ايرتان: جهينة بغيتها تبقى بعيدة على حياتي الشخصية ..
عز : وشنو المشكل فهادشي ... البنت كتبان ضريفة و بنت الناس و مانضنش تكون شي شخص لي ...
ايرتان قاطعو : سمع .. جهينة خاصها تبقى بعيدة كل البعد علا حياتي الشخصية ... و انت عارف مزيان ... الى عرفات اكتر من اللازم ... غاتعاني و غتدخل فمشاكل اكبر منها ..
عز: هههه اش كتخور ... انت عارف مزيان ..حنا كلنا كاينين و بنادم خاصو يفكر و يضرب الف تخميمة و تخميمة الى بغاو يقربو ليها و خاصة الى كانت قريبة للشافاك كوردو ههههههه
ايرتان ضرب الطابلة و خنزر فيه: غاتسد فمك و لا غنصيفيها ليك ..
فؤاد: ههههه تا هنينا اصاحبي ...
ايرتات: شوفو نقول ليكم ... الى سلتات شي حاجة و لو غير قد هكا 👌 و اللهتا نقلب ببوكم هاد الطابلة و ديرو فبالكم .. جهينة كتفهم التركية ..
عز : هههه وايلي ...
ايرتان: اه ... عرفتها البارح ...
فؤاد: وهي عارفااك ...
ايرتان: قلت ليكم.. جهينة ماكاتعرف عليا وااالو ... و ما بغبتها تعرف وااالو ...
عز: حنا اكيد مغانقولو والو على خدمتنا و دوك الامور لي على بالنا .. ولكن امور عائلتك و حياتك عامة .. مكنضنش كاين مشكل تعرف عليهم و لا الا ؟!!
ايرتان : لا ... كنفضل نبقى صفحة بيضاء قدامها ... امور حياتي انا و ماكرهتش تمحى من ذاكرتي ...
عز: ايرتان ... خود الامور ببساطة ... واش كتعطي لراسك الحق تدخل فحياتها و هي لا ...
ايرتان: انا ... غير كنحاول نحميها و صافي ...
فؤاد: اوووه هضرة جديييدة هادي ...
عز: الناس ولاو كيهضرو على الحماية و ماعرت شنو ... *غمزو * اش واقع ...
ايرتان: بلا متبداو تألفو قصص ... البنت ضعيفة و وحيدة .. لاحظت امور ماشي هي هاديك و بغيت نتأكد ... that s it ...
فؤاد : علاياش كتهدرو شنو فاتني ...
عز: السيد كلفني نجيب ليه خبار الساط ديالها ...
فؤاد: هههه اووووه ...
ايرتان : شنو ... لقيتي شي حاجة ...
عز: حتى الليل و نسيفط ليك المعلومات ديالو ...
ايرتان : هادو مشاو يصنعوه ؟ 😡
عند جهينة و اشرف ... واقفين كيضومونديو كل واحد فيهم واخد شي 3 ديال البيرجيرز و الفريت و كوكا و دجاج مقلي ...
اشرف: واخيرا تلاقيت شي حد كيعشق الماكلة بحالي .. هاوك العجولة كيصبرو للجوع .. طيبقاو عاصرين على الحدمة بالسوايع و يخليوني ناتلوى بيناتهم ... ماكاينش لي كيحس بشعوري ..
جهينة: قادرة نحس بيك .. هادي قصتي مع صحابي تانا ...
اشرف: خاصنا نبقاو نخرجو غير انا و ياك .. غاديك لمطاعم ديال اشهر الطباخين عمدهم شي ماكلة كتسبب الادمان ..
جهينة : بالصح .. صافي غير تاصل بيا و انا معاك .. جبد قيد نمرتي ...
عطاها و قيداتو عندو ...
اشرف: صافي .. دابا نشوفو غير شي وقيت مايكونش فيه الجلاخة ...
هزات بلاطو ديالها ... و اشرف هز ديالو و ديال ايرتان ز تمو غادين حتى و صلو ... ضحك جهينة واصل حتال لزداكاداو ... حطو بلاطواتهم و حطات لايرتان ديالو قدامو ...
ايرتان: اش هاد التعطيلة .. مشيتو للقمر تجيبوه ؟
اشرف: مالك معصب اصاحبي .. راه الدنيا عامرة و تسنينا نوبتنا ...
جهينة: علاش كتشرح ليه .. خليه يتفرغع ...
ايرتان: ياك لمك ... ياله تهزي لحكي داركم ..
جهينة هزات بدات ماكلتها: سير انت انا كناكل ...
جمع ايرتان فمو كيتعصر و الدراري كيضحكو ويتغامزو عليهم .. دايرين شجار العشاق و هما ماعايقينش ... شاف ايرتان فالسوب ديالو و شاف فاشرف ياله غيهضر و قال ..
اشرف: ماشي انا لي طلبتها .. جهينة قالت ليا انت باقي بلا غدا ... و بغات تاخدو ليك ..
غير سمع سميتها و شاف فيها ... هي مامسوقاش كتغيز لماملتها ..
عز؛ اش هادشي كامل جايبين .. دوقونا ..
جهينة و اشرف: والله فحلقكم لا طاح 😠
فؤاد: نوض نجيبو مانجغدرو هادو راه غير جيعانين ..
ناضو عز و فؤاد مشاو يجيبو غداهم ..
خلاو ايرتان جالس مربع ايديه و كيشوف فجهينة لي خالقاها هي و اشرف ... كولشي هضرو فيه .. من موضوع لآخر .. تلاقاو ب2 talkative (كيهضرو بزاف )... ايرتان تبخو ليه راسو ... هي مامسوقاش ليه و هو الدخاخن خارجين من فوق راسو ....
ايرتان : اشمن نصف ... على انت فيك حتى ربع بقا ليك غير نصف ..
جهينة: وانت مالك علاش كتخشي نيفك ..
ايرتان: وكليني و سكتي ...
جهينة؛ كول راسك ...
ايرتان خنزر و خبط فالطابلة و هي دور عندو بلهلا يطريه ليها ... مابيهش الماكلة و لكن بيه داك الضحك لي طول مع اشرف و خلاتو وراها كيتغدد و عاد هي غير شافت اشرف و نساتو هو ...
كتشربو و تخشي في فمو بالجهالة ... دار فيها واحد الشوفة ديال نشدك نطويك .. عاد نقصات شوية ...
جهينة: مالك قبيح مالك جلاخة ...
هز ايرتان وجهو فيها و هو يطلق ابتسامة من وجهو بالعرض البطيء ... تلفاتها على هضرتها لي كانت غتقول ... وهي مصنمة قدامو .. مد ايدو و مسح الكيتشوب من جنب فمها ...
حدرات وجها حشمانا منو ... جاو الدراري جلسو ... كياكلو تاهما ... و جهينة مرة تامل هي مرة توكل ايرتان ...
ايرتان: صافي باراكة عليا .. كملي ماكلتك ...
دارت جهينة كتكمل ...
اشرف: الله عركتها ...
جهينة: انا باقي ماكملت .. داغيا ساليتي ..
اشرف: انا فمي تكبر من فمك داكشي علاش سبقتك ...
فؤاد: هادي ماكدبتيش فيها ... ماعرفنا هاداك فم و لا بسطام ...
جهينة عمرات فمها و هي ديير بفففففف كوبات كولشي قدامهم و تلاحت فالكورسي كتضحك بالدموووع و شادا كرشها ... اشرف كيضحك و فؤاد غرق فحوايجو و عز كيضحك على الموقف لي تفكرو و ايرتان كيشوف فجهينة و يضحك على حالتها ...
اشرف: ههههههه خاصك .. تسمعيها هادي اجهينة ...
فؤاد: و اللهتا غانوض نسرح والديك هنا الى ماسديتيهش
اشرف ماداهاش فيه : سمعي سمعي... غير هادي شي 8 اشهر كنا مخيمين ب4 فواحد الغابة فامريكا ... مشينا لواحد الحافة كينقزو منها الناس باش كيطيحو فواحد البحيرة ... تما نيت فالغابة .. قررنا نقزو تاحنا ... بدا فؤاد هو الاول بغا يدير فيها واعر قدام شي تيتيزات كانو التحت ..هههه بغا يدير ديك اللعيبة ديال التشقليبة فالهواء .. ماجا غير فشجرة شحطاتو و شدات ليه شورط مشروك بالكارصون و مع تقلو تقطع و طاح محزطط قدام التيتيز ...*جهينة كيعاود و هي كتضحك و لكن غير كمل اخر جملة تبلوكات و فمها عامر ماكلة تزيرات ولات حمراء و عينيها تسدو و الدموع دايزين و كتضرب فاشرف باش يسكت و الو كيشوف فيها هكاك و كيكمل *
اشرف: و هربنا و خليناه مسرح الساط مابقاش قادر ينوووض .. و الساطات شبعو فبه ضحك .. كولشي جبد كيصور .. و حنا علقنا نكرناه ... أو واش السيد كان بعقلو حدانا ...حتى صدق فالارض حزطوطي بلا غارصون ... 😂😂😂😂
عز: نااري فاش فكرتينا المسخووط 😂😂😂
جهينة كتحاول تهضر بفمها عامر : امينيييمن...
اشرف: هههههههه اشنو لي امنييممين .... عجباتك قضية طاح بلا سروال .. نوريك التصاور ؟؟؟
جهينة كسيرااات عاوتااااني .. دارت عند ايرتان .. بانت ليه السيدة كتعاني و فمها عامر غتموووت بالضحك ووجها فزغ ... شاد في فخضو و كتكية على الكرسي كتضحك ...
ايرتان : تفرق منها شوف كيف ولات ..
فؤاد ناض لاشرف و علق تابعو كيتحلف ...
اما ايرتان خدا تيسو كيمسح ليها وجها ... عطاها الماء باش تسرط داكشي لي في فمها ...
جهينة: نااااري .... على بلااان 😂😂 اوووف ضراتني كرشي ...
عز : مسخوط كيجبد غير الغابرات ... 😂😂
رجعو الدراري لبلابصهم ...
اشرف: ايرتان .. الله يحفظك .. خلينا نديرو شي خرجة تاني و معانا جهينة ..
جهينة: اااه ماكرهتش ... عاففاااك عااافاك عااافاك
ايرتان: باش ياله تلاقاو ليا ب2 عند راسي ...
عز : ماعليش ... خليها تفوج شوية ...
جهينة: عاافاك ... انا اصلا عطلتي بقات فيها غير سيمانة .. خرجة ديال يوماين و نرجعو .. اممم ؟ اممم ؟
ايرتان : اووووف .. واخا الالا... من بعد الويكاند غانشوف ...
جهينة: عندي احساس حتى انا 😍😍😂😂 *تبدلو ملامحها من الضحك للالم و شدات كرشها *
اشرف لي قبالتها شافها و قال ..
اشرف: مالك اجهينة ؟
جهينة: اوووف ماعرفتش فيا الوجع ...
ايرتان: من الصباح و انت تركلي و تسرطي و نابغيتيهاش ضرك ..
جهينة: شربت مناضة فيها التلج و جبدت الصداع على راسي ...
فؤاد: ياكما المعدة ...
جهينة: لا ماشي المعدة .. بلا متبرزطو راه دغيا تفوتني ...
عز: مايمكنش انت صفراء و كتقولي منتبرزطوش ..
ايرتان: نوضي قدامي .. نمشيو للسبيطار ..
جهينة: لا .. ماشي لديك الدرجة ... 😨
جهينة فخاطرها : اويلي على شوهتي ... غامكشي للطبيب غايقوليه .. مابيها والو غير جاتها الدورة الشهرية .. و بين 4 العجولة ... اويلي حي ... 😨😨
ايرتان: مالك مزال مسمرة تما نوضي تغعدي ...
جهينة : انا بيخير ... والله ...
خرج عينيه فيها و ناضت بلهلا يطريه ليها ...
ناضو الدراري ... باش يمشيو تاهما ... دازت قدام ايرتان لي كيهز عكازو و هو يقول ليها وقفي وقفي ...
ضارو عندو كاملين و جلسها و قال ..
ايرتان : غير سبقونا انتوما احنا جايين ...
عز باستغراب : واخا ماتعطلوش ..
جهينة: مالك... اشنو وقع 😩😩
جهينة : اش واقع مالك ؟
ايرتان : ك.. حوايجك .. عامرين .. بشي حاجة ..
جهينة بغات تطل : باش ...
قاطعها: جلسي ماتنوضيش ...
جلس حداها و جيد تيشورت ديالو ...
ايرتان: لبسي هذا ...
جهينة: اويلي و علش غير فهمني اش واقع ...
ايرتان: لبسي و سكتي ...
خدات تيشورت ديالو اسود ... جاها طويل لحد فخاضها ... و هو بقى بلي التحت ...
ايرتان ؛ دابا ياله ...
بغات تشد فيه و قال ؛ فيك الوجع و كتقلبي على التقل ؟
جهينة: ماشي مشكل راه عادي .. غير نشرب شي حاجة سخونة و غايفوتني .. انتوما لي زدتو فيه ...
ايرتان: يعني بااش الطبيب ؟
جهينة: ياله غير نرجعو فحالنا ..
ايرتان: واخا ...
خرجو للباركينغ عند الدراري ..
اشرف: وا سربيو اش كتعرجو علينا ب2 تما ..
ايرتان؛ غير سيرو ... احنا غنرجعو للدار ..
جهينة: اه راني مزيانة .. شكرا على الاهتمام ...
مشاو و خلاوهم واقفين مافاهمين والو ...
جهينة ركبات و ركب ايرتان ... جلس كيشوف فيها غير من الجنب ... كتوجع و تصطنع القوة قدامو ... ديمارات و كل شوية نشد جنبها .. كولشي قدام عينيه و ساكت ... السيدة ماجايبة للدنيا خبار و ماطاحتش فبالها بلي طرى ليها داك البلان .. حيت عمرو وقع .. هاد المرة بقات تضحك و تعصر حتى خرجات لي كان غايخرج على 4 ايام دقة وحدة و شدات الارض ..
ايرتان : واش ماقاداش تصوغي ؟
جهينة: علاش كتسول ؟ قادرة ... اجي .. مالك من الصباح و انت كتطل عليا و تصرفاتك ماشي هي هاديك ... مولف تسول فيا ..
ايرتان شاف فيها ... عرفها ماجايبة للدنيا خبار ... شاف قدامو و خلاها ...
وصلو و خرجو من السيارة ... طلعو و دخلو ..
ايرتان: صافي انا غانتكى هنا فالصالة ... سيري انت بدلي و لا ديري لي عجبك ..
طلقات منو و مشات مستغربة و منوية من كلامو .. هزات كتافها بضبر راسو و دخلات للبيت .. سداتو و حيدات تيشورت ... حيدات شورط و هي تشوف المصيبة و هي طلقها بزغية حتى طارو الطيور من فوق السطح ... ايرتان سمعها و بدا يضحك و داير ايظو على وجهو ... هي هزات الشورط و خرجات فيه عينيها و كتطلب الله تكون غير كتحلم ... دابا عاد فهمات علاش عطاها تيسورت ديالو كل شوية يسولها ...
جهينة كتندب : اويييييييييييلي حي على شوهتي و فضيحتي ... اويييلي شاف كووولشي و يعلم الله شكون شاف من غييرو ... 😭😭😭 ناااري على شوهتي و فضيحتي ... كيف غاندير نشوف فيه دابا ...
سمعات الدقان و هي تقلس...
ايرتان: جهينة ... واش انت بيخير ..
جهينة: كتطنز ... سييير خرج غبرو مانشوفكش ... 😭😭😭
ايرتان: هههه فين مسيفطاني ... بلا ماتكبري الموضوع راه عادي ...
جعينة: عندك انت ... علاش ماقلتيهاش ليا ..
ايرتان: باش تفضحينا ... ماوقع والو بلا ماتزيدي فيه ...
سمعاتو مشا و مسحات دموعها و بدات تهضر مع راسها ..
جهينة : ماوقع والو حيت ماعندك حتى فكرة الموضوع شحال محرج ...
جبدات حوايج جداد و لوازمها و خرجات راسها كطل فين كاين ... سمعات تلفازة مشعولة .. عرفاتو فالصالة و هي طير للحمام و دخلات ... دوشات و هي كتغبن مارضاااتش تطيح فبلان بحال هذا و مع ايرتان من الفوق و هي اصلا كتحاول تبين راسها فصورة زوينة قدامو باش تنجح خطتها معاه ... لبسات و نشفات راسها كيف العادة .. ضربات كولشي كحل كيف ملامح وجهها الحالية .. عمر داود يعاود ... حلات الحمام بعدما نظفاتو .. دابا ماكايناش بوحدها فالدار ... فينما كتخلي الروينة كيسمعها ايرتان المنقي خيارو داير بحال العجوزة ... طارت للبيت و سداتو عليها ... ماحاملاش تبان ليه دابا ... تكات فسريرها و بقات حتى غفات ...
ايرتان كان كيتفرج حتى سيفط ليه عز ميساج ...
عز: كولشي مزيان ؟
ايرتان: اه ... راه كان شوية الوجع و فاتها الحال ..
عز: اااااه القلب حن و لا شغلك الشاغل ديك البنت مابقيناش كانشوفوك ...
ناض كيعرج ... لقا باب البيت مردود ... دفعو ودخل ... لقاها نااعسة و لا نقول مغيبة احسن ... دخل و جلس بالشوية فجنبها ... هز عينو شاف فوجها و شعرها لي باقي لابد بالماء ... لاحو بجنبها ... دوز عينيه على جنب وجها مغمضة عينيها و مرتاحة فنعاسها ... دوز ايدو بخفة على حناكها لي هابط معاهم شوية الخلفة من شعرها ... وصولا لذقنها ... وقف صبعو الكبير على ذقنها و جرو شوية ... تجرات شفاها التحتانية و رجع طلقها ... جمع ايدو و شاف فيها .. كانت نظرة غريية و مامقروآش ...فجأة قطب حجبانو بحال الى فكرة رافضها جات بين افكارو ... دور وجهو وار قدامو .. كيشوف فالشرجم قدامو مباشرة فالسماء ... و تنهد تنهيدة تقيلة و عامرة و غمض عينيه ...
ناض من حداها ... و غطاها ... خرج من البيت و رد عليها الباب .. مشا للصالة حل تيلي لقا داكشي وصلو ...
اول حاجة صورة ليه ...
ايرتان حقق فيه مزيان و داز للمعلومات .. جلال الزبيدي ممرض فعمرو 26 سنة عايش مع عائلتو امو و اخ اصغر منو و عندو اخ اكبر منو عايش فمدينة اخرى ... اون كوبل مع جهينة من ايام القرايا ... الخ ...
ايرتان : شفت هادشي عندو نقي ...
جاه اتصال ...
عز: قريتي داكشي ؟
ايرتان : اه ... شفت القضية عندو نقية ...
عز: لا ... مانقية والو ... كمت باغي نقولها ليك بفمي ..بما ان الموضوع كيتعلق بجهينة
ايرتان: شنو كاين ...
عز: هاد الساط كايخونها ... مصاحب مع طبيبة فالمستشفى لي خدامين فيه شهور هادي و هي بنت مول شي ... و كنضن جهينة باقي مسايقاش الخبار و هاد اللحظة لي كنهضرو فيها مسافر معاها و السيدة كتصرف عليه و مامخلية ليه مايخصو .. بصراحة ماعرفتش علاش باقي شاد جهينة معاه ...
ايرتان: ولد الق*** كيلعب بذيلو ... وحدة فالجيب و الاخرى يلعب بيها كيف بغا ..😡
عز: اشنو نبالي بيه ؟
ايرتان؛ صافي درتي لي عليك ... خليه ليا ...
عز: واخا .. ياله تلاح ..
قطع ايرتان و طوع البورطابل ... زير فكيه و ظلامو عينيه .. 2 امور لي فكر فيها ... مشاعر جهينة منين غتعرف و شنو نوع الاستفادة لي كياخد منها لي مخليه يخليها معاه و مايفرش فيها .. حيت عرف بلي هاد النوع ماكايهمو غير مصلاحتو و نهار غايلقى ما احسن من الطبيبة غايفر فيها تاهي ..
دوز يدو على شعرو ... و قال ...
ايرتان : خاصني نلقى كيفاش نخليها تهضر ...
مشا رجع للبيت و جلس قدامها تاني ... مد يدو لكتفها و فيقها ..
ايرتان: جهينة ... نوضي باراكة عليك ... جهينة ...
جهينة تحركت : اممممم
ايرتان: نوضي .. مافيكش الجوع ..
جهينة حلات عينيها ... غير شافتو و هي تدور و غطات وجها ...
جهينة: اش ... اش دخلك عندي خرج ...
ايرتان : 3 السوايع و انت ناعسة ... نوضي باراكة عليك ... و زيدي نشوفو ماناكلو تانا جاني الجوع ..
جهينة: ما فياش ... من بعد و نطيب ليك شي حاجة ..
ايرتان: مالك ؟ ما تقوليش ليا باقا شادا فداكشي ديال قبايلة ...
جهينة ساقلة ..
ايرتان: نوضي من الحماق ديالك .. داكشي راه عادي
جهينة: مغاتحسش بداكشي باش غانحس .. حيت عمرك جربتيه و عمرك غاتجربو 😢
ايرتان: كوني هانيا ما شافك حتى شي حد ... غير انا و عاونتك حتى سترتي القضية .. و زايدون منين عارفة راسك هكاك لاش لابسة شورط و ابيض من الفوق انت لي قلبتي عليها ... هضرنا بزاف و من جيهتي غير خودي راحتك .. داكشي عادي و هاديك طبيعتك كامرأة ... و نوضي تهزي و لا غانجيب سطل دالماء ..
ناض و تم غادي دار عندها و قال ..
ايرتان: انا لي غانطيب ...
غير سمعاتها و هي تنوض كتطل ورى شعرها و تفرنس .. ناضت كتزحف على ركابيها و نقزت و تبعاتو ...
ايرتان: شنو بغيتي تاكلي ..
جهينة: كتعرف تطيب ؟
ايرتان: شوفي بعينيك و حكمي .. و لكن خاصك تعاونيني ...
جهينة: واخا... عارفة يدك باقية مقسحة ... فكرني ندير ليك ماساج من بعد ...
ايرتان : جبدي الخضرة ...
جهينة كانت غادية و هي توقف ليه : ياع الخضرة ؟
ايرتان: ولايني راك غير بعلوكة ... غير جبدي وماغاتندميش ...
جهينة: واخا اسيدي ...
ايرتان: اري اللحم تاهو راه فالتلاجة
مداتو ليه ... خدا مقلة سخنها ... خدا اللحم دار فبه شوية الملح و الابزار و خلاه يتشحر بوحدو ...
ايرتان: قطعي هاد البصلة و قطعي 2 تومات ..
دارت لي قال ليها ..
وهو حيد اللحم من المقلة و رمى فبلاصتو البصلة و صوص ماطيشة و خلطهم حتى تشحرو و و حط اللحم و كب عليه مرقة اللحم و صويا صوص
ايرتان : قطعي هاد الخضرة طروفة كبار ...
خدات تشكيلة الخضر و قطعاتهم ... خداهم و رماهم فالطنجرة و سدها و خلاهم يطيبو ..
جهينة: وااو وصفة جديدة هادي ..
ايرتان: تسناي دوقيها و تشوفي ..
جهينة: احنا غانشوفو .. اجي جلس ..
جلس ايرتان و شاف فيها ... و هي تبدا دور فعينيها ..
ايرتان : اجي جلسي حتى انت ..
جهينة : غير خليني انا غنصاوب عصير ...
مشات من قدامو كتجبد الفواكه من التلاجة و كتهرب من عينيه ... عارفها توترت من شوفاتو ... بقا متبعها بعينيه و هي عاطياه بالظهر .. حتى نطق ايرتان و عينيه عليها ووجهو مامفسرش بحال الى خايف من جوابها ...
ايرتان: حتال اشمن حد كتبغي داك ... جلال ؟
جهينة هزات عينيها منين سمعات سؤالو .. دارت شافت فعينيه ... و حيداتهم .. رجعات شافت قدامها و قالت ..
جهينة: و علاش كتسول؟
ايرتان؛ ماكانحملش لي كيجاوبني بسؤال ؟
جهينة: كنبغيه و صافي ... هادشي فيه الحدود ؟
ايرتان: واخا خليني نصوغ ليك السؤال بطريقة اوضح ... حتال اشمن نقطة وصلات علاقتكم ؟
جهينة فهمات شنو قصد ... فهاد اللحظة و هي كتسمع كلامو ماعجبهاش الحال و ماحملاتش ان شخص يفكر فيها بهاد الطريقة ... و هي عندها اخلاق و مبادئ تربات عليهم ...و لكن تفكرات بلي مسكنا معاها راجل ... اكيد غايفكر بلي هي متساهلة و سهلة المنال ... هادشي لي طاح فبالها و هادشي لي فكرات فيه ... رمات الموس من ايدها و دارت عندو بغضب لقانو وراها واقف مباشرة ... هزات عينيها الفوق تشوف فيه ... لقاتو كيتغدد و يتفقص ... حيت تعطلات فجوابها ... حسات بنظراتو التاقبة تملكها شهور غريب و لكن مانساهاش فداك الغضب لي كانت غتوجه ليه ...
قالت بغضب ؛ سمع نقول ليك ... انا يمكن مسكنة معايا راجل غريب عليا ... و لكن محتارمة راسي و عندي كرامتي و اخلاقي و محتارمة لي رباتني ... مكنتعداش حدودي داكشي علاش .. حتى انت ماتعداش حدودك و علاقتي مع جلال كتخصني انا ماشي انت ... و اموري الخاصة ديك المرة قلت ليك ماتدخلش فيها .. و كانعاود نقول ليك ... تفرق من خطيبي ... و خلينا ندوزو هاد شهراين على خير ...
ختماتها بشوفة فعينيه و مشات ... خلاتو كيعض في فكيه و رابطهم كيف ديما و لكن راضي على جوابها و بما انها تعصبت فكلامو جرحها و بما انها تجرحت فراه داك الاحتمال لي كان وارد تلغى و ارتاح نسبيا ... حيت باقي سبب وجودو فحياتها غامض بالنسبة ليه ...
جهينة دخلات للبيت و جلسات و ملامحها باقية كتحيل على الغضب ... عاد دابا شوية كانت طالقاها عليه و كتلعب على اعصابو و فنفس الوقت تجرحات ماشي غير حيت قال ليها داك الكلام و لكن ايرتان بالذات فكر فيها بديك الطريقة ... هادي اكتر حاجة بقات فيها ...
بلا ماتفكر زادت عليها من الفوق و خدات السوارت و خرجات .. بلا ماتدخل عندو لاكوزينة قالت ...
جهينة: انا نخرج شوية و غانرجع ...
ماجا فين يخرج لقاها خرجات و سدات الباب ... تبعها و لكن مالحقهاش...
ايرتان: جهييينة ... فين غادية هادي ... دخل و ردخ الباب ... هادشي جديد عليك ا ايرتان ...
جهينة هبطات و خرجات من العيمارة ... و كتمشى و كتهضر مع راسها ...
جهينة: تعصبت تعصبت تعصبت ... كيفاش قدر المكلخ يفكر فيا بهاد الطريقة ... و لكن من حقو انا لي محلولة ليه و واخدة راحتي معاه ... تفووو الله بنعل النهار لي شفتو فيه .. منين عرفتو و انا غير فالفقايص و الغدايد من هادي لهادي ... فين غانمشي دابا ... نهبط البحر و لا نمشي للبارك لي هنا ؟ البارك احسن ...
مشات و دخلات البيسري و شرات السقاطة و مشات للبارك ... جليات و ربعات رجليها .. كتاكل و عينيها كيدورو و مخها كيحلل و يخمم كيف دير تعامل معاه من الان فصاعدا ...
عند ايرتان ... جلس فالصالون و شاد راسو ..
ايرتان: فضولي نحوك اجهينة كان غلطة و تقدر تكون نهايتي ...* و قف غادي جاي * مادربتش لهادشي الحساب ... كيفاش مافكرتش فهاد الشي ... كيفاااش 😡 * طلع النفس و زفرو * فبن غاتكون مشات دابا ...
عند جهينة لي غاعما مسوقة ناضت كتلعب مع شي دراري صغار حابة ... حسات بتيليفون كيفيبري .. شافت شكون لقاتو جلال ... اه جلال مالكم 😏 ...
جهينة: ولدات شي بغلة و غتشرق الشمس من الغرب ؟ الو ؟!
جلال؛ جهينة ... فين سافا ؟
جهينة: حمدالله و انت .. كيف داير مع الخدمة ؟
جلال: الخدمة ؟ ااه .. م يان حمدالله ...
جهبنة: اوى الله ينزل عليك اللعنة صبا صبا يالكذاب
جلال: جهينة ؟ مالك اش كاين ..
جهينة: فينك .. علاش كاذب عليا ...
جلال: فاش كاذب عليك الله يهديك ...
جهينة: راني عارفاك شاد كونجي معانا و انت مطول فيه غااع و انا ماجايبا للدنيا خبار و السيد ماعرت فين شادها .. داك النهار شحال و انا نعيط مالك ماجاوبتيني ... انا علاش مصدعة راسي معاك اصلا ... سنين و حنا مع بعضياتنا ... ديما صابرة على كذوبك و اهمالك و فينما كتبغيني كتلقاني ... كتعيط ليا 2 و لا 3 المرات فالشهر اما البقية انا لي نسول فيك .. مخلية ليك حريتك و ماكاندخلش فامورك حيت كنتيق فيك .. طايحة فمشاكل و انت ماجتيب للدنيا حبار .. عييت منك انا صافي ... واش انا مظطرة نصبر عليك مزال ؟ لا .. مامظطراش و نفضل نبقا حياتي بوحدي على نكون مع واحد معاك ... و دابا ضرب على شي وحدة سميتها جهينة عمرك تجي من جيهتي مزال ...
جلال: جهينة بلاتي .. *قطعات عليه*
جهينة: حمار حيوان كلب سفود البرادعية ... جابك الله نخرج فيك سمي ... تفووو ... مييبغد كنت باغية نستاغلو باش نشد بيه الضد مع الجلاخة لاخر ... اشنو ندير دابا 😟 تفووو اش داه يعيط ليا دابا ... * كيصوني تيلي و جاوبت بلا ماتشوف *
ايرتان: اقسم بالله العظيم و ماتباني دابا قدامي ياحتا مقلب الدنيا فوق رايم و انت عارفاني نديرها ... *قطع*
جهينة: اهيا وعدي ... راه انا لي غاضبة و معصبة .. اش معصبو تاهو ... ياخ على عشية .. الله يكملها بيخير ...
خشاتو فجيبها و تمات غادية .. بعد نصف ساعة و وصلات للحي فين ساكنة ... جاية بالشوية و كتضرب الحجر برجليها و دايرة ايظيها فجيابها .. حتى قفزها صوت ايرتان من الفوق كيغوت ...
ايرتان: بشوييييييية على مك باقي الحال 😡😡😡
هزات راسها شافتو و هي تبدا تولول و تندب و طلعات كتجري و تلعن ...
جهينة:ويبيلي وييلي الجلاخة شوهني ...
وصلات للباب لقاتو واقف عليها كيف المردة ...
ايرتان: اش غاندير معاك انت 😡😡
جهينة سلتت و دخلت ... تبعها و سد الباب ...
ايرتان: فين كنتي ..
جهينة: ها...هاد الوضع مامريحنيش ... واش فينما نخرج تبقى تسول عليا فين كنت ... راه ماعندكش الحق ...
ايرتان: هاد الهضرة كوليها ... داك الحق عطيتو لراسي و حاسبيني ياله ...
جهينة: واش انت حمق؟ علاش معصب دابا علاش راه انا لي خاصني نكون معصبة ...
ايرتان: علاش ؟ علاش خاصك تكوني انت لي معصبة ..
خرجتي بلا ماتقولي والو و انا لي كنت كانوجد لسيادتك باش تعشاي ... باش تجاوبني و تقولي ليا جلال 😡
جهينة: جلال ؟!!
ايرتان: اه... عيط ليك ؟
جهينة : ماسوقكش ...
دارت باغية تدخل و شد دراعها رجعها ...
ايرتان مغمض عينيه و كيهضر : مانعاودش سؤالي ؟
جهينة:ايه ... عيط ليا .. فاش خصك هادشي ...
ايرتان: هذاك ما صالحش ليك .. خاصك تفارقي معاه ..
جهينة: فين كتعرفو ؟ باش عرفتي ماكيصلحش ليا ...
ايرتان؛ انا عارف شي امور انت ماعارفاهمش ...
جهينة: علاش شكون انت ؟ و كيفاش عارف ... ياله شرح ليا ...
ايرتان: ماشي سوقك فهادشي ... لي خاصك تفهميه هو داك خاينة خاصك تفارقي معاه ..
جهينة: و الى مابغيتش ؟ سمع نقول ليك .. هذاك كنبغيه و مامفارقاش معاه .. واعطيني بالتساع ...
طلق منها ايرتان ... غلباتو و حصلاتو ... عينيه بقاو غارقين فعينيها ... حتى من الرمشة مادازتش على عينو ...
جهينة : شفتي .. حنا ما بيناتنا والو ... ماتنساش حنا غير مريض و ممرضتو ...
مشات و خلاتو واقف ... اول مرة كتغلبو بالهضرة حيت اصلا جوابها لي غايجاوبو ... هو بنفسو مامعتارفش بيه و كيحاول يتبت لنفسو العكس ... بلي جهينة ماكاتعني ليه وااالو ...
ايرتان : عندها الحق ... شنو بيناتنا ... ضبر راسها ... غنكمل لعبي و غنمشي بحال الى ماوقع والو ... خليها تعوم بحرها و تغرف معنقة عنادها ...
عند جهينة ... سدات الباب و جلسات فالسرير ... عيات تحبس دوك 2 دميعات و والو ... حسات بشعور خايب ورى هادشي كامل ...هبطات راسها بين ايديها و قالت ...
جهينة : اشنو كندير فحياتي ياربي ... كان كولشي مقاد كيفاش ترون هادشي و تشوشو مشاعيري ... مابقا فيا ماننكر .. داك السيد خرج عقلي من بلاصتو .. مابقيتش عارفة راسي اشنو كندير ... مابقيتش قادرة نتحكم فنفسي و لا فشنو كنقول ... و شنو الى تقلبات الاية و هو نجح فلي باغي و انا لا ... اشنو ندير ياربي شنو ندير ... خاصني نتصرف ببرود معاه ... صافي ماغانخليهش يوصل لداكشي لي بغا... و بحال والو هاد الغضب ديالو يكون فإطار التحدي لي داير ... كيفاش مارديتش البال ... و واخا نموت و مانطيحش مستسلمة قدامو ... صافي هادشي خاصو يساالي هنا ... خاصني نحمي راسي ...
عند ايرتان ... جلس فالسداري لايح رجلو المهرسة مسرحها فالارض و الاخرى جامعها ... لايح ايديه ب2 فوق فخاضو ... عينيه كيشوفو فالارض و عينيه ظلامو بحال الى خسر فشي معركة دامية ... و نيت خسر قدام ديك الصغيرة ... لي فالاول كانت مجرد مزعجة تعرضات طريقو ... و دابا و لا فصراع دائم مع نفسو كيحاول يتبت بلي جهينة مأتراتش فيه و ماخلاتش قلبو يلين و يتحلو بيبانو ... البيبان لي كانو مسدودين و عمرهم تحلو ...عمر شي وحدة قدرت و لا حتى تجرأت تقرب ليه ... حيت ماشي غير سادو بل مشمعو ... حياتو كلها مرأة وحدة لي كانت قريبة ليه هي امو ... اما حتى ختو و جداتو ماكانش عندو معاهم ... من ديما كان قلبو بارد برود التلج و قاسي قساوة الحجر ... كان مرتاح و راسو هاني و لكن دابا لا و هادشي اكتر حاجة مابغاهاش و خايف منها ... راحة البال لي ماغاتبقاش و جهينة فجنبو ...
حار ماعرف واش يحميها من ضعفها و لا يتخلى عليها باش مايزيدش يتعلق بيها اكتر و يخليها للذياب يذيرو فيها ما بغاو ... اول مرة فحياتو كيحير و ماكايلقاش حل مناسب يفك بيه مشكلتو ...
ايرتان ناض فجأة وشير بفاز حتى تشتت مع الحيط و قال : ميييييغد 😡😡
جهينة فالبيت قفزت ووقفت ...
جهينة: مال هذا ؟ 😟
خرجات بالشوية كطل ... لقات الفاز مشتت و الباب ياله تسد ..
جهينة: اويلي واش هذا خرج ... 9 الليل هاذي ... خليه يضبر راسو 😠.. *تمات غادية للبيت ورجعت* ولكن رجلو مهرسة ...
دخلات لبيت هزات السوارت ...
جهينة: صافي اجهينة غير من باب الانسانية و صافي ... محتاج المساعدة و غنصبر حتى يبرى و نكركبو ... صافي هادشي لي كاين ...
سدات الباب و هبطات كتدردغ لقاتو شير لطاكسي ... و هي ركبات فسيارتو هو و تبعاتو ... غادية مبعدة على الطاكسي...
جهينة : اوف فين غادي هذا ...
بعد مدة ... وصل للبحر و نزل ...
جهينة: ناااري لمك شو فين هبط ... نخرج نتبعو ؟! صافي نخرج و لي ليها ليها ...
خرجات و غادية تابعاه ... مبعدة و بالشوية ... دخل مع الرملة ... حيدات سباطها و بقات غادية خطوتو بخطوتها و هو مضارب مع عكازو حتى وصل .. جلس فوق واحد الصخرة و جبد كيكمي ... تخبات هي فواحد القنت كتراقبو و حاضيا جنابها ...
كتشوف فيه جالس هادئ هدوء البحر تماما ... دخان كيطلع حتى كيغبر فالهواء ...
جهينة؛ لي شافو يقول انا لي كنلعب ليه بمشاعرو و طالقاها عليه باش يتزعط فيا و نزيد و نخليه كيتشوى ... داك الراس عندو ماعرت اش فيه ... ناري اللهم محنة داك الزمر ديال جلال و لا محنة هاد الجلاخة ... *جلسات قفازية* باينة فيه مهموم 😟 واخا هكاك بحالتو دابا بقا فيا ... ها قلبي غيحن تاني و نوض نجري عندو بحال الى ماوقع والو ... *سمعات الحس و زادت تخبات*
بانو ليها الكليكة جايبن و اشرف محيح ... وقفو عليه سلمو و جلسو حداه ...
جهينة: ها المساخط جاو يتلفوه ... نمشي ؟! و باش غايرجع ؟!
عز: فين البنت ؟ فالدار ...
ايرتان: مخبية ورى الصخرة بلا ماديرو دورة الطوبيس ...
اشرف جلس قدام ايرتان و بدا كيعوج عينيه غير بالريط و كيطل بنصف عين و هو كيفرنس ... بان ليه شعرها طاير و نصف وجها كيطل ...
ايرتان قدامو كيخنزر فيه .. جبد عكازو و جبد معاه حتى لواه فالارض ...
ايرتان: انت راه طلعتي ليا فصحتي بهاد الحماق ديالك ..
اشرف: مالك مع عشيرتي الجديدة😂😂 علاش مخبية بوحدها تما ..
عز: تخاصمتو ؟
ايرتان و عينيه على البحر : تناقشنا ...
فؤاد: الجاذبية خدامة خدمتها ...
شاف فيه ايرتان بنصف عين و رجع كيكمي ...
فؤاد: هههه و مالك ... بلا متنكر واضحة وضوح الشمس فنهار جميل ... فاش كيتجمع ذكر و انتى تحت سقف واحد ... كايكون واحد المصير مامنو هروب ...
ايرتان؛ داك المصير مكاينش فقاموسي غير هنيو بالكم ...
عز: راك غير كتمحن راسك ... عطي راسك فرصة ... و جهينة منين شفتك حطيتي عليها عرفتها شخص ماشي عادي ... حيت انت عمر الحاجة العادية ماجدباتك ...
جهينة: انا .. غير .. بقا فيا ... *غوتت و هزت صبعها السبابة باتجاهو * واخا مايستاهلش و راسو قاسح 😡
ايرتان شاف فيها مغوبش و هو يشد ليها صبعها هو شادو و هي حامياها غوات و كتحنقز باش يطلقو حتى طرطقو ليها عاد طلقها و جلست فالارض مربعة و موقفاه و كتبكي عليه ...
جهينة: صبعييييييييي الحمااااار 😭😭😭
ايرتان: نوري لوالديك كيفاش تبوانتيه عليا .. انا لحسك لي راسي قاسح .. و زايدون اش مخرجك .. لاش تبعتيني و الليل هذا .. شوفي لبسك ... هاد الصباح كنتي كتشكاي من البرودة ...
جهينة كتهرنن مفمضة عينيها و حامياها: بعد منيييييييي 😭😭😭😭
عز: هههه تفرق منها اصاحبي ...
اشرف هبط عندها و نوضها من الارض ... و عنقها بالجنب ...
اشرف: صافي صافي مايبقاش فبك الحال راه غير جلاخة هذا ماكايعرفش يهضر بحال الناس...
ايرتان: واللهتا نوض نشقلبك انت و ياها ...
اشرف: اووووه ايرتان مزاجو هاد النهار غير ديال التشقلييب ... *دار عند جهينة* اش درتي ليه المسخوطة 😂
جهينة: على هاد كتدار ليه ؟ شوف غير التخنزيرات لي داير فينا كيف دايرين ... و انا لي خاصني نغضب و نتعصب عليه ماشي هو *دارت فيه شوفة تقطع الريوس*
ايرتان شافها و طلع و هبط فبها و حرك براسو لجهة الطوموبيل زعما زيدي قدامي ...
وهي تقول ليه : رجع بالطاكسي فاش جيتي ياله ...
ايرتان غمض عينيه بعصبية و قال : 2............1 ......
خسرات وجهها طلقات من اشرف و مشات لعندو شدات فدراعو ووناض ...
جهينة: بسلامة احنا مشينا 😊
الكل : باااي ...
اشرف: متبقاش تلوي ليها صباعها ا ديب الفجر راهم على قد الحال 😂😂😂
ايرتان غمض عينو بالفقصة و جر جهينة لي غادية و كدور تشوف فالدراري لي كيضحكو ...
جهينة شاد فايرتان يد ملوية على ظهرو و الاخرى مكالية سدرو و هزات عينيها فيه و قالت : كيفاش هاد ديب الفجر 😂😂😂
ايرتان مجاوبش ...
جهينة: كان قال ليا عزيز عليك تفيق فوقت الفجر ... و ديب جات معاك اذا ديب الفجر هو النيك نايم ديالك ...
ايرتان : داك الحيوان خاصني ندير ليه لجام ... اش قال ليك آخر ...
جهينة: اش غايقول غااع .. هضرة من هنا و من لهيه ... كولشي داكشي عارفاه عليك ...
ايرتان شاف فيها بنصف عين : اش عارفة ...
جهينة: عارفة بلي انت جلاخة و نفسك فنيفك و شوفاتك كيسوسو الركابي و و عزيز عليك الماكلة الصحية و لكن كتكمي يعني كتضرب كولشي ف0 و كتفيق فالفجر و دغيا كتعصب و صعيب نشوفو ضحكتك ...
ايرتان ضحك ضحكة خفيفة و كيشوف قدامو : هههه اوى لاباس ...باراكة عليك غير هادشي ...
جهينة: اووو من لحظة من اللقطات النادرة لي كتظهر فيها ابتسامة ايرتان النازي و كتبين بلي عندو سنان و ماشي فرم ..
ايرتان: غاتسكتي و لا غندفنك هنا و نزيد ...
جهينة حلات السيارة : ركب ركب .. الجلاخة غير جلاخة ...
سدات عليه الباب و دخلات لجهتها ...
شافت فيه لقاتو كيخنزر بنصف عين ... شوفتو فكراتها فنقاشهم و مخاصمتهم و هي دور و جهها بنفرة ..
ايرتان: آش ديك الشوفة ؟
جهينة :ا شمن شوفة 😠
ايرتان : لي درتي فيا فالبحر ...
جهينة: اوى شوف انت علاش ؟
ايرتان تنهد و شاف قدامو : واخا ... سمعي اش غانقول ليك ... داكشي ديال الاعتذار و الامور العاطفية ديال البشر ماعنديش معاهم ... فاش سولتك داك السؤال كانت شي امور فبالي انت ماعارفاهاش ... و انا ماكنبررش ليك تصرفي دابا ... حيت مانادمش ... لي خاصك تعرفي هو انا عارف بلي انت بنت غير بنات جيلك فهمتك و عرفت عليك اكتر ماكتصوري ... و سؤالي ماكانش كيدل على انني كنفكر فيك بديك الطريقة ... و انما عارف ضعفك فين كاين و بنادم شنو ممكن يدير ...
جهينة... تهز مودها من اسفل السافلين الى اعلى الاعالي و غير ب2 كلمات منو ... عجبها كلامو و فهمات بلي كاينين شي امور مايمكنش يتشافو غير الى وراهم ليك شي حد ... حماسها الداخلي و فرحتها مابانوش عليها خارجيا .. راكم عارفين داكشي ديال عزة نفسي... دورات وجهها للجاجة لي حداها حيت بزز باش قادا تحبس ديك التبسيمة لي فوجها ... قبل ما يعاود يهضر دارت عندو وقالت ..
جهينة: و شنو غاع الى اعتاذرتي راك واخا هكاك جرحتيني ...
ايرتان: و علاش غنعتاذر .. راه قلت ليك انا ماكنتش كنبرر ليك ... فهميها كيفكا بغيتي سوقك هذاك ...
جهينة: ياك ؟ ماقادرش تخسر فيا اعتذار واحد ..
ايرتان: لا ... بما اني ماعنديش الحق نتدخل فيك حيت ماكانعنيو والو لبعضباتنا حتى الاعتذار ماكاين لاش يكون و لنفس السبب ...
جهينة: يااك ؟
ايرتان: اه ... مافهمتكش انت لي قلتيها و زايدون اش خرجك و تبعك ليا مادام مابيناتنا والو ..
جهينة دارت قدامها و كتحك فعنقها : انا .. غير ..
ايرتان: غير شنو ؟
جهينة: شفتك خرجتي بوحدك و انا ممرضتك مسؤولة عليك واجبي نهتم بيك ... غير من باب الانسانية و نرضي ضميري ...
ايرتان:ضميرك ؟ باش ترضي ضميرك و من باب الانسانية خارجة مع 9 الليل و تابعة واحد للبحر و بحوايج بحال هكا ؟... الى كان هكا غير تعلمي تكوني انانية و تقتلي داك الضمير حيت ماغاتطوليش فهاد الدنيا بيه ...
جهينة دارت قدامها و ديمارات ... ماقاداش تجاوب معاه بكل بستطة مابغاتش يرجعو يقلبوها صباط تاني ...
وصلو و طلعو للدار ...
جهينة: انا فيا الجوغ ...
ايرتان داخل : سخنيه راه فالكوزينة .. انا غانعس ..
جهينة: غناكل بوحدي ؟
ايرتان: باغاني نوكلك ؟
جهينة: لا ... ولفتك تاكل معايا .. غير جلس معايا غاع الى مافيكش ...
ايرتان : فيا النعاس ...
تم غادي و طارت شدات فتيشورت ديالو و كتحنقز و تطلبو ...
جهينة: عافاك عافاك عافاك ...
ايرتان: متبقتيش ديري ليا داك الوجه 😡
جهينة: ههه هي اااه ... *جراتو من ايدو *
جلساتو بالزز فالصالة و شعلات التلفازة ..
جهينة: الى دخلتي نتخاصم معاك ...
مشات للكوزينة كتحنقز و هو بقى متبعها حتى دخلت و هو يسميركي ( نصف ضحكة )
ايرتان: واللهتا غاتجيب ليا التمام هاد الكمشة ...
جهينة واقفة على العشاء كيسخن و كتبسم غير بوحدها ..
جهينة: يعني ماكيفكرش فيا هكاك .... يييييي دابا كنحس براسي مزيان هههه ...*جمعات الضحكة* بلاتي علاش مزيان ؟ ... يضبر الراسو يفكر كيف بغا ... *ربعات يديها و هزات راسها و لكن سرعان ما طلقاتهم و بدات تنقز و تصفق بايديها و تضحك*
ايرتان: وا طلقينا ..
جهينة: آني جااياا ...
سخناتو و حطاتو فطباسل و خرجات عندو ...
جهينة: ريحتو كتشهي 😍😍 ...
جلسات حداه و جرات الطبلة عندهم ربعات رجليها و هزات الطبسيل و الفورشيط ... و هو مربع ايديه و كيشوف فيها بنصف عين ... كلات اول دغمة متحمسة بدات تندغ و عينيها بداو يبريو و بدات نشوف فيه ...
جهينة: شنووو هادشي 😍😍 ناري من دابا ماباغياهش يتقادا ...طايب مزيان.. هشيييش و مجوووسي هكا كيعجبني ...
ايرتان: كولي و سكتي ...
جهينة كتاكل و تصدر اصوات : مانقدرش بنين بزاااف من اليوم ..
قاطعها : واخا تموتي ...
جهينة: ياله غير مرة مرة ... طيابك لا يقارن بديالي ..
ايرتان اكتفى بمراقبتها ... جهينة كتاكل و تلذذ عجبها طيابو بزاف و ناسب ذوقها ... حتى سالات ز شافت فيه ..
جهينة: ماكلينيش ... واش نوكلك ..
ايرتان : غير كولي انت .. انا مافياش ...
جهينة: غاعلا ...
خداتو و صفاتها ليه تاهو ... سالات و ناضت غسلات الماعن ... خرجات لقاتو دخل للبيت و مشات عندو ..
جهينة: ايرتان؟
ايرتان: دخلي ...
جهينة: نعستي ... خاصني ندير ليك ماساج ليدك ...
ايرتان: واطلقي .. بغيت ننعس ..
دخلات و جبدات برودوي من المجر و جلسات قدامو ...
حادرة عينيها و جبدات يدو عندها ... دهنات البرزدوي فيدها و بدات تماصي ليه المعصم ديالو و عظام راحة يدو ... ماكايفلتش فرص يشوف تفاصيل وجها و هي قريبة ليه ... اما هي كتشوف فيدو و كتماصي ليه و فنفس الوقت كتشوف فشكل يدو الكبيرة و الحرشة و فيها ندبات صغار و قدام و عروقو خارجين و باينين طالعين حتال دراعو ... هادشي عمرها لاحظاتو حتى مساتو بيديها ... حتى تفاصيلو الصغيرة و العادية كيعجبوها ... عمرها فكرات بهاد الطريقة و هي مع جلال ... اما هو كيشوف فيها و يرجع يشوف كيفاش كتلعب بايدو و كتماصيها ليه باتقان .. آلمو ناسيه و almost كيحس بيه ... اكتر حاجة كتجدبو ليها هو داك حنان الام لي فيها ... ديما فاش كتدوش ليه و لا كتعاونو يبدل و لا كتوكلو و اي اهتمام شخصي بيناتهم كتفكرو فحنان الام ...نفسو داكشي لي ما خداهش و هو وسط واليديه ... ديما كانت الامور مجرد شكليات ... و لكن دابا كيجربو و كيتلقاه من القلب ... هادشي غريب تماما عليه ... احاسيس ولات كتخالجو عمرو تخيلها و لا فكر فيها حتى التفكير و ... ايديها الصغار و الرطبين عجبو ملمسهم و ماكرههاش تبقى هكاك لاطول مدة ممكنة ... للحظة شد يدها و هزات عينيها فيه ... جرها لعندو و حطها على حنكو ...
حركتو نجحت فتسريع دقات قلبها ... كتشوف فايدها على حنكو و غمض عينيه ... وقال ..
ايرتان: ماشي غير قلبك لي دافي ... حتى يديك ...
جهينة سكتات و بقات هكاك بدون حراك ... حركاتو ديما غير متوقعة ... كيلعب بمشاعرها بحال الى ولا عندو جهاز التحكم بيها .. مرة مفرحها مرة محشمها مرة مقلقها مرة مضحكها مرة معصبها ...
للحظة و هي مستمتعة وهي قريبة ليه .. جات فبالها : جهينة تهزي الله يعطيك السم راه طالقها تسرح ..
جهينة ناضت من gلبتها ... ربطت غوباشتها و هي تشد لحيتو بيدها و نتفاتو منها ... حل عينيه و شد ايدها كيتحل ...
ايرتان: وااااش لمممك تسطيييتييي 😡😡
جهينة وقفات : باش نوريك كيفاش تطنز عليا 😡😡
خرجات من البيت كتخبط فرجليها و خبطات الباب و حلاتو كيشوف مصدوم من تصرفها ... عاد كانت بعقلها حتى ناضت كتنتف ...
ايرتان شاد حنكو : وا بربي حتى حمقاء و غاتحمقني ...
جهين كتسرح ففراشها و كتنغر ...
جهينة: مزيان مزيان ... 😠
تخشات ففراشها كتشوف فالسقف ... بدات كتبسم غير بوحدها ...
جهينة: الله يستر واقيلا حماقيت ...
دازو يوماين ... نفس الصداع و المشاكيل بيناتهم مرة مصالحين مرة يتناغرو ...
اليوم غايسافرو مع الدراري لشي منطقة فالجبال باش يخيمو فالغابة ... جهينة فايقة فرحانة و راشقة ليها كتجمع و تلم حوايجهم ... و تدور و تهدر ... نفخات لايرتان راسو بالحماس ديالها ... جا الوقت باش ينزلو حيت عيطو ليهم الدراري و علموهم بلي وصلو ...
غير و صلو و شافت اشرف و تعانقو كيتناقزو ب2 بحال شي بعالك ...
عز: اهلا ..
فؤاد: اري داكشي ....
خدا من عندها اغراضهم و حطهم بالسيارة ...
اشرف جر جهينة عندو : هههه غانخربوها اليوم ..
جهينة: متحمسة غنتسطى بالفرحة 😁😄😄
ايرتان: على انت ياله غتسطاي ؟ طلعي قبل مانرجع فكلامي ...
دخلات و جا اشرف يركب حداها و هو يجرو ايرتان من قفاه و لاحو ... و ركب هو ..
اشرف: فعايل ولاد الروض هادو 😂😂
جهينة: ههههه حشومة عليك علاش طوعتيه ...
ايرتان : سدي فمك انت ..
اشرف : غير خليه جابها لراسو ..
ركب اشرف حداهم و سد الباب ... حيت جلسو ب3 اللور ... و عز سايق و فؤاد القدام حداه ...
عز: و تبدأ رحلتنا إلى المتعة ...
ايرتان: قول و تبدأ رحلتنا الى جهنم الكحلة مع 2 افواه متحركة ...
غير قالها و تلاحو كيضحكو ..
جهينة: بزاف عليك ...
اشرف: ههههه هضر علينا؟ ...
ايرتان رجع راسو اللور و غمض عينيه يتصنت لعظامو .. عز ديمارا السيارة ...
جهينة: فين غانمشيو دابا ..
فؤاد: ماقالش ليك ايرتان ؟
جهينة: كيحل فمو غير الى بغا يعطي الاوامر و لا يخاصم عليا 😠
عز: ههههه ايرتان لي اختار غانمشيو ل*******
جهينة: اوااااه 😲😲
اشرف : مالك ؟
جهينة: تما بعيد على الفيرمة ديال خالي غير بشي 20 كيلومتر تقريبا ...
اشرف: بالصح ... هي غاتصتادفينا عندو تبرعينا ...
جهينة: البعابع ... انا لي عندي مي ساكنة تما و مامشيتش عندهت هاد العطلة ... بقا غير نمشي على غفلة و معيا 4 العزارا .. بغيتيهم يدبحوني ...
اشرف : و علاش ماتمشيش عند امك ... ماتوحشتيهاش ؟
جهينة: لا ماكنحملش خالي و طاسيلتو تقااال على القلب و ماعنديش معاهم ... و عاد خالي باغي يلصق فيا ولدو ... واحد المنونخ واحد المجلج كيفقص خارج من الكاطريام و عزيز عليه يدير فيها رومانسي و جذاب .. قاتلني بالمقاطع ديال الغنا ديال افلام الشاروخان فالواتساب .. مافيدو لا خدمة لا صنعة عايش معول على باه ... لا شخصية لا كاريزما
اشرف و فؤاد و عز : ههههههه
اشرف: باغين ياصقو ليك مونتيف ولاد اللادينا 😂😂
جهينة: ياك شتي ماتبغيهاش لعدووك ...
عز: ولكن واخا هكاك الوالدة ديالك خاصك تشوفيها .. اما ولد خالك قولي لا و فرضي رأيك راك ماشي صغيرة يتحكمو فيك ...
جهينة: اودي ... شكون مسوق ليهم كتدخل من هنا و تخرج من لهيه .. انا همي غير فماما لي مريضة بالقلب ... كون كان بيدي نجيبها حدايا و مايخصها والو و نتهنا من بنادم .. ولكن هي عزيز عليها خوها و دار باها و عاد الجو تما موافقها على هنا ...
فؤاد: ماشي مشكل ... على صحتها صبري ...
صونا تيليفون جهينة ...
جهينة: سمحو ليا ... الو الحمارة ...
ايناس: فين غابرة علبا الكلبة ...
جهينة: قولي انت لي فين غابرة ؟ و لا قولي ليا عتمان مامخليش ليك فين تحكي راسك ..
الدراري سمعوها و سقلو ... كتغوت و بالتركية ... بداو يشوفو فبعضياتهم و ضربو الطم ... و حتى ايرتان مكانش من الغافلين .. ساد عينيه و حال ودنيه على الآخر ...
ايناس تاهي قلباتها تركية : و الله ينعل مك ... هاملاك مالي قاطعة عليك البزوولة ... و زايدون ماتبدليش الموضوع اش مخرجك وسط الغابة مع 4 الرجال مابقيتيش تحشمي صافي ...
جهينة: ماتخافيش .. خارجة نسقي عويناتي كون تشوفيهم واحد ينسيك فلاخر اشمنك يافورمة و ياشعر و يازين و شي حطات و ظريفين ... خاصة واحد فيهم ... مطلوووق و هو التيتيز فيهم غاع توافقنا انا وياه و جاني على gاانتي ... شي نهار نعرفك عليه ...
الدراري كيسمعو و يضحكو تحت نيوفهم اما اشرف كيطل بنصف عين عليها مدرق بايرتان و داير يدو على نيفو حيت الى مشا حتى تفرغع بالضحك غيقتلو ايرتان ... بالحديت على ايرتان تاهو كان كيتصنت و يتغدد غير مع راسو و كيتسناها تزيد تزبلها يطوع جد بوه داك تيليفون من الشرجم ...
جهينة؛ هههههه راه غير بغا يشد فيك راه عارفك طايحة فيه و ما تقديش تحزقي بلا بيه ...
اشرف دار بفففففففففف مابقاش قاد يشدها تفرغع بالضحك و بالدموع شافت فيه جهينة وهز تيليفون زعما شي حاجة فتيليفون ورجعت كتهضر فتيليفون ... ايرتان حل عينو خنزر فيه تخنزيرة ديال الموت ... شاف فالدراري فالمراية لقا كل واحد خاشي راسو فقنت كيضحكو و يتعصرو بلا صوت ... و شاف فجهينة لي كتهضر و تبرول بالتركية نفخات ليه راسو ..
جهينة: مهم تهلاي ... الدراري حدايا و هضرت بالتركية ما بغيتش يفهموني ...
ايناس: وا حضي راسك و تسيلفاي معاهم و سيفطي ليا التصاور ...
جهينة : لي فيك مامهنيك مخاصماك مع راجلك على هادشي و باقا كتسولي على تصاور الدراري ..
ايناس: اوى راك عارفة صحايبتك ...
جهينة: ياله تلاحي ... و تكايسي لا تخرجي بالتوام راك مقفرها من عند خالتي.....ااه و البارح عيطات ليا حيت ماجاوبتيهاش و بقيت ندوخ فيها .. غضور ليا فالخوى غنطلق ليها الفيلم كولو ... والله الى كتبقى فيا مسكينة كتوجد العرس و داكشي و بنتها مابقا ليها والو و تجيب ليها شي نونو 😂😂 كنتخيلها فاش غاتعرف ...
قدري أن أحبك الجزء الخامس
محتوى القصة
التنقل بين الأجزاء