البرهوش الجزء 35

ساط تيعطلي فشييي أوقات كيخلعني تنبدا نقلب فجنابي واش سيد حدايا.. قلت لختنى عبدو هدا تيعيط لون لي فوجهها تبدل هاا فين هيا شجاعة وقوليه قوليه.. جاوبتو غير فاش سمعت سلام عرفت بلي معارف والو قاليا ديك لبنت بغيتك تقوليها بلي باها بغا يشوفها خاصها ترجع ولكن بغيتك نتا تجي معاها.. وايلي أنا؟ فين؟ علاش؟..؟ مالك تخلعتي بحالا درتي شي زبلا تاني واش قصتي لبنت؟ لا والله ما حطيت يدي عليها غير بغيت نعرف علاش باغيني وفين عاادي.. قاليا نيومكسيكو بقيت سااكت وعلاش بغيتيني نجي معاها راه رجعت لدارنا ولعائلة منقدرش نرجع خويا مسافر باقيليه شي شهر باش يرجع.. صافي هيا هاديك خود حتى كتر لمهم جي معاها بغيتك تلاقا ب باها تكون بيناتكم شي خدمة راه كتباليا غيير كتصرف وصافي خاصك تخدم.. قلت ليه لا أخويا غير خليني بعيد.. والو خونا تيقوليا خاصك تجي دويت مع سيد عليك منقدرش نقوليه لا دبا.. قلت ليه وخا وقطعت يا ربي يكون مزال معرف والو.. كتسولني على ولدها كي داير وشنو بغا قلت ليها غير بغاني فشي خدمة وغندي معايا لبنت.. رجعنا لدار كملنا معاهم داك نهار بزز موحال واش تقبل لينا داك نهار كاع كلو خنزر فيا نخنزر فيك لمهم وصلنا مرات عبدو وديك لبنت فطريقنا ومشينا لدار وأخيرًا عرفتي على شعور تكون فدار مع داك بنادم لي كتبغي وفلحلال أححح باركين كنتفرجو فلحموضة راك عارف لوقيتة مورا لفطور وحنا نسمعو لعشا تيأدن قلت ليها كتصلي؟ قالتليا قطعت غير مؤخرا شباليك نمشيو نصليو بزوج؟ يا واد يا مؤمن مخلاتش ليا فين ندوي توضينا ومشينا لفوقيا ولمسائل تشوفنا تغلط فينا أخويا تنمشي لصال تنهز لعجب لكحل ودوك 8 ركعات لولين قهروني تنحس بالعافية شيطان ولد لعبد خرجت كنتسنى فيا دبا تخرج دبا تخرج والله تا بقات حتى كملو رجعنا لدار خويا لحرام دخلات ديالو ساهلين لحلال فشكل.. مصحرين بضانون وبيمو لعطبمك زعما راه مزوجين بميمة خاصنا نشبعو شهيوات ساعة عااد غادي نولي زوفري دبصح قالتلك وغير يفوت رمضان ونفرجك وا بنت ناس شنو ضمني بلي غنبقى عايش حتال رمضان.. لغد ليه دوزناه كامل غير هضرة ومع موالف بالبطبوط وداكشي مع لواليدة ضربات ديك 12 لموت ولات كتباليا سيدة متعوداا هدا هو سحورها حولها متبقى صغيرة أخويا وليت باغي غير ننعس وسيدة نشااط ولحيوية واهيا واش فاطرة ومطلعاها عليا ولا كيفاش جهد بزااف على ضانون وبيمو قالت ليا غير بالولف مزال مولفتيش رمضان.. بقات دااويا حتى هيا فيها لهضرة كتر من ولدها تراه داتني لدار والديها دخلنا مها الله يعمرها دار وغير كتضحك تبسيمة محيداتهاش من وجها وليت شاك فيها وجها مفيكسي بحال هكداك ضرسة لعقل كتباليا ولعضمة كون مكانش رمضان ناريي كون راه تبرعات عليا ولكن مزال لحال معيات معانا نبقاو نفطرو تما بنتها مبغاتش رجعنا لدار من 2 وهيا كتقاد فداك لفطور ولكن فطور تنشوفو غير فتصاور دلفيسبوك أساط قالت ليا غنمشيو لعند والديك عييت معاها لا قالتليا والو مجاتش تخليهم بوحدهم ومهدي مكينش ومنها نقادو لوضع شويا بيناتنا.. مشينا لعندهم لواليدة لبطبوط تاني ولحريرة ريحتو كتضربك مع لباب رمضان هو لموسم ديال لبطبوط عند لواليدة لواليد تيدخل معايا لقصوص وكيدير دياك صوت ديال هييه إيييه كنتسنا ديك نويطة لي غيطلق حطينا داكشي فوق طابلة باركين وهو يجبد تيليفون تيصور أدن صلينا بركنا سكااات داك يمكن داك سكون لي كيسبق العاصفة وهو ينطق لوالد تاني تيقصيي و شاف فيا فاش تكونو غادين ديوني معاكم بقيت تنضحك ساط هرباان ليه ملك نويطات بدون منازع فلعائلة تيجمعو فطابلة بقيت غير أنا وهو قاليا نتا لي مزوج البرهوش كبرتيي كبرتي فعينيا.. بركنا قلت ليهم نمشيو مجموعين لجامع لواليدة وهيا تصدم كتصلي؟ أييه تنصلي ديناهم معانا راجعين شويا لواليدة تطلقات فلهضرة مع سيدة وصلناهم لدار تيبانو ليا ضواو شاعلين قالينا سيكيريتي بلي مهدي رجع قبيلا دخلنا معاهم لدار سيد يلاه كيعالج مع شاف لواليدة واش نتي لي موجدا هادشي؟ قالت ليه مرات خوك أول مرة يتلاقاو بركنا قلت ليه ياك قلتي بلي باقي تما واحد شهر أخر؟ قاليا صافي رجعنا بزوج تكمل قرايتها هنا ندوزو رمضان مع ناسنا غدا ولا بعدو بغيتك تمشي معايا لدارهم واحد باها راه تيخلعني وبغيتك تكون معايا فاش نقوليه بلي غادي نعاود نتزوج بيها.. عرفتي بحالا ضربني ضو تنشوف فيه واش كتضحك؟ قاليا لا علاش راك خويا بغيتك تمشي معايا باش تزعمني.. واحد سعاد مكتسدش فمها أه بصح بصح سيد معاه قاليها حتى نتي غادي يكون حسن والله ومنها باش تشوفي شيماء.. خليتهم داوين وخرجت على برى تنفكر كيغادي ندير ليها هادي وهو يتبعني لواليد مالك؟ شفتك ماشي حتال لهيه؟ منقدرش منعاودش ليه يمكن يعطيني شي حل لهاد لمشكلة قلت ليه عقلتي فاش تضرب مهدي مني مكنتش راه أنا لي ضربتو وعطيت لهاد نسيبو فلوس باش لبس لقادية ولدو مهدي معارفش هادشي إلا عرف يمكن ميعاودش يدوي معاي.. عرفتي واحد تصرفيقة من شحاااااال محط يدو عليا حتى قبل منخرج من دار مكانش تيضربني عرفتي وااحد صدمة تنحس بضو فحنكي قاليا خرج ديك سيدة من دار ومنعاودش نشوفك هنا بارك ليه فدارو وكتضحك ليه ليه فوجهو ونتا كنتي غادي تقتلو.. بغيت غير نشرح ليه والو قلت ليها غنتسناك لتحت جيبي دوك لماعن وتبعيني قالت ليا وخا؟! غادين لدار كتسول فيا مالك؟ شنو وقع؟ قاليك باك شي حاجة عليا تاني ياك؟ عاودتليها شنو واقع بتفاصيل وهاد زهر لي عندي سيد لوحيد فهاد لعالم لي عارفني أنا لي ضربت خويا داك نهار ملقا لمن يزوج بنتو من غير داك خويا واش هادشي ماشي خرجان لعقل قالتلي صافي خليها فيد الله خوك تيبان ضريف وعزيز عليه عرف شنو درتي راه غادي يسمحلك معرفش صاافي معندك علاش تقلق.. رجعنا لدار حاط تيليفون حدايا مزعمتش نعيط ليه نقولها ليه صافي غدا نقولها ليه فاص.. لغد ليه فصباح باركين داوين كيفاش غنمشي نقول لمهدي بلي انا لي ضربتو حتى تنسمع دقان خرجت نحل لباب لقيتو مهدي سولتو كيدرتي تا عرفتيني فين ساكن؟؟ قاليا قصة طوييلة دبا خاصنا نتحركو محد باها مزال فدار ندويو معاه تنشوف فسعاد قالت ليا يلاه نمشيو كما قلتلك خليها فيد الله خرجنا معاه غادين معانا تينعتلي زعما وأنا عااارف دار فين كاينا غير مبغيتش نبين ليه وصلنا وعلى طرف لساني ديك مهدي عندي ما نقولك..