شهر ونص فدار القحاب الجزء 28

 تغدينا أنا وبا المعطي ومشينا لبراكة دوزنا نهار زوين و صرع واحد لكاميلة بليل وهضرنا بزاااف داك نهار تقرب مني أكثر وتقربت منو، خرج بالمعطي مع لعشرة د ليل لخدمتو وخلاني أنا فالبراكة ناعس، وخا سهر مسكين مع الخدمة ولكن تمنية لقاتو فاق وفييقني هزيت كارطونة ديالي وشدينا الطوبيس لوسط لمدينة وراني الفيروجات فين غانخدم وداني عند واحد مول الكيوسك ديال جورنان .. قاليه: الله إرحم وليدين راه غايخلي عندك الكارطونة و غايهز منها عشرة وملي يبيعهوم إرجع تاني .. قاليه هداك: وخا غا تاهو إدير معايا بحال كاع الدراري لعشية قبل مايمشي خمسة دراهم .. قاليه با لمعطي: صافي قبل مايمشي راه غايطركك، سمعتيه أموحماد ياك. وسير توكل عالله و خرج عينيك وكن راجل راه تاكربوزييت مخاداماش ليك مع الزنقة .. مشا بالمعطي وخلاني، لبيع وشرا فالفيروج غايورني وجه أخر للمغاربة نص نهار لول كل دوزت مابعت ولاو حبة وحدة .. لي مشيت عندو كايقول ليا: الله إسهل عليك .. وكاين لي كايشوفك قبل ماتوصل لعندو كايطلع الزاج وكاين لي كاتلقا معاه ناشط و كايبغي يجيب بيك الضو لخضر، وكملات وجملات دا ليا لمقدم السلعة ماعرت فين نزلات عليا سطافيط طلعني وحييد ليا دوك البواطات وحلف ليا ويلقاني مزال فداك الفيروج تايصيفطني لخيرية. القلاوي أنا كنت فتبقالت هاني و كنت مع كلثوم واكل شارب ناعس أش وصلني لهد لخرااا، مشيت شديت الطوبيس ورجعت لبراكة لقيت با لمعطي باقي ناعس دقيت عليه .. حل ليا، قاليا : موحماد رجعتي ياولدي دغيا صافي بعتي كلشي .. مابعت وااالو يا با لمعطي سلعة داها ليا لمقدم و قاليا: إلى لقيتك مزال هنا غا نصيفطك الخيرية .. با لمعطي كايضحك ضحكتني ياولدي داكشي ضروري منو نهار لول و غاتصبر غادير كليان ديالك فديك لبلاصة .. مكاين لاضروري منو لا وااالو يابالمعطي أنا ديك لخدمة ماحملهاش بحال إلى كانسعى بنادم وكايصعب عليا نقرب لبنادم فطوموبيلتو نقوليه شري عندي كانحس براسي بحال شي كلب كايدور بين الطموبيلات ماشي إنسان .. خلعك أولدي لمقدم ملي قاليك غانديك الخيرية أولدي الله إهديك راه دابا كايخرجهوم من الخيريات ماشي كايدخلهوم الدولة تقهرات ها الحباسات عامرين ها الخيريات عامرين سبيطارات عامرين راه الدولة هي براسها عيات كن غايديوك الخيرية لو كان داوك ديك ليلة فاش لقيتك مفرش فوق الطروطوار، مهم ماعليناش أولدي غدا راه مكايناش لا خدمة لا وااالو .. علاش أبا المعطي .. غدا عيد الموليد النبوي، واش عندك شي حد من عائلتك تمشي تعييد معاه؟ .. كن كان عندي شي حد كاعما تالقاني ناعس فوق الطروطوار أبا لمعطي .. مهم أولدي عندي بنت وحدة وغانتغدا معاها غدا و مافيها باس تمشي معايا نعرفها على خوها .. وخا الله إجزيك بخير أبا المعطي .. واااو ليلة كلها مابغاش إديني نعاس بالفرحة و أخيرا غانتلقا معا نعيمة وتقدر ترجعني لدار الحاجة . فقنا صباح لبس با المعطي جلابييتو ولبست حوايجي وشدينا الطوبيس نتلاقاو مع نعيمة، لقيناها كاتسنى فينا حدا بلاكة د الطوبيس نعيمة بوجه أخر جلابة والزيف، ولكن أنا شتها و حاولت مانبيينش حدا باها بلي كانعرفها ولكن هي الصدمة بانت على وجهها و مافهمات وااالو .. قالت ليه: با شكون هد الدري .. قاليها: هدا خوك أبنتي هد الدري ولد باب الله و درت فيه خير .. بنت القحبة نعيمة تا هي ممثلة قالت ليا: شنو سمييتك .. قلت ليها : ‏( فبالي القلاوي قدور ‏) سمييتي موحماد .. مشرفين موحماد مهلي فيك با شوية ومهلي فيه تا نتا .. قلت ليها : أه الله إجازيه بخير .. يالله أبا يالله .. نعيمة دايرا لعاقة كاتضرب بريكولات صحاح داتنا لواحد ريسطورة مقودة و خا أنا باينة فيا مجرتل وباها راجل شيباني وهي طرف مليح ولكن راضية بينا و غدا معانا براسها مرفوع تغدينا بالحوت، ناض باها قال مشا لطواليط ولكن هو غاتغدا تاتغدى بانت ليه فالنفحة يسطر وحشم إسطر قدام دوك المخلوقات لي قالسين فذيك الريسطورة .. لقيت الفورصة فين نهضر مع نعيمة قالت ليا: موحماد أش كادير مع با؟ .. نعيمة باك دار فيا خير عمري ننساه ليه تجرتلت تكرفصت تشردت ودخلني من الزنقة أنا مزاوك فيك أنعيمة شوفي كيديري ترجعني معاك لدار الحاجة بغيت نشوف كلثوم بغيت نرجع لدار القحاب مابقيتش حامل الزنقة .. صافي صافي سكت با جاي .. كلس باها قاليها: نعيمة يالله أري ليا أبنتي راه غانمشيو أنا وموحماد نضربو ضورة جهة البحر ونطلعو فحالنا .. حلات نعيمة صاكها و جبدات عشرة لاف ريال عطاتها ليه .. شدها وقال ليها : شناهي هادي؟ .. قالت ليه عشرة لاف أبا براكة عليك راه الحراكة مييتة راه مكاين وااالو، ديك عشرة لاف راه خرجتها ليك من فم السبع .. صافي، صافي داك الديسك ديالك راه حفطو، ولكن راه تبقاي غدا معايا هكدا والله تانحرم عليك الخدمة فديك الفيلا .. الفيلا كايقولها بالمعطي لبيران حيت كلهوم كايعرفهوم فين كاتخدم بنتو نعيمة، باش مانعيقش .. أنا قاليا: يالله نوض أموحماد نمشيو .. قالت ليه نعيمة: صافي صافي غاسير خليه معايا بغيتو إمشي معايا نقضي واحد الغراض فسلا و مابغيتش نمشي بوحدي هانا غانصيفطو فالطوبيس ملي نرجع .. قاليا: ولي بان ليك أولدي غاتمشي معايا يالله، غاتمشي معاها تا تسيفطك نتا تعرف البراكة راك عارفها .. قلت ليه: صافي قبل المغرب نكون عندك أبا المعطي .. با لمعطي مشا وبقينا أنا ونعيمة قالت ليا: كيفاش بلانك نتا، الحاجة كاتحلف عليك قوتيها معاها عمر الصداع ماناض بينها وبين تورية تا دخلتي بيناتهوم، أما كلثوم كيتسمع سمييتك كاتشبع فيك سبان قالت ليك نكار الخير مشا مقال تا تفووو عليك .. ماشي بخاطري أ نعيمة داوني لحبس عند تورية محاملش لعيشة عندها خرجت باغي نرجع للدار و توضرت لقيت راسي فالزنقة تالف .. ماعليناش كيبقا راسك بعدا بريتي .. شوية، شوية غدا خاصني نحييد الفاصمة .. وخا يالله نوض نوض نرجعوك تاني وخا مافيكومش الخير كلكوم ولاد القحاب لا نتا لا الحاجة لاكلثوم لا هد الزامل لي خرج .. حشومة تقولي لباك الزامل .. مكاتشوفش فيه كانبيع لحمي باش نجيب ليه باش إعييش ديك القحبة لي مخلي فالبلاد وباش إقمر، وملي كايدخل لبار كايدير راسو مكايعرفينيش وماراضيش بيا ماشي زامل هدا .. دابا نتي باك عارفك قحبة .. با كن لقا نخدم شي حرفة خرى كتر من قحبة مهم نجيب ليه الفلوس وشحال ما جبت ليه مغايقدوش، يالله يالله نوض نمشيو .. واش غاتقولي ليه دابا ملي غاترجعني لدار الحاجة .. مالو هو مزعوط فيك كيرجعتي كيما رجعتيش، غانقوليه غفلت عليك عيني لقيتك هربتي وولد الزنقة كايبقى ولد الزنقة، تا نتا أشمن خير لقيت فيه أنا لوالدني تلقاه فيه نتا، يالله يالله ماتزيدش تا شي سؤال .. مشينا شدينا الطوبيس أنا ونعيمة، قلت ليها: نعيمة دابا نتي بقا ساكنة فدار الحاجة ياك؟ .. أه، علاش هد السؤال؟ .. لا حيت نهار لول لقاتك الحاجة ناعسة فالبيت ماحملاتكش و كانت غاتجري عليك، طلعتها كلثوم للسطاح و قالت ليها شي حاجة ورجعات قبلاتك كيفاش؟ .. بنت القحبة ديال كلثوم صاحبتي من شحال هادي ومكانخبي عليها كلشي و قلت ليها عندي شي فلوس مخبياهوم لدواير الزمان مشات قالتها الحاجة، والحاجة يكفي تعرف بلي القحبة عندها ذهب ولا الفلوس الدار كلها غاتكون ديالها .. ومن بعد عطيتي لفلوس الحاجة .. أه بقات عليا بالتحلوين تا عطيتها مليون سلف، ولكن حسبها مشات القلاوي لي غاترجع ليا رجعات بعد دهبها لكلثوم لي باعتو على قبلها .. تانتي خدمة غا فالتقحبين وعندك مليون، كن عندي مليون أنا كن مشيت البلاد .. غاتمشي لجهنم إنشاء الله سير سير نزل تقاود، أما هد ليلة غادوز و خا دوزتي ماعرت شنو فحياتك ماعمرك غادروز بحالها، حالف عليك الحاجة و حاقدة عليك بالمزيان

يتبع