مهدي و شيماء الجزء 21

لعشا محطوط وكنتسناو فيهم تعطلو لواليد كعا ديال بصح تنعيط على شيماء كتقوليا غير صبر ها حنا جاين بقينا كنتسناو حتى جاو طلعو وهيا تباليا مها كتدور فعينيها فدار لاحت ليا ديك صهد هنا هاد صهد = دار صغيرة قلت ليها باركين هنا بلاما كملات دار لأخرى غنمشيو ليها غدا ولا بعدو يمكن لواليدة ولواليد تصدمو قلت ليهم كنت مخليها ليكم مفاجئة أولاد ناس قالك والو نتعشاو ونمشيو نشوفوها قلت ليهم وخا أصلا قريبة ومشيتلها غير صباح تعشينا وبركنا شويا داوين مع بعضياتهم وبارك أنا وختنى تنوري فيها شي تصاور من تيليفون تحركنا لتما وصلنا خليتهم ومشيت عند سيكيريتي هادو ديال ليل قلتلهم بلي جيت عند دراري ديال نهار.. قاليا مرحبا حل لينا لباب دخلنا لواليدة تصدمات كتقوليا كلفتي على راسك بزااف أولدي منقدرش نقوليها بلي ولدها صغير هو مول هاد لحزاق حنا غير ضيفان هنا دخلنا تنسركلو بركنا فصالون والدين ختنى ولاو غير تيضحكو عارفهم موالفين بهادشي مكنتش باغي نجي هنا ولكن هانية بعدا تصورنا عليهم باش يعرفو راسهم معامن مناسبين.. لواليدة كتدور فلكوزينة ومعاها شيماء مشيت عندهم قلت لواليدة غدا نتحولو هنا؟ قالت ليا منقدرش أولدي بقى هنا نتا ومراتك وأنا وباك غنبقاو فديك دار.. هاي هاي على تحلوين(بصوت نزهة) أصلا عارفكم باغين تهناو مني هانية هانية وخا تنحس بالخيانة قالت ليا لا آلبغل راه غنبقى تما على ود خوك لا يجي لعندنا وميلقا حتى واحد غير يجي ونقوليه بلي تحولنا لهنا ونجيو غادين ناخدو لبيت لي تيطل على لابيسين فصيف غنولي نقز من تما ههههه ختنى شيماء كتباليا كتركل بضحك مك لهربة.. منقدرش نقوليها بلي هو لي عاطينا هاد لفيلا هو وصاني وغادي تبدا تسول شي أسئلة أنا براسي مزال تنقلب على لجواب ديالهم.. بقيت تنحاول نقنعها بطريقة أخرى ديال غيجي غادي يسول وحنا غادين نوصيو جيران يقولو ليه فين كينا دار كيما درنا لمرة لولا إلا بغى يلقانا غادي يلقانا وهيا تبدا شيماء حتى هيا أه أخالتي بقاو معانا.. وهيا تقوليا صافي لي بغيتي فاش غادي يجي لمرة جايا منخليوهش يعاود يمشي نتا دبا لحمد لله برزقك يعيش معانا نرجعو كيف لول وحسن بقيت تنشوف فيها فخاطري من نيتك دري راه يمكن تيشد كتر من صالير ديالي لي كنت فرحان بيه.. مشاو خوتنا وبنتهم وحتى حنا رجعنا لدار تنجمعو فحوايجنا شويا وصافي لواليدة كتخيط فديك لبيجامة لي تقطعات داك نهار عندها بزاااف من غيرهم ولكن هاديك عندها معاها شي قصة يمكن من غير لخطبة.. لغد ليه مشينا لديك دار أسيدي لواليدة غوفلات عليا فداك لبيت قلنالك غناخدوه هيا غناخدوه أنا غير عارفها إلا قالت غتنقز يعني غتنقز وغتولي مهرسا من شي بلاصة لا قدر الله باركين تنفطرو قلت لواليد سيدة راه سابت سابت سابت ولات باغيا تنقز من لفوق لابسين وهو يشوف فيها قاليها ديك رجعاتلك لمراهقة بلا وقت غادي تديريها غنصيفطك لداركم معانا لبراني مشفتيش رجال لي عند لباب ولكاميرات غتشوهينا لواليدة وهيا تدير فيا واحد تخنزيرة ديال لعنطبمك هههه أول مرة نسمع لواليد تيهدد لواليدة😂 وهيا تقوليا ياك أولد كرشي ياك أنا كنت غير تنضحك معاك ونتا بحال لبراح.. خلقت ليهم لفتنة وخليتهم مناقشين منها ينقصو شويا من رومانسية زايدة مخليتش شي قنة فديك لفيلا مقلبتوش مكينا حتى شي ورقة ولا كتاب ولا حتى نمرة نقدر نديرها راس لخيط ونسول على هادشي كامل منين جاي وفين تيغبر هاد لولد كل مرة عيطت على كمال ومشيت عندو للخدمة بركنا تنعاود ليه خونا كيفاش رجع ودار لي ولينا ساكنين فيها قاليا مالك فك كثرة لحسابات صافي عيش ورتاح تبرعلك مع راسك شويا تما ياك قلتي دار بلأمن ديالها بكلشي ليها غيكون تيخلصهم هو إوا صافي رتاح حتى يرجع يوصل لوقت وغادي تعرف كما قالك.. هادشي لي درت عايشين تما بعدا تنعس مرتاح فليل تنمشي نسافر للخدمة ولا تنخرج نسركل مرتاح مخلي والديا فلأمان حتى دوك سيكيريتي لي خدامين تما كتوصلهم خلصتهم من لحساب ديالو ومتيبغيوش يشدو حتى ريال من عندنا دراري ضريفين ديال بصح ولاو تياكلو معانا ديما لقص بحسابهم من لعائلة وصافي طلع واحد فيهم ساكن فدرب لول كاع ديالنا وتيعرفنا ديك لمعرفة ديال ريحة شحمة فشاقور.. لمهم قرب وقت لعرس لواليد مرة مرة تيجرني لشي بلاصة تيبدا بديك لجملة ديال جا لوقت ديال هاد لهضرة عارفو فاش باغي يديوي تنغيرها سيد كعما فخبارو بلي عصر السرعة هدا واش لجيل لي كابر مع ميا خليفة غادي يحتاجك تشرح ليه هادشي.. وصل نهار لعرس درناه عندنا فدار جديدة كنت كنتسنى لبرهوش ديال خويا يجي 100% يكون عارف بلي ليوم عرسي عرفتي مرة مرة تنطل ندور عينيا بدا لعرس تنمشي عند سيكيريتي تنسولو واش باليهم تيقوليا والو مجاش رتاح إلا جا غادي نعلموك لابدة صافي خونا مجايش لمهم لعرس كاع بنادم لي عرفتو فحياتي تقريبا حضر مريم مها جيرانا ديال درب لول وتاني ولعائلة ديال لواليدة ولواليد كلشي إلا خويا معقلتش على داك نهار لواليدة باينا فيها مقلقة كتقوليا خوك معرفناه حي ولا ميت شحال هادي مطل علينا مموالفش ليه هادشي ونهار عرسك كان هدا هو نهار لي خاصكم تصالحو فيه زعما سولت جيرانا والو مجاش سول علينا كاع قلت ليها دبا يرجع نتي عارفاه كيفاش داير صغر مني ولكن قبيح معندو ما يوقع ليه, عارفاه قبيح وهادشي علاش خافا عليه.. لواليدة فاش كتفكر مسكينا ولواليد فاش تيفكر ضربت يدي فجيب ديال لكوستيم لي ملبسني لقيت نفس لبكية لي عطاني نهار كنت غادي مسافر سيد عزيز عليه هاد لعجب منعرف كيفاش ولدني أنا ولخوادري غتكون لواليدة كتخونو تندور وكنتساطح مع بات لبنت زعما ليوم مكنتش باغي نشوفو فينما ندور نلقاه خوتنا جايبين واحد ساط تيغني وشيخات طايح كتر من نايض ولي واقف تيقول أوه مونديوه شي تيشطح شي كيتصور معانا وأنا تنفكر كاع لفيديوهات لي شفتهم فحياتي تنستجمع لمعرفة لمكتسبة منهم حتى تيباليا داك خونا لي كان سايق جاڭوار داك نهار مع خويا يمكن خدام معاه ولا صاحبو ولا منعرف سيد معرفتو واش تيشطح ولا جاي لعندي تيديرهم بزوج تيشطح وجاي عندي هرباان ليه هاد ساط وتخايل نتا لقطة😂 غادي لعندو وتنضحك خونا زعما فالملامح ديالو تيبان so serious وصحيح وتيشطح بإحتراف💃 خونا تيلوز وصل حدايا وهو يشدلي فيديا وبدا تيشطح معايا عرفتي تنتحرك معاه زعما تنشطح وبدموع فعينيا بحالا كنتفرج فشي فيلم وهاد ساط هربان ليهم من شي سبيطار...

يتبع