البرهوش الجزء 29

قاليا لواليدة غادي تسناني أول مرة غنبقى فوق داك لكرسي لمهم وصلت لمطار فلمغرب رجعت مقودة عليا ودار لي غنمشي ليها فيها والديا ومهدي ومراتو لمهم واحد خونا من لمطار وصليا لباليزة فجنب واحد لحيط بارك كنتسنى فختنى تجي والو تعطلات ولييل جاني نعاس حتى تيوقف عليا مهدي وسط لمطار مفهمت والو كنت كنتسنا ختنى صدمني قاليا نمشيو؟ لا راه غيجي واحد سيد صاحبي غادي يوصلني مبغيتوش يديني لدار مفيا لي يبقى يشرح ليهم ومبغيتهمش يشوفوني هكداك خونا لاح ليا لباليزة فوق لكرسي وغادي دافعني قاليا راه أنا خوك وصلنا لطوموبيل بزز باش طلعني سوفل راح فداكشي موحال واش خويا هدا قلت ليه مدينيش لدار دبا مبغيتش دار يشوفوني هادشي لي دار داني لدار لي كانو ساكنين فيها دخلني لبيت وممشاش لدار لأخرى بقى معايا ليلة كامل فاش فقت صباح تيحسابلي مكينش تنجر فلكرسي وأنا نطيح وهنو يدخل ممشاش لدار تيعاون فيا وتيسول شنو هادشي شنو وقعليك فين كنتي منين جاوك دوك لفلوس شنو هادشي واش شفتي طبيب؟ بقا غير تيسول بعدا موجد لفطور تنقصي ومباغيش نجاوبو مراشقاليش على لهضرة مكنتش ضارب حسابي بلي غادي نبقى معاه قلت ليه كيفاش عرفتيني غنكون فالمطار؟ قاليا راه عيطلي داك صاحبك قالها ليا.. معرفتش زعما قاليا غادي يسيفط لواليدة ديالو واش مدايرش فيا تقة وخا داكشي راح فداكشي ولا كان أصلا معول غادي يعيط ليا على مهدي حيت عارفو مغاديش يخليني فوق لكرسي.. باركين تنفطرو و داوين حتى تفكر بلي عندو ميدار غادي خارج قاليا راه غادي يسيفط لواليدة قلت ليه لا لا إلا كنتي غادي تعاوني عاوني نتا مبغيتش لواليدة تشوفني هكذا.. وهو يدير بناقص من داكشي لي كان غادي ليه سولتو فين كان غادي قاليا كانت عندي شي خدمة مع نسيب جديد غادي نسافرو ليوم ولكن ممكتابش.. بقيت تنقوليه صافي غير سير متضربش ليا حساب قاليا لا صافي أصلا تعطلت بزااف عليهم ومنقدرش نخليك.. ساط من نهار لول درت ليه مشاكل مع نسابو لي مزال معارفش بلي أنا عرفتهم قبل منو لمهم رونتلو حياتو ديال بصح كان تيحسابلي غادي يطلع ليه دم وغادي يديني لشي صبيطار بالعكس خونا خاصو غير شي لعيبة باش يضحكني وخا حويمض ولكن تيهربني شحال من مرة حتى تنبغي نقوليه راه أنا لي ضربتك داك نهار بطوموبيل وتنبقى ساكت لا يولي لايحني لزنقة لمهم تنشد بيسي ولا تيليفون تنصيفط مساجات لعبدو والو متيجاوبش مهدي وهو يديني لصبيطار مكنتش باغي ولكن مقديتش نقول لا خونا لمدير قالينا نفس لهضرة شي عمليات و زعزعو ليا بثمن غادين راجعين لدار تيقوليا وجد راسك غادي تدخل لتما قلت ليه ماشي دبا حتى ندبر على لفلوس بقى تيحلف ليا وأنا عارف راسي معندي منين نجيب دوك لفلوس دبا دوك ليوماين مخليتش شي واحد من لي تنعرف مسولتوش واش يسلفني والو بنادم بحالا متيعرفنيش صافي خليت مهدي يخلص ماشي خليتو لخاطري سيد راه لي فراسو تيديرها دخلت لداك صبيطار وبقى تيجي عندي خونا من نهار رجعت متفرقش عليا دبصح حسسني بشنو هيا يكون عندك خوك بداو داك لعلاج ديالهم ولعمليات أنا بعدت على تيليفون ولبيسي شويا غير راحة وداك تخربيق ديالهم من لعملية لولا بديت تنحس برجليا وداك سميتهم عليه عرفتي دموع أساط حتى فقدت لأمل بنادم ناعس وأنا تنلعب بصباعي بحال شي هبيل ولاد ناس مبغاوش يرجعو ليا تيليفوني بغيت غير ندخل لشي سيت راك عارف داكشي ديال (Test Test) لمهم خوتنا لي تما محملونيش نوقف بزربا قبل منكمل دوك لعمليات مبغاوش يخليوني نخرج أنا تنشوف بلي خاصني نخرج نشوف شنو وقع فهاد شهرين نشوف عبدو شنو وقعليه مبقيتش سمعت عليه شي حاجة كنتسنى غير إمتى يغفلو عليا وأنخرج مبغيتش مهدي يعرفني غادي خارج حيت غيبدا يسول فيا فين غادي نمشي معاك ويمكن ميخلينيش نمشي تاني راه رجعنا خوت كيف لول وكتر كاع لمهم قربت نكمل شهرين غير فداك صبيطار بلا داكشي لي دوزتو فدار مقدرتش نصبر لله يجعل لبركة ديك ليلة جمعت لحوايج ديالي لي لقيت تيليفوني وخرجت مع ديك 3 بنادم نااعس خرجت معارف فين نمشي هادشي مكنتش تنفكر فيه باغي غير نخرج حتى لفلوس معنديش بقيت كنتمشى حتال واحد لبلاكة ديال طوبيس بينو وبينو شحااال بقيت واقف حتال ديك 6 دصباح عاد جا داك طوبيس غادي وتنلعب برجليا بحال فاش كنا صغار وكيشريو ليك دار شي سروالو جديد.. نيشان لدار ديال عبدو تندق تندق عارفهم صباح مغاديش يسمعوني ولكن دار مسدودة يمكن تحولو لفيلا واحد طريييق تاني ضربتها على رجليا بكل سرور مكرهتش نبقى غير نتمشى زعما كنسيي رجليا واش مزيانين ولا لا وصلت لقيت سيكيريتي سولتو على عبدو قاليا راه شهرين وصرف مجا وبلي مخلاو فين قلبو عليه قلت ليه وخا ندخل قاليا دار دارك دخل دخلت تندق فلباب وهيا تحل ليا مراتو شافتني وهيا تصدم قلت ليها فين هيا سعاد؟ وهيا تبدا تغوت خاالتي خالتي ياسين جا وهيا تخرج لعندي من لكوزينة مكين لا سلام لا والو فين كنتي فين هو عبدو دوي فين هو شنو وقعليه تنقوليهم وا غير صبرو ندير غير تيليفوني يتشارجا وندوي معاكم راه بحالي بحالكم تا أنا بزز باش دخلت ليهم لراسهم بلي أنا معارف والو قالت ليا فين كنتي نتا هادشيي كامل علاش مسولتيش عليه عااد طفات عليط شمعة قلت ليها فين كنت وشنو داز عليا بسباب ولدها لا فلوس لا والو وأخر مرة شفتو خليتو تما تيقوليا غادي يحل هاد لمشاكل لي دار.. قالت ليا ودبا رجلي على رجلك غنمشيو نقلبو عليه قلت ليها غتبقاي هنا أنا لي غادي نمشي ولكن خاصني فلوس كاع حساباتي موقفين..

يتبع