البرهوش الجزء 54

لبنت مزال مسخناتش حتى بلاصتها بداو تيعمرو ليها راسها بدوك نويطات ديال والو مزال لواليدة شويا يفوتها غير لواليد غنبقاو بيخير إلا مشا تا علمها ديك لهضرة ديالو مشكييل تاني بقينا باركين مدويناش على لموضوع ديال مهدي غير داوين مع لبنت مبقات عارفا معامن تدوي سولت مهدي واش دار لقديمة تباعت قاليا معرفتش وهو ينطق لواليد قاليا ياسين ولدي من شحال وحنا تابعينكم من دار لدار دبا غادين تسمعو لري ديالنا خاصنا نبقاو هنا داكشي لي غادي ترجع بيه ديك دار نصلحو منو دار ومنها توفر شويا راك عارف شنو واقع قلت ليه وخا لي بغيتو أصلا تانا توحشت هاد دار ولكن أنا غنتحول شي بلاص.. ولحد لواليدة كتحلف وتعاود منتفرقو عليها من شحاال وأنا غادي جاي خويا هاد ناس مغاديش يخليونا نفرحو براسنا بقينا معاهم على وعدنا وسعدنا لغد ليه فيقاتنا لواليدة فطرنا مبانش ليا لواليد فدار تنسول تيقولو ليا خرج صباح نزلت نشوف طوموبيل وهو يباليا جاي مع واحد مول لهوندا وهازين سيما وصباغة وزليج وشي عجب معرفتوش تخلعت أنا ترعزعت قاليا أجي أجي تعاون بقيت تنشوف كتضحك؟ شاف فيا وااحد شوفة قدام مول لهوندا تنعيط على مهدي جا تراه داك لعجب تقييل بزز باش دخلناه ريحت نرتاح لبنت وهيا تجيبليا كاس دلما تراه لأدب كتعرف صواب لله يعز لحكام يلاه غنلوح ليها شي كليمة زوينة وهو يوقف عليا لواليد تاني يلاه يلاه راه كنتسناو فيك بدل ونزل تعاون شعب واا لواليد راه صحيحة غي على قد الحال عريس جديد وراك فاهم إرحمو من في الأرض يرحمكم من في سماء شحال بغيتي نعطيك جيب معلم بدراري ديالو يقادو هادشي.. وهو يقوليا يدخل لبراني لدار ودار مخلطة مغرتيش على مك ومرات خوك غير على مراتك أويلي شوالد.. تيقنعني هاد سيد نزلت عندو لواليد ميكانيك تريسيان شيفور فلاح صياد كلشي تيعرف ليه مدوز لخيخ ديال لخدامي فصغرو مهدي تيباليا مسيكين تيمشي ويجي لواليد خدام وداوي ديك أويلي اويلي شنو والد.. بزز باش طلقنا مور لغدا بدلت حوايجي هزيت ختنى وخرجنا غادي سايق وعينيا مسدودين ديتها لبحر شوفي لبلاد شحال زوينة.. عيطات على باها دوات معاه ودوزاتولي داويلي على لخدمة داكشي مزيان قلت ليه سلملي على لبوليسي.. تنضرب على ل(fond d'écran) كتبان ليا دايرا تصاور ديال(HelloKaty) تخلعت ناري أش هادشي لباطل يشوفوها صحاب لوقت يغبروني يحساب ليهم غير قاصر خاطفها ولا شي لعبة قلت ليها بدلي هادشي.. ياسين نسولك؟ اه.. واش غنبقاو مع عائلتك؟ ناري جبداتني عاودتليها لقصة من لول ومع تنبقى نقلب على لكلمات بلونغلي تيهربو ليا داكشي لي خلاه لواليد كملاتو هيا لمهم فهمات بلي دارنا يلاه باغين يشوفوني ويشبعو مني ونخليهم يرتاحو شويا.. رجعنا لدار لواليد دار ليا لحصار فدار واحد 4 ايام ديال جيب هز شد ندمني على نهار لي جيت فيه ولكن طلع دبصح معلم لي تيدوز عليها متنرجعوش ليها مهدي مزال مدويتش معاه كاع هو أصلا متيدويش غير فاش تيكون محتااج يدوي وغير أه لا بغيت نقوليه يبرد على راسو وموقع والو ولكن مزال مجاتنيش لفرصة من غير أنه خويا معمري غادي ننسا بلي واقف على رجليا تاني بسبابو الا نسا هو هادشي أنا مغنساهش لواليد كمل لخدمة تا شيبنا دخلنا لفراش لي جابو من دار لقديمة لواليدة خطيرة فلبيع وشرا تراه باعت فراش لي يعمر زوج محلات فنهارهم عائلة محققة لإكتفاء داتي.. بارك أنا ولواليد ومهدي لواليد مطلعها على مهدي تاني تيقوليه هانتا تزوج موراك مراتو حملات وماتت لله يرحمها وها تانية جايا فطريق ونتا مكيناش ريحتك واش عندك شي مشكل سميتو عليه بيخير؟ شوف غنوريك هاد لحركات بقا ديرهم فليل خويا أنا هزيت تيليفوني وخرجت تنجري متلفتش نشوف شي لقطة تبقى واحلا ليا فلميموار إلى يوم الدين.. خرجت لخدمة تنسركل من محل لمحل وهيا تباليا شتا كتطيح وأنا نتفكر لأراضي دلحاج خاص يتحرتو ناري وليت فلاح صافي من هادي لشيخات دخلت لدار لقيت لواليد مزال تيشرح لمهدي وتا هو تيسمع مسكين بااغي يستافد ريحت معاهم تانا خاصني معامن نطلعها هانتا أخويا شوف وسمع مزياان نصيحة لي أنعطيك بوماضة صفرا قبل وبعد هيا كتفيد فكلشي زعما غتجي تال سميتو عليه وغتوقف لواليد تيسد ليا فمي وأنا كنتمتم بضحك خرجاتلي نويطة ديال بوماضة صفرا غير بزز تندور وجهي كتباليا مراتو ورايا أه ختي شيماء يخ ثف ثف على شوهة شفت فلواليد أه صافي دهن بيها صبعك قبل لماكة وميكون عندك باش يلاه أنا فبيتي تحطو لعشا عيطولي.. تنقلب على واحد خيتي غبرات ياكما رجعات عند باها لقيتها مع لواليدة فلكوزينة كتڭرد فلمسمن تخلعت أنا وقفت حداهم لبنت وهيا تقوليا سمع شنو تعلمت سمن ماطيشة بريكة. تنشوف فلواليدة خاصك لحبس نتي كتفسدي ليها أخلاقها بهادشي سمن الواليدة عيب دبا إلا بغيت نرجعها والله ما يقبلوها ليا تاني موحال يخليوها تحط رجلها فبلادها تاني بريكة أمي بريكة.. واحد لواليدة غير كتشوف فيا وكتضخك خليتها ودخلت لبيتي لا تموت ضاحكة ويسبوها فيا حطو لعشا خرجت شافتني وهيا تبدا تضحك تاني مفهمت والو سيدة ضرسة دلعقل كتباليا وجها ولا حمرر لواليد تخلع ولا تيقوليا سير لبيتك حيد من قدامها دبا تقتلها تانا شنو درتليها دخلت لبيتي ومزال كتضحك بزز باش سكتات طليت عليها واش عطاك شي واحد شي حاجة فزنقة وهيا تبدا تاني خليتها كتضحك طبسيل فاراها دخلت لبيتي وكليت لواليدة كتمعجن.. سالاو خرجت ريحت معاهم بعدا شويا تقدر تحبس ضحكة تنشوف فلواليد واش كتعرف شي واحد يحرتلي شي أرض وهيا تبدا تاني تاني وا بزااف شفت ف شيماء ديها أختي لبيتها دبا تموت داوها بقيت مع مهدي ولواليد تنعت لواليد لخدمة فين كينا قاليا صافي أنا غنسوليك غدا نمشيو بزوج قلت ليه مهدي غادي يمشي معاك أنا ممساليش مهدي بحالا صرفقتو لواليد قاليا ديك تصبحو على خير نمشي نشوف هاديك مالها تحرك هو بقيت مع مهدي صافي جات لوقيتة باش ندويو جيتو ملخر قلت ليه بغيتك تبعد على صداع أصاحبي نسا هادشي لي داز عندي خدمة عاوني ومغادي يخصك خير وهو يطلق وجهو شويا تبسم من شحال وهو عاقدهم قلت ليه بلي غير غادي يحل لمشاكل ديالو غادي نرجعليه فلوسو لي كان عطتمي ندير بيهم لعملية يدير بيهم ما بغا بقى تيحلف ولكن لي فراسي فراسي مبغيتش توقعلي شي حاجة وهو مزال كيتسالني شي ريال.. مشا لبيتو جمعت طابلة ناس دارت عقلها دخلت لكوزينة لقيت لبنت شادا مسمنة كتاكل فيها بديت تنشك بلي قولبني باها غتكون زيادة وخلوق هنا غير مغلفينها بهاد رطوبية بحال شي كرطونة ديال لآيفون فيها نوكيا بيل حنا ماشي حڭرنا نوكيا بيل بالعكس هو راه صبار وديال زمان وسميتو عليه ولكن منتقولبوش إلا مكانتش غتحسن نسل وتولد بنادم زعر وعينين زرقين راه مكاين والو خاص ترجع لدارهم..