المصخوط الجزء 13

كتبقى حاط لعين على لحاجة وكتسنى تقول منزربش تا كيطير بيها شي واحد من قدام عينيك هادشي لي وقعلي مع ديك بنت ناس بقيت تنقول منبعد منبعد لعطلا كلها وأنا كنتسنا شنو كنتسنا الله أعلم تال واحد نهار فلصال وهيا تقوليا شفتي داك لولد لي داير لقب كيقتلني فاش قالتها ليا لمرة لولا قلت غير كتضحك وهيا تباليا بدات كتقرب لخونا دخلاتو بلقرعة دلما شويا ديال لهضرة أنا تخلعت يا ربي نكون تنحلم واش أنا يهودي.. تا خونا عندو واحد لهيت فشكل من داك نوع لي لابدة يدير شي لعبة فوق راسو يا كاسكيطة يا لقبية وتيشوف غير فالأرض ومتيحيدش لكيت تيخلعوك بحال هادو صافي حيدتها من دماغي لحمد لله بعدا ملي مزربتش كوراه تقمعت من عندها أكبر قمعة فتاريخ أصلا موجود صرف هيا لي ضيعاتني لخويلة خلاتلي طوموبيلتها وخدات وحدا أخرى مبغاتش تاخد من عندي شي حاجة قالتلي ديرها كادو أصلا كنت باغيا نبدلها بشي وحدة صغيرة لمهم وليت غير تندور تنمشي لدار دلواليد تنشوف هادوك خوتنا فين وصلو فلخدمة تيبنيو فوق داك خونا لي مدفون ناريي لمهم ديك لمرا لي كانت مع لواليد نعتاتلي دار ختها مشيت شفتها وشنو خاصها أنا شاك فلواليد تيبان ليا فنعاسي بسبابها زعما نكون مقصر من جيهتها و ولدها لمهم مبقالها والو وتولد اتولي عندي ختي لأول وأخر مرة لخويلة مفخبارهاش.. اوا هوا هدا قرب لعام يبدا ومحاملش ندخل لشي قسم ولفت لحرية وأنا نجمع وراق دلباك ليبر مزيان نربحو داك لعام ديال لجهوي انوجد ليه مزيان وانشدو بشي نقطة زوينة وخا لخويلة عكساتلي فلول قالتلي قرا بحال دراري لأخرين درت غي لي فراسي.. ديك بنت ناس بدلاتني مبقاتش كتعيطلي نمشي معاها لصال لخيانة لخيانة💔 خليتها تال لوقيتة لي عارفها كتدخل فيها لتما ومشيت دخلت شيراتلي بيدها باش نمشي عندهم ضربت فيها ودرت بحالا مشفتهاش بحالا تقلقات واحد شويا وهو يجي باها خرجات معاه خداام وهو يجي عندي داك خونا لي كانت معاه كنتسناه يقول غير شي لعبة نحس بلي غير لمح را غادي يعيرني ولا غير فكر غادي ندخل فيه طول وعرض ناري تنغير خونا سلم عليا كل كلمة تيقولها تيقول خويا قبل منها قتلني بصواب قلت ليه كيدايرا آية قاليا هادشي علاش جيت ندوي معاك راه لبنت دايراني طريق لك باش تغير شويا وتزعم تدوي معاها وا زعم أخويا راه كتقتلني بالهضرة وليت تنعرف كلشي عليك قبل ما ندوي معاك.. قتلني أنا وحشمني بقيت غير تابعو فداك لصال واش بصح تيقوليا والله واحد شويا تاني صاحبي واش كتدوي بصح ولا كتضحك كيحلف ليا تاني بقيت داير ليه حبوبة تا قاليا شوف غدا غادي نقوليها سيري دوي معاه غادي نزعمها ونتا دوي متحشمش عطيني نمرتك.. بزز باش تفك مني كنت عارفها غير كتضحك واش أتخليني أنا على ود داك بهلول وخا تكون عورا لغد ليه بارك فدار وهو يصيفطلي مساج قاليا راه دخلنا أجي دخلت نفس لفيلم هوما فبلاصة وأنا فواحد لكوان وهيا تقصدني كما قاليا خونا صافي هو لي صيفطها درت براسي مفخباري والو سلمات عليا رجعت سلام بقيت ساكت وهيا تقوليا قولي مبروك راه غادي يجي يخطبني بنت لعبد شكدير لكدوب قلت ليها اوا مبروك هيا نوجد لكادو بقات غير كتشوف عاد قلت ليها بنت لعبد راه دوا معايا دري وعاودليا كلشي باراكة من لكدوب إتهدي يا شيخة.. من داك نهار رجعنا كيف لول غير زايدين نغزة وصافي خرجنا ليها طاي طاي ولينا تنسركلو كنخرجو بزاف واحد لواليد عندها تيدير فيا شيي شوفات ديال حدااري🚨 بدات لقرايا كان عندها لباك داك لعام وتا أنا حيت درت باك ليبر قالت ليا بقى تدخل معانا باش تفهم شويا وأنا غادي نعاونك لمهم داكشي لي وقع كتوريني داكشي لي قراو فلجهوي وغاديي مزياان غنسالي داك لعجب فلول دلعام وفلخر غادي نضرب طليلة صافي لكريطينة فجيبي ورابح عام.. وهيا تعيطلي ديك خيتي لي كانت مع لواليد قالتلي بلي ولدات بنت ونعتاتلي صبيطار لي فيه هزيت واحد سنسلا من ديك صنيديقة ومشيت لعندها فوطوكوبي ديال عينيا نخاف غير نبوسها نطير معايا شي حنك ديجا شفت بزااف ديال دراري صغار ولكن هادي زايدة نغزة فصغر سولتهم واش طبيعي قاليا طبيب أه عادي راه صحتها عادية سولت ديك لمرا واش خاصاها شي لعبة و واش نمشي نخلص خوتنا قالت ليا هادشي علاش عيطتليك بغيت ندوي معاك ريحت حداها قالت ليا نتا عارف كلشي تما عارفني ممزوجا موالو ومبغيتش ولادي يسمعو شي كلمة خايبة بسبابي.. قلت ليها وشنو؟ قالتلي بلي ختها لي كانت عندها مكتولدش وباغيا تربيها وغادي تخليني نشوفها فلول مبغيتش معطاتنيش خاطري معرفتي هاد ختها كيف دايرا واش تخليني نشوفها ولا لا بقيت معكس شويا وهيا تدخل ديك ختها بقات كتحلفلي بلي نقدر نشوفها فأي وقت بغيت معمرها غادي تقوليا لا وتقدر تخليها عندي مرة مرة كاع دورتها فدماغي مها بصح متقدش تديها وحتى أنا قلت لديك سيدة صافي غير عنداك تقلبي وجهك بقات كتحلف ليا مديت لديك خيتي سنسلا قلت ليها خليها ليها وها نمرتي لي حتاجتها عيطيلي عطتيها داكشي لي هاز معايا وخرجت رجعت لدار لخويلة كتسولني فين كنت قلت ليها غير فلقهوة معرفتش علاش قالتلي قريب يوجد لعشا قلت ليها فيقيني فاش يوجد و دخلت لبيتي حطيت راسي مزال تنشم ريحت دراري صغار داني نعاس ومعول نشوف لواليد تاني ولكن هاد لمرة شفتو فبلاصة أخرى وأخيرًا كوم ما كنت ناعس كون بكيت هاد لمرة فبلاصة معقلتش فين شفتها ولكن بحالا عارفها وهو ينزل على ركابيه. كتفيقني لخويلة عرفتي كنت غنبدا نسب لله ياخد فيك لحق علاش فيقتيني قالت ليا نوض واش مباغيش تعشا؟ لا مبقاش عندي لخاطر خليني غير نعس.. حطيت راسي مبغاش يديني نعاس تاني تا شربت أخر فانيدا من داك دوا عاودت لحلم من لول تحنى على لأرض وبدا كيحفر بيديه تا كتفيقني قالت ليا نوض تفطر تنشوف فيها وايلي راه يلاه حطيت راسي وراتني ساعة راه 9 ونص هادي بقا بالي مع داكشي لي شفت نهار كامل كنتسنا ليل واش غادي نعاود نحلم بنفس لحاجة مشيت ناخد داك دوا من حدانا مبغاوش يعطيوه ليا مشيت حتال عند سيد لي شريتو من عندو فلول حدا ليسي لقديم قلت أجي نشوف دوك ولاد ناس تنسول على نظيظرات قالو ليا راه تحولات رجعت لدار بارك وكنشوف فلساعة قالت ليا لخويلة شنو كتسنا؟ كنتسنا ليل.. علاش؟ باش نعس.. ونعس دبا علاش أتسنى حتال ليل؟ باش نشوف ل.. خليني علك.. بقات نهار كامل كتطلب فيا باش نرجع لعند داك طبيب ديال لحماق بزز باش نساتني عليها داك نهار وهو يتجبااااااد ديال بصح حيت كنتسناه يكمل ولكن عندي دواه مشيت لصال رجعت تفرجت فواحد زوج أفلام تا ضربات 8 دليل كليت بزربا ودخلت سديت عليا من لداخل باش متفيقنيش ونعست نفس لحلم بقى تيحفر فنفس لبلاصة تا فقت صباح كين زوج احتمالات يا أنا بصح هرب ليا لفريخ ولا كينا شي لعبة تما لبست حوايجي و نزلت ضربت ديك لبالا فطوموبيل لعجيب فالأمر أنني تنعرف ديك لبلاضة منين الله أعلم لمهم عارف طريق واش داني لواليد تما فاش كنت صغير الله أعلم وصلت لديك لبلاصة خااااويا وفيها شويا ديال شجر جبدت ديك لبالا وغادي تنسركل تا لقيت ديك لبلاصة لي باليا فيها لواليد تماما كما شفتها فلحلم ضرني راسي شنو غادي يكون تما بديت تنضرب بديك لبالا وديك لأرض قاااصحا بزز باش وصلت لواحد تراب رطب حفرا كبرات ومكين والو يمكن بصح طارلي لفريخ فديك ساعة وهو يوقف عليا واحد سيد سارح شي غنم تما كنت غادي تموت بالخلعة قاليا علاش كتقلب؟ قلت ليه والو غير تندير شويا ديال رياضة قاليا لبالا ولات رياضة بقيت داير ليه خاطرو وبصح ومن هنا ومن لهيه تا مشا يلاه غنطلع وهيا تخشالي رجلي فلحفرة تنشوف كيباليا عود مهرس ورجلي داخلا تراه صندوق جريت رجلي شفت ليمن ليسر مكين حتى واحد خشيت يدي لقيت دهب بحال داكشي لي لقينا ف صنيديقة لي فدار غير هاد لمرة بزاف صندوق تهرس بزز باش جبدتو خليت ديك لبالا تما وطيااارة وحدا لطوموبيل ضربت داك صندوق فلكوفر وطياارة لدار ناري أنديانا جونز وداكشي لخويلة غادي يسكتليها لقلب فاش أتشوف هادشي دبا غنشوفو شكون لي حمق انا ولا هيا دايز من واحد لباراج ديال لبوليس وهو ينعتلي بيدو باش نوقف فجنب شداتني وااحد لخلعة جا لعندي سلم عليا مديتليه لوراق ولبيرمي هوما هادوك قاليا نزل حل لكوفر كان قلبي غادي يسكت مزال مفرحتش بيهم شنو غادي نقوليه لقيتهم فطريق وأنا سروالي كلو عامر تراب أصلا لخويلة عندها معارف معندي مناش نخاف..

يتبع