البرهوش الجزء الثالث

بركت حدا سيد لي جاي يشوفني ولي متنعرفوش بالمناسبة مدلي يدو قاليا ياسين بيخير؟ صدمني منين عرف سميتي زعما يكون من لعائلة شي عمي ريحة شحمة فشاقور.. قلت ليه شكون نتا قاليا سميتي عبد الوهاب ولكن قوليا غير عبدو جيت وجبتلك معايا واحد لفرصة مكتعاودش قلت ليه أشمن فرصة؟ علاش كتدوي؟ قاليا نتا يتيم ياك حيت قبل ما تدخل لهنا بحالا معمرك كنتي لا لكارط لا والو ومعندك حتى سوابق وحتى كنيتك قلتي معندكش قلت ليه أه ومن بعد قاليا شنو باليك تولي عندك كنية قالها وهو كيتبسم بقيت تنشوف فيه عمو واش من نيتك كتضحك عليا راه تغالطاتلك لخيرية مع لإصلاحية يمكن دي مراتك وسير للخيرية وغيجيب الله تيسير نقص من تكفات ودبا يجيب الله تيسير تقدر تولد تاني بقا تيضحك قاليا فاش كنت قدك كان تيحسابلي تكفات هو لكفتة لمهم لا راه متغالطاتش ليا أصلا كنت فوحدا من دوك لخيريات قبل نيربيوني شي ناس سيد لي باغيك حداه مصيفطني ونعتلي هاد لبلاصة بضبط حتى هو داز من هنا فاش كان صغير هو مقالش ليا فلان بضبط ولكن قاليا يكون صغير شويا معندو حتى واحد ومعندو ميخسر قلت ليه كيفاش معندو ميخسر واش داكشي ديال لإرهاب لا أخويا خدينا غير مغانة و350 درهم كانو غيبركونا على لقرعة وقفت باغي نرجع منين جيت غير وقفت تنسمعو سالا وقت زيارة كاع دراري لي كانو باركين تما وقفو وعائلاتهم غادين خارجين بقيت غير أنا وهاد ساط سدو علينا لباب تاني عرفتو شي لعبة قاليا مكين لا إرهاب لا هم يحزنون سيد لي خدام معاه كبير شويا فسن معندو لا ولاد لا عائلة نفس لقصة ديالك كبر بين زنقة ولإصلاحية بغى يتكلف بشي ولد يحس بشعور ديال لأب وصافي عتابر راسك بحالا غتخدم معاه دير ليه خاطرو قوليه بابا كاع ومغادي يخصك حتى خير وأنا متأكد فاش غادي يبغي يموت غيخلي ليك شي رزق شكون بحالك كون جا عندي فاش كنت قدك غادي نخلي والديا ونمشي معاه دبا شنو قلتي؟ بقيت تنشوف فيه تندور عينيا تنقلب على لكميرات بلانات ديال لكميرا لخفية هادو رامز خرج باراكة من هاد لفعايل ديال لبراهش تندور راسي قاليا مالك علاش كتقلب شنو قلتي دبا؟ قلت ليه شكون نتا بروجولا شكون هاد سيد واش مطلعينها عليا؟ شوف نتا غتبقى هنا حتى تكمل 18 ومن تما للحبس أنا تنقولك تقدر تخرج من غدا يولي عندك إسم وتقدر تقول عائلة فلوس يمكن خدمة قلت ليه صافي موافق قاليا فكرتي مزيان.. معندي فاش نفكر ولكن سؤال واحد علاش ميجيبش شي ولد صغير من شي ميتم زعما علاش زعما لإصلاحية قاليا هادشي لي كنت باغيك تسولني عليه من لول هو بغا ولد من هنا حيت داز من هنا ومعندوش عائلة باش يكون هو لعائلة لوحيدة ديالو ومصغيرش مقادش على تبرزيط وليكوش وروايح دبا واغلبية خدمتو ماشي قانونية يعني شي ولد عندو قابلية شويا وخا يسمع شي حاجة ولا يشوفها تجيه عادي ميخافش ويهرب.. قلت ليه وإمتى غادي نشوف بابا بدا تيضحك قاليا غدا غادي نقوليه بلي لقيت علاش تيقلب ليوم وغدا غادي تقدر تخرج قلت ليه وخا أنا غير هنا معندي فين نمشي.. رجعوني فين كنت كاع دراري لي معايا تصدمو تيسولو فيا كيفاش بقيتي تما وخا سالا وقت زيارة مجاوبتهمش تنجمع فشي حويجات لي فراس مالي بنادم تيقوليا واش حماقيتي راه مزال مغادي تخرج من هنا وفاش أتخرج غيدوك للحبس قلت ليهم غدا غادي نخرج تفرجو.. لغد ليه فايق بكري مقدرتش نبقى ناعس وأصلا نعست غير بزز ساعة مورا ساعة داز نص نهار لول بنادم بدا تيتغامز عليا لوقت دايز تقيييل كنتسنى يجي شي واحد يقوليا تكلم باش يخرجني والو عشيا وضلام بدا تيطيح بنادم تيضحك عليا فظهري والو حتى واحد ما جا رجعت حوايجي لبلاصتهم كنت عارفو تيضخك عليا نعست بكريي باش منبقاش نسمع بنادم تيضحك عليا غنولي ضارب شي واحد وغادي نزيد نوحل فلحبس كتر شكون تيفيقني داك لحية عبدو تخلعت فاش شفتو كيفاش داخل حتال تما ميمكنش وكلشي ناعس قاليا يلاه معايا قلت ليه مغاديش نهرب واش نتا مريض كيفاش دخلتي هنا؟ قاليا مغاديش نهربك أبنادم غادي تخرج بحال شعرة من لعجينة يلاه وقف تبعني.. بغيت نجمع حوايجي قاليا خلي هاد شراوط دبا يحرقوهم ناس لي خدامين هنا.. غادين خارجين قدام صحاب لوقت ولعساسة مدواوش معرفتش شكون بغا يكون هاد ساط ولكن بغيت نولي بحالو فاش نولي قدو خرجنا شحاال هادي مخرجت من تما دموع كانو غادين يطيحو يضرب فيك داك لبرد فوجهك بلا حيوط ضايرين بك شعور مغاديش تفهو حتى تجرب.. كندور عينيا كنقلب على شي حدييدة ديال بصح بقيت تابعو حتال واحد ضاسيا قاليا طلع بقيت تنشوف فيه من نيتك هاد لحزاق ولهبة كاملا وعندك ضاسيا واش ولات غاليا يمكن بقيت فلإصلاحية شنو تبدل أخر؟ قاليا طلع طلع من لفهامات راه أنا غير خدام هادي طوموبيل ديالي لواحد هو لي يقتصد على فلوسو ومهرس بيها لعين فنفس لوقت ودبا طلع ولا غيخرجو يرجعوك.. طلعنا خونا غادي محرك حتى داني نعاس مفقت حتى وقف قدام واحد لباب ديال عمارة دياليا نزل قلت ليه واش خونا ملعق وساكن هنا؟؟ قاليا هادي داري غتبقى فيها حتى يرجع سيد لي دويتلك عليه لفيلا ديالو هو دبا مسافر منقدرش نخليك تما بوحدك رجالو متيعرفوكش ومتنحمل حتى واحد فيهم لمهم نتا غتكون بيخير هنا كلشي عندك.. طلعنا لدار تيوري فيا دوش لكوزينة لبيت قلت ليه واش ساكن هنا بوحدك؟ قاليا أنا ساكن هنا ومساكنش حيت تنجيو هنا قليل غالبا تنكون أنا ولمدام و ولدنا فدار لواليدة ولا دار والديا بتربية قلت ليه كيفاش عائلة عندك تبارك الله؟ قاليا قصة طوييلة مفيا ميعاود حتال من بعد غيكون عندنا وقت من هنا لفوق هاد ليلة رتاح ليا مع راسك دار دارك...