير الدودة فالبلون كاصي فاتح فيه الورد فالغوز مع ليزاكسيسوار ديال الذهب الابيض والمضمة ديالها من الذهب الابيض غطاوها بليزار مشبك ، بدلات مروى وملاك حتى هما ولبسو حوايج اخرين مع صبابط الطالون وخرجو غيثة بالزغارت مهبطينها فالدروج حتى قربات للصالة لقاتهم موجدين ليها الطيفور جلسات فيه ودخلو هازينها النساء بنفس اللبسة تحت نغمات الحضرة اللي كتكون من 12 سيدة بلباسهم الابيض والشدة الشمالية اللي دايرين كيعزفو على الانهم الموسيقية بلهجة الشمالية ، تلفتات ملاك عند مروى كتهضر فودنها باش تسمعها
ملاك: هادي هي النبيتة...هانتي غتشوفي المراسيم ديالها
مروى: اااه...يعني الحنة بوحدها والنبيتة بوحدها؟
ملاك: اه ولاكن حتى دابا غادي نديرو ليها الفال دالحنة غير وجدي شي باكية دكلينيكس شديها راه مغتسكتيش من البكى

دارو بيها فالطيفور وشطحو ورجعو حطوها جلسوها فبلاصتها وسط الاهازيج والزغاريت اللي كتسمع فالميكرو فالقصر كامل واصلة حتى لبرى ، قادو ليها الجلسة بتكشيطة ديالها وراسها مغطي بالشبكة وهي مرعودة كتقفق ، كلارا مامات ميساء شافت هاكاكا وهاكا لقات ميساء طارت مابقاتش كتبان وهي تلفت عند مروىكلارا: فين ميساء؟
مروى: بلاتي تيليفون كيصوني...الو وي ؟ هانا جايا(قطعات) بلاتي نشوف نور اش بغا ونجي
خرجات مروى وسط الاغاني والاهازيج اللي هازة القصر ومشات كتجر تكشيطتها خرجات وهي تلقا نور بسروال التوب وقميجة نص كم وصباط كلاص والشعر مقاد واقف شاد لميساء فيديها وهي هازة جلايل تكشيطتها وكتبكي
مروى: مخلوعة) مالك ...مالها؟؟؟
نور: بترجي) الله يحفضك جلسيها حدى غيثة تا هيا ...بليييز ديرو ليها داكشي اللي دايرين لغيثة (شاف ميساء) شنو غيديرو ليك؟
ميساء: كتنخصص) داكشي... ويركبوني لفووق دوك العيالات ويشطحو بيا. ونجلس حدى غيثة يديرو ليا داكشي هابط بحال هاكا (كتشرح بيدها)
نور: واخا واخا صافي براكة من البكاء
مروى سدات عينيها وتنهدات وعاودات حلاتهم
مروى: يالاه دخلي هانا جايا
ميساء غرغرو عينيها بالفرحة وهي تعلق فنور باستو بالجهد ومشات ...
نور: نفخات ليا راسي بالميساجات نهار كامل ...يالاه قشعاتني دخلت جات كطير لسقااااتتي مابغاتش تسكت ، الله يحفضك دخليها ديري ليها خاطرها الواليدة الله يسهل عليك
مروى: صافي دابا هانا غنشوف
نور: لا متشوفيش ديرو ليها تا هيا بحال غيثة ...مهم ساوي معاها مافيا مايبقا غادي جاي براكة رياض اللي لاسق فيا فين ما مشيت
مروى: جيبو ليا
نور: وانا كرهت!! كيشوف ذهب هازها عهد ولاسق فيا مابغاش يطلق مني
مروى: مهم هانا مشيت...عندااك يطيح
نور: غادي كيشير بيديه) وراه انا اللي غنطيح بالفقصة ..صافي شوفي غير ميساء تهنيني من صداعها
مشا ورجعات مروى لقات ميساء واقفة ليها كتسنى ، داتها جلساتها حدا غيثة عاد رجعات فيها الروح وكتسنى فوقاش يهزوها تا هيا فالطيفور . غيثة دايرة عقلها وجالسة مكتنفنفش و وجها مغطي كتحس بشي حد كيترطى جالس حداها كيصفق ، تلفتات لقات ميساء وهي تكعا ، جرات مها من جلايها هضرات ليها فودنها
غيثة: اوااعدي واش حتى ميساء غيبرزوها؟
ملاك: لا راه قالت ليا مروى ديروها وزيرة وخليها حداك
غيثة: اااه صافي
ملاك: صافي هاهما غيبداو دابا...عنداك تبداي تبكي ضيعي المكياج...راه عاادي كلشي كيتزوج وكيخليو واليدهم ويبني دارهم
غيثة: خدات نفس طويييل) اففف واخا انشاء الله
سكتات الموسيقى فمرة وكلشي جلس والعروسة حانية راسها ، ناضت رءيسة دالحضرة بتكشيطتها البيضاء هازو ميكرو ودايرة نبالة ذهب قدها قداش ، تقدمات كتصلي على النبي وتعود تا وقفات حدا غيثة وبقات بوحدها اللي واقفة والحضور كيشوفو فمركز الصالة اللي هوا البرزة دغيثة، بدات كتلحن غير بصوتها الرقيق بلا دقات بلا موسيقى وصوتها كيتسمع فلبيفان بشكل قوي
...: مع اللحن)اللم صلي وسلم عليه ...سيدنا محمد عليييه السلااااام
عاودو موراها الفرقة النساءية بلا موسقى
...: اللهم صلي وسلم علييييييه ...سيدنا محمد عليه السلااااااام

...: سيدنا محمد عليييه السلاااام .....طوووول اللياااالي وطوووول الدواااام (مع اللحن)...:2 )تكرار الفرقة الموسيقية مع الزغاريت) اللهم صلي وسلم علييييه ...سيدنا محمد عليييه السلام.
...1) وصليييو على النبي يا الحاضرييين...وصليييو على النبي يا الحاضرييين ...سيدنا محمد مع الصابرين
...: تكرار الفرقة الموسيقية) اللهم صلي وسلم علييييه ...سيدنا محمد عليييه السلام.
...1)و جاابو الطبل جابو الهدية ...قولو ليما ترضي عليا
...2)اللهم صلي وسلم علييييه ...سيدنا محمد عليييه السلام.
...1 ( صبرو باباها المحني الراس ...كبر بنتو وعطاها لولد الناس
...2 :اللهم صلي وسلم علييييه ...سيدنا محمد عليييه السلام.
...1:صبرو يماها وكتبكي.....وتقول ليوم فراق بنتي
...2: اللهم صلي وسلم علييييه ...سيدنا محمد عليييه السلام.
...1: جيبو العروسة وجيبوها لي ...نعملها الحنة ونمشي بحالي
...2: اللهم صلي وسلم علييييه ...سيدنا محمد عليييه السلام.
...1: لاللة داري ويا دار البنات ... لبارح عامرة وليوم خوات
...2 : اللهم صلي وسلم علييييه ...سيدنا محمد عليييه السلام.
...: 1طولو الليالي وما مولو ....فراق الميمة وما حرو
...2: اللهم صلي وسلم علييييه ...سيدنا محمد عليييه السلام.
...1: و رشو ماء الزهر وقرشو الضردار...... والله يجعلها عنارة الدارة
...2: اللهم صلي وسلم علييييه ...سيدنا محمد عليييه السلام.
...1:سيدنا محمد عليه السلام ....طول الليالي وطول الدوام
...2:اللهم صلي وسلم علييييه ...سيدنا محمد عليييه السلام.
...1:يديك ملاح للحنة ويالاااااااللة ...يديك ملاااح للحنااا
...2: تكرار الفرقة الموسيقية) يديك ملييح للحنااا
...1:يديك ملااح للحنة يالااالة ...خاتم ذهب لازمهااا
...2: خاتم ذهب لازمنا
...1: رجليك ملااح للحنة يالاااللة...شربيل جديد لامزمها
...2: شربيل جديد لاامزها
كلشي بدا كيبكي من صوت واللحن واسم الرسول صلى عليه وسلم خلاهم يتبورشو تا ختمات الرءيسة المدح ديالها وكملات قبل ماتسكت وتحركات نغمات المويسقة مع الغناء
...: الاللة مد يديك مدها لا لحناني تردها العزيزة علياااا...الاللةكتقول ليك يماك امشي الله يرضي عليك امشي الله يرضي عليك
جابو ليها بنت عزباء من عاءلت غيثة من باها هي ليا للي بدات كدير ليها الحنة فصبعانها بلا متقيس النقش تحت الزغاريت وكلشي رجع كيضحك وعاءلت عبد المالك كتغني مع الفرقة وغيثة يديها كيترعدو قاطعة البكية بغات طرطق
...: الاللة مد يديك مدها لا لحناني تردها يا العزييزة عليااا...الالة كيقوول ليك باباك امشي الله يرضي عليييك.....الاللة كتقول ليك يماك ابكي ولا تسكت ابكي ولا تسكووووت🎵🎶🎶🎶🎶
الاللة مد يديك مدها للحناني تردها العزيزة عليا...الاللة كتقوليك يماك ابكي ولا تصبر ..ابكي ولا تصبر ...
الاللة مد يديك مدها لالحناني تردها الحنينة عليا.🎶🎶🎶الاللة ودعي لي باتيسير راني فنسافر ...راني غنساافر 🎶🎶
مروى مسكتاتش من البكا وتلاحت على وعد عنقاتها تا كانت غتسخف ، فديك الاثناء تلفتات مروى تشد الكاس دالماء من عند ملاك باش تشرب وهي تلقا رانية واقفة حداها
مروى: رانياا!!! فوقاش جيتي
رانيا: جيت قبييلة شفتكم مخشعين وخليتكم تا تسالو المدح
مروى: تعطلتي
رانيا: يالاه سالا ولدي شي خدمة وباه مسافر مخلانيش نجي بوحدي
مروى: فين راه
رانيا: راه برى مع الرجال
وسيم ولد رانيا فديك الاثناء تسلت من الرجال باش يهضر فالتيليفون وبقا غادي كيهضر فالجردة وقادوه رجليه فالدورة دالقصر بعييد فالضلام والخلى كيهضر تا لمحات عينيه خيال اللي خلاه واقف مشوكي قطع تيليفون فالبلاصة خشاه فالجيب

وهوا هاز راسو لفوق كيبان ليه خيال مافهم والو تا نزل داك الخيال دفعة وحدة من الفوق وفالبلاصة وبالخلعة مد يديه جات فيديه غدير كانت ناوية تنتاحر ، شدها حطها فالارض وهي كتبكي ماعرفش شكون وهي كتهضر الخليجيةغيدير: علاااش شديتيني اهىءاهىءاهىء خليني نموووت خليني شكون قالك شدني
وسيم: مفزوع) اختي ماعرفتش شنو كنتي نتوية واش باغا تموتي ولا زلقتي...شكون نتي
غدير: طلق مني...بعد مني ..بغيييت نمووووووت اعباد الله اهىءاهىءاهىء وابغيت نمووووووووووت اهىءاهىءاهىء واش حتى فالموت ماعندي زهر ...تاني مرة كنتاخر مكتصدقش اهىء...طلق مني ...بعد علياااااا
وسيم: تهدني تهدني اختي ..غير بشوية علاش باغا تنتاحري مالكي شنو خاصك ؟ ماعجباتكش الدنيا بغيتي تبدليها بجهنم؟
غدير :كتبكي) اه جهنم حسن ليا من هاد الدنيا ...حسن ليا منشوف راجلي كيدير العرس
وسيم جمع يديه فالبلاصة ورجع اللور فاش سمع كلامها وخلاها فالارض
وسيم: باغدون...واش نتي مرت عهد ؟
غدير: هه مرتو بالسمية...اما مرتو الحقيقية راها داير ليها العرس
وسيم : وحتى نتي درتي العرس ودوزوك فالاخبار ...اش فيها الى دارت هي العرس ، وزايدون الانتخار ماشي هوا الحل ...نتي مابقيتيش كتعبدي الله على هاد الحباب وليتي كافرة و كتعبدي حبك راجلك وفضلتيه على اللي خلقك...هادا ماشي حب ..اول حب خاص يعنر قلبك هوا حب الله عاد حب شي واحد اخر وهوا من حقو يتزوج والله عطاه الحق يتزوج حتى 4
غدير: هه انا مكيهمنييييش ...هادشي كامل ماعندي ماندير بيه ، عييت كنصبر اهىءاهىءاهىء عييت كنتسنا فيه
تحنى حداها بلا ميقيس فيها وبانو على ملامحو الحزن
وسيم: سمعي اختي نقوليك...كيما نتي كتبغي حتى للجنون يقدر يكون واحد اخر كيبغيك فالخفاء وكاتم السر ديالو ...انا وقع معايا بحال هادشي اللي وقع معاك وكلنا دزنا فتجارب واختبار ولاكن ماطغيناش بحال اللي درتي نتي ومفكرناش فالانتحار ...الله اللي زرع فيك الروح وهوا اللي ياخدها نها اللي وصل اجلك ماشي نتي اللي تقرري ...حتى انا دزت من ازمة نفسية كتر منك وبقيت متشبت باللي خلقني و هوا جزاني ونساني بحال الى عمرني دزت من ديك الازمة اما كن نتاحرت كوراه مشيت لا دنيا لا آخرة وهانا دابا الحمد لله رجعت حسن مللي كنت قبل ومع البنت اللي كتبغيني وكنبغيها ... ماتبقايش اختي تفضلي شي واحد على اللي خالقك وخالقو باش نتي تشوفيه وتبغيه ، استغفري الله وبراكة من هادشي
غدير: الصمت
وسيم: ماشي انا اللي عتقتك ..انا غير سبب جروني رجليا لهنا باش نعتقك وهادي فرصة ليك باش تراجعي افكارك ..كيما قلتي نتي جوج مرات ونتي كتحاولي ومكتصدقش ليك...راه الله عز وجل كيعطيك فرص ماشي الانتحتر مكيصدقش..تقدري المرة جايا تحاولي وتموتي ولاكن هادي فرصة اخرى باش توبي ليه وباغيك توبي وابوابو مفتوحة ليك ونهار تسد فوجهك هاداك هوا النهار اللي فتصدق بيك فيه عملية الانتحار اما دابا راه مفتوحة ليك وعندك فرصة وراجعي نفسك
شافت فيه بعينين مدمعين مترددة وحاولات توقف وهوا حداها ، ناضت جلسات حلى طروطوار والضو دالقمر كيضرب فيها وكتبكي ، جلس حداها كيتنهد
وسيم: سمعي نعاود ليك انا شنو وقع ليا ويقدر نكون كتر منك ومايبانوش معاناتي قدام المعانات ديالك ومع دالك صبرت ومرضت وشحال وانا كنعاني تا عفا عليا الله
غدير الصمت

غدير: شكون نتا بعدا؟وسيم: انا وسيم ولد خالت عهد انا صغر من عهد بعام وكبر من نور بعام ، جيت وسطهم ...عندي دابا 29 سنة وقبل 3 سنين عرفت واحد البنت ...بدا داكشي بإعجاب فاللول من بعد الاهتمام ديالها بيا وليت كنتعلق بيها نهار على نهار ...تا هيا كانت زوينة وتعرفت عليها فواحد الخرجة ديال مع صحابي وجات هي مع صحتباتها ...تما بدا الاعجاب متبادل بيناتنا ...من بعد طورات العلاقة ديالنا وماكنتش كنعيط ليها حتى كتصوني عليا هيا وتقطع حيت كانت كتقول ان لافامي ديالها محافضين بزاف ومتقدرش تهضر فالتيلي فاي وقت...مهم ماعلينا ، ديما كنتسنى فوقاش تعيط ليا وكانت كعيط غير بالنهار وشي مرات كتكونو كنهضرو كتقطع على غفلة ...كنت كنقول يمكن و باها ولا معا حصلوها..كانت بريءة فوجها وتعاملها معايا كان زوين بزااف وعتارفات ليا انها كتبغيني وحتى انا كنت ديما كنقولها ليها ، من بعد ماطورات العلاقة وليت عمى فيها كنتصرف بقلبي ماشي بعقلي ، واخد النهار ديتها معايا لداري فجنب البحر على اساس ناخدو راحتنا ، بقينا مني منك حتى دخلنا فالمعقول وعاشرتها ومالقيتهاش بنت ...ماقلت ليها والو من غير سولتها عادي على كيفاش تا وقع ليها داكشي قالت ليا بللي تختاصبات وهي صغير ، بقات فييا وفنفس الوقت كنحس بشي حاجة فشكل فالمعاشرة معاها كتجيني يحال الى ديما كتمارس الجنس وحسيت بيها مولفة حيت بنت صغيرة فاش كتغتاصب كتزير مي هادي لا...جاتي مولفة ...سكت !....ماعاودش جبدت معاها الهضرة وحبي ليها كان عامي ليا الغينين وكنلقى اعذار ليها حيت كنت كنبغيها...ولينا انا وياها ديما كنتعاشرو مرة عندي فالفيلا مرة فداري وسط المدينة كل مرة فين ولات حافضة فين كنسكن ، ديما كانت كتجي عندي ساعة ولا جوج وكترجع وكانت كترفض تخرج معايا علنا خوفا من عاءلتها يشوفوها...مهم كانت كتركب معايا فالطوموبيل وكنمشيو لفسلا حدى البحر ، و واحد النهار عيطات ليا غطير بالفرحة قالت ليا انا غنكلس معاك عشر ايام...جمعات حوايجها وجات عندي قلت انا نسافرو مدام جات فرصة ، مهم سافرنا دوزنا سينمانة وبقات ليها شي 3 ايام ونرجعها بحالها، فاقت على تيليفونها كيصوني واحد الصباح شفتها نايضة كتجري تهضر فالدوش ونضت تبعتها سمعتها كتهضر مع شي واحد كتقولو الله يجيبك على خير ، تنويت ديك الساعة ورجعت لفراش باش تعرفنيش كنت كنتصنط ليها خرجات من الدوش كتجري دغيا جمعات حوايجها وقالت ليا نرجعو دابا وخاصها ترجع حيت واليديها رجعو من السفر ، مشينا شدينا الطريق و كتقولي زيد فالسرعة باش متعطلش ، زدت انا فالسرعة والطوموبيل كطير فالطريق ، واحد الشوية ماحسيناش يراسنا تا طرنا فالسماء وتلاحت الطوموبيل وشتتات ....دخل فينا كار تا هوا كان كيجري...كانت كسيدة شنييعة بكل ماتحمله الكلمة من معنا...تهزينا للكلينيك واول ما حليت عيني سولت عليها الواليدة قالت ليا راه ماتت ...حسيت بقلبي كيتقطع وانا اصلا مرييض وكوللي مدكدك مكنتحركش وزادت حتى نفسيتي مرضات و رديت اللومة لراسي ، تعطل العلاج ديالي مدة طوييييلة حيت مكنتش كنستاجب ليه كنت مدمر ...تمنيت كن مت اتا وبقات هي ...كنت ضعيف فديك الوقت ومكسور وست اشهر وانا فالكلينيك حتى لواحد الصباح دخل عندي راجل هاز بنيتة فيدو ، وقف كيشوف فيها بحقد والبنيتة كتبكي ...معرفتوش شكون حتى هضر بصوت مبحوح باينة فيه مقصح تا هوا مريض فنفسيتو هه...عرفتي شنو قاليا
غدير: شنو؟
وسيم: كانت صدمة دحياتي ....قاليا مينسنحش ليك ومنسمحش ليها ...قاليا طعنتوني فضهري وفشرفي ، مافهمتش شنو كان كيقصد وسولتو علاياش كيهضر ، قاليا الله جازاكم على فعلتكم لا نتا لا مرتي ودنوب هاد البنية مزال

غيخرجو فيكم ......خرج وخلاني مصدوم صدمة العمر ...عمرني كنت نتخيل ان البنت اللي بغيت تكون مزوجة و والدة ، زدت دمرت كتر من اللي كتخيلي عرفتي راسي كنت كنعاشر وحدة مجوجة وكنت حاس بشي حاجة فشكل وعمرني فكرت انها تكون مزوجة وكتخون راجلها معايا و والدة من الفوق ...ضربت معاها 4 سنين...ربع سنين وانت كنبغيها ونموت عليا ...4 سنين وهي كتكدب عليا ودير السبة براجلها .. وعرفت ان العشر ايام اللي سافرنا فيها كان راجلعا سافر عند مو ودا معاه تلبنت وهي دارت السبة انا مريضة مافيها مايمشي وفاللخر مشات معايا ورجع راجلها قبل وعيط ليها وكان هاداك هوا النهار اللي درنا فيك كسيدة ...تقلب الكار وماتو فيه الناس وانا بقيت شحال كنتعالجو جسديا ونفسيا ، ماعرفتش شكون اللي خانت فينا ..واش خانتني انا اللي كنبغيها واعدا حاجة عندي الخيانة ولا خانت راجلها اللي هوا راجلها ...ولا خانتا بجوج مع بعضياتنا والضحية فينا شكون...واش انا ولا هوا ولا بنت اللي تيتمات وانا سبابها (تنهد) دارت بيا الدنيا...الصدمة الاولى الموت ديالها والصدمات التانية زواجها غدراتني وخلاتني هاز حمل لمدة عماين من بعد الحادث ...مكنعسش وديما كنتفكر الايام اللي كنت كنعيط ليها بليل وكنلقى تيليفونها طافي ...عرفت انها كتكون فأحضان راجلها ...خانتيني وخانت راجلها ...من بعد عاماين كينا قلت ليك سيفت لراجلها مرسول مجهول باش يتلاقاني ولقاني كنتسناه فالقهوى ، فهمتو مزياان انني مكنتش عارف وكن كنت عارف ماكنتش غنفكر نشوف فيها حتى الشوفة وبللي كدبات عليا ، بعد حديث طوييييل عاد تسامحنا وحسيت بالحمل نقص شوية ، حيت ربي يقدر يغفر ليا ولاكن راجلها الى مسمحش ليا مغيسمحش ليا الله وعرفت انني بقيت حي باش نراجع نفسي وان الله كيبغيني ومابغاش يقبض روحي وانا مرتاكب اكبر غلط ..الغلط اللول الزنا والتاني مع وحدة مجوجة ...لتاجأت لله سبحانو وتعالى عاد بديت كنرتاح وعرفت ان الله مكانش راضي عليا حيت الحمل اللي على كتافي كان ديما ممرضني وفاش بدا كيخفاف ورجعت مرتاح عرفت ان ربي رضى عليا وتحط الحمل وتمحات داكرتي ونسيت كلشي ورجعت كنعرف بيني وبين الله حتى لقاني بالبنت اللي تستاهل وبنت الناس شريفة وحلفت منقيصها تا نتزوج بيها الخلاصة ...الطيبون لي طيبات والخبيثون للخبيثات وانا كنت خبيث وطحت فما خيث مني وفاش رجعت لطريق الله طلاقيت مع اطيب خلق الله وهي اللي عمرات الفراغ اللي كنت كحس بيه وخطبتها من دارهم رسميا وقريب انشاء الله غنديرو العقد . كنضن واقيلا نتي مدزتيش من عذاب الضمير اللي دزت منو انا وباغا يوقع ليك كيما وقع لهاديك اللي ضحكات عليا وعلى رجلها وحتى واحد مكيدعي ليها بالرحمة لفعايلها اللي دارت ومكيدكروش سميتها واخا انا كندعي ليها بالرحمة ...واش تبغي تا نتي يوقع ليك بحالها وفعوض مايترحمو عليك الناس ينعلوك؟ ماتهناي لا فقبرك لا فحتى حاجة؟ غدير: الصمت
وسيم: عاودي فكري مزيان راكي غالطة بزااف ابنت الناس ...خلي ايمانك فالله قوي وراه غيجازيك وخودي قصتي عبرة ليك
غدير: حانية راسها) بصح... (شافت فيه بعيون مدمعة) انا منكتابش ليا نعيش مع عهد ومكيمكنش ليا نغير المكتاب...غادي نرجع بحالي ونوكل امري لله ويلا كان مكتاب ليا نبقا معاه راه حتى واحد مغيفرقنا
وسيم ؛ هانتي فهمتي دابا...المشكل دابا العويص ههه هوا منين غادي دوزي ودخلي والرجال فالبيبان ديال القصر كامل ..ويلا شافنا عهد فهاد البوزيسيون غتنوض الحرب
غدير: هههه (كضحك وتمسح دموعهو)
وسيم : نوضي نشوفو شنو نديرو فهاد الحريرة ومنين غدخلي ...ماخاص تا واحد يشوفنا ولا يشوفك راه غتوقع شي كارتة عاوتاني وانا مناقصني صداع مع ولاد خالتي وحنا بحال الخوت غينويوها فيا غلط

بعد ما بردات غدير من البكا بقا كيقلب معاها وسيم على شي دخلة تا لقاها ودخلها مشلت رجعات لبيتها ورجع هوا يكمل هضرتو فالتيليفون ، سالات السهرة دالحنة وطلعات غيثة لبيتها ترتاح و هزو ميساء فالعمارية شوية دارو ليها خاطرها بلا متشوفها غيثة ، داز النهار دالحنة وبدلات غيثة حوايجها لبسات سوميج دو نوي وتكات فبيتها بوحدها تا دخل عندها عهد لابس البلدي ، جبادور فالخضر ملكي من الطراز الرفيع مخلوق وبلغة سفرة فكامل اناقتو لقاها ناعسة، حيد حوايجو بقا بالبوكسر ودخل حداه بدا كيبوس فيها وهي ناعسة تا فاقت لقات راسها عريانة وهوا معنقها خاشي وجهو فعنقها وبلا متهضر تجاوبات معاه ...دازت ليلة حمراء تا بدا كيطلع الصباح وناض دوش هوا ياها وصلاو الفجر و ونعسو تا صبح الحال ، فاق خلاها ناعسة ومشا يتفقد غدير فبيتها ويشوف احوالها ، دخل لقاها فايقة وجالسة لابسة عباية وشاال باينة فيها شادا الطريق ، باليزاتها قدامها والدموع فعينيها، شاف فيها معجب كيشولها بعينيه غدير: عهد...انا غنمشي بحالي
عهد: ؟؟؟
غدير: انا غنمشي...بلا منزيد نعقد ليك حياتك ، كنتمنى ليك السعادة
وقف كيشوف فيها مصدوم وشد ليها فيدها وهي كتبكي قالبة وجها
عهد: كنتمنى تفهميني...مابغيتش نضلمك معايا
غدير : لا...انا اللي مكانش خاصني تعلق بواحد ملك لغيري ، انا اللي بغيت نكون معاك بأي طريقة و مابقا لي غير طريقة اللي تهديت ليك بيها...انا اللي طلبت محمد نتعطى ليك هدية بلا خبار بابا
عهد: عارف اغادير ...داكشي علاش انا مقبلتش بيك كهدية وفضلتك كزوجة
غدير: فهمت...وكنت اسعد وحدة واخا ماشي بإرادتك كنتي باغيني وانا اللي فرضت راسي عليك ، حسيت بيك فديك الوقت مجروح وماكنتش عارفة سباب جرحك ...
عهد: اللي وقع وقع دابا...سمحي ليا ، عارف راشي قصرت معاك مي...
غدير: مي الحب فوق كلشي ، كيما نتا قصرتي معايا وكتبان ليك غير مرتك حتى انا كتبان ليا غير نتا...ولاكن ماعندي ماندير نتا كتبغي مرتك وهي كتبغيك وانا غير زايدة ...يمكن كن مارجعتيش ليها كنتي فتبقى معايا مزيان واخا مكتبغيكش ياك
عهد: اه كن مرجعناش كنت غنبقى واخا غنبقى معاك جسد بلا روح مي كنت غنكمل طريقي وانا ميت ...دابا تبدل كلشي (شاف فيها بأسى) كنتمى ليك السعادة اغادير مع الراجل اللي يستاهل ديري المستخيل على قبلو ويدير على قبلك المستحيل
غدير: بدموع) متصورش شحال كنتمناها حتى انا. انا غنرجع بحالي ، وراني هضرت مع عاءلتي قلت ليهم غنرجع ...ورقتي ديال الطلاق بغيتها فاقرب وقت ... حيت تعطلت بزااف ومابغيتش نزيد نتعطل . غنحاول نبدى حياتي من جديد واخا عارفة راسي عمرني نلقى بحالك
عهد: غتلقاي حسن مني...غتلقاي اللي يبغيك ويقدرك وغيكون حسن مني حيت غيكون كيبغيك
غدير: كنتمنى...وكنقول سعدات غيثة بيك ، هي اسعد وحدة فالكون حيت عندها واحد مامنوش جوج كيبغيها ويقدرها ويدير المستحيل عليها وفوق هادشي كامل ههه زوين
عهد: ههه
عنقها وبدات كتبكي فحضنو تا تزرات وحيدات ليه يديه ماعاوداتش شافت فيه وجرات باليزتها خرجات بالزربة باش ماتزيدش ضعاف من بعد ما خدات قررها ، تبع ليها العين بأسى وهي غادية والخدم تلقاو ليها هزو ليها الباليزات وهبجات هي هازة راسها كتمسح دموعها و تجمع النفس باش مضعافش ، طلعات فالطوموبيل يالاه بغات تسد عليها الباب وهي توقفها يد ماخلاتهاش تسد الباب...

يتبع...

التنقل بين الأجزاء

صفحة القصة
سيتم تشغيل صندوق التعليقات بعد لحظات
معظم التعليقات تم إخفاءها بواسطة الفيسبوك، نحاول بكل الوسائل المتاحة إستعادتها في أقرب وقت ممكن.