قدري أن أحبك الجزء 15

داز على رجوعهم للمغرب 8 ايام ...

جالسة جهينة و ايناس فالكافي ديال المستشفى فوقت استراحتهم كايتحتتو ..

ايناس: ااوووه الناس زيانو و لاو مهليين فريوسهم و اللبس و الحالة ..

جهينة كاتلهب بشعرها : اوى اختي هذاك غير الحب لي زيني ..

ايناس شدات فيديها : هههه عرفتي و اللهنتا عاظ وليتي تباني ليا عايشة ... احسن حاجة وقعات فحياتك هي تلاقيتي بايرتان .. بدلك ياختي عااد وليتي بنادم ..

و ليتي هوكا عندك شخصية و كاتنبع منك شوية من الكاريزما ..

جهينة : اوييلي يهدييك الله اشمن شخصية و لا كاريزما .. *رشفت قهوتها*

ميقات فيها ايناس و قالت : و هانتي .. وليتي كاتعرفي تقولي لا ... مابقاوش دوك الحمارات كايلوحو ليك خدمتهم .. وليتي تمشي هازا راسك ... ولات عندك واحد التقة فالهضرة ... ماعرت كيف غانقول ليك مهم هاد ايرتان مأتر فيك .. و هادشي عاجبني صراحة .

جهينة : هههه واش بالصح هادشي لي كايبان ليك ..

ايناس: اايه الالاا ..

جهينة : هههه عندك الحق ... وليت بحالو .. ديما كايقول ليا خاصك و خاصك .. التصرف لي درتو كايصححو و يوريني كيفاش نتعامل ... و انا كانشد لي بغيت و لي ماعجبنيش كاناخدو بطريقتي ... ماما رباتني على الحنان و اعطاء الحب و كل ماهو زوين فالعلاقات و لكن ماكانش عندي الاب لي يربي داك الجانب القاسح فيا .. جا ايرتان و بحال الى تقولي كاينمي داك الجانب فيا ... يعني عندو دور الاب فحياتي اكتر من اي حاجة اخرى .. و دابا على لي قلتي غير الولف بما اننا عايشين ب2 فراه طبيعي ياخد مني عاداتي و ناخد منو عاداتو ..هههه راه حتى هو ولا فيه الهضرة بزاف .. و كل شوية يدور و يصايب شي خاجة ناكلوها ب2 😂😂

اينااس: ههههه فرحت ليك العجلة ... دابا عاد رتاحيت من جيهتك ... شفتي شنو كاتستاهلي و انت كنتي راضية ليا بداك الويل ... لا زين لارجلة ...

جهينة : اوى صافي اش فكرنا فيه دابا ... ولا ماضي و عمرو يرجع ... مهم اشنو خبارك مع عتمان ..

ايناس: حمد الله .. ملاهي مع الستريس الخدمة هاد الايام مابقا عندو خاطر .. و غيير معصب .. مابقينااش كانتلاقاو كيف شحال هادي ...

جهينة : اوى اختي عندو الحق .. خدمتو صعيبة و فيها تمارةو السفر بزاف .. خاصك تعرفي كيفاش تنسيه شوية و تهزي ليه المورال .. و منها نيت حتا انت تنسي و تبدلي الجو...

ايناس: واييه دايرة جهدي و لكن ديما نفس الامور كانديروهم .. ملينا بغينا التغيير و لكن ماعرفتش شنو ندير و كيفاش نبدل الروتين .. راك عارفة اش كانقصد ..

جهينة : خاصك تشوفي الامور لي كاتعجبو و تزيدي فيها شي تفاصيل ... و تبدلي فيها .. شنو كابعجبو بالظبط ؟

ايناس: كاعما كانحير معاه لي درتو يعجبو ..

جهينة : هههه اوا بدلي لبسك شوية ... بدلي لوك ديال شعرك ... شري شي حاجة فاللبس جديدة راك عارفة شنو كانقصد .. و شوفي موديلات جداد ... دخلي امور جديدة و حيدي عليا داك الشعبي غير ديال العروبية ... شوفي شي موسيقى شرقية ... و تعلمي الرقص الشرقي .. راه كايعجب الرجال ..

ايناس: علميني انت كاتصرعي هزان البوط ..

جهينة : ههههه تي شكون باقية كتهز البوط الله يهديك .. راه اليوتيب يعلمك ..

ايناس: و علاش .. مالك حتى مابقيتي تهزي البوط 😂😂 عقلتي القصاير لي كنا نديرو انا وياك ..

جهينة :اوى انا و ياك .. اما دابا عندي داك الحلوف فالدار .. يحصلني شي نهار نوليو فسبن و جيم .. و انت عارفة الرجل العربي و الرقص الشرقي ..

ايناس : و اللهيلا 😂😂 هو رقص فني لحال جميع انواع الرقص .. و لكن العرب كايشوفوه غير طريقة من طرق الاغراء و متعلق بالشيخات و بنات الليل ..

جهينة : اوى اختي راه عندهم الحق ... رقص كلتحرك فيه سدرها و الاهم خصرها و ساقيها و كاتبرز فيه مفاتينها فين بغيتي عقلهم يمشي ... معذوورين ...

ايناس : هههه وا من هادشي كولوو عطيني حلول الله يرضي عليك ..

جهينة : قلت ليك .. ديري امور جديدة تبدل الروتين و شوفي كيف ديري و عطيه وقت اكتر خرجي انت و ياه و بعدو من هاد البلايص لي موالفينهم ... و حاولي تزربي حتى انت تهضري مع مك تسربي عرسكم .. واش تبقاو ديما هكا تسرقو الوقت لبعضكم .. غايجي النهار لي يعيا و يقولها ليك فوجهك .. راك لقيتيه ظريف و حنين .. اما كون كان بحال هذاك لي عندي يجي ليا لقلب الدار .. و اللهما يحشم ..

ايناس: هههههه عندك الحق ... وا نوضي فحالك راه زدنا فيه ...

ناضو البنات طلعو يكملو خدمتهم ... بعد ساعات ... جا وقت انتهاء مناوبتهم الليلية ... خرجو ركبات جهينة فالسيارة لي مخليها عندها ايرتان و ركبات حداها ايناس توصلها كيف العادة ..

جهينة : و اللهتا ظهري غايتقسم عليا عييت ... ديك العملية دات اكتر من وقتها ..

ايناس: واييه اختي هاد الطبيب الحديد شفتو شوية تقييل فخدمتو و كايبقا يحقق و يعاود يتأكد اويلي مالو على حالتو ..

جهينة : وا روح هاديك لي بين يديه .. سهلتيها .. مهم بعدا غانمشي نضربها بتدويشة و ننعس حتى للعشية ..

ايناس: يا ختي شحال معجازة ... انا 12ماكانفوتهاش ..

جهينة : هههه اوى انت اختي كادوزي السطاج دابا .. مك غاتكون حاضيام لي درتيها تقولك راك براجلك ... 😂😂

ايناس: و اللهتا بحال الى عايشة معانا ..تي بحال الى هاد الزواج ماعرت شناااهو .. معظمينو بلا فايدة .. و هو كولو تمارة ... اودي دابا تجربي و تعرفي ..

جهينة : ههه وعلى شكون قالك ماماجرباش ... راه عايشة مع الجلاخة بحال المزوجين ..

ايناس ضارت عندها و خبطات فخاضها : اويييلي حاااي .. 😨😱

جهينة قفزت حتى تهزو كتافها : اويلي لا اش فهمتي لمك 😳.. راه قصدت غير تمارة الشقا و النغيير.. تي اش كاتصحابيني .. حمااارة ؟

ايناس : وا هووكاك ... اصلا العيشة مع بعضكم ماصالحاش ... خاصك تجبدي ليه الزواج .. الى كنتو باقين باغين الوقت يخرج من الدار حتى تبغيو على خاطركم ...

جهينة وقفات قدام دار ايناس : وا هااا دخل الصحة ... مال مك شغلك .. خرجي لحغي داركم ... شحال فيك ديال الهضرة ..

ايناس: وا ها هي فمك ... لقيتيني مشقلبة .. ميعادنا نهار الاتنين .. تشاو ..

ردات جهينة سلامها و طارت للدار ..

فهاد الاتناء كان ايرتان فالسطح ديال العمارة كايتمرن بالقفز على الحبل ... بسروال اسود و ملابس والو من الفوق ... و داير ليزيات فودنيه كايتمزك و يشم هواء الصباح .. طل مابانتش ليه السيارة و جلس فالقنت و لاح ظهرو لور كايشوف فالسماء ..

بعد مدة قليلة ...وقفات و خرجات جهينة من السيارة و طلعات للدار .. دخلات حطات ساكها و صباطها و دخلات للبيت .. مالقاتش ايرتان اصلا ديما كاتلقاه خارج يتقدى و لا يجري ..

جهينة :ماكاينش ... الله على راحة ندوش و نفطر على خاطري ... ياربي مايجيش دابا باش مايسبيش فيا الغداء ..

طلقات شعرها و جبدات حوايجها ...

دخلات الحمام دارت دوش خفيف ... و خرجات كتطل .. مابانش ليها و طارت للبيت ..ردات الباب برجليها نشفات راسها بالفوطة و لبسات ملابسها الداخلية فقط و شعلات الراديو هادا وقت الmashup songs لي كايعجبوها... تونس بيهم ماكاتحملش الصقيل فاش ماكايكونش ايرتان ...دارت من الزيوت المغدية ليعطاها السي عوصمان ... و هي كاتدندن ... لبسات سروال بيجامتها و ... لبسات التوب ديال البيجامة .. وقفات قدام المراية كاتدهن وجها بسيرومات و المغديات ... حتى دازت فالراديو وحدة منmashup لي حافظة الريتم ديالهم ..هزات تيشورت من على خصرها و تقادت مع المراية كاتحرك خصرها وفقا للريتم .. و كتتبسم عاجلها شنو كادير... دخل ايرتان للدار بعدما شاف السيارة التحت ... و محلف اليوم يبدا معاها التدريب لي سيمانة و هي تهرب ليه بسبب العياء و النعاس لي كايجيها.. سمع الموسيقى جايا من البيت .. و تم غادي .. كان باب البيت مشقووق .. طل و شاف لي عمرو كان يتخيل يشوفو ... ماشي جهينة الصغيرة القزمة البرهوشة الكيوت .. و إنما انثى ناضجة كاملة ساحرة و جذابة .. جانب منها عمرو تخيلو .. كان شعرها سارد مليوح ورى ظهرها على طولو كايتحرك و يتموج مع حركاتها .. و كانت كاتبسم و تشوف فخصرها فانعكاس المرآة و كان الريتم على شكل طلقات الرصاص .. كل طلقة كاتلوح جنب خصرها لجهة .. مخرجة لسانها بمرح معبرة عن متعتها بالموضوع ... اما ايرتان .. واقف مخشب ورى الباب كايشوف .. متبع خصرها كيف الحية كاتبع المزمار ... وكل طلقة من خصر جهينة كاتضرب فقلبو نيشان .. من الضربة الاولى و بدون شعور منو شد فقلبو .. و ربط حواجبو و غرز صباعو فيه بحال الى بغا يشدو بيديه و يهدنو ... سالات الموسيقى و حبسات جهينة و هي كاتضحك مع راسها ..

ايرتان رجع تسند على الحيط المجاور للباب و هبط معاه شاد فقلبو و عينيه ماكايرمشوش بالصدمة .. خرجات جهينة بعدما قادات حوايجها ... و هي تغوت منين شافتو منشور فالارض .. هبطات لمستواه كاتضرب فوجهو و كاتقول :

جهينة : بونغ بونغ ... مالك ايمتا جيتي اش عندك ... مالك شاد قلبك 😨 واش كايضرك .. اييرتان ..

هز عينيه شاف فيها ... و عينيه كايلعبو فيها كاملة .. بغير تصديق بأن هادي لي قدامو هي ديك الصغيرة لي دق قلبو ليها ... اولا نقولو هي كانت هكا من ديما و لكن هو لي كايشوف فيها البنيتة الصغيرة لي كايعاود فيها التربية ...

جهينة : اويلي ايرتان رجوع الله... ماالك ؟

ايرتان : شكون انت ... فين جهينة ..

ناضت جهينة للكوزينة جابت ليه كاس الماء مداتو ليه ... شدو كايشرب ... غير تفكر حركات خصرها ووحلات ليه ..

جهينة : لا لا انت ماعاجبنيش .. نوض دخل للبيت .. وغش كنتي كاتجري ..

ايرتان وقف دغيا : حيدي .. بعدي لهيه ..

جهينة : اويلي مالك .. خليني نعاونك ..

ايرتان : مابغيتش سيري نعسي ...

دخل للبيت و سدو ..

جهينة : اوييلي هذا مااالو .. فين كان و هو هكاك عريان بعدا ... اجي ماتكونش شي بايرة من هاد الجارات فلاشاتو و اكيد حشم و جاني هكا مزنغ ... اصلا بنات الهم يديروها ... ولاو غير حاضيينو فالطلعة و النزلة ...

دقات عليه : واتاحل هاد الباب .. قوول ليا اش وقع لييك .. راه والله و تجيني خبارك عطيتي وجه لشي بقرة فبنات جيران لابقيتي بتي فهاد الدار و هاني علمتك ...

مشات للكوزينة تسخن فطورها ...

اما ايرتان كان حل الشرجم لي فالبيت باش يضربو الهواء .. و كل شوية يسووط ...مافهمش اشنو وقع ليه وا لا علاش هاد ردة الفعل الكبيرة ... بعد شكلها من قدام عينيه ... و نفض افكارو .. تلاح فالسرير بلا مايدوش و لا يلبس عليه ...

اما جهينة فطرات دات الماعن غسلاتهم و نيشان شدات السداري باش تهرب من 2 .. الغداء و التدريب ...

بعد ساعة ... خرج ايرتان من البيت رابط حجبانو ... و كايحك شعرو .. لاح شوفة فالصالة بغير اهتمام و رجع شافها فاش لمح جهينة مكمشة فقنت السداري و معنقة الوسادة كاتشخر .. سرط ريقو .. تم غادي و رجع .. و تم غادي للكوزينة و رجع تاني نيشان للبيت هز غطا .. لاحو و مشا نيشان عندها هزها و مغمض عينيه ... حطها فالسرير و غطاها دغية و سد الباب و خرج ..

دخل للدوش طامع يوضر الافكار الغريبة لي بدات تطرق راسو ... و لكن ماعرفش بلي الحمام المكان الامتل لتوليد اكتر الافكار غرابة ...