البرهوش الجزء الثامن

خويا واقيلا وليت تنبغي وخا فعمر لواليدة ولكن الحب لا يعرف أرقاما لمشكل عبدو غادي يولي ولدي يقدر يقتلني.. لمهم دخلت عندهم لكوزينة لقيتو هو ومراتو و ولدو سيد تيفطر ب 8 لبيضات مابين لمصلوق ولخضر جاب ليا تقية بسيف ما يولي تيخلع أخويا سيد تيدير فطور الوحوش وخا يكون معول يتغدا فجهنم خرجنا لصال غادين وتيقوليا راه مزال فيه جوع هدا بنادم ومبايناش فيه شي وكاال فورمة مقودة كاع دخلنا لصال تيهز تريبل ديال لوزن ديالي تخلعت سولتو أخويا كي درتي ليها قاليا شوف سر ديالي هو لبيض 10 لبيضات فصباح على ريق ورد عليا بقيت تنشوف فيه 10 لبيضات كل نهار راك وليتي حنش أمحمد.. خرجنا من لصال قاليا غنديك تقيد عند واحد صاحبي باش تاخد لبيرمي ديالك قلت ليه وخا دخلنا عند سيد قيدني قاليه شوف كيفاش دير لدري ياخد لبيرمي ديالو بزربا بقا عليه خويا منقدرش وأنا وهوما قلت ليه نهار ناخد لبيرمي 5 الاف درهم ديالك شاف فيا نتا راجل وكتعرف تدوي مع رجال هاد سيمانة غدوز لإمتحان ديال لكود وسوغان سيمانة جايا قلت ليه وخا خرجنا غادين لدار وسيد طابخ ليا راسي هاد لبلاكة كتعني وهادي كتعني وهادي وييع لعطبمك صافي سكتنا دوي معايا فشي حاجة أخرى كين بزااف فاش ندويو من غير هادشي قاليا بحالاش؟ كيفاش بحالاش قوليا لحاج فاش خدام شنو عندو بضبط دوي معايا فلفلوس وهاد عشرانو راه عرضو عليا قالك باغيني نخرج نصيد معاهم شهر جاي وأنا فحياتي كاملا تنصيد غير شنيولا فدار قاليا تا مالك خايف منهم بالعكس ديرهم معارف قدما عاشرتيهم ميزيان وغادي ندير لك ورقة بكاع داكشي لي عند لحاجة ولي تحول لك دبا خاصك تمشي لبنك تقاد شي مسائل قبل من راس شهر باش فلوس لخدامة يوصلوهم وصلنا لدار كنتسناو فلغدا تنفكر واش نقوليه بلي عندي عائلة ولا لا أصلا سيد لي كنت تنكدب باش نبقى معاه مات قلت لخونا راه كدبت علك داك نهار أنا ماشي يتيم والديا مزالين حين تصدم قاليا فين؟ شكون؟ كيفاش؟ عاودت ليه على نهار خرجت من دار وعلاش بقى تيضخك قاليا شوف الله شنو مكتب علك قاليا يلاه معايا نديك تشوف والديا لي رباوني قلت ليه وخا ديك ساعة غادين وتيعاود ليا حتى هو قاليا بلي رباوه وهوما صغاار ومن بعد عرف لواليدة ديالو ديال بصح قاليا بلي هاديك دار لي ساكن فيها دبا ديالها وعندها شي محلاة مخليهم ليها راجلها بقيت تنشوف فيه مك دجاجة بملحها وكامونها وخبزها ولموناضة ديالها أخويا وهو يخنزر هاد سيد دوي ليه فمرتو ومتدوي ليه فمو ولكن معامن دبا طحت ليه على لكود ديالو غادي نبقى ديما نشعودو بيه قلت ليه دبا إلا جا بنادم يخطب مك فالحلال واش عادي؟ وهو يوقف قاليا نزل البرهوش نزل بقيت تنطلب فيه والله ما نبقى نجبد لموضوع ديال لحلال صافي غير تحرك وانا نقوليه ممكن حرام بقى واحد 2 دقايق عاد استوعب شنو عنيت بيها دار ليا ديك أخر فرصة اتعاود تجبد لواليدة غادي نقطعلك دكر خويا فاش تتوصل لقدية لولادك وحفادك حبس ضحك.. وصلنا لدارهم والديه الله يعمرها دار أخويا كلينا شربنا بركنا شويا عاد رجعنا لدار بقيت ساكت مخرجتش حرف قاليا مالك ساكت قلت ليه اخويا لموضوع لي باغي ندوي فيه يقدر يطيرو فيه رقابي هههههه قاليا تعاود تجي لعندي لدار عاد تكون لهضرة.. وصلني لدار ومشى مبقى تيدير والو مور موت لحاج غير تيوصلني معاه وصافي لمهم دخلت لدار طلعت لديك لخزنة بقيت تنضرب فيها تاني دخلت ليوتيوب كيف تفتح خزنة بأدوات منزلية.. واالو خوتنا طالقينها عليا حط ودنك هنا حط يدك هنا واالو مبغاتش تحل ولكن معامن نزلت لغراج لقيت لامون وطلعت ليها تاني شي نص ساعة يلاه بدا لامون تيدخل فيها شويا وأنا نلقا ليها حل مقااود ضربت لحيط لي داير بيها ضلام لحال وأنا مزال مقاتل معاها خرجتها فرتكتها ديال بصح وأخيرا تحلات 8 سوايع عرفتي داك لبيرو كيفاش ولا ولكن رتاحيت نفسيا فاش تحلات تيحساب ليا غنلقا شي حااجة لقيت مغانة هيا مقودة ولكن ضربنا عليها كتر من حقها ضربتها فيدي لقيت تما كتاب شديتو لمدكرات ديال خونا هادو وييع بنادم عندو لخاطر كل ليلة يكتب شنو وقع ليه بنهار بالنسبة لناس لي تيديروها واش نتوما حقيقين؟؟؟ هو متيكتبش كل نهار ولكن تيكتب بصفة عامة حياتو كيفاش دازت دوك لأيام لمهمين لمهم خليت ديك روينة كين لي يجمعها عرفتس لقطعة بعدا واقيلا تبليت دبصح تنحس براسي ناقصاني شي حاجة ملي مشربتش ديك ليلة ولكن جابلي الله داك لكتاب نشد بيه ستون دخلت لكوزينة عالجت ودخلت لبيت تنقرى فداكشي لي كاتب هاد خونا نفس لهضرة لي عاودلي ديال لإصلاحية ونزقة خرج دير علاش باش تدخل تاني حتال نهار قرر باش يبدل حياتو خونا مخلاش شي حرفة مدارهاش كي زوينة كي خيبة سيد كان قواد كبير تبارك الله دبا أنا عايش بفلوس تاقواديت تناكت.. خونا تزوج بشي وحدة هيا لي خلاتليه صرف باش طلع ديال بصح وعرف هاد عشرانو كاتب عليهم واحد بواحد وشنو عاطيهم وفاش مشارك معاهم وشحال كيتسالهم تيباليا تيدوي على واحد منهم هو لي عرض عليا باش نمشي معاهم لصيد شهر جاي هاد خونا بحالا قلتي تيدخل سلعة لمغرب وتيخرجها ودارو بزااف دلحوايج خيبين باش يكبرو شركة ديالهم بزوج... خوكم مكانش داير راسو فلقراية تنقرى كلمة ونقز عشرة كنتهجا فلخر وأنا نمشي لصفحات لخرين تيدوي عليا قريتهم وأنا ملوح ديلمو تحت سرير ضربنا عليه لعداب ديال ليهود نص نهار أعباد الله نعست باش فقت لغد ليه بكري مشيت لديك لمدرسة أخويا أنا وليت باغي نقرى شي يهودي مات فلملاح تنمشي لديك لمدرسة ديال سياقة داك خونا لي قلت ليه 5 الاف درهم غير تيشوفني كيتبسم راه 5 الاف درهم هاديك غادي يدير بيها شي تسافيرا دايزها لكلام لمهم كيما قاليا سيمانة كود سيمانة لي موراها دوزت سايق عطاني روسي عطيتو 5 الاف ديالو شن طن.. داك نهار محطيتش ديك طوموبيل كاع دروبا سركلتهم بيها مع لعلم لغد ليه غادي مسافر لعروبية مع دوك خوتنا باش يصيدو ديت معايا واحد لقرعة نحتافلو شويا لغد ليه فايق متمن سيد مصوني ليا 100 مرة جاوبتو قاليا راه شدينا طريق نص ساعة دبا قلت ليه ممكتابش قاليا لا أولدي مكتاب بزربا لحق علينا ها حنا غادين نتسناوك مقديتش نقوليه لا بزربا دوشت وخرجت لعندهم تينعتلي طريق حتى لحقت عليهم غادين لفيرمة ديالو فشي عروبية لمهم وصلنا وخوتنا حامضييين قوليهم غير سلام يبداو يضحكو لمهم ولاد ناس تيطلقو لحمام باش يضربوه يموت فكروني فيامات كنت مربي لحمام فسطح لمهم شاد داك سلاح هادشي بحال لأفلام فلعشيا خرجنا راجعين داك ساط لي عرض عليا قاليا تبعني تعشا معايا فدار نوريك لعائلة راه باغين يعرفوك لحاج راه كان كتر من خويا قلت ليه وخا علاش لا وبصح هو وشيباني كانو مكبتينها باش دارو هاد لفلوس لمهم وصلنا لحدا لفيلا ديالو حطيت طوموبيل برى غادين لباب كتباليا واحد رونج واقفة قدام لباب معرفتش فين فايتلي شايفها دخلنا أسيدي لدار لقا خت مراتو عندو فدار قاليا لمدام سلمت عليها قاليا خت لمدام سلمت عليها وهدا ولي لعهد ولدي سلمت عليه قاليا هادي بنتي شيماء سلمت عليها وهادي مريم بحال بنتي سلمت عليها حتى هيا قاليهم هدا هو ولد عمكم فاروق الله يرحمو أنا حشماان أخويا سيد عندو لعائلة متيتزة اعشيري و ولادو وديك بنت خالتهم بالخف بغاو يشريو معايا معرفة عطيني نمرتك؟ فين كتبرك؟ معامن كتعمر؟ فين كتقرى؟ عندك طواليط بلدية ولا رومية؟ كتكفت؟؟؟

يتبع