أنا غير هبيلة الجزء الثاني

واحد الساعة.. تاتسمع شي خطاوي تايقربو.. بقات كاتغوت..

الشخص # براءة ماتغوتيش ابنتي.. مع الغوات ديالها.. وراكم عارفين الناس ديالنا ماعزيزش عليهم داكشي دالتبركيك.. دغيا حلو البيبان..

الشخص # وهو تايغوت على هادوك لي حلو البيبان # الله ينعل لي مايحشم.. مخليين بنت بايتة بوحدها.. ماسمعتوهاش وهي كاتبكي.. ولكن جاكم الفضول دابا..

واش مابقاتش الرحمة فهاد البلاد.. فين هو حق الجورة.. اوا الالة عيشة.. ياك يامنة الله يرحمها هي لي كانت كاتعطي لولادك ماياكلو ملي راجلك احمد مرض.. دغيا نسيتي خيرها وماقديتيش تدخلي بنتها عندك واخا تبيتيها غير فالدروج وماتخليهاش هنا

عيشة هي جارت عائلة براءة وكانت صاحبت لالة يامنة مها الله يرحمها # سي الفقيه.. راه ماشي هكاك.. أنا راه بغيت ندخلها وليني مع.. مولف سي سلام غير تايرجع من برا ويدخلها معاه.. وزايدون راه تبرا منا وقال للجيران بلي لي دخل بنتو عندو يوصل معاه لخزيت

الشخص وهو نفسو الفقيه دالحومة # اييه.. اوا ملي ماجاش علاش مادخلتوهاش.. كاع هاداك سلام خلعكوم كاملين.. ماعلينا اوا فين هو دابا

عيشة # وا الصراحة من فالعشية خرج هو ومراتو.. وقلنا راه خرجو يدورو.. وليني مادام الهبي..بغيت نقول براءة هنا يعني سافروا

الفقيه # لاحول ولا قوة الا بالله العظيم.. اييه ياليام.. لهلا يحرم شي مسلم من القلب الحنين.. مسكينة لالة يامنة.. مشيتي وخليتي بنتك بوحدها.. وليني كاين الله.. اوا هاني نديها معايا.. وايلا جا باها وقدر الله وسول فيها.. قولو ليه داه الفقيه..

دا الفقيه براءة عند مراتو.. الفقيه عندو 2 بنيات و 3 دالولاد.. ولكن كلشي بدارو بقات ليه غير بنية 1 وولد قد براءة.. الصباح.. مرات الفقيه وبنتو داو معاهم براءة للحمام.. عوموها مساكن.. وتهلاو فيها

بقات معاهم 3 د السيمانات وتقول شي خبار على باها.. حتى لهاد النهار..

فالدار دالفقيه. فرح جات تادق الباب.. حلات ليها مرت الفقيه الباب..

فرح # السلام عليكم.. خالتي انا فرح صاحبت براءة.. جيت نشوف عمي احمد (الفقيه )

واش كاين حيت انا خدامة..

مرت الفقيه # اييه ابنتي زيدي مرحبا بيك

فرح # شكرا.. دخلات لقات الفقيه تايسبح.. # السلام أعمي احمد لاباس

عرفتيني ياك..

الفقيه # وعليكم السلام ورحمة الله وبركاته.. واش بنتي فرح هادي.. تبارك الله شحال هادي مابنتي ليا.. ياك لاباس ابنتي

فرح # الحمد لله أعمي.. غير جيت ندي معايا فرح.. تسكن معايا..

الفقيه # فين غاتسكن معاك ابنتي.. وباها دابا يجي يقلب عليها راه مهما كان راه بنتو هادي

فرح # اييه.. راه سمعت با البارح تايقول لمرتو بلي سي سلام باع ألدار والحانوت.. ومشا معرفو فين

الفقيه # لاحول ولا قوة الا بالله العلي العظيم.. لاحول ولا قوة الا بالله العظيم.. وفين بغيتي تديها معاك

فرح # مولات الدار عندمن خدامة.. قالت لي نجيبها معايا.. تجلس معاهم حيت هما بوحدهم.. عندهم بنت وحدة راها مزوجة فالخارج.. والولد تايقرا فأمريكا.. وملي عاودت ليها هادشي لي طرا لبراءة قررات تعاونها

الفقيه # مسكينة.. الله يكتر من أمثالها.. اوا اش نقوليك ابنتي.. ديها.. أنا نيت راه كبرت وخالتك تاهي.. وراه بغينا نرجعو للبلاد

..اللهم تمشي معاك عند دوك الناس

أنا غير هبيلة

أماه بعدك لا نور

أماه عم الظلام

أماه بدونك يتيمة

أماه عودي يبزغ القمر

أماه عودي تشرق الشمس

أماه عودي.. أماه

اييييه يالزمان الغدار.. فين اليام لي كانت فيها يامنة.. كنتي يا براءة يتضرب ليك ألف حساب.. كنتي نتي نور عين باك.. لي عمراتها وحدة جات من مور مك.. ايييه

ودابا هانتي وليتي يتيمة الابوين.. واخا باك باقي حي

ولا يتحسب من الميتين.. باع الدار بلا مايفكر فيك ولا حتى فخوك.. ومافكرش حتى يديك معاه..

المهم فرح دات معاها براءة.. براءة لي ولات تلاح من دار لدار

وصلو ودخلاتها.. حطاتلها تفطر فالكوزينة.. # هانتي ابراءة دابا نتي غاتسكني مع فرح صاحبتك

ومع خوك مراد.. راجل فرح.. فديك الدار..

نتي غاتعاوني فرح فالشغل.. ياك

براءة # الهبيلة تجلس مع فرح.. لا الهبيلة بغات تمشي لدارهم.. حمزة ومي غايجيو ومايلقاوش الهبيلة.. و با غايضرب الهبيلة إلى مارجعاتش..

فرح عنقات براءة # كيف ندير نفهمك.. (مولات الدار تاتعيط )

..براءة جلسي هنا كولي هاني غانجي دابا

فرح # نعم الالة..

مولات الدار # بنتي واش جبتي معاك ديك البنت..

فرح # آه الالة..

مولات الدار # المهم هانتي عليها البيت ديالك.. ونتي ومراد رجعو للبيت لي حداه.. راه كبير على هاداك.. وراني هدرت مع واحد صاحبتي هي طبيبة نفسانية.. وقالت لي غاتجي تشوفها.. اليوم فالعشية..

فرح # شكرا بزاف الالة.. الله يكتر من مثالك..

المهم فرح مشات كملات الشغال ديالها.. ودات معاها براءة

للبيت اللي غايولي ديالها # براءة هانتي هابيتك.. وهاهما الحوايج الجداد ديالك.. راه عاد شريتهم ليك.. براءة عاودي لصاحبتك فرح.. أنا عارفاك ماهبيلاش غير خايفة ومصدومة من الموت دمك

..ومن داكشي لي وقع ليك.. شكون لي تكرفس عليك.. شكون لي جرحك ديك الليلة.. واش تانعرفوه

براءة تكمشات وهي تاتبكي # معرفتش.. أنا غير هبيلة.. ماعرفتش

مولات الدار # فرح.. فرح.. جيبي براءة واجي عندي

فرح # واااخا الالة.. براءة اجي لبسي هاد الكسوة..ديال الدار..لبساتها.. شتي جيتي قمرة ماشاء الله.. بلاتي ندير ليك الظفيرة..

براءة مبتاسمة.. # مي كانت تادير للهبيلة الظفيرة.. الظفيرة زوينة..

فرح # الحمد الله هانتي تبسمتي.. أنا نبقى ديما نظفر ليك هاد الشعر الزوين والطويل.. يالاه دابا نمشيو مولات الدار تاتسنى..

مشات براءة و فرح لعند مولات الدار للصالة وماكانتش بوحدها.. كانت معاها واحد المرأة.. جلساتها فرح ومشات توجد اتاي كيف ماطلبات منها مولات الدار

المرأة ولي هي الطبيبة النفسانية # براءة لاباس.. أنا الطبيبة ديالك.. نكونو انا ونتي صحابات.. قولي ليا اشنو تايعحبك ديري..

براءة # بدون جواب.. وخايفة

الطبيبة كاتخاطب مولات الدار# حالتها ماصعيباش.. غير كاتبان مصدومة وخايفة.. غاتكون دازت من شي حاجة لي ركبات فيها الخوف وتلقات صدمة. فحياتها..

عيطي على فرح باش نسولها.. جات فرح # الطبيبة # فرح ماعرفتيش اشنو لي كان تايعجبها دير.. قبل ماتموت مها.. شي عمل شي هواية..

واشنو الحوايج لي دازت منهم خلاوها هاكا

فرح # آه كانت كاتيعجبها تطيب واخا صغيرة.. وكانت كاترسم بزاف.. عندها موهبة ماشاء الله فالرسم..

كانت مات مها ومن موراها جات مرت باها لي ردات حياتها جحيم.. باها لي ماكانش تايخسر ليها ولا تايهلكها عصى.. خطبها واحد ولد جيرانا واخا كانت باقا صغيرة. .. كانت عندها. 14 العام 

.. زعما حط عليها يديه على ماتبلغ السن دالزواج.. وباها قبل وجلسها من القراية وخا كانت كاتقرا مزيان.. ولكن واحد الليلة كانت الشتاء والدنيا خاوية كانت خارجة تاواحد ماعرف اش كان خرجها فداك الليل..غبرات

والغد ليه لقاوها مرمية حدا الكوليج.. وعامرة دم.. وحوايجها مقطعين كانت شبه عارية.. وتخلى عليها داك اللي كان خاطبها.. من بعد ماقالو بلي خرجات تتلاقى مع صاحبها.. واخا انا متأكدة بلي هي ماكانت كاتعرف تاواحد.. مسكينة مادافعاتش على راسها

..حيت ديك الساعة تصدمات

الطبيبة # مسكينة هادشي كامل.. المهم غاتحاولو تردو ليها الهوايات ديالها.. عطيها ترسم وبقاي تدخليها تطيب معاك

حيت هي خاصها تهدر وتعاود ابعدا.. مادامت بقات ساكتة.. فهي اذن مازال مامتيقة داكشي لي وقع ليها

المهم مشات الطبيبة.. لي واعدات براءة باش غاتعاونها.. وحتى مولات الدار

فالليل..

فرح # لالة.. هاني غادية نمشي انا ومراد.. باش نقولو لبا الخبر دالزواج.. واخا غير الله يحفظ

مولات الدار # واخا ابنتي الله يسهل عليك.. براءة باقة فايقة

فرح # آه راه عطيتها واحد الستيلو

والدفتر وقلت لها تجلس ترسم

مولات الدار # آه صافي.. غانوض عندها نطل عليها..

مشات فرح.. وناضت السيدة عند براءة للبيت لقاتها كاترسم.. # بنتي براءة تاترسمي.. اش كاترسمي.. عطيني نشوف

شدات منها الدفتر.. # ماشاء الله عليك.. شكون هاد المرأة لي رسمتي..

براءة # الهبيلة بغات يامنة مي.. وبقات كاتبكي..

السيدة # هي هادي مك ابنتي.. تغرغرو عينيها.. منين سمعات براءة.. اجي ابنتي عندي.. ديريني انا هي مك يامنة..

براءة # خديجة قالت للهبيلة انا هي يامنة.. مي ماكانتش تاضرب الهبيلة.. مي.. مي.. مي.. وهي كاتبكي

يتبع..