المصخوط الجزء السابع

دخلت لبيت ديالو تنقلب وهيا تبعني سولاتني علاش كتقلب قلت ليها على شهادة لملكية وشي وراق معقلتش فين فايتلي شايفهم قالت ليا أه قلب قلب بقات باركة ورايا سولتها تاني فكريني علاش معمرك سولتي فلواليدة هاد سنين كاملين؟ قالت ليا راه سحر ليها ولا منعرف سيدة تبدلات بين نهار وليلة وخلات تا قرايتها وجات لهنا لا تيليفون لا والو كيفاش عادي نسول عليها انا قلت زعما غيكونو عندها شي 5 دلولاد دبا وعايشا مزيان وشي نهار غادي تجي تسول عليا ولكن هانتا كتشوف شنو وقع.. بقيت كنقلب تا لقيتهم عطيتهم ليها كتقلب فيهم وأنا مخليتش شي بلاصة فداك لماريو لقيت واحد صنيديق ديال دهب مشفتوش داك نهار وايلي لواليد كان تيدير دهب موحال وريتو ليها قالت ليا غيكون ديال ماماك أرا نشوف داك لعجب عطيتهم ليها هيا تعرف ليهم ديك ليلة بقيت غير كنقلب فداك لبيت رونتو ديال بصح سولتها على لفراش فاش انبيع دار قالت ليا خليه ليهم معندك ما دير بيه.. مبغاش يديني نعاس ديك ليلة حاس بشي حاجة مضيقالي نفسي بحالا خايف مناش معرفتش وزايدا عليا تاهيا عندها قلب ديال دجاجة غا نبدا نسد عينيا كتقوليا واش نعسي كيفاش انعس ونتي كتديري ليا هاد لعداب ديال ليهود بزز باش غمضت عيني شويا لغد ليه فايق بحال شي زومبي قلت ليها تبقى فدار تا نمشي عند سيد ونرجع قالت ليا لا رجلي على رجلك متخلينيش هنا بوحدي.. مشينا عند لول قاليا بلي مريض ميقدرش يخرج ولكن قاليا متبيعش بلاد بوك ركزلي على ديك بوك قليل فين كتسمعها مشيت عند لي حداه قاليا ولدو راه مسافر مكينش أخر واحد تنعرف وهدا كان روح ديال لواليد من صغرهم دخلنا داكشي بالخف حطو لينا أتاي لحلوة طابلة عامرا تقول عارفينا جاين سيدة طاحتلك فواحد طبسيل ديال لحلوى وكتسول لمقادير وا لمقادير لمقادير بروجولا؟ خرجت هيا ومرات خونا لبيت توريها بقيت أنا وخونا راس فراس قاليا عارفك اولدي لاش جاي باغي تبيع بلاد بوك ديك بوك تاني قلت ليه أه اعمي راك عارف تنقرى بعيد ومعندي ما نجي ندير هنا ومنقدرش نقابلها ولا ندير فيها شي حاجة اللهم نبيعها وندير بفلوسها شي حاجة بقى ساكت حط لكاس من يدو وقاليا أيييه قالوها ناس زمان فلوس لبن يديهم زعطوط بقيت تنشوف فيه دبا أنا زعطوط درت فيها مقلق وخا معارفش شنو هاد زعطوط أسيدي لله يكبر بيك كما كبرتي بينا وقفت غادي خارج وهو يقوليا أجي أجي مالك بزربا كتشعل راه بوك الله يرحمو تاهو كان هكذا كلمة زوج كيتقلق أنا مقلتش ليك زعطوط غير تنشوف هو الله يرحمو شحال وهو محافظ على داكشي مجموع ونتا معطلتيهش مخليتيهش تا يبرد فقبرو قلت ليه دبا شنو واش اتمشي معايا ولا لا قاليا صافي انمشي معاك تسنيتو تا لبس وخرجنا فطريق قلت ليه واش عندك شي فكرة علاش دار لواليد هكداك وهو يسكت قاليا راه ماشي هو مك لي كانت زايدا نغزة. وهيا تقوليه عرف شنو كتخرج من فمك أسيدي بداو مناغرين وليت غير تنسكت فيهم ولكن خديت راس خيط قاليا هو ماشي مصطي غير فاش كيتعصب صافي مكيبقاش يفكر وهيا لله يغفر ليها كانت مزوجة بيه وكتعيط على شي واحد تيجي من لمدينة لعندها فاش متيكونش ناس شافوها ولكن هو معمرو لقا عليها شي حاجة وكمل من راسك.. دبا أنا ولد سميتو عليها بقيت غير ساكت طريق وصلنا لقينا خوتنا كيتسناو ماشي واحد بزاف درجال كبار ولبسهم فشكل بحالا صحراويين قلت ليهم سمحولي أعمي مبقيتش باغي نبيع باش داخل باش راجع واحد فيهم وهو يقول لي تصحر مع لبراهش يصبح فاطر طاني راجل كبير منقدرش نحط يدي عليه وهو ينطق واحد أخر قاليا خمسة آلاف و500 درهم لميترو عرفتي بحالا صرفقتيني داك ثمن لي عطا بزاااف على ديك لبلاصة بزز مني رجعت ريحات لخويلة وسيد قاليه واش داوي بصح؟ قاليه أه تامن داك سيد متيقش داك ثمن لي عطاو قلت ليه باركة من لهضرة أسيدي نعبرو و وجد ليا شيك وليت باغي نبيع.. خليني من لهضرة ديال لأفلام لفلوس زوينة قاليا صافي غنجيبو سيد لي تيعبر لوراق عندك ياك؟ وخاص تحضر معانا.. قلت ليه لوراق عندي ولكن مبغيتش نبيع دار بغيتها تبقى فبلاصتها اصلا جات فجنب مغاديش تدير ليكم شي مشكل.. مبغاش فلول قاليا كلشي ولا والو تانا درت فيه عزة نفسي ما بتسمحلي بقاو تيشوفو فبعضياتهم خرجنا كنتسناوهم برى تا دواو مع بعضياتهم وخرجو داك لي تيدوي فيهم قاليا صافي ميكون غير خاطرك أولدي غادين ناخدوها كلمة درجال لعربون سيمانة جايا و.. مشاو وصلنا داك سيد لدارو غير حطيناه وتحركنا وهيا تضربها بوااحد لغوتة تقباتلي طبل دودني لفلوس المصخوط واش عرفتي ديك لأرض شحال فيها بداك ثمن غادي تلعق ولكن متنسانيش أنا خالتك لعائلة هيا لولا هادشي خاصو شي غدا دايزو لكلام تشها شنو بغيتي تاكل.. أنا ومدرتش ديك لحالة لي دارتها هيا مع لعلم لباس عليها ممحتاجاش. ريحنا كنتغداو سولتها واش بصح لهضرة لي قال سيد على ختك؟ قالت ليا راه ماماك هاديك وكل واحد وعيبو الله أعلم بعدا سيدة موحال ديرها راه كانت كتحلم بباك فليل وغادي تخلي حياتها هنا وتمشي معاه تال ديك لبلاصة وغدير شي حاجة هكدا راه هادشي مكيدخلش لعقل دبا خوي دماغك نتا من هادشي نساه باك دا معاه سرو لقبر.. معارفش تا لقبر ديالو فين كين رجعنا لدار كتكون باركة شادا خدمتها تا كتقفز لقيتها دير شي صال كبير ومخلط وفيه كلشي هادشي كيتمشا دابا خمسة دقايق مورا هادي كتعاود تقفز لا صافي لقيتها غادي دير واحد ريسطورا كبييرا وغادي تخدم ليك را هادشي كيتمشا دابا كتسكت تاني وصافي لقيتها طلعاتلي لقوق فراسي هزيت بزطامي وخرجت لداك لصال تقيدت فيه اللهم لمزيكا وداك صداع ولا نبقا نسمع دوك لبلانات لخاوين ديتلها شاد واحد شعبة هز حط حط وكتباليا ديك خيتي راسطا غا حاضياني وكتضحك صوراتني عاد جات لعندي ساط شكدير نص ساعة وانا حاضياك بغيت نعرف غير شنو كتخدم معرفتش كون ما كنت عارفاك جديد نقول راه شي لعيبة نيفو طالع عليا تبعني تبعني مشيت معاها وهيا تحيد لقبية بقات ضاربا واحد لقيبة بحال رحمة ربي ملابسا والو وصافي تنضرب عليها سيدة كرشها بحال شي فراكة وضهر تا هو أنا تخلعت وليت شاك فيها محسوبا علينا عندها سميتو عليه انحيد تيشورت أتبقى غير تضحك عليا بقينا داوين وانا نزعم عليها قلت ليها ياختي لبنات ممعطيهمش هادشي شوفي مكينا تا بنت هنا سيري ديري ليك شي حاجة ليوغا ولا شي لعبة أبنت ناس قالت ليا عاود شنو قلتي بلاتي داتني لواحد لكرسي بقات كتعمر فواحد جعبة دخلات هيا لولا سالات قالت ليا وريني العضلات أبويكا ريحت هزيت داك لعجب واحد زوج تلاتة بزربا ولبقية نص ساعة وأنا كنتعصر معاهم حطماتني معمرني نعاود نقول صحيح مشيت لدار نعست لغد ليه مقادش نهز كاس ديال لما ممشيتش ليسي مقديتش وهيا تجي عندي ديك خيتي تاني يلاه تريني لا أختي غير سيري لحديد يعرف لحديد أنا غا ولية نقدش نخرج سيري لله يسهل عليك بقات لاصقاني غتمشي معايا هيا غتمشي صافي وراه خاص تمشي باش يفوتك هادشي ومتخلينيش نمشي بوحدي لبارح ضحكنا ودوزنا نهار زوين.. مقديتش نقول لا دخلت نبدل حوايجي باش نمشي معاها ختنى لصقاتني لصقة ماشي عادية وكترقق صوتها بحالا أنا معارفش صوتها كيداير زعما يا ربي منكونش تنعجبها ياربي إني لا أسألك رد القضاء ولكن أسألك اللطف فيه كلشي إلا هاد لمخلوقة..

يتبع