نهى بائعة الهوى الجزء الخامس

من بعد هضرت حياة عطيتها للبكا والتنواح، با الى عرف بلي غير تصاحبت غايقتلني، عاساك يعرف بلي حاملة، واخا قالت لي حياة، صبري تانشوفو اش كاين، مشيت شريت اختبار، الحمل، درتو، كانت النتيجة سلبية، فرحت، وبديت تانحمد الله ونشكرو، ولكن من بعد هاد المشكل، مابقيتش باغا نجلس فمكناس، هاد المدينة عطاتني حياة، فيها كبرت وتربيت، ولكن فيها عانيت وفيها تذليت، كرهتها، كرهت راسي،كرهت كلشي،...... داكشي باش قررت نبعد. 

العشية جا با، جلس، حطيت لهم العشا، مع حياة عيانا شوي. 

انا # با بغيت نعرف مي، وبغيت تعاود لي كلشي. 

با من بعد تنهيدة كبيرة # بنتي مك فاش خلاتك عندنا كان فعمرها 16 لعام، كانت جات حاملة هربانا من دارهم، ديك الساع احنا كنا فالشاون، وانا وزينب كانت فين ماحملات تايطيحو لها، ردينا بقضاء الله، تال واحد النهار، كانت مك جات كيف قلت ليك هربانة عند شي مراة من عائلتها سميتها رحمة، وبقات عندها كانت تاتهلى فيها، وتما عرفاتها مك وعاودات لها قصتها. 

Flash back#

منى الام الحقيقة دنهى # ختي زينب تقلت، ماعرفتش لمن غادي نخلي هاد البنت،ولا مانقدرش نرجعها معايا لكازا، وماعندي كندير لها، شي مرات تانفكر نقتل راسي ونقتلها داخلي. 

زينب (الام اللي ربات نهى)# نعلي الشيطان،باش عرفتيها بنت، اجي ماعودتيش ليا كفاش تاحملتي. 

منى # القابلة لي قالت لي راه كرشك دبنت..... اش غانقوليك اختي زينب، انا با مات واحنا صغار، خلاني انا وختي وخويا، وانا الكبيرة، ضطريت نخرج نخدم نعاون مي على الزمان، بديت كانخدم فالديور، وفالقهاوي، تما تعرفت على ربيع، كان ولد مول القهوى لاباس عليهم، صافي بدات علاقتي معاه، وانا فعمري 14 لعام، قلت العقل وليت تاندير ليه كلشي، كنت تانقولو يجي يخطبني، قالي راني باقا صغيرة غير نزيد شوي، مهم كلا ليا عقلي، واحد النهار طلب مني ندير نعاه علاقة، ملي رفضت قالي واش ماتاتيقيش فيا، وانا باغيك للزواج، واش بغيتيني نمشي للزنقة، عند بنات الزنقة، بقا عليا، تاقتانعت، سلمتو راسي، صافي من بعد داكشي ندمت ولكن فات الوقت، قالي ربيع بلا مانخاف راه غايجي يخطبني، مهم قنعني، ودامت علاقتنا الغير الشرعية، حتى ولات عندي 16، وهو ولات عندو 22عام، خدا الاجازة ديالو، انا بداو علامات الحمل تايبانو فيا، قلتها لربيع قالي، واخا واخا غانديك للطبيب والى كنتي حاملة تحيدي داكشي لي فكرشك، قلت لو واش هانت عليك هاد النفس وهاد الروح، علاش مانتزوجوش وكلشي يتقاد، قالي بلي هو تعرف على شي نصرانية وغاتديه، وبلي باغي يكمل قرايتو برا.... بكيت قدامو،صافي تافقنا نمشيو عند الطبيب باش الى كنت حاملة نزول داكشي لي فكرشي.......... نهار اللي درت معاه ماجاش سولت عليه صاحبو، قالي بلي هاد الصباح شد الطيارة لفرنسا، من تما، سخفت، هزوني، جات مي قالها الطبيب بنتك حاملة، قتلاتني عصا،وعرفات شكون السبب ولكن اللي معروف هو اننا ماغانستافدو والو الى دعيناهم، مشات هضرات مع مول القهوى، قالها دي العاهرة دبنتك باغا تلصق فولدي. رجعات محطمة ، وكانت باغا تشربني شي عشوب باش داكشي يطيح ولكن ماقبلتش، صافي قررت نهرب حيت عرفت مي غادي تقتلي هادشي لي فكرشي، انا مابقيتش باغا نزيد نغلط، والى قتلت هادشي لي فكرشي غادي نرتاكب معصية اخرى، اوا وشديت الطريق عند خالتي رحمة، كنا عرفناها فكازا، قبل ماترحل هنا، كانت ساكنة ديك الساع مع ولدها اللي ماتاتكونش، من بعد موتو رجعات لهنا. اوا وهادي معاك دابا. 

زينب # هادشي كامل داز عليك، اوا الله يدير ليك اللي فيها الخير. دازو دوك الشهور وولداتك مك، مسكينة فرحات ولكن فنفس الوقت بكات على زهرك وزهرها، قتارحات عليها مك باش تبقى معانا، ونربيوك نتي وياها، فرحات ولكن قررات ترجع، وتخليك غير نتي، اوا من تما رحلنا لمكناس وجبناك معانا، ولكن هي عطيناها العنوان، جات شافتك من بعد 3 سنوات، وعرفنا بلي تزوجات بشي واحد فكازا، وعطاتنا العنوان، فايت لي مشيت عندها، فاش هبطت لكازا، من تما تقطعات بيناتنا الاخبار، وهادي هي قصة مك ابنتي

فاش كان با تايعاودي لي القصة دمنى لي هي المراة اللي ولداتني، بانت لي قصتي مع مراد ومع جواد، نفس القصة، غير بشخصيات وازمنة وامكنة مختالفة، مي انا جامي نسامحا، دابا تأكدت بلي تخلات عليا وحتى هذاك اللي كان سباب باش نتولد تخلى عليا، مي ماهمنيش هو، قد ماهمني اخر المراة اللي ولداتني، كان بإمكانها تربيني وتخدم عليا وعليها، علاش خلاتني فحضن مراة اخرى، ولكن من جهة اخرى كانت صغيرة، وحتى انا كنت نقدر نطيح فداكشي فاش طاحت، كون حملت تا انا من جواد، اسئلة طاحو فعقلي وافكار متناقضة......... ولكن الفكرة الاخيرة لي دارت لي فراسي،هو انني خصني نبعد من مكناس،باي طريقة، والحل لي عندي دابا هو نمشي عند منى، اه انا مي وحدة وماتت، وهادي جامي نسامحها،......... شحال قراوني فالابتدائي على الام وكانت الصفة اللي تاتدكر مور اسمها الحنان والرحمة وانا ماعرفتش هادشي معاها وانما مع مراة اخرى،كانكره مي لي ولداتني كيف ماكانكره با البيولوجي ،وكيف ماكانكره راسي...... . 

با # سبحان الله ابنتي فين سرحتي. 

انا # با انا بغيت نمشي عند مي لي ولداتني، بغيتك تديني عندها.

با بصدمة حزينة # علاش ابنتي واش درنا ليك شي حاجة، واش ناقصاك شي حاجة نديرها ليك، اشنو خاصك ابنتي الله يرضي عليك، قوليلي. 

انا وعيني دمعو # لا ابا ماخاصني والو ولكن بغيت نمشي عندها، بغيت نعرفها،بغيت نعرف عائلتي. 

با # اييه الحسين كبر وربي، اييه ابنتي واش احنا ماشي عائلتك. 

انا ونفسي مخنوقة بالدموع # با ماتقولش هكاك نتا با اللي ربيتيني وانا ماغانساش خيركم نتا ومي الله يرحمها، ولكن انا بغيت نتعرف على ولديا دبصح.

با # هي التربية لي ربيناك ابنتي ولات خير (كان كايهضر بحرقة لدرجة تخنق، ولكن مادرت تاردات فعل حيت الى حاولت نفكر بقلبي غادي نتراجع وانا ماباغاش نطيح بالراجل اللي طول حياتي اعتاقدت انه الاب ديالي، مابغيتش نمرمد لو راسو فالارض، جواد مشا ولكن شكون عرف بلي ماغايرجعش، شكون عرف بلي ماغانتفضحش وديك الساع اكيد غايندم على النهار لي رباني فيه).

انا نضت لبيتي خليت با مريض وحزين،ماشي مريض جسديا ولكن مريض نفسيا والمرض النفسي صعيب يداوى كيف ما انا مريضة ولكن انا الاسباب لي خلاوني كتار والعامل الرئيسي فيهم هو قلبي وعقلي الغبي ، وفالنهاية اجسادنا وارواحنا مرتابطين ونهار تاتمرض الروح فراه كاتأثر على الجسد، والعكس صحيح، مامسامحاش لراسي لانني السبب فحزن با ولكن الى مشيت غايكون حسن، سبحان الله داك اللي كان سبب فولادتي كرهني وماعرتافش بيا واللي رباني وانا اللي بغيت نخليه ماقدرش على فراقي....... ولكن هذه هي لعبة القدر.

الغد ليه لا صبح مريض وعيان، انا حاولت مانبانش قدامو فالليل طلع عندي، بست لو يدو، عنقني وقالي جمعي ابنتي حوايجك غدا مع 5 نشدو الطريق لكازا..... تقبط قلبي ولكن انا قررت وساليت. 

في الصبا دالنهار الموالي، نضت مع 4.اصلا مانعستش الليل كامل وانا تانفكر فحياتي ، نضت توضيت وبديت كانصلي، وتانطلب من الله السماحة، قلبي تايبكي الدم وعيني نشفو، ماباغاش نمشي ولكن ماعنديش خيار اخر........ باغا نبدل حياتي وماعرفاش كيفاش، يمكن الى بعدت غادي تبدل. 

وصلات الربعة ونص جا با بغايفيقني ولكن لقاني اصلا فايقة، صافي هزيت باليزتي لي كنت وجدتها فالليل، ماديتش بزاف دالحوايج واصلا ماعنديش بزاف، سلمت على حياة، الانسانة الرائعة، وانا خارجة من الباب حسيت بلي خليت روحي لداخل، وهنا حسيت بالشعور لي حسات بيه حياة قبل مني، ولكن هي كانتخارجة وجايا لدارها الثانية، جايا رافعة راسها، ماشي بحالي انا، ودعت بيتي وودعت دارنا ودعت الزنق اللي شاهدة على طفولتي ومراحلها كاملين،واخير ودعت اخر نسمة من هواء مدينتي مكناس. 

وشدينا الطريق للمحطة دالتران، كان خارج مع 05:10 دقايق، دغيا تحرك بينا.

يتبع