الدخيلة الجزء الثامن

من تأليف Ghazal trust
2018

محتوى القصة


رواية الدخيلة

دخل يحيى دوش وخرج لبس شورط قصير ومشا فاتجاه الناموسية
يحيى: سدي عليا داك الباب غنعس وماباغي حتى واحد يدخل عليا 
اسراء: مغيجي حتى واحد كلشي مشغول مع سحر ...بغيت ندوش وخفت يفيق يبقا يبكي ... واخا زعما بدلت ليه وشبعان 
يحيى: اريه نشدو وسيري نتي دوشي
تكى على ضهرو وسط الناموسية ولبسات اسراء لولدها تقاشر و كسوة خفيفة رماضية فيها الابيض و حطاتو ليه على صدرو مكمش يديه وطالق رجليه كيحل ويسد فعينيه مكيتحركش
يحيى: صافي دابا خليه هاكا وسيري
دار يديه مور راسو وسد عينيه وفكل مرة كيتنفس كيبقى البيبي يطلع ويهبط فوق صدرو . دخلات دوشات وخرجات لابسة بينوار وفوطة على راسها لقاتهم كيما خلاتهم على نفس الوضعية ... استاغلات الفورصة ومشات عتانت بالبشرة ديالها وتهلات فراسها وتعطرات ومشات تكات حدى يحيى بيدها كضحك وكتصورهم 
اسراء: عولنا عليك بكري ... تحضيه...نعستي وخليتيه ماخفتيش تيكركب !
جاوبها يحيى وهوا كغمض عينيه : راني فاايق مناعسش ... وغير ميكي عليه راه نااعس 
اسراء : ههههه حسابلي نعستي تا نتا 
حل عينيه فيها: نعسي ياك فيك النعاس... وانعسي ماحدي شادو 
اسراء: واييه كنموووت بالنعااس 
ناضت لبسات بيجامة حد الركبة معرية من الصدر وجابت معاها لاطروس جليات حدا يحيى كتحل ففوطات داءرين بحال اولويز حيدات ليهم اللسقة دارتهم لداخل فحمالة الصدر ودهنلت يديها ورجليها 
يحيى: شداكشي؟
اسراء: هادو كيشربو الحليب ... ياااربي تسمحلي كنت مشيت مع ماما واحد المرة نباركو لواحد النفيسة مقدرتش نسلم عليها بريحت الحموضة ... وعاد لابسة طريكو دالخيط وسروال دالخيط وواحد البودي ابيض تحت الطريكو يديه مسخين ... مقدرتش نجلس حداها ... الحكول سايحين مجلخين واحد الحالة منقولش
يحيى: وا الله يكون فعوانها مسكينة تكون مريضة...ماشي بحالك نتي مشاء الله بلا منبقا نهضر عليك بزاف حتى تمرضي 
اسراء: لالا سمح ليا ... كتقدر تنووض وكتسلم وكتمشي وتجي عاادي و ولدات عاادي واخا غرزوها ولاكن كتقدر تحرك وكضحك ... واخا كاااع مقدراتش دوش وماعندهاش امكانيات على الاقل تبدل غير حوايجها وتعطي لشي وحدة كتجيها بونجة وباندوش دوز ليها على لحمها وعصرها فالماء وتمسح ليها ... ماشي تبقا هاكاك ... راه غير فوطة فازكة كااافية وترش شوية دالريحة كيما كانت .
يحيى: هنينا براكة من الهضرة فالناس...حمدي الله ولدتي بيخير وعلى خير
اسراء: وكاع كن ولدت شي ولادة صعيبة راه منبقاش هاكاك عاطيا مني ريحت الصنان وعاد ولدي اللي كنشدو ونرضعو يشمها فيها راه عينيه غيمرضو 
جاوبها ساد عينيه بهدوء : نتي راه ميقد عليك غير اللي خلقك...نعسي خلي الدري ينعس 
حطات لاطخوس فالجنب وتكات راسها وهزات تيليفون كتاخد السيلفيات مع يحيى وهوا ناعس حداها ومنعس الطفل على صدرو

داز اسبوع والحال هوا الحال ... اسراء مقابلة ولدها مكيقرب منو حتى واحد قايمة بالواجب وجالسة كتربيه ومتوانسة بسحر اللي فرحانة غير كضحك مع كلشي ، علاقتها بيحيى كيما هي ... البروود بيناتهم وهضرتو قليلة معاها ونهار نهار كتزيد تقلال كثر ، الرياض خوا وبقاو فيه غير العاءلة . داز اسبوع كامل والعاءلة وجدات للسبوع احفالا بالمولود ... كل واحد فين فين كيجري ... الاحتفالات مكتساليس فرياض السباعي .
وصل النهار دالسبوع ومشات اسراء مثل كل مرة للصالون وجدات راسها ورجعات طالقة الشعر ودايرة تاج مذهب خفيف وتكشيطة خضراء ملكية ومضمة ديال الذهب ديالها وبلغة مذهبة ومكياج خفيف...طلعات لبيتها لبسات ولدها جبادور فالاخضر بحال اللون اللي لابسة وحطاتو ف ايزار باج مطروز بالذهبي ونزلات هازاه فيديها ومعاها يحيى بفوقية رقيقة فالباج جات واقفة على جسمو وتقاشر فالابيض وبلغة دالصم كيبان بحال العريس هبطات للفيناء الفسيح فين موجود الكل عاءلاتها وعاءلت زوجها والكل بجلالب والنساء بالبلدي بحال نهار العيد ناشطين مع مجموعة من الدقة المراكشية بجلابهم الحمراء . وقفات حدا النافورة هازة ولدها وحولي صردي قدامها ممشوطة ليه الهيضورة ونضيف وحناء حمراء على جبهتو وسمين وطويل . فوق ازار ابيض مفرش فالارض واقفة الحاجة فيديها مريشة عامرة بماء الزهر كترش الارض فرحانة هازة قفطانعا بيديها ولايحة الشال ابيض على راسها . علي واسماعيل طيحو الحولي فوق ليزار الابيض تحت انغام الدقة المراكشية والزغاريت والكل كيصور . دار يحيى من اللور هز الجنوية وسما الله وذبح بيدو اليمنى على اسم "محمد امير" ... ترش الدم على التوب الابيض وبسرعة البرق خطفات الزوهرة نقطة ديال الدم من الحولي ومشات دارتها للطفل بين حجبانو واسراء كتشوف فيها 
اسراء: شنو هادشي؟
الزوهرة: من العين ... اش كتعرفي نتي فهادشي.
وتهز الحولي مشا نيشان مع الكزار وبقات الدنيا نقية نقية والكل فرحان وناشط واكثر شخص فرحان واخا تقيل ومرزن باينة على وجهو الفرحة .. هز محمد امير فيدو ومسح ليه بين حجبانو وشاف فإسراء بإنزعاج
يحيى: شهادشي درتو ليه؟
اسراء: قالك من العين
يحيى: بانزعاج ) التخربيق
قلب وجهو ماعجبوش الحال وخلا اسراء كتشوف فيه مصدومة من التعامل ديالو وكأنه احتقرها
خلاتو هاز الطفل ومشات طلعات لبيتها مقلقة وجلسات طالع ليها الدم باغا تبكي ، بقات جالسة حتى دخلات عندها سحر كضحك ... شافتها وهي تجمع الضحكة 
سحر: مالكي ؟ كنقلب عليك طرتي! مالك جالسة هنا بوحدك 
هزات اسراء راسها بغضب: مافهمتش انا مالو معايا مفهمتش؟؟؟ 
سحر: غير بشوية بشوية ... مالك اش وقع ؟ شنو كاين شرحي ليا نفهم
اسراء: هاداك خيينا ... يحيى... ماما دارت شوية ديال الدم دالحولي لمحمد امير فجبهتو ...ايوا جا السي يحيى هزو شافو وقالك علاش ديرو ليه وتخربيق وماعرفت اشنو بحال الى ولدو بوحدو ماشي ولدي انا 
سحر: ايوا ماقال عيب ... ياك هضر بفمو ماشي حيدو ليك
اسراء: قالها لطريقة فشكل بحال الى انا خدامة عندو ولا معندي اصل ! زعما هوا شكوون غيكون كاااع 
سحر: صافي دابا 2اافي خلي يدوز هادشي وهضرو بيناتكم بلا متجبدو الصدع قدام كلشي ... نوضي يالاه هبطي قبل مايطلعو يبقاو مالها مات مالها وبنادم خاصو غير علاياش يتجمع 
اسراء: لا غير سيري خليني مافيا اللي يهبط 
سحر: وانوضي احبيبة عافاك خلينا نشطو ماحد كلشي مجموع ... انا عندي السبعيام ليوم ونتي عندك السبوع واش متفرحيش معايا 
اسراء: تأ. (تنهدات) يالاه 
نزلات معاها لتحت فين كاين كلشي ناشط ومجموع وشافت فيحيى بنص عين لقاتو جالس فالصالون كيضحك مع باها وخوها وباه وخوتو ... قلبات وجها بحزن شافت ولدها هازاه الزوهرة كتراري بيه ومشات عندها هزاتو ورجعات طلعات لبيتها حيدات حوايجها ولبسات بيجامة خفيفة من الصهد وحطات ولدها فوق الناموسية كيفركل فالجابادور . طلعو ليها طبسيل ديال الكبدة لبيتها كلاتو وجلسات متكية حتى دهل عندها يحيى راشقة ليه وعقلو مشطون مشا نيشان هز ولدو فيدو كيشوف فيه بحب وكيبوسو واسراء هازة عينيها فيه كتشوف فيه شوفة فيها نوع من الحقد والحزن والغضب ... عكسو هوا اللي مشافش فيها وبقا ملهي مع ولدو ... عيات ساكتة وهيا طلع حاجبها 
اسراء: اش ديك الطريقة هضرتي معايا بيها قبيلة؟
مجاوبهاش وبقا كيضحك مع ولدو وكررات السؤال مرة اخرى بعصبية وتلفت ليها بجدية
يحيى: اش كااين؟
اسراء: هاديك طريقة كيهضرو بيها الناس؟
يحيى: وكيفاش بغيتي نهضر معاك؟
اسراء : اش فيها الى دارت ليه ماما داكشي مافيها والو
يحيى: لا ا لاللة ماديريش ليه داكشي وماديري ليه حتى حاجة خليه كيما هوا ... الدم على جبهتو ...اش هاد التخربيق هادا ومعامن تشاورتو تحطو عليه الدم؟ 
ناضت شافت فيه بصدمة: ايييه !!! نووض ضربني نووض ... راه كيما هوا ولدك ولدي حتى انا ولا نسيتي شكون ولدو 
حط الطفل فبلاصتو ورجع ليها خرج عينيه وهضر بصوت مرتفع 
يحيى: غتعلمي تهضري بشوية ولا غنتفهام معاك ... هانا كنوصيك ا اسراء هادي اخر مرة تعلي فيها صوتك عليا ولا مغيعجبك حال سمعيتي مزيال ولا نعاود ليك 
شافت فيه مصطومة كطلع وتهبط فيه وتشوف فجنابها ممتيقاش وخافت يسمعو صوتو من لتحت ... سكتات كطلب مايعاودش يغوت ولا يهضر ويسمع عندها العاءلة كاملة 
خلاتو ومشات جلسات حدا المراية حطاية راسها على يديها وكتبكي وهوا متكي بيديه على البياص ديال ولدو كيشوف فيه مغوبش وساهي كيشمع للتنخصيص ديالها ... شوية هز راسو بعصبية ومشا كيهضر بوحدو فنفسو طالع ليه الدم وخرج زدح الباب وبقات هي كتبكي وزادت عطاتها للبكى.
رجعات سحر لثاتها كتبكي وبقات كتهدن فيها حتى سكتات ولبسات قفطان ابيض خفيف ونزلات سلمات على عاءلتها وودعاتهم ورجعات لبيتها جالسة كتشكي على سحر والاخيرة كتنصحها حتى داز الوقت وناضت سحر خرجات وبقات اسراء متكية حدا ولدها كتشوف فيه ... دخل يحيى مشا نيشان للدوش دوش ومشا تكى حداها تقلب على جنبو باس لمحمد امير يدو وجلس كيداعبو واسراء حداه ماكية شادة لولدها فرجلو وهازة عينيها فيحيى كتشوف فيه وهوا ممنتبهش ليها وملهي مع ولدو...هز عينيه فيها بلا مبالات وتقلب عاطاها بالضهر نعس

نعسات معصبة وكل مرة تفيق بالليل عند الطفل وكل ساعة يفيق كيبكي ... حل يحيى عينيه وقلب راسو عندها لقاها شاداه كتسكتو 
يحيى: مالو علاش كيكبكي؟
اسراء: ماعرفتش...بدلت ليه ورضعتو ومابغاش يسكت 
يحيى: يمكن جاه الصهد...حيدي ليه حوايجو خليه يتنفس
حطاتو قدامها حيدات ليه حوايجو وخلاتو بليكوش وتيشورط بيضاء خفيفة وسكت بقا كيفركل ويضرب بيديه مابغاش ينعس ليعا وهي كتميل بالنعاس عياانة ... تكات سادة عينيها وخلاتو بيناتهم فالوسط كيفركل ويحيى كيشوف فيه ويبوسو من رجليه ومن يديه تحت الاضواء الخافتة حتى نعس وناض هزة حجو بلاصتو وغطاه ورجع نعس .صبح الحال وناضت اسراء فالصباح مع الستة كترضع وتبدل ليه ومقابلاه عاد رجعات نعسات . ناض يحيى خلاها ناعسة ومشا طل عليه ودخل للدوش دوش ولبس حوايجو وخرج . مرة اخرى فيقا بكاء الطفل وناضت هزاتو وبدات فالروتين ديالها من تبدال وغسيل ومسيح ورضاعة حتى سكت ومشات دارت بحالتها ولبسات فىاشة خفيفة وصندالة وخرجات . يالاه حلات الباب سمعات اصوت كثيرة ديال الناس رجال وعيالات وبكاء . طلات من الفوق بانت بيها الدنيا عامرة شي داخل خارج كيتسالمو ونزلات بشعرها مطلوق وقفات كتشوف فيهم والكل معجب فيها وكيتناغزو عليها ... تلفتات للجنب شافت يحيى جالس فالصالون شدا راسو بين يديه وحداه علي وجهو صفر مرة كينوض مرة كيجلس وسامية وجها حمر بالبكاء ... شافت كلشي كيشوف فيها مفهمات والو وبقات كتقلب بعينيها على سحر مالقاتهاش ورجعات تلفتات جيهت يحيى شافتو كيشوف فيها بغضب شديد ونايض بعصبية جيهتها

شافتو جاي جيهتهاورجعات باللور طالعة كتجري فالدروج وقلبها غيسكت بالخلغة وكل ماكيدور فراسها انها مشات فيها و سيرتها غتولي على كل لسان ... وصلات لبيتها ودخلات كتجري مشات نيشان هزات ولدها فيديها ووقفات كترعد وهوا داخل كيزدح فالباب
اسرء: والله ماقصدت ... والله ماكنت ناوية على داكشي اللي فراسك ... راه كنتي قلتي ليا طلقتيني وبغيت غير نضحك معاك والله 
يحيى:بغضب) حطي الولد ... (بصوت مرتفع) حطييي الوااااالد 
اسراء: شوفي انا غنمشي بحالي هنننهننن بلا متحط عليا يدك 
يحيى: غتحطيه ولا لا
اسراء: لاا... باش ضربني ... منحطوووش
يحيى: حد 3 ....واحد ... جوج ...ثلا...
حطات الولد كترجف وكترجع باللور وهوا يشدها من شعرها جرها بعصبية
يحيى: نازلة ليا بحال هاكا مالقيتي اللي يحكمك... عاجبك راسك وعاجبينك سوالفك الناس كلشي ساترين راسهم الا نتي نازلة دايرة فيا الضحك 
اسراء: ااااي .. اهىءاهىءاهىء طلق شعرييييي ايييييي
دفعها طاحت على الناموسية ووقف كينهج 
يحيى: تفوتي هاد الباب نقطع ليك رجليك ... (كيتحلف تحت سنانو) وييلااا مقطعتهم ليك يااا اسراء راني ماشي راااجل ... وعلى الله ... ياااربي فوتي هاد الباب وغتفرجي شغاندير فيك 
خرج وخلاها كترجف مافاهمة والو ومعصبة 
اسراء: مال هاد بنادم واش تسطى ولا شنو ؟؟ اش هاد الحياة ولليت عليشاه يخخخ على متخلف 
جلسات كتجمع شعرها وتنكر بوحدها وتسب ودعي فيه حتى دخلات سحر لابسة جلابة طويلة ولايحة الشال على راسها وعينيها حومر بالبكى 
سحر: اويييلي اش ديك الحالة نازلة بيها واش هبلتي؟
اسراء: ماعرفتش اش واقع وشنو كاين ؟ مالهم ياك لاباس؟
سحر: علاش مفخباكش؟
اسراء: لا ... شنو كااين واش انا السبب
سحر: ماشي الحاج مات لبارح 
وقفات اسراء بصدمة: هاااه!!!! كيفاااش؟
سحر: ماشي مسكين مات مع الدبيحة ديال السبوع وسكتو ماقالوها لحتى واحد باش ميضيعوش ليحيى السبوع وينغصو ليه الفرحة ... باش تشووفي العاءلة كي دايرة والحاجة قالت ليهم ميعرف حتى واحد 
ااسراء: الصمت
سحر: كان واقف معانا صحة سلام وهز محمد امير فيدو فرحان بيه ورجع عطاه ليحيى وقاليه تهلى فيه ومشا جلس فبيتو بوحدو ... حتى دخلات الحاجة شافتو غبر ولقاتو مات الله يرحمو وسدات عليه الباب وجرات علي بووحدو قالتها ليه وبكى تاعيا فالبيت هوا وياها ورجع خرج بحال الى موقع والو ودبحنا وسمينا ودرنا العشاء للناس وكل واحد مشا ينعس عاد حسيت بعلي ماشي هوا هاداك ... فاش سولتو قالي راه الحاج مات الله يرحمو وهاد الصباح عاد قالوها لكلشي وصبح كلشي كيطيح وينوض .. وبلااا منقولك فاش هبط راجلك لقا الدنيا مقلوبة مافهم والو وبقا كيشوف فالناس وكمل ليه واحد الراجل دخل سلم عليه وقال ليه البراكة فراسك من جيهت الواليد تما جلس مصدوم ماعرف باش تبلا

سكتات اسراء وبقات مصدومة كتسمع لسحر شوية نزلو الدموع من عينيها وطاحت على الناموسية كتبكي فصدمة بحرقة وسحر كتشوف كتسكت فيها وتعنق واسراء كتزيد فالبكا 
سحر: صاافي دابا اللي وقع وقع ودعي ليه بالمغفرة 
جاوباتها اسراء بصوت متقطع : كان بحال با ... كنت حاسباه بحال بابا و كنت عزيييزة علييه بزاف وكيتهلى فيا ااااااااهىء اعىء اهىءاهىءاهىء 
سحر: نعلي الشيطان ... وشوفي راه امير كيبكي 
مرداتش عليها اسراء وبقات فبلاصتها كتبكي معنقة المخدة وكتمايل بيها ... خلاتها سحر ومشات هزات امير فيدها كتسكتو وكتبكي فصمت .. مابغاش يشكت ورجعات عطاتو لاسراء فيدها عنقاتو وجلسات تبكي وهوا يبكي وسحر كتسكتها 
سحر: اويييلي الولد غيموت بالبكى اسراء ... سكتيه قبل ميدخل يحيى بشوفو هاكا يبقى يغوت عاوتاني ماقادين على صدع... سبحان الله كيحضر غير فالاوقات الكحلة 
بدون جدوى ... بقات اسراء كيما هي حتى سكت امير كيرمش بعينيه فحضنها وهي كتبكي وتمايل ... حيداتو ليها سحر رجعاتو لبلاصتها ونوضاتها جمعات ليها شعرها وجبدات ليها جلابة زرقاء مغلوق وشال ازرق عكاتهم ليها وشدات ليها وجها كتمسحو من المكياج 
سحر: شووو صافي ... سكتي براكة من البكى عينيك تنفخو ... صافي سكتي ولبسي حوايجك يالاه نهبطو راه غيدفنوه مع العصر
ردات عليها بصوت مخنوق كتنخصص: ميخلييينيش يحيى ... وبغيييت نشوف بابا الحاج قبل مايهرجووه اهىءاهىءاهىء 
سحر: غير لبسي حوايجك ويالاه تهبطي معايا 
اسراء: ميحلينيش راه خلف عليا يقطع ليا رجليا 
سحر: راه غير كان معصب مغيقول والو وتهبطي معايا وتجلسي حدايا انا والزوهرة راه جات هي وبا يعزيو ... ميقدرش يهضر معاك 
اسراء: اهنننهننن ويلى غوت عليا قدام الناس ؟ ومحمد امير معامن نخليه؟
سحر: اسية غطلع تشدو ... مجاتش تبقاي هنا اسراء والناس كلشي لتحت غيقولو مالها متبغات تهبط ... والناس على سبة خصهوم غير مايقولو
اسراء: خفت اختي يمشي يجرني قدام الناس يدير ليا شي فضيحة والله تا نموت ليه تما ولا ندير شي كارتة ... نتي ماشفيتيهش كيفاش هضر معايا وجرني من شعري
سحر: اويييلي؟ على جرك من شعرك؟ كاااع!!!!
هبطت طالقة شعري شافتي وناض عندي وهربت لهنا ... كن ماهربيت من دار ليا شي فضيحة ... ومكيعقلش دتير كي شي تور
سحر: ما غيهضرش دابا ... (عنقاتها) وصاافي الحبيبة صاافي براكة من البكى ... وتوضاي باش دخلي تشوفي باك الحاج قبل ميخرجوه 
عنقاتعا اسراء كتبكي بحرقة وبقات معاها سحر حتى توضات وغسلات وجها ولباستها جلابة والشال وخرجاتها كتبكي

طلات من الفوق حدى باب بيتها شافت الفيناء عامر بالناس جالسين مع الحيوط فوق الفوكويات والكراسة ...تلفتات بان ليها يحيى جالس على كرسي فالطرف عينيه حومور كيشوف فالارض وولادو كل واحد فين جالس كيبكيو ... واحد اللحضة شافت الاحاجة خارجة من واحد البيت شادينها خواتاتها وكتمايل براسها وقفات حدا يحيى كتبكي تالفة كدعي وتطلب الله ... هز يحيى عينيه فمو وناض عنقها وضماتو وخبا وجهو فكتفها كيبكي وهي كيدوح بيه وكتدعي واحواء الموت كتبكي وكل واحد فين كيبكي . تراجعات اسراء خطوة اللور دايرة يدها على فمها كترعد وتبكي ودخلات للبيت خلات سحر تابعاها مافاهمة والو 
سحر: مالكي؟ يالاه نهبطو
اسراء: لالا اختي غير سيري خليني هنا اهىءاهىءاهىء انا شقت يحيى كي داير الى هبطت مغيعقلش عليا 
سحر: انهدات) انا غنهضر مع علي يهضر مع يحيى يخليك تنزلي 
خرجات سحر وبقات اسراء عاطياها للبكى حتى رجعات سحر 
سحر: نوضي يالاه صافي هضر معاه علي وقاليه قولها تستر راسها وتنزل 
اسراء: شنو قلتي لعلي؟
سحر: قلت ليه راه اسراء بغات الحاج الله يرحمو ويحيى حرم عليها تفوت الباب ومشا هضر معاه ... يالاه نوضي ما حد محمد امير ناعس وراه غيخرجوه دابا ... سربي
خرجات اسراء مع سحر نزلو وسط الناس ودخلاتها سحر لغرفة فيها الحاج مغطي بالكفن مجبد فالارض وعند راسو سامية وبنتو المزوجة كيبكيو و بعض رجال العاءلة واقفين . شافتو وبداو يديها كيرجفو وجلسات حداها كترعد وتبكي وعنقاتو مابغاتش تنوض وتبوس ليه راسو ، عراو ليه على وجهو شافتو ولسقات حداه حتى دخل يحيى وعلي يهزوه يخرجوه وشافها جالسة حداه كتشهق . نوضاتها الزوهرة وسامية بزز من حداها دوزوعا حدا يحيى مارداتش ليه البال وخرجوهم كاملين من تما بزز هي وبناتو . 
تهز الميت هزوه ولادو الاربعة مخرجينو والناس كطيح وتنوض موراه والحاجة غادية جاية كدعي هازة كفوفها للسمى 
الحاجة: يااربي ترزقنا الصبر ... ياربي تصبر ولادي يا حمدناك وشكرناك ياربي ...حمدناك وشكرناك يااربي حمدناك وشكرناك ياربي 
خرجات الجنازة ومعاها الرجال وبقاو النساء فالدار شي كيصبر شي وطلعات اسراء لبيتها بكات تاعيات وحمدات الله وجلسات حدا ولدها هي ومها وخواتاتها . فالعشية رجعو الرجال ودارو العشاء وتفرقو الناس وبقات غير العاءلة كل واحد فين مخشي متكي وتقلب البكا للضحك عند البعض منهم اسراء فمل مرة تسمع نكير الزوهرة على اسية كتغلبها الضحكة وترجع تشتغفر الله .
في جهة اخرى جالسة سامية مريضة حازمة راسها وسط عماماتها وخوالاتها كيسكتوها والحاجة كتهضر بحزن لابسة الابيض وتنصح فيها 
الحاجة: نعلو الشيطان ومتبقاوش تنوحو وحمدو الله وشكروه على كل حال. وربي يزقنا الصبر 
الكل مشا وكل واحد فين نعس .. طلع يحيى لبيتو بلا حتى كلمة مشا نيشان دوش وخرج طلق السجادة وطول فالصلاة ورجع هز محمد امير فيدو باسو واسراء متبعاه ساكتة ماقدراش تهضر معاه بقا فترة مع ولدو شادة فيدو من بعد حطو ودخل احدى اسراء عطاها بالضهر ونعس وكانه بوحدو فالبيت

دازت ايام على موت الحاج والرياض مزال مخيم عليه الحزن والناس مزال كتعزي ونهار على نهار كتعود العاءلة على فراق الاب وشي كيصبر شي وكل جمعة كيمشيو يزوروه فالقبر . وصلات الربعين ودارو الصداقة وشوية شوية بداو كيتأقلمو مع الجو واخا نزيف الجرح وفراق الاب عمرو مكينتهي . الايام كدوز و سحر كدير نوبتها مع فالشقا مع الكل وبينات حداكتها ليهم حتى ولات الحاجة فين ما تبغي شي حاجة ولا دير شي حاجة او كتشاور معاها وتاخد برأيها ، وهادشي مخلي سحر مرتاحة فحياتها معاهم ومتفادا المشاكل بالرغم من احتكاكات زوجات لوايسها معاها وحشيان الهضرة ليها . الحاجية راضية عليها عكس اسراء فكل مرة تشوفها كتعبس ومكيعجبهاش الحال وتبقى تعصب عليها . 
شهراين دازت والايام كطير ورجعات اسراء لعادتها القديمة والاعتناء بنفسها وبولدها هاداك هوا شغلها نهار كامل . خلات يحيى دخل معاها محمد امير للدوش ونزلات لتحت للكوزينة فين واقفة سحر كطيب الغدا وحداها الحاجة كتجمع معاها ... تلفتات هاد الاخيرة شافت فاسراء وهي دير يدها على جنبها 
الحاجة: ايوا نتي تعرفي غير تنزلي تاكلي؟ ماتعرفي تقلي حتى بيضة لراسك ؟
اسراء: وراه كنت مقابلة محمد امير
الحاجة: عطيه ليا نشدو .. ياك رجع كيشد راسو دابا ... اريه ليا وشمري على كتافك ونتي من نهار جيتي مادقنا من يديك 
اسراء: وا لاواع لا واه الحاجة هانتي بديتي عاوتاني ... مال سامية مديري ليها النوبة تاهيا بحالنا بحالها .. ولا هي ماعلهاش الله!
الحاجة: ساميا مزاالة فدار باها نهار تزوج تمشي لدار راجلها ديك الساعة تشمر على يديها ... ونتي كنتي بحالها فدار باك ودابا راكي فدار راجلك بيني لينا حنت يديك ... وطيبي لراجلك واش غايبقا مقابل ماكلة دالزنقة 
اسراء: سحر فاش كانت فدار با راه كانت هازة الدار كاااملة ماشي حتى جات لهنا ... وبحالي بحال سامية تنوض تاهيا دير يديها وندير يدس حتى انا 
شخر واقفة مور الحاجة كتندب حاطة يديها على فمها كتلمح لاسراء باش تسكت والاخيرة مخرجة عينيها حتى سمعات صوتو موراها وهي تسكت 
يحيى: شكااين؟ مالنا على الصدع؟
الحاجة: ايوا وليدي ماهنا زوااج...جبتي لينا هادي تخرج فينا عينيها ومعمرها دارت يديها فالماء
اسراء: نهار جيتي قالت ليك ماما مكنعرف ندير والو ... وبغيتيني (قلبات وجها ) وحتى دابا يلا طلعت ليكم راسكم نمشي بحالي 
شافت فيهم غضبانة بنص عين وخرجات 
الحاجة: هانتا كتشوف... كلمة جوج تقولك هاكا جبتيني ... انا بغيت ليك بنات الاصل ونتا ... 
قطاعاتها سحر: الله يهديك الحاجة راه بنت الاصل حتى هي ماشي شي وحدة جبتوها من برا...راه هي الصغيرة ماعندها عقل وماعرافاش الزواج وشوية بشوية غتعلم ... وراني دايرة حقي وحقها الحاجة الله يعطيك الستر متعايريش اصلنا 
يحيى: لالا زيدو كملو ... صافي دابا الحاج الله يرحمو مشا مابقيتو دايرين اعتبار لحتى واحد ... اللي كان جامعكم فهاد الرياض خوا... وليتو باغيين ديرو مابغيتو ... وحدين كيخططو بوحدهم يبنيو ويطلعو وماعرفت اش بغاو يديرو كاع ووحدين باغين يرحلو ويمشيو يفرقو ويدرو ما بغاو ... ونتوما هنا مالقيتوش اللي حدها ليكم ... صداعكم طالع كل نهار ... الحاجة ... انا نهار اللول جبتها هاكاك وقد كلمتي ... بغيتيها تنوض تخدم وتشقى حنا غنفرتكو هاد الرمانة فمرا باش متبقاوش مصدعين لينا راسنا ... اجي معايا الحاجة نهضر معاك فشي حاجة ضاوروية

خرجات معاه الحاجة دخلو للصالون جلسو فالصالون وسدو عليهم الباب 
الحاجة : ياك لاباس اوليدي؟
يحيى: الولد اللي كنت قلت ليك بغا سامية راه صدعني وهضرت معاه باش يدوز ليك مو تفاهمي نتي وياها وديرو المهار ولا ضبرو راسكم ... باش نخرج من هادشي انا وشوفوف نتوما شغلكم 
الحاجة: انشاء الله اولدي...يجيو مرحبا بيهم ... يخطبو بعدا ويدوز واحد العام عاد نفرحو بسامية ... وهي قابلة؟
يحيى: هي اللي قالت ليه اجي ... وغتكون دابا كتهضر معاه غير مابغاتش تبين ودايرة راسها مافراسها والو ... ماعلينا كاينة حاجة اخرى
الحاجة: شنو هي؟ 
يحيى: انا باغي نعاود نتزوج 
الحاجة: بصدمة) و اسراااء!!!
يحيى: هاهيا معاكم ... مغنتلقهاش ولاكن انا من خقي نتزوج او لا لا !
الحاجة: اييه من حقك ولاكن علاش ؟ مال اسراء؟
يحيى: مامالها والو ... غير بغيت نزيد وحدة اخرى 
الحاجة: وشنو ؟ بغيتي نشوفها ليك انا ولا حاط عينك على شي بنت 
يحيى: شفت واحد البنت ... وهضرت معاها وقبلات 
الحاجة: وشكون هاد البنت؟ واش ديال راسها ولا مطلقا ولا شنو؟
يحيى: محامية ... وهضرنا فهادشي وهي بنت عاءلة وعارفة عندي ولد و مزوج وقبلات 
حدرات راسها الحاجة: اييييوا ... شغانقول ليك اولدي ... الى كانو عيالاتك غيديرو لينا المشاكل بلاش من هادشي... هانتا كتشوف اسراء ماشي شي وحدة اللي سويهلة تقول هي وسحر ماشي خواتات وتزيد تجيب الثانية غادي نبقاو نصبحو على الصدع ونمسيو عليه
يحيى: لا...غنسكنها بوحدها واسراء هضري معاها ولا قلبي ليها على شي خدامة تعاونكم بلاصتها باش نتهناو من الصدع
الحاجة: ايوا حشومة هانتا كتشوف عيالات خوتك كاملين دايرين يديهم و مرتك نتا تجيب ليها خدامة !
يحيى: هادشي علاش تافقنا النهار اللول ونتي كنتي حاضرة ... مغنرجعش فكلمتي .. بغات هي منعا راسها تعاونكم هاهيا ... والحل الانسب اللي بان ليا هوا خدامة دير داكشي بلاصتها ... اما المرى الثانية مغتسكنش هنا ومغتلاقاش هي و اسراء نهاءيا

الحاجة: ايوا اللي عجبك ديرو ...نتا تعرف... فوقاش ناوي تقولها لاسراء ؟
يحيى: حتى دوز الخطبة دسامية ونشوفو ديك الساعة ... عاد غنهضر مع اسراء فهادشي
الحاجة: ويلى مابغاتش؟
يحيى: ماعندي مندير ليها ... بغات مرحبا مابغاتش الحل اللي يناسبها نديرو معاها 
الحاجة: يكون خير انشاء الله...نهار اللول قلت ليك مصالحاش ليك 
يحيى: وصاافي دابا هاد الهضرة ماعندنا مانديرو بيها كل واحد غيدير اللي يسلكو واللي كيرتاح فيه ... هاكي ها النمرة ديال ديك الولد تفاهمي مع الواليدة ديالو
الحاجة: انشاء الله 
عطاها النمرة وخرج طلع لبيتو لقا اسراء جالسة كتاخد فالسيلفيات ومشا حداها هاز سوارت سيارة فيدو كيهضر بجدية 
يحيى: ها الطوموبيل علاش هضرنا 
شافت فيه بدهشة: بصح؟؟ ديالي؟
يحيى: هادشي علاش تافقنا ... خديتي البيرمي ها الطوموبيل فاش طلقي يديك ... والرونج حتى نشوفك طلقتي يديك ديك الساعة يكون خير ... 
شدات الساروت وعنقاتو فرحانة كتشوف فالسوارت 
اسراء: ههه شكرا شكرا شكرا بزاااف اشمن طوموبيل هادي ههه
يحيى: فورد فييسطا فديمة شوية موضيل 2014 مازوط ... فيها غطلقي يديك 
اسراء: ههه شووووكرا حساب لي نسيتي
يحيى: مزال عند كلمتي ... ومكنساش 
غمزها وطلع حاجبو وخرج خلاها فرحانة بالسورات ... لبسات حوايجها ونزلات كتعوج هازة ولدها عطاتو لسحر وخرجات تبعات يحيى وراها فين كاينة الطوموبيل ... طلعات ليها فرحانة كتقلبها وتشوف وضحك عادي عسكو هوا اللي كيهضر بجدية 
يحيى: معلم سياقة اللي غيعلمك تسوقي فيها .
اسراء: فوقاش غنبدا؟
يحيى: غدا غيجي عندك لهنا... سيري دتبا للدار انا عندي مايدار (شاف فالساعة) مشغول دابا 
نزلات رجعات للدار ناشطة دخلات دازت حدى الصالون طاحت فودنها شي هضرة رجعاتها جوج خطوات للوراء وطلقات ودنيها كتسمع حديث داير بين سامية ومها 
الحاجة: واش نتي قابلة على هاد الولد غير نهضر معاهم يجيو؟
ردات عليها سامية حشمانة: وااغيير يجيو نشوفوه بعدا ويكون خير .
الحاجة: احياااني عليكم البنات ... كدربوها بنكرة وتمسحو السماء بليكة 
سامية : ههههه وييلي ضحكتيني ... وشحاال هادي باش هضر لينا يحيى عليه ومزال هاد الخطبة مابغات تجي
الحاجة: اممم (كدور راسها) ايوا هانا غنهضر معاهم كاع الى طولنا نديرو السبت الجاي يجيو صافي؟
سامية: انشاء الله
الخبر حرك قلب اسراء وصفار وجها وطلعات كترجف لبيتها غادية جاية تالفة مشات كرقات عليها وهزات تيليفونها تاصلات 
اسراء: اححمم .. الو كريم ... انا سامية
كريم: وايلي علاش انا غنساك احبيبة ههه عاد قطعت مع خوك قالي راه عطا النمرة لماماك باش تهضر مع الواليدة نديرو النهار ... بغيت غير نعزيك فالموت دباباك مكتجاوبيش وكنلقا تيليفون طافي
عضات على شفايفها فخوف وصدرها كينهج : مامشا معاك باس ... انا خاصني نقولك شي حاجة ضاروري 
كريم: اشنو كاسن مالك مخلوعة؟
اسراء: كريم اخويا ضاروري نقولك شي حاجة وهاد الخطبة مابقيتش باغاها ومابقيتش باغا نتزوج 
كريم: علاش؟ ياك نتي قلتي باغا وشحال وحنا نوجدو ودابا قلبتي رأيك؟
اسراء: اللي عندي قلتو وانيولي الخطبة فمرة ومتعاودش تاصل بيا 
قطعات وجلسات على الناموسية كتنهج ويديها كيترعدو ... دخلات للدوش غسلات وجها ويديها بالماء بارد وخرجات كتمسح وجها تلاقات مع سحر داخلة 
سخر: مالكي وجهك صفر؟ مريضة؟
اسراء: بثوتر ) لا ...مامالي والو شنو كاين؟
سحر: وجهك صفر وعينيك دخلو خلعتيني 
اسراء: كتضاهر بالفرحة) لا بلعكس ... هانتي شوفي يحيى جاب طوموبيل ههه
سحر: اسراء . . . جيتيني نتي ويحيى فشكل ... متبقيتوش كيما كنتو وحتى الضحك بيناتكم مابقيتش كنشوفو 
اسراء: لا بلعكس عادي مزيانين وحاب ليا الطوموبيل
سحر: حركات راسها) مزيان ... على الله تبقاو مزيانين ... انا خارجة انا وعلي تخرجي ؟ 
اسراء: لالا عيانة غير سيرو 
خرجات سحر ورجعات اسراء للتوتر ديالها ومشات جلسات حدا محمد امير كتخمم دايرة يدها على خدها وسارحة بأفكارها والطفل حداها كيفركل ويشوف فيها كيضحك ليها وهي كتبادلو نفس الضحكة بزز منها . جلسات حتى عيات وناضت هزات ولدها فيدها ونزلات بيه لتحت جلسات مع الكل فوق الطبلة ديال كاسكروط حتى طاح الضلام ودخل يحيى زربان داز حداهم شير بيدو لسامية 
يحيى: تبعينس نتي باغي نهضر معاك 
دخل وناضت سامية مستغربة تبعاتو للصالون وسدو الباب ، بقات اسراء كتشوف فيهم وشهات فتفكريها و رجع وجها صفار من جديد وبدات كتفتف حتى زلعات الكاس عاد توكضات وناضو كيجمعو الطبلة بالزربة والكتس اللي زلعات ... تسمع الباب تحت وهزات عينيها بخوف شافت يحيى خارج عادي وسامية وجها مر حشمانة حابسة الضحكة

مافهمات والو وبقات كدور فعينيها وكتشوف فوجوه الكل بتوثر وارتباك ورجعات ناضت دايرة ابتسامة صفرة هزات ولدها طالعة بيه فالدروج حتى كتخرج فيحيى قدامها شاف محمد امير كيضحك ليه وبادرو نفس الضحكة ودوز يدو بلطف على شعرو الخفيف الاسود الناعم 
يحيى: اجي عند بابا ههه 
عطاتو ليه اسراء هزو فيدو كيمشي ويجي براسو ويحيى كيبوسو فعنقو وفيديه وغادي بيه جيهت الفوطويات يجلس ، اما اسراء فطلعات نيشان لبيتها بلا متلفت دخلات وسدات عليها وهزات تيليفونها كتصوني على كريم من جديد والاخير مكيردش على اتصالاتها بالمرة ... حاولات حتى عيات بلا فاءدة وحطات التليفون بانهيار شادة البكية وحاءرة ... بقات كتفكر وتخمم كتحاول توصل لمخرج اللي يفكها من الوحلة اللي هي فيها ... فكرات وفكرات وفكرات وماوصلات لوالو من بعد استسلمات للنوم ورفضات تتعشا او تجلس مع شي واحد اخر . فاقت على صوت محمد امير كيبكي فالليل هزاتو بدلات ليه ليكوش ورضعاتو وحطاتو بينها وبين يحيى فايق كيلعب بيديه ورجليه ... طار ليها النعاس ورجعات تفكر من جديد حتى نعسات . الصباح حلات عينها بشوية شافت يحيى ناعس ومعنق محمد امير بيدو وهوا ناعس على جنبو ... اول ما طاح ليها فبالها فاش حلات عينيها هي الكارثة اللي وحلات راسها فيها . ناضت هزات تيليفون دخلاتو للدوش وحاولات تتاصل من جديد ... لاكن جميع المحاولات اللي دارت باءت بالفشل والتيليفون طافي ... خرجات مفس تقسلة وكأنها رمات حجرها وتكات على الحيط باغا تبكي مربعة يديها ... شوية سمعات صوت يحيى كيقرقب وهي تجمع التيليفون خباتو وغسلات وجها وخرجات دارت ابتسامة خفيفة فوجهو ومشات للروتين ديالها اليومي حتى تعاشات العشية وخرجات دوزات ساعتاين مع معلم السياقة ورجعات للدار لقات بنت كبيرة شوية فالسن جالسة معاهم كتهضر مع الحاجة 
الحاجة: ايوا نوضي ابنيتي شوفي شغلك ... وسيري مع حتدة توريك بيتك
اسراء: شكون هادي؟
شافت الحاجة عاقدة حجبانها: ايوا نتي يالاللة ماعندك كتاف .. جبنا اللي عندها الكتاف تقوم براجلك وبحوايجو وتصبن ليه وتحدد ليه وطيب ليه وظير النوبة مع البنات ... هالعار غير تبقاي لينا على خاااطرك ... (ناضت ) الله يخليها سلعة 
اسراء: حاااشاااك... ماجبتونيش من الزنقة باش تعايروني 
الحاجة: زيدي ردي عليا الهضرة ... داكشي اللي بقا ناقصك 
اسراء: ايوا حتارميني نحتارمك انا ماشي خدامة عندك .. ماجبتونيش خدامة عندكم 
الحاجة: اييييه ابنيتي زيييدي عطيينيا ... دايرين ليك الخاطر فوق القياس و مابقا ليك غير تسوطينا .. ولاكن غييير بلاتي ... هانتي غتفرجي خبارك يجيبوها اللخرين 
مشات الحاجة وبقات اسراء واقفة كتعيبها وتحول فعينيها . طلعات كيما العادة كتعوج فالدروج لقات يحيى وعلي نازلين كيهضرو ... دار ليها علي ابتسامة خفيفة وكمل طريقو هوا و يحيى وطلعات هي لبيتها 
يحيى: هانتا كتشوف اخاي علي ... همها الوحيد الرفاهية ... وكيما قلت ليك ... بغات الرفاهية خليها تعيش الرفاهية ونعيش انا حياتي كيما بغيت حتى انا
علي: حاول تهضر معاها بلاتي هي احسن 
يحيى: ضحك بسخرية) معامن غتهضر ! ديجا هضرت معاها وكنحاول نتفهمها ولاكن اخاي الخاطر مابقاش عندي ليها منكدبش عليك ... بحال الى مزوج بمونيكة حاطها فالبيت مكتنفع مكضر
علي: لا حولة ولا قوة الا بالله
يحيى: هادشي اللي عطا الله ... بغات هاد العيشة خليها تعيشها ... ولاكن باش نبقا حداها كنتفرج فيها بحال الى انا ماشي راجل راه ممسلكاش ... مغنفسد عليها مغنخونها ... والشرع عطا ربعة وانا ديحا مطلق ومكنرضش المطلقة الى طلقتها ... من الاحسن نتبع الشرع اللي عطانا الله ونحيب التانية .. واسراء هاهي معززة مكرمة وعاجبها الحال هه! 
علي: ماعندك زهر فالزواج امحمد ... نتا بغيتي الصغر و ...
يحيى: واش بغيتي الصغر نبقا نتفرج فيه اصاحبي واش بعقلك تا نتا تبدا تفكر ليا بعقل لعيالات ... خلينا من الهضرة بلا منبقاو نهضرو بزاف راه اللي عارف اش كاين

الحوار كان طويل بين يحيى وعلي خوه اللي كبر منو ... كونو الوحيد اللي متفاهم معاه وكيتناقش معاه فما خباش مشكلتو على علي واخا مدخلش فالتفاصيل . 
الروتين هوا الروتين الحياة فالرياض مستمرة واسراء مزالة كتحاول تتاصل بكريم حتى للنهار اللي دالخطبة . ناضت ككل يوم نزلات مافراسهاش شنو واقع . شافت كلشي ناشط وكيوجدو ويضحكو ... شدات فالحيط مستغربة كتشوف شنو واقع وصدرها كيطلع ويهبط بالخلعة واقفة كترجف حتى ماقداتش تشد راسها وجلسات سخفانة فوق الفوطوي كتفكر متوثرة 
سحر: اسراء؟ مالكي؟
هزات عينيها فسحر : شنو واقع؟ و و.. وو وواش الخطوبة؟
سحر: اه علاش مافراسكش؟ فين كنتي من الصباح وانا كنقلب عليك؟
ردات عليها بتوثر كترعد: كك .ككنت في هادا ... فسميتو فالبيرمي مشيت الصباح ورجعت . مشيت اسميتو ... هادا ... نيشان للبيت جلست تما ... ماقتلوش ليا اليوم الخطبة؟
سحر: حتى انا مافراسيش! تأ دتيرين داكشي حسي مسي بيناتهم ... حتى للبارح عاد قالت ليا الحاجة راه الخطبة اليوم ديال سامية 
اسراء: اوييلي؟ 
سحر: مالك نتي فير كترعدي شكاين؟ ياك لاباس؟ 
اسراء: شوفي بغيت نقوليك شي خاحة ضاروري 
سحر: مالك اش واقع خلعتيني
اسراء: يالاه يالاه ...يالاه لشي بلاصة نعاود ليك 
ناضت بالزربة كتفتف دخلات مع سحر لبيتها وبدات كتعاود ليها وترعد وتفرد يديها مع بعضياتهم وسحر حاطة يديها على حناكها حتى سالات 
سحر: اوييلي يا اسراء واش مابغيتيش ديري عقلك؟ واش باغا تخرجي عل راسك وتشفي فيك العاءلة كاملة ... من بعد ما كلشي ضارب ليم الف حساب غيوليو يشوفو فيك شوفة فشكل 
شافت فيها اسراء بعينين عامرين بالدموع : عافك فكيني .. ديري شي حاجة انا وحلت ... مانويتش غنوصلو لهادشي كاامل .. ملشي غلطة فغلطة وكلشي تقلب ضددي 
سحر: عيييت فييك ونتي مكتسمعيييش... عطا الله ولد الناس ممقصرش من جهدو عليك حافضي علييه وعلى عاءلتك وضربي حسبة لولدك راك مابقيتيش بوحدك ... دابا اللي عطا الله عطاه ميمكنش نخرج عندهم نقولهم وقفو هادشي ... علي يلا قلتها ليه غيقولها ليحيى ويحيى غيدبحك ولا غيسيفطك لداركم 
اسراء: وشنو غنديرو دابا اهىءاهىءاهىء 
سحر: بارتباك ) ماعرفتش اختي معرفتش ... تلفت مابقيت عارفة راسي من رجليا 
اسراء: غنمشي نقول ليحيى كولشي من اللول حتى للخر واللي بغا يوقع يوقع . 
سحر: كان عليك من اللول تقولي ليه 
اسراء: حتى دابا ماعندي ماندير وحتى داك الزمر كنعيط ليه مكيجاوبش مرضني فحياتي مكنعس مكنشوفو وحتى الماكلة مكدوز ليا بكترت التخمام 
سحر: وانوضي دااابا قبل ميوصلو الهرين وتوقع شي فضيحة ... راه ميرضااااااش تحطيه فداك الموقف قدام خوتو و عيالاتهم وقدام الناس... وتوقعي منو اي حاجة ديك الساعة 
اسراء: انا غنمشي عندو دااابا 
ناضت كطير خرجات من البيت طلعات لبيتها مالقاتو لقات غير محمد امير ناعس ونزلات كتحري فالدروج بالصندالة خرجات فحادة نيشان
اسراء: بلهفة)فين يحيى؟
حادة : مالك اش كاي راه لتحت مع الناس 
اسراء: هرجات عينيها: اينا ناااس؟؟؟
حادة: اويلي مالكي؟ الناس اللي حاز يخطبو سامية .. راه تما الحاجة وعبد الحفيض وعلي وسماعيل وكلشي لداخل 
اسراء: اويييلي جاااو؟
حادة: جااو ونتي مافراسك مايتعاود 
كملات اسراء الجري ديالها فالدروج حتى للصالون الكبير سمعات الهضرة لداخل و وقفات مغمضة عينيها مور الباب الكبير الخشبيى ديالو كتنهج حاطة يدها على صدرها وكتستاعد دخل عندهم . جمعات القوة ديالها كاملة ودخلات على الكل ...

دخلات لقات كلشي جالس كريم وعاءلتو ويحيى وعاءلتو . شافت الكل مستغرب من الدخلة ديالها وهيا دير ابتسامة متوترة وبدات تسلم ، وصلات حتى لكريم ابتاسم فوجها وهي تمد يدها سلمات عليه ومخرجة عينيها فيه ودازت على كلشي بالسلام ثم مشات جلسات حدا يحيى متبتة وساكتة كتسمع للكل كيهضر وكيتناقشو 
يحيى: ايوا السي كريم ... عرفنا عليك شوية .. وفاش خدام 
كريم: انا خدام فصونطر دابيل ... حاليا على بيدمن لقيت ماحسن
يحيى: الله يوفق 
كريم: اما بالنسبة للسكن ههه راك عارف كلشي كيبدى درجة درجة حتى يحن الله 
يحيى: ايوا نتوما تعرفو ... ياك هي قابلة؟ ايوا مانزيديكم غير الصلاة على النبي
ام كريم: ايوا فين هي عروستنا نشوفوفها 
شافت اسراء فكريم لقاتو حاضيها وبدات كتحرك عينيها وراسها بالنفي والخوف متملكها ... هضرات الحاجة مع حادة للي داخلة هازة البلاجو فيديها 
الحاجة: سيري جيبي لينا سامية 
اختفت الضحكة فوجه كريم وبدا كيبان على وجهو الاستغراب وعلامات الاستفسار وكيشوف جيهت الباب ويرجع يشوف فإسراء اللي كدور عينيها بتوثر .. حتى بانت ليها الخدامة اللي جابو جديدة وهي تهضر بصوت مرتفع شوية مع ابتسامة خفيفة 
اسراء: سيري جيبي ليا ولدي غيكون فاق
الخادمة : واخا 
زادت علامات التعجب والاستفهام على وجه كريم و شاف فأسراء كيسألها بعينيه ... قلبات وجها كترعد وتبلع فالريق مخشية فيحيى وهوا بدورو داير يدو موراها على المخدة ... شوية دخلا سامية حانية راسها لابسة قفطان وبداو الزغارت والصلاة على النبي ومشات هازة التمر كدوزو عليهم وكريم كيشوف فيها عاقد حجبانو ويرجع يشوف فأسراء ... جلسو سامية حداه وفنفس الوقت دخلات الخادمة هازة محمد امير فيديها عطاتو لاسراء وهوا كيفركل برجليه ويضحك ليحيى
يحيى: ههه بغيتي تجي عندي؟ يالاه اجي
هزو يحيى باسو وشدو عندو وتلفتات اسراء مرة اخرى كتشوف ردة فعل كريم لقاتو مصدوم حاني راسو وهاز عينيه فيها بغضب . مدار حتى ردة فعل ... بقا ساكت وكل مرة يشوف فإسراء بغضب وحقد حتى دازت الخطبة وركبو الخواتم عاد تنفسات اسراء الصعداء وخرجات من المجمع كتنفس وموراها سحر تابعاها
سحر: اجي .. هااه هاديك ااه ... اجي لهنا 
اسراء: تلفتاة) هانا شنو؟
سحر: كي درتي ليها ؟
اسراء: ههه صافي تهنيت وحتا هوا متلقا ميقول ... سلك الجرة
سحر: وهاادي دير ليك الراس ... هانا فين كنعلمك 
اسراء: التووبة ياختي عمرني نعاود... كنت غنتشوه شوهة انترنتسيوال 
سحر: وا تكمشي دابا 
رجعات الحياة لاسراء بعد ما طلعات من الحفرة اللي طاحت فيها ورجعات ليها رشاقتها وضحكتها وفرحتها ومشات جلسات قدام المرايا كتغني وترش الريحة مور ودنيها حتى سمعات تيليفون كيصوني ومشات هزاتو بكل انوثة كضحك 
اسراء: الوو وي؟
كريم: ماصدقتيييش وضحكتي عليا ... طلعتي مزوجة ووالدة وجالسة كتقولي ليا خويا 
اسراء: قلت ليك متجيش ونتا اللي بغيتي تجي 
كريم: شوفي دابا من هاد الهضرة كااااملة انا خديت نمرت سامية الحقيقية ياااك ودابا غتخرجي عندي نهضرو ولا غنعيط ليها داابا نعاود ليها كلشي 
اسراء: شوف اخويا انا مرى مزوجة وعندي ولد بغيتي سامية الله يسهل عليك معاها مابغيتيهاش قولها ليها وقل ليها اختي الله يعاون بلا مدخلتي انا فهادشي وتخرج ليا على داري 
كريم : بربي وماجيتي دااابا حتى نعيط لراجلك اللي فدقلتي ليا خوك ونفركع معا هاد الدلاحة ... نتي اللي شفتك ونتي اللي هضرت معاك ونتي اللي قلتي ليا نجي 
اسراء: تفووو على بشر صافي صافي هانا غنجي نحلو عاد المرض هادا 
كريم: تلقايني فالقهوة اللي مور الشارع ديالكم 
اسراء: لا خويا ننا نييت باغي تشريها ليا فالحكل ... بعد شوية بعيد غنتلاقاو فالجردة اللي فكيليز يالاه باي

قطعات ولاحت تيليفون فوق النموسية بعصبية وربعات يديها كتفكر وتخمم تا عيات وحلات البلاكار جبدات حوايجها بالزربة عبارة على سروال اسود لاسق وديباردور ابيض وكاش خفيف شفاف واسع فالابيض والاسود والرمادي محلول من القدام وصندالة عالية فرجلها وصاك فيديها ، جمعات شعرها كيما العادة بمقبط وخلات اطرافو نازلة ولافخونش من القدام هابطة ودارت مكياج خفيف وبارفان وهي كتغني تاثقة فراسها .. نزلات كتعوج فالدروج ختى للتحت وبدات كتمشى بالزربة كيما العادة كتعوج بكل تقة فالنفس . طلاقات مع الحاجة فالباب وقفاتها 
الحاجة: دخلنا عليك بالله واش دابا هادي هيءة وحدة مزوجة؟ 
ردات عليها كتهضر بالزربة : وشنو بغيتيني ندير نلبس جلابة ونخرج مكشترة حالتي حالة جارة كروسة باش تبان عليا مزوجة؟؟ 
الحاجة: ومالها جلابة وديري الشال على راسك ... فين خارجة بعدا؟
اسراء: عندي مايدار مامشلياش دابا للهضرة حتى نرجع ونهضرو .. حيدي خليني ندوز 
دازت كتفرفر خرجات وخلات الحاجة كتفقص . مشات ركبات قالطونوبيل وهي مزالة كتعلم ومعلقة التسعين ... ديمارات وساقتها بوحدها ومشات .
دخل يحيى للرياض هوا وعلي كيهضرو وهي تعرض ليهم الحاجة 
الحاجة: غير قولي اولدي ا يحيى اش غنديرو مع هاد المرة ديالك؟
يحيى: شكاااين عاااوتاني؟ 
الحاجة: سرحات يدها كتحسب فصبعانها) مااتحتاارم اللي كبر منها ... ما ضاربة حسااب اللي ساكن معاها ... وهازة هم لا لودلدها ولا لحتا واااحد 
يحيى: تنهد) الله يرحم ليك الواليدين الخاحة عنسنا من هاد الصدع ... علاش مقابلاها نتي مااع خليها تشرق ولا تغرب كيبغات ... ياك الخادامة دايرة شغلها ايوا هنيييونا من هةظ الصدااع وااه! 
الحاجة: انا اولدي مرارتي غطرطق على الخاطر اللي داير ليها كتر من القياس ... فاش جاتها فاش ... لا حداكة لا صواب لا حتى حاجة ... راه مابقاااتش فالزين راه كلشي ولا زوييين دابا 
يحيى: الحاجة .... واقيلا كترتي وهادشي بدا كيطلع ليا فالراس ... ديما كتشكاي وعمرها جات تشكات منك ولا من شي واحد فيكم ... خليونا نعيشو هانيين وباراكة علينا من الشكاوي يكفي المشاكل اللي دايرينها ولادك باغيين يدعيونا فالمحاكم على قبل دوك البزارات اللي خلى الواليد ... واش هادشي مكيفركعش ليك المرارة ؟ حاضيا اسراء جات اسراء مشات و الاهم من هادشي كاع ممسوقا ليه... حق بناتك باغيين يسرطوه ونتوما مصدعين لينا راسنا بالخوى الخاوي
الحاجة: انا مفهمتش علاش كتحي من جيهتها مفهمتش .. اشنو دايرة ليك ها د المرة حتى عمات ليك البصيرة
يحيى: الحاجة والله مامسالي لهادشي ... راسي منفوووخ معنديش فين نزيد شي حاجة 
علي: الحاجة يهديك الله راه عاد كنا مع الضابطة طالعين نازلين من اللي آمر الله بالصباح وحنا كنجريو على هاد الورث اللي مشكلنا فحياتنا ... وكن جات مع البراني كوراه فكينا الروينة شحال هادي منحتاجوش كااع لحريق الراس... المشكيلة دابا مع الخوت كي غنديرو ليها وهما مابقاو عارفين خاوا ولاو باغيين يسرطو كلشي ... فعوض ماتهضري معاهم نحلوها بلاتي هي احسن حضايا الخوا الخاوي
يحيى: فين فين هي داباب فين
الحاجة: رااها خرجات دلع عاوتاني 
تنهد وجبد تيليفون كيصوني 
يحيى: فييينك؟
اسراء: فالصالون شنو ؟
يحيى: بعصيية)صافي الله يعاون ...(شاف فالحاجة) راها فالصالون ... عاوتاني اجيو فرعو لينا راسنا( مشا )
شافت فيه الحاجة غادي : وااااكون غييير طلقتيني علييهااا وتفرج 
رد عليها من الدروج كيسوط: منك ليهاا ماتجيوش تشكيو عليا ...
✋البطلة خايبة ولا زوينة القصة هاكا دايرة و حتى واحد ما ملاك ... وكل واحد وعيوبو ومل وحدة فيكم وانا معاكم فيها عيب والى مفيقوهاش الناس بيه عمرها مغتشوف عيبها .. كل واحد عيوب الناس وينسى عيوبو ... كل بطلة وشخيصتها وبما اننا ولفنا البطلة تكون سادجة وغبية والبراءة المسطنعة اللي هي مكيناش اصلا فالواقع ديك البطلة داكشي علاش كلشي كره البطلة.

مشات سايقة وخايفة دخل فشي واحد حتى وصلات للجردة وعطات للكارديان سطاسيوتة ليها الطموبيل ومشات عاقدة حجبانها زربانة لقات كريم واقف كيتسناها 
اسراء: هانا جيت اش باغي؟
كريم: هه اش باغي؟ شدوك الفعايل درتي معايا؟ والمانيا و غاديا بلليل وجيتي للعرس!
اسراء: طلعات حاجبها) المانيا! نتا اللي طماع سمعتي الخارج خرجو عينيك ... وزايدون انا كنت مخاصمة مع راجلي ولعبت ديك اللعبة ماحسابش ليا كلشي غيتفهم بالمقلوب
كريم : اييه ودايرين طريق ... دابا بلا متخرجي فعينيك وغير بشوية راه بنادم كيشوف 
اسراء: مهم عانا جيت قول داكشي اللي باغي تقول 
كريم: اجي نجلسو فشي بلاصة هنا ونشوفو كي نديرو نحلو هاد الحريرة اللي طيحتيني فيها مع عاءلتي ... انا ماباغيش اصلا ديك البنت باغيك نتي
اسراء: انا مزوجة وعندي ولدي واش تسطيتي؟ وزايدون عاءلتك مكانوش عارفين شكون هي العروسة حتى جاو يخطبو .. ايوا صافي كمل دينك معاها ياك نتا باغي غير الفلوس ايوا راه غتشد الورث وترفح ليا مع راسك يالاه اش بغيتي كتر
كريم: اجي بعدا نجلسو ونشوفو 
تمشات هي وياه كيتجمعو حتى لواحد الكرسي وجلسو ... دارت رجل على رجل وحطات صاكها على فخادها 
كريم: ماقلتيش ليا سميتك بعدا
اسراء: شعيبية ! ونتا مالك ومال سميتي ياك ... صافي دابا اللي عطا الله عطاه ومعندك فين تهرب ... من الاحسن تزوج بسامية ودير موراها لاباس
كريم: اممم ... بااينة فيك قوييفزة مع راسك ... واخا لاللة حتى نضر ... ومزيان مللي جيتيني من اللخر 
اسراء: شوف الله يرحم باك بلا متزوق ليا فالهضراا .. ونزوق ليك فداكشي ونطولو الموضوع اللي اصلا انا عارفاك لاياش باغي توصل ... فمن الاحسن اسيدي تزوج ليك بسامية وهني راسك وهنيني 
حط يدو على كتفها بابتسامة وقرب بغا يبوسها: بلا متعصبي .. انا غندير داكشي اللي قلتي 
اسراء: ناضت وقفات )اييييوا سيدي جمع راسك ... مزيييان تبااارك طوالو يديك ... سمع نقول ليك جوج كلمات ... ها الحل قدامك صوفي راسك ... وسامية ماشي شي وحدة خيبوعة باش ترفض ... وفوق هادشي كااامل بنت عاءلة وحصل ليك الشرف تناسب معاهم ... وديك الساعة متبقى تبان ليك لا المانيا لا عبو الريح . وانا اخر مرة تاصل بيا وتصدع ليا راسي ... نزيدك .. اللي عجبك ديرو بغيتي تعيط لراجلي عيط ليه وقولها ليه .. انا مكنعرفكش وعمرني شفتك هي سطاش واجي دابا حيدها ليا من فمي
طلعات ونزلات فيه وقلبات وجها ومشات كتكسول زربانة خلاتو واقف كيحرك راسو ويهضر بوحدو
كريم: عند بالك مطورة ... هانتي غتشوفي اللعب على اصولو 
خرجات من الجردة مالقاتش الكارديان وطلعات كتردخ فالبيبان بغات تخرج الكوموبيل والشارع موراها عامر .. حركاتها اللور وهي تقيس سيارة ونزل مولاها كيغوت وهي تنزل ليه معصبة 
الراجل: الاااللة واش عورة؟ واش مكتشوفيش موراااك؟
اسراء: ونتا مكتشوفش معلقة التعيسن قدها قد راسك ودايرز مدرم مورايا 
الراجل: واسيري حتى تعلمي عاد سوقي ونتوما اللي شدات البيرمي كتنوض تسوق 
اسراء: ههييي اسيدي حتارم راسك ... ماشي شرفتي هترتي ولاو كيبانو ليك الطرقان عوجين وجاي تفهم عليا 
وقفات كتقلب الطوموبيل من اللور : غتصلحها عاد غتمشي فحااالك 
الراجل: لا مزيااان تبارك الله داكشي اللي بقا .. ضهسي فيا ونخلص الخطية!!! واااطرنييي هادشي مطبووخ عندك 
اسراء : نتا اللي فوتييف ونتا اللي غتخلص ... ولا نعيطو للبوليس حنا كاااع 
خرجات امرأة من السيارة دالراجل كتغوت: ايوا هادي هيااا ضربني وبكا سبقني وشكا !!! واش نتي داخلة فينا وزايداها بتخراج العينين ... عيطي لهاد البوليس 
غوت الراحل على مرتو ودخلها للطوموبيل كيزعف بصوت خافت واسراء واقفة كتشوف اللور فالزاحة ديالها مهرسة ووصلاتها الهضرة 
الراجل: ها الخرجة الملاوطة ديالك فين وصلاتنا .. هاد المرة بقاي تسدي فمك واش انا مزال مخلصت لاصورانس ونتي كتقولي ليها عيطي للبوليس
شافت فيه اسراء بنص عين : اسيدي .. اجي ياجي فك حريرتك اللي درتي معايا ... ولا يجيو البوليس يفكوها 
الراجل : سمعي الاللة ... نتي درتي الغلط غتعطيني باش نصايب طوموبيلتي ونبينا عليه السلام 
اسراء: شنوووو!!! راه نتا اللي غتعطيني باش نصلح ديالي ... ولا عرفتي شنو راه البوليسي فالرومبوان يجي يفك هاد خردولة 
الراجل: صاافي صاافي بلا مشاكل .. ها 200 درهم سيري بدلي الزاجة 
اسراء: 200 درهم! 600 درهم السي قالك 200 درهم ! سحاب ليك غنشري بولة للكولوار ولا شنو ؟ راه طوموبيل عادي 
الراجل: لا الاه الا الله. 500 درهم كافيا ؟
اسراء: يالاه طلق راه مزروبة 
جبد الراجب 500 درهم عطاها ليها وطلع فالطوموبيل كيبرد الجنون فمرتو ومشا وطلعات هي كتنكر بوحدها رمات الفلوس ادحداها و خرجات الطوموبيل مضروبة ومشات طالقة الموسيقة راجعة للدار حتى كيوقفوها البوليس فالطريق

وقفات للبوليس كتفرنس هبطات الزاج لقات واحد شاب باقي صغير وبقات كضحك 
اسراء: ههه تبيع ولا تشري؟
البوليس : هههه السلام ... الوريقات الاللة 
اسراء: مالني اش درت 
البوليسي: مدايراش السمطة ... اري لينا الوريقات نشوفوهم 
مدات ليه الوراق كتفرنس : ياك هما هادوك كاملين
البوليس عندك مخالفة قدرها 300 درهم 
اسراء: هاك هاهيا 
عطات ليه من الفلوس اللي ششتتات حداها بالزربة
البووليسي: وا فالصراحة ماكناش بغينيا نرزيوك ف 300 درهم كاملة.
اسراء: ههه لا غير رزيني ... ارى ليا الورقة دالمخالفة 
دارو معاها الاجراءات ورجعو ليها وراقها وطلعات كتفرنس .. فاتتهم وهي تجمع الضحكة وبدات دعي
اسراء: ولاد الكلاب باغي قهوة والله طاحت فكرشك ... هه! قالك مابغيناش نرزيوك باااز.... تزعل وانا اللي منك زعلااان🎶🎶 تكصا وتجرح فلبي مغلييك 🎶🎶
مشات كتغني مع الموسيقة لرجعات للرياض ووقفات كدق فالباب ... خلات ليها الخدامة الجديدة وهي تهرج فيها عينيها 
اسراء: عاااام باش تحلي الباب !!! اش كنتي كديري ... شدي تبعيني لفوق 
عطاتها الساك ومشات كتكسول طلعات لبيتها وبدات تخيد فحوايجها 
اسراء: محمد امير رضع؟
الخادمة: اه رضع
اسراء: بدلتي ليه ؟
الخادمة: اه بدلات ليه الحاجة وراه عندها 
اسراء: تلفتات لابسة ديباردو ابيض عريان) سيري جيبي ليا شي كاس دالليمون 
يالاه بغات تكمل هضرتها وصلها مسج ... هزات تيليفون حلات الواتساب لقات تصاور ديالها كتمشى هي وكريم فالجردة وجاللسين كيهضرو ووحدة اخرى فيها كريم قريب منها باغي يبوسها ويدو على كتفها قبل متنوض تحيحي عليه .. مباشرة وصلها مسج " نزيدك ولا باقي؟ هههه" خرجات عينيها ومشا اللون فوجها وبدات كترعد وتفتف واقفة بوحدها 
الخادمة: مالكي ؟ مدام اسراء!
هزات اسراء عينيها بغضب: شبااااقا كديري هناا ؟ ... خرجي جيبي المشمااااش ولا الجااايحة اللي ضربك .. براااااا
تلفات الخدامة على الوقفة ومشات كتجري وبقات اسراء حاطة يدها على جبهتها كتمشي وتجي مخلووعة وكتبلع فالريق

كرزات على سنانها ودارت يديها على جنبها كتمشي وتحي وكتصوني فالتيليفون 
اسراء: هاهاهاها كتفرنس ؟ ... سمع سمع نقول ليك واحد الحاجة ... راك غااالط اولدي والى بغيتي الحبس وريه التصاور ... يالاه الى سميتك راجل وريهم ليه حساب غنمشي فيها غير انا ... راك حتى نتا وجهك باااين وكمارتك وااضحة وراسك كي الراس عند بالك مطووور 
كريم: نوصل معاك فين مااابغيتي ... مالكي كترعدي دابا ... غير شفتي التصاور ونتي دوخي فين هوا تخراح العينين
اسراء: هههه شوف شوف غييير وريهم ليه وتفرج اش غيخرج منك ... هاد سخونية الراس اولدي كااملة غيخرجها منك ... نتا خدام وباقيي صغير باغي تلعب هاد اللعب ... ايوا لعبو كاملين 
كريم: اهااااه !!! ساااهلة ابنتي تخربيقة على الوجه ديالي ويبقا وجهك نتي يالاه 
اسراء: هههههه عاد عرفتك مكلخ ... واش نسيتي بللي راك سيفطتي ليا التصاور وهاهما عندي دابا ... باين وجهك ! ديرها قبل متسيفطهم المكلخ .. ونفرضو كاااع خبيتي وجهك ... راه غيسولوني شكون هاداك ونقول ليهم فلااان ... وديك الساعة انا غنخرج عليك نتا اللي كدور بمرت الراجل والله تا تشد فالحبس ويتوسخ ليك الضوسي وهانتا خرجتي على حياااتك يالاه (دخلات الخدامة) حطي الباكور وخرجي درقي عليا وجهاااك
كريم: غا بشوية اختي غا بشوية مالكي على هاد الصدع !!
اسراء: سمع نقوليك .. انا قلت دابا شنو كاين بغيتي تلعب لعبك لعبو وعرف راسك راك مصور وخريزو كيتسنا فيك يالاه الله يعاون .
قطعات عليه وخرجات طلات من الفوق كتعيط
اسراء: جمعاااا جمعاااا 
ردات عليها الخادمة من لتحت : نعام الاللة؟؟
اسراء: طلعي دااابا تكوني عندي هناا ومحمد امير معاك 
دخلات للبيت جلسات ف المراية كتجمع شعرها وتعكر . دخلات الخدامة هازة الطفل عطاتو لاسراء 
اسراء: بهدوء) جبدي داك الماريو طويييه راه مرون .. (غوتات بصوت مرتفع وعينيها خارجين) يااااالاااااه
نقزات جمعة من بلاصتها كتجري مشات كطوي الحوايج واسراء هازة ولدها فالسما كتبوس فيه وهوا كيضحك ويفركل 
اسراء: هااااني مااامااا هانييي الحبيب دمااما ياختي ياختي يخليييلي الزيييين 
الحاجة: دخلات : هبطي نتي لتحت خدمتك لتحت ماشي هنا 
اسراء: بميوعة) جمعة الماريو يتطوا كامل 
الحاجة: سمعي نتي ... راه هضرت مع يحيى على هادشي اللي دايرة ... وقالي منك ليها وا داابا غتنوضي تحركي من هاد البيت وتهبطي لدوك المعامن ونتي اللي غتغسليهم ... يالاه تحركي

اسراء: ايييه مزيااان ملي قال ليكم منكم ليا .
الحاجة:يالاه تحركي 
اسراء: واخا غير سيري هانا جايا ... نعس محمد يحيى ونهبط 
الحاجة: اريه ليا ونزلي تحركي
اسراء : هاكي. (شافت فالخدامة) يالاه نتي تحركي 
نزلات خي والخدامة والخاجة عجبها الحال وطلعات راسها للسماء و تبعاتهم هازة محمد اكير فيديها .
وصلو للكوزينة دخلات جمعة واسراء عوجات الطريق جيهت بيت سحر وخلات الحاجة كتغوت وتعيط . 
قلبات الدورة ورجعات لبيتها كتسوط وطل على الحاجة من الفوق وترد عليها 
اسراء: هاا هيا بنتك تغسلهووم ... مالها هي محنية يديها باش نغسلهم انا ... وديك الماكينة دالماااعن اللي جايبين علااش شاريينها ولا كتكتاصدو على الضوء !!! 
هزات الحاجة راسها: معصبة) ويلاااا بقاااات فيييك هااااااهياااا ... احي وشمي لياااااا سمعتي ... سااااااميااااا ... ااا رشييييدة 
اسراء: مغاديش نخاااف منهم اللي سميتها مرى طلع عندي 
خرجات ساميا كتجري وتكفض على يديها : متعصبيييش امي انا غنفرجك فييها . . . حسااابها قطعات الواد ونشفو رجليهااا 
اسراء: وسييييري انعسي تيقتي راااسك مخطووووبة شكووون يقبل عليك يا المحروووقة 
طلعات سامية كتجري فالدروج بحال التور .. اما اسراء دخلات وسدات عليها وخلات الباب غيفرح بالضرب والركل ديال سامية والمعيور ... جهدات فالموسيقى حتى مابقاش كيتسمع ليها المعيور وجلسات كتسب وتعاير فير بوحدها ... شوية نقصات فالصوت وسمعات الصدع لتحت وخرجات طلات لقات رشيدة وسامية محاميين على سحر بالمعيور وسامية قلبات الطبلة فوجه سحر وبغات ضربها ... خرجات عينيها ودخلات كتجري جمعات شعرها ولوات عليه زيف حياتي ونزلات مع الدروج حفيانة نقزات لسامية على شعرها وجرات مع الارض وبدات كتركل فيها مخلاتش ليها فرصة في تنوض ... ناض الصدع بغات رشيدة تجر اسراء من شعرها وشداتها سحر ضربات ليها نتفة وبقات الحاجة واقفة كتغوت هازة امير فيديها والخدامات كيفكو حتى دخل ولدها الكبير كيفك وبقاو كيتعاسرو وينهجو ودفعو اسراء طلعات لبيتها بشعرها محلول فالسماء وشادة زغب سامية فيديها وسحر ورشيدة كدالك ... فرتكو المجمع وكل واحد فين تكمش كيغوت بوحدو . دخلات اسراء لبيتها ومعاها سحر كيجمعو شعرهم
اسراء : بنت الحرااام ... ااا مسحت بيها الرياااض 
سحر: اش دانا لهادشي .... انا كن ماظيم بنت لخرام شفتها غتنقز ليك على شعرك ونتي معنية كتجري فسامية والله ما كنت غنضارب تفوووو
اسراء: هاديك تاهيا راه واااحد بنت الحرااام تاهيا ... دابا شي نهار نتفها 
سحر: تفووو على كنس كيتحاماو 
اسراء: كي الدبان بنات الحرام ... شحااال هادي وانا شهوتي فسامية ندكَ مها شي دكَة نييت 
سحر: دابا غيجي علي ويحيى و اواك للفراجة ... كلشي غيبدا يشكي 
اسراء: يشكييو ... طزز مهم نتي فاش يجي علي مسحي السماء بليكة ... ماضاربنا ما ترايشنا هما تحاماو علينا ... نتي علي غيفهمك انا اللي يحيى غيحيح عليا ... غيجي يلقاني جامعة باليزتي وواقفة فالباب نسبقها ليه قبل مايبدا يغوت

ناضت بغات تخرج باليزتها ورجعات فكرات ورداتها بلاصتها وهزات برودوياتها دخلاتهم للحمام تحممات وخرجات دهنات لحمها ونشفات شعرها ، لبسات شوميز دونوي وبينوار طويل سترات راسها وخرجات طلات من الفوق على الفيناء شافت محمد امير منعسينو فالارض فوق الزربية ومفرشين ليه كيفركل والحاجة حداه كتعاود ليحيى وعلي على المدابزة ، عوجات اسراء سيفتها وتمات نازلة تجيب معاها محمد امير حتى وقفاتها ضحكة وحديث خافت بصوت رشيدة وسعاد. رجعات بللور وطلات من مور الحيط قاطعة الحس كتسنط عليهم 
سعاد: بودني سمعت الحاجة كتهضر هي وعلي ههه ... سكتي مضحكيش بالجهد غيسمعنا شي واحد 
رشيدة: ربي ربي واش بصح ... بغيييت نبرد جنوني فالبرهوشة ونسمعها مزياااان 
سعاد: ماشي دابا خلي حتى تفركع الرمانة 
تدخلات اسراء دايرة يدها على جنبها : وش وشوش وش وش من الصباح ونتوما توشوشو اشمن رماتة رمانة غتفركع؟
رشيدة : هههه على مفراسكش؟ ايوا الرياض كلو فراسو
اسراء: ابتسامة صفراء ) هيي لا فراسيشاي الحبيبة
نخزات سعاد رشيدة تسكت والاخيرة حطات يديها على جنابها كتشفى
رشيدة: ايوا راجلك ناوي يتزوج عليييكي ياروووحي ونتي نايمة في دار غفلون!! هههه هانتي غتجي لاللاك ضرتك حبيبتك ونتي غيرميك براا
اسراء: هيهيهي هاداك راجلك اللي غيديرها ليك ماشي راجلي ... هه! زوييينة هادي مالقيتي باش تبردي قلبك احبيبة عااااذراااك 
رشيدة: ايوا سوليييه ... وشوفي ... بقيييتي فيا امسكيينة
مشات اسراء كتعوج: بردي على قلبك احبيبة بردي ... مغنجاوبكش ... مشي
طلعات لبيتها سدات عليها وهي تخرج عينيها : ايييه يااا ولد الحراام طلعت ليك فراسك !!! واخاااا السي يحيى 
دخل شاعل مع الباب هاز محمد امير امير فيدو مشافش جيهتها ومشا حطو للاصتو ورجع ليها جرها من دراعها 
يحيى: بغضب)بريسلي وليتي ليا فهاد الرياض ؟ مابقيتي كتحتارمي تا واحد ياااك هااا؟
دفعاتو بدموع محجرة فعينيها: طلقي مني الكذاااب...يا المنااافق ... ناوي نوايتك وانا مفراسي والو ياااك... الرياض كلووو كيضحك علياااا وكلشي عارف الا انااا 
يحيى: اش كتخربقي ااااش؟
اسراء: باااااغي تزوااااج
تصدم ... سكت كيرمش وقلبو وجهو عاقد حجبانو وهي كتبكي ودفع فيه
اسراء : قوول ليااا سيري لداااركم وسييير تزوج ... سيير مشديييتكش يااالاه سييير ... سير وبعد مني ومعمرك غاتشووف كمارتي اهىءاهىءاهىء 
مشات جيهت الماريو كتبكي وتمسح بكم يديها وهوا ساكت مردش عليها ، جبدات الباليزة لاحتها فالارض وتحنات على ركابيها حلاتها وناضت بدات كتجبد فحوايجها وترمي فالباليزة . مشا شد ليها يدها جرها بقوة 
يحيى: معندك فين تمشي
اسراء: طلق مني...باغي تزوج سير تزوج مغنشدكش ومغنبكيش علييك اهىءاهىءاهىء اصلا نتوما كاااملين بحال بحال اهىءاهىءاهىء بعد مني متشدش فيا وطلقني انا اللي حمارة قبلت نتزوج بيك
يحيى : مغنطلقكش ا اسراء ... ونتي اللي وصلتيني لهادشي كااامل اللي معمرني فكرت فيه ... حتى عييت مللييييت منك ومن التصرفات ديالك والحياة اللي عايشها معاك
اسراء: مالي اخويا اش درت ليييك هااا؟ شنو بغيتي ندير ليك ؟ فاش ضريتك؟
يحيى: مضرتينيش ولاكن محسبانيش ...وانااا راااجل ماشي مرى نبقا نبات حداك بحال خوك ... عااام اسرااء عااام فيها الشتاء والربيع والخريف والصيف شي مات شي تزاد وشحااال من عيد داااز وانا كنقول دابا يهديها الله ... قلنا حااملة كتوحم نصبرو مافيها باس عندها عذر ولاكن باش يدوز العام كامل وولدتي وبريتي و كتخرجي تساراي وتجي تنعسي بحال الى ممزوجاش ! لا ومامقبولاش منك اسراء ... صمت عام كاامل ... حتى لفوقاش ؟ وشحاال من عام غنبقاو هاكا ؟ ها عام مشا ونتي هي نتي .
اسراء: اهاااه مزوج بيا غير على داكشي هااا؟ 
جاوبها بجدية: كن بغيت فيك داكشي غنصبر شهر والى مبغيتيش اللخ يعاونك ماشي عاام كامل...وحنا درنا عقد نكاح ماشي عقد دوران وتسركيل وانا راااجل .
.والى بغيت هادشي راه بغيتو فالحلال ماشي فالحرام و راه كل ليلة متانعتي فيها كتبات الملاءكة كتنعل فيك حتى كيصبح الحال باش يكون فعلمك... الله اللي خلقنا هاكا وهوا غرز فينا ديك الغريزة وبسبابها شحال من واحد كيمارس الحرام اما انا معرمني فكرت نمشي للحرام والحل اللي بقا ليا بغيت نطبقو كيما حللو الله.
اسراء: دابا عاد وليتي فقيه؟ كتهضر بالدين هه! نتا اصلا عينيك زايغيين بلا متجي تفهم عليا 
يحيى: نتي مكتعرفيش تهضري وانا كنحمق معاك راسي فعوض متنازلي شوية ونتنازل انا شوية ونعيشو طبيعتنا ونكملو حياتنا جالسة كتخربقي عينيك زايغين!!! واش مالقيتي متقولي؟ فين شفتي عيني زايغين الاللة؟ واش شفتيني كنخونك ولا تابع البنات بعيني؟ ولا صافي حيت عجبتيني نتي وطلبتك نتي جيتك عيني زايغين؟ ومن فقيه وليت عيني زايغين! ههه انا جاوبتك بداكشي اللي دار فينا الله ماشي حنا اللي ختارينا هادشي .. راه الحيوااان كيتزاوج و الى بغيتي الاللة نتي منقربش ليك الله يعاونك بينك وبين اللي خلقك مغنبززش عليك ولاكن حتى انا من حقي نتزوج ونعيش كي الناس مغنبقاش هاكا حتى نموت وانا الله محلل ليا نتزوج ... ونتي دنوبك على رقبتك 
اسراء: سير تزوج ... اصلا نتا ماشي رااجل
حط يدو على جبهتو وتهند: عرفتي شنو ديري جمعي حوايجك وسيري الله يعاونك ... الى درت فيك عقلي يا اما غنسيفطك للسبيطار ولا للقبر نيشان ... كيما تلاقينا بالمعروف نتفارقو بالمعروف ونتي تبعي القصص ديالك وداك الحب المزيف .

شافت فيه مصدومة وبدات كتهز وتخبط فحوايجها وتجمع فباليزتها وهوا متكي ببرودة دم هاز محمد امير فيدو حتى جمعات حوايجها ولبسات جلابتها ومسحات دموعها مارضاتش تبكي وكتشوف الهدوء ديالو كتزيد تعصب...مشات جمعات حوايج محمد امير ورجعات عندو 
اسراء: ارا ليا ولدي 
ناض عطاه ليها وزادت صدمتها فيه كثر 
يحيى: يالاه نوصلك
اسراء: ممحتاجاش 
يحيى: سيري نتي حتى نجيب ليك محمد امير ... والى كنت غنوصلك راه غير حيت معاك الولد اما انا اختي مكندبش عليك...مابقيتش باغي نشارك معاك لا طريق لا عينين لا حتى حاجة ... طماعة وباغا تعيشي بوحدك وباغا غير الفلوس ومابقا مانبغي فيك 
شافت فيه بغضب: من اللول ماتجيش تزوج بيا ... اش جابك ليا
يحيى: كن حساب ليا نتي هاكا كن قلبت الطريق... انا بغيتي على عزة نفسك و اهتمامك بيا فالايام الاولى وواخا كنغنض عيني على بزاف دالحوايج...ولاكن نتي مشات ليك عزة النفس مللي شفتي لفلوس...مللي نتي مباغاش تزوجي وماعينكش فيا علاااش كنتي كتعوجي فلاكام وتفتنيني وضحكي وتشدي معايا السوايع.؟ ديك الساعة قولي ليا انا مابغييتكش ومابغيتش نتزوج و واليديك بززو عليك ... ماشي ضحكي وتخرجي معايا وفرحاانة فالعرس كان يحساب لي باغاني ... ساعا نتي حتى تزوجنا عاد قلتي ليا واليديا ما واليديا ! نتي من اللول طمعتي وطحتي من عيني وبقا فيك غير الزين والزين ابنتي راه ماشي هوا كلشي وماشي هوا اللي غيحببني فيك ... هادي ديريها حلقة فودنيك باش متشوفيش راسك بووحدك راه كاين ما حسن منك .. انا اللي عليا درتو معاك ابنت الناس وكنت باغي نصبر معاك حتى ديري عقلك ولاكن نتي عاجبك الحال هاكاك ومكتفكريش ديري عقلك وهاد الولد هادا راه جا غير بالزهر وصافي .
اسراء: ممحتاجاش تقول ليا هاد الهضرة ... طحت من عينيك ولا من راسك مكيهمنيش من غدا نتزوج ما حسن منك وماشي فير نتا اللي كاين
يحيى: ديري اللي عجبك ... غير ديري فراسك واحد القضية ...الى تزوجتي غناخد ليك الولد ... ماشي بالقوة .. بالقانون ... اما دابا من حقك تخليه معاك ولاكن نهار تزوجي مغنخليهش ليك يتكرفس عليه واحد اخر . 
اسراء: را ليا ولدي لهنا 
هزات ولدها فيديها كتمهج بالغضب ونزلات معنقاه كيبكي ويحيى موراه ركبها ومشاو فصمت حتى للدار اللي شرا ليها ... دخلات وهزات راسها 
اسراء: معمرك ما تحط رجلك عندي هنا ... وهادي داري منبغيكش تجي ليها
يحيى: هه! متخافيش منخادش ليك الدار...وولدي فاش نبغي نشوفو غنجي ناخدو وسيمانة ديال الاوراق نكونو مطلقين والله يسهل عليك ابنت الناس
اسراء: بغضب ) سير فحااالك .. خرج علياا 
يحيى: غير بلاتي هانا غنمشي بلا متعصبي ولا نتعصب
جبد تيليفوتو وبدا كيصوني : الو لاللة الزوهرة دوزي ليا السي حسن نهضر معاه . . . اه شي حاجة ضارورية ............. الو السي حسن . . . لاباس الحمد الله بغيت غير نقول ليك راه اسراء خرجات من الرياض وهي دابا فدارها ... متفاهمناش ومن الاحسن كل واحد يشوف حالو . . . لالا الشي حسن مشاكل قديمة مابغاتش تحل ومكاينش علاش نكملو وكييما الله حلل الزواج حلل الطلاق ... انشاء الله الله يعاون 
قطع وشاف فإسراء: باك غدا غيكون هنا ... بغيتي تقولي ليه السبب شغلك هاداك وبغيتي هادشي يبقا بيناتنا مرحبا ... وكيما كنت قلت ليك اخر مرة ... نتي موافقة على الطلاق وانا كذالك دونك غنديرو طلاق التراضي والله يكمل عليك تصبحي على خير

خرج وخلاها واقفة حالة فمها ممتيقاش راسها ... مشات كتجري وقفات حدا المراية وبقات كتشوف فراسها ويديها ورجليها وهي تشتت جميع المساحيق ودفعات كلشي اللي فوق الطبلة بجنونو كتغوت وطات للارض كتبكي وتهبط فشعرها وضرب فالارض ... بقات هاكاك حتى شمعات محمد امير كيبكي وناضت بالزربة كتنخصص مشات هزاتو عنقاتو كتبوس فيه حتى سكت وجلسات شاداه فحضنها وساهية ... شوية جمعات النفس و رجعات حطاتو وجمعات شعرها ةمشات غسلات وجها بعزيمو و ارادة ورجعات تكات حدا ولدها كترضعو وهوا مكمش على جنبو شاد البزولة بيدو كيقمش فيها وعينيه تقال حتى نعس ... هزاتو حطاتو على الناموسية وجمعات الروينة اللي دارت كاملة وحرات باليزاتها للبيت نعاس ومشات نعسات.
فاقت على الصونيط فالباب وناضت كتجري تحت عينيها كحل والتعب على وجها لابسة بيجامة سيفية فالرمادي لقات الزوهرة قدامها وحها صفر هي وحسن وسحر وعلي معاهم .
اسراء: دخلو
سدات الباب موراهم ومشات جلسات دارت يديها تحت فكها وربعات رجليها فوق الفوطوي وبدا الحوار بيناتهم
الزوهرة: صاافي... هانتي تهنيييتي دابا .... بقيتي على خاااطرك خرجتي على دارك وشتتي شملك هاااه؟
حسن: شنو كاين ؟ قولو لينا علاش هادشي ؟ بين ليلة ونهار شتتو الشمل؟ 
اسراء: سيرو سولوه هوا 
حسن: من تماا جاييين... عاد كنا تما فالرياض من الصباح حتى لدابا وحنا معاهم وبفمو قالينا الى بغات ترجع مرحبا ... ولاكن دير عقلها وتشدي معاه الطريق
اسراء: بتحدي) انا مراااجعاااش ... ماشي يطلق وقت اللي بغا ويردني الوقت اللي بغا .... راه ماشي اول مرة راه طلقني بالفم ورجعني عاوتاني
الزوهرة: كيفاااش طلقك وردك؟ 
اسراء: علاش مقالش ليكم شنووو كاين؟ قال لكم اللي بغا 
علي: اسراء ... بلاتي غادي نعيطو ليه دااابا يجي باش كلشي يتحط فوق الطبلة ... ونشوفو شكون الضالم وشكون المضلوم
اسراء: هزات كتفها)عيط ليه 
جبد علي تيليفون : الو يحيى ... اه صافي
)قطع) هاهوا فالطريق جاي 
اسراء: انا مراااجعاااش والى بغا الطلاق نطلقو اما الرجوع مغنرجعش
الزوهرة: نعلي الشيطان ابنتي راه ماشي اللعب هادا ... راه الزواج وراكي عايشة بيخير وعلى خير اش خاصك؟ كتقلبي على العصا؟ باغا ضحكي فيك الناس
اسراء: بعصبية)هوا كااايبلاااني وقااالها لكلشي الا انا ... جالسين رشيدة وسعاد كيتشفاو فيا
علي: للااااا مقالهاااش لكلشي قالها ليا انا والواليدة لا غير ونابغا حتى واحد يعرف حتى يفتح معاك الموضوع ... كيفاش عرفوها الهريين مااانعرف! وهادشي نوض لينا الصدع لبارح فالرياض فاش جابك لهنا ورجع نوضها معايا ومع الواليدة وكان غيضرب رشيدة ... الليل كامل والدنيا مقلوبة وبسباب هاد المشكل شد الزكير مع عبد الحفيض سماعيل دابا على الورث وتاضت حنا عندنا الريكااطة
اسراء: سول رشيدة وسعاد هما اللي جلسو كيتشفاو فيا ... وهما اللي قالوها ليا اما انا ماجبدت بو صدع 
علي: هادشي كااامل عاارفينو ... ودابا حنا جينا نرطبو ونهديو النفوس ... وعلى قبل داك الولد صبري نتيا ويصبر هوا واخا راه انا عااارفو صبر معاااك بزااف وكان مستااعد يزيد يصبر معاك ... ولاكن اختي اسراء راه هاصك حتى نتي تراعي شوية ... واش من المدابزة ديالك مع رشيدة وسعاد للغوات مع الحاجة ودوري جيهت سامية و مكتحمليش المسؤولية
اسراء: ايييه!!! ماشي هما اللي كيجبدووني؟؟
سحر: اسراء ... راه نتي خاصك تساعدي شوية ... وبداك التعفار والنقاهة ودافعة عليهم كبير ومخلياهم يتحملو مسؤولية الرياض هي اللي مخلياهم معاك بحال هاكاك ديما مدابزين ... دابا ولاو حوج خدامات حنا مابقيناااش كنشقاو بزاف غير الطياب وصافي
اسراء: من اللول قلتو ليهم مكنعرف ندير والو
الزوهرة: ايوا قلت ليهم مكتعرفي ديري والو وعجباااتك نتي تيقيتي راسك؟؟ واش غتبقاي هاكا ديما ولا شنو؟ قلنا غدير عقلها وحنا قلنا هاكاك لاش يعلموك شوية بشوية ماشي ترمي كلشي وظيري مابغيتي 
اسراء: من هادشي كااامل انا ويحيى مصالحينش لبعضياتنا ومل واحد فينا يشد طريقو حسن ... هوا باغي يتزوج انا مقابلاش تجي عليا الضرة و اصلا بلا ضرة ماباغا زواج 
حسن: واخا لاللة حتى هادا نضر ... عنداك غير تندمي ويكون فات الفوت 
الدقان ...
علي: هوا هادا اللي وصل
ناضت اسراء حلات لباب لقات يحيى واقف مخرج فيعا عينيه كيسوط 
يحيى: تبعيني لبيت النعاس
سدات الباب وتبعاتو ... دخل وسد الباب وهز راسو كيشوف فيها بعينيه خارجين وجبد التيليفون ديالها من الجيب هزو قدامها 
يحيى: اش هادشي؟ فين كتعرفي هادا؟
شافت الواتساب ديالها وتصاورها مع كريم والمحاثة كاملة قدام غينيها فتيليفونها اللي نساتو فالبيت ديالها فالرياض مع التلفة والدوخة دالليلة الماضية ... خرجو عينيها ومشا اللون فوجها وبقات كتشوف فالتيليفون وفنضرات يحيى الحادة

🏵نهااااية الجزء الاول🏵
يتبع

التنقل بين الأجزاء

صفحة القصة
سيتم تشغيل صندوق التعليقات بعد لحظات
معظم التعليقات تم إخفاءها بواسطة الفيسبوك، نحاول بكل الوسائل المتاحة إستعادتها في أقرب وقت ممكن.