قدري أن أحبك الجزء 14

جهينة : وا قول عامة و صافي .. 

ايىتان : مهم تنا شخصيتي داخلة من الكاطيغوري ديال العقلانيين فيها 4 رئيس الاركان و العقل المدبر و المخترع و المعماري .. انا معماري ... شخصيتي كتمتاز بالاستقلالية و التحفظ و الذكاء و الغموض و الفضول و حب الاستطلاع و المعرفة ... مزاجي عصبي انطوائي .. حنا مبدعين ديما عندنا طرق جديدة غير العادة .. بارعين فالنقاش و الجدال و الاقناع بحيت عندنا قدرة على تفصيل الامور و تحليلها لاجزاء بسيطة ... بزاف المرات كانبدل اراء الناس فاش كنتانقش معاهم حيت كانجبد شي تفاصيل ماكانوش رادين ليها البال و كاتكون خفية بالنسبة ليهم .. عايش وسط عقلي وقتي كولو كانحلل و ناقش مع راسي انسان حاالم و ديما شارد الشي لي كايخليني ديما ساكت و منعازل على الناس .. ماعنديش مع الغرباء و ماكانرتاح غير مع لي قراب ليا ... خيالي واسع و ديما كانشوف الامور بعين المصحح و ديما كانقلب على الحل المنطقي كانبغي الوضوح فكولشي و ديما فضولي كايجبرني نقلب و نبحت على تفسير لاي حاجة تارت انتباهي ... لا اهتم باعالم الحارجي و شنو واقع فيه .. 

جهينة : بالصح هادشي كولو فيك كانستغرب كيفاش راجل ماعندوش مع الاخبار و ماعندوش مع الكورة و ماكايخرجش بزاف من الدار .. زعما راه نيت انت فشكل هايش فعالمك الخاص و غريب الاطوار و فريد من نوعك .. كاتبان باارد من برا و غير ودود بالمرة و شرير يعني فالاول كنت واخدة عليك نظرة واحد طايش و عاااجبو راسو و برهوش واخا و لكن واخا هكاك انت شرير 

ايرتان : هههه حتى هادشي داخل فشخصية المعماريين انا فيا روح شريرة الى ماسيطرتش عليها غادير مابغات ... مهم النعماريين ناصحين جيدين كايتحركو غير بالمنطق كانركزو على الابداع .. عندنا قدرة على ظبط النفس و لكن هادشي ماكايعنيش اننا ماكانفاعلوش فاش الامر كايكون جدي .. عندنا شغف فتطوير الذات الشي لي كايخلينا نبحتو و نستكشفو شكون حنا و معرفة ذاتنا و حنا اغلب الاحيان مصدر الهام للبعض الآخر و يستافدو مننا حيت عندنا وسع نظر .. قادرين نتقنو الانظمة النظرية و استراتيجية الشركات و الانواع الجديدة من تيكنولوجيا ... 

جهينة : امم داكشي علاش عندك كترة اخيوطة و الكابلات .. 

ايرتان : الخيوطة و الكابلات !! ههههه واخا الالا... فايت ليك لاحظتي بلي مرتب و عزيز عليا التنظيم .. 

جهينة : مهوس النظافة 😒 

ايرتان : ماشي لديك الدرجة ... 

جهينة : يكت اتا لي عارفة كمل .. 

ايرتان : حنا يالالا ... مامتكبرينش و ماكايهمناش التقاليد و العادات ... ماكانفهموش فالصواب و فن الكلام ...ماعندناش مع الاهداف التقليدية و الاستقرار .. كانكره الروتين ... ماغاتلقايش معايا مشاكل حيت حتى انا بحالك غير متطلب وفي و مخلص ياك ؟ *شاف فبها بنصف عين*

جهينة : بطبيعة الحال و لو 😂😂 

ضحك ايرتان و كمل : و حتى انا ماعنديش مع الجدالات و النقاشات ..غير مهتم بالسلطة ..ماكانبغيش نقود و نتقاد من قبل الناس .. 

جهينة : هو نيت عندك الحق واخا فهمت بلي انت ميسور و لكن ماكاتزيدش فيه فاصراف الفلوس .. يعني شوف الدار لي ساكن فيها متواضعة .. دابا من الوقت لي شفتك استخدمتي شي 3 سيارات تقريبا عادييين ماشي شي حاجة .. و حوايجك ماكلتك كولشي فيك متواضع .. بلاتي بعدا واش انت نيت لاباس عليك ؟ 

ايرتان : هههه وعلاش كلتسولي .. 

جهينة : ماتفهمش غلط انا غير بغيت نعرف و صافي .. 

ايرتان : اوى عاطيك تقرير على راسك و بغيتيني نفهمك غلط ؟ مهم راه سبقلي و قلت ليك .. عندي شي مطاعم و شي مؤسسات فمختلف المجالات موزعين بين امريكا و تركيا .. 

جهينة : هااكدااك .. اوى شتي كون كان شي واحد اخر كوراه صارع لينا راسنا غير بالحديدات لي ماضايرينش و الماركات فاللبس و غير الماكلة بخبخ و شاري شي قصر فشي قرينة .. و مضور بيه الرجالة ... هادشي لي كايعجبني فيك ... التواضع ديالك و عدم اهتمامك بنفس اهتمامات قرانك ... دابا انا قلتي ليا كانستخدم الحواس ديالي .. هادشي لي كايخليني اكتيف فكولشي و كنتفاعل مع الامور فحياتي .. و كاتخليني بارعة فالاكتشاف و التعامل مع الامور ... انت شنو نقطة قوتك ؟

ايرتان : انت عندك الحواس دالك و انا عندي الحدس 

جعينة : الحدس ؟ 

ايراتان : اه .. كنعتامد على الحدس ديالي بزاف و الحواس ديالي هما المنطق و العقل ... انا متساهل مع الامور و لكن الى تخطاو حدودي ماكانتقبلهاش و كانولي انسان صريح بزااف ... انا عكسك ماكاناخدش قراراتي استنادا على مشاعيري و انما المنطق واخا تكون خارجة على نطاق الانسانية و هادشي لي خالق ليا مشاكل معاك ... فيا عيب هو تعظيم الذات و عندي مشكل فالتعبير على العواطف و المشاعر ديالي و حتى هادشي مدخلتي معاك فحريق الراس ... داكشي علاش كانحاول نطور الجانب الحسي و كانقرا علم النفس .. باش نفهم مشاعر لي ضايرين بيا حيت الى مادرتهاش غادي يسيطر الطبع الحاد لي فيا و ممكن نوصل لنقطة نجرح حتى و بلا مانعيق ... و هاد الطبع الى مشيتي حتى شفتيه فيا غانوليو فالمشاكل .. حيت انت حساسة .. 

جهينة : ماتخافش عليا واخا هكاك راه كانخدم عقلي .. 😂 

ايرتان : اوى هادي هي شخصية ايرتان .. حطيت ليك كولشي .. يعني غادي يخصك تعرفي و تفهمي تصرفاتي .. و ديما تلقاي ليها تبرير ..

جعينة : انا ولفتك هادشي اهم .. واخا عيوبك باقي مابانوش مزيان و لكن ممكن نتحملهم .. 

ايرتان : عيوبي مابانوش حيت شادهم .. 

*فجأة قفز ايرتان و جلس و عينيه خارجين كايتحسس و يتصنت *

جهينة قفزات حتى هي و جلسلت قدامو .. 

جهينة : مالك ؟ شنو عندك  😨 

ايرتان : بقاي هنا ماتحركيش من هنا .. 

جهينة : لا ماتخلينيش بوحدي .. ايرتااان 

خرج ايرتان و بقات مكمشة كاتدور فعينيها .. حتى رجع عندها .. 

ايرتان : نوضي .. غادي يخصنا نرجعو .. 

جهينة : اويلي على نرجعو اش واقع خلعتيني .. 

ايرتان : ماتخافيش ...زيدي بلا ماتسولي .. غير بقاي فجنبي و ماتمشي لفين .. سكتي و ماتنطقي حتى كلمة .. النفس ديالك مانسمعوش .. 

جرها وراه و خرجو من الخيمة ... تصرفو خلا الخلعة تدخل مع عظامها و خوا ليها الركابي .. و لكن ما عليها غير تبعو ... 

دار عندها و اشار ليها باش تحنى ... تحنات و تبعاتو على ديك الحالة و لي دار كاديرو ... نجحو فتخطي الهضبة لي كانو مخيمين عليها ...كان الظلام و الطريق عامرة حجر و اغصان فالارض و شجر ... كانت شادة فيه و غارسة ظفارها فقبضتو بالخوف قلبها كايضرب و عينيها كايضورو... اسوء حاجة تكون خايف من شي حاجة ماعارفش حتى ماهيتها ... 

وقف ايرتان و وقفات حتى هي .. كانت كايتحسس الصوت بحال شي حيوان اتناء الصيد .. فجأة دور وجهو لليسار و اووب ضرب جهينة طاحت فالارض و تسمعات ..بانغ بانغ ... 

دغية جرها وقفها و طلقو رجليهم للريح .. 

جهينة هنا دخلات معاها ديال بصح ... القضية فيها هجوم بالسلاح ... عقلها وقف من التفكير و دابا ماكاتبع غير خطوات ايرتان لبر الامان .. 

كاتجري و كاتجري ... حتى خطوات العدو ماكاتسمعهمش ... ولكن صوت الطلقات كان واضح ... 

كايجريو و صوت ايرتان صاح قائل بالتركية : توقع ليها شي حااااااجة ماغانرحمكمش يااا ولااااد الق**** 

كملو الجرى لمسافة طويلة .. جهينة بدات كاتعيا و لكن صوت الرصاص مابقاش .. 

جهينة بعياء و صوت متقطع بفعل سرعة التنفس : اير .. اير..تان ... وقف .. 

ايرتان : ماعندناش الوقت .. ماخاصهمش يلحقو علينا .. جهينة شدي فراسك وضرنا طريق السيارة ... خاصك تصبري حتى نلقاو فين نتخباو .. 

جهينة كاتبكي : شكون ..هادو .. علاش باغيين .. يقتلونا ... انا خاايفة ا ايتاان .. 

ايرتان: ماتخافيش ماغايوقع والو .. 

و هو كايقولها يد جهينة تقالت ... دار عندها لقاها بحال الى غاتسخف .. شدها و جرها ورى صخرة متوسطة و تكاها تما .. 

جهينة كان تنفسها غير منتظم و مع البكاء و الخلعة ولات شبه مغمى عليها .. جلس ايرتان قدامها .. كايهدن فيها .. عنقها لسدرو و بقا كايدوز على راسها ... 

ايرتان : تهدني .. خودي نفسك .. غير بالشوية عليك .. 

جهينة : بغيت نرجعو فحالنا... انا .. خااايفة .. 

ايرتان : غانرجعو .. غير تهدني ... هانتي هنا مخبية بقاي هنا غانحاول نعرف فين حنا باش نوصلو للسيارة .. ماغانتعطلش .. 

جهينة : لا ماغاتمشي لحتى بلاصة ... عافاك ماتخلينيش بوحدي فهاد الظلام .. 

استسلم ايرتان لطلبها و خداها لحضنو تاني .. 

ايرتان : كان خوفو غير عليها هي .. اما شكون كان و علاش هادشي كان عارفو و خاصة استراتيجية ديالهم و طريقتهم مألوفة ليه بزاف... 

ماطمنش لسكوتهم .. و كان عارف شنو كايحاولو يديرو .. شاف فجهينة و قال : 

ايرتان : مزيان دابا ؟ نتحركو .. 

جهينة : لا خايفة خلينا هنا مخبيين 😭 

اي تان : جهينة .. ماشي وقت الجبن ديالك ..خاصك تواجهي مخاوفك .. حتال امتى غاتبقاي هكا ... المشكل لي جا تقابليع بالبكاء ؟ ..غادي تنوضي دابا .. يدي فيدك .. غادي نلقاو الطريق منين نرجعو للسيارة اكيد مابعيداش و غانرجعو فحالنا .. تشجعي و قسحي قلبك اجهينة .. ياله تحركي ... 

شافت فيه جهينة شوية .. و مسحات وجهها و شدات فيه و ناضت .. 

جهينة : عندك الحق... انا تايقة فيك ا ايرتان 

ايرتان : مزيان ... *باس راسها* قسحي قلبك ... 

شدات فيه و تمو غاديين تاني و لكن بحذر اكبر ... جهينة جمعات خنونتها و دارت بنصائحو واخا الامر صعيب و لكن على الاقل كاتحاول ... 

بقاو غاديين بالجهة المعاكسة حتى بانت ليهم السيارة .. 

جهينة بغات تسطى بالفرحة تمات هي لي جاراه كاتجري باتجاه السيارة .. حتى جرها ايرتان وراه و ماعرفات 4 الملتمين منين خرجو .. 

جهينة قلسات وراه و عينيها دمعو تاني ... 

ايرتان بالتركية : غاندمكم الق*** مكم على هادشي 😡.. 

وقفو ب4 باستقامة و حناو راسهم نصف حنية بحال تحية و هجمو عليه

ايرتان مابقاش واقف بطبيعة الحال ... هجم بدورو .. خلاه حتى وصل لعندو و ركلو برجلو لسدرو لعدو لكم لي فيمين و عطا بدراعو لي فاليسار ...جاه واحد من لور تحنى و زواه بمرفقو ... جهينة فهاد اللحظة .. تخلات ورى شجرة كاتبكي و تدعي الله يفكهم على خير ... رجليها مارصاوش و يديها كايترعدو فوق فمها لي حابسة بيهم اي صوت ممكن يصدر منها .. 

ايرتان كان خفيف بيناتهم بحيت كان قادر يضرب كل واحد فوقتو و يدوز للاخر ... ملامحو تبدلات للحادة و مخيفة .. مدخل شفاتو التحتية داخل فمو و محلول ... كايضرب و يصدر اصوات بفعل الحركة ديالو ... 

ضرب واحد لجنبو و زادو ضربة فعنقو خلاتو ينساحب و يطيح مغمى عليه .. شنق عليه واحد من اللور و جاواحد يضربو من القدام لكن ايرتان ركلو برجليه ب2 واخا مشنوق ...خلاه يتساطح مع لي وراه و يطيحو ب2 ... اما لي وراه فمالقا كيف يدير ليه من غير يشدو من نقطة ضعفو و هي عضوو التناسلي .. شدو و ضورو ليه و حركات كانت قاسية خلاتو يطلقو و يتحنى يشد مسائلو زرب عليه ايرتان و هز جلو ركلو لوجهو و زادو بفوق ظهرو طاح كاو ... هنا جات ايرتان ضربة للظهر طيحاتو الارض ماجا فين ينوض حتى تحماو الجوج لي بقاو عليه بالركيل و الضرب .. 

جهينة شافت ايرتان عيا ... و دوك الحلالف داروه بيناتهم مافكراتش 2 مرات يا ربحة يادبحة ... و هاذي طبيعتها ماتقدرش تسكت على الظلم .. شافت فجنابها مالقات باش تدافع عليه ... جمعات الحجر و بدات تشير عليهم و كل حجرة يا حجرة ... ماداوهاش فيها ... 

شاف فيها واحد و انطق بالتركية .. 

....: صبري انا جاي ليك ... 

لاحت الحجر و بدات تشوف فيهم .. شرشمو ايرتان حتى مابقا قاد يتحرك ... هزات راسها للسماء تطلب الله يعاونهم ... بان ليها خصن شجرة تعلقات فيه و دارت الجهد لجيهتها حتى جراتو طيحاتو .. كان نوعا ما تقيل مهم دقتو الى كان فيها الجهد تطيح كااو ... ضاربت معاها و هزاتها و هي تم غادا كاتجري و تغوت ماجا فين يدور الحلوف حتى دخلات فيه بيه طيحاتو كايتلوى شاد جنبو ... اما لاخر داز ليها ... لاحت الغصن و بدات تضرب فيه فينما جات و كيفما جات مامفاكاش .. كاتضرب و تغوت و هو كايقلب منين يحكمها و لاهيا بغات ترصى ... بقات مضاربة مع اللتام ديالو تحيدو واخا شانق عليها ... قدرات تحيدو و تلاحظ شوية من ملامحو لحية و شعر اشهب و عيون زورق كون ماكان الوضع غير مناسب و مايكون مدوخها ايرتان من الاول كون جلست تصور معاه احم احم خلينا فالمعقول 😂 ... جهينة بركت تنقز و تقمش و تعض و حاامياها زغا و غوات ... حتى بان ليها طاح ... و كان ايرتان وراه كايتماسك باش يبقا واقف .. دغية شدات فيه جهينة و سنداتو عليها كاتبكي... 

جهينة : ايررتااان 😭😭 

ايرتان : ياله ... فحالك .. 

جراتو غاديين بالشوية و كل شوية دور تشوف لايكون ناض شي واحد ... مد ليها الكونكاكت لي كان فجيبو .. ركباتو حداها و طارت ركبات و ديمارات موركة ... كاتشوف فيه و فالطريق و كاتبكي .. كان شاد جنابو ووجهو بيه شي كدمات و خارج الدم من فمو .. 

ايرتان : صافي اجهينة سكتي .. ضريتيني فراسي .. 

جهينة : واش كانو غايقتلونا و انت كاتقول ليا سكتي .. ماعرفتش اشمن نوع ديال المصايب تاني هجمو علينا واش انا منحوسة لهاد الدرجة .. 

دار ايرتان يدو على راسو و خلاها تاني كاتغوت و تصعر عليه ... 

🚗  🚗  🚗

بعد مدة و صلو للدار .. كانو توجيهات ايرتان ليها باش ماتودرش ... هبطو من السيارة و شدات فيه و دخلو للدار ... طلعاتو للبيت و تكا .. 

جهينة : خاصني نداوي جراحك ..

ايرتان : غاتلقاي دوى فالحمام .. 

دخلات جهينة لقات بواطة الاسعافات فوق ... مدات يديها جبداتها و خرجات جلسات قدامو .. 

جهينة : حيد حوايجك الفوقانيين نشوف .. 

تغعد ايرتان و عاوناتو حيدهم و رجع تكا و باينة فملامحو كايتوجع .. 

كانو جراح قليلة فالاماكن لي كانت ظاهرة من جسمو و بعض الكدنات ديال الركيل فجنابو ... بدات كاتداوبه و تمسح دموعها .. 

تنهد ايرتان وقال : جهينة ... ماكاين لاش تبقاي تبكي صافي ماوقع والو .. 

جهينة : واش باقي كاتقول ليا ماوقع والو ... قول ليا دابا شكون هادوك و شنو كانو باغيين منا ؟ كاتعرفهم ؟

شاف فيها ايرتان شوية و قال : و منين غانعرفهم ؟ غايكونو شي قطاطعية و لا شي عصابة عايشين تما بغاو يسرقو ماتنسايش راك فتركيا .. 

جهينة : لالا .. هادشي جاني فشكل ... كون بغاو يسرقو كون خداو شنو بغاو .. و كان ممكن يتولاوك غير 2 و يديوني غاع كون كانو باغيني انا ... و هذاك لي شدني فالاخر كنت فريسة ساهلة ليه... ديك الفورمة كااملة ماقدش عليا ... مايمكنش ... بحال الى كان متساهل معايا و لا مانعرف ... ماضربنيش و مادار ليا والو من غير محاولاتو فاخفاء وجهو .. ااته وجهو ماعرفتش فين فايت ليا شفت كمارتو ... 

ايرتان : واااو اشنو هاد كمية الذكاء لي نزلات عليك فخطرة وحدة .. شوفي فيا .. داكشي لي وقع ماهو غير هجوم من شي عصابة و لا شفارة ... ماعرفناش شنو كانو ناويين .. المهم هو فلتنا دابا و ماوقع لينا والو .. دوزي تنعسي دابا ... 

جهيتة : ولكن ..

ايرتان : جهبنة طااالع ليا الخرى لراسي ماتزيديش مابيا 😡 

ساطت جهينة و دازت لجيهتها عطاتو بالظهر و نعسات .. رابطة غوباشتها و كاتخمم فكولشي لي وقع ... 

اما هو شاف فيها بقلق... و لكن تحولات نظرتو بحدة فاش تفكر بلي كانت معرضة للخطر و كان ممكن ترجع ليها الذكرايات لي شحال و هو مضارب معاها باش تخطاهم ... 

حسات بيه ناض من حداها .. مشا للبالكو ووقف .. بغا يكمي و لكن الانسة خصرات ليه الباكية كاملة ... 

غمضات عينيها و نعست و خلاتو ساهي فالسماء لي مابقا غير دقايق و تشرق فيها الشمس ..

حلات جهينة عينيها و ذاتها تقيلة عليها بالعيا و الجرى ... جلسات فالسرير كاتكسل شافت حواليها .. ماكانش ايرتان فجنبها ... عيطات باسمو و لكن ماجاوبهاش ... 

ناضت هبطات كاتجري حفيانة .. مالقاتوش التحت .. دخلات للكوزينة مالقات غير الفطور واجد محطوط و ورقة مكتوبة : فطري ووجدي الغداء .. ماتخافيش ماغانتعطلش ... 

جهينة بخوف و قلق : الله ياربي فين مشا هذا و خلاني بوحدي ...

عند ايرتان لي كان وقف قدام قصر مطوق بالرجال ... حلو ليه الباب و دخل بسيارتو ... سدها و خرج ساعر ... 

ايرتان بالتركية : دابا يحضرو ال**** لي هجمو عليا البارح ... 

جاوبو واحد منهم : مفهوم افندم ...

دخل ايرتان للقصر ، سول وحدة من الخدم .. 

ايرتان : فين آيدين بي؟ 

الخادمة : فالجردة افندم ... 

مشا بخطوات سريعة ... خرج من الباب كايقلب بعينيه ...لمحو جالس بفخامة فالجلسة كايشرب القهوة و فيدو جريدة ... راجل شامخ و attractive تقدمو فالسن ما اترش فتفاصيلو الجذابة .. لحية طويلة و شعر ابيض .. وشم فدراعو و بنية جسدية قوية ... 

تقدم ايرتان ووقف قدامو ... هز الراجل عينو فيه .. و ترسمات على وجهو ابتسامة خفيفة .. 

ايرتان بالتركية : بووص ... انت عرفتي كولشي ..

السيد آيدين : اهلا بولد روحي ...*حط الجريدة و نظاراتو * شحال من مرة كانقول ليك خارج الخدمة انا باك .. ماغاتسلمش ؟

تقدم ايرتان باس يدو و حطها على جبهتو ... ضحك الراجل ووقف .. خداه فحضنو بعناق قوي كايربت بقوة على كتفو .. حط ايرتان راسو على كتفو ... و غمض عينيه ... 

السيد آيدين : جلس اولدي .. 

جلس ايرتان فالكرسي فجنبو باحترام ... و يديه على ركابيه ... 

شاف فيه السيد آيدين كيف العادة بفخر و قال ليه : انا ماكاتخفى عليا حتى حاجة .. و ماتنساش بلي انا لي رديتك شافاك كوردو ... 

ايرتان : بوص ..انا .. 

السيد : باباك ... 

ايرتان : بابا ... ماكنتش باغي نقول ليك عليها .. حيت داكشي لي وقع البارح هو مناش كنت خايف ... جهينة ضعيفة و خوافة ماشي وقت تدريبها نهائيا ... و اكيد غاتكون عارف التجربة لي ياله خرجات منها .. كانحلف ليك بلي كنت غانعاود ليك عليها و نعرفك عليها و لكن منين تكون قوية و عارفة كولشي ... و لكن دابا لا .. خايف تدخل فشي حالة نفسية اخرى و يمكن باقي مابراتش كليا .. انت عارفني ماكانبغيش نزرب .. 

السيد : انت غالط اولدي ... جهينة اقوى من لي كايسحاب ليك ... و انت ماكاتعاونهاش راك غير كاتصعب عليك الامر اكتر .. خوفك عليها و شوفتك ليها كشخص ضعيف كايخليوك ديما ملازمها .. و هي ديما كاتحس بالامان و عمرها ماغاتخرج من تحت جناحك .. ماكاتعطيهاش فرصة فين تفكر تعول على راسها ... البارح فاش سيفطت الدراري قلت ليهم يركزو عليك و يخليو ليها هي الفرصة فين تصرف ... و الحمدالله الخام ديالها عاونا .. ماخلاتكش و هربت و لا استسلمات و لكن حاربت غير بلي فيديها .. هادشي كايتبت بلي جهينة ماشي خوافة و انما انت لي كاتخليها تحس هكاك ...

السيد : سمع اولدي ... كولشي كايبدا و كيسالي فعقلك.. الى عطيتيه القوة كايستخدمها ضدك الى سمحتي ليه ... كانفهم بلي جهينة مرات بامور صعيبة عليها كامراة ... وكانفهم خوفك عليها لا تضعف تاني .. و لكن خليني نقولك .. الحياة بحال المسار ديال اقرودة بين الشجر ... كايشدو فحاجة و يطلقو منها و يخليوها وراهم باش يشدو فلي قدامهم .. و فالاخير كايوصلو للبلاصة لي كانت قدام عينيهم .. هكاك بالنسبة لينا تاحنا .. مشكيلة تدخلنا فمشكل حتى كانوصلو لهذفنا .. و حنا هذفنا فهاد الحالة هو قوة جهينة .. انا ماكانحرمكمش من انكم تبغيو و لا تديرو الولاد .. ولكن كولشي بشروطو ... بغيتيها تبقى معاك خاصك تقسح قلبك من جيهتها و تخليها تواجه ..باش تقدر تحمي ظهرك و تحمي ظهرها .. كولنا نوايانا حسنة و لكن اعذائنا لا .. الى ماكنتيش غادير هادشي خلي البنت تمشي فحالها .. 

ايرتان : واخا ... يمكن عندك الحق .. ولكن خلي ليا شوية الوقت بما وجدتها .. 

السيد : واخا اولدي ... البارح كان هذفي غير نتعرف عليها ... و عرفتها ... دابا خاصك تعلمها تخدم جسمها بالطريقة الصحيحة .. و عارف ماكاين مااحسن منك فهادشي و مابغيتهاش تعرف شكون انت و لا علاش كاتعلم داكشي .. 

ايرتان : مفهوم ابابا .. 

ضحك السيد و قال : و اخيرا شفاك كوردو تجاوز عقدتو و مخاوفو ... 

ايرتان تنهد و قال : من ناحية انا فرحان بيها و لكن عندي بزاف المخاوف ... راك عارف صغري شنو عانيت فيه ... 

السيد : قلت ليك عاد دابا ماتعطيش القوة لعقلك باش مايستعملهاش ضدك ... انت عايش وسط الاحتمالات و كولشي كاتبقى تحلل فيه حتى كايخرج من يديك ... عيش و ماتفكر فوالو ... و شريكتك كانظن عندها السيطرة عليك .. 

ضحك ايرتان و قال : عندها طرقها ... 

السيد : هههه اكيد فهي حواء ... و حواء ديما عندها طرقها ... ولكن بغيتك تزرب فتعليمها حيت ماقادرش نصبر و نهز جروك بين يدي ههه.. 

ضحك ايرتان على التشبيه لي دار فهو اول من طلق عليه اسم الذئب و دائما كايشبهو بيه .. و هادشي لاسباب منها حدة ذكاءو و مكرو و شجاعتو و عدم خوفو من اعداءو .. قوة حدسو و استراتيجياتو لي كايستخدموها فخططهم بالاضافة لقوة شخصيتو و شرو ...

ايرتان : واخا ماعنديش مع البعالك و لكن غاندير جهدي باش نلبي رغبتك ... 

ضحك السيد آيدين و قال : غانشوفو منين تهزو من صلبك واش غايكون عندك معاه و لالا ههههه 

ايرتان : الايام غاتورينا ههه ... 

ضحك السيد و تبعها بتنهيدة مد يدو و حطها على حنكو بطريقة رجولية و ضربو ضربات خفاف و قال : 

السيد : كنتي غاتكوون من صلبي انا كون ماداك الحيوان ... 

شد ايرتان فيدو و قال : حتى انا .. كاندم على كوني ولدو هو .. ولكن الحقيقة لي كانعرف هو انت لي الوالد و ولادي غايكونو احفادك انت ... و انت لي غايقولو ليه جدي ... و كانواعدك غايندم حيت دمر ليك حياتك ... 

السيد : ايرتان ... انت غاتخرج سوقو .. هذاك غانتولاه انا و الدراري ... ماتنساش القيم لي ربيتك عليهم .. 

ايرتان : ماتخافش ابابا .. انا ماناسيش بلي هو لي ولدني ... ولكن حتى هادشي ماكايعنيش نسكت و نخليه يهرب من جزاءو .. 

السيد : كولشي فوقتو اولدي ... كووولشي فوقتو .. مهم ترد البال لختك نيسرين و.... بيراي ... كانقصد ماماك وفاء ... 

ايرتان هز براسو مبتاسم ليه نصف ابتسامة ... 

خرجو الرجال عندهم معاونين 4 لي مفرشخين ووقفو مستفين .. 

آيدين : مال هاذو ؟ 

شاف فايرتان لي غايموت و ينوض يبرد فيهم هوايشو .. ضحك عليه و قال .. 

السيد : هههه خليهم عليك ... راه ماتحركو غير بامر مني و حسب معلوماتي راه لي مطيرة ليك العقل غاعما تآذات .. 

شاف فيه ايرتان بحال الى كايطلبو يخليه يدير ما بغا فيهم .. 

ايرتان : خليني نحاسب غير هذاك لي خلاها تشوف وجهو ... 

ضحك آيدين و هز براسو .. 

ناض وقف قدامهم كايخنزر و هوما حانيين ريوسهم ليه ... 

ايرتان : هاذو على الخلعة لي ركبتو فيها البارح .. 

داز عليهم كل واحد زواه حتى عواج .. وصل للشهب و خنزر فيه .. 

ايرتان : درتي غلط كبير البارح منين خليتيها تشوف كمارتك .. عرفتي هادشي علاش؟ .. حيت هي شافت وجهك منين عطيتيني الكونطاكت ديك المرة .. و الى مشات حتى تفكراتك غادي تدخلني فدوامة ديال الاسئلة معاها ... و انا هادشي مابغيتوش ... بما انك حطيتيني فموقف بحال هذا فخاصك تحاسب عليه ... 

الزعر : كانعتاذر افندم ... كنت واخد بالي ولكن كانت كاتحرك بزاف .. 

ضربو ايرتان و عطاه 2 ركلات ..

ايرتان : مانقبلش منك مرة اخرى تلوح اللومة على شي حد ... و اغلاط بحال هاذي المرة الجاية ممكن تسبب فموتك .. آخر انذار و هادشي ليكم كاملين ...هزوهم عليا من هنا .. 

مشا رجع كايلعب بلسانو و مغوبش ..جلس حدا آيدين و حيد التجاكيط لاحها و شعل غارو و انفاسو طالعة نازلة .. 

ضحك آيدين : حالك الشرير ..ماكتسمحش فحقك ههه

جلس معاه ايرتان مدة قليلة هضرو فيها على الدراري و خدمتهم ... حتى وقف .. 

ايرتان : خاصني نمشي ابابا .. خليتها بوحدها... 

وقف آيدين كايضحك .. خداه فحضنو كيفما استقبلو و قال .. 

آيدين : تهلى فيها و ماتخافش خليها و طلق ليها الحبل ... راكم ب2 تحت حمايتي .. ماتنساش .. 

ايرتان : واخا ابابا ..

خرج من عندو زربان .. و رجع آيدين لجريدتو و كايضحك .. 

ركب ايرتان فسيارتو ووصلو اتصال ... كان من اشرف.. 

اشرف : بالصح داكشي لي سمعت .. 

ايرتان : اه .. بالصح ... 

اشرف : اشنو وقع ؟ .. 

ايرتان : كان عارف كولشي .. واخا درت الحيطة و لكن راك عارف ... 

اشرف: كنت عارف سكوتو ماشي حتال لهيه .. هو اكيد ماغاديش يرفض علاقتكم و لكن غادي يتصرف من عندو .. 

ايرتان : و داكشي لي دار .. مهم هضرت معاه و قال ليا مناويش يعاود شي اختبار اخر حتى ندربها .. 

اشرف : و جهينة كيف دايرة ؟ 

ايرتان : حمد الله بان ليا غاتقبل الموضوع هكاك و صافي .. قتلاتني اسئلة البارح و دابا غانرجع غاتكمل .. 

اشرف: هههه مانخااافش علييك .. راك غاتعرف كيفاش تتلفها و صافي .. مهم تهلا عندي مايدار .. 

ايرتان : اش عند بووك مايدار .. الدراري راه عندهم خدمة و انت مخشي تما مغاتكون عاطيها غير للقصاير .. 

اشرف: هههه اوى الى حسدتيني دير بحالي .. تهلااا.. 

ايرتان قطع و لاح تيلي قدامو : برهوووش 

ديمارا السيارة و خرج ..

قطع اشرف و لاح تيلي فوق السرير .. و دخل للحمام ..

فالكولوار كانو رجلين بصابو بلاستيكي و لباس ديال عاملة الميناج قصير حد الركبة و طابلية ... و جامعة شعرها البني بباندا و وقفات قدام باب الجناح دوزات البطاقة و حلاتو ... جرات السلة لي فيها مواد التنظيف و دخلات ... غير شافت الجناح كيفاش داير كولو مرون و زبل سقاطة و كيسان شراب و غاروات و البيوتة مفرعين و حتى حاجة مافبلاصتها... و هي تربط غوباشتها .. و دارت يديها على جنابها و قالت .. 

.....: ايييه القرف المهبب ده .. ايه الناس الزبالة لي معانداهاش ضميير ... مش مستحملة الحياة ده ...*هزات يديها للسماء* ياربي انا عملت ايه عشان استحق القرف ده ... انا هربت من قرف مصر عشان انغمس فقرف المغرب .. ايه ده بجد what s wrong with my life ... 

بعدما سالات من نغيرها بدات تجمع الرواين و بدات بالبيوتة .. دخلات لبيت اشرف هو الاول و بدات تجمع و تسب و تدعي فيه .. 

خرج اشرف من الحمام لاوي عليه فوطة و لكن رجع منين شاف .. بنت عاطياه بالظهر محنية و كاتقاد فالفراش و كاتهضر مع راسها .. بقا كايطل عليها و كايطلع و يهبط .. كانت بنت طويلة رشيقة و فورمة زوينة بتحركات انتوية ... قرب ليها بالشوية و عينيه قلوبة فيها تحنى لمستوى جسمها من التحت و دار يديه بحال الى غايقيس ... و ضربها تماا ... حتى قفزت و غوتت .. هزات فاااز حداها و ياله غاتضربو بيها و شد يدعا و شد حتى فخصرها و زدحها معاه و هو كايضحك .. ولكن هجرو منين شاف الحسناء لي قدامو بملامح بريئة .. عيون خضراء مشفرة و بشرة بين البيضاء و الخمرية ... ملاحظش نظرتها الغاضبة حتى بعداتو عليها و هي تهز رجلها عطاتو لballs (ماتنساوش بلي السيد محزطط بالفوطة) طاح كايتركل بكشاكشو ..

عند جهينة .. 

منين خرج و هي غادية جاية مافطرتش و ماقدتش تصاوب الغدا .. قال ماغايتعطلش و لكن السيد نسا راسو و تعطل ... سنعات الباب كايتحلى.. هزات مدلك ووقفات ورا الباب تحسبا .. غير دخل ايرتان كانت غاتجيه لراس كون ماشدها و ضورها بحركة دفاعية .. 

ايرتان : وا استقبااال ذارت ليا الحب .. 

جهينة :اوووف هذا انت ... فين مشيتي و خليتيني ... هادي هي دغيا غانرجع ؟ 😡😡 

ايرتان عنقها : توحشت برهوشتي ... 

جهينة بعداتو : اوووووف .. واش كميتي تاني 😠 

تنهد ايرتان بغير اهتمام و دفع الباب برجلو و دخل كايحيد التجاكيط ... 

ايرتان : ياااله بداااي تاني ... 

جهينة تبعاتو : غانبدا علاش ماغانبداش .. علاش كميتي و فين غبرتي الصباح كامل و نخليني غانموت عليك بالخلعة و اش باغي تحمقنييي 😡😡😡

دخل ايرتان للكوزينة و لقا كولشي كيفما هو .. و دار عندها .. 

ايرتان : فين الغذاء لمك .. 

جهينة صعرات عليه : واااااش باااقي كاااتقوووليا الغذاااء واش باغي تصعرني 😡😡 

ايرتان : تهدني ياهاد البنت اش وااقع غاااع بردي .. 

وقفات جهينة كاتخنزر فيه ضحك ايرتان عليها و قرصها من حناكها ... 

ايرتان : وينو على الخويويفة ديالي مقيلقة ليا و معيصبة ... 

زاد فقصة على فقصة .. شداتو من شعرو و هبطاتو لعندها غاديا جايا براسو و هو كايضحك 

جهينة : واش انا لمك كاتشوف فيا على اعصابي و انت باقي كاتفلى عليا ... دويي فييبن كنتي .. 😠 

ايرتان شد يديها و جلسها كايضحك : مامشيت فين غير قدمت بلاغ على دوك لي تعرضو لينا البارح .. 

جهينة : و علاش مادياينيش معلك غاياخدة افادتي حتى انا .. 

ايرتان : انت تركية ؟ اوى ريحي .. 

جهينة : ولكن هادشي ماكايعنيش ماياخدوش افادتي .. 

ايرتان : الى مشيتي حتى انت غايبغيو تبقاي هنا مدة اطول و انت اانسة بعد غدا غاتهزي قلوعك ترجعي فحالك .. 

جهينة : مهم قدمتي شكوة .. 

ايرتان: ايه الالا .. بردتي دابا ؟ 

جهينة : و علاش كميتي تاني ؟ 

ايرتان :كنت معصب و نسيت راسي .. 

جهينة : انت حلفتي مابقيتيش تكمي .. و لكن ماوفيتيش بوعدك 😠 

ايرتان : صافي هتد المرة بالصح و من نيتي و اللهما بقيت نعاودها .. 

جهينة : بعد لهيه .. صافي رجعتي فهضرتك من الاول كنتي ترد البال .. 

ايرتان : وا صافي ماتنكديهاش عليا الله يرضي عليك و انا لي جاي موحش حبيبتي و باغي ندوز معاها عشية زوينة .. 

جهينة : ماعندي خاطر .. خليني عليك .. 

ناضت طلعات .. 

ايرتان جلس و تنهد ... عارفها مقلقة و لكن حلها ساهل و عارف كيفاش يراضيها ..

عند اشرف ... 

....: دانتا هاتروووح فالف 60 داهية انهارده... 

اشرف: اااه صدقتي مصرية ... قودتيها لمك .. عرفتي اش درتي ؟ خصرتي ليا الموعد مع الشهبة تاني ... *ناض وقف بدا يقرب و هي كاتبعد و عينيها خارجين * 

اشرف: ولكن ... مابقاش باين فيها البلان .. بان فيك انت...

زادو خرجو عينيها فيه .. 

اشرف: اوووه بان ليا الانسة المصرية كاتفهم مزيااان المغربية .. 

.... كاتبعد وجهها و تسرط ريقها : ا.. إنت .. بتهبب..بتأوول اييه ..اكيد مش فااهمة خاالص .. 

اشرف: علاش ... ماكاتفهميييش مغربي ؟ 

..... : لأ ... طبعا لأ لهجتكو ...صعبة ..اوي ... مابفهمش حاجة خااالص ... ممكن تبعد شوية لحسن انت مقرب جدا مش لاقية اتنفس ... 

اشرف زاد قرب : مامبعدش ... اشنو غاديري .. *شاف الشارة لي على سظرها و فيها اسمها* آاا ايشراااق .. 

زادت غرقت فحوايجها و تزيرت ماعرفت منين تخرج راسها ... هو زعم بما انها مصرية و ماغاتفهمش .. قرب لودنها ووشوش شي حاجة و رجع شاف فعينيها كايتبسم بشر ... 

ولات حمرة و عينيها كايلوحو شرارات ديال العافية و الدخاان خرج من ودنيها ... و هي تغرغع ... 

.....: حتتااااال هناااا و حبااااس شفتيييني مصرية قلتييي آاااجي هاذي موضرة نلعب عليييبهااا ... اااه دوييي يا زرق الكمااارة ... وا سمع على ودنيك .. هادي مغربيييية بنت مغربيييي و تحديييدا من الدرب الكاااابيييير وبربي حتى اليوووم بوووك مااايلقاااو مااايجمعو فيك ... 

اشرف كايسمع ليها و كايشوف كيفاش كاتبوووزق عليه و ضحك .. هز راسو الفوق و ضرب بيديه و قال : هااا الطرح حمااااا .. 

وهي تدخل فيه براس ...

عند جهينة .. جالسة فالبالكو و دايرة يدها على خدها ... عيط ايرتان من التحت و والو ماجاوباتوش .. طلع عندها .. وحل الباب لقاها فالبالكو .. قرب و جلس حداها .. 

ايرتان : باقية حبيبتي مقلقة مني .. 

ماجاوباتوش و ناض جلس قفازي قدامها .. 

ايرتان : صايبت ليك واحد الغداء عمرك دقتيه .. شافت فيه و رجعات شافت قدامها ... 

ايرتان : هههه امم دافعة كبير .. و حتى كرشك مارحمتيهاش ... كوراه من الصباح و هي توغوغ .. 

جهينة : بعد مني ماسوقكش .. 

ايرتان : واش لمك غانبقا نتعنب عليك هنا .. 

ناض هزها على كتفو هبط بيها كايدردغ و هي كاتغوت

هبطها و جلسها فالكورسي و جلسات مستقيمة و ربعات يديها و دورات وجهها .. شاف فيها ايرتان بنصف عين و كايضحك .. حط ليها فالطبسيل و حطو قدامها .. شمات جهينة الروايح حتى دوخو ليها العقل و لكن الكبرياء فوق كل شيء .. 

ايرتان ؛ ممكن تفصلي غضبتك على الماكلة .. غضبي ولكن كولي ... و لا غانلوح مو... 

جهينة : اه .. علاش نجوع راسي .. حيد لهيه .. 

تقادت و بدات ماكلتها .. جلس كايضحك فجنبها و جلس ياكل حتى هو .. 

ايرتان : نبقى انا ديما تابعك باش تاكلي فينما تغضبي .. 

جهينة : اوى ماديرش علاش .. 

ايرتان : وا صافي .. باقي ماولفت قضية عندي لي يفكر فيا و يخاف عليا ... غانولي ندير بحسابك .. غير فكي عليا ديك التقليقة الله يرحم باك ..

جهينة شافت فيه بنصف عين و كملات ماكلتها .. 

ضحك ايرتان و كمل ماكلتو .. 

ايرتان : عمري سولتك اجهينة .. 

جهينة : اشنو 

ايرتان : كايعجبوك الدراري الصغار ياك ... شحال باغية تديري فالمستقبل .. 

جهينة : بغيت كل عام نولد واحد .. حتى نوصل لسن اليأس ...

ايرتان وحلات ليه : ااااحاااحاااااح 

جهينة : هههههه باسم الله عليك هاك كاس الماء .. 

شرب ايرتان و هز راسو فيها .. 

ايرتان : واش كاتعني هادشي لي قلتي .. مال مك قنية ... 

جهينة رجعات لبلاصتها : و مالك تصدمتي .. هادشي خاص يصدم لي غايتزوج بيا ...

ايرتان : و علاه انت الالا معولة تزوجي غيري ؟ اش مجلسك معايا .. 

جهينة : وا ماعرفت منين نشدك ياك ماباغيش تزوج بيا .. 

ايرتان : كيفاش ماغانتزوجكش؟ و اش بغيتك لاماكنتيش تكوني مرتي .. واش انا النهتر كولو و انا نتعنب و نخسر فالحجرة باش تقولي ليا غانتزوج غيرك .. 

جهينة : هااااا وا شد طريق وحدة الله يرضي عليك .. انا راك تلفيتيني .. خليني نعرف راسي من رجليا .. واش بغيتيني للزواج و لا اللا .. 

ايرتان : كاتبوزقي عليا .. ياك ؟ 

جهينة : اعووذ بالله .. علاش غانتبوزق عليك .. انا غير سولتك .. 

ايرتان : اوى شوفي الالا و الله لغيري لا كنتي مراة و انت لي غاندير معاك الولاد ... يالله جاوبتك .. 

جهينة : إوى هكاك .. قولها من الاول علاش عزيز عليك تشد الضد .. 

هزات طبسيلها و ناضت كاتبعصص و مشات للصالة و شعلات tvو جلسات ... 

ضحك ايرتان و ضرب جبهتو بيدو ...

عند تشيم تشيم ... 

لي ضرباتو براس شدو .. و جات تعاود تضربو و شد يدها لواها ليها حتى ضارت هي وياها .. و حكمها..

اشرف : هاااي هاااي على الفتاة ...تي هاد الكيوتنس لي فوجهك فين درتيها... 

إشرااق : حيد مكافشك ولا غانهرسهم لييك .. نورييك الزعامة كيف دايرة ... 

اشرف: هههه الزعامة انا غانوريك الزعامة... عرفتي داك الضرب باش غايتقاام عليك .. 

اشرااق: باااش ... زعما باغي تجبد ليا الصداااع و تجري عليا من الخدمة ؟ ماكيهمنيييش .. خلييتها لييك .. 

حيدات اطابلية خبطاتها على كمارتو .. تمات غادية كاتخبط فرجليها .. وقف كايشوف فيها كايضحك ... مابانت ليه غير رجعات و عطاتو عاوتاني و هربت ... 

اشرف : بنت الحراام ماعارفاش معامن طحتي لمك *بقا يتلوى * ولكن جيتيني مرأة مابغيتش ندير فيك يدي ... 

عند جهينة ...

غسلات الماعن و طلعات للبيت .. كان ايرتان متكي كايتصنت لعظامو .. حتى دخلات عندو و تكات حداه .. 

جهينة : ناعس ؟ 

ايرتان : الى خليتيني .. 

جهينة : البارح ... 

ايرتان : رجعنا لموضوع البارح ؟ 

جهينة : والو بغيت غير نسولك على ديك العصا لي عطيتيهم ... من طريقة الضرب ديالك كاتبان مدرب ماشي غير كاترتاجل ... حتى قبايلة فاش حليتي الباب .. ديك الحركة لي درتي ليا .. لي شافك يقول عميل سري .. 

ايرتان : هههه عميل سري ... 

جهينة : ااه .. ماكرهتش نكون حتى انا هكاك بحالك .. لي قرب ليا يرعف .. 

ايرتان دار عندها دغية و بحماس قال : نعلم حبيبتي .. 

جهينة : واااايلي انااا ..

ايرتان : انت و على شكون ؟ 

جهينة : هههه نعس نعس .. راك ماناعسش ... بقا ليا غير المصارعة .. 

ايرتان ناض جلس و تقابل معاها : انت كبنت غادي يخصك ضروري تكوني عارفة كيفاش تحركي جسمك دفاعا على راسك .. 

جهينة ناضت من السرير متهربة : مافياش و مابغيتش عندي انت لي داافع عليا .. 

ناض ايرتان شد دراعها و قفها قدامو و كلام السيد آيدين فودنيه "ماحدها عارفة بلي انت ديما غاتعتقها فراه عمرها تخرج من تحت جناحك " 

ايرتان : و الى ماكنتش معاك ؟ ...جهينة .. شوفي فيا .. تخيلي انا وياك مزوجين و عندنا ولد ... خرجت الصباح مشيت لخدمتي و انت خرجتي تدي ولدنا لمدرستو .. جا واحد تعرض ليكم فالطريق و بغا يسرق ولدنا و لا تعرضتي لشي هجوم ... باش غادافعي على راسك وولدنا ؟ 

جهينة : غادي نقلب لي لقيت حدايا و نضرب مو للراس ... نقتلو نهز ولدي نهرب .. 

ايرتان : و الى ماعندك باش ضربيه ؟ .. و الى كانو اكتر من واحد ؟ 

جهينة : خلاااص عليا واش الدنيا سايبة ... اصلا المغاربة معاغيز و حتى السرقة مايقدرش عليها غير هني بالك .. 

دازت من حداه .. غوت باسمها : جهياااانة .. 😡

دارت عندو قافزة مابانت ليها غير يدو جايا لكمارتها تحنات و دازت فالخوى و عينيها خارجين ... وقفات راجعة باللور و قالت : واش حماقيتي .. 

ماعطاهاش فرصة ... وجه قبضة لبطنها و شداتها ليه كاتحاول تحمي راسها ... و استمر هكاك فينما كايشير بقبضة لشي جهة من جسمها كاتشد فيدو و يرجع يحول الاخرى لجهة اخرى من جسمها و هي مصدومة فيه و كاترجع بلور حتى وقفها الحيط باش تولي محاصرة بينو و بين ايرتان .. هاذ الاخير لي كان مركز مع حركاتها الغريزية باش تحمي جسمها .. محركة جميع حواسها باش تقدر تركز على شحال من حاجة فخطرة وحدة .. ابتاسم ايرتان و حاصرها بين يديه حاطهم على الحيط .. 

جهينة : واش .. حماقيتي شنو هادشي درتي .. 

ايرتان : عندك القابلية باش تعلمي ... و هادشي غايجيك ساهل ماهو غير practice و صافي .. 

جهينة : ماغانعرفش .. 

ايرتان : قلت غانعلمك .. 

جهينة : مافهمتش علاش هاد الاصرار كامل ... 

تنهد ايرتان و قال : اجي هنا ... 

جرها جلسها على طرف السرير وجلس قدامها شاد يديها ... احنا عينيه كايشوف فيديهم المتشابكة .. سكت شوية و قال : انا غير انسان ماشي متالي ... انسان لي ملاحقينو عقد الماضي ... و التخوف من انهم يبانو فالمستقبل ... و يدمرو كولشي لي بنيت ... من بينهم انت .. خايف عليك مني .. عارف بلي فداخلي وحش ماكايرحمش ... انا خايف عليك منو ... ماعارفش كيفاش غانشرح ليك و لا نوصل ليك .. و لكن انت خاصك تكوني قوية و مسلحة .. باش تقدري توقفيه ... و عاد كاينيين امور اخرى ... كيف قلت ليك .. الحياة ماشي الوان قوس الرحمان و ضحك و برائة و لعب ... خاصك دخلي هادي فراسك ... هادشي فايت قلتو ليك ... و انا ماشي ديما غانكون فجنبك و حداك ... ضروري غايخصك تعرفي كيفاش تدافعي على راسك و تصرفي بوحدك .. 

تبسمات جهينة و شدات فوجهو بن يديها وقالت : كايعجبني خوفك الابوي عليا ... ايرتان ماتخافش عليا انا قادرة على راسي زعما راه عشت سنين بوحدي ... و فيها ماوقع ليا وااالو ... 

ايرتان : علامن كاتضحكي اجهينة ... الطريقة باش دخلت لحياتك كانت خطر عليك ... جلال كان خطر عليك و مارديتيش البال... تصرفاتك الطايشة خطر عليك .. صحابك قالوها و عاودوها فاش دخلتك للحبس ... و عاد امك لي ماكاتعرفنيش ... شافتني مرة وحدة فحياتها ووصاتني و امناتني عليك .. كيفاش كاتقولي قادا على راسك ... *عضت شفاتها بخجل* سمعي احبيبة ... من خلال لي وقع البارح .. فهمت بلي انت واخا كاتخافي و لكن كاتدفعي جبهة و عندك مفهوم لهلى يقلب و فينما بغات توصل توصل ... اوى تصوري نجمعو هاد الجبهة مع القوة ... ماغايبقا يقد عليك حد .. الى دربتك غايولي عندك كيفاش تدافعي على راسك و حتى على الضعفاء فمحيطك .. ياك الالا عزيز عليك تعاوني الناس .. 

جهينة وقفات : صافي قنعتييني ... 

ايرتان وقف كايتبسم : من الان لا رجعة .. 

جهينة : ااه .. متأكدة و لكن .. بالشويى بالشوية عليا .. و انا راك عارفتي غير هشيشة راه العجينة و كاتغلبني .. 

ايرتان عنقها كايضحك : عاارف .. ماتحتاجش حبيبتي توصيني ..

###

مهم عارفة الشخصية الجديدة دارت تشويش شوية فاستمرارية الاحدات ... بسباب جنسيتها .. انا قريت شي 2 قصص مصرية و قلت علاش ماندخلش شي وحدة حيت هضرتهم واخا هكاك كاتدير جو و كاتضحك و لكن بما ان اغلبكم مامرتاحينش ليها قلت صافي نحيدها ...يعني غير تغاضاو على بعض الاخطاء لي متعلقة بيها و غادي نرجع البالنص دونت ووري .. شخصيتها و قصتها غاتبقا هي هي مابدلت والو من غير جنسيتها بطبيعة الحال ..
###

جهينة : وا سيير اسيدي نعس ليك شوية .. راك ماناعسش ..
ايرتان : اشنو غاديري انت ..
جهينة : غانهز شي كتاب من ديالولك ... بينما فاق الجلاخة ديالي ...
ايرتان باس يديها و قال : واخا الالا ...
خرجات جهينة من الغرفة و سدات الباب .. و هو تخشا فبلاصتو و تنهد .. بحال الى هم الدنيا حيد من على كتافو و قال : الحياة شحاال ساهلة مع هاد البنت ...

دااز الوقت ... حل ايرتان عيينيه .. شاف حواليه ... كان ظلام الحاال ... كان الصقيل و الحس ماكاينش .. استغرب ماماولفاش لجهينة ... واخا يكون ناعس كاتبقا تصدعو حتى كايدير بالناقص .. ناض لبس فرجليه و هبط كايحك و جهو و ولحيتو ... و يقلب علبها بعينيه ...سمع التلفازة خدامة فالصالة ... مشا بخطوات صامتة ... وقف فالباب لقاها جالسة وسط الفوتوي شادا قدامها عراام السقااطة .. و كانت كاتبكي و تمسح دموعها ...
دخل عندها و كايشوف فديك الحمقة بشفقة .. و قال ..
ايرتان : دايرة ليا جناازة هنا ... مالك ؟
شافتو جهنية جاي يجلس حداها .. مدات يديها بحال الدري الصغير ... ما إن جلس و تخشات فيه ..
ايرتان كايطل عليها : اش مبكي الحبيبة ديالي ؟
جهينة : هاد الويل لي متبعة ... ساعتين و انا كانتفرج فيه فالاخر البطل يموووت .. قتلو الشريير ... واش داك التيتيز يموت و لمن خلا ديك المسكينة لمن ... مايمكنش الشر يربح و يغلب ... تش هاد الخرى غاااع .. اش دااني لشي زمر انا غااع تفوو 😭😭
ايرتان : هههه ماشي ديما كايربح الخير .. كاينة شي حاجة سميتها النهاية المأساوية ... و لكن ماتنسايش الامور ماكاتساليش هنا .. كاين موضع آخر للحساب ..
جهينة : دابا وقت التفلسيف ديالك ... انا كانقولك التيتيز ماات و انت كاتقول ليا التراجيديا ...😭😭
ايرتان : نوضي تهزي لمك من قدامي .. اشمن تيتيز و لا عزااك .. التراجيديا هي لي غاتعيشيها الى مااحتارمتينيش ... 😠 و زايدون منيين جبتي هاد الويل كانل انا غاعما كانشرييه .. 😠
جهينة مسحات و جها و ضحكات : شريتو ..
ايرتان خرجو عينيه : خرجتي لمك بلا خباري .. كيف درتي ليها ..
جهينة : مانيش درية صغيرة .. مليت بوحدي و انت غطستي فالنعاس و طولتي قلت نخرج ندور شيوية هزيت شي حاجة من فلوسك ... و شريت لي بغيت و رجعت ... و شديت الفيلم الزفت حتى هبطتي ..
ايرتان : كيفاش درتي هادشي و ماعقتش بك ..
جهينة : مادخلتش للبيت عندك غااع ... تجاكيطتك كانت هنا .. راهية ..
ايرتان : كنتي تعلميني و كون فقت ومالقيتكش .. كون شقلبت مها هاد لدار .. و اش هاد الوييل شاريا ..
جهينة : سكتنا هادشي عندهم بنين من داكشي ديالنا باسل ..
ايرتان : ناااااااري معامن عايش ..
جهينة : ههههههه ... واشوف وجهك كيف منفووخ و نعسة درتي اليوم ..
ايرتان : كنت عيان .. عرفتي اول مرة فشحااال ..كانحس براسي نعست نيييت .. عرفتي علاش ..
جهينة :حيت كنتي كاتفكر فيا و نعستي و حلمتي بيا ..
ايرتان : لا .. حيت ماكنتيش حدايا ..
جهينة هزات الوسادة لي حداها و خبطاتو ...
جهينة :تا اش هاد الرومانسية لي كاتشل عندك انت .. عمري كانو فيا الاعصاب حتى درتيهم فيا 😠
ايرتان : هههه ريحي ... تي ريحي ...
جهينة جلست و ربعت يديها كاتغزز فسنانها ...
ضحك و حط راسو على رجليها ..
جهينة : نوض تهز راه التيساع ..
ايرتان : هذاي .. خليني نرتاح ..
جهينة : على اش كنتي كادير الفوق ..
ايرتان : كنت كانرتاح .. و لكن دابا غانرتاح من الراحة ..
جهينة : ناااري كتراات فيك الهضرة كتر مني و من تشيم تشيم ..
ايرتان : معذور و انا ضاير بيكم .. خاصة انت .. راه غير كانحط راسي ... كانبقا نسمع غواتك و صداعك و هضرتك فراسي ..
جهينة : هههههه اوى هاداك هو السحر ديالي ..
ايرتان : انت كلك سحر غير هنينا ..
جهينة : مافيكش الجووع ..
ايرتان ؛ نوضي طيبي ..
جهينة : مالي خدامتك ...
ايرتان ياله غاينوض و هي تقول ليه : صافي صافي ... ههه انا نايضة ..
ايرتان: ياله تغعدي ...
ناضت جهينة كاتجري للكوزينة و هو تقاد و جلس يشقلب التلفازة ...