البرهوش الجزء العاشر

معمري تخلعت هكداك ولكن دبصح قوتها هاد لمرة ومعرفتش كيفاش غنخرج منها هنا تيدخل عبد الوهاب لدار و هاز لبلاكات ديال طوموبيل فيدو لاحهم قدام لباب بدا تيغوت عليا صافي هانتا غادي ترجع لحبس فين خاصك تكون فرحتي دبا رتاحيتي وجهك ماشي ديال لعز لي عطاك الله بقيت تنقوليه راه مكنتش عاقل شنو كندير دبا شنو أندير نخوي لبلاد؟ دوي معايا؟ قاليا إلا خويتي لبلاد غادي يعرفوك نتا وأنا درت لي فجهدي باش نعاونك ونرجعك لطريق ولكن نتا مبغيتيش دبا غير طلب زهرك ميموتش وإلا تشديتي منك ليهم أنا متنعرفك ما كتعرفني عندي وليد وعائلة نقابلها مخاصنيش بهاد لخدمة من ليلة سالينا نسا نمرتي مسحها حسن قلت ليه خويا لا نتا لي جبتيني هنا بقى معايا.. بحالا مكيسمعش قاليا نساني وخرج دبا بقيت بوحدي ديال بصح منعستش ديك ليلة ولغد ليه مخرجتش من دار دوك لبلاكات غادي تشوفهم لخدامة ولا شي واحد غسلتهم وضربتهم تحت سرير ديالي سيمانة مخرجتش من دار كيصوني تيليفون كتشدني لخلعة ديال بصح ولمشكل عبدو مقلق ديال بصح معاودش عيط ليا من داك نهار نمرتو طافية يمكن بدلها منقدرش نمشي لعندو لدار حيت غادي يتعصب كتر.. قربت نكمل زوج سيمانات باش ضربت خويا ممشيت لا لإعدادية لا خدمة لا لصال غير مخشي تما مكنخرجش معرفتش حتى واش مات ولا شنو وقع ليه ماشي غير ندمت شي حاجة كتر دبا إلا عرفو والديا بلي أنا لي ضربتو معمرهم غادين يعاودو يشوفو ليا فوجهي.. بقيت مخشي فدار ومفراسي حتى خبار حتى كتباليا طوموبيل ديال سيد لي خطيبة ولدو مصاحبة مع خويا(شلاضة) داخل لعندي وباينا معصب ديال بصح قاليا شنو هادشي قلت شنو داكشي؟؟ قاليا لقاو طوموبيل ضربات شي ولد فواحد دار ديالي قلت ليه ومن بعد؟ قاليا هاد طوموبيل أنا عارفها ديال لحاج وكعما كينا فلغراج هنا جيت باش نفهم شنو واقع قبل منعيط على لبوليس ولدي لي غادي يمشي فيها لحبس حيت تيعرف داك لولد.. بديت تنطلب فيه لا لله يرحم ليك لوالدين قاليا إوا دوي علاش حطيتيها فدار ديالي وباش عرفتي بلي ديك دار ديالي وكيفاش عرفتي بلي ولدي تيعرف داك دري لي ضربتيه؟؟ قلت ليه منقدرش نشرح ليك ولكن راه كان غير حادث والله ما درتها بلعاني.. بقى تيشوف فيا قاليا مبغيتينيش نعيط على لبوليس ونسالي هاد صداع قلت ليه أه هادشي لي بغيت قاليا وخا ولكن فالمقابل بغيتك تسنيلي على هاد لورقة وأنا غادي نحل هاد لمشكل بلاما نقرى ديك لورقة سنيتها شدها هو وخرج فرحان تنسولو شنو وقع للولد لي تضرب قاليا مزال حي ولكن حالتو صعيبة.. مشا عارفو غادي يفك هاد لمشكل هو عندو معارف بقيت بارك فدار مبقيتش حاملها خاصني نخرج نشوف كيفاش بقى نزلت لغراج هزيت لموطور لي كان خدالي شيباني درت لكاسك وغادي لداك صبيطار لي باينة داوه ليه حيت قريب ومزيان دخلت لعند ختنى لفرملية عند لباب مديتلها 50 قلت ليها سميتو وهيا تشد داك لبيسي ديالها قالت ليا أه كين هنا سولتها كيفاش بقى؟ قالت ليا راه فاق غير مؤخرا كان كوما دارو ليه 3 لعمليات صعيب يعاود يتمشى على رجليه تاني واش نتا من عائلتو حيت راه كينين والديه وصحابو عندو لفوق قلت ليها كان تيقرى معايا شكرآ خرجت لحدا صبيطار و وقفت تما شحاال وانا واقف تيباليا مول لمحل لي كان خدام معاه مهدي خارج من تما وأنا نتحرك حتى انا قبل ميشوفني شي واحد ولا والديا ميمكنش نبان ليهم بالأخص دبا كنت غادي نقتل ولدهم لي تيبغوه كتر مني رجعت لدار تنقلب على لكارطة ديال لمحامي عشير لحاج لقيتها عيطتلو نعتلي لبيرو ديالو مشيت لعندو باش يوريني كاع داكشي لي عندي وهادشي لي وقع قلت ليه راه سنيت شي ورقت لخونا قاليا أه فخباري راه نصيب ديالك فشركة لي كانت ديالو وديال لحاج دبا ولات غير ديالو بوحدو راه غتلقاني ضارب عليها تما قلت ليه لحمد لله يحسابلي سنيتلو على كلشي راه راجل مزيان هدا ملي خلا ليا داكشي لأخر بدا تيضحك قاليا راه نصيب ديال لحاج لله يرحمو فشركة فايت لمليار ونص بلاما نقولك راس مالها حيت غادي تفقص كتر عرفتي فاش قالها ليا تشلل عليا نصي أخويا دموع كانو غادين يطيحو أاولاد ناس واش كانت عندي مليار ونص ممتيقش قلت ليه بغيت نسافر نخرج من هنا قاليا أه خاصك تمشي لكندا لابدة وراني واحد شركة لحاج عندو صبعو فيها هاد سيد بحال شي أخطبوط فينما مشيتي تلقا شي صبع لمهم صافي غنمشي تما وخا منعرف لا باش تيدوي ولا لجو عندهم كيفاش داير تما لمهم غنمشي بقيت داوي أنا وداك لمحامي قاليا سيمانة جاية تقدر تمشي من ديك ساعة تنجمع فوراقيا غادي نخلي كلشي ورايا وغادي نبدل لجو شويا تما مبقيتش قاد نمشي لداك لصبيطار من غير غادين يشوفوني راه درت لخويا إعاقة مغاديش يعاود يوقف على رجليه وأنا لي عارف شحال عزيز عليه يتحرك بالأخص عارفو يموت وميبعدش على لكرة ومنقدرش حتى نعاونهم بفلوس منقدر ندير والو من غير نبعد عليهم ونبعد على داك شراب هو سباب هادشي كامل خسرت لفلوس لي معمري غادي نعاود ندخلهم فحياتي داك خونا دارليا أكبر تخويرة فحياتي معرفتش كيفاش غادي يفك لمشكل دبا مع خويا على الله غير يعطيهم شويا من دوك لفلوس شي 100 مليون تبدل ليهم حياتهم وتعوضهم شويا على هادشي لي داز عليهم بسبابي مغاديش تبان قدام لفلوس لي خدالي.. من بعد جا لعندي لمحامي قاليا راه قاديتلك لوريقات وغتلقا شي واحد من شركة كيتسنى فيك لهيه واش نكريلك دار لي كان تيبقى فيها لحاج تما؟ قلت ليه لا شوف ليا غير شي بلاصة صغيرة وبسيطة نبقى فيها من لأحسن نتكايس شويا فلمصروف ومعنديش لوجه لي يدوي مع لي خدامين فهاد لفيلا نقص منهم خلي غير سيكيريتي و سيد لي مقابل جردة قاليا وخا لي بغيتي.. قاديت كلشي صافي غادي لتما وخا Bonjour مكتخرج ليا مقادة ولكن بشويا بشويا بنادم كيتعلم وصل نهار لي غادي نمشي فيه لا عشران لا عائلة يقولولي حتى بسلامة واالو مكين حتى قرد مشيت فطاكسي لمطار ومعارف حتى لعبة خوكم أول مرة يحط رجلو فشي مطار جاب الله واحد خونا خدام تما وراني فين غادي نمشي لمهم طلعت فطيارة وتنقول أجي ياكما ماشي هيا يوليو مصيفطيني لشي مغرب أخر تاني نتعدب فيه غير الله يستر تحركات طيارة خوكم تيدعي سبحانك ربي إني كنت من الظالمين طلع البدر علينا.. تراه طوبيس كان تيخلعني بقى غير طيارة ولكن دبا غادي نبدا من لول تاني فهاد لبلاد...

يتبع