قصة رقبة تحت السيف

من تأليف Ghazal trust
2018قصة كاملة بدون سفالة

محتوى القصة

رواية رقبة تحت السيف

كتعرفو ذهب مزياااان .. عارفين بنت من خههه وكتعرفو رياض حتى هوا وعارفين ولد من ... لاكن غتعرفوهم كتر فهاد القصة ... قصة كتمزج بين الكوميدية والدراما والعناد و بزااااااااف ديال الغيرة فمن لا يعرف سلالة آل سقراط غيعرفهم فهاد القصة ... وبما ان دمهم مشروك فالاستسلام اخر حاجة كيفكرو فيها .... غنختاصر فكلمة واحدة وغنقول ... البطلة قنبلة متفجرة حضيو معااها لا تشبك فحوايجكم راه بنت الكينغ هادي 😂😂😂 والبطل بركان من الغيييييرة والغضب وشفتوه فاش كان صغير . ودابا غتعرفو عليه وهوا كبير ... احداث جديدة وغنخفف من الدراما حيت مافيا اللي يوجع لى هاد العاءلة مرة اخرى 😂😂😂😂


-شونزيليزي ، باريس.
فسيارة مرسيديس كحلة طويلة ... نزل طفل صغير تكون فعمرو 7 سنوات غادي فاتجاه محل لبيع الحلويات والشكلاطة امام اعين اخته الي كتراقبو عن قرب من نافدة السيارة ... كان من الهندام ديالو باين كينتمي لأسرة غنية ... واضحة من مشيتو رغم صغر سنو وتقتو فنفسو .. زيادة على الوجه الجميل والشعر الاشقر الكثيف النازل على ودنيه ... خدا شنو كيشتهي ورجع ادراجه فاتجاه السيارة.. فهاد اللحضة اخته اللي جالسة مبتاسمة كتراقبو جاها اتصال وقلبات عينيها هزات التيليفون كتهضر وضحك ...ورات وجها مرة اخرى جيهت المحل وهي تفاجأ ... فين خوها الصغير؟ ... فين مشا ؟ عاد كان جاي جيهتها وماهما غير 2 خلفات حتى يكون ركب حداها ! بداو عينيها كيقلبو بارتجاف وتلفتات قدامها وهي تشوف سيارة سوداء عالية طالع فيها رجال لابس كلشي كحل وهاز الطفل ويدو على فمو باش ميغوتش .. طلقات من التيليفون بصدمة وفمها محلول ... عيونها البريءة مخلوعة .. قلبها ف90 درجة كيضرب ... الصوت مقدرش يخرج ... فالاخير لقات راسها تابعة السيارة وكتراوغ فالشارع وسط السيارات .. عينيها مغفلاتش على السيارة السوداء اللي بدورها حسات ان سيارة مرسيديس تابعاهم من اللور ... الخوف والرجفة والاصرار على الالتحاق بيهم ... لسقات عليهم بسيارتها من اللور وكتكلاصوني بالجهد وهي كتشوف خوها كيغوت لداخل وكيضرب .. فجأة بان ليها واحد هز يدو ضربو حتى غاب على الوعي ... شعلات النار فقلبها .. بل بركان من الغضب نفاجر ... حلفات حتى توقفهم ... بالبكا والدموع والخلعة تابعهم .. بعدات السيارة على المدينة وشدات طريق الطبيعة ... مزالة تابعهم ومستسلمانش ولا يمكن تستسلم وخوها فسيارة معارفاش شكون هادوك وعلاش خطفوه و شنو بغاو منها ... فجأة وقفات السيارة اللي قدامها وشدات الفران حتى هي موراهم ... جبدات السلاح من المجر ونزلات بغضب صوباتو فاتجاه واحد طاح فالبلاصة وجات تصوبو فاتجاه الثاني لاكن زرب عليها وضرب يدها بركلة حتا طاح الفردي من يدها وبضربة وحدة منو طاحت فالارض فاقدة الوعي وباب سيارتها مفتوح بينما انطالقو المجرمين بسرعة وخلاوها مرمية فالأرض

فيلا وسط الاشجار ... بعيدة على ضوضاء السيارات وصخب المدينة ، مطوقة بحراس كل واحد واقف فجهة ، فغرفة نوم الكلاسيكية ديال هاد الفيلا وقفات بنت طويلة القامة متناسقة الجسم ..شعرها اشقر نازل تحت كتافها .. جميلة جدا وفعيونها خوف كبير ... كتهضر فالتيليفون بغضب وكضرب فالطبلة بيديها .
ذهب : لقيتوه؟ 
الشخص : مزال ... من لبارح وحنا كنقلبو ... من اللحضة اللي عطيتي فيها الاوامر ديالك 
ذهب : بغضب ) اش كتسناااو ... بغيتو يكون عندي ليوم قبل غدا ولا غنقتلكم واحد واحد ومنحنش فشي واحد فيكم 
الشخص: عرفنا باللي عصابة اللي خطفاتو ... وهاد العصابة كتاجر فالاطفال 
غوتات بصوت مرتفع وغضب : علااااااش تقول ليا هاد الهضرة ... عارفين العصابة سبرو هجمو عليهم . . متخليو حتا واحد فيهم حي 
الشخص : ماشي بالساهل امدموزيل 
ذهب : كفااش ماشي بالساهل . . شنو اللي صعيب فهادشي شنوووو؟
الشخص: اللي صعييب ان هاد العصابة ماشي اي عصابة وماشي شي حاجة اللي ساهلة .. واللي دايرين فيها يديهم ناس مرموقة وصعيب تواجه معاهم ... باختصار اللي مساند هاد المافيا من الريوس الكبار دأمريكا 
غوتات بغضب : كن يعرف بابا بهادشي ... غيوريك نتا وهادوك الريوس ولا الرجلين اللي كتهضر عليهم ... بالزهر ماعارفش ومستحيل يعرف ... نبغي نعرف بالضبط شكون اللي يدو طويلة ... وهادشي نبغي نعرفو من بعد .. يعني ياسين نبغيه يبات معاااااايا سمعتي ... معاااااايا 
قطعات وطاحت فالارض كتبكي .. مقاظراش تهيل شنو يقدر يكون وقع ليه .. شنو واقع ليه دابا وفين هوا ... من اللحضة اللي رجعات فيها الوعي ديالها وهي كتقلب عليه ... قطع تفكيرها اتصال .. هزات التيليفون طلات لقات باها كيعيط ... خرجو عينيها وتحل فمها ... وبصوت مرتجف كتحاول ما امكن تبعدو باش باها ميشك فحتى حاجة فتخات الخط بابتسامة 
ذهب : الو بابا 
عهد: صافا؟
ذهب : مزيان .. ونتوما؟
عهد : مزيان ...ياسين لاباس عليه؟
ذهب : الحمد لله ... خرجنا لبارح تسارينا شوية ورجع عيان نعس دغيا ... داكشي علاش ماقدرش يهضر معاك ... ودابا راه فقاعة السينيما كيتفرج 
عهد : امم .. مزيان ... تهلاي فخوك ... راه كيبغي يجي عندك غير نتي 
ذهب: وي عارفة .. سلم على ماما والدراري 
عهد: مبلغ ... يالاه بسلامة 
قطعات وطاحت للارض مرة اخرى ... عينيها خارجين والدموع كتهبط قطرات متابعة .
ذهب سقراط السن 27 سنة ... من عاءلة معروفة وغنية جدا ... ثروتهم لاتعد ولا تحصى ... هي البنت البكر وهي اقرب وحدة للاب ديالها ... بحكم تزادت فصروف صعيبة ومحضرش ليها وكانت الاولى فأولادو والنور دعينيه ... حبها للعاصمة باريس وسرحها خلاها تاخد قرار وتعيش فيها ... وخوها الصغير ياسين اللي هوا اخر العنقود وتزاد بالغلط والوحيد اللي كيشبه ليها واشقر بحالها تخطف ليلة امس ... والليل كامل وعينيها محلولين كتقلب عليه و واخدة الاحتياطات ديالها باش متخليش عاءلتها تشك . وعارفة ان هاد الفاجعة اللي وقعات حطات ليها رقبتها تحت سيف باها ... والى عرف مغيرحمهاش وغيدوز عليها من الودن للودن ...لانه كان واضع فيها تقة كبيرة عمياء لدرجة مكيختش موراها او يراقبها وكيلبي رغباتها كلها ... وديما كتفضل تنقل بلا رسميات او حراس .. ملات حياة الترف والحراس ديما تابعينها ولفت الانتباه ... لاكن هاد الكارتة اللي طاحت فيها خلاتها تخرج من توبها الابيض وتلبس توب اسود وبسرعة البرق جمعات عندها جميع المجرمين وكونات خلية سرية باش تواجه المافيا المختطفة لخوها الصغير فأقرب وقت ممكن ...قبل مايشك شي فرد من عاءلتها او باها ويجبد اخبارها من تحت الارض وتنزل من المرتبة اللي كان حاطها فيها

امريكا ...

فصفوف متصافة وحدة مور وحدة لرجال اقوياء البنية .. لابسين لباس العسكر و بصوت واحد كيرددو .. وفجهة اخرى جالس كروب كل واحد اش كيدير حيت ماشي نوبتو فالتدريب ... كاين اللي مجمع ضاحك على الوقت وكاين اللي كيدابز مع صاحبو وطلق عضامو وفنفس الوقت كيتجمع ويضارب واللي شافو كيدابز يقو بصح ... هوا شاب طويل ... اسمر اللون واشقر الشعر ... لون عيونو رمادية وابتسامته السخرية جد جدابة .. لابس ديبرادور اسود وسروال العسكر وسبرديلة بيضاء ... فجأة طيح الخصم ديالو للارض ورفع ليه يدو للور و لأعلى وخشاه بين رجليه وهوا واقف 
الشاب : ااااوو... سطووب سطوووب .(ضرب فالارض )
رياض : بسخرية) هه .. نجرب نهرسها .. غتسمع واحد الصوت زوين 
الشاب : لاا ههه سمعت داك الصوت . مقزز 
طلق منو رياض ورجع اللور هز فوطة لاحها على كتفو كيمسح بيها وجخو وفنفس الوقت كيهضرو على الرياضات والحروب الامريكية اللي سبق ليهم خادوها 
الشاب : مكرهتش نتعلم فنون القتال ... ومنهم كسر العضام 
رياض : تعلم ... شكون شدك 
الشاب : المشكل الوقت مكاينش ... يكفي الكراطي 
رياض : سمح ليا .. الكارطي بوحدو مكافيش ... فاش تكون فالحرب وبلا سلاح غتصادف مع الخصم وهوا براسو دارس فنون الكراطي (غمزو) داكشي علاش خاص تكون عندك مجموعة من الفنون القتالية الى بغيت تسلك من وسط ستة ولا سبعة فاش يدورو بيك ... راك عارف ... الحرب يا أما ترجع منها حي ولا تقتل فيها 
جلسو على كراسة كيشربو الماء ويتفرجو فالعسكر قدامهم 
الشاب : لحد الآن مازال مفهمتش علاش نتا هنا ... كلشي عارف الطبقة اللي كتنتمي ليها ومامحتاجش تكون هنا 
قال ببرودة : عاارف ... ولاكن عندي اسباب اللي خلاتني نكون هنا ... ومزيان .. لقيهاا لصالحي فواحد الوقت اللي كنت نقدر نقتل اي واحد ونضرب اي واحد لدرجة نقتلها هي اللي بسببها انا هنا

يتبع

التنقل بين الأجزاء

صفحة القصة
سيتم تشغيل صندوق التعليقات بعد لحظات
معظم التعليقات تم إخفاءها بواسطة الفيسبوك، نحاول بكل الوسائل المتاحة إستعادتها في أقرب وقت ممكن.