مهدي و شيماء الجزء 14

بارك تنفطر معاهم وكمال ومراتو باركين ورانا صدمة زهر كيفاش داير زعما ليوم خارج مبهدل قلت غنشوف غير مريم ونرجع لدار.. شافنا وقفت سلمت عليه وعلى سلوى مراتو مزال يلاه دخلو لداك لمحل بركو معانا فطابلة قاليا فين غبرتي.. غير لخدمة بحال ديما, وايلي معامن خدمتي؟ مع واحد شركة يمكن تعرفها بيترا قاليا أه عرفتها الله أودي شنو خدام فيها؟؟ كيفاش درتي ليها بعدا؟ قلت ليه قصة طوييلة لواحد هو لي يدير شي حاجة لراسو بنادم راه مقااود ميعقلش علك حشيتلو لهضرة زعما باركين وخونا دارلي بحالا تيحقق معايا قاليا هيا غادي نديرو شي حاجة بزوج بحال شحال هادي قلت ليه لا شكرًا مباغي نديرو والو صافي الله يجعل لبركة نعيشو برزقنا ونرتاحو راك عارفني شنو مدوز.. قاليا وخا يلاه غير عطيني نمرتك راه مبقاتش عندي تنبغي نعيطلك وحتى دار لي تنعرف تحولتو منها قلت ليه مرحبا عطيتو نمرتي وغيرناها حنا وصلت مريم ومها لدارهم.. رجعت لدارنا لواليدة ولواليد مزال داوين على لبرهوش ديال خويا دخلت لبيتي هاد لبرهوش غادي يبقى حياتو كاملا نخرج أنا من دار يدخل هو غادي نغيرها أنا نخليهم غير هوما وهو.. وهادشي لي درت عيطت على واحد سمسار فجديدة قلت ليه يشوفلي شي دار للكرا حدا لمصنع لي عندي فيه لخدمة قاليا موجودة بفراشها تقدر تسكن فيها من غدا.. حتى أنا جاتني من الجنة والناس جمعت داك صاك قلت للواليد بلي مسافر على ود لخدمة تاني بقاو عليا متمشيش متمشيش درت براسي مكنسمعهمش لغد ليه هزيت صاكي وشديت طريق عندهم فلوس عندهم ولدهم غيبقى معاهم دبا وصلت لجديدة تنعيط على داك سمسار داني لديك دار شفتها وتلاقيت بمولاتها قادينا لمسائل تفاهمنا عطيتها فلوسها تسبيق ديال 3 شهر وهيا تعطيني سوارت دخلت لدار وأنا نجبدها بنعسة تليفوني مبقاش تيسكت ها مريم ها ناس ديال لخدمة ها كمال.. فلعشيا مشيت لداك لمصنع سيكيريتي ولا عارفني دخلت نيشان تنسركل لداخل حتى وقفات عليا ختنى شيماء قالت ليا مرحبا مرحبا سي مهدي معلمتينيش بلي غادي تجي قلت ليها غير جات فجأة وليت ساكن هنا قريب سولاتني فين بضبط وبقينا داوين لبلاصة لي ساكن فيها دبا قريبة ليهم قالتلي تقد تدوز لعندنا لدار غير على رجليك.. لغد ليه نفس لبلان دخلت لتما وبقينا داوين فلعشيا ديال نهار تاني تتعيط ليا مريم جاوبتها قالت ليا فين نتا مالك غابر؟ أنا فجديدة تحولت لهنا على ود لخدمة. وايلي تحولتي ومقديتيش حتى تقولها ليا والله ما رجولة هادي أنا شنو تندير على ودك ونتا مقادش حتى تقوليا بلي غتمشي... ختنى تقلقات ديال بصح حتى أنا فرشتها بصراحة نسيت بلي مقلتهاش ليها قلت ليها شنو بالك تجي لهنا وفأقرب وقت نجيب والديا و ندوي مع لوالدة ديالك.. قالت ليا هادشي زوين ولكن منقدرش نجي أنا مزال تنقرى هنا.. وا بنت ناس وهانتي قريتي ومن بعد يمكن مزال مفهمتيش لخدمة ديالي مع هاد شركة راه فشهر واحد نديرلك جامعة قراي فيها نتي وصحاباتك.. ختنى مباغيا تبعد على مها يمكن مقديتش نبزز عليها صافي بقينا تندويو فتيلي ونهار كامل وأنا تندوي مع ختنى فلخدمة كتدوز بيا لوقت بصراحة جيت خوكم معندو ميدار تما مرة مرة فاش تيجيبو ليا شي ورقة نسنيها دموع تيطيحو فاش تيسولوني على شي حاجة لواليدة كل نهار كتعيط ليا واش مناويش ترجع لدار قلت ليها غير دوزو وقتية مع ولدكم.. ختنى شيماء ديما كتعرض عليا نمشي نقصي معاهم فدار مبغيتش نعيق عليهم تنمشي غير جمعة مها كتصرع كسكسو مها حنينة وباها عندو واحد لموستاج تبارك الله كسكسو تيوحل فيه بحالا كنتفرج فشي فيلم مغربي ولممتلين متيعرفوش يمتلو وتيتعنبو على لولد باش يتزوج بنتهم بحال هكداك والله وهيا خاصها غير إمتى تلوح ليا شي مساج على زواج واش مكتفكرش تزوج حتى أنا تنتعفر عليها تندير فيها حشومي إن شاء الله من بعد.. مدوز 5 شهر هكدا كل سيمانة تدوز فحال لي قبل منها فهاد 5 شهر تبدل كلشي تنعقل فأول دفعة من عند شركة ديك 35% لي تافقنا عليها فاش حولو ليا لفلوس عيطاتلي لبنك مفهمو والو شرحتلهم قالك صيفطلنا شي وراق نتأكدو صيفطتلهم نسخة ديال لعقد جاوبوني برسالة ديال شكرا على ثقتك.. طوموبيل لقديمة بعتها فلبلاصة ودخلنا لجديد حوايجي لي جبتهم وليت تنشوفهم وتنضحك على راسي شو شنو كنت تنلبس بصراحة لفلوس كتبدل بنادم أسيدي بديت تنفكر نرجع لمدينتي نشوف والديا ومريم ويمكن نطل على كمال ديما تيعيط ليا غادي لمصنع نشوف ولاد ناس ونتوادع معاهم ولغريب ختنى شيماء مخرجاتش ليا من شي قنة لي تنسولو تيقول ليا فلبيرو ديالها مشيت عندها تندق قالت ليا دخل وصوتها مبدل دخلت ختنى مراشقاش ليها وبحالا باغيا تبكي سيدة ماشي فحال عوايدها بركت حداها أمالك أبنت ناس باك مات؟ عادي نتزوج أنا بماماك بروجولة.. قالت ليا لا وكون غير دارها وهناني, كيفاش علاش هاد لحالة؟ مهدي هو راه باغين يزوجوني بولد عم بابا سيد قدو قد بابا, إوا صافي قولي ليهم لا وسالينا نتي أصلا خدامة مزيان هنا مغاديش تحتاجيهم قالتلي منقدرش نتا معارفش عائلتي وبابا منقدرش نقول لا..

يتبع...