المصخوط الجزء الخامس

كانت عاجباني حياتي وأنا بوحدي لحرية ندير لي بغيت ندخل وقتما بغيت حتى طلعات ليا هاد لخالة من جنب صباح وليل تعيط ليا مبقى عندها ميدار من غيري هو بصراحة شعور زوين لمهم وصلات لعطلة جمعت حوايجي وتسنيتها حتى جات مشيت معاها لدار بنت ناس دارها مقااودة فواحد لمشروع ساكنين فيه غير ناس زوينين لي تيتعشاو بشلاضة ممعطيانيش ديك لبلاصة غيشوفني شي واحد أيحساب ليه غير سيكيريتي لمهم دخلنا لدارها داكشي مصروع فينما تندور فدار تيبانو ليا وراق لخدمة ديالها قالت ليا خود راحتك غير رد بالك مع لوراق ديالي فيهم لمسؤلية وصداع.. لمهم ديك لعطلة عرفتها غتدوز تقيييلة وفشكل سيدة كتعاملني بحال شي ولد صغير كتسولني شنو باغي تاكل خرج شويا شم لهوا غسل سنانك طلعاتلي زعف من ليوماين لولين كنت غنقتلها وغنلحق على لوالد.. يوماين مشفتش شمس غا نعاس وتلفازا وعندها بلاي فدار قالت ليا بلي نساه راجلها عرفتي داك لبلاي حفظتو من زيرو نهار كامل وأنا تنلعب بيه تا كتولي تباليا غير ضبابة عاد تنعس متنفيق حتى كتكون قريبة ترجع من لخدمة نهار لخامس عاد زعمت نخرج فقت شويا بكري لبست وخارج نجري شويا نعاس ولماكلا خيبين على صحة وأصلا تبدل عليا لجو بزااف من دار لولا لتانية لهادي لمهم خرجت ودرت لتيلي (Airplane mode) باش متبرزطنيش فاش توصل لدار درت لكيت لمزيكا غادي تنجري محسيتش بالوقت ومعيتش حتى تلفت على طريق ومع دالك مخدمتش تيلي بقيت كنتمشى بسوايع وتنسول تا لقيت داك لمشروع باش داخل سيكيريتي تيقوليا خويا راه خالتك رونات دنيا عليك مخلاتش فين قلبات جمعات درت ديال بنادم طلا وفين تيقلب قلت ليه شنو كتقول طلعت لدار ملقيتهاش خدمت تيلي معيطالي فوق 100 مرة وخا نكون مزال تنرضع عيطتليها انا راه فدار وقطعت واحد نص ساعة وهيا تدخل عنقاتني بحال نهار لول بانو ليا شي عيالات وشي رجال تاقادة ديالها شواقع كنت تنجري شويا وتلفت لقيتك درتي فيلم قالت ليا وراه معلمتينيش تا بمساج, شوف متافق معاه لعائلة وكلشي ولكن متزيديش فيه تاني.. معجبنيش لحال أنا تنحس براسي برهوش يمكن واحد أخر كان أيعجبو لحال ولكن أنا متربيتش هكاك صعيب نولف هاد تبعصيص لواليد مكانش تيدير معايا هكدا.. لمهم بنادم مشا دخلات هيا لكوزينة مدواتش معايا حطات لماكلا فوق طابلة حدايا ومقداتش تا تقوليا كول تقلقات تيحساب ليها انطلب سماح قلت ليها تقدي توصليني لدار ولا نشوف شي طاكسي وهيا تقوليا ولا ولا مالك قاصح هكدا بحال باك عارفاه رباك قاصح وفبلاصة قاصحة ولكن دبا راه مات وأنا لي بقيتلك ونتا لي بقيتيلي فاش عرفت ختي ماتت مغاديش تمشي صافي نبقيتش مقلقا أجي تاكل شوف شنو مطيبا ليك راه موالفا ناكل غير برى وصافي اولدي لله يهديك شوف شحال دايرا ليك لخاطر.. نتي حالفا تا ترجعيني كيليميني, كلينا وخرجنا تنسركلو طالقالي دوك دياسك ديال نانسي وداوديا و واحد ديسك تعاود 10 لمرات داك يا ترى مزال ليوم تنسها تنلقا راسي تندندن بيه بلاما نحس من داك نهار تخلط ليا مع دم.. عيطاتلي نظيظرات ديك لهضرة ديال خليتي توحشناك زعما فهم راسك والو أنا حجرة كل مرة كتعيط ليا.. بارك أنا ولخالة وهيا تعيط مجاتش نحيد من حداها عاد نجاوب جاوبت حداها وهيا تلصقني شكون كيفاش عرفتيها فين كيفاش دايرا قلت ليها غير واحد بنت لقسم كتدور وتعيط ليا كتسول فيا اما راه مكين والو قالت ليا وفهم راسك نتا راه معمرها أتزعم هيا قلت ليها اتخلي على دراري لأخرين وأتشوف فيا شنو فيا ميتعجب قالت ليا وازبل واش مكتشوفش راسك فلمرايا طول فعرض زوين لعوينات خضرين و.. بقات داويا وليت شاك فيها هيا مزعوطة فيا ولكن دارت ليا تقة فنفس صافي قودوها قودوها.. بقيت معاها بيخير واكل شارب خارج داخل ضاحك تا قربات تسالي لعطلة بقات كتقوليا نمشي معاها باش تشريلي شي حوايج ولكن مجاتش مبغيتش نعيق عليها وصلاتني لدار بقات عليا نشوفليك شي بلاصة أخرى حسن تبقا فيها سيدة شايطين عليها فلوسها يمكن قلت ليها لا مرتاح فبيتي ودراري لي معايا ضريفين ولفتهم قالت ليا صافي بقاتليك غير هاد دورة وغادي تحول حدايا قلت ليها وخا غير سيري قابلي خدمتك.. مشات رجعت لعند دراري تا حاجة ما تبدلات حوايجي بقاو كيما خليتهم وأخيرًا نقدر نتحرك بلاما يقوليا شي واحد فين غادي فليل بغيت نشد كتوبتي شويا دراري ديك ليلة سكرانين شمنك يا جوانات وشيشة وشي عجب عمري شفتو درت بناقص من لكتوبا بغيت غا نعس مخلاونيش 3 دليل صبر تقادا تيغوتو وأنا نخرج ليهم تيبانو ليا معاهم زوج معمري شفتهم كراو عندو غير فاش مكنتش واحد منهم ضعيف جريتو من رجليه صدقت هازو مكاملاش فيه تا 50 مقادة لحتو على خوه تنضرب فيهم والله ما عاقلين وتيضحكو تانا بقيت تنضرب تنضرب طلعات ليا تبوييقة تا أنا معقلتش كيفاش دخلت لبيتي لغد ليه فقت غير بزز تيباليا بنادم كلا وفين شاد صلخة ديال لكلاب درتليهم لبارح تا نعسو والله الا بصح لعصا خارجا من جنة كلا واحد وحاط لعين على واحد كيقوليه نتا لي ضربتيني أنا تيقولو غير درويش ميديرهاش ريحت مع نوردين قلت ليه خويا هادشي ديال لبارح بزاااف ميتسكتش عليه مخليتوني نشد كتوبا لا نعس مكانش هادشي شنو وقع قاليا صافي اصاحبي راه غير لعطلة وزهينا شويا مع دراري لمرة جايا غادي نقصو من صوت.. داك نهار كامل ضارني راسي مموالفش بداك دخان كتعيط ليا لخالة مخاصهاش تعرف شي حاجة من داكشي وليت غير خايفها تجي فشي وقت ماشي تال لهيه وداكشي لي كنت خايف منو طحت فيه خرجت أنا نجيب واحد نتيجة لول فداك ليسي راجع لدار فرحان كتباليا طوموبيل ديال لخويلة لتحت محكرتش غادي طالع وهيا تخرج من طوموبيل مموالفاش ليها تبقا لتحت اول ما قالت شنو هاد لأشكال لي ساكن معاهم غتطلع تجمع حوايجك دبا قلت ليها علاش دوا معاك شي واحد قاصك شي واحد مبغاتش تدوي وهو يتم نازل نوردين قلت ليه شنو واقع قاليا غير دوك لبراهش جداد موقع والو غير فيهم لهضرة وصافي متسنيتش تا نعرف شنو قالو ليها نقدر نكون محنينش حيت مربي فبلاصة قاصحة وتربية قاصحة ولكن فاش كتوصل لعائلة وخالتي لي جايا على قبلي طلعت ليهم لداك لبيت لباب محلول لقيتهم باركين داك لقصير تيباليا غير هو واحد تصرفيقة يدي ضراتني معاودش ناض تنضرب فالأخر برجلي وتنسب شي كلمات معقلتش تا إمتى دخلو لقاموس ديالي مبقيتش حاير شكون كيسمعني 5 درجال وهيا يلاه قدو يحبسوني عليهم كون ما جروني كون قتلت شي واحد أصلا نفسي خايبة هاد لقضية ورتها من لواليد كان ديما تيقولها ليا كنتعصب تيولي كلشي يبالي حمر وراسي تيسخن.. خرجوني برى مزال باغي نطلع ليهم وهيا تدفعني لطوموبيل تحركنا كتقوليا شحال جبتي واش دويتي مع ديك لبنت.. بقات كتبدل لموضوع حتى بردت شويا رجعنا هزيت حوايجي بلاما نتناقش معاها مبقاتش صالحة ليا ديك لبلاصة بقا نوردين تيقوليا لا غيخرجو هوما قلت ليه لا صافي انا باغي بلاصة لكالم نسمع فيها لعضومتي ماشي نتبلا فيها خطيني من داكشي أنا لمهم هزيت بعدا حوايجي لي مهمين وخرجت رجعنا لدار عندها وبقيت مراشقاش ليا سيدة تقريبا كتصرف عليا وكتكبر بيا وتسمع لهضرة على ودي مجاتش على لأقل خاص نولي ندير ليها خاطرها قالت ليا أتبقى هنا قلت ليها صافي لي بغيتي...

يتبع