أنا أحترق الجزء 41

من تأليف Ghazal trust
2017

محتوى القصة

رواية أنا احترق ل Ghazal trust الفصل الثالث

جبدات ليه مقص ومشطة وبقات جالسة تابتة قدام المراية وهوا كيمشطو ليها للور وشعرو كيقطر بالماء وملوي عليه الفوطة ، تحنى على ركابيه هبط ليها شعرها تا للتحت بامشطة وسمى الله ودوز على الاطراف التحتانية بالمقص وبقا كيقاد ليها السطر حتى ولا مقاد نيشان وتقطيعة مقادة ومشطو ليها بالمشطة وناض ، جراتو قدامها لقاتو باقي فطول ديالو وهي تشوف فيه غيثة: هأ ! وماقطعتي والو !عهد: براكة راه قطعت دوري تشوفي ...صافي تقاد ولا غادي نيشان بلا ماتزيدي تنقصي
دورات وجها لقات غير تفرتيت للي نقص ليها 
غيثة: وا طلع غير شوية بعدا يوصل لي غير حتى(حطات يدها على خصرها) 
عهد: بسخرية) هه شنااهواا،؟ لااا صافي خليه هاكا جاك زوين ، وقفي نشوف
وقفات مقادة و شعر مغطي ليها المؤخرة كاملة ، بقا كيشوف 
عهد: لا برااكة هوا هداك ...هانا عاقل عليه فين واصل ، الا نقصتي منو منبقاش نهضر معاك 
سكتات وتقلقات تا بغات تبكي هوا دورها عندو وحط يدو على خدها وهضر معاها بصوت حنين
عهد: خليه احبيبة كيما هوا وانا نمشطو ليك الى عدبك
غيثة:بحزن) نتينا كتقولي معتبقاشي تهضر معايا على قبل الشعر ...خاصك غير السبة
عهد : لا منقلبش على السبة ، اي حاجة فيك عندي فيها الحق نتحكم فيها وباغي نشوفك كيما انا باغي وكيما كنت راسم البنت اللي باغي فأحلامي ...ونتي هي اللي كنت راسم فأحلامي ومكنقدرش نلمسها وكنكتفي بالشوفة فيها وصافي ، هاكا كنت كنت كنشوفك قبل منعرفك ، بشعر طوييل وفهاد اللون هادا وهاد الضحيكة هادي وهاد النضرات ونفس الحركات مي مكتش عاطيك واحد السن محدد ..فاش خرجتي من احلامي للواقع وشفتك اول مرة عرفتك انك نتي البنت اللي رسمت فخيالي وديالي انا ، ولاكن مكنتيش باغاني عكس البنت اللي كانت فخيالي ...كانت بغاني ، وفاش مبغيتينيش نتي بديت كندير المستحيل باش نساك ونحيدك من بالي مي الحقيقة اني كنت مدمن عليك قبل من متخرجي للوجود ومقدرش ننساك واخا باقا صغيرة فالسن ولاكن الهيءة ديالك متكاملة واخا الفيزاج ديالك ديال الدراري الصغار ، يعني منقدرش نسمح فيك واخا كنقول ليك منبقاش نهضر معاك 
حطات يديها على صدرو وكتشوف فيه بابتسامة وعينيها كيبريو بالفرحة 
غيثة: حتى نتينا هايدا كنت كنتخيلك ولاكن محسابليش عتكون كبير عليا و عتكرفس عليا 
عهد: كلشي فات دابا و ها حنا بجوج وزايدون ماكبيرش عليك بزااف راه فصالتك ديال وحدة ناضجة غير وجهك وعقلك اللي صغار 
غيثة: بغيت نزيد نطوال هههه
عهد: راكي طويلة فين باغا توصلي؟ باغا تولي قدي؟
غيثة: لا قد وعد وميساء 
عهد: خههه مزال متحد الطول ديالك ومزال غتجبدي وتولي قدهم 
باسها فنيفها وعنقها وخلاها واقفة كتهضر معاه وتشوف فيه بإعجاب فحركاتو و وقفتو ونضراتو وهوا حاير قدام البلاكار كيفكر و كيلبس قدامها
غيثة: بدلع) واش حتا انا عنتعشى معاكم معنتعشاشي بواحدي هنا؟
عهد: طلع حجبو)كيفاش بوحدك؟ ديما كنتعشى معاك هنا 
غيثة: كتلعب فشعرها) واش دابا غترجعني لبيتي حيت جات غدير 
عهد: لا رد

غيثة: اممم...صافي انا غنرجع راسي
دار جيهتها كيلبس القميجة كحلة وشاف فيها عاقد حجبانو
عهد: عاودي شنو قلتي؟
وقفات متلوى فبلاصتها وهوا جاي بخطوات بطيءة جيهتها لابس سروال سليم رمادي غادي للزرق والقميجة كحلة محلولة ووقف قدامها حاط يديه على جنابو 
غيثة: ايوا فلت زعما نرجع لبيتي مللي غدير خرجات من الكلينيك غنرجعو كيبحال اللول
عهد: هه...هادا بيتك ، فين ما نعست انا غتنهسي حدايا
شدها من نيفها بالضحك وهي ضحك وبدات كتسد ليه صدايف القميجة وكتحلون 
غيثة: علاش لبستي بحالي؟
عهد: بغيييت ههه عندك شي مشكل ؟
غيثة: لا ...جيتي مزيون 
خشا القميجة فالسروال الرمادي وبدا كيلبس ساعتو اليدوية الكلاسيكية وهي تشوف الخاتم فصبعو وعقدات حجبانها ، شاف فيها ماعجبهاش الحال وحيد الخاتم عطاه ليها 
عهد: هاكي شوفيه مزيان ويلا معجبكش مانبقاش نلبسو 
مشا جبد السمطة كحلة ركبها فالسروال وجبد موكاسان ديال الدان كحل مزينو بروش فضي بحال براسلي لقدام ورش بارفان حدا ودنيه وفيدو وشاف فيها بنص عين 
عهد: يالاه جمعي داك الشعر وغطي داك الراس 
سهات فيه بإعجاب وريحتو فايحة فالبيت وبقات مسمرة كتشوفيه تا فاقت من القلبة لقاتو جمع ايها شعرها وكيلبسها الفولار 
عهد: غتبفاي كتشوفي فيا بحال هاكا ؟ مغتعطينيش خاتمي؟
نتابهات و شافت فالخاتم باش ترجعو ليه وهي تلاحض الدورة الداخيلية ديالو منقوشة ، بدات كتشوف وهوا يبان ليها الاسم ديالها فيه وابتاسمات مازادت تا كلمة وهزات راسها فيها لقاتو مبتاسم وماد ليها يدو
عهد: يالاه رجعي الخاتم لبلاصتو
غيثة : كتلبس ليه الخاتم)وانا فين خاتمي؟
شاف فيها وضحك وزاد جوج خوات قدامها هز الهدية ورجع عطاها ليها 
عهد : فاش تنزلي غتعطي هادي للواليدة ومتقولس والو ، واخا تهضر بقاي ساكتة
شافت فيها مخلوعة
غيثة: عادي تغوت عليا؟
عهد: لا ...نتي غير عطيها هادا وبقاي ساكتة 
شدات الكادو ولبسات صباط اسود مرصع بالاحجار وشد ليها فيدها وغادي كيداعب يدها بصبعانو بعفوية ، هبطو مع الدروج وهي كتشوف كلشي جالس فالطبلة من غير غدير تلوحيدة اللي مهرسة باقا مكتحركش. نضال ومروى وملاك ونور وميساء و كرم كلهم بقا كيشوف فيهم وفالحلة اللي نزلات فيها غيثة والتغيير اللي بان عليها واخا مستورة باينين يديها ولاو عامرين وبياضت ولاو كتشعل و وجها منور بان فيها الخنات والفشوش ، وقف عهد بكل كبرياءو قدام مو وقف قدامو غيثة وهي كتفتف حشمانة وقصيصة كتخرج من الشال وعهد كيدخلها بصبعو ، هزات مروى عينيها فيها مصدونة وشافت فنضال حشمات وهوا كيتسنى ردت فعلها ، وقفات عازة رسها وغيثة حانية راسها مدات ليها الكادو وعهد كيدوز يدو مور ضهر غيثة باش ترتاح ، بقات مروى واقفة والانضار عليهم وتنهدات وبلعات ريقها وقبلات الهدية من غيثة ، شداتها حطاتها قدامها فوق الطبلة وشافت فعهد حرك ليها راسها بالايجاب ومبتاسم وهي تحط يديها على غيثة وهزات ليها وجها وضحكات ، بقات غيثة كتشوف مافاهمة والو تا عنقاتها مروى وهي تبادلها نفس التعنيقة وفرحانة وماعارفاش اش واقع 
مروى: مرحبا بيك فعتءلتنا ابنتي 
غيثة : !
دورات مروى وجها وهزات علبة مستطيلة وحلاتها قدام غيثة وجبدات منها براسلي من الالماس وركباتو ليها فيدها وكتهضر بلباقة
مروى: مبروك عليك البيبي 
غيثة: بارتباك) ل.لل.لله يبارك فيك شكرا
نضال شاف فعهد وغمزو وعهد رجع ليه الغمزة وشد فيد غيثة وداها لبلاصتو فين غيكلس ، جر ليها الكرسي جلسها وجلس هوا على رأس الطاولة مقابل مع باه وكيهضرو بالعينين ويضحكو غير بوحدهم ، بقات ميساء مصدومة فغيثة والتغيير اللي واضح عليها ، كرم نخز مروى وهمس ليها فودنها
كرم: شكون هادي اللي مع عهد؟
مروى: مرتو ...واش غنبقى نعاودها ليك كل شوية 
كرم: وهاديك اللي لفوق؟
مروى: تا هيا مرتو ...واهنينا ونتا مكيجيك تسول حتى كايكون كلشي جالس.
كرم: ايوا نعرفو معامن كالسين ماشي نجلسو وصافي
مروى: مهم نتا عاقل على عهد ...ايوا الى شفتي معاه شي وحدة عرفها مرتو 
كرم: اممم...مزيان 
جلسو كيتعشاو وغيثة مرتابكة ماكلاتش فخاطرها ويالاه جلسو شوية وهوا ينوض عهد 
عهد: بالانجليزية) مهم بصحتكم وامسية سعيدة 
شد لغيثة فيدها وغمزها باش تنوض ، ناضت مدهشرة مافاهمة والو وهوا شاد ليها فيدها خرجها مع الباب تا خرجو وهي تسولو
غيثة: الليل...فين عنمشيو؟
عهد: زيدي وسكتي مالك ...ياك باغا تخرجي ؟ ايوا يالاه نخرجو
غيثة: فين؟؟ فهاد الليل
شافيها وضحك وماعاودش جاوبها وهي غادية معاه شادة فيه وهازة جلايلها والشال كيزلق ، حل ليها بابا الطوموبيل ركبها وركب حداها 
عهد: صافي غير حيدي داك الشال وطلقي علينا الشعور فقصينا وحنا سايgين ههه
غيثة: فين عنمشيو؟
عهد: علاش فيك الاسءلة بزااف ...مالكي خايفة نهرب بيك؟
سكتات وديمارا الطوموبيل خارج وشير ليكارد كورد يتبعوه ومشا طلع الزاج ديال الطوموبيل اللي مكيبينش شكون جالس وحيدات الشال والفوقاني ديال اللبسة وبقات بكتافها عريانين غادين فكريق لوطوروت وشاد ليها فيدها فجو رومانسي فالطوموبيل.
الكااالم وغيثة عينيها كيتلسقو ولات فشلانة وغير مرخية والسخفة ديما شاداها وعهد مقابلها كل مرة يحركها ويضحك معاها شاف فيها بنص عين مبتاسم وهي متكية راسها وطالقة رجليها مقلزاهم فالطونوبيل 
عهد: سافا احبيبة؟ عيتي؟ 
حركات ليه ليه راسها يمين يسار وهي ساهية مرخية شادة القرعة دالماء فحجرها
عهد: واش هاكا دازت عليك فاش كنتي حاملة؟
غيثة: بلسان تقيل) لا ...كنت كنعيا ونسخف بلحق ماشي بحال هاكا ...دابا ختى النفس كنطلعا بزز وقلبي مزير مكنقدرشي حتى نتحرك ، ماعرفتشي مالي هاد المرة
عهد: لاس لها يدها) غنوصلو وترتاحي وتشوفي الطبيبة عاوتاني ...عنداك يكون فقر الدم
غيثة: لا...الطبيبة كل نهار كتجي عندي تعطيني الدواء والفيتامين وكتقولي كلشي مزيان ماعندي والو 
عهد: شحال تكون دابا عندك؟
غيثة: دابا 4 شهور .
حط يدو على كرشها وعينيه ضاحكين
عهد: تبارك الله دغيا دازت 4 شهور...مي الكريشة مبغاتش تبان!
شافت فكرشها وحطات يدها على يدو كتفحصها
غيثة: هايدا كانت فاش كنت حاملة بذهب ...مكانتشي باينة مرة ومكنتشي عترفة كاع راسي حبلة
عهد: شاف قدامو وهوا سايق)ولاكن خاصها تبان راه 4 شهور هادي...ونيت نشوفو شنو عندك واش بنت ولا ولد...شحال كتوزني دابا؟
غيثة: ههه 
عهد: هههه غير قولي باااينة مكحلاها
قلبات وجها كضحك وعينيها كيبريو حشمات 
عهد: 64؟ ولا 66 وطول تكون عندك ديك اممم....مترو و 76
شافت فيه مصدومة
غيثة: باش عرفتيها؟
عهد: و غير قدرت عيني ميزاني ...جيت فيها؟
غيثة: كنوزن 64 وطولي مترو 76 !
عهد: تبااااااااارك الله هههه وباغا قالك تزيد طوال ...باغا تولي قدي؟
غيثة: هييه ! واخا نعيا نتجبد منوصلكشي
عهد: باركة عليك من الطول ومن الصحة ، الا زدتي غتولي مشحمة وحنا براكة علينا اللحم مابغينا شحمة 
غيثة : قلبات وجها معفرة) بصحتي 
عهد: هههه فخبارك الا زدتي كتر من هاكا ماغتقدريش....احم مهم تولدي وديري الريجيم باش تبقاي فنفس الوزن ديالك هاكا مزيان 
كان بغا يقوليها متقدرش تولد حيت البيبي غيتزاد الوزن ديالو تا هوا فكرشها ورجع سكت باش ميخلعهاش وهي مخلوعة بوحدها وعلا سبة وديما كتخمم وساهية بالنسبة ليها الحمل بير وطاحت فيه وكابوس كتعيشو وتقيل تفكر فيه وفالولادة والحمل والهم اللي هازة من جيهت الحبالة مهازها تا واحد فالدنيا لدرجة كتبغي تبكي فاش كتفكر انها كتقرب من الولادة والفكرة دالوجع والحريق والموت اللي شافت ماقدر حتى واحد يحيدها ليها من عقلها وتعقدات من جيهت الولادة ، حتى حاجة مابقات كتحلى ليها ولا تريحها او لا تعجبها وعارفة راسها مغيفكها تا واحد ، بالنسبة لعهد فهوا عارف ان العيا والسهوة والكالم اللي هي فيهم ناتج على هموم الدنيا اللي هازة من جيهت الحمل وكيحاول ينسيها و داير ليها الخاطر و غادي معاها غير بالسياسة باش متفكرش تآدي راسها ولا تزيد تأزم ، وخلى عقلها الصغير يفكر ان عهد هوا اللي غيفكها ويعاونها ومتقصحش ومتعدبش وكتشوف فيه داك الشخص اللي غيهز عليها عذاب الولادة كامل من خلال الهضرة والدلع اللي معيشها فيهم ومآمنة بأنه ميخليهاش تعذب لانه كيبغيها ومكتخصرش ليه الخاطر باش ميخليهاش وتعاود نفس التجربة اللي عاشتها من اللول ، دخلات لراسها فكرة انه واعدها مغتعدبش ومع ذلك كابوس الولادة فاش كترجع تفكرو كتخنق وتقج ومحاملة تا واحد والوقت كامل وهي مكمشة و داخلة سوق همها كتفكر فحريرتها .

جبدات عليها بنعسة وهوا غادي حداها سايق الطوموبيل كل مرة يداعب كرشها ويديها حتى وصل ، نزل حل عليها الباب وهزها ناعسة وهي تحل عينيها فاللحضة اللي هزها فيها .شافت فيها مخلوعة وابتاسم ليها مع صوت حنينعهد: متخافيش هانا معاك ...وصلنا غير رتاحي
دورات مومو دعينيها فدهشة كتكتاشف ارجاء المكان وشعرها مدلي وغادي بيها بشوية باش تشوف على خاطرها . المكان بحال شي فيلا صغير عندها باباها وداير بيها صور لونو ازرق فاتح والدخل فيها جردة صغيرة فيها اضواء خافتة مكتبينش المكان مزيان، . دخل طوموبيلتو لداخل وخلا ليكارد كورد برى ، سمعات حس شي حد موراهم داخل وتلفتات شافت المساعدات ديالها هازين شاوانط صغار ديالهم ودخلو نيشان لداخل ، دارت قدامها لقات الباب محلول و واقفين جوج خدامات فالباب فاستقبالهم ، دخلها هازها بين يديه وهي معنقاه من رقبتو مكمشة فيه خايفة من خيالها وكدور فعينيها ومكمشة رجليها ، شاف فيها ضاحك 
عهد: مناش خايفة؟
غيثة: الصمت
ماجاوباتوش وبقات كدور عينيها فالفيلا ، ماكبيراش بزاف بحالها بحال الفيلات العصرية الحديثة البناء ، عندها صالون كبير على ليمن وصالون على ليسر وبجوج مفرشين فراش عصري ، واحد احمر بليطابلو فالحيط مع الوان مواتية للصالون ومقابل معاه صالوم ابيض مع ديكور فيه الوان فاتحة ومأتثة بأحدث الاثات ، وأحدث انواع الصباغة و اضواء خفيفة مكتعميش العين ، وهي واقفة فالباب ديال الدخلة بان ليها فدامها نيشان باب اخر كبير ديال الزاج بحال شي حيط من الزجاج واصوات مغريباش عليها ، داها عهد لداك الباب وبرك على زر باش انساحب الباب لجهة اليمين وتحل وهوا يضربها الهواء دالبحر وجردة محلولة كاملة على البحر واصلة ليها المرة تا للدرجة الاولة ديال الباب ، بقات كتشوف وتسمع اصوات الامواج مجهدة والرمال المحيطة بالفيلا كاملة مستفين فوقها كورات بيضين كبار مضوين بلون ازرق البلاصة ومشتتين فارجاء الجردة وفوق الرمال كل وحدة فين ، شافت على ليمن لقات فوطوي خاص باجواء البحر مفرش باللون الاحمر منو للرملة وشافت على ليسر لقات جلسة فالارض ، زربية طويلة وفقها المخاد مبار ومنفخين بالالوان وحداهم زعلولة من القنت للقنت مصنوعة من الشبكة ومدليين من جنابها المجادل ، حتى بركاكات مزيان عاد بدات كضحك وشافت فيه

غيثة: ههه...حنا فالبحر؟عهد: هاد المدينة سميتها الجديدة ...عجباتك البلاصة؟
غيثة: فنننة
عهد : ههه نتي اللي فنة...شنو طلعي للبيت ترتاحي ولا تبقاي هنا...كاين انا ونتي واللنات اللي معاك وجوج خدامات لا غير ...والرجال مكينينش وهاد ليسباس ديال البحر محصور وممنوع شي واحد يوصل ليه ومسدود ...تعومي بوحدك حتى واحد ميصدعك
غيثة: ههه صافي نجلسو هنا 
نزلها وحيدات صباطها ونزلات للرمة كتمشى وتجرجر الكسوة ، مشات نيشان للزعلولة ديال الشبكة وشافت فيه
غيثة: نركب؟
عهد: ههه طلعي بدلي حوايجك راه كلشي لفوق واجي نهزك فيها
رجات كتمشى فوق الرمال المسطحة اللي ملسوها باش متبقاش تلسق فالرجلين وقادو الارض وسطحوها فعبار واحد باش حتى الى مشا فوقها شي واحد متغرقش رجلو فالرملة ، دخلات كتشوف وضحك بعفوية وطلعات مع الدروج درجة بدرجة كتشوف فيهم بحال الى مكتزطم على والو لان الدروش من الزاج اللي مكيتهرسش وكيبان ليها لتحت كلشي لدرجة طالعة وخايفة ، وصلات لفوق لقات كولوار صغير فيه 4 دلبيوت والبقية كامل محلول كيطل على البحر بحال شي سطح معري ومفرش كامل ومضوي فالفايوزات فالارض مربعين ، دخلات لبيتها شافتو وعجبها ديكور ديالو ولون الرمادي مع الابيض والاسود . حلات البلاكار لقات حوايج صيفية مستفين ، بدات كتشوف و واقفة حايرة شنو تلبس، جلسات كتقيس وتحط وجبدات كسوة حمراء معرية من الصدر على شكل قلب وشادينها خيوط رقاق من الكتاف ، بينات ليها صدرها وقصيرة حتى لفخادها ورطبة ، لبسات صندالة دالصبع ونزلات كتلعب بشرعها عاواتاني نازلة وكتقفقف فالدوج ديال الزاج وخايفة تزطم . هبطات كتشهد تا وصلات لتحت وخرجات عندو لقاتو حيد القميجة ومتكي على الزعلولة المشبكة وهاز يدو فوق راسو كيمشي ويجي فالزعلولة ، وقفات حداه كتفرنس وحركاتو ، هز راسو فيها وطلع وهبط عجباتو فديك الكسوة الحمراء ، ناض هزها طلعها عليه 
عهد: ااااجي يا جي ياللي قالت لك باغا طوال وهي فيها مترو و 76 ويالاه عندها 18 لسنة
خشاها بيه رجليه دار ليها بلاصة وتسرحات على صدرو فوق الزعلولة فرحانة 
عهد: قبل متعرفي راسك حاملة كانت عندك شهر ياك
غيثة: اه
عهد: وعندك شهر ونتي ساكتة!! ماحسيتيش براسك؟
غيثة: باش غنحيس؟
عهد: شي حاجة شي لعبة باش كيحسو الناس ، راكي حملتي واقيلا مور العيد الصغير بشي سيمانة (ساهي كيفكر) كنا تلاقينا نهار التالت مور العيد ورجعتي نتي لتطوان تبعتك ياك...تما وقع اللي وقع يمكن فالنهار اللول حملتي ومن تما حتى لنهار عرفناك حاملة! او السيدة عندها شهر وحنا ماعرفينش؟
غيثة: وراه معرفتشي كيفاش غنعرف!
عهد: (كيحسبها فدماغو) بلاتي الا نتي كانت عندك شهر ...! هههه واش عارفة شحال عندك ولا لا؟
غيثة: بلسان تقيل) 4 شهور
عهد: من تيتك؟ راه ياالاه شهراين منين جبتي شهراين لوخرى ؟ قالتها ليك الطبيبة؟
غيثة: لا 
عهد: دوختيني !! بلاتي راه مينكنش تكون عندك 4 شهور وانا ونتي مور العيد الصغير نعسنا ، يالاه عندك شهراين الغزالة كي درتي لهاد 4 شهور ! (تنهد) اففف خلعتينا كاع ، غتكملي شهراين مع العيد الكبير ...وبقات ليه 3 ايام غتجيبيها لاسقة ....بفف وانا كنقول فيناهيا الكرش مالها مكتبانش
غيثة: لا رد
حرك عينيه فيها لقاها ناااعسة وهوا كيهضر بوحدو وهي كتشخر

شافيها ناعسة حاللة فمها وعينيها مجبدين وبدا كيضحك ، قاد ليها راسها وزاد طلعها عندو وهي ميتة كتشخر ، خشات وجها فعنقو وعنقاتو وكمشات رجليها بين رجليه وبدات كتهضر فالنعاس وهوا حال عينيه نص حلة فيه النعاس كيتسنط ليها والزعلولة كتمشي وتجي بيهم ، صوت الامواج وريحت البحر والندى كيهبط عليهم والسكااات والهدووء واضواء خفيفة ، جو رومنسي كيجيب النعاس والراحة والسكينة ، جابت ليهم مرى كبيرة خدامة فالفيلا غطاء فالرمادي رطب ومزغب فيه ريحت المعطر داوني بريهت الخزامة منعش، فطاتهم بشوية وهما ناعسين وعهد معنق غيثة بيديه بجوج وناعس ، بقاو دوك الضواو شاعلين الليل كامل حتى بدات الشمس كطلع ضربات فيهم وهما يطفاو تلقاءيا وضوات الشمس بخيوطها الذهبية ضربات فعهد وحل عينيه بزز بغا يتحرك لقا غيثة غارقة فيه ومكمشة فيه، حيد لغطا لاحو فالارض لقاعا سخونة وصهدات وصهداتو تاهوا ، بقا خال عينيه كيتمرجح تا بغات تقلب وتبدل لابوزيسيون وهي تفيق شافت فيه وهزات يدها دوزاتها على وجهو وعنقاتوغيثة: نعيست حَوْلة!
عهد: نعام احبيبة؟
غيثة: ااي ...عواجيت
عهد: يالاه احبيبة نوضي بشوية عليك ...اجي بعدا
شد ليها راسها باسها من فمها وبقا كيبوس فشفايفها وحدة وحدة وفحناكها وعنقها بلطف ويرجع لشفايفها ويعنق فيها بحال شي بنيتة صغيرة 
عهد: سيري ابب دابا نعسي فبيتك (شاف الساعة فيدو) باقي الحال هادي يالاه 7 
شافت قدامها لقات البحر هاادء ونقي وصافي وشمشية بديال الصباح باردة و مشرقة وصوت العصافير كيغردو ، بان ليها المكان بمنضر اخر واضح وعجبها وهي تبتاسم 
غيثة: مابقاشي فيا النعاس 
عهد: بابتسامة)بصح
عنقها كيداعبها وكل شوية يبوسها فبلاصة 
عهد: عرفتي لبارح شنو قلتي ليا
غيثة:بدلع) شنني؟
عهد قلتي ليا لبيبي عندو 4 شهور ونعستي خليتيني كنحسب بوحدي
غيثة: هأ ! وراه نسييت ههه
عهد: ههه كتفلااااي واجي لهنا نوريك تفلية
شدها كلاها بوسان وعضان وهي كتغوت وضحك تا دمعو عينيها بالضحك 
عهد: دوختيني لبارح لحسك تا جست كنقول اواه هادي امتى حملات!!!
غيثة عجبها الحال وكضحك بحال دارت انجاز وفرحانة قولباتو وكضحك من نيتها وهوا زايد ليها فيه دايها على قد عقلها باش يشوف الضحكة فعينيها وحركاتها الدلوعة وهي كضحك 
غيثة: هههه شحال دابا عندي ؟
عهد: ههههه وانتي اللي حاملة نتي اللي تعرفي
غيثة: نسييت
عهد: شد ليها يدها) هانتي تفكري ...فاش كنتي مريضة و ورجعتي من الكلينيك تصالحنا وغضبتي مشيتي لتطوان ، تبعتك ياك
غيثة: ههه اه
عهد: كضحكي ههه عجباتك هادي
غييثة: اه هههه
عهد: والله ينعل حسك ههه ...سمعي باش ماتجي تقولي ليا عندك عاماين ومزال ماولدتي ..مهم تبعتك وديتك لطنجة قولبتيني وكانت فيك ليغيكل
غيثة طلقات ضحكة تا لسما فاش قاليها قولبتيني وعجبها الحال بدت كضحك وهوا كيشوف فيها ويضحك على ضحكتها وكل مرة يطير عليها ببوسة
عهد: ويالاه سمعي دابا...مهم من بعد فداك الاسبوع نعسنا دونك تما غتكوني حملتي وهادي دابا شهرين من داك الوقت لدابا و العيد الصغير والعيد الكبير بيناتهم شهرين وعشر ايام ياك
غيثة: شحال؟
عهد: شهراين وعشر ايام (كيحسب ليها فصبعانها) شهر ديال رجب وشهر ديال ذو القعدة هي شهرين و 10 ايم ديال دو الحجة يعني نتي خاملة ظابا ب شهرين فهمتي
غيثة: ايوا و 10 ايام اللي بقات
عهد: هاديك منحسبوهاش عليك فالحمالة حيت فيها كنا كنعسو وماعرناش النهار بالضبط اللي حملتي فيه يعني غنحسبو غير شهرين وصافي والعيد الكبير بقات ليه 3 ايام وهاكا غتكون عندك شهراين ديال الحمل بالحساب بلا منحتاجو تقولها لينا الطبيبة فهمتي
غيثة: مافهمتش
عهد: مهم باختصار بين العيد الصغير والعيد الكبير شهرين و 10 ايام ونتي مينكنش تكون عندك شهراين وعشر ايام حيت فديك العشر ايام كانت فيك سيمانة ديال ليغيكل ومن موراها نعسنا قبل ماتسالي العشر ايام الزين فهمتي وفاش نعسنا فالنعار العاشر دخلنا فشهرين اللي بقات باش نوصلو للعيد الكبير وها حنا دابا بقات لينا غير 3 ايام يعني نتي عندك فالحمل شهراين بالحساب غتكمليها مع العيد نيشان وبان لينا النعار اللي حملتي فيه يعني هوا النهار العاشر اللي نعست معاك فيه وتما دخل عاد البيبي للي نتي هازة دابا فداك النهار العاشر واحللي عقلك شوية راه شهرين اللي عندك 
غيثة بقات كتشوف فهمات ومافهمات ودوخها بالحساب بقات غير كتحرك راسها ، شافها مفهمات والو وهوا يبوسها
عهد: يالاه نوضي تصلي و تحفضي باش تعلمي تحسبي وانا غنصلي ونهبط نعوم (كيتكسل) ااااه توحشت البحر
غيثة: كتحلون) نعوم معاك؟
عهد: نوضي يالاه تصلي ونديك تعومي شوية 
ناضت عاجبها الحال وكتكسل قدامو وهو كيتفرج فصدرها مبندر وغادية قدامو كتكسور وتلعب فالحلاقات للي جاب ليها فودنيها

غيثة مشات وعهد ناض كيضحك ويهضر بوحدوعهد: هههه واللهيلا عالام هاد البنت للي بقاا تابعها غتسطيه .
من بعد ما خربقها ودوخها وتلف ليها الحساب مزيان باش متشدش الحساب وماتبقاش مخلوعة من وقت الولادة تأكد انها مابقات عارفة شحال عندها ومابقاتش شادة الحساب وهو بلعاني بقا كيخربق عليها باش دوخ وما رتاح تا دوخها مزيان عاد طلقها و خلاها غادية ناشطة ، مشا طلع عندها لقاها كتوضى وصلى بيها وباسها وعطاها القرآن تقراه
عهد: انا غنخسب ليك بلا متصدعؤ راسك مع الحساب ...نتي كولي وقراي ونعسي باااركات عليك والولادة باااقة بعيييدة غير رتاحي 
باتاسمات و جلسات كتقرى القرآن وكتهجا ونزل هوا لابس شورط قصير كحل مشا نيشان وقف حدا البحر لقى الامواج سخفانين وماعندو فين يسورفي ، مشا دخل للبحر كيعوم فالصباااح تا بانت ليه غيثة جاية كتكسول بالمايو ابيض سيكسي ودافرة شعرها كرينات وحدة فليمن وحدة ليسر والفرة فالشعر والقصيصية فوق العينين مسبسبة وجاية كتبوزة ، يالاه هز عينو فيها تفكر الحساب والتلفة للي تلفها وبدا كيضحك بوحدو وتعرض ليها وهي داخلة كتفيبري فالماء وهوا كيشير ليها تجي عندو ، هزات يديها كتفيبري وكتعيط بصوت مرتفع
غيثة: وااا البااااارد ....المااا باااارد
عهد: من بعيد) واااا دخلي ههه 
شيرات ليه بيدها مابغاتش دخل وتمات راجعة 
عهد: بصوت مرتفع) غيييييثاااا...واااالحمقااااا ههههه وااااجي ماتخافيش
عطاتو بضهرها وتمات راجعة منين جات ماجاوباتو و هوا كيعيط ، جلسات فالرملة كتشوف فيه بدوك الكرينات مغوبشا وهوا كيشير بيدو ليها باش تجي عندو
عهد: وااا سخوووون غير اجي
قلبات وجها ماجاوباتوش وسرحات رجليها قدامها كتحفر فالرملة ومابغاتش تشوف فيه باش ميقوليهاش اجي و كيموت بالضحك عليها وهي زعما ديرة راسها مكتسمعش وماباغاش تشوف فيه ، خرج عندها فازك كيرجع شعرو لور والماء هابط مع ضهرو وصدرو ، ركع حداها متكي على ركابيه كيضحك وكيشوف فيها كتحفره 
عهد: علاش مابغيتيش تجي
غيثة: بعد مني
عهد:كيضحك) مالي اش درت ليك ؟ ماشي انا انا للي جلدت الماء من التلاجة وخويتو فالبحر باش نتي متعوميش
غيثة: كتحفر) كتفلى عليا ...تينا عااارف الماء بارد بحال الجليد ومعيط لي ياتا زعما نعوم 
عهد هههههههه والله مابارد ...لداهل سخون (شد ليها فضفيرة ليمنية) شنو هادشي ههه
جرات الضفيرة ديالها عندها وغوبشات وماجاوباتوش وكملات الحفير فالرمة ومفرقة رجليها 
عهد: كيضحك) فكرتيني فواحد المعزة كانت عزيزة عليا فالفيرما دنور ههههههه
ناضت مرضاتش جمعات الضفيرات ديالها وتمات غادة وهوا تابعها كيتشتت بالضحك وكيبغي يجرها من الكرينات وكدفعو
غيثة: الزمر بعد منيييي ...شني باغي غلاش كتجرني من شعري؟؟
عهد:واغير كنضحك معاك المعزة باغدون ...بغيت نقول الغزالة ههههه
دارت عندو مضرب بيديها بحال الفرفارة وكدفعو وهوا يهرب ليها كيضحك وهي تابعاه كتجري بكريناتها مغزفة عليه باغا تشدو ، هارب كيتشتت بالضحك وكيوقف تا كتقول غنشودو وكيفلت تا كتبغي تفركع وكتبقى تشتف فبلاصتها
غيثة: وااا علااااش الزمر خليني نضربك 
عهد: ايلا شديتيني ضربيني 
غيثة: وامشي دخراا مالعباشي 
فرشات راسها باللي باغا تلعب معاه داك اللعب وشاف فيها كيمووت بالضحك ورجعات غادية غضبانة كتشوف بنص عين وهوا مورها ، تا كدور على غفلة تشدو وكينقز كي الزواق وكتشد البرد وكتصدق فارشة راسها وترجع تغضب

بقا معاها كيدور بيها من هنا ومن هنا وهيا غادة مكمشة فمها شادة الضحكة كتشوف فيه وكتسنى الفرصة فين تشدو ، بقات غادية رادة ليه البال تا غفلها وهزها كتركل وضربها بجرية جيهت البحر: شافتو غادي كيجري بيها وتفكرات الماء بارد وبدات كتفرطط كي الدجاجة البلدية، جرية وحدة دخل فالماء كينقز تا مابقاش قاد يجري فالماء وهوا يزلق هبط هوا وياها تحت الماء وبقاو الدفيرات منشورين مل وحدة فجهة ، جراتهم الموجة جرة وحدة لداخل وهي تهز راسها كتلهت والماء داهل من فمها وخارج من نيفها و ودنيها طرطرو ولاو فحال البندير كيزنزنو بالماء ، بدات كتسب وتعرق ليه وهي تنتابه ليه مكاينش وغير بوحدها فالماء ، بدات كتعيط عليه بعصبية وهوا يجرها من رجلها تحت الماء تا غرقها خلاها كتبقبق وحالة عينيها كتشوف فيه وهوا حابس الضحكة بسيف وشادها من رجلها مابغاش يطلقها ، بدات كترفكل كي القطة فاش كيشدها شؤ حد من رجلها ، ما طلقها تا ولات حمرة وطلع لسطح الماء على ضهرو كيضحك وكتلوى عيها بالضحك وعينيه كيتسدو وسنانو مستفين تستيفة ودة يشعلو وحفيرات الزين مح اللحية بانت عليه البراءة وهوا كيضحك من نيتو ، اما هي كتشوف فيه شوفات العدو وكتنهج مدارت حتى حركة وضارت كتعوم بغات تخرج غضبانة ، داز ليها من للور وحل ليها السليب من الجناب تسل مع الماء وخلاها عهد: يالاه خرجي دابا هههههه
غيثة وصلات بيها للطوب وبدات كضرب الماء والضفيرات كل وحدة شادة اتجاه والقصة لبدات ليها على جبهتها ولات بحال ديك القطة المزغة الل كيخويو عليها الماء وكيسخف الزغب ، هرب عليها كيشير بالسليب وهي تابعاه فالماء كتسب وتلعن ماقادراش تخرج بلا سليب تا سخفات تابعاه و هي تقلبها بكا ، هزات يدها حدا نيفها كتبكي وخوا يجي عندها بسهوولة فالبلاصة لبس ليها سليبها فالماء وهي تشقمو وطارو الدموع وشداتو من شعرو بدات كتجر وهوا كيضحك وشاد ليها يديها 
غيثة: هاااا شبرتك دابا يا الحلووف 
عهد: ههههه الشعر لا ههه الشعر لااا ...طلقي الله ينعل هههههه اجي لموك غانتي لتعرفي تنتفي
جرها من كريناتها وهبط هوا ياها فالماء خلاها كتبقبق تا شحفات وطلق منها وطلعو كينهجو ، هي كتنهج بالمشادة والسخفة اللي سخفها وكيغلب عليها وهوا كينهج بالضحك تا تغرغرو عينيه ، تعصبات وجلسات تصرفق فالماء وضرب
غيثة: متبقاااشي تلعيب معايا هاد اللعب واش انا قدك ؟؟ شوف زرفتي ليا لحمي وكتافي بالشدان ونتفتي لي شعري 
عهد: وا ضاحكين المعزة اووبس الغزالة 
غيثة: ماضحيكش معايا صافي 
عهد: بجدية) اوك صافي منبفاش نضحك معاك 
صدمها بردة فعلو ومابيناتش ليه الصدمة وحساب ليها غيبقا يزاوك فيها وهي تشطحو عاد ضحك معاها ساعة تقلبات الاية وبدا كيدرع بيديه وهي مصدومة تبعاتو تا خرجو من الماء ومشا هز فوطة دار فيها مقلق وهي نتادم معاها الحال وبقات تابعاه بعينيها ، هزات فوطة ديالها تلوات فيها وتمات طالعة لبيتها، دوشات ولبسات بينوار بيض وخرجات لقاتو دوش وكيمسح شعرو ، كانو يديها فزمين ودازت حداه رشاتو وبدات كضحك وهوا يدور عندها بجدية
عهد: علاش دابا باغا تلعبي ؟ ياك قلتي صافي منبقاش نلعب معاك ؟ ايوا صافي اخر مرة نضحك معاك ، مشا وخلاها واقفة وقلب الدورة وبدا كيضحك عليها بلا متشوفو ، تقرصات وبدات كتلبس حوايجها ونشفات شعرها طلقاتو ورجعات كيوت من جديد ولبسات كسوة معرية مايلة من الكتاف واصلة حتى لركبة فالموطارد وفيها ريشة مرسومة فالازرق فالصدر وصبيبيط كيوت بلا فالموطارد فيه موزونات فالازرق ، نزلات كتكسول شافتو شاد تيليفون وجالس غير بالشورط عاطيها بضهرو ، بدات كتختل وهي تشد فيه من اللور زعما خلعاتو
غيثة: عوووو خهههههه
مفاقش ليها من النعاس ومتحركش ليها ومضحكش وشاف فيها بتكبر ومرضش عليها وهي تجمع الضحكة مارضاتش وحشمات تجلس حداه من بعد الفرطة اللي دار ليها وتسلتات غير بشوية تمات غادية كتلعب فاطراف شعرها وساهية مقلقة، هز عينو شافيها بابتسامة وهي غادية محبطة خارجة جيهت الارجوحة، مشات جلسات فيها بملامح حزينة وخوا ينوض داز من حداها بلعاني ودار راسو مشايفهاش ، ناضت بغات دير محاولة اخرى وهزات البخوشة صغيرة ومشات موراه حطاتها ليه على كتفو وبدات كتغوت باش يخلع
غيثة: عندااك عنداااك هيييه 
شاف كتفو وطير ديك البخوشة بصبعو وشاف فيها مطلع حاجبو 
عهد: مكنضحكش
دار فيها ومشا خلاها كتنفس بسرعة وهما يفضحوها عينيها دغيا بدات كتبكي وتخبات مور واحد الحيط مارضاتش يدير ايها هاكاك وبدات كتبكي قاطعة الحس ، مسحات دموعها بزربة باش متبانش فيها بكات وهي دور بغات ترجع ، مع الدورة لقاتو واقف موراها مربع يديه ، بدات كتفتف وتمتم وتلف الهضرة وتشوف لتحت وهي تحرك بغات تمشي وجرها عنقها تا تهزات من الارض وشدها من خصرها بيد اليسرى وشاد ليها الرقبة ديالهاباليد السمنى وباسها فعنقها وهي مكمشة دايرة فيها غضبانة وماقدارش تشوف فيها بعينيها مدمعين 
عهد: غير كنضحك معاك الحب ...واش نقدر نتقلق من الليمونة ديالي هههه
شافت راسها لابسة الموطارد غادي لليموني وهي تغوبش 
غيثة: لعبك خايب
عهد: ايوا صافي منبقاوش نلعبو ...صافي
غيثة: لالا غير كنطحيك ماخايبشي
شاف فيها كيضحك ورجع عنقها
عهد : اجي نوريك واحد اللعيبة

هزها غادي بيها وهي كضحك وكيهضرو فالودنين بصوت خافت ، طلعها فالدروج تا لبيت النعاس و وقفها كيشوف فيها دوك الشوفات الساخرة والغمزات اللي كتزنك ليها حناكها، لوات رجليها مع بعضياتهم وكتحلون وتلوي فشعرهاغيثة: ايوا فاين هي هاد اللعيبة هههنن (لحناتها ليه وكتحلون وتقلب فعينيها وهوا كيشوف فيها فرحان عينيه كيبريو)
عهد: هي هادي يا الحليوة ديالي...وخففي شوية من التحلوين راه دخت انا دخخخت ههه
طار عليها ببوسة وغدي تابعها من قنت لقنت وشفايفهم مكيفارقوش تا طاحو فوق الناموسة.
من بعد ساعات دفعاتو بضحك وبغات تهرب عريانة وهوا كينهج ومثمل لاسق فيها 
غيثة: ااااي هههه صافي عيييت زول يداااك هههه
عهد : ههه انا معييتش تا نعيا ونوضي 
لاحتو على ضهرو وهوا مرخي وتكات عليه كضحك 
غيثة: مانبقاشي نتيق فيك
عهد: كيلعب ليها فشعرها)وعلاش 
غيثة: كدبتي عليا...قلتي لي عتوريني اللعيبة وماوريتيني والو
عهد: ههه (طلع حاجو كيضحك) راك شتيها ودقتيها ...مالها معجباتكش؟
غيثة: (كتحلون) ولااا ههه محسابليشي هاديك هي اللعيبة ...و صلا مكتعجبنيشي ومكاجيشي قدي
عهد: انمم ... (غمزها) من نيتك مكتعجبكش) قولي الصراحة
غيثة: تزنكات و حطات لسناها على شفيفها كضحك) وصاافي انا قلت ماكتجيشي قدي وكتحرقني
عهد: بسخرية) ههن! ايوا صافي غادي نقص ليك منو شوية يالاه يبدا يجي قدك...ولا راكي نتي للي كتكمشي بزربة وكلشي كبر فيك بقات غير ديك التفيفيحة تكبر شوية هههه
غيثة: هههمم (عيباتو) زول مني خليني نوض 
بغات تنوض وهوا يجرها 
عهد: واجي باقي ماسالينا
غيثة: ههه انا ساليت وعنوض تا تسالي وتوض على خاطرك ههههه
ضحكاتو وهوا يجرها عريانة تخشا فيها بالبوسان وهي كضحك وتغوت بالضحك .
من بعد مدة عاودات دفعاتو كتنكر
غيثة: اوااعدي شي نهار نقاك كليتي ليا شي رجلي ولا يدي
عهد: وناكلها وناكلك كلك
غيثة: اففف صافي عييت كنحيس بكرششي كدحرقني 
عهد: وا توحشتك وكتحمقيني وتهبليني وباغا تسطيني 
جرات الغطا على صدرها وسترات راسها باش يجمع يديه وتكات عندو كيتجمعو ويضحكو ، كتطلق ضحكتها تا للسماء عكسو هوا صوتو خافت وكيضحك بشوية وناقص من حدة الصوت وكيهمس غير فالودنين ، توسط النهار وهما فالفراش و عيثة فالعسل والدلع بكل انواعه مع عهد اللي محتسبهاش مرتو فقط ، بل كيحسبها مرتو وعشيفتو وصاحبتو و مرتو كيستخدما غير فاش كيهضر معاها على ولادو اما تصرفاتو معاها بحال شي عشيقة مكيملش منها و مكطاعش ليه فراسو وافعالها حتى هي افعال خطيرة كدلع راسها براسها ومرة تفششو ةدير ليه خاطرو و مرة تجمعو وطويه فالبلاصة وتنفخ وتغضب وتقلب على السبة باش تغضب ويبقا يحزر فيها ويبوس فاليدين ويزوق ليها فالهضرة وهي مستمتعا وعاجبها الحال ، ومع العلم انه فايق بيها وعارفها اشنو كتبغي ومكيبخل عليها بحتى حاجة وغادي معاه فالخط .
بقات جالسة كتكركر ومرة مرة تشها فيه شي بوسة وتبوسو وتلمس فصدرو حتى بدا فمها كيجري بالماء و وجها كيصفار ، شافت فيه مخلوعة وهوا يحط يدو على خدها
عهد: مالكي ؟ 
غيثة: طالعة معايا التقييي... (شدات فمها وناضت كتجري للدوش وناض موراها لاح عليه بينوار وتبعها شد ليها شعرها لور وبدات كترض تا سخفات ، غسل ليها وجها وخرجها هازها وهي كتنهج
غيثة: اففف ديما فاش كنبغي نتقيا كنحيس بمسارني عيخرجو، التقيا كتبهدلني
عهد: شوو صافي رتاحي 
حطها فوق الناموسية وهز الكينة اللي كتشرب باش متقياش ، عطاها ليها وجرات الغطاء عليها ، جلس حداها واحد الشوية كيداعب كرشها وهي مسطحة تا رتاحت ونوضها للدوش دوش معاه ، شافها كتغسل عادي وهوا يشلل عينيه من الصابون والماء نازل عليه 
عهد: بلاتي ...حطي هاد القرعة ، قبل كلشي كنتوضلو الوضوء الاكبر من الجنابة 
غيثة: ايوا حتى ندوش ونتوضا
عهد: لا هاداك الوضوء العادي ...مي فاش تكوني مجونبة خاصك توضاي الوضوء الكبير 
غيثة: ؟؟؟
عهد: اجي 
جرها قدامو كيعلمها كيفاش تغسل وكيوريها وشاد ليها الرشاشة ةغادي معاها خطوة بخطوة حتى توضات وخلاها تكمل الغسيل وخرج صلى الضهر وهبط لتحت ، خرجات موراه ملوية فبينوار ، نشفات شعرها وحلات البلاكار ، بانو ليها حوايجو معلقين حدا حوايجها وهي تهز قميجة بيضاء لبساتها فوق لحمها نيشان ولبسات سليب ابيض وبقا صدرها كينقز تحت لاشوميز ، سدات ليها الصدايف وخلات جيت صدرها عريان ، ومع طويلة ومفورمية مزيان جاتها القميجة زوينة واصلة ليها لفخادها بحال شي كسوة واخا واسعة عليها ، طلقات شعرها جنب وتمات نازلة عندو كتلعب فالسنسلة فصدرها لقاتو متكي على جنب الفوطوي مشورط وكيهضر فالتيليفون ، دارت راسها ممسوقاش ودازت قدامو كتكسول غادية جيهت الكوزينة كتعوج ، هز عينو فيها متبعها وكيهضر فالتيليفون

عهد: فالتليفون) واخا الواليدة كوني هانية ، لا صافي غنجيو غدا غير تهناي...يالاه تهلاي ليا فراسك ...بيزو.قطع ودخل عند غيثة للكوزينة كيفرنس لقاها واقفة حدا الثلاجة وهازة زلافة فيها حب الملوك ومتكية كتاكل بشوية ، شافتو جاي جيهتها كيتهز وهي تقلب للجنب بلعاني منخلاها، وقف موراها وحط يدو على خصرها وهمس ليها فودنيها ، خرجو الخدامات خلاوهم كيترومانساو فالكوزينة 
عهد: شكون قالك حطي يدك على حوايجي؟
جاوباتو بصوت عذب كتلحن فالهضرة وفشفايفها حبة دحب الملوك 
غيثة: ثالها لي راااسيييي...عندك شي مشكيل
عهد: عندي مشاكيييييييل... (طبع قبلة على عنقها) كنت بيخير تا تعرف عليك نتي وانا نتلف مابقيتش عارف راسي من رجليا...اشنو الخاجة اللي فيك ماكيناش فالبنات؟
تقلبات كتعوج 
غيثة: فيا السكر هههههه
طلقات ليه ضحكا وتحركات من قدامو كتعوج فالمشية ، مشا تبعها كالاها مع البوطاجي وهي معنقة الزلافة 
عهد: هي من ناحيت السكر فيك بالزااايد... (شاف صدرها) افففف...اجي قلتي ليا مجاش قدك ! شنو زعما جاك صغير ولا جاك كبير؟؟
شافت مطلعة حاجبها 
غيثة: وا غليييض وكبييير شوطني 
دفعاتو ولاحت ليه حبة فمو و وقف كيضحك على هضرتها ، يالاه بغات تمشي وهوا يجرها خربق ليها القميجة بالتلماس وكمشها فيه وهي عازة كتافها كتعلق مع لماساتو على صبعانو رجليها ونازل فيها بوسان ، شدها من كتافها كمشها بحال الى بغا يهزها وهي وحالة فمها فيه، باسها بلهفة ورجع نقص من الهيجان
عهد: متبقايش تلعبي بالعافية راه غتحرقك ، تا تولدي ولعبي بيها كي بغيتي ....ايلا بقينا هاكا غنمشي نعطب ليك البيبي فكرشك سي ميو تفاداي اللعب الخايب 
ضربها بالضحك لقيزبتها وخلاها كتقاد حوايجها ومشا حل الثلاجة جبد الماء ؛ تلفت فيها هاز الكاس دالماء وسولها 
عهد: صليتي؟
غيثة: ءاا؟
عهد: طلعي تصلي ...باينة من ديك ءاا ديالك نازلة بلا صلاة...يالاه طلعي توضاي وصلي وهبطي باش نخرجو 
غيثة: بالفرحة) بصح؟ فاين عنمشيو؟ تخرني غير انا وياك؟
عهد: وي ...علاش نتي ماباغاش تخرجي؟
غيثة: بغيت ولاكن ماحسابشي ليا عتخرجني نتينا
عهد: نخرجك ونخرج معاك تا لطرف الدنيا غير تبقا ليا الكبيدة على خاطرها (غمزها)
غيثة: هههنن
ضحكات ومشات كطير توضات وصلات ولبسات سروال عصري ديال الثوب زرق طالع حتى للسرة وعندو خيط ابيض فبلاصت السمطة و واسع بحال الصاية وطوييل حتى للارض كلاسيكي وفصلاتو وستيلو كيمشي مع الموضى و لبسات قميجة بيضاء ديال الحرير رطبة وباردة وكلاص باليدين ، خشاتها فالسروال ؛ جاتها اللبسة انيقة وكلاص ، يالاه بدات كتقلب على شنو تزيد وهوا يطلع شافها لابسة ديك اللبسة ووقف حداها لمس القميجة بيدو وابتاسم ليها و وقف حداها كيجبد حوايجو ، جبدات فوقية بحال سلهام طويلة حتى للارض كيدخلو فيها اليدين وبلا قب فالابيض وفيها حمامة فالضهر مطرزة فالزرق فلون السروال وشادها بروش لقدام حدا السدر لبساتها فوق اللبسة وخلاتها محلولة من القدام ودارت شال فالزرق على الطريقة التركية وخلاتو نازل مغطي ليه صدرها بطريقة راقية ، دارت ساعتها للي هداها واكتافات بمرطب الشفاه و مشطات حجبانها فقط بلا مدير مكياج ، لبسات صباط عالي زرق مغلوق وهزات ساك من ديور مربع فالازرق وهزات ريحتها بغات ترش وهي تمنعها يد عهد قبل مترش
عهد: ة.تو تو...بلاش ...خارجة معايا ولا بوحدك الريحة بلا مترشيها
غيثة: وعلاش نتينا رشيتيها
عهد: هضرت معاك اغيثة ...بلاش من الريحة وحتى الطالون بلاش منو
غيثة: مكيبانشي اصلا ...نازل عليه السروال مغطيه
عهد: تنهد) مهم خلي ريحة ماديريهاش .
شافت فيه وعبسات وحطاتها وشافت فالمراية وبدات كتبتاسم، الابيض والازرق ملكي جاها زوين وحتى لاطاي ديالها المليءة لباسة وللي لبساتها كتجي معاها ، شاف جنب لقاتو كيسد ساعة داليد وطلعاتو وهبطاتو بإعجاب فاناقتو وستيلو الجداب ، كان لابس دجين سليم زرق داير وتيشورط بيضاء مصيرة ديال لاكوسط كول v باينة السنسلة كتبري فعنقو ودتير سمطة زرقاء مغلوقة غادي للكحل و حداء راياضي ديال النايك زرق فلون السمطة ، هز عينو فيها خاشي ديه فالجيب كيقاد السروال
غيثة: علاش مكتلبسشي الصبابط مع السراول؟
عهد: لا ...الصباط فوقتو كيمشي مع سروال التوب والدجين كيمشي ليصبادري ديال المشية ماشي سبرديلات ديال الجرى والرياضة (قرب حداها كيستهزأ) 
غوبشات وقلبات وجها مارضاتش علاش يصحح ليها وهوا يجرها من يدها 
عهد: يالاه زيدي .. غتمشي جوج خطوات غتحيدي داك الصباط غير ديريها فبالك
غيثة: مكتفهمشي فلباس البنات ماعندك ماتعرف فهادشي
عهد: (بسخرية) هه زيدي زيدي براكة من الهضرة ...انا قلت ليك كيجي معاك هاد النوع ديال اللباس ياك...ايوا مالي اتا مكنعرفش علاش تابعا ريي؟
ماجاوباتوش وهي تهز راسها وطولها مع الطالون وصل ليه للكتف ، بغات تنزل فالدروج ديال الزاج وهي تفيبري ، تا هزها بالخف هبطها كيدردك بيها وخرج هازها تا لباب الطوموبيل حلها من البعيد قبل ميوصل ليها ، حط تما وركي حداها
غيثة: علاش هازني زعما مكنعرفشي نمشي بالطاكون؟
عهد: ماحدي معاك منخليكش تمشي على رجليك (غمزها)
عجباتها المغازلة وهي تزنك وهبطات المراية اللي قدامها كتشوف راسها كي حات وكتقاد الفولار وهوا ديمارا الطوموبيل وخرج من الفيلا و تبعاتو الطوموبيل ديال ليكارد كورد من للور

داها كيتسارا بيها فالشوارع فالطوموبيل كيكتاشفو المدينة كي دايرة وهي كتفرج من الزاج فرحانة، بقا كيدور بيها من شارع لشارع والشوارع عامرين كلشي خارج يتسارا و كلشي تابع الفيراري المذهبة بعينيه فدهشة وزجاجها الاسود مكيبنش شكون لداخل ، حطات يدها على كرشها وضارت عندوغيثة: فيا الجووع
عهد: وااايلي؟ جوووع كاااع!!!!
غيثة: ولله
عهد: ههه ...واخا انا نوقف فشي بلاصة ونزلو 
بان ليه من بعيد اوتيل كبير باينة فيه راقي و وقف قدامو وطلع الطوموبيل هوا كاع فوق الطروطوار تا لباب حدا الزربي الحمراء ورجال وقفو موراه ونزلو ، اللي خارج الاوتيل واللي داخل واللي غادي واللي جاي كلشي تقل المشية وكيشوفو بنص عين كيتسناو يشوفو شكون نازل من الطوموبيل وحتى من المستقبلين ديال الاوتيل خرجو وقفو برى ، نزل عهد و داير نضارات شمسية كيتمشى عن غير قصد بعجرفة ، اللي شافو يقول هادا مكيتنفسش بالعقاية وانما العكس ، هاديك طبيعتو و مولف كيمشي هاز خنافرو للسماء ومتكبر مكيشوف لا هاكا لا هاكا و عفوي فحركاتو اللي كاتبان للناس متكبرة ، كيضرب بحال السيف فأعين الايناث بوسامتو وملامحو الخشنة ، حل الباب على غيثة وهي تنزل شادة ليه فيدو كضحك بشوية وشايفة الصدمة فعينين الغادي واللي جاي وعاجبها الحال باغا طير ، الصدمة القوية فعينين الناس هي انهم كانو كيتوقعو تكون معاه بنت فالطوموبيل حيت شافوه كيفتح ليها الباب ومتوقعسن تنزل شي وحدة لابسة نص ميترو ديال التوب وكلشي فيها كيبان ، وانما الصدمة كانت مضاعفة فاش شافو غيثة لابسة الكلاص بحال شي اميرة ومغطية شعرها بالفولار وباين صغر سنها من ملامحها رغم جسمها والنخوة فالوقفة وكتافها الواقفين وطولها كإمراة متاكملة بكل تفاصيليها، خلاها غادية قدامو وهوا موراها بخلفة حاط يدو على خصرها وهي كتهز عينها فيه وضحك فكل مرة؛ دخلو للاتوتيل واستقبلوهم فالدخلة مشاو معاهم حتى لاطيراس فين كاينة كافي كبيرة راقية وفيها الناس وعصافير الحب كل جوج فقنت ، جلسات ودارت رجل فوق رجل ومبرزطة من نضرات الناس ليها، جلس بارتياح وهز رجلو على ركبتو وشاف فيها سولها بعينيه مالها
غيثة: كلشي حاضينا !
عهد: ايوا حيت نتي حاضياهم
غيثة: مكنشوفيشي فيهم
عهد: ايوا وباش عرفتيهم كيشوفو فيك؟
غيثة : ياه على مفلسف !!...شفتي كيفاش ستاقبلونا!!!
عهد: غيثة قلتي فيك الجوع ياك ، واشوفي شنو بغيتي تاكلي
غيثة: امم ولاد الحرام كيشوفو الفلوس كيرجعو يضحكو مننن...
عهد: (حيد النضاضر) دخلي ديك لل فخونش اللي جالسة طل علينا
خشات صبعها كدخل لافخونش وهزات الموني طويل وكحل وجلسات تشوف فيه وعهد مسرح عينيه فالبحر قدامو ؛ فجهة اخرى جالسين 3 دالبنات تكون عندهم حوالي 24 حتى 30 سنة انيقات كيهضرو بلباقة و كل شوية يشوفو فيهم
البنت1: شوفي هاداك جاي بليكارد كور !
الببنت: كتشوف بنص عين) باينة فيه شي سعودي.
البنت3: مطلعة حجابها ) فين عمرك شفتي شي سعودي عينيه رماضيين توتو..هادا غيكون غير شي تركي اما سواعدة كاع مزيوينين ...كيكونو مطراسيين ديك اللحية بحال شي زربية مغربية وديك الكادومة مرققينها ومثلت هناومثلت هنا اما هادا عادي زينو بحال شي تركي و حروفو حرشين 
البنت 1: ايوا هاهيا تلوات عليه مغربية ههه ولاهيلا المغربيات بعدا كيحمرو الوجه كيظيو ليك غير شكون وشكون 
البنت3: ديك البنت اللي معاه غتكون غير شي بنت20 عام باينة فوجها 
البنت1: صراحة بلا كدوب تاهيا زوينة مافيها مايتعاب ...الفورمة و وجها نقي واخا مدايراش المكياج يعني غتكون عجباتو فزينها 
البنت2: انا بغيت غير نعرف فييييين اعباد الله كيتلاقاو ليهم...هاد النوع راه متلقااايهش كيدور فالزنقة خاصك ديري عليه بحث معمق وتشدي عليه ديبلوم الى بغيتي تعرفي فين كاين ...كن ما كانت هاد البنت مغربية وجايباه هنا ماعمركم كنتو تشوفوه.
عهد: غيثة مزال كتقلعي الحروف؟
غيثة: بتكبر) ايوا مافهمتشي شنني سميت الماكلة وهما كاتبينها بالفرونسي ...انا قريت غير كيفاش نتحاور مع الناس ماشي قريت على الماكلة
عهد: هز الموني) مهم شنو تشهيتي؟ قبل مايطيح الضلام بغيت ندوزك للفيرمة دنور فمراكش تشوفي الحوالة ديال العيد 
غيثة: بدهشة ) جيبتوهوووم !!
عهد: وي ...بغيت ندوزو نباتو تما هاد الليلة وغدا نمشي للقصر حيت بعد غدا العيد 
شافت بحزن و بقات ساكتة
عهد: مالكي ماعجبكش الحال؟
غيثة: نتينا غتعيد مع الفاميلة ديالك وانا بابا بواحدو وانا وماما لواحدنا ...العيد هادا ومل واحيد عيعيد بواحدو وبا مسكين ماعندوشي معامن يعيد كلشي فالفاميلة ديالو مجمعين مع ولادهم وهوا دابا عيكون قناااط بواحدو فالدار

عهد كيقرى الموني و غيثة كتشكي عليه وساهية كتخمم من جيهت باها ، هز راسو فيها عاقد حجبانو من الشمس اللي ضاربة فيه عهد: تاكلي الحوت؟
غيثة: امم؟
عهد: بغيتي الحوت؟
غيثة: الحوت ؟؟ اشمن حوت؟
عهد: كاين بزااف دالانواع ... (قلب الورقة) ها السوشي الا بغيتيه 
غيثة: اممم ...صافي بغيت الصوشي ومبغيتشي هادا اللي فيه السلمون خضر
عهد: شوفي لبياس اللي بغيتي ..هاهما مصورين ليك هنا كل واحد شنو فيه...هادا الناجيري هوا اللي فيه الحوت خضر ويمكن طلبي الناجيري ديال الخضرة بلا حوت خضر وهادا سميتو جونكان مشكل وفيه بزاف دالانواع دمأكولات بحرية مع شي اعشاب تا هما بحرية ومافيهش الروز ..جربيه تا هوا الا بغيتي
غيثة كتشوف فالتصاور ديال السوشي وكتقلب فين كيقرى داكشي ، هزات راسها فيه معجبة باغا تعقل عليهم باش متحرجش مرة اخرى
غيثة: فاين كتقرى هادشي؟ وريني فاين مكتوبين
عهد: نن ممكتوبينش غير عارف سمياتهم وصافي ...عقلي عليهم باش تعرفي طلبي مرة اخرى واخا 
غيثة: اممم !..كمل 
بدات كتركز وكدخل لدماغها وكتبغي تعلم غير داكشي اللي بغات وكتركز غير فالوقت اللي بغات ...دارها معاها درس وفنفس الوقت كيعلمها تاكل وتعرف شنو كتاكل ومتحرجش راسها قدام شي واحد وشد معاها الخاطر كيقريها وهي كتشد وتعقل وتحفظ بالزربة
عهد: هادا سميتو نوريماكي تا هوا بحالو بحالو بحال جونكان مختلف فالنسمة وفيه الروز 
غيثة: كسميتو؟ مكي ..مرنياكو!
عهد: كيضحك بشوية) ههه لا نوريماكي ...هادو انواع عاديين وكاين كثر من هادشي 
غيثة: اااه نو..نوري..نوريماكي ياك؟ ولاخر كونان؟
حط يدو على فمو شاد الضحكة 
عهد: لا جووونكااااان عقلي عنداك تقوليها لشي واحد يضحك عليك راه فأي بلاصة يقدرو يسولوك على اشمن نوع بغيتي وتمشي ضحكي فيك الناس...ويقدر يسولوك غير فالقصر شي نهار الى تشهيتي سوشي وماتعرفي ماتقولي
غيثة: غوبشات) وصاافي راني عقلت دابا غير كمل ..بلا ماتبقا تعياق عليا بالصوشي
عهد: حابس الضحكة) السوشي ...ماشي الصوشي ...رققيقها ماشي تغلضيها ...ها علاش كنقوليك قراي باش تعرفي تلفضي الحروف والكلمات بسهولة ...اون بلوس مكنبانش عليك الفاهمة ونتي عندك كلشي عياقة ..اللي بغا يوريك كتحسبيه كيعياق عليك! ايوا الا جينا نعياقو مغاديش يبان السوشي فالعياقة ههه
غيثة: تنفخات) وصافي مالك دابا كتفلسف عليا...مهم كمل نشوف شني اسمو هادشي
عهد: مهم (حط صبعو متبع معاها وهي شادة الموني ) هادا سميتو تيماكيزوشي هههه الا نطقتي بيها نكرط دااابا هاد اللحية من الجدر 
غيثة:هاا!! ..تيكو..ماكي ...ماكوشي ؟
عهد كيتشتت بالضحك وتكى على ضهرو حاط يديه على وجهو كيتهز بالضحك وهي معبسة كتشوف وكتشوف فالناس حاضيينهم ،

يتبع...

التنقل بين الأجزاء

صفحة القصة
سيتم تشغيل صندوق التعليقات بعد لحظات
معظم التعليقات تم إخفاءها بواسطة الفيسبوك، نحاول بكل الوسائل المتاحة إستعادتها في أقرب وقت ممكن.