المصخوط الجزء الرابع

كونما تنشوف سيدة كيفاش كتبكي نقول غير تيكدب عليا.. سيدة مبغاتش تسكت وليت تندفع فيها وهيا شادا فيا شدة لعما فضلما دخلنا لدار كتقوليا ولدي شنو كدير هنا علاش مسولتيش و مقلبتيش عليا أنا مفهمت والو شفت فلكوميسير قلت ليه ياك قلتي ليا بلي لوالدة معندها حتى واحد قاليا لا قلت ليك سولنا وقلبنل ملقينا حتى واحد سيدة شافت سميت ختها فجورنال بصدفة وجات من مدينة أخرى باش تشوف دوي معاها انخليوكم بوحدكم.. خرجو بقيت انا وهيا فلبيت مزال معنقاني بعدا مبقاتش كتبكي قلت ليها علاش معمرك سولتي فلوالدة ولا جيتي قلبتي عليها وشنو وقع ليها.. هادي قصة طوييلة اولدي نعاودها ليك من بعد دبا أنا يلاه لقيتك خليني نشم ريحتك قوليا فاش كتقرا كيفاش كبرتي واش عاقل على وجه ماماك كيفاش عشتي مع داك لحيوان هاد سنين كلها.. بغيت ندور فيها فاش قالت على لواليد ديك لهضرة وهو ميت ولكن مقديتش جبداتلي تصاور قالت ليا ديال لوالدة ديالك وشي تصاور ديالهم بزوج فوطوكوبي ديال بعضياتهم بقينا داوين شويا على ما فهمت من هضرتها فلول خدامة محامية عندها بيرو ديالها فشي مدينة أخرى بقات عليا بديك لهضرة ديال ميخصك معايا تا خير وعندي بزاااف ما نقوليك.. قلت ليها سمحي ليا منقدرش نمشي معاك نخلي قرايتي وبنادم لي عرفت هنا ونبدا تاني من لول بزز باش درت قاديت حياتي تم ولحمد لله مخاصني تا خير كلشي ديالي.. قالت ليا وخا نديرو خل بقا هنا هاد لعام لعام جاي غادي تحول لعندي وغنبقا كل سيمانة نجي عندك ونعيطليك.. مغاديش تيق شحال فرحانة حيت تلاقيتك ليوم اولدي عندك فلوس قوليا شنو بغيتي لي بغيتيها متحشمش مني تقليد يبقى عليك نمرتك عطاها سيد غير نوصل لدار نعيطلك قيد نمرتي عنداك نعيطلك ومتجاوبش.. بقات كتوصي كتوصي تا نسيت سميتها كاع وصلتها لباب وهيا تبدا تاني كتبكي منعرف شنو قصتها مع لواليدة حتى هيا دبا باغيا تعوض عليها بيا زعما ولكن جات فوقت مخاصني فيه تا خير.. درنا مناقص من ديك لخرجت كاع بقينا باركين فدار كيشول شكون ديك لمرا علاش بقات كتبكي عليك ملي هيا خالتك..؟ ساط بدا تيدخلو شك من جهتي تلفتو غير بزز فلعشيا كتعيط عليا سلام سلام مقديتش نقولها خالتي ومقديتش نعيط ليها بسميتها حيت تنساتلي لمهم بقينا داوين واحد نص ساعة ديك لهضرة ديال شنو باغي تبع من بعد شنو عزيز عليك تاكل تا هيا عندها مع داك لهيت ديال لكتوبا وهضرة تجيب هضرة قلت ليها تعاود ليا شي حاجة على لواليدة أي حاجة قالت ليا لمواصفات لي أي وحدة غتقولهم على ختها ضريفة حنينة.. معطاتنيش راس لخيط وصافي من هضرتها باينا كانت كتعرف حتى لواليد مبغيتش نسولها عليه ديك ساعة عارف بلي غنولي نشوفها بزااف من هنا ولفوق.. لغد ليه فليسي بالي غير معاها كان عاجبني لحال وأنا معندي حتى واحد كنت طرونكيل دبا ولات غير دور وتعيط ليا شنو كتاكل شنو لابس شحال فيك فطول خلعاتني أنا رجعت لدار مع 12 كتباليا واحد jeep قدام لباب ديال لعمارة طلعت قاليا نوردين راه خالتك جات عطيتها ضوبل ديال ساروت مجاتش تبقى برى ومتقلا قلت ليه لعز هانية دخلت لبيت لقيتها كتطوي ليا فحوايجي ولبيت مقاااد تخلعت أنا قالت ليا سلام أجي شوف هاد لحوايج لي جبتليك غادي يجيو معاك يلاه بزربا غادي نتغداو بزوج ونوصلك فطريقي.. مقديتش نقول لا وخا ممولفش بدوك لفشوش جاتني بجالا كتزيد فيه شويا لمهم درت داكشي لي قالت داكشي لي جايبا باينا سااوي وجا قدي عاد عرفت لاش لبارح بقات كتسول فيا دوك لأسئلة لمهم خرجنا ديك طوموبيل لي كانت قدام لباب ديالها صافي اتوصلني ليسي اححح غادي يكمل ديكور صافي تغدينا فواحد ريسطو و وصلاتني قدام ليسي بدات كتخطط ليا غتقرا هنا اتمشي لهنا اتدير هادي صراحة بدا تيعجبني لحال تنحس بحالا لواليدة لي كتدوي معايا وكتنصح فيا لمهم وصل لوقت بغيت ننزل مداتلي فلوس حلفت ما نشدهم منكترش عليها مشات ودخلت وأنا راشقالي ديال بصح تنفكر نتحول لعندها ننقص عليها طريق غتبقا غادا جايا مجاتش.. ريحت فلقسم لور وهيا ترجع حدايا وحدة من دوك لبنات مموالفاش ليها تبرك لور لمهم خرجت بقات واقفا معايا داوين وهيا تقوليا شكون نتا علاش مكدويش على والديك بزااف شكون هاديك لي وصلاتك قبيلا واش لوالدة ديالك؟ قلت ليها لا خالتي يمكن غادي نتحول من هنا كانت كتبسم وهيا تجمع بحالا غتبكي قلت ليها مالك قالت ليا ونتا يلاه جيتي وبغيتي تمشي تا ولفناك لحت ليها ديك معرفتش تانا راه ولفتكم بقينا مني منك ديك لعشيا قلقلتها كنعجبها خاص غير تزعم شويا وتقولها حيت وخا تبقا معايا 100 عام أخرى مغاديش تسمع ديك كلمة مني راه وخا هكذاك تنحشم لمهم بشويا بشويا رجعت لدار كتعيط ليا تاني راجع تغطا مزيان متخليش تيليفون فشارج ختنى باغيا ترجعني ولدها ماشي ولد ختها باغيا تعاودني فترابي نعاماس لمهم دوينا شويا تاني وبقيت تنراجع وداوي مع نظيظرات ديال قبيلا تكلمين حتى هيا كتقول كلمة بلعربية و10 بلفرونسي ولكن وخا هكداك حنينة فشكل خاصها غا علاش تبكي لمهم بقينا تنخرجو مرة مرة وصلنا لسطاج هارب فتعناب ومزال مكين والو بيناتنا درية عندها 4 لعينين كتحيد نظيظرات كتولي تبان بحال شي شينويا ولكن فهضرتها مقودة متقدرش تخصر ليها عندها حقها فزين تاني أصلا تيكبرو وتيزيانو تنخاف غير يشوفني معاها شي واحد فيها راه فيها لحبس هادي راه الإغرار بقاصر لمهم بشويا بشويا كتعرف عليا شي لعبة منين جيت فين ساكن.. واحد لخويلة قالت ليا فلول مرة فسيمانة ولات غير دور وتم جايا خدمتها مبقاتش مدياها فيها ولات كتجيب معاها خدمتها طلعات فشكال قالتلي بلي بقينا غير بزوج فديك لعائلة وبلي مكانتش كتفرق هيا ولواليدة شي نهار وهوما ينوضوها على شي واحد تزوجات بيه هاد خالتي وطلقها حيت مكتولدش لمهم كتعاود عطاها ربي تعبير كتكون داويا تا كتطلق ليا شي متل ولا عبرة كتخليني غير نشوف ديما تنسولها على لواليد شنو كتعرف عليه فين تلاقا مع لواليدة واش عندها شي فكرة علاش دار هكداك مبغاتش تقوليا كتقوليا نساه ونسا داكشي لي وقع كامل حنا ولاد ليوم.. أنا غيبقى راسي ضارني حياتي كاملا إلا معرفتوش علاش دار هكداك هو كان ضريف ومتأكد بلي ميقدش يدير هادشي يمكن هادشي وقع غير بالغلط ولكن علاش بقا مخبي هادشي وعلاش مقالش ليهم هادشي هو كان شديد ماشي من نوع لي يقدر ينتاحر ويستسلم هكداك كينا شي لعبة مغادي نرتاح تا نعرفها..قربات دورة لولا تسالي وغنمشي لعند لخويلة لدارها لأول مرة عطلة حاس بيها غتدوز لا شيء مما سبق فسنين لي فاتو..

يتبع