حيت تانبقى نعاونها، راكم عارفين الروينة لي مور العرس،،،،،، صافي بقات لسيمانا يومين وتكمل، اذن يومين وتجي سليمة، انا رجعت للدار اليوم نرتاح،دخلت سلمت على حياة ودخلت دوشت، ساليت تعشينا، وطلعت لبيتي نعس.
أصبحنا وأصبح الملك لله #
صبح الصباح كيف ديما فقت، جمعت شوي مع حياة، مرة مرة تانحصلها تاتضحك غير بوحدها، قلت لها مالك، قالت لي كملي داكشي لي فيديك واجي، كملت وجلست حداها.
حياة #فرحي، راه قالي باك، جا عندو شي ولد وباه البارح للحانوت، وقاليك عجبتي الولد ومو فالعرس وبغاو يخطبوك،
انا تخلطو عليا الاحاسيس والفرحة.
حياة # ولكن راه غاتجلسي فالدار ماغاتكمليش قرايتك، حيت هما عائلة ملتزمة بزاف، فهمتي وغاتعملي خمار، وباك خايف لا ماتوافقيش داكشي باش قالهم حتى نشوف البنت.
انا # اويلي على مانوافقش، واش بغاني با نبقى بايرة، انا اصلا ماعنديش مع ديك القرايا، ونديرو الخمار، تا النقاب نديروه،ماتعرفي الله بغا يهديني.....
حياة # هي نقول لباك راك موافقة....
انا # واشنو كانلعبو،....
طلعت لبيتي، وجبت واحد الصندوق دمي الله يرحمها، كانت كاتقولي هذا ديالك ملي غاتزوجي، حليتو وجبدت منو شي تكاشط قدام،ولكن زوينين وشي يزور مطروزين، وواحد الصنيديقة صغيرة، فيها سنسلة وحلقات دالذهب كانت مي شراتهم لي، بقوة فرحتي بهاد الخبر بقوة حزني حيت مي ماكايناش، جمعت داكشي فبلاصتو، وهبطت نتغدا انا وحياة، با اصلا ماتايجي تا العشا، جا المتعلم ديالو دا الغدا، ومشا.......
كمل النهار عادي....فالعشية جا با تعشينا، بغيت نعس، قالي با بلاتي ابنتي نهضر معاك، رجعت لبلاصتي،
با# اوا ابنتي نتي كبرتي ومك الله يرحمها كانت امنيتها تشوف ولادك، ودابا كيف قالت ليك حياة، راه جا هاد ولد الناس، وانا مابغيتش نبزز عليك شي حاجة، راه غير نتي لي عندي، وماساخيش بيك، ولكن هادي سنة الحياة، الى كنتي موافقة، راه الناس بغاو يجيو، حيت الولد راه خدام فأكادير، عاد تخرج استاذ جامعي تما،والقرايا مابقى لها غير شهر، وخاصو يرجع والى كتب الله راه بغا يسالي كلشي قبل.
بقيت كانفكر فهاد السيد لي وافقت عليك بلا مانعرف تاسميتو، المهم خدام مزيان، وشاد فالدين، اش بغيت كتر من هاكا..... بقات فكرة تديني لفكرة تانعست،.......
اليوم فيقاتني حياة بكري، قاليك نمشيو للحمام حيت الناس غايجيو يشوفوني بالليل، بهاد رالزربة،ولكن نضت الدار مجموعة حيت عاد خملنا، مشينا للحمام. مارجعنا تال 1 دالغدا وصلنا انا عييت داكشي باش كلست نرتاح حياة ناضت دارت شي تخربيق نتغداو بيه، نضت تغدينا، لبسات حياة خرجنا نجيبو شي حلوة، مشينا عند واحد المراة تاتعرفها حياة فايت لها خدمات معاها، تقضينا من عندها شي شكيلات دالحلوة، ودزت عند دار سليمة غاتكون وصلات، مهم سلمت عليها، وعاودت لها اش كاين، ديت منها واحد القفطان، وعيطنا لهم النيت هي وراجلها ومها وباها، باش يجيو يتعشاو معانا،.......
اوا وصلات العشية سليمة ومها جاو بكري، باش يعاونونا شوي، وصلات المغرب، هاهو الباب تايدق انا كنت فبيتي تانلبس قفطاني وسليمة تاتعاوني، وتاتعاود لي على اسبوع العسل ديالها ههه......حلات حياة الباب، وهبطات وانا وسليمة بقينا تانطلو من الحلقة دالسطح(الضوايا )،دخلات واحد المراة وواحد البنت وواحد الشابة اخرى، ماعرفتش شكون ولكن العريس او باه مابانوليش، عيطات لي حياة، هبطت سلمت عليهم، وجلسنا كاملين، من بعد ماحطيت اتاي وحطينا داكشي لاخر، حيت الرجال ماغايجيو تاتفوت الصلاة دالعشاء، المهم عرفت بلي ديك البنت قدي وهي اخت يوسف (هذه هي سميت راجلي المستقبلي ههه)،وتاهي مخطوبة، والشابة الاخرى مرت خو يوسف عاد جابوها غير عام هذا، ولكن تاتبان كبيرة شوي، والمراة الكبيرة هي مو، ظريفين صراحة، المهم بقينا جالسين، هاهما الرجال داخلين، با وبان سليمة وراجلها، و2 شبان، وراجل كبير، شتهم غير من الكوزينة حيت نضت نحرك الطنجرة، دخلهوم با للبيت لاخر، وجدنا اتاي مرة اخرى، حطاتوا هاد المرة حياة، والام دسليمة، مهم شربو اتاي، انا جلست مع النساء، حتى قالت لي حياة اجي، طلعت لبيتي وتبعاتني لوستي (المستقبلية كانت سميتها زينب بحال اسم مي الله يرحمها).
شوي دخلوا الشباب ب2......انا بغيت نعرف غير ان واحد فيهم المهم جلس واحد قدامي، زينب وخوها لاخر خرجو للسطح....... طلعات معايا السخونية تانحس براسي مزنكة نيت،
الشاب # انا يوسف ونتي (بغا غير يبدا الهضرة اما تانظن غايكون عرف اسمي)
انا بخجل # نهى ااانهيلة
يوسف # اذن تايعيطو ليك نهى، اوا انهى اشمن مستوى عندك
انا # هاد العام خضيت الباك (مع غض البصر )
يوسف # اوا المهم نجيك نيشان، انا راه باغي مراتي دير الخمار، من بعد العقد مباشرة، وان شاء الله الى داز كلشي مزيان، غانعملو كلشي هاد الشهر حيت خدمتي غاتبدا من بعد شهر ونص...
انا # ان شاء الله يكون خير، والخمار ماعنديش فيه مشكل....
ناض قالي واش عندك التلفون، قلت لو لا
واخا عندي ولكن قالت لي سليمة قولي لا حيت هما ناس ملتازمين والبنت اللي تادير التلفون قبل الزواج، راه تيخرجو عليها العجب وتايديو عليها نظرة فشكل....
يوسف # واخا ان شاء الله، نهار الخطبة نجيب ليك واحد
انا (فرحت حيت ماشي شي واحد زقرام) # ماجاوبتوش كتافيت بابتسامة، وحدرت راسي، اوا هبط يوسف وخوه وتبعتو انا وزينب مهم تعشاو الرجال وتعشينا تاحنا وتافقنا بلي الخطبة غاتكون من لهنا لاسبوع، يوسف جا مرة وحدة فهاد الاسبوع هو وخوه ومرت خوه، داوني نشري لخاتم والحوايج الاخرين اضافة لتواب دالخمارات لي من بعد ديناهم لواحد الخياطة تاتعرفها زكية مرت خو يوسف، اوا داز الاسبوع عادي.... وهاد النهار الخطوبة، سليمة مسكينة هاد الصباح شدو الطيارة هي وراجلها، ماغاتحضرش لي ولكن خضاو لي كادو هي وراجلها وجاو سلمو عليا ومشاو......
الدار عامرة شوي،غير الجران اما العائلة فكيف ماقلت قبل ماتانعرف حد، وصاحبتي غير وحدة هي سليمة راه ماكايناش.... مشيت عند الكوافورة، ساكنة غير حدانا، دارت لي مكياج خفيف، وقفطان بيض جيت زوينة واخا سميمرة ولكن سبحان الله العروسة تايعطيها الله واحد السر......
رجعنا من الكوافورة، دخلوني بالصلاة والسلام على رسول الله (صلى الله عليه وسلم )، شوي جاو عائلة يوسف، يوسف دخل جلسوه حدايا، اول مرة تانركز فيه الشوفة، جا زوين ماغانقولكمش طويل وغزال وعندو العضلات مفتولين، لا هو راجل هادي شاد حقو وصافي، ولكن كايبان راجل مع ديك اللحية الخفيفة اللي عامل، جلسنا، مهم تصورنا شوي ومشا يوسف عند الرجال وبقاو نسا تايضحكو شوي دازت الخطوبة زوينة، مهم تعشاو الناس وناض كلشي مشا، بقيت غير انا وحياة وبا، نعسنا، مافقت تال 3 دالنهار، لقيت حياة مرت با عاد فاقت عملات اتاي كلينا ونضنا جمعنا الدار انا وهي، وجات حتى خالتي زهور مان سليمة وبنات الجيران عاونونا، ماسالينا تال الليل، عمرنا لهم اتاي، اوا ضحكنا وهضرنا مشاو، بقيت عاود انا وحياة، هزينا داكشي لي جابو لي فالخطوبة تانقلبوه، صراحة تهلاو فيا، جابولي 2 فاليزات عامرين، فيهم 2 تكاشط وحدة بنواغ ووحدة بالخضر الملكي، و3 دالتواب دالخمارات .... 2 صبابط واحد طالون واحد بلا، بجوج كحلين، وسندالة بيضة، و2 شرابل فاللون دالتكاشط، و2 ديال لي بارفام، وعلبة مكياج كبيرة، وادوات الاستحمام، مع طاقم فوطة دالاستحمام، و2 بيجامات وحدة غوز بيبي ووحدة بيج، و جابولي بعض الخمارات مخيطين، والملابس الداخلية..... مهم داكشي دالعروسة (الحناء، الورد، الفاكهة الجافة... )،ولكن احسن حاجة فداكشي هو واحد التلفون Xperia z3، عجبني هزيتو شعلتو لقيت فيه كارط سيم،مهم جمعنا داكشي من بعد ماقيست حيت انا ختاريت غير الخاتم والسنسلة دالذهب اللي خضالي يوسف اما داكشي لاخر كلشي ختارتو ختو ومرت خوه ولكن عجبني ذوقهوم بزاف، وطلعت لبيتي تكيت نرتاح تاداتني عيني، وانا نسمع شي تلفون تايصوني، قلبت فين لقيت التلفون لي جاب لي يوسف هو اللي تايصوني، وكانت سميت يوسف طالعة عرفتو ديجا قيدها، جاوبت بعد تردد وحشمة.
انا # الو السلام عليكم
يوسف # وعليكم السلام ورحمة الله وبركاته، اكما فيقتك
انا # لا كنت غير متكية شوي لاباس
يوسف # لاباس الحمد لله، ونتي مزيان، كيف دايرين مع الشغل.
انا # مزيان الحمد لله،....
يوسف #بغيت نقوليك غدا ان شاء الله غاندوز عندك فالعشية انا وزينب وخاطيبها نخرجو شوي، وراه قلتها لباك
انا وماقداني فرحة # ان شاء الله
قطعت ونعست......
اوا وصل نهار جديد، ووصل الوقت وجا عندي يوسف وزينب وخاطيبها وخرجنا كاملين، بديت كانهضر مع يوسف شوي بشوي، عاودت ليه على كلشي ماعدا مايخص مراد، وحتى هو، قالي بلي تعذب باش وصل، مهم تسرحت شوي فالهضرة،صافي ردني للدار، وبدينا تانهضرو فالتلفون، شوي بشوي ولفت عليه، لا كتر من هادشي، وليت كانبغيه بزاف، واخا عاد اسبوع باش دازت الخطوبة، ولكن تفاهمنا بزاف، بقا اسبوع ونص للعرس ويوصل وتافقنا ان العقد يكون نهار العرس، اليوم خرجت انا وحياة نتقضاو باش نصاوبو شي حلوة، مهم تقضينا ورجعنا، انا عييت طلعت تكيت ماحسيتش براسي، ضرباتني الفيقة مع 10 دالليل نضت هبطت للطواليط واصلا كنت باغا ناكل شي حاجة لقيت الضواو مطفيين، مابغيتش نشعل الضو باش مانصدعش با وحياة خاصة ان با نعاسو خفيف،شعلت غير لبيل دالتلفون ، ولكن مع الكوزينة وسط الدار فاش كنت غادة لها،سمعت حياة كاتهضر مع با اذن باقي مانعسو، ماشي هادشي لمهم، الاهم انني سمعتها كاتقولو،امتى ناوي تقول لبنتك الحقيقة...... ياك ختي زينب قلداتك قبل ماتموت الله يرحمها، باش تقوليها كلشي.
نهى بائعة الهوى الجزء الثالث
محتوى القصة
التنقل بين الأجزاء