قدري أن أحبك الجزء السابع

6 الصباح ... فاق ايرتان ... لقى الدراري باقين ناعسين و جهينة كيف عادتها ديما ناعسة على كرشها و مخبية وجها ... ناض جلس حك راسو ... و قرب لجهينة و بدا يململها ... 

ايرتان: جهينة ... جهينة .. 

حلات نصف عين ... كطل ... 

ايرتان: نوضي باش ياله نشدو الطريق ... 

جهينة: خليني مزال غير شوية عافاك ... 

ايرتان : نوضي تغعدي ... 

ناض ايرتان و هي بقات تكسل و تجبد فبلاصتها ... 

تبعاتو ... وجلسات حداه كان جبد قرعة الماء يغسل وجهو .. كب ليها فراحة يديها و غسلات و عطاها تاهي كبات ليه و غسل .. 

ايرتان : دخلي بدلي حوايجك ... انا غنعلم عز ... 

دخلات كتقلب وسط حوايجها ... و جبدات كسوة بيضاء فوق الركبة بشوية و كونفيرسة فالغوز و خلات شعرها مطلوق غير عاقدة فيه باندة غوز ... خرجات عندو لقاتو مبدل تاهو ... عطاها صوندويش و كاس الحليب .. جلسو فطرو ب2 و ناضت هزات ساكها و مشاو مشادين ... 

جهينة: متحمسة نشوفها .. والله الى توحشتها ... 

ايرتان: وا شتي انت لي ماكنتيش باغية تمشي .. 

جهينة: ههه مزيان منين قنعتيني ... 

عطاها الكونطاكت و ركباتو حتى هو ... 

ديمارات بالطوموبيل ... و بدات الرحلة ديالهم ... 

ايرتان: عمرك هضرني على ماماك و عائلتك ليا ... 

جهينة: ههههه يمكن كتبان ليك شخصيتي ديال شي وحدة حياتها كولها ترابل و تقشاب و لكن لا ... حياتي مملة لدرجة الموت ... اول حاجة فاش حليت عينيا لقيت غير ماما لي كاينة ... بابا مات قبل مانتولد ب5 اشهر بسكتة قلبية ... خلا ماما بوحدها لا حنين لا رحيم .. كانسولها على عائلتو كاتقول ليا باك كان مقطوع من شجرة .. هادشي لي كاتقول .. اما عائلة ماما كان عندها غير خوها هو لي ساكنة معاه دابا ... كنا عايشين فواحد الحي فيه كبرت مع ايناس و عتمان ... كانو جيرانا و ماما مصاحبا مع مواتهم ب2 ... مهم خدمات عليا حتى كبرت ... فاش وصلت ل18 العام ماما صحتها تدهورات و مابقاتش قادرة تخدم و لات كل مرة جاياها كريز قلت ليها باراكة عليك ... جا وقت راحتك ... خالي كان على صلة معانا و كان ديما معاوننا مسكين واخا هكاك مادازش ختو ... قال لينا نجيو نسكنو عندو ... انا مابغيتش على قبل قرايتي ... و تافقنا نتفارقو واخا مابغاتش ليا فالاول ولكن اصريت عليها حتى وافقت ... كنت خديت الباك ... خدمت فالصيف و فنفس الوقت كنفكر فاش نكمل قرايتي .. ماما من ديما كانت باغاني نكون ممرضة ... و قريت التمريض و نيت باش نقدر نتهلا فماما براسي ... ونيت دخلات معايا عشيرتي بقيت كنقرى و كنخدم فنفس الوقت .. خديت ديبلومي و شي سطاجات و خدمنا ديريكت الحمد الله ... و كنت تلاقيت بجلال فوقت القرايا و من تما و حنا مع بعضنا ... حتى جيتي انت و شقلبتي ليا حياتي ... هادي قصتي .. 

دارت عند ايرتان لقاتو مركز معاها و كيلتاقط كل كلمة و يحللها .. 

جهينة: سبحان الله فين مشيتي .. 

ايرتان: انا معاك ... مزيان .. 

جهينة: مزيان .. هادشي لي غاتقول ؟ 

ايرتان: شنو بغيتي نقول ليك ... مسكينة عاشت بلا اب و لا مسكينة مها مريضة و خدامة عليها من صغرها ... كل واحد كيعاني بطريقتو و فالزون المخصصة ليه... خاصك تعلمي ... تعاني و تعذبي بوحدك .. تنوضي و تطيحي .. و فالاخير تلقاي طريق المخرج ديالك من معاناتك بوحدك .. عمرك تبيني ضعفك لشي حد ... هكا غاتكوني اقوى و نقط ضعفك مامعروفينش ... و مناعتك ضد الحياة قوية و قادرة تحميك ... سمعتي .. انا سولتك على حياتك بسباب اهتمامي باش نعرف تفاصيل حياتك ... ولكن ماشي باش نقول ليك من بعد انا كنتأسف على هادشي لي وقع ليك و الحياة هي هادي و ديك الهضرة ... و نحس من جيهتك بالشفقة و انت تكمليها بالدموع ... آلامك هضري عليهم و انت هازا راسك و كتقولي آاااه هادشي لي دوزت فحياتي بحال كولشي الناس و الحمد الله على كل حال ... 

هو كيهضر معاه .. بايديه و فمو و تعابير وجهو .. كلشي تفاصيلو وضروها و اكتر حاجة كلامو القاسي لي كيبين بلي تفكيرو اعمق بكتير من توقعها ... كلامو قاسي و لكن صحيح و منطقي ... ماجرحهاش و ماحسسهاش بشعور خايب .. بالعكس حسات بيه قريب ليها و كلامو بين ليها بلي ايرتان واكل الدق بالمزيااان و عارف بل حافظ دروس الحياة وفسن صغير بزاااف ... 

جهينة دورات لقدامها كتفكر فكلامو ... منين تلاقاتو وهي كتعلم منو و باقية ... كملات سوقانها و مابقات قالن حتى كلمة .. ايرتان حتى كايشوف قدامو و ديما ملامحو كتبين بلي كيفكر و يخمم ... شوية نطق وقال .. 

ايرتان: انا بغيت نعرف على الوالدة ديالك ...

جهينة: تش بغيتي ديييير 😨

ايرتان: مالك قفزتي ... انا غير بغيت نتعرف على ام المصييبة لي سلط عليا الله ☺ 

جهينة:انا لي مسلطة عليك ... اويلي ندخل راجل على دار خالي بغيتيهم يعلقونا ... 

ايرتان: ومالك معولة تخليني فالطوموبيل كنتسنى ... 

جهينة: اه .. غير شي ساعتين و غانرجع مال غانبات ... 

ايرتان: لا ... غاندخل واحبسيني ... 

ضارت جهينة قدامها كتفقص و تغدد ... اما ايرتان دار يديه ب2 ورى راسو و رجعو لور مغمض عينيه ... 

ابتسامة خفيفة كتمتل الرضى على وجهو ... ما بغا يفلت حتى فرصة انه يعرف عليها كولشي ... بغا يتعرف على امها واشمن نوع ديال العلاقة بيناتهم ... بغا يعرف جانب جهينة العائلي ... وكولشي عليها ... 

نعس وهو كيفكر ... جهينة طلات عليه .. و رجعات شافت قدامها .. كتفكر كيفاش تدخلو للدار بلا كايقولو ليها شي حاجة ... 

جهينة: باغي يدخل لدارنا باش يحطني فموقف محرج ولد العبد ماكايضيع حتى فرصة باش ينتاقم مني ... الجلاخة لاخر ... 

ايرتان سمعاها و تبسم شوية و كمل قيلولتو ... 

بعد مدة وصلو ... وقفات و كلملات ايرتان و شاف فيها ...

جهينة: وصلنا ... 

طل بعينيه كيشوف فين هما .. كانو قدام فيرمة جات على الطريق ...

حل الطوموبيل و تم هابط و شداتو ..

جهبنة: فين غادي هبلتي ...

ايرتان: مالك .. راه قلت ليك غاندخل معاك ..

جهينة: وا هانتا غير فهمني .. راه عائلتي ماشي كووول و لا عايشين فالاوروب باش ندخل عليهم راجل و نقول ليهم صديق ... 

ايرتان: انا ماشي صديق ... انا مريض ديالك و جيت متطوع معاك حتى انا و وصلتك لعند عائلتك هاد الصباح حيت عندي طوموبيل وانت ماجبتيش ديالك حيت خاسرة ...

جهينة: وااااو عقلك تحفة ...كاتخرج قصة من نوير زعما مايقد عليك غير لي خلقك ... 

ايرتان: خرجي من الهضرة ... 

خرجات حتى هي من السيارة و عاوناتو خرج ... عطاتو عكاكزو و نكراتو ... 

جهينة: زيد راسك .. يسحاب ليك غانشد فيك .. راك وليتي لاباس و ولفتي ..

ايرتان؛ هههه غير زيدي قدامي ... ضارت كتمشى شادا صاكها و هو زراها كيضحك عليها ...

دخلو مع الفيرما و رجعات الباب سداتو ... ايرتان غادي وراها و كايشوف المكان و يتفقدو ... حتى وصلو لباب الدار لي وسط الفيرما ... كانت كبيرة و فيها 2 طبقات ... طلعات فالدروج و دقات ... 

بركات كتقاد فكسوتها و حالتها و طلات على ايرتان طلعات و هبطات فبه وقالت .. 

جهينو: كون غير حيدتي دوك السلوكة و دوك خواتم من ايديك كتبان بحال شي gangsta و علااالش ديما لابس الكحل ... انا الابيض و انت الكحل اش هاد التنافر .. 

ايرتان مد ايدو و شد ليها ودنها ..

ايرتان : باغية تموتي .. 

جهينة:صافي صافي طلق ... 

تحل الباب و هي تضرب يدو ... حلات ليها حنان بنت خالها ... تكون قدها فالعمر ... لابسة بيجامة و هازا شعرها شفنجة الفوق ... شافت فجهينة و دازت بعينيها لايرتان ... بقات حالا فيه فمها و جهينة كتهدر .. و السيدة ماكايناش هنا ...

جهينة: وااا حنااان يعطيك ...

حنان: ااه .. بنت عمتي ... توحشناك اش هاد المفاجئة .. (عنقاتها)

جهينة: غير بالشوية اختي راك جيفتيني ...

حنان: هههه الوحش هذاك غير الوحش ... اش هاد المجية ..

جهينة: غير كان عنديغرض فالنواحي و جينا ..

حنان ضربانها بكتفها و قالت بينها و بينها : شكون هاد الفريشك ... 

جهينة: ياله جيت .. من دابا بديتي تفلي و تبحتي ... فين ماما .. غانبقاو واقفين هنا راك كاتشوفي السيد مايقدرش يبقا واقف بزاف .. 

حنان: اه سمحو ليا مرحبا مرحبا .. 

دخلات و دخلو ورته و سدات الباب و تمات غاديا سبقاتهم و كتعيط ... 

حنان: ماما .. عمتي اجي تشوفو شكون جا ... 

خرجات امها كتمسح يدها فالطابلية و كتقول .. 

العالية : مالك يا هاد البنت كاتغوتي ... 

غير شافت جهبنة و ايرتان و سكتت ..

العالية: مرحبا مرحبا .. *كتسلم * فين غبورك توحشناك ابنتي .. 

جهينة: غير مع الخدمة ... تانا توحشتكم لاباس عليكم فين ماما .. 

العالية : راها متكية الفوق ... حنان طلعي عيطي ليها ..*مشات حنان طلعات * اجيو دخلو .. نهار كبيير هذا ... 

حيدات كونفيرستها و شدات فايرتان حتى حيد فردتو و الحامي ديال الكبص لي كيحط فالارض و دخلو ... 

جلس فسداري و جهينة و العالية فسداري مقابلين معاه ... 

جهينة: كيف دايرين احوالكم .. وماما واش لاباس عليها كتشرب دواها فالوقت ؟ واش صحتها مزيانة .. 

العالية: ههههه غير بالشوية عليك ابنيتي .. هاهي غاتجي و سوليها انت .. 

الام دخلات : بنتيييي .. 

ناضت جهينة طارت تخشات فيها : مااامااا ... 

الام زكية معنقاها : الله على بنيتي الحبيبة ديالي و شحال توحشتك ... اش هاد المجية ماعلمتيني ماقلتيها ليا .. 

جهينة: غير خاطفة هاد النهار وصافي .. 

الام: اجي دخلي احبيبة بعدا ... 

دخلات و لقات ايرتان واقف و لايح ايديه و كيشوف فيهم .. شافت في بنتها باش تقدمو ليها ...

جهينة: ا .. هذا اماما سي ايرتان ... جا كعايا وصلني حيت سيارتي خاسرة .. راه ماجيتش نبقى ...غير هاد النهار و غانرجع .. المستشفى لي خداما فيه ... ظار واحد حملة تطوعية لهاد النواحي و سلت و الله يجازبه بيخير جابني ..

جهينة غير سالات هضرتها و دورات عينيها شافت فيه و هو براسو حاضيها اش كتقول .. مد ايدو سلم على زكية و مبسم ليها 

ايرتان: سلام الالا .. 

زكية: سلام اولدي مرحبا بيك و سمح لينا عدبناك .. *لاحظت رجلو * جلس اولدي رتاح .. ياك لاباس ... 

ايرتان: غير كسيدة الالا .. الله ينجينا و ينجيك *شاف فجهينة *

زكية: حمد الله على سلامتك اولدي ... والله الى ولاد اليوم غير كيطيرو و ماكايضربو حساب لحد الله ...

جهينة: ماتدعيش اماما .. تقدر يكونو ماقصدوش 😅 

ايرنان شاف فيها و دار فيها شوفات كيفقص و يغدد فيها ... 

جلسات زكية و بنتها عاد جلس ايرتان .. 

العالية : اش كاتسناي انت نوضي جيبي شي صينية ... 

ناضت حنان كتلعب بشعرها و تنقز ... 

زكية: اوى كيف دايرة ابنتي مع شي خدمة و شي تمارة كاتهااي فراسك ابنتي .. 

جهينة: بنتك اماما عايشة بيييخير حامدة الله وشاكراه ماخاصني والو .. انت لي واش صحتك هي هاديك .. 

زكية: كيف كاتشوفي ابنتي حمد الله صحتي هي هاديك دوايا و كولشي كناخدو فوقتو ديما مرتاحة الله يجازي خالتك العالية مامقصراش ... 

العالية : بداي تخربقي تاني راك ختي ماشي غير لوستي ... 

ضحكات معاها جهينة و طبطبات على رجلها ... ضارت عند امها وهي تحط راسها على كتفها .. 

جهينة: والله اماما حتى توحشتك ... و توحشت نعنقك ... 

زكية : حتى انا الحبيبة ديالي ... 

ناضت العالية تبعات بنتخا للكوزينة ... جهينة نسات ايرتان و بقات مخشية فامها كتعاود ليها على احوالها و تسول فيها و امها معنقاها كتلعب فشعرها و تضحك معاها ... كيشوف فعلاقة جهينة وامها لي قرابات لبعضياتهم كيفاش لا و هما لي عند بعضياتهم ... كتشبه لماماها فضحيكتها ... كيهضرو بنفس الطريقة و يضحكو نفس الضحكة ... كتمس فوجها و ترجع تحط راسها على كتفها ...ايرتان خدا نفس الانطباع لي خدا على جهينة اول مرة .. كتبان امها تاهي درويشة وقلبها ابيض غير من شوفاتها و ضحكها الدافئ و حنانها على بنتها و غير من عناقها لي مطلقاتهاش ... دابا عاد فهم مصدر حنان جهينة المدفغ ...حيت الدرية شابعة حنان من امها ... هاهو جانب آخر لجهينة كيعجبو ويسحرو ... جانب البنت الصغيرة و الوحيدة لماماها ... شافت فايرتان ساهي فيهم و ناضت على ماماها ..

جهينة: احم ... 

دخلات حنان هازا الصينية و امها طبسيل الحلوة ... حطاتو و جلسات تكب ليهم اتاي ... 

مداتو لجهينة و لايرتان و هي تشوف فيه شدو و خلاه فيدو حيت حشومة يرفضو .. 

جهينة:واش فيه .. السكر .. 

العالية : اه ابنتي .. 

حنان: مالك .. درتي الريجيم ههههه 

خنزرات فيها جهينة وقالت .. 

جهينة: ياختي باقية حويمضة .. انا على السيد لي معايا ماكاياكلش الحلاوة .. 

حنان: مسكين باقي صغير و فيه السكر .. 

جهينة كتشوف فحنان لي منين غبرت رجعات طالقة الشعر و موردة الحناك ... مقابلة مع ايرتان تهضر و تميق فيه و تلعب بشعرها ... خنزرات فيها جهينة ولا السيدة بغات تلم راسها ... و هي تقول ليها ..

جهينة: وا الغزالة .. ديري واحد بلاسكر ... و لا بلاتي انا وياك غانوضو نديروه .. 

حنان : وا ديريه راسك لاش منوضاني ..

دازت من حداها جهينة و جمعات مع بتلييعة غير بالريط ... و ناضت بلهلا يطريه ليها .. 

ايرتان غير جالس و كولشي كيوقع عندو فالراس .. من علاقة جهينة وامها حتال اهتمامها بيه و التلييعة لي عطات لحنان ... 

زكية: الله يشافيك اولدي و يعافيك .. باقي صغير على ..

ايرتان: لا الالا ماعندي والو .. غير انا هكا طبعي ماكانكلش السكر .. 

زكية: هاكداك .. اوى الحمد الله اولدي .. و مزيان نيت ماتكونش معود على السكر .. انا دابا ممنوعة منو هو الملح .. راك وفرتي عليك عناااء ديال الكبر ... 

ايرتان: كولشي الامور بيد الله .. 

زكية: عندك الحق اولدي ☺ 

العالية : قول ليا انت خدام مع جهينة ؟ 

ايرتان : لا ماشي تقنيا .. ولكن نقول اه جامعاما الخدمة .. 

زكية: مزيان اولدي .. 

رجعات جهينة و عطاتو اتاي وجلست حداه ... 

بقاو مجمعين هكا ... حنان غير كتشوف فيه برزطاتو ولكن ماعندو مايدير ... جهينة مرة تهضر مع امها مرة يقول ليها ايرتان شي حاجة بينها وبينو ... امها حاضياها بلا ماتعيق ... كيبانو بحال شي كوبل ... كتخاصم هليه و يخاصم عليها و فنفس الوقت مقابلاه الى حتاج شي حاجة كنهضر فبلاصتو و كتصرف من عندها بلا مايقول شي حاجة و هاد النوع من العلاقة ماكاتكون غير بين الناس القراب لبعضياتهم ... و بما ان زكية حافظة بنتها فقدرات تقرى هادشي فالسماء ... 

داز الوقت ووصل وقت الغداء .. دخل خالها و ولدو عبد الرزاق .. غير شافتو وكحلت بالعما .. سلمات على خالها ووصلات لولد عمها و لاحت السلام غير بالزز .. عرفاتهم على ايرتان و نفس الكدبة قالتها ... جلسو مجمعين و حطات العالية الغذاء .. كيتغداو و يضحكو كبف اي عائلة ... في حين عبد الرزاق حاط عينيه على ايرتان .. كيشوف فيه و فلبسو و طريقة هضرتو جاه متشي مغريبي .. وقال .. 

عبد الرزاق كي : جهينة .. هاد السيد واش من برا ؟ علاش ماكيهضرش بزاف .. 

ايرتان: لا مغريبي ...

جهينة: ومالك كاتسول ... لي بداتو ختك كملو نتا .. 

عبد الرزاق : ومالك كتخاصمي .. راه غير سولتك .. 

الخال : غتبداو تاني ... وانا لي كنفكر نزوجكم .. كيف غاديرو توالمو .. 

عبد الرزاق بدا يفرنس و يقاد قاميجتو و يكل على جهينة بنصف عين .. 

ايراتان هز حاجب و كيشوف فجهينة لي دورات وجها كتسب و تبرغم ... 

شافتها حتى امها وقالت .. 

زكية: راني هضرت معاك اخويا .. عبد الرزاق نشوفو ليه شي وحدة من هنا .. اما هاديك راه ماتصلاحش ليه .. ماكاتعرف دير والو ز عاد موحال واش معمرة راسها بشي زواج .. غير غنتعداو على عبد الرزاق و هو عزيز عليا مابغبتوش يتكرفس .. 

جهينة: اه اخالي ... غير نساوني .. انا راه مانقدرش نعيش هنا و الخدمة ديالي مانخرجش منها ... و عاد انا باقي ماناويا لا على زواج لا وااالو .. 

الخال: ماشي مشكل .. تعلمي ابنتي و كل حاجة عندها حل .. 

عبد الرزاق : اه وانا قابل عليك كيفما انت .. غير وافقي .. 

ايرتان كيتصنت و يطحن الدغامي ... كان كيفكر غير لجلال طلع ليه هاد ولد خالها تاهو من الجنب ... ولكن جهينة قايمة بخدمتها ... 

جهينة غير سمعات كلام عبد الرزاق .. خنزرات فيه و شدات الموس قدامها و دارتو فايدها بحال الى باغية طعنو ... و بدات تلعب بيه قدامو ... شاف عبد الرزاق داك الديكور و هو يهز كاس الماء كيشرب فيه و يبقلل فيها ... 

شافت فخالها وقالت .. 

جهينة: خالي ... انا جيت نطل على ماما و نمشي ماشي تجبد ليا هاد الموضوع تاني .. الزواج ماشي لعب و انا غانتزوج بلي ختاريت .. ماشي غير حيت ولد خالي صافي نضربو لكحل فالبيض 😠 صافي غير شوفو ليه شي عروسة من هنا راه عطا الله البايرات 

حنان : ههه تي قولي غير ماراضياش بخويا .. انت فرملية وهو غير كيعاون با فالفلاحة ... 

جهينة سدات فمها و شافت فامها كتدور لسانها وسط فمها ... امها فهمات و قالت .. 

زكية: وا خليوها تنزل هاد الدغمة على خاطرها واه صافي ماتعاود غير الصلاتو على النبي بلا منديرو مشكل من والو .. و زايدون ماشي وقت هاد الكلام معانا ضيف .. حرجتوه و صدعتوه بهضرتكم .. 

الخال: غير سمح لينا اولدي والله الا غير نسينا راسنا .. 

ايرتان: لا هانية غير خودو راحتكم .. 

الخال : وا كول مرحبا بيك .. 

حنان لجهينة: كولي.. كولي .. ماخليتي وااالو .. 

جهينة ضحكات ضحكة مفقوصة وقالت : باغية تموووتي ؟ 

ايرتان بدا يتهز بالضحك بلا صوت حيت هضرات بحالو .. 

جهينة: غدايد خوك غانعطيهم ليك انت دقات ... 

العالية كتغمز فيها باش تحشم : حنان ... مالك ابنيتي اليوم ... (كتحلف عليها بلا صوت )

حنان ولات عوجت راسها و سكتات حيت تحشرت .. 

عاد ضارت جهينة عند ايرتان و قالت ليه بالشوية .. 

جهينة: مالك انت كتهز ؟ اش عندك .. 

ايرتان : ههه والو .. تغداي تغداي ... 

تغداو وناضو البنات جهينة و حنان .. جمعو الماعن و غسلوهم ... عمرو اتاي و خرجو حطوه ... بقاو الرجال .. ايرتان و الخال و عبد الرزاق مجمعين و ناضو النساء من بعد كل وحدة فين مشات .. جهينة وماماها جلسو فوسط الجنان فالظليلة ديال شجرة ... تكات على رجلين امعا و غمضات عويناتها كتحسس بيدين امها على شعرها .. 

جهينة: الله اماما شحال توحشت يديك فشعري ... 

تبسمات امها كتصنت ليها ... 

جهينة: كون ماكانو كيبرزطوني هاد البشر كون جيت عندك كول سبت و احد ... 

زكية: ماعندك ماديري عائلتنا هاديك ابنتي واخا مبرزطين ولكن راه كيبغيوك و باغين غير مصلاحتك .. 

جهينة: اشمن مصلحة اماما .. يلصقو فيا داك ولدهم ... واش انا من سهمو ؟ هضري مع خالي ينسى عليه داك الموضوع اماما .. 

زكية: هههه انت مابيكش سهمك و لا من سهمو ... انت بيك داك القليب عامر ... 

جهينة: اش كتقولي اماما .. اشمن قليب و لا كبدة ... 

زكية: راك بنتي و عجينة يدي واش غاتخفاي عليا ... كولشوي مادا ليه حاجة ... ايرتان هاك ايرتان بغيتي ؟ و دوك الشوفات و داك التوشويش بيناتكم .. يسحاب ليك ناعسة على ودني .. 

جهينة: اودي اماما اش غانقول ليك ما غانخبيش عليك ... هذاك السيد انا لي خبطتو بالطوموبيل ... و شخشختو هكاك ..

زكية: اويلي على الجيفة .. كاتقولي فيها هكاك ؟ 😨 

جهينة : ماتخافيش اماما صدق ولد الناس مادعانيش ... و خرج منها كيف الشعرة من العجين ماشي شي حاجة غفاف راه بقى عندنا فالمستشفى و انا لي مقابلاه و دابا ولينا اصدقاء و صافي .. بلا مايمشي بالك بعيد .. 

زكية: ههه احياااني عليك العفرينة راه واخا تكوني حاطة عليه العين ماتدي ماتجيبي .. حيت انت غير هبيلة ...ههه 

جهينة: هههه حشومة تقولي عليا هكاك اماما ... و هاني غاع كنت نيت حاطة عليه العين ... هو شفتي كيف داير مايشوفش فيا حتى الشوفة ... 

زكية: حاغرة راسك ابنتي ... انت ماكاتشوفيش بعينين الناس علاش كتبقاي تقولي هكاك .. 

جهينة: انت احبيبتي حيت ماما اكيد غانبان ليك احسن بنت فالعالم ولكن الواقع اماما .. مهم ... اجي ندخلو باراكة عليك .. 

زكية: اري يدك عاونيني نوض ... شرفت ابنيتي ..

جهينة: هههه اشمن شارفة .. باقا دغي و دردغي غالاك باراك من التبوحيط ... 

ضحكات زكية و عنقات بنتها كتبوس راسها .. دخلو هكاك .. للدار ومشاو لبيت متكيية فيه العالية ناعسة .. دخلات تكات حتى زكية .. و جهينة سولات على حنان ..

العالية : ماعرت فين هي .. 

جهينة: واخا غانمشي نشوف .. 

خرجات جهينة خلاتهم كيتحتتو... مشات نيشان للصالة فين كانو جالسين .. لقات حنان كطلطل تما و دايرة السبة بلي كتقلب على شي حاجة و كطل على ايرتان لي كان متكي... و مربع يديه .. 

جهينة : هاديكا اه .. اش كتقلبي .. 

حنان : اه ... لا والو .. بغيت نقول كنقلب على تيليفوني ماشتيهش .. 

جهينة: تيليفونك ماشي تما ... باراكة من فعايل قلالات الترابي و سيري كوني تحشمي ... 

حنان: اويلي اش كتخربقي و اشمن فعايل كتقلبي غير على السبة من والو ... *مشات كتنغر * 

جهينة : عليا انا ... 

دارت شافت فايرتان و شافت فعبد ا لرزاق و خالها ناعسين كيشخرو كولشي موالف ينعس فهاد الوقيتة ... قربات ليه كطل عليه و هو يحل عينو فجأة قفزها و شظات فقلبها .. 

جهينة: باسم الله الرحمن الرحيم قفزتيني ... منعستيش ؟ 

ايرتان: ضاراني المعدة ... 

جهينة: ههه بزو عليك الماكلة حتى تقلتي ... انا غانجيب ليك كينة من الفوق ... 

ايرتان نايض : ديني معاك ... مافياش النعاس .. 

عاوناتو حتى وقف و عطاتو عكازو و تمو غاديين .. عطلت يلبس فرجلو و طلعو ... دخلات لبيت امها و دخل وراها كيشوف و يدور فعينيه ... هي محنية كتقلب المجورة و هو كيشوف فالبيت فيها ريحة زوينة منظم و مقاد شراجمو محلولين و الخامية بيضاء مردودة كتمشي و تجي بالهواء ... كوافوزات كل واحد عامر بشلا حوايج ... بانو ليه 4 نونوسات مستفين باينا قدام .. هز واحد كان على شكل ذئب فالاسود و شاف فالاخرين كان واحد دب و آخر سبع و الاخر قط .. ناضت و مداتو ليه ولقاتو هاز نوموسات و قالت ليه .. 

جهينة: هاك ... ههه بونغ بونغ ... *خداتو من عندو *

ايرتان خدا الدواء و قال : بونغ بونغ ؟!! 

جهينة؛ هههه هادو صحابي ديال الصغر عندي منين كانت عندي 3 سنين ... سميت كل واحد فيهم سمية ... هذا بونغ بونغ و هذا تشيم تشيم و هذا مين مين و هاذا وين وين ... 

ايرتان: حمقاء من صغرك .. اشمن نوع ديال سميات هاذو *عيبها* تشيم تشيم ... 

جهينة خنزرات فيه وقالت : الجلاخة 😒 

ايرتان سرط الفانيد و هز كاس الماء كان تما كتشرب بيه زكية دواها و قال : باقي نسمع طلمة جلاخة من فمك نوريك الجلاخة ديال بصح .. 

جهينة : بحالك بحال بونغ بونع تاهو كان قبيح و شكلو مخنزر بحالك .. *حطاتو حدا وجهو * والاه الى كتشابهو .. صافي من اليوم مابقاتش سميتك الحلاخة سميتك بونغ بونغ 😌 

ايرتان كيخنزر :بو ..بونغ شنو ؟ باغية تموتي ؟ 😒 

شدات فدراعو : ياله ابونغ بونغ نتسركلو ... 

جراتو و هو كيتذمر ... هبطو و خرجو للجنان .. شادا فيه و كيتمشاو ... و كاتوريه فيرمة خالها وامها كيف دايرة ...

جهينة : عرفتي شحال جريت و لعبت هناا .. طنت خارجة على خالي كل مرة مرومة ليه شي مصيبة فشي قنت ... فيننا نغبر عليهم يلقاوني موضرة هنا نقطف وناكل ... ماطيشة و لا ليمون .. رمان و الكرموص نااري شنو كنت كاندير ليه .. واحد الصيف جاو معانا خالاتي مامات عتمان و مامات ايناس و تاهما معانا .. كان احسن صيف كولشي الزبايل درناهم .. انا و عتمان دخلنا نشوف الكسيبة وفاش خرجنا خلينا الباب محلول الغد ليه لقا الحوالة دايعين فالفيرمة كيف البابوش ... و خصرو ليه كولشي .. كولشي جبدوه و نتفوه ... خالي مشا يحماق .. النهار كولو و حنا نقلبو على الحوالة حتى جمعناهم .. هههه والله كانقول كون غير بقيت ديك البنت الصغيرة .. ماكان همي غير فجدول الضرب و الغيسيطاسيون ... 

ايرتان كيسمع ليها و يضحك ... 

جهينة : بغيتي دوق الكرموص ؟ اجي ... 

جراتو و دازو لواحد الجهة فيها الكرمات .. 

جهينة: غايعجبوك ... 

عقدات كسوتها لاتبان من التحت و طلعات كتشعبق .. 

ايرتان: ردي البال غاطيحي .. 

جهينة: هههه مولفة ماتخافش .. انا غانلوح ليك و شقم ... راه داك السطيل تما حط فيه .. 

ايرتان : واخا الالا ... 

بدات تنتف و تجر كل غصن عندها حتى كاتخويه و تطلقو و تلوح لايرتان ... حتى عمرات السطيل و قال .. 

ايرتان: باراكة عليك .. نزلي فحالك .. مايسحابش ليا عايش مع قردة ... 

جهينة : سكت يعطيك اللقوة .. بغيتيهم يسمعوك .. 😠

ايرتان: هههه هبطي المصيبة هبطي ... 

هبطات جهينة شوية بالشوية حتى عاونها ايرتان و شدها من خصرها و هبطها ... كانت شادا فسدرو و هي كتهبط عينيها فعينيه ... مد ايدو و حيد ليها شي وريقات لصقو فشعرها ... 

جهينة ضحكة متتوترة : ههه لصق ليا فشعري ... 

ايرتان: جهينة يا جهينة ... كاينة شي حاجة ماكاتعرفيش ديرها .. 

جهينة: اه .. ماكانعرفش نطيب ... 

ايرتان : هههه... هاكي غسليهم .. 

رجعات شعرها ورى ودنها و خدات من عندو .. كان واحد التيو قريب غسلاتهم و رجعات عندو .. 

جهينة : اجي نجلسو لهيه .. 

مشاو للبلاصة فين كانت جالسة هي وامها و جلسو ... حلات وحدة و مداتها ليه ... خدا من عندها و كلاها ...

جهينة؛ حلوة عجباتك ... 

ايرتان: اه .. حلوة ... و عجباتني ...

جهينة: بطبيعة الحال حيت عطيتها ليك بكل حبي .. *لاحت وحدة في فمها وشافت قدامها * 

ايرتان كايشوف فيها و فشعرها الطاير وراها و كل شوية تجرو بانزعاج .. سرحات رجليها و حطات راسها جدع الشجرة ... بغفلة منو و بدون سابق انذار تكا و حط راسو على رجليها ... جهينة رجعات حيدات راسها و كلات عليه مدهوشة .. 

جهينة هزات راسها كاتشوف لايكون شي حد : واش حماقيتي .. غايشوفونا و يفهمو غلط .. 

ايرتان مغمض عينيه و مربع يديه : الى شافونا ننزوج بيك 

جهينة: واخا يحطو عليا الجناوا ... ما ندير يدي فيديك .. 

ايرتان: ههه و كأن الامر فيدي و لا فيديك .. 

جهينة: اش كتقصد .. 

حل ايرتان فيها نصف عين وقال مبسم ؛ حتى انا ماعرفتش ... الايام غاتورينا ... 

جهينة رجعات راسها كيف كان : انت والغازك تاني ... 

خدات كرموسة اخرى حلاتها كلات نصفها و خشات نصفها في فمو .. 

ايرتان كلاها وقال : الكرموس .. ماكان كيعني والو من قبل ... ولكن دابا غايولي مرتابط بكمارتك ... 

جهينة: حشاك 😂😂 هذاك راه وجهي ماشي كمارتي .. *ميقات فيه* قلتي ماكانش كيعني ليك شي حاجة .. دابا ولا كيعني ليك .. اذا حتى انا كنعني...

ايرتان قاطعها: ههه ماتحاوليش تلعبي معايا الغزالة ... مانصلاحش ليك .. 

جهينة عوجات فمها فيه و قالت : مامنكش امل ... كتجيب الدغمة حتال للفم و تقلعها ... 

ضحك ايرتان و رجع غمض عينيه ... حس بايدها على سدرو بشكل عفوي منها و مارداتش البال ... كيحس بشعرها كيطير و يلامس وجهو بخفة ... صوت الطبيعة و ريحتها و ظليلة محرك فيها نسيم الصيف ...و بين ايدين الشخص لي بدات كاتعني ليه الدنيا ... هذي لحظة من اللحظات لي كيحس بالنشوة و الفرحة فيهم .. واخا ماداير والو من غير انه مستلقي و كيشم الهواء بين يديها ... من جهة هو فقمة سعادتو و من جهة فقمة بؤسو فنفس الوقت ... عرف بلي الموضوع كياخد منحى جدي و حقيقي ... و هنا تأكد بلي الموضوع كايستاحق ... اه هذا هو الحب ... ماشي متالي و ماشي سحر و ماشي ديما مرتابط بالسعادة ...كيجي على غفلة و بدون اي سابق انذار ... مرتابط بالحزن و المقاومة و التحدي و التشبت و عدم الاستسلام ... هو كلمة من 2 حروف ساهل يتكتب و يتنطق و لكن صعيب يتشرح ... و النهار كتفهم معناه ...الوقت كولو ...كل ساعة و دقيقة وكل تانية كتستاحق حيت كاين فالموضوع 2 ارواح ... 

جهينة كاتشوف فيه بكل حب نفس لي شاغلو شاغلها ... كولشي واقع فداخلهم ... كل واحد فيهم فنان فاخفاء مشاعروهم .. حيت بالنسبة ليهم الموضوع سم فتاك اكتر ماهو كرموسة حلوة ...

بقاو مدة لابأس بيها مستمتعين بداك الاطموسفير ... ايرتان غفات عينو و هو على ديك الحالة ... أما هي رجليها نملو عليها و لكن ماعطاتهاش خاطرها تزعزع و تزعج راحتو لي باينة فملامحو ... ديما كاينعس مغوبش ولكن دابا ملامحو شبه مبتسمة كاتخليها تبتاسم حتى هي بلا شعور ... عزيز عليها تحقق فملامحو وهو غافل ... تفاصيلو محفورة فخيالها بحيت حتى الى ماكانش قدامها صورتو كاتكون فعقلها و قلبها .. شافت فشعرو و خللات صباعها بين خصلاتو ... جراتو بخفة حتى طاح .. و رجعات دارتها ... بقا ساكن كيتلقى منها هذاك الشي لي مفتاقدو ... و كان كيقلب عليه من شحال واخا كان رافضو .. ولكن بمجرد ذاق حلاوتو مابقاش قادر يقاومو ... حل عينو التحت ..هزهم بالشوية و شاف فيها .. هي كانت كتشوف فشعرو و تحسي ملمسو حتى حسات بعينيه مختارقينها .. شافت فيه و حشمت .. بعدات يدها بخفة ... شد ايدها جرها قدام عينيه ... جهينة كتشوف فيه كيشوف فيهم و قالت .. 

جهينة: مالك ؟ عمرك شفتي شي يدين ... 

ايرتان: شفت يدين و لكن عمري ماشفت يدين كيصنعو السلام ... عاد دابا شوية كانت نايضة واحد الحرب .. غير حطيتي عليا يديك و كولشي تهدن ... و توقف الوقت عندهم ..

جهينة: ههه شكون هما ... 

ايرتان رجع شاف قدامو : واحد ال2 ... واحد فيهم ماعندوش العقل و لاخر ماعندو قلب .. لي ماعندو عقل كايعرف امور كتيرة مايقدرش يفهمها لي ماعندو قلب ..و لي ماعندو قلب مكايتحرك غير بالقوانين و المنطق ... و انا بيناتهم موضر كنتسنى ... 

جهينة ضحكات و حطات ايدها على راسو وقالت : هنيتك دابا ؟ 

هز راسو فيها و دار واحد الضحيكة عريييضة حتى تسدو عينيه و هما كيتفحصو ضحكتها ليه ...

6 العشية ... جهينة وايرتان دارو كاسكروط بالخف ... و ناضو يودعوهم .. عنقات جهينة ماماها بالجهد و كتغبن حيت ماشبعاتش منها ... و امها كتضحك و تسكت فيها .. 

زكية: مايبقاش فيك الحال احبيبة هادشي لي عطا الله ههه بيناتنا تيليفون .. تهلاي فراسك و حتى فالمريض ديالك *تبسمات ليها و ميقات فيها *

ضحكات جهينة و كتمسح دموعها حيت فهماتها ... طلقات من بنتها و شدات فايرتان جراتو ... شافت فجهينة كانت كتهضر مع حنان و البقية .. 

زكية: الله يرضي عليك اولدي جبتيها حتال عندي و محن معاها واخا معطوب ... و سمح لينا حتى حيت هي لي دارت ليك هاد الحالة .. ماعرفتش كيف دارت ليها و هي ديما كترد البال ... 

ايرتان: هانية هذاك واجب الالا .. مكاينش مشكل .. هي ماقصداتش انا لي مارديتش البال .. 

زكية: الله يرضي عليك اولدي .. غنطلبك تهلا فيها .. هي لي عندي عوينة وحدة باش كانشوف و هي لمن عايشة ... دخلتي لقلبي و باينة فيك ولد الناس و كون مارتاحيت ليك واللهما نسيفطها معاك هاذ الطريق كاملة .. 

ايرتان شد ايدها: ماعندك مناش تخافي بنتك فالحفظ و الصون و بحال الى انت لي معاها ... ماتهزي هم .. 

زكية ضربات على كتفو و ابتسامة عريضة على وجها .. 

زكية: الله يرضي عليك اولدي ... 

حنان : يسحاب لي غاتباتو .. كون غير بتو حتال الصباح .. 

جهينة : لا الحبيبة تابعانا الطريق ... 

زكية : وا بلاتي ابنتي نسيت .. 

جهينة : اشنو اماما ... 

دخلات زكية دغيا و جابت معاها قفيفة ..و مداتها ليها .. 

زكية: هاكي اماما .. هادي شي حاجة كولوها فالطريق و راه كاين حتى عصير الباربا لي كيعجبك عنداك تدفقيه ... 

جهينة عاودت عنقاتها: لهلا يخطيك عليا احبيبة ديالي ياله بسلامة عليكم احنا مشينا ... 

الكل بسلامة .. الله يعرضك لطريق السلامة .. 

ركب ايرتان و حهينة تاهي و ديمارات ..و مخرجة يدها كتشير ليهم .. 

دارت كتضحك و طل من المرايا حتى بعدات و مابقاوش بانو .. 

جهينة: تفو .. غانتوحشها .. قلت ليك ماغانشبعش منها ... 

ايرتان ؛ هانية .. نرجعو مرة اخرى... 

جهينة شافت فبه و قالت : ههه عجبك الكرموس ابونغ بونغ العفييريت 😌😌 

ايرتان : رجعنا لسيرة بونغ بونغ عاوتاني ... 

جهينة: مشيتي خلا .. من اليوم سميتك هي* كتجبد فيها* بووونغ بووونغ ... 

ايرتان غلباتو الضحكة و لكن حافظ على صلابة ملامحو .. ربع يديه و خلاها تهضر بوحدها ..

دازت شي نصف ساعة فالطريق ... جهينة بعدما شافت راسها كاتهضر غير بوحدها كانت شعلات المزيكا محيحة ضد فيه ... 

ايرتان : نقصي عليا هادشي و لا غانردخو فوق راسك .. 

جهينة شافت فيه و زادت فيه و وكملات غناها كتفقص فيه .. ياله غيجبد ودنها و هي تسمعو بيييييييق .. فرانات و خرجو عينيهم ب2 كيشوفو فبعضياتهم ... 

جهينة: ناري مي اش درت .. 

ايرتان ماغاتكون غير طرطقت الرويدة ... بغاةيحل الباب و شداتو ... 

جهينة: واللهلا خرجيتيها .. 

ايرتان: و علاش لا راه خاصني نشوف شتو وقع .. 

جهينة:غاتكون شي مصيدة .. باش نخرجو و يتلقاو لينا القطاطعيا ...

ايرتان: حيدي ؟ وقت حماقك دابا ... *خرج*

جهينة: ايرتان .. لا ... خرجات تبعاتو ولصقات فجنبو ...

ايرتان: كيفما توقعت .. تفرغعات ...

جهينة: ماعندكش السوكور ؟ 

ايرتان: لا ...

جهينة: جبد تيليفون عيط للدراري ... 

ايرتان: ممكن ترخي ليا يدي شوية .. 

جهينة : لا .. عيط دغيا انا راه الى ماتحركناش من هنا غانحماق ليك ... 😟 

شاف فيها بغير حيلة و جبد بورطابلو ... شعلو و لكن ماكانش الريزو .. 

ايرتان : ماكاينش الريزو .. اري ديالك .. 

جهينة جبداتو وعطاتو ليه : ناري ماتقولش ليا حتى ديالي .. مافيهش😢 

ايرتان :لا ... واش ياله خرجنا من السيارة باركة ترعدي عليا ... صافي غانلقاو حل .. 

جهينة : وشنو هو الحل .. غاع الى قدرنا نقولوها للدراري اش غايديرو راه سيارة وحدة لي كاينة هي لي تفرغعت ... 

ايرتان : غانتمشاو حتى نلقاو لي يوصلنا و من تم لتم يحن مولانا ... 

طلق منها بالكشايف .. خدا ساكها و القفيفة لي عطاتهم زكية حيت عارفها غاتصدعو من بعد ... و سد الييارة و تم جاي عندها .. 

ايرتان : هاكي ساكك ... 

جهينة: هانتا كون غير بقينا فالطوموبيل حتى للغدا راه غايطيح علينا الظلام فالطريق اصلا كاتشوف الشمس غربت .. اش جا ماوصلنا فهاد الخلا ... 

ايرتان لوى يدو على عنقها و جرها : ولايني راك خويويفة ... انا معاك ماغايوقع والو .. غانتمشاو حيت مايمكنش نبقاو فبلاصتنا ... حتى نخرجو فالاوطوروت و غانطلبو شي حد يوصلنا فالطريق عند الدراري ... 

جهينة: والى تلاقا لينا شي حد و انت مهرس واللهتا يلقاو ريوسنا فشي قرينة ... 

ايرتان فخاطرو : (كون غير تعرفي راسك معامن ماتقوليش هادشي ..) ماتخافيش ماعندو مايوقع غير تيقي فيا ... 

جهينة عنقاتو تاهي و تمو غاديين .. و كل شوية تشوف فجنابها .. اماةايرتان غادي مامسوقش و بالو غير مع جهينة لي كتفتف و بينات ليه بلي هي اكبر خوافة عرفاتها البشرية ... 

بعد 2 ساعيتين لي تمشاو فيها مسافة لابأس بيها ... جهينة ولات وراه عيات و بدات غير كتجر فرجليها و تغبن ليه و هو قدامها ماباين فيه لاعيا لاوالو ... 

جهينة: وخلينا نوقفو غير شوية ... *ماداهاش فيها* بوونغ بوونغ 😟😟 

ايرتان: دابا وليتي باغية توقفي .. زيدي صبري مازال .. 

جهينة: اش غانصبر ... بان ليا انا لي مهرسة ماشي انت .. ظهري كايضرني و رجليا كيضروني و بدا كيبرد الحال و ظلام الحال و خايفة لا يخرج لينا شي كارتة من هنا .. 

ايرتان : هادشي ساعتين و انت كاتقولي وتعاودي فيها .. سكتي شوية خلينا نفكرو لهاد الحريرة .. فين كان عقلك فاش كنتي كاتغني و تحيحي و دزتي على حفرة .. 

جهينة: شنو دابا وليت انا السباب اه ... كون بقينا فالسيارة احسن لينا .. هاحنا شحال وحنا غاديين ماداز حتا حد .. 

ايرتان : باقي ماوصلنا لاوطوروت .. حيت الالا غاديا بالشوية و زايداها بالنغير .. خفي رجليك قبل مايتعطل الحال اكتر ماهو معطل ... 

جهينة كتهضر و تنتف الوراق لي حداها بالغدايد و تقطعهم و تنفهم و تلوح و تعاود تنتف : انا راااه عييت .. 

خلاها ايرتان كتهضر و تنغر بوحدها عارفها غتهضر حتى تعيا و تسكت .. 

هي شافتو منخلها و بدات تنغرز غير بوحدها ... لاحت الوراق من يدها و دوزات يدها على وجها بانزعاج هزات شعرها لاحتو لور ... حسات بعينيها حرقوها و بدات تحكهم .. و ناضو عليها حتى شفايفها ... تحك تهدن و ترجع تحك .. حتى حسات بوجها ماشي هو هذاك و المرآ ديالها غادي و كيضياق ... حيدلت النظاظر و كملات الحكان بشكل هيستيري .. 

جهينة : بونغ بونغ ... 

ايرتان: جهينة راك صدعتيني ... 

جهينة: كنحس براسي ماشي هي هاديك و فيا الحكة بزاااف ... اااه ...

ايرتان كان شاعل الفلاش من تيليفونو و دورو لعندها ياله غايخاصم عليها وخورجو عينيه ... 

ايرتان : اش درتي فحالتك ياهاد البنت .. 

جهينة: واعتق ماعرفتش شنو هادشي .. 

ايرتان حط عكازو و القفيفة و شد وجها ... 

ايرتان: اش كنتي هازا فيدك .. 

جهينة: والو ماكنت شادا والو .. غير لعبت بشي نبتات فيدي ... 

ايرتان: ماتعرغيش تجمعي يديك .. كوراه حريكة و لايعلم الله اش هاد الويل .. راه وجهك كولو تنفخ وليتي حالتك .. 

جهينة بدات تبكي : عتتتتقني وجهي كايحرقني بزااف ... 

تحنى ايرتان دغيا جبد قرعة الماء و حناها كيغسل ليها وجها و يفرك و كيخاصم .. 

ايرتان : من مصيبة للاخرى غير قولي ليا فيين مشا داك الرضى لي كانت كتعطيك امك قبايلة ... واش فينما كانت شي كارتة جدبتيها اش داك لشي زمر شوفي حالتك كيف وليتي .. غسلي مزيان دخلي الماء فعينك باش تنقى ...

هي كتفكرو هو جمع ليها شعرها الفوق ... 

ايرتان : صافي ؟ 

جهينة هزات راسها ليه ووقفات .. 

قربها لعندو و جر تيشورت ديالو ومسح ليها وجها بالشوية و بدا ينش حتى حلات عينيها شوية .. و شافت فيه

ايرتان: واش باقي الحريق .. 

جهينة: مابقاش كيف قبل ..كاتبان ليا غير الضبابة .. واش وجهي منفوخ بزاف .. صورني بالفلاش نشوف .. 

ايرتان : اش غاتشوفي اودي وليتي بحال المصارعين اليابانيين .. عينيك تسدو و الحناك تدلاو بحال بيتبول و دوك القنانف هههه لاحول ... 

جهينة درقات وجها كتبكي: ماتقولهاش 😭😭 ماتشوفش فيا ...

ايرتان جرها من يدها لقدامو كيضحك .. حيد يديها من وجها و عنقها ... وهو كيربت على كتفها و يسكت فيها .. 

ايرتان: صافي صافي دابا يتفش راه غسلناه بالماء غير شوية ويولي بيخير ... 

جهينة: عييت و فيا الجوع و النعااااس ... 😭😭

ايرتان : هههه ولايني تريبية عطاني الله ... وليت انا لي مقابلك ...

جبد من القفيفة طويسة .. حلها لقا فيها نصوصة الخبز فيهم الدجاج و بطاطا فريت من لي بقا فالغداء ... عطاها واحد و رجع سد داكشي و قال ليها .. 

ايرتان؛هاكي ... ياله اجهينة قسحي قلبك و تشجعي .. انا معاك راه شفتي ماكاين والو .. وجمعي يديك عندك ماتبقاي تمسي والو .. 

هزات راسها ليه و جرها محاوط دراعو عليها .. كتاكل و تجر خنونتها ... 

دازت شي ساعة و نصف ووصلو لاوطورت ... 

ايرتان: جلسي ارتاحي هنا ... انا غانوقف نشوف عالله دوز شي طوموبيل دغيا ... 

جهينة؛ واخا ...😢

جلسات على حجرة فطرف الطريق لي جا على الخلا .. جهينة مدرقة شوية وسط الربيع لي خارج ... والى شفتي لور تلقى بلي تما غارق شوية ... 

ايرتان تقدم شوية و وقف كيتسنى شي سيارة دوز ..

جهينة دارت يدها على خدها و كتحسس وجها لي باقي منفوخ ... غمضات عينها كتكمع و ايرتان كل شوية يطل عليها اش كادير ... دازو شي 3 السيارات كيشوفوه و يزيدو بلا توقف ... طلع ليه الدم واخا هكاك بقا واقف ..بعد مدة قليلة بان ليه شي ضو جاي تاني .. عيط لجهينة تنوض و بدا كيتقدم بالزربة و كيشير بشكل مصر باش يبان .. جهينة ناضت بالزربة .. تزبقات ليها رجلها و تكركبات تما وسط الربيع ... ايرتان قدر يوقف السيارة لي جايا و كيهضر معاهم .. كانو شي 3 الناس .. امراة و زوجها سايق و ولدهم صفير .. ماجا فين يقول ليهم معايا بنت .. و حنا واحلين ..

حتى كاتبان ليهم يد خارجة كتجر و من تم خرجت جهينة من وسط الربيع شعرها مشعكك كتر ماهو هكاك و وجها منفوخ و احمر ... كانت كسوتها البيضاء تجلخت بالتراب و كانت رجلها تلوات ليها و طاحت ليها الكونفيرسة و جراتها برجلها بلا متلبسها و هي جايا زربانة و كتزحف برجل... الناس حلو فامهم و ولدهم طلق زغية حتى خرجو حلاقمو ..كايشوفو فيها هكاك جايا و منظرها المرعب لي ماقال جنية يقول زومبي ... الاب عفط و هو كيقرى آية الكرسي و االام كتدفل فشونها و تغمض عينيها و كتردد باسم الله الرحمن الرحيم و الدري كيعنطز اللور و يغوت ... ايرتان مافهم والو دار لقا جهينة واقفة كاتشوف حتى هي مافهمت والو ... 

ايرتان وقف ساكن كايحاول يستوعب اش دارت تاني حتى وصلات عندو .. 

جهينة: علاش مشاو ... 

ايرتان : ماعرفتيش ؟ على ماشي خرجات جنية من وسط الربيع ؟؟ 

جهينة كاتعلق فيه : اوييلي ماامااا ... فيين 😱 ... 

ايرتان بقا كيشوف فيها ... وخو يدور هاز عكازو و كيضرب فالربيع لي حدااه بالفقصة و كيغوت و هي لاصقة فيه و كتهرنن ... 

جالس ايرتان فوق الحجرة و جهينة حداه حاطة راسها على كتفو و كتغبن عليه .. 

ايرتان : دابا لاش كاتبكي .. جريتي على الناس و خليتينا حاصلين هنا ... غير سكتي لي عطا الله عطاه .. 

جهينة:ما قصدتش انا غير تكركبت تما و حىجت كانجري باش نركبو ساعة تخلعو تاهما .. ياخ على زهر .. 

سكت ايرتان شوية .. شاف فيها و بدا كيضحك ... 

جهينة: ماتضحكش عليا 😭😭 

ايرتان ؛ شوفي كيف وليتي ... حالتك بالعيا و الوسخ و زايداها بداك الوجه المنفوخ  😂😂... 

جهينة: ضحك انت لي جات معاك ... 

سمعو شي حس تلفتو بانو ليهم ضو بعيد ديال شي سبارة جاية .. بغا ينوض ايرتان و وقفاتو .. 

جهينة : انا لي غانتكلف هاد المرة .. ارى تيشورتك .. *كيشوف فيها مصدوم * طلقني .. 

حيدو بالخف و عطاه ليها كمشاتو وخشاتو فكرشها و حلات قرعة الباربا و كوباتها على رجليها و على كسوتها .. بقا ايرتان غير كايشوف اش كتصنع .. وهي توقف فالطريق شادا مرشها و كتوجع .. وقف دغيا تاهو و سبقها القدام و بدا كيغوت ... شافهم لي فالسيارة ووقف... *كان راجل*

ايرتان : عافاك اخويا الله يرحم الوالدين مراتي كاتوجع ممكن تقربنا .. 

هو شاف فجهينة لي حامياها بكا و غوات شادا كرشها و جاوب مدهوش : اه اه .. ركبو اخويا ..

جر ايرتان جهينة خشاها فالسيارة و ركب حداها .. 

و ديمارا الراجل .. زربان .. 

هو: اش وصلكم اخويا لهاد الخلا و مراتك حاملة هكا و مال وجها منفوخ هكاك ... 

ايرتان: اخويا كنا مسافرين ل***** هبطنا نتمشاو و نرتاحو ساعة توضرنا على سيارتنا .. طلبنا واحد مول الكرويلة يوصلنا صدق موضرنا اكتر .. حتى شدها الوجع.. و تنفخ ليها وجها بالحساسية انا دابا بغيت غير نوصل للسيارة و غانديها للسبيطار.. 

هو: غانوصلكم للسبيطار نيشان و رجع لسيارتك من بعد .. 

جهينة: لا لا ...اخويا .... ااااه .. غير دينا للسيارة .. الطريق بعيدة بزاف و معاكسة لهاد الجهة .. حطنا غير حدا **** 

جاوبهم الراجل بواخا ... 

شاف ايرتان فجهينة بتعجب .. متلات و تقنات الدور بحال الى فايتة طايحة فهاد الموقف بكل تفاصيلو .. شادا فايدو مخبية على الراجل و كتبكي و تغبن بوجه كيضحك لايرتان زعما راه فكيت البلان .. هو ماعرف واش يضحك و لا يمتل القلق حتى هو .. 

جهينة كتضرب فايتان و تعض فيه: آي .. سربي اسيدي عافاك ..غانموووووووت . .. اااه 

ايرتان كيتحلف عليها بعينيه : صافي احبيبة صافي احنا قربنا ... 

الراجل : صبري اختي دابا يفرج الله ... راه قدما صبرتي ربي غايكتب ليك بيه احسنات الله يسمح لينا منكم .. 

جهينة لقانها فرصة كتسلخ ايرتان و تعض فيه : اااه ... شفتو العيلات مساكن و شنو كايعانيو .. ااااي .. ماما ياماما كنتقطاااع .. 

قرب لحداها و برغم : ابلاتي لمك لا ماخليتك توجعي ديال بالصح .. غير تسناي لقيتيها فرصة ؟ 

جهينة هزات حجبانها كتفقص فيه و كملات توجاعها ... 

دازت شي ساعة قلتلت و حطهم فين معتو ليه .. 

الراجل : واش متأكدين السيارة كاينة هنا ؟ 

ايرتان : اه اخويا .. غير سير الاه يرحم الواليدين عدبناك معانا .. 

الراجل : ماشي مشكل الله يفك وحايلها على خير .. 

جهينة: شكرا اخويا .. 

خرجو من السيارة و بقا شادها و دايرين ريوسهم غاديين .. حتى غبر .. و هي تعلق و هو كيغوت .. 

ايرتان : اجي لمك لهنا .. 

جهينة: سير بعد مني ... كنا غير كانمتلو كون مادرت هكاك كون راه باقين منشوريين تما .. 

ايرتان : ولاو فيك 10 دابا .. 

جهينة : بعد مني .. شوف حالتي كيف دايرة و باقي كاتهضر معايا .. حمد الله ماسخفتش ليك فشي قنت كوراك باقي كتجر ... 

ايرتان سكت كيشوف فيها ... باقا غادية شادا كرشها و اصلا ظهرها لي كيظرها و جاتو الضحكة .. كان تمتيلها حقيقي و كون ماكان عارف اش كاين كان اكيد غايتيقها ... عرفها ماكرة و عفريتة واخا خوافا ... تمشاو شوية .. هي قدامو كاتجر فرجليها بالعيا و هو وراه مضارب مع عكازو .. حتى بانت ليهم البلاصة فين مخيمين و فيها الضو .. كان اشرف كيحرك فالغاميلا حتى وقفات عليه هز راسو شافها و هو يطلق واحد الغوتة ..مقطعة.. 

اشرف : ااه .. اااه .. اااه .. 

حتى خبطو فؤاد عاد سكت .. الدراري شافو منظرها خراو فسراولهم بالضحك .. عاد دخل ايرتان عندهم .. 

جهينة جلسات : تهجرووووه 😭😭 

تكا ايرتان و لتح يديه و رجليه كياخد نفسو .. 

عز: مالكم على هاد التعطيلة و آش هاد الحااالة 😂😂😂 

ايرتان : لهلا يوريكم اش دوزنا هاد العشية ... 

جهينة: قول اش دوزت اما انت راه كيف مشيتي جيتي .. 

اشرف ناض جلس مباشرة قدامها كيشوف ليها فوجها و يقلبو يمين و يسار .. 

اشرف: و ماال هاد الوجه .. 

ايرتان : حكات شي نبتة دارت ليها الحساسية فوجها ... واشوف هاد الفعايل واش ديال بنت 23 عام .. عز:صافا واش باقي كيضرك .. 

جهينة: فاش غسل ليا ايرتان فاتني الحريق شوية .. 

فؤاد جبد التلج من الغلاصيير و لواه فبلاستيكة و مدو ليها ... 

فؤاد: هاكي حطيها على وجهك ... 

جهينة: عطيوني الماء .. 

عطاها اشرف نزلات على القرعة كاملة ... و حطات التلج على وجها ... 

اشرف : اجي بعدا اش هادشي دايرة فكرشك .. واش هادشي مكبوب عليك ماشي لون الدم ... *شهق و دار يدو على فمو * ماصدقتيييش .. تافقنا البارح على اليوم نتزوجو .. غبرتي و رجعتي بكرشك لفمك ... كولشي نقبلو منك ... الااا الغدر ..

جاتو سبرديلة لراس من عند ايرتان .. و طاح شاد راسو قدام جهينة ..

جهينة: ههههههههههه وا المسخووط باقي غاعما سخنت بلاصتي ... خليني غير حتى نرتاح ... 

ايرتان : نوضي فحالك بدلي و مسحي حالتك و احي تاكلي ... 

ماضت جهينة دخلات للخيمة .. 

عز: تا غير قول اش وقع ليكم .. 

ايرتان ناض جلس معاهم فالطبلة ... 

ايرتان: واللهتا هاد البنت .. سبيطار متنقل .. حمقاء بكل معنى للكلمة ... مهم منين كنا راجعين مع ديك جوايه 7 تفرغعات لينا الرويضة ... *عاود كولشي* 

اشرف تلاح لور كيضحك : هههههههههه مسخوووطة 😂😂😂😂 

ايرتان : واللهتا بقيت غير حال فمي .. جات حتال الاخر و طاحت عليها هاد الفكرة ... السيد من نيتو تيقنا ..و ناض تيدعي معاها .. 

عز: عفريتة والله العظيم ... جاب الله تيقكم و قدرتو توصلو ... 

ايرتان : واللهتا سخفاتني غير هي .. مرتاتني تقول درية صغيرة فرعات ليا راسي ..هاهي خافية هاهي عيات هاهي فيها الجوع ها وجها كيحرقها هاهي طاحت هاهي كتبكي ... حمقاتني ... 

فؤاد كيعيط عليها : جهينة .. اجي تاكلي .. *ماجاوباتش و ناض طل عليها لقاها نعسات* 

ايرتان: نعست ؟ .. عيات الحمقاء...

عز:ههه شوف كيف ولينا ... كانحس بهاد البنت كتخرج منا ناس عاديين بالزز منا .. 

ايرتان : واهانتا ماقريبش ليها بحالي انا و قدرتي تحس بهادشي و انا اش غانقول ؟ 

اشرف: بصراحة عندو الحق .. طبعها زوين كيخليك تأتر بيها بلا ماتشعر .. 

حدر راسو كيلعب بالكاس لي فيدو .. 

عز: ههه مالك .. فهمتي اش واقع و لا باقي 😂😂؟ 

ايرتان: فاهم من شحاال هاذي غير كنت كانكر .. دابا صافي مابقا مايتخبى .. 

فؤاد: كنت عارف هاد الخرجة معاها بوحدها غاتخليك تحط كواريك و تعتارف .. 

عز: شنو غادير دابا غاتعتارف ؟ 

ايرتان كيهضر بالشوية : كاتسطاو عليا .. واش الشهر الجاي عندنا ميعاد مع الفرادا و العصابات و انت كاتقول ليا نعتارف ليها .. وليت كانقول صافي غانخرج من حياتها و فنفس الوقت ماقادرش .. ماقادرش نخليها ورايا .. كنت باغي نطيحها فالفخ صدقت انا لي غارق فيه و هي ماجايبة للدنيا خبار .. و عاد داك جلال باقي شاغل بالي ماغانرتاح حتى نفرقهم .. كون كان شخص مزيان طول خليتها من دابا .. ولكن صدق حيوان و جهينة ماكاتستاهلش يتلعب بيها بديك الطريقة ... فاش غانرجعو غانبالي بيه شخصيا مانتسناش حتى تفارق معاه بوحدها .. 

عز: واخا .. ولكن كانظن الفراق خاصك تفكر فيه اكتر .. ممكن تخليها فجنبك و حنا كاملين ضايرين بيها و متنساش مكاينينش غير حنا .. و جايا 7 سنين هادي و حنا متخفيين و عمرك خفتي ... كيفاش دابا و انت اقوى خايف .. 

ايرتان : فاش غاتجرب هادشي لي كانحس بيه غاتعذرني ... هي نقطة ضعفي دابا واش عرفتي شنو نقطة ضعفي .. قبل كنت كانلعب واماخايفش من العواقب حيت ماكان هامني والو ماكان عندي مانخسر .. غاتقول ليا واليديك ... هادوك شي 8 سنين و هما يسحاب ليهم كنقرى فامريكا .. خاص غير نقول ليهم خاصني الفلوس و يسيفطو ... كنت اخر همهم الوالد تابع شركتو و زبلو و الوالدة تابعة الوالد و مشاكلو ... اودي خليني ساكت تاني راه كولشي فخباركم ماغاديش نجبد داك الحزاق تاني .. جهينة واخا ماشي دابا ولكن غايجي واحد الوقت وغاتولي ماضي كيفما غانولي بالنسبة ليها ... حيت واخا نتبع قلبي و نخليها فجنبي هي ماغاتقدرش عليا و يمكن ماتقبلش حياتي الاخرى..

اشرف : ماتقول ليها والو و هني راسك .. 

ايرتان : صعيب الموضوع ... 

عز: ماتزربش دابا تقدر جهينة عندها رأي حتى هي .. مهم باقي الحال على هاد الهضرة .. تعشا ولا مافيكش الجوع .. 

ايرتان : ارا ارا.. هلكني العيا ... بغيت غير ننعس ... 

عطاه اشرف و كملو هضرتهم ... حتى ناضو ينعسو ... حتى تخشا فالخيما هو وعز و تفكر جهينة و ناض خارج .. 

عز : مالك؟ 

ايرتان : ديك الحمقاء تقدر تنوض بليل تلقا راسها بوحدها و تخاف .. انا غانخرج .. 

عز: هههه نوض نوض ... ايرتان و الاهتمام .. هاد البنت قضات عليك ... 😂😂 

ايرتان : نعس و زمو .. 

خرج ايرتان و خرج معاه فراشو .. طل على جهينة لقاها غاطسة فنعاسها .. غطاها و قاد ليها راسها و فرش قدام الخيمة ديالها و تسرح تحت النجوم .. كيتفكر لحظاتو معاها اليوم كلو حتى داتو السهوة و نعس ...