أنا غير هبيلة الجزء الثالث

السيدة # صافي ابنتي قطعتي قلبي.. صافي.. ونتي ماشي الهبيلة نتي براءة.. يالاه نعسي ابنتي راه مشا الحال..
نعسات براءة ولكن هادي أول ليلة كاتنعس وهي ماوكلاش العصا.. نعسات على قلب حنين.. قلب السيدة حنان مولات الدار..
أصبحنا وأصبح الملك لله والحمد لله رب العالمين..
فرح # براءة فيقي فيقي.. هانتي فيقي طيبي معايا
فاقت براءة وغسلات ليها فرح وجهها.. مشطات ليها.. ولبساتها كسوة غوز بحال دالبنات الصغار من الكتاف.. وفايتة الركبة
دخلو للكوزينة.. ودارت ليها الطابلية.. هانتي ابراءة.. طيبي لي بغيتي.. ديري لينا المسمن بحال لي كنتي كاديري
هزات براءة الطحين لي عطاتها فرح والماء والملحة..المهم باش توجد.. بقات كاتعجن.. سالات بدات تكرص.. با تايعجبو المسمن د الهبيلة.. الهبيلة. غادير المسمن لبا..شوي وبقات كاتبكي.. با مابقاش باغي المسمن دالهبيلة.. با بغا دخديجة..
فرح # براءة انا ومراد ولالة حنان بغينا المسمن.. احنا ضياف عندك اليوم..
براءة # دير لفرح المسمن..
كملات براءة.. وحطات فرح داك المسمن بغات تديه للطلبة..
السيدة حنان دخلات للكوزينة # بنتي فرح دي داكشي للجردة.. واجي باش نفطرو كاملين..
فرح # واخا الالة
فالجردة..
السيدة حنان# تبارك الله على بنتي براءة المرضية..مسمن هادا .. فرح اش قاليك باك البارحعلى حساب زواجك
فرح # ماخلا ليا غير اللي نسيت.. ولكن فالاخر اقتانع
السيدة حنان # آه مزيان.. المهم ملي تكملي.. وطلعي قادي البيت دولي.. زياد راه بعد غدا غايجي..راه عزيزك مشا يجيبو معاه
فرح # هي الأولى الالة
براءة # الهبيلة غاتعاون فرح..
فرح # واش بصح الحمد لله ياربي.. شتي الالة حنان هاهي ولات كاتفاعل مع هدرتنا
السيدة حنان.. # آه بصح.. غدا غانديها عند الطبيبة.. ونقولها هادشي
المهم كملوا الفطور وطلعات براءة للبيت مع فرح
جمعوه.. براءة شافت الصورة دزياد وتفكرات خوها
براءة # حمزة ماجاش يشوف الهبيلة.. حتى هو خلاها.. مي خلات الهبيلة.. وبا خلا الهبيلة.. وحمزة خلا الهبيلة.. وفرح،،، حتى فرح غاتخلي الهبيلة..
الهبيلة غاتبقى بوحدها
وبقات كاتبكي
فرح قربات عندها وعنقاتها.. # حمزة خوك غايجي عندك ماتعرفين..راه غير تايقرا
كملو الجميع دالبيت.. وداز النهار هاكاك..
فالليل كلسات براءة تاترسم.. رسمات واحد الشخص مي ملامحو لوناتهم بالاسود وبقات كاتبكي وكاتغوت..
دخلات عندها فرح والسيدة حنان # براءة مالك..
هزات حنان الدفتر دالرسم.. براءة شكون هادا.. علاش لونتي وجهو بالكحل..
براءة # هو.. شدني بالليل.. هو هو.. وبقات كاتبكي.. خديجة سخرات الهبيلة.. وشدني بالليل..
حنان # واش هذا لي اغتاصبك.. آه هي خديجة بنت الحرام لي سخراتك وتاتقول مشيتي تلاقاي مع صاحبك.. ةماتبكيش.. الله ياخذ فيه الحق
لالة حنان # واش كاتعرفيه ابراءة..
براءة # الهبيلة مابغاتش تهدر معاه.. حيت جواد مايبغيش.. وبا تاهو مايبغيش.. كان تايتبع الهبيلة..
: كان تايتبع الهبيلة ديما..
براءة بقات كاتبكي.. حتى نعسات ماكملاتش لفرح وحتى هما مابغاوش يضغطو عليها
أصبحنا وأصبح الملك لله والحمد لله ولا اله الا الله وحده لاشريك له
اليوم نهار جديد..
هاد النهار براءة مشات عند الطبيبة مع السيدة حنان
قالت ليهم راها كاتحسن مدام ولا كاتفاعل معاكم
خرجو من عند الطبيبة.. ومشات السيدة حنان لمحلات الملابس
شرات حوايج جداد.. وخضات لحنان ولبراءة
2 كسيوات.. دفرح حمراء ودبراءة فالصومو.. لبساتها تما ومابغاتش تحيدها.. هههه مسكينة..
..صافي رجعو للفيلا..
دخلو.. مع حلو الباب حتى كاتغوت السيدة حنان # ولدي زياد جوات عند واحد الولد عنقاتو.. براءة بنات غير كاتشوف
زياد # ماما توحشتك بزاف
السيدة حنان # درتيها بيا.. ياك قلتي تال غدا عاد غاتجي.. فين هو باك
زياد # هو تال غدا عاد غايجي.. أنا بغيت ندير ليك مفاجئة.. زياد رد البال للبنت لي واقفة.. فالباب
السيدة حنان # براءة اجي ابنتي هنا.. هذا ولدي زياد..
زياد مد ليها يدو # السلام براءة
براءة (بدون رد وشدات فيد السيدة حنان )
جمع زياد يدو وهو ماحاملهاش.. السيدة حنان ردات البال.. # براءة هذا خوك زياد ماتخافيش منو.. سلمي عليه.. ماتديش عليها اولدي راه مسكينة مريضة شوي.. من بعد ونعاود ليك
مشات براءة عند فرح..
داز النهار عادي.. ماوقع والو وحتى براءة كانت عيانا مارسمات والو نعسات بكري
صبح الصباح.. النهار جديد واحداث جديدة
فالكوزينة
السيدة حنان # فرح بنتي.. وجدي لزياد عصير دالليمون.. راه خرج يدير السبور
فرح # آه راه وجدتو..أصلا.. راه الفطور واجد فين تبغى نحطو..
السيدة حنان # حطيه ابنتي فالطبلة دالجردة.. فين براءة مابانتش ليا هاد الصباح
فرح # راه فاقت.. وبقات كاتبكي.. قاليك بغات تشوف حمزة خوها.. اليوم الأحد ومولف كل سبت كايجي يشوفها
وأنا خرجتها للجردة وعطيتها ترسم
السيدة حنان # هاني غانمشي نبدل عليا ونمشي نطل عليها
فهاد الأثناء.. زياد دخل رد البال للبنت لبراءة لي جالسة تاترسم.. قرب ليها # السلام براءة.. لاباس
براءة وهي نايضة باغا تمشي..
زياد # شكون هاد الولد لي رسمتي زوين..
براءة # الهبيلة بغات حمزة..
زياد # واهانتي هضرتي دابا.. شكون حمزة
براءة # الهبيلة بغات حمزة.. حمزة ماجاش يشوف الهبيلة..
زياد # واخا غير قوليلي
شكون حمزة باش نديك عندو
السيدة حنان جات # زياد ولدي امتا جيتي
زياد باس لمو يديها # عاد دابا شوي.. الميمة بغيت نسولك شكون هو حمزة لي كاتهضر عليه براءة
واصلا ماعاودتيش ليا مالها هاكا
السيدة حنان # براءة سيري ابنتي عند فرح عاونيها.. مشات.. الحمد لله لله ولات كاتفاعل معانا..هداك راه خوها..
المهم اولدي براءة تعرضات لبزاف دالمعاناة فحياتها.. عاودات حنان لولدها زياد داكشي لعارفة على براءة
زياد # مسكينة صراحة بنت زوينة بزاف.. ماتستاهلش..
السيدة حنان # ههههه هي عجباتك..
زياد # ههه ماشي هاكاك اميمتي.. المهم علاش بغيتي ديري فيها الخير
السيدة حنان # ماعرفتش اولدي ولكن بقات فيا بزاف.. تفكرت ختك الله يرحمها (حيت من غير زياد وختو اللي فالخارج كانت عند حنان بنت وماتت مسكينة كان فيها التوحد.. وكانت طاحت غير فلابيسين ومع ماعرفاش تعوم وهي تموت.. )..كون كانت بعقلها ماكانتش ترمي راسها فلابيسين وتموت.. خلات ليا شمتة وحرقة اولدي..ولكن براءة فكراتني فيها وبغيتها تبرا.. واخا هي ماعندهاش التوحد.. وغير مصدومة ولكن
بغيت نشد بيديها..
زياد باس لمو الراس # الله يخليك ليا يالميمة الحنينة
..
حطات فرح الفطور وهي وبراءة فطرو فالكوزينة مع مراد
من بعد الفطور
..
زياد # الميمة اش بان ليك نديو براءة تشوف خوها
السيدة حنان# واخا
كنت باغا نقولها ليك.. هاني نقول لحنان تلبسها
ونبدل تا انا ونمشيو
السيدة حنان # فرح بنتي.. لبسي لفرح.. غانديها تشوف خوها
فرح مع ابتسامة فرح # هي الأولى الالة
دات فرح براءة لبساتها.. الكسوة لي شرات البارح.. وصباط بلا فالبيض.. دارت ليها ظفيرة.. جات فنة.. خاصة وأن شعرها كحل وطويل ورطب.. سبحان من صورها
السيدة حنان # فرح واش لبستيها.. يالاه راه زياد كايتسنى فينا حد الطوموبيل.. بنتي فرح بلا ماتوجدي الغداء علينا..
خرجات براءة مع السيدة حنان..
ركبو والطريق كاملة وزياد تايشوف فبراءة من المراية دالطوموبيل..
وصلو للأكاديمية.. وهبطو سولو على حمزة.. وعيط لو المدير دالاكاديمية لي صديق العائلة
جا حمزة دخل للمكتب وغير بانت ليه براءة طار عنقها
حمزة # براءة توحشتك سمحيليا بزاف اختي ماجيتش نشوفك.. عندي الامتحانات بزاف.. (مسكين مافراسوش بلي بأه باع الدار)
بقى تايعنقها.. وعاد رد البال لزياد وحنان.. # السلام عليكم.. سمحوليا.. مارديتش البال.. شكون نتوما
براءة # حمزة خاصو بقرا مزيان باش ينجح.. براءة غاتجلس مع لالة حنان وختي فرح
السيدة حنان # براءة واش قالت براءة هي قالت براءة.. شتي اولدي حمزة ختك ولات كاتحسن
حمزة وهو فرحان # براءة.. آه نتي براءة..ولكن كيفاش حالتك ولات مزيانة..
السيدة حنان # ولدي حمزة براءة ولات ساكنة معانا.. حيت باك ومرتو مانعرت فين رحلو.. وفرح صاحبت ختك لي جابتها عندي.. حيت هي خدامة عندي.. وغير كون هاني اولدي راه غاتبرا وتكون فالأمان..
حمزة # ايييه أبا.. دغيا نسيتي ولادك.. مسكين حمزة نزلو ليه الدموع وخا تايعيا ماينفع
..اش غانقول ليك الله يكتر خيرك.. براءة أمانة فعنقك.. 4 سنين ماعمرها نطقات سميتها تال هاد النهار

يتبع