قدري أن أحبك الجزء 13

ايرتان : الله يعطيك 2 صحات ... 

جهينة : بان فيك العيا ... كل و نوض ترتاح ..

ايرتان تبسم ليها .. كلاو و ناض ايرتان طلع اما هي هي دارت الماعن فالجلاية و طلعات ... لقاتو متكي فبلاصتو و نعاااس ..

جهينة قربات لعندو ... غطاتو ... و حل عينيه .. تصوخر و جرها لعندو ... 

جهينة : فين جارني ... غانفرش فالارض .. 

ايرتان شبه نائم : غير خليك هكا ... 

سكتات و بقات كاتشوف ... هزات راسها و تكات على جنبها و كلات راسها بيدها .. و تقابلت مع وجهو ... حتى نطق و قال ليها بلا مايحل عينيه .. 

ايرتان : مافيكش النعاس ؟ 

جهينة : لا ... 

ايرتان : بطبيعة الحال .. نعستي فالدار و فالطيارة .. انا راه ماغامضتوش نهائيا ... و هادشي على قبل واحد القزمة خاص لي يحضيها منين تكون ناعسة فبلاصة ماشي دارها ... 

جهينة ضحكات و حطات يدها على حنكو و قربات لوجهو و باستو ... 

جهينة : يخلييك ليا ... عارفة راسي محناك ههه .. عنداك نطلع ليك فراسك ..

ايرتان حل نصف عين فيها وقال : 

ايرتان : و علاش غاطلعي ليا فراسي ... 

جهينة كاتلعب فوجهو بيديها : راك عارف زعما انا تصرفاتي صبيانية و ديما شاطناك و مخليا روينة ورايا ... 

ايرتان : اه بالصح .. ممكن تطلعي ليا فراسي ... 

جهينة غوبشت و ضرباتو للسدرو .. ضحك و شدو .. 

جهينة : و لايني راه ماعندك قلب 😠 

ايرتان : هههه و الى مابغيتيش طلعي فراسي ... عندك واحد الحاجة كاديريها كاتشفع ليك كولشي .. 

جهينة : شنو هي ... 

ايرتان : تقادي ... 

جهينة دارت كيف قال ليها و شافت فيه مستغربة ... حتى حط راسو على سدرها و تخشا فيها كيف شي دري صغير ... شد يدها و حطها فراسو .. 

ايرتان : ديري كيف موالفة ديري ... 

جهينة حسات بالغرابة فالاول ... و لكن منين شافت على وجهو الارتياح ... حسات بحال الى كايتسالها هادشي .. من ديما كان حضني الملاذ ديالها .. خاصها ترد ليه داكشي لي كايعطيها ... و تريحو فوقت التعب ديالو ... خلات يديها كايتخللو بين خصلات شعرو .. بحال شي ام وولدها ... ما إن خشات يديها فراسو نعس و استسلم بين يديها ... بقات جهينة شوية و تبعاتو ...

اصبح الصباح ... فاقت جهينة على احسن دقة فالجبهة ... شداتها و بدات تنغر و هي ناعسة .. 

جعينة : بعد مني الحغاااار 😖😖 

ايرتان : نوضي تغعدي و انت تلويتي فيا و ليت نعس حداك نفيق نلقاك مخبلة فيا ... 

جهينة : حلات نصف عين لقات راسها لايحة عليه رجليها و خاشيا يدها تحت ظهرو ... 

ناضت كاتحك عينيها ... وقالت 

جهينة : شحال فالساعة ... 

ايرتان شاف مغانتو : 12 ... 

جهينة : باقي الحال .. 

ايرتان: جيتي للتركيا باش تنعسي ؟ 

جهينة تحلو عينيها اوتوماتيكمون بعد سماعها لكلمة تركيا .. و ناضت كاتشتف تاني نقزت لجهة الشرفة حلاتها لقاتو بالكو و خرجات كاتطل .. و تحنقز .. كانت الشميسة كاتطل صوت الطيور و العصافير و الماء هادئ مع اصوات بعيدة ديال القوارب ... و الشجر كايتحرك بالريح الخفيفة ... 

بقات كاتطل و تسر نغسها بالمنظر حتى حسات بيديه محاوطينها من لور ... 

ايرتان : عجبك هنا .. 

جهينة : عجبني !! تاقول حمقني ... كيفاش مخلي بلاصة بحال هادي و جاي للمغرب .. 

ايرتان : المعدغرب مشيت ليه غير ندوز اخر ايام الصيف فيه ... لا انا لا الدراري مستاقرين فيه ... 

جهينة : اممم فهمت ... 

ايرتان : تبغي تسكني هنا ؟ 

جهينة : كان حلمي نعيش فتركيا .. فاش كنت صغيرة و لكن مايمكنش ليا راك عارف ماما .. قلت غير نزورها شي صيف الساعة حتى الزيارة ماكتابتش .. 

ايرتان باس حنكها : حيت قدرك تجي مع حبيبك ليها ... 

ضحكات و ضارت عندو ... 

جهينة : هادشي لي بان ليا 😇.. 

باس راسها و قال .. 

ايرتان : ياله بدلي حوايجك عندنا شلا مايدار ...

جهينة : حلف حلف 😍😍 

ايرتان دار دخل للبيت : رجعنا لسيرة الحلووف تاني ... 

تبعاتو كاتحنقز و تشعبق فيه ...

حل الباب ... خرجات هي و هو وراها سد الباب .. 

جهينة : فين انمشيو .. 

ايرتان : غادي نتسركلو ... و غانغديك باحسن شوا غادوقيه فحياتك ... و من تما نشوفو شنو نديرو .. 

جهينة بدات تحنقز بملامح طفولية : ناااري غانتسطى ليك هنا ... مامتيقاااش جيت للتركيا و غاندور فيها و مع السااط ديالي .. و ناااري الفراشات هلكووني ...

ايرتان : اجي الساطة ديالي ... *عنقها بالجنب*تبتي الله يرضي عليك .. واش انت بنت و لا كنغر .. 

جهينة : ماخليتي باش قارنتيني .. ها دبدوبة ها نعجة ها ديبة ها كنغر ... شنو غاتسميني آخر ..😠 

ايرتان : اه و كاتشعبقي يعني قردة حتى هي داخلة .. 

جهينة : اشنو قلتي 😠 

هرب و تبعاتو شادا حجرة ...

غادي هو و ياها ... داير يدو حول عنقها و شانق عليها كيف عادتو ... اما جهينة غادية و كاتشوف فانحاء الشارع لي كايتمشاو وسطو بين المنازل التركية التقليدية ... لاحظت بلي كولشي الدروبة ملونين بالوان فاتحة كتسر الناظر و كولشي مزينين منازلهم بالورود و النبات التزيينية ... دروبة نقيين ..كولشي متول و مرتب .. 

جهينة : واااو😮 .. عرفتي هاد الدروبة احسن بالآلاف ديال الملايين ديال الملايير ديال البلايين ديال المرات من داك الخرى لي عندنا ...😞 

ايرتان : هههه *جمع ليها فمها فقبضتو * صلحي فمك راك بنت .. 

جهينة : حيد لهيه .. خرى تاهي كلمة خايبة ... 😑 و مالك انت لي كاتسب غير تحت السمطة ... حلال عليكم و حرام علينا .. 

ايرتان : غاتقارني راسك بيا ؟ انتوما النساء مرتابطين بالكيوتنس و الكبرياء و الاخلاق و الآداب ... اما حنا الرجال مرتابطين بالحروشية ...

جهينة قاطعاتو : و قلة الاداب ...😒 

ايرتان : هههههه شنو قلتي ؟ 

جهينة :اوى هي ماهي ... احنا العيالات مانسبوش حيت مربيات و نتوما الرجال كاتسبو حيت قلاال الترابي ... صافي فهمت ال point ديالك .. 

ايرتان حك مؤخر راسو :هههه ايااايااااي ... ماكانحملش هاد القيم ديالك فراسك ؟ 

جهينة : علاياش كاتهضر ؟ 

ايرتان : هههه والو ... نتغداو و لا باقي ماطاب جوعك .. 

جهينة : كاتسول ؟ انا جوعي ديما طايب .. 

ايرتان قرص حناكها : و ياله الدبدوبة ديالي نعتقو ... *باس حناكها * 

ضحكات جهينة و مشات فجنبو مشادين .. خرجها من الدروبة لجنب النهر لي كاين فدوك النواحي ... مجموعين صحاب المشاوي و الاكلات الشوارع .. كانو يإما عربات حديدية عليها شوايات ... يا إما عربات لنقل السلع... مفتوحة بشكل دكاكين كايبيعو الحلويات او السوندويشات و الشاي .. و حاطين كراسي بلاستيكية ... 

جهينة : الله على الروااايح ... 

ايرتان : اجي لهنا ... 

جرها وقفو قدام راجل كبير .. كان كايشوي فالسمك و بعض الخصر و الفلافل ... 

غير شافو الراجل و سلم عليه و ضحك معاه .. فهمات جهينة بلي كايعرفو ... سول الراجل فاحوالو و فغيابو و ايرتان كان كايجاوبو و كذلك كايسول فيه بدورو ... و طلب منو يعطيه بحال ديما ... و جر جهينة و جلسها فكرسي و جلس حداها ...كايشوف فالنهر و القوارب ... 

اما جهينة بقات كاتشوف فيه و قالت : واش مولف تتغدا هنا ؟ 

شاف فيها ايرتان مبتاسم و قال : اه ... اغلب الاوقات كانجي نتغدا هنا حتى عقل عليا .. عزيز عليا طياب هاذ الراجل ... هو مكايديرش غير الشوا كاينوع مرة مرة ... ديما كناخد من عندو و نمشي حتااال تما *كاينعت لواحد السور ابعد منهم * و كانجلس مكونصونطري .. فينما كانتجلا للدراري كايلقاوني تما .. شحال نقزنا من تما .. حتى تهرس عز واحد المرة هههه ... شتي ديك البنت لي تما ؟ 

جهينة شافت فيها كانت وكاتسربي : م .. مالها ؟ 

ايرتان لاحظ نبرتها و شاف فجهينة و ضحك : مالك صفاريتي؟ ههههه 

جهينة ضرباتو لكتفو: ماتلعبش معايا 😠😠 ... 

ايرتان : هههههه غرتي غرتي 

جهينة : و علاش غانغير انت اصلا باقي ما قلتي عليها والو .. 

ايرتان : و ياله غانقول ليك .. 

جهينة خرجو عينيها و جرات الكورسي حتال لاصقاتو مع ديالو و هي تقابل وجهها مع وجهو نيشان حتى اقتاحمت مساحتو الشخصية ... 

جهينة :دوي .. شكون هاديك 😠 

ايرتان : هههههه بغيتي تعرفي ؟ زعما متأكدة ... ماغايبقاش فيك الحال ... 

جهينة لوات فمها و بدات تضرب سدرو : كنت عارفاك غير كاتكدب عليا ... كنت عارفة عندك سوابق .. اكيد واحد بحالك مستحيل تفلتو شي وحدة واخا تربح معاك غير ليلة و تمشي ... 

ايرتان : هههههه هاااا بااان عيبك 

جهينة بدات تكحب باش تلفو .. عاق بيها و بدا يضحك... 

جهينة شافت فيه رابطة غوباشتها و قالت : زعما ماتفهمش غلط .. انا غير بينت ليك الامور كيف غادية فهاد الوقت .. و زايدون ماتلفنييش .. شكون هاذيك ؟ 

ايرتان : شكون ؟ 

جهبنة : ايرتان ...سخفتيني 😩

ايرتان : هههه ااه كاتهضري على البنيوتة .. والو غير اتاي ديالها احسن من ديالك ...

جهينة بقات كاتشوف فيه غمضت عينيها و دارت يدها فجبهتها مجسدة ليه كمية الفقصة لي تيليشارجات فهاد اللقطة ...هو بقا كايضحك و هزات عينيها فيه و قالت .. 

جهينة : دابا هاد الشحفة كاااملة لي شحفتييني .. باش تقول ليا اتايها احسن من ديالي ... وعلى اتاي تركيا هو ديال المغرب ؟ 

ايرتان : تقريبا و لكن نفس التيكستيير ... 

جهينة : سير بعد مني .. انت و رومانسية كيف الماء و الزيت ... جايبني حتال بلاصة بحال هاذي و شاد فيا و كاتعيب فيا ... ماصدقتيش .. 

ايرتان ضحك و دار يدو على خصرها من لور و جرها لعندو ووجهو فودنها .. 

جهينة : بعد مني صافي ...

ايرتان : اوى صافي .. ماشي انا لي نقلق دبدوبتي .. 

جهينة كاتدلي شفايفها و مربعة يدها : صااافي دبدوبتك قلقتيها ..غير سير بعد مني .. 

ايرتان : ههه إيييوااا ولينا نتغنجو و نتلفو بوونغ بونغ ديالنا و ندفعو عليه كبييير .. وا صافي .. غير ضحكنا معاك .. 

جهينة ضورات وجهها شادا الضحكة ... مابان ليه غير عنقها .. ماصبرش و باسها فييه .. حتى بورشها و ضارت عندو .. 

جهينة : اداك اه شد تيقارك .. 

ايرتان : اشمن تيقار بقا بيناتنا ... انت خليتيني نشد شي تيقار .. 

جهينة : اوى ااى كنتي كاتهضر على المباتة لي كانباتو ب2 راه غيير الضرورة هاديك ... و انت لي ولفتيني ديك القاعدة ..

ايرتان : هههه تانا ولفت ديك القاعدة ... يعني انت كاتستافدي مني و انا كذلك و هاحنا عايشين بسعادة .. 

جا الراجل مد ليهم السوندويشات .. 

ايرتان : تيشيكولار (شكرا )

البائع : آفييت اولسن 😊(بالصحة و الراحة )

مشا البائع ... عطا لجهينة ديالها ... دخلات فيه طول و عرض .. و ايرتان كذلك ... كملو ماكلتهم و هما كايدردشو ... و كملوه بالشااي ... بقاو تما شوية و ناضو يتمشااو .. هبطو لسوق شعبي على رجليهم ... لي شافتو جهينة تبغيه .. و لي ماعرفاتوش تسول ايرتان عليه ... قربها من التقاليد و العادات التركية اكتر ... 

جهينة : والله هادشي شي ينسيك فشي .. 

ايرتان شاف فيها ايرتان و ضحك على عفويتها ... 

جهينة : اجي ...*جراتو لمحل بسيط لصناعة الخرز * بغيت هاذو .. 

ايرتان : كاتآمني بهاد...

جهينة : بطبيعة الحال لا ... غير تذكار .. 

ايرتان : واخا الالا خودي لي بغيتي ... 

بقات جهينة كاتشووف و تقلب ... و هو واقف عليها يد فجيبو و يد كايلعب بتسبيحة صغيرة فيدو .. 

جهينة : حرت ... هادي ليا و هادي لايناس ... الرجال كايلبسو هادشي ؟ 

ايرتان : و انت شنو بغيتي فالرجال .. 

جهينة ؛ زعما لعتمان ... 

ايرتان : كاينين ديال الرجال .. بحال هاذو .. 

خدات جهينة و بقات تخير حتى ختارت شنو بغات و شافت فيه .. 

جهينة : شوف ... انا غانتسلف منك .. حتى نرجعو للمغرب و نرجع ليك .. 

ايرتان : نسلفك و لكن خاصني الفائدة .. 

جهينة : ماكانتعاملش بالريبة ... واخا تموووت* دوزات ظفرها على سنها* ماندزيدك السانتيم 

ايرتان : هههه شحيحة مع راسك و لكن انا فاش قلت الفائدة .. ماقصدتش السانتيم لي هضرتي عليه انت .. 

جهينة : و شنو هي هاد الفائدة بالسلامة ... 

ايرتان قرب اكتر و قال : غاتعطيني الحب ...

جهينة : ياء ... وعلى هاد لي كانعطيك شنو هو .. التقلية ؟ 

ايرتان : هههههه لا ... ماتبدل والو منين اعتارفنا لبعضنا ماتزاد والو .. وليت نقرب ليك تهزي صبعك ... اشنو استافدت انا من اعترافي .. 

جهينة : اوى اسيدي الى بغيتي الحب .. ياله نضربو الابيض فالكحل و العيب عليا لا قلعت ليك شي حاجة .. 

ايرتان : هههه بلاتي بلاتي بالشوية عليا ... كاتهضري على الزواج ؟ 

جهينة : و علاياش كانهضر ...البصلة ؟ 

ايرتان : هههه و على انت ا انسة قابلة تزوجي بواحد باقي ماعارفة عليه والو .. 

جهينة : يكفي كانعرف قلبك .. اما داكشي لاخر ممكن نتغاضى عليه .. 

ايرتان : ماتقوليييش هضرة ماتقديش عليها .. 

جهينة : هي مخبي عليا شي حاجة .. 

ايرتان دار تيرتان قدامو و رجع شاف فيها : دابا لا طلبت منك الزواج ... تقبلي هكا بلا تفكير ؟ 

جهينة قربات حتال عندو بابتسامة بريئة و شدات يدو ..

جهينة : لا ... انا ماغانتزوجش بجلاخة ...

ايرتان : شنااهوا ؟ 

جهينة : مالك كاتخرج فعينيك .. كيف سمعتي .. 

ايرتان : و علاش بالسلامة ؟ 

جهينة ؛ حيت انت جلاخة و قبيح و ruuuude ... 

ايرتان :اوى هكا بغيتيني و عرفتيني ... و يكون فبالك الى بغيت نتزوج بيك ماغاناخدش رأيك .. 

جهينة : و على رأيمن غاتاخد بالسلامة .. 

ايرتان : مك و من بعد غاتسني و ايديك فوق راسك .. 

جهينة بقات كاتشوف فيه مصدومة و قال : مالك ؟؟ هادي هي طريقة الجلاخات ... ياله خودي شنو بغيتي و زيدي قدامي .. و اللهيلا قالت ليك ماكانتزوجش الجلاخات ... كانلعب معاك انا هنايا 😒 

خلص و زاد خلاها كاتشوف و هي تبعو كاتغوت ... 

جهينة : وا داك اااه ؟ بلاتي باقي ماكملنا هضرتنا ...

دازت العشية وظلام الحال و هما باقيين كايتسركلو و يشريو ...و يتناغرو بطبيعة الحال .. 

جهينة : انت غاتحمقني مافيهاش ... ماغانتزوجش بيك حتى تقبل بشرووطي ... 

ايرتان غادي قدامها هاز السيكان التقدية فيديه و مغمض عينيه و هادشي بسباب هضرتها لي ماسالاتش على هاد الموضوع ... حيت ماتسرطاتش ليها هضرتو و بحال اي مرأة مستقلة بغات تفرض نفسها قدامو ... هو فاهم هادشي و لكن مع شخص بحالو بشخصيتو و قوتو لي فراسو فراسو و جهينة ماغايحيرش فيها .. خلاها تكمل هضرتها حتى تعيا و غاتسكت هادشي لي مولف معاها ... 

جهينة وقفات قدامو : معاك كانهضر ... وااش نيت يسحاب ليك غانتزوج بيك بلا موافاقتي و نشرط عليك شروطي .. 

ايرتان : واخا الالا شنو هي هاد الشروط .. 

جهينة : اوى سمع مزياااان ... انا ماشي تقليدية بحال البنات ماغانشرطش عليك داكشي ديال الصداق و داك تخربيق ديال العراسات و الدهاز و ماعرفت شنو .. انا كانفكر للمدى البعيد يعني ما بعد الزواج .. هاد المعاملة الناشفة ديالك غاتبدلها .. يعني فمك ديما يقول كااانبغيييك و غاتبقى تجيب ليا الورد و تكتب ليا رسائل الحب و تبقى ديييما تغزل فيا و تمدحني واخا نزيد نغلاض و خا تولي عندي الكرش واخا نولي شارفة .. واخا يوليو عندي علامااات التمدد فجسمي و لا الكلف فوجهي و لا الشيب فراسي ... مابغيتكش تولي راجلي بغيتك تبقى صااحبي الساااااط ديالي .. تبقى ديما تبغيني و عمرك تغدرني و لا تمل مني ... واخا نغلط تعذرني و تسامحني تحتارمني و تقدرني ... 

وقف ايرتان كايتصنت ليها ... كايشوف فيها و يسمع لمتطلباتها ... عجباتو هضرتها و هاد النوع ديال الطلبات العجيبة لي كاتعكس شخصيتها المختالفة ... ماجبدات تاحاجة كاتعلق بالفلوس و لا المظاهر كولشي كان على مشاعرها ... عارفها انسانة كاتحركها العاطفة بشكل اساسي ... 

قرب منها ... هي بقات ساكنة كاتشوف شنو غاقول اولا شنو غايدير .. تحنى لمستواها و على وجهو ابتسامة .. خطف قبلة من شفتيها ... خلات يديها يفشلو و يترخاو و عينيها تبدلت نظرتهم .. هزات عينيها فيه متسائلة .. اشمن نوع ديال الاجوبة هذا .. جاوب ايرتان قائل .. 

ايرتان : ماتحتاجيش تشرطي هاد الشروط الغبية ... حيت انت هي نفسي الاخرى إلى آذيتك كنآذي راسي و الى فقدت احترامك فراه فقدتو لراسي ... و انا مابغيتش جسم جهينة بغيت روحك يعني كون جيتيني فشكل شجرة كنت غانبغيك ... اما ديك الهضرة لي كانبغيك و داكشي ديال الورد عندي طرقي الخاصة لي غايخصك تولفيهم بزز منك ... و تفهميهم بالزز منك و واحد الحاجة قلتيها و عندك الحق فيها .. انا غانبقا صاحبك و ماغانتزوجش بيك .. على كل حال الزواج راه غايقتل الشغف لي بيناتنا .. يعني مامزوجكش .. هكا لمك غاتبقاي معلقة ... 

داز فيها كايضحك و خلاها كاتشوف .. 

جهينة : اويلي واش هذا كايعني هضرتو ؟ اويلي واش نييت ماغايتزوجش بيا ؟ ايييرتااان تسنى ... 

تبعاتو و غادية مع خطواتو السريعة .. 

جهينة : واش .. واش كاتعني هضرتك .. مابغيتيش تزوج بيا ... 

ايرتان : على ماشي غير انت لي عاد قبايلة قلتي ماغاتزوجيش الجلاخات .. 

جهينة : اوى الى ماكنتش غانتزوج جلاخة ماكاين لاش نبقى حتى معاه .. 

ايرتان : غاتبقاي بزز من your ass 

جهينة بعناد : اوى انا مابغيتش وابقا فهاد العلااقة بوحدك .. 

ايرتان وقف .. و حتى هي وقفات ... دار عندها عاض على شفايفو بنظرات غريبة ... قرب لاتجاهها و هي كاتبعد حتى لصقها مع الحيط .. شافت حواليها كان درب خاوي ... هزات عينيها فيه بتوتر ... بنفس نظرتو لي كاتحمل مزيج من الغضب و التحدي و اللوم و الاصرار ... قال :

ايرتان : شفت هاد الconversation مشات بعيد .. 

جهينة : ا... انا ... 

ايرتان مد يدو طايلعب فشعرها و يشوف فيه : شنو انت .. باغية تفارقي معايا ؟ ماعاجباكش شخصيتي .. 

جهينة بتوتر و خوف من طريقة هضرتو و نبرتو لي اول مرة كاتحس بيها غريبة : لا .. ما ..قصدتش هادشي .. 

ايرتان تبسم ليها بحب : واخا ...*باس رأسها بكل حب * باقية دبدوبتي باغية تبقى حتى نتعشاو على برى و لا نرجعو فحالنا للدار .. 

جهينة بابتسامة ارتياح قالت : الى عييتي نرجعو .. 

ايرتان جرها من خصرها لعندو و قال : انا ماكانعياش ... 

ضحكات جهينة عنقاتو و باست خدو و قالت ..

جهينة : ديني لشي مطعم فيها الاكل التقليدية .. بغيت ندوق ماكلتكم .. 

ايرتان : تآمر القزمة ديالي .. *رد قبلتها لخدها*

تعشاو فمطعم كيف طلبات ... حتى عرغوها و مشاو تمشلو شوية غير بينما هضمو و رجعو للدار ... طلعو بدلو و طاحو كااو بالعيا ...

اصبح الصبااح .. فاقت جهينة كاتكسل على صوت التقرقيب فالغرفة ... حلات عينيها و هي كتحكهم بظهر يدها ... شافت فايرتان لقاتو مبدل ... و كايجمع شي حوايج و لعض الحاجيات .. ناضت جلسات و بقات تشوف حواليها ..

ايرتان شافها وقال : وا اخيرا فاقت دبدوبتي .. 

جهينة كاتكسل : اشنو كادير ...

ايرتان : غانمشيو نخيمو .. 

ناضت جهينة وقفات فالسرير عينيها خارجين ... و قالت : اواه .. فين ؟ نااري ماكاتقول والو غير حتى كاتغفلني .. *عنقاتو معلقة فيه * الحياة ممتعة معاك.. 

ايرتان : هههه ياك بعدا ... اصلا عارف شنو كايعجب دبدوبتي... الامور ماصعيباش عليا ... و ياله تحركي غسلي وجهك .. و فطورك راه التحت .. انا غانجمع لي غايخصنا .. 

جهينة بتحية : علم و ينفذ .. 

ضحك خربق شعرها و مشات هبطات كاتدردغ ... 

اما هو جمع كولشي لي خاصو و لي خاصها و هبطهم لقاها فطرات و غسلات الماعن .. 

ايرتان : 2 دقايق تلبسي ..

جهينة : اويلي غير 2 .. 

ايرتان : ياله ياله تحركي .. راه غير غاتبدلي ماشي غاتوجدي ليا تصميم مشرووع ... 

جهينة : هاهي .. 

طلعات جهينة و هو خرج امتعتهم لصندوق السيارة ووقف يتسنى .. هبطات كاتجري .. سد باب الدار و دخلات هي للسيارة .. و طلع حتى هو .. 

جهينة : فين غانمشييو و شحال غانبقاو .. 

ايرتان : غانباتو هاد الليلة و الى عجبك تما نزيدو ... غانطلعو للجبال .. عارف ديك البلاصة غاتعجبك و اصلا هي لي خلاتني نجيبك للتركيا من الاساس .. بغيت منين تدخل حبيبتي لخدمتها ترجع كولها طاقة ايجابية و نشاط و حيوية و لايحة كولشي الامور الخايبة وراها ... 

جهينو * باس يدها*

جهينة : ههههه يخليك ليا يالي ديما هاز همي .. انا مرتاحة غير و حيت انت معايا .. 

ايرتان : و انا ديما معاك و غانبقا معاك ... 

جهينة تبسمات ليه .. ديمارا السيارة ... انطالقو فرحلتهم ... ورد اتصال لايرتان و جاوبت جهينة بالسبيكر .. 

جهينة : تشيييم تشيييم ... 

اشرف : حبييي .. 

ايرتان : غاتقطعي و لا غانشقلب مها هاد الخرية 😡

اشرف: هههههههه بنت الهم دايرة سبيكر مالك ماعلمتيني .. 

جهينة : ههههه و باش غانعرفك غاتزبلها و زايدون راه تيلفون جلاختي هذا ... 

اشرف: هههه وراه انت هضرتي الاولى ... يعني عرفتك انت لي مجاوبة .. 

ايرتان : الى ساليتو ممكن تقول ليا لاش معيط .. انا هربان من ال**ال بوك ... و صداعك تابعني حتال تركيا 😠 

اشرف: هههه انا عيطت لجهينة و تيليفونها منين مشيتو و هو طافي .. داكشي لاش عيطت ليك ...

جهينة : اااااه حقا تيليفوني 😨 

ايرتان ضرب جبهتو : ال**امل بووك هانتا فكرتيها فييييه دابا .. 

جهينة ؛ كنتي مخبيه الجلاخة اويلي حي يوماين و انا ناسياه و لايني راك واحد الشلاهبي .. 

اشرف: راه قلت ليك نمروود ماتعرفيه كيف دار ليك .😂😂. 

ايرتان : ها نت هضرتي معاها و دابا غاتقطع و لا غانطفي مو هذا حتى هو .. 

اشرف: ههههه جهينة حيدي السبكر الله يحفظك .. 

جهينة ياله غاتهزو و خنزر فيها و قال .. 

ايرنان : و الله يامك و ماتحطيه حتى نطوعك انت وياه ... 😠 

جهينة : هههه ناري ا اشرف كانت راشقة ليه .. تامالك كاتخرج غير فالاوقات الغير مناسبة 😂 

اشرف: هههه راه هو لي عندو حساسية مني 😂😂 اشنو بعيتي ندير ليه .. صافي انا قاطع لا يشقلب ديك الطوموبيل و نبقى بلا جهينة .. 

خطفاتو جهينة و قطعات عليه دغية و كاتضحك على ايرتان لي بدا يسب تاني .. 

جهينة : ههههه و اللهتا علاام .. 

ايرتان : اشنو كاتضلو تقولو بغيت غير نفهم .. اش غايمون بغا يقولك 😠

جهينة : و اللهما عندو مايقول ليا راه غير بغا يشد فييك .. 😂😂 راه تيليفوني عندك و قرى كولشي الميساجات لابغيتي .. *تفكرات المعيور لي تظل تعاير بيه ايرتان هي و اشرف * واحم و لا بلاش اكيد كاتيق فيا 😨 

ايرتان شاف فيها : هاااا .. علاش بدلتي رأيك .. 

جهينة: و علاش غانبدل رأيي .. هه... 

ايرتان وقف السيارة فالجنب: شوفي فعينيا ... 

جهينة مابغاتش تزعزع عينبها من قدامها و هو يدور وجهها عندو و قال .. 

ايرتان : شوفي لمك فعينيا 😠 

شافت فيه جهينة و مزيرة حيت عاق بيها ... شافت فعينو و هي تبان ليه العين اليسرى ديالها كاتمشي لليسار بشكل غريب .. قرب وجهو حتال عينيها كايشوف اش داكشي وااقع .. 

ايرتان : كاتكدبي لمك .. 😠 

حل صندوق السيارة قدامو و جبد تيليفونها و بدات كتجابد معاه و هو حابسها بيدو الاخرى و دايرها فراسها مبعدها بيها .. 

جهينة : واللهما كانقولو شي حاجة .. خصوووصياااتي ا ايرتان ... 

شعلو ايرتان و طار نيشان للميساجات .. 

ايرتان : انا غانشوف لمك .. هادشي لي مخبية .. 

وصلوه عرارم الميسااجات .. ماكاين غير بفففف بففف .. 

ايرتان : هاااي هاااي على النوتيفيكاسيووون تيليفون غايتفرغع ... 

جهينة : اواالو داكشي و الله غير انا ادميبن فواحد الباج تاراه ماكاين وااالو .. 

ايرتان : اما غانشوف لمك .. اش كاديري ورى ظهري .. انا هاد الحزاق غاعما دايرو .. خاصني نبلوكي لمك هاشي حتى انت ملعندك ماديري بيه .. 

جهينة : تا اشمن تحيدو .. وا تا ريح ارى ليا تيليفون اش كاتبقشش لا واتسااااب لااااااا .. 😭

دخل ايرتان نيشان لسمية تشيم تشيم ... و لقا ميساجات باقي مقراتهمش .. 

اشرف: وا مال هاد تيلي طافي .. ياكما دارك فدغمة يالمسخووطة ... بغيت نجي ساعة ولد الهم داير ليا الحصااار ... و لكن بيا ولا بيه 😂😂 حالف حتى نشلل ليه العروق .. الى قريتي ميساجي عيطي غير نسمعو صوتك .. 

ايرتان : تسمع صوتها .. ولات ام كلتوم لمك.. تشلل ليا العروق؟ غاندير لمك عاهة مستديمة غير صبر عليا ال**امل بوك ... 

سيفطها ليه .. و بقات جهيمة كاتقاوم .. 

جهينة : اويلي حي شنو صيفتي ليه .. واش جهلتي .. 

ايرتان : تبتي و لا غانخشيك فالكوفر .. بلاتي نشوف فتش موالفة تهضري انت و ياه .. 

طلع و زادت كاتقاوم و تغوت و هو عاد مازاد بغا يقرى .. طاح فالميساجات لي كانت كاتعاود ليه على كيفاش ارتابطو و شاف فبها ايرتان .. 

ايرتان : شحفتيني باش قبلتي ... ماحشمتيش .. 

جهينة : غيير بغيت نطلقها .. ماتخدش الموضوع بحساسية احمباااك .. 

ايرتان : انت راك ماشي غير مرمدتيني انت راك عفستي على ديلمي 😠 

جهينة تبتات الارض ... شافت فيه تعصب و تفقص ... 

كايشوف فيها و كايتسنا جوابها ... حيدات السمطة و ناضت لعندو .. غير شافها ناضت و رجع راسو لور مغمض عينيه و كايدوز يدو على جبهتو حيت عارفها كيفاش غاتهرب من نقاشهم ... 

قربات حتال لعندو واقفة على ركاابيها و حطات يديها على حناكو ب2 و تخشات فيه كاتبوس فحنكو ... شافت فعينيه و قالت .. 

جهينة : بوونغ بوونغ واش نيت غادي تقلق على هادشي .. غير ضاحكين علاش فاش كايتعلق الامر باشرف كاتوليلي حساس هكا .. 

ايرتان : جهينة شحال من مرة وصيتك ..شحال واش انا كانخلييك تغيري اه .. عمري خليتك تغيري و عصبتك على شي حاجة اااه ... 

جهينة : واش قصدت ؟ انا ماكانقصدش و اللهما كانديرها بالعاني .. انت عارف علاقتي باشرف هكا حتى قبل مانوليو مع بعضياتنا و هو اول واحد تطلقت معاه بينكم كاملين حتى انت لي كنتي ساكن معايا ماكنتش زاعمة عليك بحالو هو .. *خنزر فيها *زعما فداك الوقت ... فهمني ا ايرتان واش باغيني نقلب عليه واش هادو فعايل ... واحط راسك فبلاصتي .. 

ايرتان : انا كون كنت فبلاصتك غاندير داكشي لي يريح الطرف الاخر من العلاقة .. الى شي حاجة ماريحاتنيش خاصك تلقاي ليها حل كيفما كاندير انا .. 

جهبنة : صافي غاندير حد للskinship بيناتنا و مانبقاش نقرب ليه و لكن تمنع الميساجات و الهضرة مامتافقاش معاك .. 

ايرتان : غاتحيدي السكينشيب ... والى حصلتك ؟ 

جهينة : قجني بمصارني ... 

ايرتان : ههههه بااش ؟ 

جهينة حاوطت يديها على عنقو: هههه عجباتك هادي .. صافي تصالحنا .. 

ايرتان : اممم كاتعرفي لمك كيفاش تملصي و اللهتا كنت غانرجع مك و ندير بالناقص .. 

جهينة : اويلي رجوووع الله ... كان كايسحاب ليا عندك الخاطر ... ساعة جا اشرف و شعلك فدقيقة .. شوف كيف ذاتك سخونة ... 

ايرتان : شحفني .. مدي قرعة الماء .. 

مدات يدها للور الشيء لي خلاها تقرب اكتر من ذاتو .. هو حاوط يديه على خصرها و لصقها معاه ... و خشا وجهو فعنقها .. 

جهينة جاتها التبوريشة من عناقو ... واكتر حاجة من وجهو لي فعنقها .. هز راسو فيها و قال .. 

ايرتان : ماكاديريش الريحة لي هديتك ؟ 

جهينة : و مالي تسطيت نديرها ... يخرج ليا الحيوان ديالك لي قلتي ليا و انا ماقادا عليه .. 

رجع راسو و ضحك على كلامها و قال : حيواني مدريسي ماتخافيش 😉 

جهينة : نو ... هذاك الحيوان بالذات لي ماكيتدريساش .. بحال الذيب قدما تروض غايجي النهار و يغدر .. 

ايرتان بشوفات متيرة كايطلع و يهبط : هههه جربي و شوفي واش غايغدرك .. 

جهينة : هههه محاولة جيدة و لكن هي لي عمرك تحلم بيها ... *رجعات لبلاصتها * بما انك ماناويش تزوج بيا ... و تخلي علاقتنا مفتوحة هكا .. فراه هذاك تفصيل عمرك فحياتك تحلم تاخدو .. يامن عندي يامن عند وحدة اخرى .. 

ضحك ايرتان شد يدها باسها و قال : كايعجبني ذكائك و كيفاش كاترضي الامور لصالحك .. 

جهينة بفخر : اوى هاادشي لي بغاات الوقت .. 

ايرتان : معايا انا لمك .. 

جهينة : هههه لا انت الحب ديالي ... و كيف قلتي ليا البارح كتعاتابرني نفسك الاخرى .. فنفس الشي بالنسبة ليا ... 

ايرتان ابتاسم ليها و اختمها بقبلة فظهر يدها ... و ديمارا بالسيارة ... 

الطريق كلها و هما كايدردشو كيف عادتعم... و وقفاتو جهينة شحال من مرة بحجة تشوف الاماكن لي كايدوزو منها ... حتى وصلو و كانت الساعة كاتشير ل4 العشية .. وقفو فمكان كولو طبيعة ... كايطل على الجبال و المكسوة بالربيع ... خرجات جهينة كاتكسل و تبعها ايرتان ...

ايرتان :شنو ... نبقاو هنا ؟ 

جهينة : ااااه .. عجبني .. كولشي كايبان من هنا😍 

ايرتان جلس فوق السيارة و شعل غارو و جهينة بقات واقفة كاتشوف فالمنظر .. دارت عندو و جات وقفات قدامو ... 

رشف من غاروه و دور و جهو ساطو .. 

ايرتان : حيدي من قدامي خليني ندوزو هذا على خاطرنا .. 

جهينة : ماكانحملش نشم فيك ريحة الغارو .. حيظ الزبل .. 

ماجاوبهاش ايرتان ... كمل الكميان ... عصبها و جراتو من يدو .. 

جهينة : بما انك كاتكمي قدامي .. ارا حتى انا نكمي تكمي غير بوحدك .. 

ايرتان : اري الزبل من يديك .. 

جهينة : لا ... *هربات من قدامو *

ناض ايرتان تبعها كايتحلف .. 

ايرتان : الى مالحتيش الزبل من يديك غان.. 

جهينة : آش غاات.. الى روحك ماغايلياش عليك غالية عليا و عاد الغارو غير غايركب فيم شي مرض ... الى كنتي مصر تمرض نمرضو ب2 

ايرتان وقف و دوز يدو على وجهو و شاف فيها : صافي واخا ... مابقيتش نكمي ياله لوحيه من يدك .. 

جهينة : حلف بالله ... 

ايرتان : اقسم بالله مابقيت نحطو في فمي .. 

جهينة لاحتو و مشات عندو و مدات يدها : ارى البكية ...

ايرتان : هاكي الالا ... هاذي هي ضسارة القرودة على ماوكلي ... 

جهينة : حسبها كيفما بغيتي ... 

شدات البكية جبداتهم وحدة وحدة و هرساتهم و عفطات عليهم .. 

جهينة : نشوفو هاد المرة في فمك مانقولش ليك شنو ندير فيك .. 

ايرتان قرب لعندها .. و هي بعدت حبساتها السيارة .. تحنى عندها و ولات بين يديه لي حطهم على السيارة و قال ... 

ايرتان: اش غاديري فيا .. 

جهينة : ش.شفتك ..غير كلمة جوج تلسقني مع الحيط .. وغش باغي تسبب ليا سكتة قلبية .. 

ايرتان : ههههه سكتة قلبية كاملة ... و لايني راني واحد ولد الحرام مقطر .. 

جهينة : اوى ..الله يجيب لي يقول الحق .. 

ايرتان : هههه زيدي قدامي عاونيني نسرحو الخيمة ... قبل مايظلام الحال ...

داز الوقت .. سرحو الخيمة و جلسو يرتاحو و ياكلو ... 

جهينة : ياك ماكاينينش الحيوانات فهاد المنطقة .. 

ايرتان : لا .. 

جهينة : و الشفارة ؟ 

هز ايرتان راسو فيها و قال : بدينا تاني ؟ 

جهينة : وا راك عااارفني .. 

ايرتان : ماتخافيش الالا ما حدك معايا ماعندو مايقيسك ... 

جهينة : اوى شنو نديرو دابا ... انا ملييت .. 

ناض ايرتان وقف و مد يدو ليها .. 

ايرتان : اجي نتمشاو .. 

جهينة : متأكد ماكاينينش حيوانات .. 

ايرتان : لا حول و لا قوة الا بالله العظيم ..

جهينة : صافي صافي هاني .. 

ايرتان : زيديك شي حاجة راه غايبرد الحال ...و من دابا نوصيك جمعي يديك عندك مافيا لي يشوف شي عجب فيك تاني .. 

جهيتة : ههههه على انا باقية نعاودها 😂😂

ناضت جهينة شدات فيه ... زادوهم الحوايج و هبطو يتسركلو فالنواحي ..حتى ظلام الحال و رجعو فحالهم ...

جهينة : بغيتي شي سوندويش انا كولشي داكشي هضمتو .. 

ايرتان : مافياش .. غير صايبي ليك انت .. 

دخل تكا فالخايمة و هز كتاب كايقرى .. 

جهينة صايبات صوندويش و دخلات تكات حداه ... 

جهينة : نصف وقتك كايدوز غير قراية كتوبة .. 

ايرتان : القراية و المعرفة راه نقطة قوة ماشي اي واحد عارف بقيمتها .. 

جهينة : عندك الحق .. عنداك تشوفني ماكانقراش الكتوبة تقول هادي غبية... تأنا متقفة .. 

ايرتان : الله ياودي ... قولي ليا كتوبة قريتيهم .. 

جهينة ذكرات اسماء روايات رومانسية .. 

ايرتان : هههه ماكانعتابرش هادشي داخل فالتقافة .. عاديين بحال الى تفرجتي فمسلسل و صافي .. دابا عاد فهمت التعلق ديالك بكلمة كانبغيك .. كتآكني بداك الحب ديال الروايات ... الى كان آه .. مشيتي خلا معايا ... 

جهينة : و علاش لا ... نعلم مك تقول كانبغيك بزز من طاسيلتك .. 

ايرتان : هههههه يا واخا تبقاي غير انت فالدنيا .. واخا تلصق السماء و الارض و الله ديك الكلمة لاخرجت من فمي ... هاديك الكلمة بالذات كتدار ماشي كلتقال .. 

جهينة : اوى ديرها و قولها ... و علاش مانآمنش بحب الروايات مالو ماشي حب ؟ 

ايرتان : لا ماشي حب ... 

جهينة : و شنو هو الحب فنظرك .. 

ايرتان : قلت ليك شنو هو من قبل ... و مفهومي انا هو لي غايخصك تمشي بيه حتى انت .. 

جهينة : لا .. اتت لي غاتبدل طريقتك و غاتمشي بمفهومي انا .. 

ايرتان : مفهومي انا .. 

جهينة : مفهومي انا .. كااانبغيييك شتي شحال نطقها ساهل و حلو 

سكت ايرتان قرب لوجهها و قبلها بشغف حتى خلاها تجاوب معاه بنفس طريقتو طلقها و شاف فوجهها و قال .. 

ايرتان : فاش قلتيها ماحركتي فيا والو و كان ممكن نقول كانبغيك بلا مانكون كانعنيها و لكن فاش بستك تجاوبتي معايا و كنتي متبعة حركاتي حتى بلا وعيك و استسلمتي ليها ... كيفما كنت انا بالظبط .. شكون فينا لي عبر على الحب الحقيقي .. انا و لا انت ؟

جهينة فشلها مرة اخرى بتصرفو و لكن ماكايعنيش انها تسكت .. جمعات النفس و طلقاتو .. ناضت جلسات و ربعات رجليها و شافت فيه .. ضحك حيت عاارف الوضع غايولي جدي .. ناض جلس باش يتواجه معاها فالحلبة و كااان نعلن ابتداء المبااراااة .. 

جهينة : اول حاجة ماتبقااااش تبوووس بلا متشااوني .. تااانيا ... وجهة نظرك ممكن تكون مقنعة و لكن ماقنعاتنييييش .. 

ايرتان : ههههه و علاش ؟ ياله بلا غوات و تبتي وجهة نظرك .. 

جهينة : القبلة اساسها ماشي غير الحب و لكن جايا من مصدر الشهوة .. يعني كيفما ممكن نقول ليك كانبغيك و انا ماكانبغيكش نقدر نبوسك و انا ماكانبغيكش و غير بمجرد شهوة و صافي .. 

ايرتان : هههه عندك الحق و لكن فين درتي الشخصية من هادشي كولو ... شخصية الانسان حتى هي كاتلعب دور .. ممكن نتشهاك و لكن مبادئي ماتسمحش ليا نقرب ليك الا و انت حلالي ... و كاين لي ماعندوش مبادئ و ممكن ياخد منك لي بغا حتى و انت رافضة ... و حاجة اخرى قلت ليك المعرفة سلاح قوي ... فاش كاتكوني عارفة بزاااف الامور كايكون عندك منظور اوسع للحقائق .. متلا علم لغة الجسد ... انا حفيت فيها دماغي هذا سر غانبوح ليك بيه ... و غانعطيك تحليل بسيط ... القبلة لي دازت بيناتنا دابا .. من التصرفات لي نبعات منا ب2 كانت مجرد تعبير على الحب بحيت طريقتي كانت فعبر الحدود وحتى انت ماتعديتيش الحدود .. ماستعملتش لساني و ما مسيتكش بيدي من غير حناكك و شعرك ... و انت يديك كانو فعنقي .. يعني كان الاحترام بيناتنا ... واخا القبلة فحد داتها قلة احترام مادمنا مسلمين و لكن هادو هما المشاعر صعيب نتحكمو فيها ... 

جعينة حكات مؤخر راسها و حدرات عينيها شوية ... 

ايرتان : هههه متأكد دابا حشمتي حيت عرفتي بلي رديت البال لتصرفاتك ياك 

جهينة رجعات عزات عينيها فيه و قالت :لا لا انت صعيييب بزااااف ... و موووحال نقدر علييك .. 

ايرتان : ههههه مايهمكش غاتولفي ... 

جهينة : واخا اسيدي .. كلامك معقوول و منطقي و لكن الى جيتي تشوف .. راه حتى بمجرد التعبير بالكلام ممكن يكون صادر من القلب باعتبارنا للشخصية ... 

ايرتان : ولكن التعبير بالفعل تأتيرو اكبر من القول .. دابا الى صبحتك على كلمة كنبغيك و نعستك عليها و نمدح فيك لي فيك و لي مافيكش فيما بان ليا شي كادو نجيبو ليك و لا بلاش نشريه انا نسيفط اي واحد يقضي ليا الغرض و يوصلو حتى لعندك ... الخ ... هذا هو الحب ... بالله عليك اجهينة انتوما النساء اذكى من هكا .. 

جهينة : اوى هذا طبعنا كانبغيو لي يغرقنا هضور و تعناااب شنو غانديرو .. 

ايرتان : هههه غانقول ليك واحد السر ... حنا الرجال كاتكوون فينا الهضرة بزااااف فاش ماكانكونوش جديين ... ممكن نتنازلو على شحااال من حاجة غير باش ندوزو وقيت زوين واخا يكون قصير ... مهم هو نكونو وصلنا لدامشي لي بغينا .. انا فاش كانكونو جديين ... فراه كانديرو ماشي كانقولو .. هذا طبعنا و هاذي غريزتنا هكا تخلقنا .. الى الراجل بغا شي مراة .. كايخلص ليها كايحميها .. كايوقف فجنبها ... كايشوفها ام ولادو و رفيقة حياتو ... و كون كنت امراة غانتيق فالراجل لي يسبني و يمرمدني و لكن راجل و ديما فجنبي على واحد فيه غير الهضرة و نهار نحتاجو نلقا غير بلاصتو ... راه انتوما العيلات غاتبقاو تعانيو مع الرجال حتا تقوم القيامة ... علاش حيت نتوما لي خاصكم تفهمو الراجل ماشي حنا ...

جهينة ربعات يديها و بقات كاتشوف فيه و تحك فكيها على بعضهم .. 

ضحك ايرتان و ربع يديه و بقى يتسنى حيت عارفها ماغاتافقش معاه و تجبد ليه الرأي المضاد فينما كان ... 

شاف فيديه و قال ليها : شفتي شنو درت ؟ كون كنتي عارفة بلغة الجسد كنتي غاتعرفي غير بمجرد انني قلدتك بلا مانعيق ... بلي كانبغيك ... 

جهينة : على الراجل الى كان كايبغي شي وحدة كايقلدها .. 

ايرتان : اه .. فاللاوعي ديالو كايقلد بعض تفاصيلها بلا مايعيق .. غانعطيك واحد الكتاب .. و منها نيت الى دريتي بهاد الامور غادي توفري عليا بزاااف ديال الهضوور ..

جهينة : واخا اسيدي ... عندك الحق فكولشي لي قلتي ... و لكن غير تنازل و قولها .. 

ايرتان تنهد و ضرب جبهتو ...

جهينة : ههههه مااالك ... راه ماغانتنازلش ... 

تبدلت نظرة ايرتان ليها و قال : مصرة على هضرتك ... شنو من دااكشي كولو لي كانظل نديير ماعجبكش ... و لا عزيز عليك لي بحاال جلال ... يستاغل فيك و يدير فيك لي بغا ... 

جهينة : ايرتان ... انا ماقصدتش هادشي علاش تقلقتي .. 

تكا ايرتان و هز كتابو و رابط غوباشتو .. 

تكات جهينة حداه و قالت : وليتي دغيا كاتقلب ... 

ايرتان : انت لي راسك قاسح و عزيز عليك تصري على بعض الامور .. من الاحسن ليك تولفي اجهينة .. هنا سدينا هاد الموضوع .. 

رجع لقراية كتابو ... بقات جهينة كاتشوف .. الجو بيناتهم دغية تبدل ... 

جهينة : ايرتان تقلقتي مني .. 

ايرتان : لا .. 

جهينة : و علاش قلبتي وجهك .. 

ايرتان : ماكاتشوفيش كانقرى .. 

جهينة : و جبتيني هنا باش تقرى ... 

ماجاوبهاش ... تقلقات و ناضت غاتخرج و جرها... 

ايرتان : فين غادية .. 

جهينة : نشم الهواء ... مافياش النعاس 😠 

ايرتان : رجعي فحالك الحال بارد ..

بقات جالسة مدورة و جهها جرها لعندو حتى حطات راسها على كتفو ... 

ايرتان : مالك تقلقتي ؟ 

جهينة : شووف انت ... لي دغيا تقلبتي عليا 😟

ايرتان باس فراسها و قال : خاصك تعرفي بلي كترة النقاش فنفس الموضوع كاتنرفزني و ممكن يصدر مني تصرف يقلقك .. يعني حتى انت عرفي امتى تفراني .. 

جهينة : اوى صافي سمحلي ماكنتش عارفة .. 

ايرتان : حتى انا كانعتاذر .. 

هزات راسها فيه و تبسمت .. 

جهينة : شنو هاد الكتاب لي كاتقرى .. 

ايرتان سدو ووراه ليها : قراءة الناس (قلبت على هاد الكتاب حتى شحفت الى كاتعرفو شي وحدة تعتقنا ) كايحلل انماط الشخصيات و تعاريفهم .. 

جهينة : كيفاش شرح ليا مضمونو اكتر .. 

ايرتان : هانتي حنا البشر موزعين علينا 16 نمط ديال الشخصيات ...موزعين بنسب مختلفة كاينة الشائعة و كاينة النادرة و غير هما لي كاينين .. كل شخصية عندها اسمها و كاتمتاز بمميزاتها الخاصة ... 

جهينة : وا عطيني اسم شخصيتي و حللها ليا .. 

حدر عينيه شاف فيها و ضحك و قال ... 

ايرتان : ماشي بزاف باش قدرت نعرف لاشمن شخصية كتنتامي ... انت ا انسة جهينة ديالي فيك شوية ديال الجدية ،حساسة،قلبك ابيض،مخلصة انطلاقا من اخلاصك لداك ولد *** لمدة 5 سنين ، و علاقتك بصحابك ، ماكاتحكميش فتصرفاتك ، الحواس ديالك كلها قوية ، كاتشمي مزيان و تقدري تفرزي الروايح الغريبة ، حاسة الذوق عندك هادشي كايفسر شهيتك المفتوحة ، حادة النظر كاتقشعي الامور الخفية و البعيدة ، و حتى سمعك .. كاتقدري تشوفي الجمال فاي حاجة واخا تبان عادية للناس ، هادشي وااضح فحبك للطبيعة ، انت انطوائية مع الغرباء و لكن دغية كتندامجي ،خيالك وااااسع ،حسية وعاطفية بزاااف ، كتعاملي مع الامور وفقا للشعور و القيم ديالك ، و هادشي لي كايخلينا ديما فالصراع ، انا انسان واقعي و ممكن نكون بعيد على الانسانية و هادشي فيا منافي ليك و ممكن يكون كايستافزك حيت انت متشبعة بالانسانية و هادشي فهمتو فاش قررتي تخلي جلال فحالو واخا آداك ، كاتخفي افكارك باش تحمي راسك و هادشي لاحظتو فيك فالاول ايام مع بعضياتنا ، كاتعاوني الناس و كايعجبك تخلي ناس يرتاحو و هادشي لاحظتو فطريقتك باش تهليتي فيا ، كايعجبك الجمال و الفن بحال الصنع اليدوي و الرسم و داك النهار نيت قلتي شي حاجة فالشعر، عفوية بزااف و فداخلك طفلة صغيرة ماعمرها غاتنضج ، كايعجبوك الحيوانات و ممكن جدا حتى الدراري الصغار ،مستقلة ماشي تقليدية ،عزييز عليك فاش كانمدحوك و نقدرو مجهوداتك ،كانظن كولشي كايقوليك مهملة و ماشي مسؤولة و لكن كاتاخدي الامور بجدية داكشي علاش ماكانبغيش نظغط عليك ،دغية كاتعلمي و كاتشدي الهضرة ، ماكانحملش اخلاقك لي قريييبة للمتالية حيت كتآدي بيها راسك فاغلب الاحيان .. و غانبقا معاك حتى نطيح عاد النظام ديالك .. 

جهينة : واخا تمووت .. 

ايرتات : ههه احنا باقيين فيها 😂 

جهينة : وا كمل ليا بعدا هادشي غاعما عارفاه انا على راسي ... 

ضحط ايرتان و قال : كيف قلت ليك انت ماكاتحمليش التحليل العقلاني الحالي من الانسانية ، انت كاتعلمي دغيا و تقني الحاجة فاش كاتمارسي و تدربي عليها ،انت من النوع لي كاينفذ ماشي كايخطط، ماكاتعتامديش على المنطق بزاف ..يعني ممكن تاخدي الريسك فشي قرار ، ممكن تاخدي قراراتك و تشوفي الامور من معتقداتك الخاصة و بعيد على القوانين ، عندك قدرة هائلة باش تفهمي الناس، عندك مع جمع المعلومات و كترة التحليل و هاذي نقطة مشتركة بيناتنا ، اكتر حاجة كاتعجبني فيك هي كونك آلة لانتاج الحنان و العطف كاتعرفي كيفاش تقربي الشخص ليك غير من حنيتك الغير قابلة للمقاومة ، معطاءة بدون تردد ، عاطفتك عميقة لابعد الحدود ماكايلاحظوهاش غير الناس لي قراب ليك ،انت ماكتشوفيش عظمة الامور لي كاتصنعيها و ديما حاغرة راسك و هادشي راجع لنظام القيم و الاخلاق ديالك لي كايخليك تقلبي على الكمال و حتى التواضع ديالك ، كتاخدي التزاماتك على محمل الجد و هادشي كايعجبني فيك ، و لكن لي ماكايعجبنيش فيك هو حساسيتك وعاطفتك لي ممكن تاتر فقراراتك، ساهل تجرحي و تقلقي ، عزيز عليك لي يمدحك و عزيز عليك نتغزل فيك هادشي عااارفو واخا كاتناضلي باش توصلي هادشي ليا و لكن راني عارفو ، انت متساهلة و غير متطلبة ، داخلك طفلة صغيرة عزيز عليها تلعب بعفوية و بدون قيود ، و حتى انت كاتعبري على حبك بالفعل و لكن طبيعتك كامرأة كاتخليك تبغي لي يقولها ليك ... و هاد الصفاات كاااملة لي قلت ليك مجموعة فشخصية الفنان ISFP ...يعني انت عندك شخصية الفنان .. كولشي لي فيك كايدل على انك فنانة 

جهينة : فنانة ؟! 

وايرتان : اه فنانة و لكن لي مافهمتش هو غياب هاد الجانب فيك .. يعني هاد المدة كااملة لي عشت معاك فيها مرة وحدة لي بينتي موهبتك هي كتابة الشعر .. واش كنتي كاتمارسي شي مواهب فاش كنتي صفيرة ؟ 

جهينة : اوديي فاش فكرتييني ... كنت كانشارك فبزاف الانشطة ... منها التنشيط و المشاركة فالمسرحيات و كنت كلنكتب الشعر .. 

ايرتان : و علاش مشيتي علمية و مقريتيش الادب .. 

جهينة : انا ماعنديش مع الادب بزاااف يعني الكتابة غير شي حاجة بسيطة و صافي ماكنتش واخداها بجدية و عاد شفت القراية لي تخدمني دغيا ... لقيت التمريض و عاد حيت بغيت نكون in touch مع الجانب الطبي باش نقدر نتهلى فماما الراسي ..ساعة مشات عند خالي و بقيت بوحدي .. 

ايرتان : يعني التمريض مكانش اختيارك ؟ على قبل ماماك .. 

جهينة : تماما .. 

ايرتان : ذكية و لكن ظلمتي راسك .. 

جهينة : مانظنش حيت كون كنت عارفة شنو بغيت كنت غاناخدو حتى هو بعين الاعتبار و نلقى حل يرضيني و يرضي ظروفي .. 

ايرتان : اممم مزيان .. يعني انت ماعارفاش شنو بغيتي ؟ 

جهينة : واخا خليتيني نشوف شي امور فيا غمري عرفتها و لا لاحظتها .. باقي عندي غموض على شنو بغيت .. 

ايرتان : اكيد هادشي غايكون منحاصر فشي حاجة متعلقة بالفن .. و غانعاون حبيبتي تلقى راسها فين موضرة .. 

جهينة : واش بالصح ... هادشي جاني فشكل .. 

ايرتان : طبيعي يجيك هكاك و لكن حولشي فيك كايدل على انك فشي بلاصة مخبية شي موهبة كبيرة .. و غانجربو كولشي حتى تعرفي ... 

جهينة : صافي مادام غاتعاوني انا مستاعدة ... دابا انا شخصيتي شخصية الفنان .. و انت عطيني تقرير بحال لي لي درتي ليا انا .. 

ايرتان : هههه كاين شي حد كايوصف راسو راه هادشي خدمتك انت ..