المصخوط الجزء العاشر

عرض علينا لدارو قاليك نتقاصمو طعام باش نعرفو بعضياتنا كتر حتال هنا مزيان سيد غادي يعطيني فلوس عادي يعرض عليا ويبغي يعرفني وخا معرفتش علاش باغي لأرض ديال لوالد لديك درجة يعطي فيها داك ثمن لخيالي لي تنقولها ليه تيقوليا وخا تبقالك ديك لأرض تما 100 عام معمرها اتوصل لداك ثمن لمهم لبسنا و وجدنا راسنا كنتسناو داك لي قاليا غادي يجي يوصلنا وهو يوصل طلع لعندنا تال دار نزلنا معاه غادين فطريق وساكتين تا وصلنا عندهم دار كبيييرة غير دخلا قداش وستيل قديييم وداير بيها بزااف ديال شجر لمهم دخلنا لعندهم داك شيباني سلم علينا وبركنا فواحد صالون تيسول فيا على دراسة تنقوليه غير مزيان لحمد لله سولني شنو اندير بلفلوس قلت ليه معندي مندير بيها دبا انخليها تا نفكر مزيان.. لمهم بقينا داويين قاليا بلي كان تيعرف لواليد كانو تلاقاو فشي موسم حيت لوالد مكانش تيزكل بحال داكشي قاليا بلي ديجا كان باغي يشري لأرض من عند لواليد ومبغاش.. دخلو ولادو وبناتو زوج فراقي ديال كورة مفديتش تا نحسبهم كيتشابهو سيد مزوج ب 3 لعيالات لمهم تعشينا وخرجنا وصلنا تال دار تاني حتى لخويلة لاحظت بلي خونا محكر عليا بزاف تا هيا ولات شاكا فلأرض فيها شي لعبة قلت ليها وخا منعرف شنو يكون فيها راه مغاديش يوصل للفلوس لي غادي يعطيني فيها اجي بعدا فين هيا صنيديقة ديال دهب قالت ليا فكرتيييني مزال فطوموبيل غدا ندوزها لواحد صاحبتي راجلها دهيبي واش باغي تبعيهم؟ راه يقدو يكونو ديال ختي لله يرحمها قلت ليها وغير سولي بعدا شحال دايرين.. داوين وحنا نسمعو دقان حليت لباب لقيتها ديك أية بويكا ديالي وليت تنبغيها قالت ليا فين البغل ودخلات أحححح على لحروشية وقصوحية راس دخلات عندها قالت ليا منوضاها مع لواليد تاني انبات عندك قالت ليا صافي عادي ديك ليلة أنا معول نسهر شاد واحد لكتاب كنقرا فيه وكنتفرج فواحد سيري ختنى دارتلي حبوبة ليل كامل وهيا وتا نقص أبنادم وخلينا نعسو وليت شاك بلي أنا لي بايت عندهم ماشي لعكس درت بناقص بغيت ندخل لبيتي لقيتها داخلا ليه ومسورتاه هااا خايفا على راسها زعما وا بنت ناس تي حلي لباب شكون أيزعم عليك عطيني غير لفانيد ديالي والو ولات صمكة كتسمع غير تلفازا قلت أجي نعس بلاش ليوم حطيت راسي فصالون والله ما بغا يجيني نعاس تنحس بشي لعيبة خانقاني ملقيتش راحتي وأصلا أنا من نوع لي كيتبدل عليه لفراش كيتعدب ديك ليلة منعستش حتى فاقت لخويلة صباح قالت ليا وايلي منعستيش واش نعياتلك فبيتك قلت ليها راه سداتلي على لفانيد ديالي مبغاش يديني نعاس وهيا تجي حدايا قالت ليا نتا تبارك الله صحيح مغاديش يكون شي مرض لي دايرلك هادشي غير كتحس براسك غادي دير شي حاجة خايبة فاش غتبيع داكشي لي مخلي باك غادي تمشي عند (psychiatrist) غادي تولي هو هداك أصلا دزتي من بزاف دلحوايج صعيب يبقا بنادم بعقلو موراهم شباليك تمشي؟ هاي هاي هاي دبا أنا مصطي اوا لله يعزك كما عزيتينا صيفطيني ل36 وتهناي كاع بقات كتشوف تفو اش هاد لعقلية عندك موحال واش ولد ختي نتا وبقا هكدا أنا مالي واحد شويا وهيا تفيق ختنى من بيتي بقييت تنشوف عاد تعرفت على حوايجي وااع بايتا ليا بحوايجي بدليهم بدليهم دبا يشوفهم باك نوليو فما هي وما لونها بقات كدير فيا شي شوفات فشكل لي يسمعك كتقول حوايج يقول غي شي حوايج هوما مزال فيهم ريحت لبال خنقوني لمرة جايا فاش تبغي تقدا شي حاجة عيط ليا.. بقيت غير تنشوف خويا مبقات معاهم عيشة اناخد دوك لفلوس وغادي نمشي لدارنا.. فطرنا دخلت نعس مخلاتنيش ختنى والو اتمشي معايا لصال عاد ترجع تنعس مشيت معاها رجعت لدار باغي نحط راسي وهو يعيطلي خونا تاني طلع ليا دم غادي نجاوبو نشبع فيه سبان وهو يقوليا صباح لخير كيف داير واش مقاريش قلت ليه لا قاليا سيمانة جايا نديرو وقيتا ونمشيو عند لموتق قلت ليه مرحبا قاليا ديك قهيوة ما قهيوة قلت ليه ان شاء الله وقطعت خونا باغي يدخلي بين جلدة ولعضم ولا كيفاش ضربة حبة حطيت راسي مهزيتو تا جات لخويلة كتفيق فيا فلعشيا بلما خلعاتني قالت ليا يلاه لدار باباك دبا قلت ليها علاش قالت ليا واش عرفتي داك دهب لي لقينا تما شحال ساوي سيد لي ديتو ليه شد فيه بيديه ورجليه كان غادي يتسلف ويشريه من عندي قاليا معمرو شاف بحال ديك لخدمة نقلبو إلا كان مزاال غي شي خاتم ولا شي سنسلا مقلبناش داك نهار مزيان وقفت مشينا لدار روناها وتقول واش كينا شي لعبة فيها وأنا نقوليها أجي هاد لي لاصقين على لأرض هاد لصقة 100% غيكون شي كنز فهاد لأرض قالت ليا والاهيلا صافي عيطليه قوليه مبقيتش باقي باغي نبيع يلاه شديت تيليفون وأنا ندورها فدماغي وإلا مكان والو غادي يطلع معانا أكبر قالب كون كانت فيها شي لعبة غادين يجيو فليل وياخدوخا ماشي يشريوها ويخسرو هاد لفلوس كاملين.. وشنو دبا سير حفرها كلها وقلب بقيت تنخمم قلت ليها تحركي لوسط لمدينة نتقداو شي (كاشف المعادن/metal detector) هو لي غادي يفاسرها ليلة نقلبمها ديك لأرض شبر شبر هادشي لي درنا وخديت تا بالة وي من نيتي رجعنا لدار هيا دخلات ترتاح وأنا بديت تندور فديك لأرض وكبييرة لحمد لله لأرض نقية مفيهاش زبل حشاكم قلييل فاش كنلقا شي مسمار ولا شي لعبة قرب لفجر كنت كملت ديك لأرض ديالنا كلها بقات غير واحد لبلاصة ورا دار حدا لبير لي لقينا فيه لواليدة وفداك ليل تندور من تما تا نيست وكنت انرجع لدار وهيا تبدا تغوت وماشي بحال لي كانت كتدير فاش كنلقا شي مسمار أصلا ملقيت تا شي لعبة لفوق جبت ديك لبالة تنضرب وتنعاود قبل مينوض بنادم يصلي وفرحاان أنديانا جونز ديال لمغرب تنضرب وتنعيط لمن يضرب معايا مكانش يحسابلي عندي ديك صحة حفرة فيهي شي ميترو سوفل تقادا ضربت بديك لبالا وهو يخرجلي طرف ديال خنشة فكرني فلي كانت فيها لواليدة قلت ياا ربي ميكون لي فبالي جبتها شويا وهيا تبدا تخرج وااحد ريحة مقديتش نحلها طلعت بزربا ردمتها بقيت كنضرب فيها باش متبانش محفورة دخلت لدار جبت صطل دلما خويتو عليها وعاودت نفس لبلان إلا لقاه شي واحد دبا ايحساب ليهم أنا لي قتلتو بزربا دخلت صطل لدار درت لبالا وديك لعيبة فلكوفر طلعت تنفيق فيها مبغاتش حطيت ليها واحد لمسمنة يلاه غتبدا تسب قلت ليها إلا متحركناش دبا غادي ندخلو بزوج لحبس قالت ليا علاش شنو لقيتي جريتها واش وقت لهضرة دبا فطريق نعاودلك باش تحركنا آدن لفجر وشمس بدات كتبان كنمسح فحالتي كتسول فيا شنو لقيتي؟ قلت ليها نفس لقصة لي وقعاتلي شحال هادي فلبير ليوم لقيت خنشة أخرى محليتهاش ولكن متأكد بلي فيها بنادم.. سيدة وهيا تزعزع كانت غتقلبنا قالت ليا واش متأكد مشافك حتى واحد؟ قلت ليها حتى واحد وقاديت ديك لبلاصة مزيان تحركي بزربا لدار ندخلو قبل ميفيق بنادم حالتي كلها تراب وقاتلني لبرد فليل مع طمع مكنت تنحس لا ببرد لا والو تا كنا راجعين لدار حسيت بيه فعضامي دخلت لدوش تحت لما سخون خرجت لقيتها موجدالي حوايجي ولمانطات غطاتني مزيان جابتلي لفطور لفراشي بسيف ليل كامل وأنا غادي جاي فديك لأرض وهيا كتشخر ممشاتش داك نهار لخدمة كتقوليا نعيطو على داك لكوميسير نقولوها ليه وخا محامية ولكن كتكلخ مرة مرة شنو انقولو ليه كنا كنحفرو ولقينا بنادم ورجعنا لبلاصتو كيفاش عرفناه تما وعلاش كنا كنقلبو وتاني مرة تنلقا بنادم غيشكو فيا انا لي قاتلهم.. خدمي دماغك شويا واش متأكدة نتي خت مي بقات كتضحك قالت ليا نتا إلا مشيتي لبحر وضربتي رملة برجلك أطلع بنادم ميت أش هاد زهر عندك أنا وليتي كتخلعني..

يتبع