قصتي مع الخليجية الجزء الخامس

صافي سالينا العشا شديت طاكسي للدار ، دخلت حنبت على الواليدين على راسهم و عاودت للواليد على الخدمة و فرح ليا ، قالي انا كنت عارف ا ولدي بلي الله ماغاديش يخيبك الله معاك ا ولدي دييما كاندعي معاك ، صافي دخلت للبيت قلعت للخوادري البيسي و عاودت ليه البلان ديال الخدمة تا هو مسكين فرح لي و درعني قالي مبرووك اخويا العقبا ليا حتا انا ، حليت الفيس لقيت منها رسالة قالتلي سلام رديت عليها السلام جبدنا الهدرة هنئاتني بالخدمة الجديدة ، هدرنت حتا عيينا و طلبت منها لاذن غادي ننعس قالتلي تمنيت لو تزيد معايا 10 دقايق مزال راه ماكانسخاش من الهدرة معاك جاوبتها هههه بصراحة انا ماعنديش مع الهدرة د الفيس بغيت الواقع فاص ا فاص 

رؤى : حتا انا بحالك والله الهدرة د الفيسبوك ما كاتحرك حتى حاجة فالانسان 

انا : وي بصح عنداك الحق ، يلاه درت لبك خاطرك انا كانموت بالنعاس غدا نكملو تصبح على خير

رؤى : بيني و بينك انا فرحانة لحقاش غاتكون قريب مني فالخدمة يلاه تصبح على خير 

صافي طلعت ليها vu و نعيت لغد ليه فقت غسلت سناني و وجهي ، لقيت الواليدة كاتوجد لفطور غا فطرت و خرجت انا خارج من الدار و هي كاتدعي معايا ، شديت طاكسي مشيت للشركة دخلت لقيت ديك التيتيزة ديال الغيسيبسيون تما اححح على زين فيها سلمت عليها بقينا كانهدرو واحد 5 دقايق تعرفنا بالمناسبة سميتها حنان صافي قلت ليها من بعد و نكملو دابا نهار الاول ديالي فالخدمة عندها تقلق الباطرونة ضحكنا مع بعضنا ، طلعت للبيرو لقيت رؤى جالسة لي فالبيرو ديالي 

رؤى : اهلا اهلا كريم اتفضل (ناضت من الكرسي ديال البيرو باش نجي انا نجلس فيه)

انا : لا لا لا غا خليك راك نتي مولات شي غا خليك فبلاصتك والله مانتفضل عليك 

رؤى : ماتقولش هاكا تفضل بلاصتك هادي ويلا ماجيتيش لبلاصتك غادي نتقلق منك

انا : (حشماتني صراحة) صافي ها انا ا لالة مزيان دابا مامقلقاش 

رؤى : ههه دابا مزيان يلاه هاك هاد ضواسا بدا فيهم الخدمة ويلا ماعرفتيش شي حاجا عيطلي انا غير حداك 

انا : واخا ربي خليك شكرا (ضحكت معاها فوجهها) 

صافي خرجات بحالاتها بقيت انا مقابل لخدمة ديالي ، وصلات وقيتة لغدا عرضات عليا عاوتاني رؤى ولاكن هاد المرة ماغانكونوش راس فراس غايكون معانا جوج ديال الناس جداد لي هوما جمال و نورة جلسنا فالطابلة طلبنا داكشي لي غاناكلو ، بيني و بينكم هاد جمال والله مارتاحيت ليه نورة باينة فيها بنت الناس و معقولة ، عررفاتنا رؤى على بعضنا 

رؤى : كريم كانقدمليك سي جمال و خطيبتو نورة 

انا : متشرفين ا سي جمال (مديت ليه يدي)

جمال : (خلا ليا يدي مشير) متشرفين ا كريم 

نورة : (زربات و سلمات عليا باش تصلح الموقف) متشرفين ا سي كريم (مع واحد لابتسامة)

صافي نزلو الماكلة بدينا كاناكلو حد ماكيهدر مع لاخور حتى سولاتني رؤى

رؤى : كيف جاك نهار لاول فالخدمة 

انا : مزيا..... (قاطعني جمال)

جمال : ااه هادا هو ولد العساس لي خدام عندكم و ضبرتي ليه فخدمة 

نورة : (دارت ليه حشومة بيديها و دغيا بدلات الهدرة) النهار لاول ديما كيكون زوين دغيا تستانس ا كريم ماتخافش 

رؤى : (وهي حشمانة من لهدرة د جمال و باينة فيها تقلقات منو) اه بصح كاينة متافقة معاك ا نورة 

انا غير ساليت داك طبسيل و مشيت للطواليط نغسل يدي بيني و بينكم بقا فيا الحال هاداك لي كيقول عليه عساس راه عاش بكرامة حياتو كاملة و معيش ولادو بالحلال 

يتبع....