البرهوش الجزء 12

لمغاربة ديال لويل فينما مشاو تابعاهم لمشاكل شي دعوة هادي خارجة فشعب كامل درنا شي لعبة لأمنا حواء حتى دعات فينا لمهم أنا بقى فيا خونا كيقاتل هنا وهنا ونفس قلت ليه شحال خاصك ديال لفلوس يلاه معايا دبا لبنك قاليا والله ما تعطيني شي حاجة راه نتا لي خلصتي لغدا لفلوس كتمشي وتجي أصلا مبقى ليا والو نكمل دكتوراه ديالي وأنرجع لبلاد كلشي غادي يتقاد ديك ساعة.. سولتو ختنى باش مريضة قاليا سرطان رئة (بحال والتر وايت فبريكن باد💔) بقيت تنجقر فيه باش يخليني نخلص ليها لعلاج قاليا والو خونا نفسو حاارة ولد لعبد مع لعلم تندوي معاه بلونغلي باش متفهمش ولكن خونا هكدا فعقليتو لمهم خرجنا قلت ليها غدا إن شاء الله نشوفك فديك لمدرسة قالت ليا إن شاء الله شداتلو فيدو وغادين أححح ولاد ناس ديرو ليا شويا من هادشي فخبيز.. رجعت حتى أنا لداري أخويا كنتفرج فواحد سيري وتنفكر إمتى نرجع لمغرب لله يجعل لبركة بغيت نرجع نمشي عند لواليدة ولواليد توحشتهم أخويا نبرعهم شويا.. لغد ليه مشيت لديك لمدرسة بارك حتى جات ختنى معرفتش علاش باغيا تعلم وهيا مبقى ليها والو وغادي تموت أنا موالف تنبرك تنسمع دبا نن بارك تندوي معاها شنو باليك نخلصلك هاد لعملية ولا لعلاج بلاما تقوليها ليه حيت سولتو وقاليا لا.. حتى هيا عنصرية كتر منو قالت ليا قالك لا هيا لا أخويا راه غادي يتعصب ونتا كتبان صغير منين غيجيوك هاد لفلوس؟ ولات هيا لي كتجر ليا فلساني ختنى من داك نوع لي متقدرش تبقى شاد قدامو شي سر كتدخل لخاطر بنت لعبد خرجنا بديت تنعاود ليها راه فاش خرجوني من لإصلاحية مكانوش عارفين شحال عندي من عام سو قالو 19 باش قادولي لكارط و وراقيا.. ختنى ولات كتعرف عليا شادة ولفادة فنص نهار بدات كتكحب قالت ليا غير لبرد أنا عارفها مريضة باغيا تموت وصافي لغد ليه مشيت لعند خونا راجلها ساط مبغيتيش تخليني نعطك فلوس أجي نشوفلك خدمة حسن.. دار فيا أخيب دورة تا مالك واش شفتيني كنسعى ولا كيفاش خويا ممحتاج والو أنا ضارب حسابي غادي نكمل هاد لعام وكلشي غادي يتقاد.. مزدتش معاه كلمة هادو هوما لي تيعضو ليد لي كتمد ليهم أنا منعرف مالي أنا أخويا شنو رابح بقيت تنمشي لخدمتي وديك لمدرسة ولصال مرة مرة ختنى كتدخل لخاطر أصاحبي أول مرة نعاشر شي بنادم هكدا وختها صغيرة زوينة أخويا قالت ليا غير نزل ونتلاقاو نلاقيكم بزوج داكشي ديال مرسول لحب ولات كتعيط ليا غير نسيب وا نسيب واحد راجلها لي جلدة وخا ضريف ولكن مياخدش درهم إلا مخدمش عليها شهر هاد عرفت بلي هوما ساكنين فدار مع شي زوج أخرين واااع كنتخايل كيفاش مزوجن و عايشين مع شي وحدين أخرين وخونا تيخدم أغلب لوقت ولا فديك لجامعة وتقريبا هادشي علاش دخلات لديك لمدرسة باش متبقاش فدار بوحدها.. أنا صافي خاصني نرجع لمغرب لابدة مبقى عندي ميدار بقيت تندوي مع مول دار لي بارك فيها باش يبيعها ليا مبغاش قاليا باغي نخليها غير لكرا.. بزز باش وافق خديتها من عندو بدلت لقفولا جمعت حوايجي خاصني نمشي فهاد سيمانة سيد لي تناكل عندو بجنب دار مزال تيحساب ليه أنا زيزون خويا راه وخا يكون لمحل عااامر تيسبقني من دوي لإحتياجات لخاصة زعما أباااه.. نهار غنمشي خونا بارك من لخدمة عيطت عليهم لدار تيشوفو فلباليزة ديالي قدام لباب مفهمو والو باركين تنقصيو فدار وتنشوف فلمغانة ولاد ناس أنا بقاولي زوج ساعات وغنرجع لمغرب عنقني قاليا غتخلي بلاصتك وديك لهضرة مديت ليه سوارت دار ديالي تحولو ليها غادي تبقى خاوية قاليا لا اخويا راه سدينا هاد لموضوع بقيت تنشوف فيه ساط واش منيتك راه مسطي نتا واقيلا أشمن زواج هدا وأشمن رجولة لعطبمك مديتليها هيا سوارت تحولي نتي هنا وخليه تما مع هادوك ولله ما ترجعيهم دار غتبقى غير خاوية منيتكم راه أصلا ماشي شي حاجة.. بقاو هنا حتى تكمل قرايتك نتا غادي خارج وهيا تعنقني شكرآ بزااف والله قلت ليها بنت لعبد راك ختي هادشي راه والو كونما هاد راس طارو لي عطاك الله كانت غتكون هضرا أخرى.. سلمت عليهم وخرجت تنحس براسي خففت عليا شويا ديال دنوب ودرت بوصية شيباني أصلا هادو فلوسو هادي أقل حاجة نقدر نديرها ليه.. وغادي لبلاد تاني أححح أول ما وصلت لبلاد سعيدة ضرني راسي تبدل عليا لجو أخويا تنشم ريحة رفيسة شكون جايب رفيسة للمطار لعديان هتلر ومدارش هادشي لليهود.. مشيت نيشان لدار ديال عبدو خاصني نتصالح معاه هو لي عتقني داك نهار وقفت قدام بابهم تندق وهيا تحل مراتو سلام خويا بيخير بيخير لحمد لله كتشوف فلباليزة قالت ليا دخل دخل كتعيط خالتي أجي تشوفي شكون جا لعندنا.. لااا لحب غادي تجي تشوفني وهيا تخرج من واحد لبيت هازا حفيدها والله ما باينا فيها جدة عنقاتني بركنا فصالون مرات خونا كتعمر فأتاي بارك أنا ولميمة وهيا تسولني فين كنتي غابر قلت ليها غير لغربة يلاه جيت أول حاجة غندير هيا جاي عندكم نشوفك.كم ونتصالح مع عبدو راه كان وقعلي معاه واحد مشكل قبل منمشي بغيتك تعاونيني باش يرجع لخدمتو هو لي عارف شنو كان عند لحاج أنا غير تنخربق دبا.. قالت ليا صافي كون هاني غير يدخل من لصال غادي نتحاماو عليه حتى يوافق أحححح شحال كتسمع لهضرة صافي حاط لعين أنا أخويا.. بقيت بارك حتى حطو أتاي تنعاود ليها على لجو تما كنتسنى فيه حتى دخل لقاني بارك مع مو ومراتو شاف فيهم عاود تاني هادشي لمرة لألف لي تدخلو شي واحد بلاما تشاورو واش كديروها بلعاني.. قالت ليه مو راه هدا بحال خوك صغير وشحال مشفناه يلاه جاي من سفر لعندك نتا لول أنا غير ساكت تيخلعني هاد ساط كاع ديك لهضرة ولخطابات لي كنت كنفكر فيهم طريق كاملا تنساولي غادي يعاودني بشي تصرفيقة غادي يفورماطي ليا لكارط قلت ليه عبدو خويا جيت نشوف إلا كان ما يتصلح إن الله غفور رحيم.. قال لوالدة ديالو ومراتو خليونا بزوج هادشي لي دارو كنتسنا شي تصرفيقة وهو يبرك عادي قاليا فين كنتي غابر البرهوش قلت ليه بدلت ساعة بأخرى حتى درت عقلي شويا وهانا رجعت شفتي كاع داك تبرهيش سالا هدا ياسين أخر خاص غير نتا ترجع لبلاصتك بحال لول تعاوني.. عرفتي ببلاصتي نتا مشيتي عطيتي لخونا نص فشركة قد هاديك دوك لفلوس كاملين, لغدايد غادين يقتلوني هادشي خليتك غير يوماين لحاج تلقاه كيتعدب فقبرو دبا.. بقى داوي عاود فتح داك لجرح لي سديتو زعما تا صافي لعلديمك صافي إن الله غفور رحيم دبا صفحة جديدة بزوج شنو بالك.. بقى تيفكر قاليا هاد لمرة غادي تسمع لهضرتي على لأقل حتى تولي قاد براسك.. صافي هضرتك هيا لولا.. خرجت من عندو بلاما ندوق واحد كعب غزال مني دخلت وعيني عليه أصلا غتكون مو لي مقاداه من أين هدا الجميل من داك الجمل أسيدي وصلت لديك دار توحشتها سيكيريتي تصدم فاش شافني دخلت تنسركل فدار متبدل والو غير شويا ديال لغبرة ولكوزينة خاوية لمهم عيطت على داك لمحامي رجع سيدة لي مقابلة دار ولا شي وحدة أخرى قاليا واخا.. خرجت بالموطور غادي لدارنا لقديمة باش نشوف والديا وخا غير من بعيد تاني ودار لكاسك وقفت حدا دارنا كتباليا مسدودة يمكن مسافرين ولا تحولو والمشكل منقدرش نسول شي واحد فجيران غادي راجع منين جيت حتال غدا ونشوف عبدو يجيب ليا شي خبار عليهم أسيدي غادي وسط طريق وتنحاول ندير لكيت فودنيا وهو يطيح لكاسط عرفتي باش طاح تندور راسي وهو يدوز عليه طوبيس فرتكو أنا تخلعت موقفتش أخويا بقيت غادي فطريقي عادي لحمد لله مني جات غير فلكاسك قربت لدار فواحد لفيروج واحد لكسيدة تاني حدا رجليا أخويا طوموبيل غادا فجنبي ضربات فوحدة واقفة شوف زهر كي داير يلاه غنحط رجلي نشوف شنو وقع للي فيها كتباليا شيماء بنت سيد لي داليا لفلوس عاقل عليها مني عرض عليا باهت لعشا شحال هادي تندور عيني فلي سايق تيباليا خويا بدون شعور تحركت بالموطور طياارة شنو تيدير هدا هنا ولا شيفور عندهم ولا كيفاش؟؟ وكيدار وقف على رجليه تاني نيشان لدار مخاصوش يشوفني دبا أصلا غيكون شافني يمكن هادشي علاش موقفش طوموبيل ودار كسيدة واااع على زهر...