المشرحة الجزء الثاني

شفت فالراجل لي معيا لقيتو مغطي وجهو بيدو وكيقوول اعوذ بالله من الشيطان الرجيم وكايعود فيها !!! 

المرا طاحت ولكن غير نص الفوقاني لي طاح مدلي ورجليها بقاو الفوق وهي حالة عينيها مزيان و يديها فيهم شي خربشات بحال مشرطين بزاج ولا مشرحين و علامات مافيهمش حس الدم يعني الدم لي كان فوق الارض ماشي منها !! 

كان الوجه ديالها زرق بزاف وعينيها مفتوحين وفمها محلول بحال كتصرخ !!! 

بقينا مصدومين قدام هاد المنظر ولكن كان ضروري خاصنا نرجعوها داخل الثلاجة ..

ولكن الراجل لي معيا مقدرش قاليا واش انت مسطي انا نقيس مييتين انا منقدرش لا لا..

وانا نقوليه واش انت حمق ولا شنوو غادي نلحوها الداخل فالثلاجة نسدو الباب ونخرجو وحتى لا كان شي تحقيق تشهد معيا على هاد شي لي طرا فهاد الليلة المنحوسة..

هزيناها باش ندفعوها الداخل وانا نشوف عنقها محروق وبحال لا مقشر وفيه دم ملطخ واخا شحال هادي باش ماتت، هاد شي غريب وحتى الراجل لي معيا عاق وقالي هاد الجثة وقتاش جات ليكم ؟؟؟

قلت ليه ما كملاش يوم !!

انا مقدرتش نهضر سدينا عليها و سدينا الباب ديال المشرحة ومشيت الدار بحالي ..

دخلت الدار ولقيت الوليد كيتسنى فيا وقالي كيف دازت ليلتك ؟؟

انا مقدرتش نقوليه شنو طرى شي حاجة منعتني !! 

قلت ليه عادي كولشي داز مزيان حمد لله وخى انا كنت بغيت نعاود ليه على كلشي باش نعرف شكوون هاد المرا لي ميتة وعودات فاقت !! 

انا خفت يقولي يلاه نرجعو المشرحة نشوفو شنو واقع.

انا خاصني نعرف شكون ديك المرا خاصني نقلب على سائق سيارة الاسعاف لي جابها نهار الاول هو و صاحبو..

حيت صمت ديالو ملي هضرت معاه و مبغاش يعاود ليا شكون هيا دخل ليا الشك بلي عارف شي حاجة وساكت !!

مشيت نعست ويا ريت ما نعست بقيت نحلم بشحال ديال الكوابيس وحلمت بها فاقت وتبعاتني وكتجري من ورايا فالمشرحة وشفت راسي فالحلم في واحد النفق مظلم طويل وفالاخر ديالو ضوء بعيد وانا كنجري نجري ومقدرتش نوصل ولا نكملوو كنجري في ما لا نهاية !!

كنجري حيت بحال لا شي حاجة كتجري ورايا وفي لحظة وليت كنجري بحال الحيونات تشليت رجلي فشلوو عليا والجسم ديالي كلو تقال وانا نطيح وليت نزحف على ركابي و يدي وليت غادي بشوية كنزحف وحسيت بلي الحاجة لي كانت تابعاني قربات مني اكثر و اكثر وانا خايف !! 

شوية بانو قدامي كلاب واحد وجوج و ثلاتة وانا كنصرخ ومقادش نهرب زحفت جسم ديالي تقال..

شوية سمعت صوت صراخ ديال شي مرا معرفتش جاي منين شوية كنسمع صوت بكاء ومعرفتش جاي منين..

هاد البكاء لي كنسمع مخافيش عليا بحال كنعرف مولاه !!

هادا صوت اختي هند !!!

بقيت كنغوت هند هند هند !!!!

ولكن معرفتش كيفاش نوصل ليها حتى بانت ليا قدامي وانا كنزحف ومقادرش نوصل ليها وجها واضح باين ليا مزيان ولكن الجسم ديالها مكانش جسم هند !!!!

الجسم ديالها كان جسم المرا لي فالمشرحة !!!!!!

ملي شفت داك المنضر وكنت باغي نقد ختي حتى وليت راجع الور وبغيت نبعد عليها ومبغيتش نقرب منها حيت عرفت بلي داك شي ماشي هو هداك .

وانا نشوف وجه هند و جسم ديك المرا الشارفة كتقرب من واحد الحيط وبقات تخبط وجها مرة وجوج و ثلاثة شي عشرة المرات بجهد وشيا وبدات تاني كتبكي !!

وهي ضربني الفيقة اعوذ بالله من الشيطان الرجيم ، اعوذ بالله من الشيطان الرجيم غير كنحلم الحمد لله ماشي بصح هاد شي وانا عرقان وخايف..

ولكن باقي كنسمع صوت البكاء و صوت الضرب !!! 

ياك هاد شي كان غير فالحلم علاش مزال كنسمع صوت البكاء والضرب ولكن هاد صوت مكانش ديال هند هاد صوت ديال الوليدة !!!!!!

مشيت كنجري نقزت من فوق السرير ومشيت وصلت لبيت هند لقيت الوليدة طايحة فووق الارض ويديها على وجها وكتبكي والوليد و خويا واقفين جنب سرير هند !!

هند كانت ميتة !! ووجها واقع فيه بحال داك شي لي واقع فالحلم !!! وجها مكاينش الملامح ديالو كلو مشوه وعامر دم مغرق السرير كلوو !!

وشفت جثث كتيرة في حياتي و مصائب ولكن هادي راه ختي اش غادي نقووول اش غادي ندير ؟

نقوول ليهم داك شي لي شفت فالحلم تحقق !! 

نقوول ليهم انا عندي علاقة بهاد شي لي حصل ليها !!

ولكن انا معندي حتى علاقة بهاد شي انا هاد شي شفتو غير فالحلم ماعندي حتى ذنب !!

الحاجة الوحيدة لي كانت كنسمع هي الوليدة كتقوول كيفاش كيفاش طرى هاد شي ياربي ؟؟والوليد كيقوول ليها الشراجم ديال الدار كاملين مسدودين حتى حد ما دخل البيت !!

وانا نقول مع راسي الحاجة الوحيدة لي يمكن تدخل وكلشي مسدود انا لي عارفها !!

ولكن انا مافاهمش اليومين لي دازو عليا كانو من اصعب الايام في حياتي حضرت لتغسيل اختي الصغيرة ولكن خاصني نمسك نفسي و نكون قوي ونوقف مع والوليدة والوليد ولازم الناس وعي جاية تعزينا نتحمل و نكون واقف نستقبلهم ولازم اواسي الوليدة والوليد.

ولا قلت ليهم شنو كاين غادي يقولو تسطيت !! هدا غير موت اختو سطاه يمكن !

مكنتش عارف شنو ندير حتى جا وقت الدفن صلينا العصر دينا اختي نحطوها وسط التراب طول الطريق وانا كنقنع راسي فسيارة بلي هاد شي قضاء وقدر لي شفتو فالحلم ماشي حقيقي موقعش لا ميمكنش.

وصلنا التراب ونزلو الكفن من على الخشب باش يحطوه فالقبر وباقي حتى موصلاتش الجتث لعتبة القبر وبدات توقع شي حجات غريبة بدا كيطلع دخان من وسط القبر ، الناس لي كانو واقفين هربو كايجريو ووشي وحدين بقاو واقفين مصدومين.

شنو هاد شي لي واقع هنا !!!

دخان بزاف طالع من القبر وانا كنغوت لا لا ختي مدخلوهاش هنا ميمكنش تحطوها وسط هاد الدخان..

موقفاتش عند هاد الحد شوية كنسمعوو اصوات غريبة طالعة من وسط القبر صرخات و بكاء !!

وشوية دخان بدا يتحول لنار خرجات من وسط القبر وناس هاربين يمين و شمال ولي يجري من هنا و لي يجري من الهيه ولاحو اختي بالكفن ديالها على الارض !!!! 

وكلشي هرب والناس لي كانو دايرين فيها ماكيخافووش كلشي ملي شاف النار طالعة من وسط القبر هربو حيت بحال هاد المنظر متقدرش تبقا متماسك وتشد في راسك صعيبة بزاف..

وانا كنشوف من بعيد باغي نعرف شنو هاد شي وانا لي فبالي كنقوول اكيد هاد شي غير حلم وغادي نفيق منو تاني.

ومن قلب النار لي طالعة من وسط القبر لقيتو طالع !!!!!!!

نفس الكلب لي شفتوووو ؟ الكلب لي شفت فالحلم يعني هاد شي ماشي حقيقي انا مزال كنحلم ومزال غادي نفيق تاني ياربي نفيق خلاص ، بقيت مشلول في بلاصتي مقدرتش نتحرك !!

ولكن منكدبش عليكم انا ماشي داك شجاع لي نقدر نقرب من ختي و نعتقها ولكن راه ماتت ..

شوية شفت الوليد مشا عندها وبغا يجرها من داك الكلب وشفت الوليد كيزحف على يدو ورجليه بحال داك شي لي طرى ليا فالحلم نفس الشكل و الصورة لي طرات ليا فالحلم.

كل الناس خلاتنا وهربات بقيت غير انا والوليد بغيت نقرب منهم ولقيت راسي تاني كنزحف نفس الشكل لي طرى الوليد وطرى ليا فالحلم..

غادي كنقرب و كنحس راسي كل ما قربت كنحس بحر النار لي طالعة من وسط القبر وصوت الصراخ كيزيد يتسمع كتر..

وصلت لكفن اختي و جريتو بسرعة موقع ليها والو الحمد لله وخا هي ماتت ولكن النار موصلتش ليها.

شوية كنسمع صوت الاسعاف وسيارة الاطفاء وجاين بواحد السرعة خادو مني اختي..

وانا الحاجة لي بغيت هي ندي ختي من هاد البلاصة مندفنهاش هنا ..

هزوها و مشاو وخلاوني انا والوليد ملي داتها سيارة الاسعاف من حدا القبر النار طفات بحدها .

وشوية فقت لقيت راسي فالمستشفى ولكن حتى واحد دابا ميقدر يكدبني ولا يقوول عليا مسطي النار شعلات وطفات والاثار ديال الحريق مزال فالقبر والشهود كاينين لي شافو كلشي بعينيهم.

دابا جثت اختي مدفناتش حتى يديرو تحقيق حيت اصلا حنا

يتبع