البرهوش الجزء 13

متأكد بلي مهدي شافني هادشي علاش دار كسيدة معرفتش اش هاد زهر عندو وعندي ولي مفهمتش شنو جاب شيماء معاه كيفاش تيعرفو بعضياتهم الله أعلم خاصني نعرف حيت هيا وباها تيعرفوني ويقدرو يعرفوني ويكونو سباب باش يشوفوني والديا ومهدي مبغيتهمش يشوفوني هكدا بغيت نهار لي غادي يشوفوني غادي نكون أنا لي باغيهم يشوفوني.. رجعت لدار بقيت كنتسنى حتال لغد ليه جا عبدو قلت ليه بعدا بلي مشيت لداكشي لي خلا لحاجة فكندا وعاودتلو شنو وقع وشكون كان مع مهدي قاليا خليني نسولك دبا عندنا خدمة من غير داكشي لي شفتي تما لحاجة خلا شي أراضي خاصك تشوفهم قبل ميتحصدو حيت غادي تخصهم ميزاانية.. وااع لحاج كان فلاح؟ قاليا ومنين تيحساب ليك جاب لفلوس راه داكشي غير خضرة فوق طعام عندو سيد شبعان أراضي إلا بغيتي تعوض دوك لفلوس لي خسرتي هادي هيا طريقة لوحيدة لي عندك.. خرجنا غادين لشي عروبية اححح غادي نولي نضرب جلابية ونخلي غير لمستاج ونولي عزييز عليا شيخات.. أسيدي وصلنا لديك لبلاصة تنعيطو على شي خوتنا عندهم تراكتورات ناريي على جو وديك لأرض لي مشينا ليها قريبة لواحد لواد منضر كيفاش دايير أخويا بداو تيحصدو باركين عبدو تيدوي معاهم سولني شنو بغيتي يزرعو؟ بقيت كنخمم زرعو لحشيش فيه صرف ولا زرعو بطاطة.. شاف فيهم ديرو لقمح الخوت غدا غادي نجيب ليكم لفلوس.. تحركنا راجعين لدار تاني قاليا راك باقي مبرهش دوينا معاك زعما نبينو ليهم بلي خدامين مع راجل ونتا شنو كتقول دير عقلك عرفناك مزال صغير ولكن راه نهار لول قلت ليك بلي كلشي غادي يتبدل راه مسؤلية هادشي.. خونا طريق كاملا وهو داوي ريحنا نتغداو كيمضغ وداوي دار ليا لمرض لخيب فراسي على دكر لمرض لخيب غير رجعنا لدار طاحولي خوتنا لي خليتهم فدار بوحدهم فبالي جبدت تيليفوني عيطت فنمرة ديالها جاوباتني سلام سلام سولتها كيفاش جاتهم دار واش كلشي بيخير قالت ليا فوق لبيخير مبقاش تابعنا لكرا مبقاش تيخدم نهار كامل بحال شحال هادي تيلقا وقت يمشي يقرى لله يطول ليك فعمرك وصافي ويخليلك.. ختنى بدات كتسعى وتي غير سكتي أبنت ناس راه درت معاك هكداك حيت ختي وعلى دكر موضوع لخواتات مزال مناوياش تعطيني نمرة ختك؟ بقات كتضحك قالت ليا قيد عندك دبصح عطاتني نمرة ختها أصلا مغاديش تلقا ليها بحالي قيدت نمرة قلت ليها بروجولة وخا عطيتيني نمرة راه منقدرش نعيط ليها راه كنت غير تنضحك معاك أش غادي نقوليها سلام عطاتني ختك نمرتك مجاتش ياك.. قالت ليا صافي خلي حتى ننزل ونلاقيكم عنداك تزوج صافي راه نسيبي نتا.. ختنى علاام ديال بصح غير تندوي معاها تنبدا نضحك بدون شعور كون ما كانتش مزوجة هااح زعما حسدت راجلها حق الله وخا صرف داير دبا لعكس ديالو ولكن خونا فايتني بهادي صافي أتنزل لهنا أنشوف ختها إلا كانت غير بنص عقليتها أنتوكل على لله.. أسيدي بقيت بارك ناشر رجليا فدار حتى وجداتلي سيدة لعشا ومشات غير خرجات دخل عبدو قاليا راه جبتلك لخبار صحيحة وطلق معايا وديناتك.. قاليا راه خوك صح ماشي فحال لول ولكن وقف على رجليه داك لمحل لي كان خدام فيه ولا هو لي مقابلو حيت كان عاون مول لمحل بشي فلوس دبا لمحل وقف على رجليه تاني سيد مولشي منعرف فين سافر تاني وخوك لي بقى شاد لمحل دبا هادشي باش دار ديك طوموبيل لي شفتي وتحولو لدار أخرى قريبة للجامعة لي تيقرى فيها ومن زهرك هيا نفسها لي تتقرى فيها شيماء بنت خونا لي دالك ديك لفلوس وكتقرى تما شي وحدة من عائلتهم بنت خالتها يمكن ومزوجة بولد خونا ولكن موحال يطول هادشي حيت شفتها مع خوك وعقل عليا خوك غادي ينوضها وداك لبرهوش شي صداع كتر من لي درتي نتا فلول خوك معارفش معامن تيلعب... خونا بزاااف بلاصتو ماشي فهاد لبلاد سيد واقيلا عارف عائلتي باش تعشاو هاد ليلة, قلت ليه يعطيني لعنوان ديال دار لي تحولات ليها عائلتي دبا عطاها ليا ومشا خرج نزلت أنا لغراج تبعتو بطوموبيل قاصد دار جديدة لي فيها والديا وقفت تحتها دار مبيهاش هاد لخوادري طلع مساهلش فينما تندير ليه شي حاجة تينوض صحح من لول بقى فيا لحال فاش ضربتو داك نهار ولكن فاش شفت كيفاش ولا دبا راه واقيلا كان خاصني نضربو شحااال هادي تندور عينيا طوموبيلتو مكيناش هو لي مقابل داك لمحل غيكون تيتعطل دبا عرفتي كتباليا لوالدة حلات باب دار وحطات كرسي وباركة قدام لباب شادا شي حاجة فيديها كتخيطها ديك ساعة محسيتش براسي شفت فلمراية قاديت شعري حليت لباب ونزلت غادي لعندها راه مشفتهاش شحااال هادي 100 راس تيقوليا رجع ماشي دبا ماشي دبا ولكن حتال إمتى غنبقى نقول ماشي دبا وقفت حداها شي 2 مترو بيناتنا كعما شافت فيا كاع طلعات رأسها شافتلي فوجهي وشافت تاني فداكشي لي فيديها كتكمل فيه قلت واقيلا تبدلت ومعرفاتنيش معاوداتش شافت فيا كتجري دارت 120 لجهتي أول مرة نشوفها كتجري داك تريكو لي فيدها عكلها كون ما شديتهاش كانت غتحسب سنانها عرفتي مدواتش غير كتبكي وكتبوس فيا يديا راسي بغيت غير ندوي مخلاتنيش ناري باغيا تقرب ليا واقيلا معرفتنيش دفعاتني دخلت لدار مشكلة هاديي دبا غادي تقتلني هاد ليلة...

يتبع