الضابط و زوجته المراهقة الجزء 24

نور: رميساااااااااااااااء..

رميساء غوتاات و لاحت السيريال بالحليب لي كانت هازا حتا تزلعات فالارض وهي تشد قلبها....

رميساء: الله ينعل الحمار تاع راجلك يالحمارة البغلة العجلة البقرة الحلوفة الخنزيرة باغا طيحيه ليا 😠😠

نور: راه نتي لي غتحمقيني اش جابك عندي اش بغيتي ياك رجعتي لراجلك... اويلي تخاصمتو 😱😱

رميساء بدات تبسم وضحك وتنهد: لا متخاصمناش😍😍

نور: ومالك اش جابك عندي 😠😠

رميساء قربات عندها وعنقاتها: توحشتك وبغيت نشوفك ...😊😊😊

نور: رميساء؟ واش حماقيتي تسطيتي ؟ طالعة لطاسيلتك السخانة جايا طلعيها عليا ؟ شكون مسلطك عليا ... واش واحد دايرها وانا نوحل فيها 😭😭

رميساء: راشقة ليا واللهما تاتري فيا....احح الله ريحتك شحال كتحمق ... 

نور: الله ياربي الله وا اش هاد الطلية... زيدي نديرو شي حاجة للفطور... وجمعي هادشي لي درتي هنا ..واللهلا جمعتو....

رميساء: تفو يخ انا حاملة وكاتعامليني هكا مفيكش الانسانية ...

نور: داك التبوحيط ديريه على راجلك ماشي عليا ... ياله تحناي مسحيه...

مسحات رميساء الارض ونور دارت الفطور و خرجوه برا للجردة و هبط زاين مدوش ماشط ومريح... و مغوبش حاقد على الوضعية ... و جلس معاهم...

زاين: مال مك نتي على الصباح جايا مصدعاني اش كاين ... صدعي راجلك 😡😡 

رميساء : بعد مني ماشي سوقك انا جايا عند حبيبتي نور ...عنقاتها وباستها فحنكها ...

نور كتغمز فيه باش يسكت لاتقلق وتبدا تبكي...

نور: عيط لياسر يجي يفطر معاانا 

جبد زاين تيلي و قالها ليه و دغيا جا عندهم صبح عليهم وجلس حدا زاين مقابل مع رميساء كيشوف فيها وهي كتقلب وجها زعما مخاصمة معاك وهو غير كيضحك...حتا سول زاين...

ياسر: ايوا اش درتي فقضية فالماتريكيل...

زاين: باقي معيط ليا.... بما عيط غنتفرجو فالتسجيلات باش نعرفو بعدا كيفاش دخل للفيلا...

ياسر: اه حقا فكرتيني فالكاميرات .... هاد الويكاند نصفيها لديلمو .... عرفتي ازاين تلعب معايا هاه و لاهاه غنخسر معاك .... انالي بغيت نتولا هادشي.😠😠..

زاين: متخافش انا معاك 

رميساء: اش غديرو الى لقيتوه ... 

ياسر: ماشي سوقك نتي...😠😠

رميساء قنعها وغوبشات فيه ... وبدات نور تفيبري حداها حابسة الضحكة... حتا قرساتها رميساء وهي تجمعها.... كانت رميساء غير لاسقة فنور والدراري مجمعين ... سلات رميساء فطورها وحطات راسها على كتف نور و كتلعب فشعرها لاحظ ياسر وزاين هادشي موالفين البنات يتعانقو قدامهم ولكن ماشي لدرجة انها غير لاسقاها مكتحيدش من حداها ونور مخلياها على راحتها ...

ياسر: اش قضيتك نتي غير لاصقاها هاديك...

نور: هاديك عندها سميتها😒😒

رميساء: ونتا مالك راشقة ليا عليها😠😠

زاين: متقوليش ليا كتوحمي على مرتي 😂😂 قوادت علينا😂😂😂

ياسر: واش العيالات كيتوحمو على رجالهم وانا عندي كتوحم على كارتة .... شوفي اه والله وولدي ولا بنتي يخرج ليها حتا نسيفطك

نور: ومالي كيف جيتك ...مصاب يخرج بحالي ... مالي زوينة وفنانة ودكية ... كرهتي ولدك ولا بنتك يكونو بحالي

ياسر: لا الله ينجيني ... مبغيتوش يخرج ليا مكلخ فالمات و الفيزيك وكيعرف غير المصايب والزبايل وقبيح الله يحضر السلامة... 

نور: بزاف علك انا ديما كنقول لك كنستخدم الجهة اليمنى من دماغي يعني عقلي فني كيخدم بالالوان ماشي بحالك خدام بالسلوكة و ايكسات (x)والمجهولات..

زاين: ههههههه بردو العشران مالكم معصبين ممزيانش ليكم تعصبو 😂😂😂 البيبي غيخرج لخالو ان شاء الله...

رميساء: الله ينجيه😠😠

زاين جمع الضحكة و خنزر فيها : 😡😡😡

زاين: كيفاش الله ينجيه😡😡

رميساء؛ اللهىينجيه حتا يخرج ليا قبيح و عصبي وكلمة 2 يخدم ايدو و من فوق هادشي النفخة والعياقة ..😠😠

زاين: انا فيا النفخة و العياقة😒😒

نور: اه عندها الصح ... فاش اول مرة تلاقيتك خديت عليك انطباع الغرور والعياقة..😂😂

زاين: اههها حتا نتي ...ايوا و دابا منين تعاشرتي معيا وعرفتيني.... باقي كنجيك فيا العياقة 😏😏😏

نور: لا ... ولكن غير حيت ولفتها فك ....هو كان كيتسنا جوابها وابتاسم منين قالت لا و غير قالت غير حيت ولفتها فك وهو يجمع الضحكة كيخنزر فيها و اللحظة لي خنزر.... رميساء ونور تلاسقو طالقين الضحكات المعتادة حالين فامهم كيف فرس النهر الى عرفتو فمو قداش... تبني فيه فيلا... هما كيضحكو ويتركلو ويخبطو بعضياتهم و زاين كيتغدد ... وياسر ضحكوه بضحكهم وكيشوف فزاين لي مفقوص حداه ..

كملو فطورهم فالضحك جمعو البنات الماعن والدراري خداو gاع لي ميموار ديال الكاميرات و حطوهم قدامهم... وجلسو فالصالة مخدمين بيسي... و بداو بالكاميرا ديال برا... بقاو كيدوزو حتا بان ليهم جمال داز من قدام الفيلا ..ووقفوه...

ياسر: ها هو الزامل بوه كيتبربس ليا حدا الفيلا مع 8 الصباح...

زاين: ولد الكلبة .... بلاتي مالو...

بان ليهم شاف شي حاجة و نقز بالزربة للحيط و مبقاش بان وعاد بان ياسر داخل بالوطو...

ياسر: ولد الق*** شافني...و دخل...

حيد زاين الميموار ودار ديال الفيلا الداخل و دوزو شحال....و بان ليهم خرج من باب الكوزينا هنا عرفوه دخل من الكوزينا و طلع كيجري نيشان البيت...

زاين : ولد الحررام..😠😠

ياسر: رميسااااء..😡😡

جات كتجري هي ونور وبدات ترعد تخبات ورا نور...

ياسر: شوفي ... منين دخل ياك ديما كنوصيك سدي باب الكوزينا...

رميساء: ا.. اه ؟ غنكون غير نسيتو...😨😨

زاين: صافي دابا عرفنا الحيوان منين دخل وكيفاش خصناىنعرفو دابا غير شكون هو واش بغا منكم...

نور: ولد الحرام ... شوف منين نقز ...

زاين: شفتو فاش نقز من تما يسحابلي شفار ... حتا قشعتو جمال لي جا تما عرفت شي حاجة ماشي تال لهيه...😠😠

زاين جاه اتصال: صافي سكتو هادا عز...وي صاحبي شي جديد ؟ 

عز: اه ... هاديك السيارة مشرية بفلوس مجموعة شركات المرنيسي...

زاين: مجموعة المرنيسي😠😠

رميساء قفزت وقفات ...

ياسر: شكون هاد شي ...😡😡

زاين: صافي شكرا اخويا عدبتك معيا ...

عز : ماكاين مشكل حنا فالخدمة ...وقطع..

ياسر: شكون هاد مجموعة المرنيسي....😡😡😡

زاين: وليني كلاخ حنا .... كيفاش معرفتوش غير من كنيتو..😡😡😡

ياسر: غتهضر ولا لا ...

زاين: مجموعة شركات المرنيسي ... ديال عاءلة حسام الى عقلتي عليه .... لي خطف نور و رميساء شحال هادي...😠😠

ياسر: اشناهو ؟؟؟ ولد الق*** اش باغي مازال من عندنا واش بنادم مكيتهدش ؟؟😡😡

زاين: تانا مفهمتش اصلا هادي شهر سمعت بلي ضارب مع شي وحدين فالحبس وعطبوه فرجل ولا عرج و خصرو ليه وجهو... هادشي كولو وباقي كيدور بالدرية..

رميياء خافت بدات تبكي وعنقاتها نور كتسكت فيها..

زاين: والله الحمار تاع بوه و يكون هو لي مسيفطو حتا نخرج على ديلمو بالمزيان هاد المرة...

ياسر: خاصنا نلقاو جمال فاسرع وقت ...😡😡

زااين ياله بغا يهضر و جاه اتصال من عز...

زاين: نعام اخويا...

عز: تاصلت غير نقول لك راه رصدنا ديك اللوطو ف***** الا كنتي باغي تعرف...

زاين: هههههههه العز اصاحبي ياله كنت ناوي نعيط لك ...

عز: على حنا اش كنديرو الى ماعاوناش بعضنا...ولكن اش عندك مع مولاها ... راه مول السيارة هو جمال المرنيسي عندو سوابق فالتجارة بالمخدرات مع ولد عمو حسام المرنيسي... اشمن مشكل عندك معاه .. واش بغيتي شي مساعدة...

زاي: وايلي صدق ولد عمو ولد الكلبة صافي قطع دابا.. الى عيطت لك سيفط ليا المساعدة... 

عز: ولا عليك...

ياسر: قول اش قالك...😡😡

زاين: صدق ولد عم حسام .... و جمال كاين ف***

ياسر طار خرج كيجري ....وتبعو زاين...

نور: انمشي معاكم😭😭

زاين: غتشدي الارض ولانلصق مك مع الحيط😠😠😠

تبعو زاين ركب فالوطو ....وخرجو...

رميساء :اش نديرو دابا منقدرش نتسنا حتا يجيو الى طرات ليهم شي حاجة😢😢

نور: زيدي نتبعوهم..

ركبو البنات طارو تبعوهم وبقاو بعاد على الدراري ..حتا بانو ليهم وقفو حدا واحد الفيلا وهبط ياسر كيجري .... تبعو زاين ... فرعو الباب ودخلو على غفلة لقاوه مع رجل حاطين فلوس ومخدرات ... والشراب كيسكرو..تلاح عليه ياسر معرف هاداك باش تبلا بقا عليه بالبونيات نيشان للوجه... وزاين شد لاخر حيت اصلا شدهم متلبسين ... ياسر كيضرب ويغوت...

ياسر: هاك لديامك انا دخل على مرتي اولد الق*** اش بينك وبيني ... ها؟ ( كيعطيه غير للعينين) ها العينين لي يشوفو مرتي ... بقا عليه تاخمج ايه معالم وجهو وهو كيحاول يقاوم وياسر كيزرب عليه مكخليش ليه فين يتحرك ... 

ياسر: قربتي ليها؟ دوووووي...

جمال: لا...اح اح اح مقستهاش..😨😨

زاين : صافي طلقو خرج ها القوات غيجيو مخصكش تبقا ...

ياسر ناض عليه وركلو : قول لداك الزامل ديال ولد عمك والله لابقات فيه ... قوليه يفوت مرتي ولا بربي تندبح مو...

زاين: صافي خررج...

خرج ياسر ايديه مجلخين بالدم تقول كان كيسلخ...

بقا واقف فالباب بعيد شوية والبنات حاضينو ومخبيين لايشوفهم ...حتا جاو البوليس ودخلو ومعاهم عز بقاو شحال تا بان ليهم مخرجين داك لي كان مع جمال وجمال .... وزاين وعز وراهم ... حتا تفلت ليهم جمال و هرب و زاين شافو وتبعو هو وشي بوليس داز من جهة فين كاينة الفيراري...

نور: خراااأ مالقا منين يدوز ولد الحرااام...😨😨😨

غير وصل عندها و هي تحل الباب دخل فيه وهو يطبح وهي ترجع تسدو....شنق عليه زاين وعطاه لبوليس و خاصم عليهم حيت هرب لبهم داوه وهو يشوف اللوطو تحنا وهو يدق فالجاجة ... نور حلاتها و كترعد هي ورميساء...

زاين: اش قلت لمك ... لحمك كياكلك😡😡

نور: مقدرناش نبقاو نتسناو ... وتبعناكم...

ياسر قشعهم وتم جاي ...

ياسر: اش كادييرروو هنا 😡😡

زاين: صافي ركب ديهم انا غنشوف هاد الحريرة ونرجع ياك دgيتيه وبردتي جنونك و دابا خليني ندير خدمتي..

ياسر: واخا ...😒😒

زاين: الله يعاون ونتي تال الدار ونتفاهمو...

ياسر: تgعدي نتي من تم 😡😡

نور تلاحت لور: ها انا بشوية علك عنداك تفرقع😡😡

ياسر دار عندها وعطاها طرشة خفيفة شداتها وسكتت كتبقلل فيه و قال: ياله شدي قلبتي عليها ولقيتها هاد المرة غتاخديها ديال المعقول....

دار لجهة رميساء لقاها مخرجة عينها فيه ومبعدا خافت يعطيها تاهي ..

ياسر: ههه نتي مغنعطيهاش لك دابا غنخبيهاىلك احبيبة حتا تقدي عليها... كسيرا وخلا الروينة وراه

نور: الله يعطيك التونية الحمار وعتيني... جيتيني كتسوق اما والله تا نعوج خويا...

ياسر: غتزميه لا...

نور: الاءح باش نعلمك اصلا منسيتش ديك التصرفيقة الاخرى ديال البارح ... 😡😡 

ياسر: ههههه سرك انا صاعر ونتي كتبوردي قدامي .. كبنتي ليا غير نتي... جات فك...جاب الله ماجاتش فهاد الصgعة ...😂😂

رميساء: تنا كنتي غضربني ... كصدقتبش اياسر كيسحابلي يوقع لي يوقع مستحيل ضربني .... ولكن صدقتي بحالك بحال العجل لاخر...😒😒

نور: العجل هو راجلك ... علاش اختي كتجبدي ليا راجلي😠😠

ياسر: هههههه هاي هاي على ناس ولاو يحاميو على رجالهم وقدامي صافي مبقيتش خوك حبيبك اووباتك..

نور: كنا وكنتو ... دابا عندي اوبا واحد هو راجلي...

زاين هضر من السبيكر ديال لوطو: الله يرضي على حبيبة ...😂😂

نور تحلو عينيها : اووووه صوت زاين هدا...😨😨

ياسر: هههه اه راه كيهضر معاك من السبيكر فالوطو..

نور: هي نيت داير ليا شي كصببة كتجسس عليا ياك ؟؟ بدات تقلب فيها...فين الكاميرا gر gر...

زاين: ههههه عارف والديك مكتزgلي تاحاجة ... ايوا الالا طموبيتك مراقبة ولي درتيه فيها كيوصلني..

نور: ااااه وانا نفهاام ياك ازاين كتجسس عليا😡😡😡

زاين: ايوا حين كون كنتي بعقلك منبقاش مراقبك بخال لي بيبي مهم خليوني نفك هاد الحريرة حتا نرجع..

ياسر: الله يعاون...

وصلو و هبطو دخلو لفيلا زاين ... وجلسو فالجريدة كيتشمشو ناضت نور ملاهية مع جاكسون و بغات رميساء تبعها و حبسها ياسر...

ياسر:تي جلسي خلينا غير نشوفوك...

رميساء : اش باغي تشوف فيا ...

ياسر: متوحشتينيش صافي قلبتي على راجلك ...😒

رميساء: اه .... متبقاش دور بيا صافي .. او درتي ليا الطيارة ...

ياسر: اوووف منك ارميساء 😠😠

ناض زاعف ... وهي توقفو...

رميساء: بلاتي ....

دار عندها ضاحك...

رميياء: الى بغيتيني نرجع لك جيب ليا المزاح...

ياسر غير سمع المزاح وهو بهجرو....

ياسر: المزااح😨😨 كنين غنجيبو راه فوقتو وكيكون غابر... قولي غير باغا تنتاقمي وصافي😒😒

رميساء: ماشي سوقي بغيت المزاح...

ياسر: امرب للله ميكون غير خاطرك... غير رتاحي ايا نتي... جرها عنقها وباس راسها وخرج وهي غير كتنقز بالفرحة ....

عاد خرجات عندها نور ... كتزفر...

نور: فين هو ولد الكلبة😡😡😡

رميساء: شكون فيهم 😂😂

نور: شكون من غيرو جاكسون ...

رميساء: مخرجش هنا gاع... علاش اش بغتيه...

نور: تصوري جبدت دجاجة باش نقليها .... طيرها وهرب ودجاجة كاملة اعباد الله ...غيطرطق لطاسيلتي المراارة😡😡

رميساء: هههههههههه اويلي مسخوط ههههه صافي بلا متفقصي ليا ندومونديو من كينتاكي احسن...

نور: مزيان مفيا لي يطيب دوموندي نتي انا غنتكا هنا ضرني راسي....

تكات نور فالمرجوحة ورميساء عيطات و طلبات ليهم و جلسات حدا نور .... وبقاو شحال كيتمزكو و يتتحتتو ...حتا دخل ياسر هاز 2 قفات ناضتةعندو رميساء كتجري... كتقلب اش جاب ..

رميساء: اش هادشي 😡😡

ياسر: هادا جهدي عليك احبيبة ضرت gاع الاسواق والمارشيات وبالحرام واش لقيت شي حبة وحدة مبغيتش نرجع بايدي خاويين جبت لك شي حاجة باش تقضي...

نور: ههههه تاقول جبتي المارشي كامل ...اناناس كيوي نgاص ليمون تفاح بنان فريز بابايا خوخ مونg ...

ياسر: هادشي لي كاين جبتو ...

رميساء غوبشات : ولكن انا بغيت المزااح..😢😢

ياسر: شوفي شي حاجة اخرى والله دابا تكون عندك..من غير هاد المزاح... راه غابر...

رميساء: مبغيت وااالو ...😩😩.

ومشات دخلات ...

ياسر: اووف اش غندير معاها ملقات غير المزااح...😠

نور: ههههههههههههه غزات فطاسيلتك....

خنزر فيها و تم جاي ليها وهربات ليه....

ياسر: اجي نبردهم فوالديك نتي نييت 😠😠

نور: وا بعااااد مني ... اش درت اك اناااا ..... ماااماااا ... زاااااين...

زاين: اهيا تفرق ليا من مرتي ...😂😂😂

نور: وااااع زاين جابك الله ...

مشات تخشات وراه...

نور: شدو عليا بغا يضربني..😨😨

ياسر: صافي لقيتي لي يحامي عليك دابا ....😠😠

زاين: هههه اش دارت لك تاني...

نور: واالو واللهما درت ليه شي حاجة مرتو توحمات على المزاح ملقاهش بغا يبرد فيا هوايشو ..

ياسر: والله يامك...

زاين: هههه صافي بردو 😂😂😂 ... ولايني راك صgع مسخوط كاين شي مزاح دابا...

ياسر: قولها لختك...😠😠

الدموند وصل...

نور :سير خلص الغداء...

زاين: على والديك مفيك مطيبي...

نور: راه الكلب هرب لبا بدجاجة لحد الان باقي ملقيتو...😡😡😡

ياسر: هههه نتي لي علمتيه هاد القاعدة وشدي دابا..

زاين: هههه شبهك احبيبتي ...

مشا زاين خلص و عاوناتو نور باش دخل داكشي حطوه غير فالجردة نيت....عيطو على رميساء وجلسو يتغداو.... 

ياسر: اش درتو معاهم....

زاين: غيغرق لباباهم الشقف هاد المرة ... هاداك جمال حصل كتلبس كيخطط لعملية ... راه فالتحقيق دابا و متخافش .... غنبقا عليعم تانحولهم لحبس خارج المدينة ....

ياسر: مزيااان حيت الى باقي سمعت سميتو مزال راه نقتل مو وسط الحبس....😠😠

لقاو كيتحتو ويهضرو.. فشحال من موضوع... 

كملو النهار غير فالدار .... زاين و ياسر كيتفرجو فالكورة و البنات كيرقصو الفوق...وصل الليل ..تعشاو ب4 عاوتاني... عيا ياسر فيها ترجع معاه ووالو هي حلفت لا مشات ... زاين هنا حقد عرفها مغتفرقش معاها... وتحرمها عليه...

زاين: هااه شتك ولفتيها سيري مع راجلك ظعنديش اوطيل هنايا...😠😠

رميساء: انا عند حبيبتي ماشي عندك نتا 😛😛

ياسر: رمبساء كلمة وحدة قلناها نوضي تgعدي ياله..

ناضت رميساء كتعوج و هي راه عاجبها الحال... مشات قدامو و هو قال ليهم تصبحو على خير ... ومشاو .. و زاين غير خرجو مع الباب وهو يهز نور فوق كتفو طار بيها للبيت ...

نور: اويلي بلاتي غير نجمع الماعن...😨😨

زاين: تال غدا وجمعيهم اما دابا والله لا طلقتك....

اما الكوبل لاخر ... دهلو لفيلتهم نيشان للبيت بدلو حوايجهم و تخشاو حدا بعضهم .... رميساء لسقات فيه مبقات طلقاتو وتاهو معنقها كيشم ريحتها حتا نعسو....

وصلات 3 الليل وهو يوصلو اتصال لي خلاه ينوض كيجري...

ناض ياسر ... كيجري كيلبس حوايجو وفاقت رميساء شعلات الضو كتحك عينيها...

رميساء: ياسر؟ مالك اش واقع ...

جا قرب ليها و دوز ايدو على شعرها...

ياسر: لا مواقع والو غير رتاحي نتي احبيبة ... غير عمي محمد عيط ليا .... راه الوالدة فالسبيطار غيكون غير طاح ليها السكر...

رميساء: غنمشي معاك..😨😨

ياسر: لا بلاش رجعي لنعاسك ... 

رميساء: وتاصل بيا و علمني اش واقع...

ياسر: واخا ... ياله بسلامة

رميساء: الله معاك .... ياربي تشافيها وتنوضها بالسلامة...

هبط ياسر كيجري ركب فالوطو.... كسيرا ... موقف حتا وصل للمستشفى دخل لقا محمد جالس برا و سمية معاها طبيبة وشي ممرضات...

ياسر: عمي ... اش وقع 😨😨كيف بقات ... 

محمد : معرفت اولدي كنت ناعس حتا حسيت بيها ناضت للبرا ... محسيت حتا سمعتها طاحت ... و جبتها لهنا راه تا خوك خليتو عند الجيران...و هاهما باقي مخرجو...

ياسر: الله يحضر السلامة😨😨

خرجات الطبيبة وناضو عندها كيجريو...

محمد: دكتورة اش عندها ...

طبيبة تنهدات وشافت فيهم: واش نتوما عاءلتها؟

ياسر: اه انا ولدها ...وهدا راجلها

الطبيبة: تبعوني...

شافو فبعضياتهم بعدم فهم وعرفو القضية حامضة...

دخلو المكتب وسدو الباب و قالت ليهم تفضلو وجلسو قدامها...

الطبيبة: بصراحة معرفتش كيفاش نقول ليكم هادشي.. انا متاسفة لهاد الكلام لي غنقول لكن خاصكم تكونو اقوياء....

محمد: عافك ادكتورة تكلمي دغيا بلا متزيدي تشوشينا..

الطبيبة ناضت و ودارت دوك اللعيبات فالحيط نسيت سميتهم ووراتهم بزاف تصاور الجمجمة...

الطبيبة: مدام سمية عندها ورم فالمخ.... وبصراحة هادشي شخصتو ليها تقريبا هادي عام .... وفداك الوقت كان ياله باديعا كان ساهل علينا نتخلصو منو ... ولكن منينةعرفات مدام سمية شنو عندها مبقاتش رجعات... وكنت هضرت معاها ... وقالت ليا بلي...😔😔

ياسر بالدموع فعينيه: اش قالت...

تلطبيبة: رفضات تعالج بحكم انها عيات من الدنيا و بغات تمشي مبقا عندها مدير منين مبقاش راجلها الاول وسمح لي اسي محمد على هاد الكلام ...قالت بلي الى عاشت وراه غير على قبل ولادعا لي معندهم حد ... و قالت مدام كبرو وبناو حياتهم و كل واحد مستاقر ... ممكن تمشي مهنية وربي عطاها فرصة باش تودع ..احسن متنتاحر...كنت نصحتها تبع مع طبيب نفساني ... ولكن ماماك مات فيها روح الحياة كنضن امك عاشت حياة صعبية بزاف.... ودابا للاسف المرض نتاشر ووصل للمراحل الاخيرة...

محمد: لا ميمكنش😨😨

ياسر: لا ... واش ميمكنش دير عملية.... انا مكانش ممكن هنا نديها حتال اخر العالم وديرها غير متقوليش ليا نفقدو الامال😨😢😢

الطبيبة: كنتاسف ولكن فينما مشيتي غيقولو لك نفس الكلام ... المرض نتاشر بزاف .... و كنعتادر ولكن ماماك راه ايامها معدودة والاعمار بيد الله😩😩

ياسر ناض كيبكي ومحمد دمعو عينيه ...

الطبيبة تاهي بقاو فيها وقالت: معليكم غير بالصبر صعيب عليا نقول ليكم هاد الكلام... تمنيت كون قدرت ندير شي حاجة دابا معليكم غير تبقاو فجنبها و تحسسوها بحبكم ... وحاولو تريحوها...

محمد بالدموع خانقينو : واخا ادكتورة شكرا ....

جر ياسر لي شاد راسو فالقنت و خرجو نيشان لغرفتها لقاوها ناعسة بالاكسيجين فوجها و خيوطة ملويين عليها من كل جهة ...صفارت وضعافت ...

ياسر: علىش الوالدة علاش درتي هما دغيا بغيتي تخلاي علينا... وولدك الصغير .... ونور لي لدابا كتسناك تعنقيها... اش غنقول ليها دابا 😭😭😭 اش غنقول ليها...

محمد حط ايدو على كتف ياسر: صبر اولدي معليناغير بالصبر نتمناو ربي يشافيها من عندو هو لي قادر على كولشي...😩😩

بقاو معاها .. ولكن مفاقتش... ياسر بقا غير كيخمم حداها مفرقهاش ...ومحمد تاهو ....

حتا قال ليه: نوض اولدي 8 راها وصلات غتكون مرتك مشوشة ...طرg عصام ديه معاك ... ياله انا غنبقا هنا الى وقعات شي حاجة غنعيط لك.. 

ياسر: واخا غنديه ونرجع...

مشاىياسر ودا معاه خوه تلصغير لي بقا كيسولو وقاليه غير ماماه مريضة شوية وغيبقا عندهم....

وصل ولقا رميساء فايقا كدور فالفيلا مشوشة...

دخل وباست عصام و دخل للفيلا و شافت فياسر لقاتو دابل و باينا فيه العيا...

رميساء بقلق: ياسر؟ اش واقع ..كيف بقات خالتي ..😨😨

ياسر بدا يبكي و مشا جلس وحط ايديه بين راسو.. رميساء زادت تخلعت قربت ليه وعنقاتو شادا راسو وهو محاوط خصرها بايدو كيبكي وهي تاهي بدات تبكي و كدوز على شعرو..

رميساء: اش واقع متزيدش تخلعني😭😭

ياسر: الوالدة عندها ورم...

رميساء: كيفاش ؟؟ ياربي تحفضها ... واش غدير عملية😢😢

ياسر: لا ... مشا الحال...

رميساء: كيفاش اش كتقول اياسر علااش😢😢

ياسر عاود ليها كولشي ...

رميساء: لا.. لا.. متقولهاش😨😨 علاش مسكينة دارت هكا الله يسمح ليها.. لهاد الدرجة عيات من الدنيا؟؟ ونووور ياربي نور مغتحملش هادشي الزغبية ...😭😭

ياسر: حتا انا كنفكر فنور مغتحملش وهي باقي مكملت حتا التريتمو مع عماد ... عنداك تقولي ليها شي حاجة😨😨

رميساء: على انا نقدر😭😭😭

رميساء: وشنو المعمول دابا😨😨

ياسر: غنرجع للسبيطار ...

رميساء: غنمشي معاك...

ياسر: واخا .... يالهةمعايا نخليو عصام مع نور بعدا...

رميساء: اوكي ...

طلعات بدلات و هبطات ... مشاو عند نور وزاين لي كانو كيفطرو و يضحكو راشقة ليهم فالجردة...

نور: عصووومتي ... عشيري ...

عصام: ختي توحشتك..☺😊

عنقاتو: تانا احبيبي... مالكم جيتي بكري .... 

ياسر: الوالدة عيانة شوية و جبتو لك ميبقاش مبرزطها....

نور: اااه واش هي بيخير بغيت نشوفها 

ياسر: نور بلا متشوشي راه غير طلع ليها سكر ...راه كنت عندها راه ولات مزيان دابا...

نور: واخا .😟😟. جلسو تفطرو..

شاف فرميساء وجلسو باش ميعيقوش...

و كيفطرو معاهم غير بزز لاحظ زاين شرود باسر اما نور ملاهيا مع خوها....

حتا ناضو ب2...

ياسر: ياله خليناكم...

نور: فين غادين..

ياسر: رميساء باقي ممشات للدكتورة خاصها تراقب حملها... 

نور: اااه اووكي ...

ياسر: الله يعاون ...

خرج ياسر ورميساء .. وتبعهم زاين... وقفهم برا..

زاين: ياسر شتكم ماشي هما هادوك اش كاين...

ياسر تنهد: معندي منخبي عليك الوالدة على فراش الموت😔😔

زاين: اشنووو😨😨

ياسر: اه راه غادي عندها دابا مبغيت نقول والو لنور ...معرفتش تال امتا ولكن مبغيتهاش تعرف...

زاينذ: واخا .. ولكن مفهمتش كيفاش حتا وقع هادشي عاد كانت صحة سلام...

ياسر: عاود ليه كولشي...

زاين: لا حول ولا قوة الى بالله ... واش نيت مكينا تا فرصة والله تا نديوها للبرا ... ميمكنش نستسلمو...

ياسر: قلت هادشي للدكتورة... و اكدات ليا انه فينما مشينا غنلقاو نفس الجواب مهم انا مشيت وختي مبغينهاش تعرف على الاقل ماشي دابا...

زاين: عارف واخا معندناش الحق نخبيو عليها...اشمن مستشفى غنتبعكم..

ياسر: ********

زاين: واخا سيرو دابا...

مشا ركب حدا رميساء ومشاو....اما زاين دخل عند نور ...جلس حداها شوية باش ميعيقش ومن بعد قال ليها عندو شي شغل...ودعاتو و ناضت للكوزينا كتطيب مع عصام ...

دخل زاين للمستشفى لقا ياسر ورميساء عندها ومحمد...

زاين: السلام عليكم..

قرب للسمية وباس راسها...

زاين: كيف بقيتي اخالتي..

سمية: فافضل حالاتي اولدي ...

زاين: علاش مقلتيش لينا على مرضك ....راك نتاحرتي منين سكتي ... مبقاوش فيك ولادك ....و خاصة وحدة فبهم غتموت من الشوق ليك😔😔

سمية بقات كتشوف فيه و عينيها غرغرو وقالت: نوور الحبيبة ديالي هي لي بقات فيا😭😭

زاين: منين حتا نتي موحشاها علاش متخليهاش تجي تشوفك...

سمية: انا عارفا بنتي كيف دايرا مغتحملش تشوفني هكا ... اللهما خليها راها احسن هكا الى عنقتها ضميتها ليا غيولي الفراق صعب ... وتمنيتها كون حقدت عليا ولكن شبهات باها قلبها ابيض الحبيبة ديالي...😭😭

سكتات شوية وشافت فرميساء لي كتبكي وكلهم دورو وجهم بقات فيهم ...

سمية: رميساء بنتي قربي عندي...

جات رميساء قدامها وجلسات.... سمية مدات ايدها كتبتاسم بعينين مغرغرين وحطاتهم على حنكها كتمسح دموعها ...

سمية: بنتي رميساء.... كاين شي بيبي ياك؟

رميساء: اهى اهى باش عرفتيها اخالتي😭😭😭

سمية: هههه وجهك منور ابنتي ...وعينيك كايلمعو ...حيت الحمالة اهم تجربة كدوز على الانتى فحياتها كاملة ... الامومة زوينة ابنتي...واخا منجحتش انا فامتحان الامومة.....متاكدة غتكوني نتي ام فنيونة تهلاي فيه والله يكبرو فعزكم ابنتي... خسارة مغنقدرش نشوف حفيدي الاول...😭😭

رميساء: متقوليش هكاااك😭😭😭

ياسر: الله يطول فعمرك الوالدة الاعمار بيد الله .... حفيدك غتشوفيه ان شاء الله ...

سمية بدات كتحيد الخيوطة من ايدها كتحاول تنوض وهما كلهم قربو باش يحبسوها...

زاين: هداي اخالتي اش كديري...😨😨

سمية : قنطت هنا ديوني لداري...

محمد: راه حالتك متسمحش لك اسمية بهديك الله ..

سمية: انا بغيت نموت فداري سدينا الى بقيت عنا راه غير مضيعة للفلوس...

ياسر: اشمن مضيعة الله يهديك الوالدة..

سمية: صافي كلمة وحدة..

عيطو للطبيبة بقات معاها تاهي ووالو راسها مقسحاه شدات فولدها وراجلها وتمو خارجين ...و زاين معنق رميساء وغاديين وراهم حتا دارت سمية عندو وقالت ... 

سمية: ولدي بدلت راييي جيب ليا بنتي...

مشاو زاين طاير للفيلا و دخل لقاها مجمعة مع خوها وقال...

زاين: حبيبة اش كديري...

نور: والو مجمعة مع عشيري شتك دغية رجعتي...😊😊

زاين بقا كيشوف فيها كتبسم ليها بكل براءة ومعندها تافكرة اشنو ممكن تواجه من هنا للقدام..

زاين: حبيبة ياله معيا عندنا واحد الغراض...

نور: اشمن غراض ...

زاين: ياله احبيبة حتا نوصلو وغتعرفي ... 

نتضت نور وغير كتضحك وتبسم راشقة ليها دخلات تبدل وبقا زاين وعصام كيهضرو وزاين كل شوية يتنهد ..

هبطات و ركبو فاللوطو وعصام اللور... الطريق كولو وهي فارعة ليه راسو باش يقول ... وهو كيتهرب ليها ..

وصلو لدار سمية ونور بقات كتشوف و هي دور عند زاين..

نور: اووف ازاين علاش مقلتيش ليا غنرجعو خويا انا باقا باغاه يبقا معيا ياك اصاحبي😀😀

زاين: لا راه جينا تاحنا ندخلو ... ماماك بغات تشوفك..

نور بعد اكترات: اه تشوفني...... كيفااااش ماكا انا بغات تشوفني😍😍..... شوية توترات....ولكن اش غتكون بغاتنيي...

زاين هز ايدها باسها وابتاسم : اندخلو وتعرفي...😊😊

نور: اوووف واخا ..

هبطو و عصام دخل كيجري و زاين وراه ونور غادة بشوية ومتوترة دار عندها زاين مد ايدو وشدات فيه وباس راسها...

زاين: بلا متوتري احبيبة انا معااك...

تنهدات نور ودخلات مع الباب ... بانو ليها مجموعين فالصالة و داخلات نور وهي ورا زاين تاوقفات عليهم وكولشي كايشوف فيها .هي كتدور فعينيها ببراءة مفاهمة والو ... كانت سمية تاهي جالسة بيناتهم بطلب منها حيت مبغاتش تعرف نور بمرضها ...شافتها سمية وناضت تقدمت ليها ووقفات قدامها زاين حاول يطلق نور ولكن هي كرزات عليه حتا خشات ظفارها فيه وخلاها على راحتها ... 

نور كتهدر ببتوتر و برود وابتسامة متوترة : ماما واش لاباس قال ليا خويا كنتي مريضة...😊😊

مدات سمية ايدها كتدوزها على شعرها نور خرجو عينيها و تصدمات من لي كيوقع عقلها وقف على الخدمة هزات عينيها شافت فيها ومن بعد شافت فزاين وخوها ورميساء وكلهم ابتاسمو ليها مخبيين حزنهم..

سمية: انا بيخير دابا غير منين شفتك😊😊

نور: م.. ما ما..😮😮

سمية: عيون ماما...اجي عندي احبيبة ...😭😭

هنا نور جمعات تgبيعة وتجمعو دموع فعينيها ... و قربات للسمية وهي جراتها خشاتها فحضنها ...مغمضة عينيها و ايدها كيدوزو من شعرها لظهرها...نور بقا مصدومة هزات ايديها بشوية وحاوطاتها عليها بتخوف حتا تاكدات وعصراتها وعينيها دايزين بالدموع... وكتنهد و تنفس بالجهد بحال الى مقجوجة تعالات اصوات نواحهم وبكاهم ... رميساء تاهي مسكتاتش كتبكي بحال الى تاهي كتحس باش كيحسو عنقها ياسر لي دموعو محجرين فعينيه...وماشي هو كل الحاضرين هكاك... بقاو هكاك شحال ...سمية دارتها قدامها كدوز على شعرها الكحل وكتبعدو على وجها تشوف وجها لي ولا احمر عامر بالدموع وعينيها الزورق لي كيبريو بالدموع بحال 2 لؤلؤات... دارت ايدها بين وجها وبدات تبوس ليها وجهت كامل حناكها وجبهتها مخلات تابلاصة و نور محد مها هكاك وهي كتزيد تبكي و رجعات عنقاتها وكتشم ليها شعرها ...وكتبوس راسها وكتقول...

سمية: اخححح اللله ياربي ومناش كنت حارمة راسي ... اححح على حبيبتي وريحتها لي كتحمق ...

نور كتهضر وهضرتها كتقطع بتنخصيص ومخنقة: هء م...ما ما هء اع...اعرفتي...ش.حال تسنيت ...هاد الحضن..من..ك......اهء اهء😭😭😭

سمية: عارفة احبيبة ماما...عارفة سمحي ليا اروحي تسنيتي بزاف....(دارتها قدامها) ولكن اليوم غنعوض لحبيبة ديالي ....باستها فحناكها ب2...

نور ابتسمات ببراءة وباقا فيها تنخصيصة : اهء ... بالصح ...هء اماما...😢😢

سمية: اه اروح لماما ... نخرجو غير انا وياك اليوم نقضيو يوم غير ديال الماما وبنتها الصغيورة..اش بان لك...

نور بدات تنقز: اه....اه بغيت..😍😍

ياسر: ماما...😨😨

قطعاتو: دخل سوق راسك بنتي الحبيبة تستاهل... بلاتي نلبس و نمشيو ...

دخلات لبيتها و تبعها ياسر ومحمد ..ونور تخشات فزاين كتنقز بالفرحة والدموع فعينيها...

نور: زااين ...شفتي اش وقع ...ماما قالت ليا حبيبتي و روحي ياك مكنحلمش هههه واخيرا غنقدر نعنقها ونقول ليها ماما ... الحمد الله ياربي..

زاين: ههه اه شفت احبببة صبرتي ربي جازاك فالاخير...

نور: اااه هههه اوف حاسة براسي غنسخف بالفرحة..

زاين: هههه باسها فراسها وعنقها بالجهد بحال الى كيشحنها بالقوة...

خرجات سمية ضاحكة ... لابسة حوايج الخروج ودايرا فولارها.. و محمد و ياسر وراها رابطين غوباشتهم حيت عياو معاها متخرجش وهي اصرات...

سمية: حبيبة مشينا؟

نور: اه .. ولكن بنتي ليا عيانة خليها حتا تصحي باقي قدامنا الوقت...

سمية: لا ماباغا نضيع حتا تانية مزال ...

نور زادت فرحات: واخا😍😍😍

رميساء دورات وجها وناضت للحمام تبكي على خاطرها مقدراتش تحكم فراسها وخاصة زادت حساسيتها بسباب الحمل..

زاين: هاكي انور كونطاكت ... متركبوش طاكسيات وردي البال...

نور: اوووكي هه...

خرجات معانقا هي وياها و ركبو ب2 ....وخرجو ياسر و زاين وراهم بالتخبية ركبو فالوطو ديال ياسر و تبعوهم تحسبا لاي طاوارء... رميساء بقات فالدار مع عصام...و عمهم محمد...

نور سايقة ومعاها سمية مقاداهم فرحة ب2 ...

نور: ماما ...هههه ماما ...

سمية: هههه ياروح ماما علاش كتضحكي..

نور: حيت فرحانة واول مرة كنحس بمعنى كلمة ماما شكرا بزاف هاد النهار اسعد يوم فحياتي...

سمية: لا اسعد يوم فحياتي انا .... وينو ضحيكة بنتي شحال غزالة...😍😍😍

نور: نتي لي ضحكتك غزالة ههههه فين نمشيو...

سمية: ياله للمول هو الاول حيت بغيت نشري لك شحال من حاجة كان حلمي فيها...

نور: هههه اوووكي ..

مشاو للمول دخلو والدراري وراهم وبعاد عليهم...

دخلو للمحل الحوايج شرات ليها على دوقها و تانور شرات لماماها...غاديين مشادات وكيضحكو ... دخلو للصالون تهلاو فالشعر والحالة هادشي سنية معندها غراض فيه ولكن بغات تجرب مع بنتها gاع هادشي سلاو ورجعو كيدورو سمية عيانة ولكن فرحة بنتها وضحكتها مقويينها باش تقاوم... دخلو لمحلات عاوتاني شرات ليها شي كادوات للدار ولي شراوه كتهبطو نور للوطو وترجع عند ماماها...حتا جراتها سمية للمحل فيه لوازم الامهات والرضع...

دخلو ونور مقاداها فرحة ....شرات حوايج و لبيبرونات و كولشي بضوبل ... شرات واحدلبيسة ديال توام وهزاتهم وشافت فنور بضحكة عريضة ...دخلو ونور مقاداها فرحة ....شرات حوايج و لبيبرونات و كولشي بضوبل ... شرات واحدلبيسة ديال توام وهزاتهم وشافت فنور بضحكة عريضة ...

سمية:هادو غتلبسيهم للتوام لي غتولدي...😊😊

نور: هههههه ماما باش عرفتيني غنولد توام...

سمية: انا حاسة ...وغتقولي ماما قالتها... الى مولدتيش توام غنتخاصم معاك😏😏

نور: نولد التوام غمتخاصميش معايا...😂😂

هزات رميساء بينوارات وحوايج للحوامل... 

سمية: هادشي كولو شريتو بالضوبل ليك نتي و لرميساء مرات خك...

نور: ولاش كتشري ليا اماما تانا ... انا ماحاملاش تانحمل و اجي معيا نشري...

سمية: رشقات ليا نشري لك... ونتي مالك..

نور: ماماليش شري ليا ههههه

سمية: غتكوني غزالة فاش عتكون كريشتك قدامك كنتخيلك احبببة..... غرغرو عينيها وضارت

نور: ههههه على قبلك غنحمل ..مدام متشوقة تشوفيني حاملة ههه.

سمية: ان شاء الله احبيبة متاكدة غتكون احسن مامي فهاد الدنيا..... متكونيش بحالي بيني ليهم حبك نعسيهم فحضنك عطيهم الاولوية على كولشي تصاحبي معاهم وخليهم قدام عينك .... واهم حاجة عطيهم قلبك وحنانك واهتمامك عمرك تغوتي عليهم اولى ترفضي ليهم شي حاجة...

🚨🚨بنات عاودو قراو بارت لي قبل هادا زدتفيه شي حاجة🚨🚨

نور: واخا اماما .... تصلا غتربيهم معايا .. انا مخايفاش دابا من المسؤولية مدام نتي فجنبي..😊😊

سمية: ان شاء الله احبيبة ... غير هو بغيتك تعرفي انا كنبغيك واها منشوفينيش قدامك راه انا ديما معاك...

نور: علاش مغتكونيش قدامي😟😟

سمية: ههههه حيت حنا مساكنينش مع بعضياتنا...

نور: ههه اه ايوا صافي انا وليت باغا نسكن حداك ...اولا غنبقا ديما نجي عندك...

سمية: واخا احبيبة..

يقات كتهز ليها لوازم المرءة الحامل و ولوازم البيبيات ...شرات ليها حتا كادويات للفيلا ...مهم مخلاو ماشراو ... وهبطو ركبو وهادشي كولو لي دار بيناتهم سمعوه الدراري ...لي بقاو كيشوفو فبعضياتهم و يتنهدو على زهر نووور لي مقاداها فرحة مطلقاتش ماماها وغير كتنقز بحال البنيتة صغيرة ركبو فالوطو وتبعوهم الدراري....

نور: ماما 4 هادي وحنا مكليناش اش بان لك نهبطو لماgدو...

سمية: لا ...سيري جيبي لينا مناكلو وانا غنوريك فين غنمشيو....😊😊

نور: اوووكاي...

مشات نور جابت عصيرات ودي سوندويش وفريت و دجاج مقلي و سلاد الفواكه...

سمية: ودابا غنمشيو للبارك الياسمين...

نور؛ اااه عزيز عليك تما ..اوكي نمشيو ...

صاقت نور و دخلات البارك حطات لوطو و هزات تابي صغيرة كانت فلوطو سرحوها وجلسو فالربيع والخضورة حيت فصل الربيع هادا ... حطو الماكلة وجلسو...

نور كتاكل وتضحك مع ماماها وتهضر مسكتاتش ومها كتشوف فيها وحاضياها وكتاكل غير شوية شوية ..

نور: اممم هادشي بنين ...

سمية: زيديك ديالي مفياش جوع😊😊

نور: لا كولي شفتي كيف ضعافيتي و صفاريتي ... 

سمية: هههه انا بيخير اماما 😊😊

كلاو وسلاو وجمعات نور داكشي وسرحات رجليها وغمضات عينيها كطلع النفس ومها كتشوف فيها وفريح لي كيلعب بشعرها .... ودارت ليها يايديها نعسي على رجليا...

نور تكات على رجليها وتقابلت معاها....و سمية كتلعب بشعرها...

سمية: فراسك شبهتي باباك بزاف😊😊

نور: بالصح 😍😍 هضري ليا عليه انا gاعما عقلت عليه...

سمية: ههههه باباك كان احسن زوج واحسن اب ... كان كيبغيكم بزاف خاصة نتي فاش عرفني حاملة ببنت مقداتو فرحة ويمكن فرح كتر من فاش حملت بياسر.. كان الوحم عندي صعيب فوقتك نتي ... ماخليت علاش توحمت كتدان مسكين يخلي الخدمة ويجي يشوفني اش بغيت هههه خرجتها منو .. فاش ولدتك بكا بالفرحة... كان كيخاف عليك خاصة نتي كان عندك مشكل الحرارة كانت كطلع ليك لزاف وكل مرة خارج يجري بيك للسبيطار .... واش باقي عندك هاد المشكيل...

نور: ههه فاش كنمرض اولا فاش كتجيني الدورة .. ولكن متخافيش زاين ديما مراقبني حافض الوقت لي كتجيني غير كتقرب كيجيب ليا الدواء باش نتفادا المرض...

سمية: الله يرضي عليه ويخليكم لبعضياتكم فرحت ملي عرفتو غيولي راجلك... ههه كنعقل فاش كانتي بيبي كتن عزيز عليه يهزك ويلعب معاك واخا كان فعمرو 5 سنين ... وكان غير يهزك تبقاي تبكي ليه وهو كيحلف لاطلقك وكان كيعصبك ببوسانو .... ومكان كيخلي تاواحد فالدراري لاخرين يلعب معاك... 😁😁

نور: مغيار من صغرو😂😂😂

سمية: هههه 

نور: ماما غنعتارف لك بشي حاجة...

سمية: ههههه قولي..

نور: فاش كنت صغيرة كنت كنخليك حتا تنعسي وندخل نعس حداك...

سمية: ههههههه عارفة وانا كنت كنتسناك حتا تجي وتخشاي فيا وكنحس بيك عند بالك مطورة وانا غير دايرا راسي ناعسة ... كنتي تبقاي تلعبي فشعري وتشبعي فيا بوسان حتا وكتنعسي ومن بعد تجي نوبتي ههه

نور: 😍😍😍😍😍 بالصح...

سمية:ههههه اه الحمقة مفكرتيش كيفاش كنتي كتصبحي فبلاصتك...

نور: حيت ياسر لي كان كيهزني...

سمية: هههه هاديك انا 

نور: هههههههه بالصح وانا عند بالي مطورة.

سمية بقات كتشوف فيها وتبسم...

سمية: سبحان الله ضحكتك غير ديال باباك...

نور كضحك وتشوف فيها...

سمية: شكرا احبيبة حيت نتي بنتي ...شكرا حيت محقدتيش عليا..

نور: انا اماما من ديما كنت عادراك وعارفة لي دزتي منو مكانش ساهل وحياتك دازت عداب😔😔

سمية: ولكن دقت السعادة معاكم ومع باك الله يرحمو كنتو افضل هدية وهبها ليا ربي ... ومندماش حيت ولدتكم احبيبة ديالي..

نور: ماما😍😍😍

سمية: وشحال حلوة كلمة ماما من فمك 😍😍فراسك جاتني الغيرة منين سمعتك كتقولي ماما لمدام ليلى.. نور: ههههه غرتي ههه هي عزيزة عليا و منفرقش لينب ولين رميساء داكشي لاش كنعيط ليها ماما...

سمية: هي مراة مزيانة وحنينة وعزيزة عليا عاوناتني بزاف فالماضي.... عارفاها كتبغيك ومهليا فيك وتهلاي فيها حتا نتي...

نور: واخا ماما ...

سمية : تحرك البرد دغيا طاح الليل ... ياله غيكون راجلك مشوش عليك..

نور: اوووه مصخيتش....

سمية؛ تانا احبيبة ماما ...

ناضو مشاو ركبو .تبعوهم الدراري تاواحد مكيهضر مع لاخر غير كيخممو...

وصلو للدار ودخلو ...عاد تبعوهم الدراري بقاو مجمعين وكيهضرو ونور كتعاود ليهم اش دارو وهي متحمسة وفرحانة وهما غير كيتبسمو ليها ...

زاين: ياله احبيبة نمشيو خالتي خاصها ترتاح..

نور حكات راسها على كتف ماماها: ولكن انا باقي مشبعت من ماما..😔😔

سمية: غدا ورجعي عندي هههه مغنهربش....

نور: اااه صافيى... ولكن غنجي فالصبااااح..😒😒

سمية: وانا غنتسناك😊😊

ناضو كلهم خرجو ومشاو معاهم للباب سلمو عليهم وتمو غاديين...ركبات رميساء مع ياسر وبقاو كيشوفو نور كتعنق فماماها...وزاين ركب كيتسناها... حتا حلات نور باب لوطو ودارت شافت فمها لي باقا واقفة ....وهي ترجع جرات عندها عنقاتها بالجهد ...وعاد طلقو بعضياتهم ...وهنا كولهم كيتفرجو فيهم و كيبكيو في صمت ...اما رميساء دايرا gنازة بتنخصيص وياسر لي كيبرد فيها ....

نور سلات العناق واخا مشبعاتش ومعولا ترجع الغد ليه ...

حيدات منها نور وتقابلت معاها وقالت...

نور: بسلامة يا احسن ام...

سمية: بسلامة ياحسن ماوقع فحياتي...😊😊

مشات نور وضايرا عندها ركبات حدا زاين ... وخرجات راسها كدير ليها باي بايديها وكتسيفط ليها بوسات فالهواء...حتا غبرات..

وصلو للفيلا دخلو عند زاين ونور هزات داكشي لي شرات مع مها...ودخلات... همت جالسين وهي عند راسهم مزربعة داكشي كتفرج فيه...

نور: ههه شوف ازاين ماما بغاتنا نولدو توام ههههه ضحكاتني... وينو هادي زوينة...رميساء هاكي هادشي خداتو ليك نتي...كرشك غتكبر وغتحتاجي حوايج واسعين... زاين شوف هادو ههههه كييوت وصغيورين شهاوني فشي بيبي ههه 

زاين: غير كيشوف فيها ويتبسم ليها ويومء ليها براسو... ورميساء كتضحك معاها وغير بالزز...وياسر ساهي كيخمم...

نور طارت عنقات زاين: ممتيقاش و اخيرا حبيبة ماما صفات خاطرها من جيهتي ..نقول لك غدا غير نفطر غنمشي عندها...

زاين: ان شاء الله احبيبة...

دارت عند ياسر وعنقاتو تاهو: حبيبي خويا ...ههه ديما كنتي كتقول ليا غيجي واحد النهار و غادي تعنقني فيه ماما .... وداكشي لي وقع ..هههه انا فرحانة بزاف 😁😁

ياسر: داكشي لي بغيت اختي الصغيرة ....

نور: مالك دابل قول ليا بيك شي حاجة ...

ياسر: لا فرحان ليك احبيبة 😊😊

نور: اووف صافي تهنيت دابا هم وانزاح...

ياسر: ياله نخليكم عيان دابا وبغيت نرتاح...

نور: اوكاي خويا تصبحو على خير..

رميساء عنقاتها: فرحت ليك احبيبة..😊😊

نور: شكرا احبيبة...

خرجات رميساء تبعات ياسر و نور بقات كتوري لزاين داكشي لي شرات وتعاود ليه شحال وهو غير كيتبسم ليها و يتبع معاها.... شوية جرها جلسها على رجليه...وعنقها دخلها فيه بتلجهد كيواسيها و بطريقة غير مباشرة وكانه حاس باش غيوقع من بعد نور شافتفيه بديك الابتسامة البشوشة المتفاءلة وهو قال ليها ... 

زاين: نور عيني يطرا لي يطرا خاصك ديما تكوني اكيدة بلي انا ديما فجنبك ...

نور بابتسامة باستو فعنقو: ههه عاااارفة ..

وعنقاتو وجمعات الضحكة بنظرة فارغة...

ناضو تعشاو وطلعو للبيت و نعسو....وكدالك بالنسبة للكوبل لاخر...

▪▪▪▪▪▪▪▪▪ا▪▪▪▪▪▪▪

نور جالسة فالبارك لي كانت فيه قبايلا كتزعلل... وفرحانة كتسمع غير صوت الشجر والفراخ دارت لليمن بانت ليها ماماةجلسات كتزعلل حداها وكتضخك...

نور: هههه ماما مشفتكش فاش جيتي ياك مخاصمة معيا...

سمية: لا مبقيتش مخاصمة معاك حيت نتي الاميرة ديالي...

نور: بالصح اماما ...ههه وياله نمشيو جاني هنا البرد..

سمية ناضت وجلسات قدامها ... انا لي غنمشي نتي غتبقاي...

نور: ولكن هنا كاين البرد بزااف...😣😣

سمية: زاين عندو مانطا دافيا...😊😊

نور: ولكن هو مكاينش معيا 😔😔😔

سمية: غادي يجي دابا...😊😊

نور: ونتي فين غادا..😟😟

سمية: غادا مع باباك توحشتو😊😊

نور: تانا توحشتو ديوني معاكم...😢😢

سمية: لا اماما باقي الحال .... ها باباك جا بسلامة...

نور: مااامااا رجعي متمشيييييش مااااماااا ياله جيتي تسناي شوية مازال...

سمية غادا شادا ايد راجلها... و دارت عند نور وقالت...

سمية: تهلاي فجود وجودية...😊😊😊

مشات.....

زاين فاق شعل الضو على صوت انين بكاء نور ....شاف فيها لقاها كتبكي وهي ناعسة بالدموع فعينيها مدكتبكي بحال الى فايقا وكتقول...رجعي متنشيش دابا باقي الحال...

جرها عندو مفيقهاش بدا يطبطب عليها ويقول...

زاين: صافي انا معاك احبيبة شششششش صافي احبببة صافي...

وهي بدات تدريجيا كتسكت و تحلي البكا وهو بقا فايق كيدوز على راسها ملصقها معاه كيطببطب عليها كيف شي بيبي باش يطيب نعاسو بقا هكاك شحال حتا نعسو...

الغد ليه فاقت نور خاسرة مراشقاش ليها لقات زاين صاوب الفطور هبطات هكاك بالبيجامة ووجها منفوخ ...دخلات عند زاين عنقاتو من لور وهو خدام فالكوزوينة ... دورها وخشاها فيه ...

زاين: حبيبة ديالي فاقت...😊😊

نور: مممم

زاين: مال الغزالة ديالي طاير ليها...

نور: معرفتش قلبي مقبوط عليا وممرتاحاش ..و واحد الحلمة حلمت بيها ضراتني فخاطري...

زاين تنهد : غير حلم احبيبة متخميش .... اش بغيتي تفطري...

نور: مابغيت والو ازاين ...مخنوقة باغة غير نبكي😭😭 ديني عند ماما 

زاين: ورجوع الله انور لاش باغا تبكي راه قلبي طايب بلا متزيدي عليا😳😳

نور:😭😭😭

زاين عنقها: ششششششش 

جاه اتصال و جاوب...

زاين: ياسر ؟ فينك.......تنهد.... واخا ...

نور: اش قالك😢😢

زاين شاف فيها شحال...: ياله سيري لبسي غنمشيو عند ماماك...

طلعات طايرة لبسات غير لي لقات وهبطات...ركبو فاللوطو و طارو ...

نور: ها الدار فين بقات ...😭😭😭 علاش غادي فهاد الاتجاه...

زاين غير ساكت...

نور: كتشوف فالطريق وكتبكي بحال الى عارفة اش كيتسناها... و ماباغاش تقبل دوك الافكار لي كيكيحو فبالها... زاين كيشوف فيها كتبكي من نيتها وهي باقي معرفت والو وكيدعي الله يهرج هادشي باقل اضرار ممكنة...

ووصلو ووقفو قدام المستشفى...

نور كتهضر والبكية خانقاها: زاين لاش جبتيني هنا ...الدار من هنا ....انا غادا عند ماما...

هبطلت وتمت غادة وخرج كيجري شدها...

زاين: نووور تبتي معايا ..ماماك كاينة هنا...

نور: اهء اهء كداب كتكدب عليا..😭😭😭

زاين: اجي احبيبة...

جرها بالزز منها طلعو للانعاش ... غير دارو مع ديك الدورة لقات كولشي العاءلة كاينين ...محمد ..ياسر رميساء عصام علي ليلى سعد و سيف و عيالاتهم ...نور شادا ايد زاين جارها وكلهم هزو عينيهم كيشوفو فيها شوفة خوف وشفقة و كلهم حمرين بالبكا نور دايزا من قدامهم كتشوف فيهم ولي دازت من حداه كيحدر راسو اولا كيدورو وهي غامكتزيد تاكد وتبكي اكتر...زاين قدامها معالم بيه غير لي خلقو حبيبتو قدامو غدوز اسوء يوم فحياتها بعدما كان الامس اسعد يوم فحياتها اااه هادا هو تلزمان كيخليك ترفرف مع الطيور مكتحس بيه حتا كيخبطك مع الارض....حل ليها الباب دخلات مخبية ورا زاين وكتجار معاه مبتغاش تشوف حتى...

▪▪▪يتبع▪▪▪