البرهوش الجزء 14

دخلاتني لدار وسدات لباب بحالا معمرها أتعاود تشوفني ولا يمكن معمرها أتعاود تخليني نخرج تنقوليها لوالدة وامي عنداك توقعلك شي حاجة تنفسي بشويا أنا هنا معاك دبا صافي وفهاد لحظة تيباليا لواليد نازل من دروج سيد نقز نسا راه فدروج ضربها بواحد تكربيعة تاريخية بغيت غير نمشي عندو لواليدة مخلاتنيش كتضحك معرفتها واش فرحانة حيت رجعت ولا كتضحك على لواليد فعايلها هادو سيد شاف حتى واحد مغادي يجي عندو حكها وجا لعندي كنسنى شي تصرفيقة وهو يعنقني أول مرة نسمع صوت لواليد وهو تيبكي كي لويل ولكن حنين ملي مبكيتش ديك ساعة عمرني أنعاود نبكي تراه جاتني ضحكة بزز باش سكتو واحد لوالدة بقات لصقاتلي فيدي مطلقاتهاش بركنا لواليد تيباليا تيعيط على شي واحد قلت ليه علامن؟ قاليا خوك مهدي؟ لا متعيطش ليه بزربا خطفتلو تيليفون قطعت قلت ليهم مبغيتش مهدي يشوفني ولا يعرف بلي جيت عندكم هادشي إلا بغيتو تبقاو تشوفوني لواليدة وهيا تلوح سوارت للواليد ضربتهم فداك سميتو عليه تحت لكالصو قالت ليا نتا راه عمرك مغادي تعاود تفوت داك لباب هرب ليا أنا واقيلا مكانش خاصني نبان ليهم دبا أيديرو ليا طيارة بقيت بارك معاهم لواليدة كتسول فيا.. فيك جوع؟ نطيب ليك شي حاجة؟ كتكفت ياك؟ قلت ليها مباغياش تعرفي فين كنت؟ قالت ليا لا كون فينما كنتي لمهم رجعتي ومغاديش تعاود تمشي.. تنطلب فيها وغير حلي لباب غنبقى ديما نجي نشوفكم هاد لأيام وصافي من بعد غادي نديكم تعيشو معايا.. تراه والو سوارت راحو فداكشي تنطل من شرجم عالي شويا ولكن نقزت من ما كتر بقيت بارك معاهم من شحال مبركتش معاهم هكداك عطيت للواليدة نمرة وخا مبغاتش تاخدها قالت ليا راك مغادي لتا شي بلاصة قلت ليها وغير خودي ومتنساوش مهدي ميعرفش بلي جيت لعندكم إلا عرف معمري أنعاود نحط رجلي هنا بغيت نتصالح معاه بطريقي.. قالتلي ولدي خوك مسكين عرفتي شنو داز عليه.. قلت ليها اه عارف راه وخا مكنتش معاكم راه تنعرف شنو واقع ليكم دبا غادي تنوضي تجيبي ليا شي كاس ديال اتاي لله يطول فعمرك.. من نيتها مشات لكوزينة لواليد صدرتو يقوليها بلاش اتايير قهوة سيد غير تحرك وأنا نخرج من شرجم سبايدرمان ومدارهاش هادي تراه رجلي تلواتلي أملعم غادي تنعرج لطوموبيل يلاه حليت لباب تنسمعهم تيعيطو ليا ياسيين تيطلو عليا من شرجم نعتلها بيدي📞 زعما بيناتنا تيليفون وطلعت تحركت قبل مينزلو فلبلاصة كتعيط ليا فين مشيتي البرهوش دبا رجع ولا أنسخط عليك ديالمن ديك طوموبيل شنو تدير؟.. وا لواليدة منقدرش نرجع دبا حتى نكمل شي حوايج ونتصالح مع مهدي لي مخاصوش يعرف بلي جيت لعندكم كيما قلت ليك راه معمركم أتعاودو تشوفوني إلا قلتو ليه شي حاجة صافي نساو ديرو بحالا موقع والو عادي غنبقى نجي ديما فاش ميكونش نخرجو مرة مرة وطوموبيل غير مسلفها من عند صاحبي متندير والو معندك مناش تخافي غدا واقيلا أنجي عندكم تاني.. عرفتي بزز باش قطعات واحد لواليد إلا عرفني بدلت كنيتو غادي تجيه سكتة قلبية وفنفس لوقت إلا عرف شحال ديال لعاقة جات مع لكنية جديدة غادي يبدل حتى هو كنيتو😂 أسيدي رجعت لدار رااشقة ليا مدانيش نعاس و لواليدة ولواليد مناوبين عليا كل واحد يعيطلي مرة شنو تدير شنو لابس سير تنعس حيد شارجور من ضو تراه طفيت تيليفون غا باش يفهمو راسهم لغد ليه شعلتو وهيا تعيط ليا لواليدة مع مع بحالا كانت عساسة عليا قالت ليا مهدي مشا لفاك كنتسناوك حتى تجي تفطر معانا؟ عرفتي محملتش راسي فاش قلت ليها لا منقدرش غير فطرو حتال ليل واقيلا وغندوز وقطعت.. غادي نمشي يمكن يرجع ومنقدرش نشوف ليه فوجهو هو سبابي باش خرجت وتانيا كنت غادي نقتلو حشمان منو وحاقد عليه فنفس لوقت لمهم يلاه فطرت وجا لعندي عبدو خرجنا لصال خونا صدمتو بلونغلي تاني لقاني تنسمع لبينك فلويد صافي سطاج لخر قاليا خاصك دبا غير شويا دلفرونسي مشينا لواحد لمدرسة من بعد لصال أصلا أنا ولات عزيزة عليا شي حاجة سميتها لغات أخويا من نهار تحنسيرة فديك لبلاد وليت داير فيها زيزون ماشي عيب تقولها لبنادم يبقى يضحك علك.. أسيدي بقينا نهار كامل وحنا طلع نزل حتى وصل ليل خاص نمشي عند هاد ولاد ناس كما قلت ليهم مشيت لقيت لواليدة كتحمر دجاج أاااح ماشي موحش فيه ولكن طياب لواليدة فشكاال ومن شحال مكليتش من يديها أسيدي قصينا وباركين تيسولو فيا فين كنتي واش خدام ولا كتقرى ولا شنو؟ منقدرش نقوليهم شنو كين قلت ليهم بلي خدام مع واحد دري عندو محل وبلي نهار خرجت من دار مشيت لعندو فلبلاصة مبغيتهمش يعرفو شنو داز عليا فزنقة ولإصلاحية تنحاول نتلفهم بشي حاجة باش ميبقاوش يسولو فيا حيت عارف راسي عندي داكرة منكوحة غادي نكدب فشي حاجة يعاودو يسولوني عليها أنعطيهم كدبة فشكل أاخر تاني لمهم دوزت معاهم واحد 3 سوايع وخرجت عطاني لواليد ضوبل ديال ساروت ديال هاد دار ولقديمى قاليا وقتما جيتي دخل راه داركم هادي وحتى لقديمة قلت ليه وخا غير متنساوش مهدي ميعرفش بلي مجيتش حتى نعرف كيفاش خاصني نتلاقا بيه قاليا سوقك هداك نتوما دبا رجال تبارك الله هو بنا راسو براسو من زيرو تبارك الله ها نتا كتشوف كيفاش ولينا عايشين مخلانيش نعاود نخدم وحتى نتا تبارك الله راجل كنت شحال هادي خايف علك تنقول غير برهوش ميقدرش يجيب حتى خبزة إلا مجبتهاش ليه أنا ولكن بينتي ليا لعكس لله يحفظكم بزوج متنساش راه خوك حتاجيتي فلوس أي حاجة أحححح والد رجااال شاف فلواليدة خاصنا نزيدو شي 10 بحال هاد زوج بدات كتضحك ويلي حشم تراه سابو سابو ولاو كيفتحو هاد لمواضيع قدامي خليتهم ومشيت أخويا حسن ما ناخد شي نضرة خيبة عليهم معمرها أتمسح ليا من دماغي ولد لعبد متيحشمش وتيقولك مالك برهوش نساو من أين داك الشبل من دالك الأسد وصلت لدار كتباليا واحد لميرسيديس محطوطة قدام لباب وحداها طوموبيل ديال عبد الوهاب سيكيريتي حل ليا لباب وقاليا راه كين عبدو وشي ناس كيتسناو فيك شي ساعة دبا قلت ليه واش تنعرفهم فايت ليهم جاو لهنا؟ قاليا لا عمري شفتهم.. وخا شكرا دخلت طوموبيل لغراج وطلعت لعندهم تيباليا عبدو واقف وزوج دناس مرا وراجل باركين معمري شفتهم قاليهم هو هدا.. ولد لعبد كيفاش هو هدا كتدور ليا لحبس ولا كيفاش شكون هادو؟؟

يتبع