عهد: صافي سالات الهضرة ... غتمشي ومتعاوديش تجبديها ليا مرة اخرى ... انا ماعندي بنات ... انا عندي الرجال لاغير
غيثة : ونتا عارف شنو كيديرو ؟ حكرتي غير عليها
عهد: بهدوء) كل واحد فولادي ... غيجيني الرابور ديالو ... التقة مشات ... واللي حصلات عليه شي حاجة مصيرو فهاد الجزيرة ... هنا يبقا ... لا طوموبيلات .. لا شوارع...لا والو .. غير هما والبحر والغابة ... دابا غتمشي ساكتة ماحدي مزال كنهضر بشوية ... غتزيدي تكتري معايا الهضرة ماغايعجبكش الحال لا نتي ولاهما .. وراكي عارفاني ... دابا خليني ساكت .
سكتات كما هوا ساكت .. تنهدات وعارفاه معصب من داكشي اللي كتاشف والى قوات معاه الهضرة تقدر تندم .. تبعاتو ساكتة لليخت وطلعو .. مشات كتبكي ... عينيها لاسقين على الجزيرة واليخت كيبعد ... اما عهد واقف عاطي بضهرو للجزيرة وكيشوف ساهي فالطريق قدامو .
تحت شجرة متكية على ضهرها ... كتبكي بوحدها وتنخصص .. جمعات يديها بجوج ندمانة على الماضي الاسود ديالها ... عرفاتو كتاشف داكشي اللي مانواتش يكتاشفو شي نهار ... الخمر والسهير والخروج والعرا ... كاع داكشي اللي حاول يبعدها منو مشات ليه ... وكانت كطمح لكثر من هادشي .. كانت مطمح تكون مافيا حتى هيا .. حبها لعاد العالم خلاها كتفكر ديما تكون فيوم من الايام مافيوزية تذكر على لسان العالم كامل .. لاكن جا فرمشت عين وقتل ليها احلامها ... حرم عليها كلشي ... نفاها فالجزيرة بوحدها .. غير هي والسماء .. لا تيليفون لا نواصلات لا حتى حاجة .. رجعها للانسان البدائي ... واخا عندها خدم وحشم تما لاكن الملل بغا يقتلها ... ماعندها مادير قدام قوة باها والسلطة ديالو .. وهي بلا بيه ماتسوا والو ... سهات كتخمم ... وتفكر ... دازت اربع ساعات وهي متكية تحت الشجرة .. وفبلاصة اخرى حدا الميناء نازلين حراس من اليخت وشادين اسلام وهوا كيسب ويجدر ليهم من السمطة للتحت .. حطوه حتى هوا وطلعو بلا ميهضرو وخلاوه وقف كيلهت ويسب .. بغا يشير عليهم بالفقصة مالقاش باش .. سلاحو حيدوه ليه وتحماو عليه كاملين باش قدرو ينزعوه منو .. واخا عطب شي وحدين فيهم لاكن فالاخير قدرو يحديوه ليه .. بغا يهز الحجر ومالقاهش هز الرملة لاحها وبدا يشتف معصب تا عيا ومسح على شعرو مغدد ودخل للجزيرة كيضرب هنا وهنا ويجبد فالاغصان باغي يبرد هوايشو ومالقاش فيمن
وهي ناعسة كتسنط لعضامها حسات بشي واحد كقرب من جيهتها .. حلات عينيها وناضت وقفات بشوية تا كيبان ليها إسلام جاي بواحد الكاط وسروال كحل وتيشورط فالخزي عندها كول v وصدرو مزغب .. قد باه فالطول والعرض وكيشبه ليه طبق الاصل .. مطلع حجبانو ومخيب سيفتو .. خرجات ليه دهب قفزانو من بلاصتو ورجع تبتب وخنزر فيها شوية ... يالاه بغا ينقض عليها وهي تنقز هربات وطلعات فواحد الشجرة بالزربة مخلوعة .. الخلعة ومادير .. تكمشات لفوق وبدات كطل عليه
أسلام : هبطي ... هبطي نوريك العياقة ... يا السكارية ... لا دروووكَ هااا
ذهب : ماشي شغلك فيااا ... رياض اللي كايدير لا دروكَ ماشي انااااا
أسلام : هبطي ولا نطلع .. هبطي .
دار رجلو طلع شوية وجرها من رجلها زلقات وزطمات ليه على وجهو اللي هاز فيها بصندالتها وطاحت عليه ... ناضت بالزربة بعدات وخرجات عينيها
ذهب :غتقييسني نقولها لبابا
قبل ماتكمل هضرتها جمع معاها بنص والخش لاسق ليه فضهرو من الطيحة اللي كلا ... عاود ليها بركلة وهي شادة فجنبعا كتبكي وبعد خلاها
ذهب : حكَاااار اهىءاهىءاهىء ... كنت راااجل طن ورييتك ... ولاكن مزال تعرف شكون هي ذهب .
مشا كيهضر : وريييني شطون هي ذهب ... شمكااارة
ناضت كتنفض حوايجها وتمسح خناينها ومشات عكس الاتجاه ديالو .
دخلات لواحد الفيلا كبيرة من الخشب وطلعات كتسب وتعاير فخاطرها .. دخلات للدوش وزدحات الباب .
فنفس المكان ... " الميناء الصغير " ديال الجزيرة فين كيحطو اليخوت والباطوات وحتا الهيليكوبتر ... وقفات هاد الاخيرة ونزل منها سلام ... دفع بعصبية واحد من الحراس وشبع فيه معيور ... طارت الهيليكوبتر وخلاتو واقف داير يديه فجيابو ساخط وكيدور فعينيه ... لابس شورط دجين وتيشورط بيضاء . صدرو مزغب ونفس الشبه بينو وبين اسلام .. طبعا لانهم توأم حقيقي .. توأم حقيقي فكل شيء .. حتى فالشخصية .. لهاذا مكايتفاهموش وما كيتلاقاوش حيت كل واحد منهم راسو قصح من الثاني ... تلفت سارح بعينيه كيشوف راسو اش غيصنع فهاد الجزيرة اللي تنفا فيها حتى هوا ... شار بيدو لواحد من الحراس اللي لابسين لباس العسكر وواقفين فالميناء وجاب ليه الكواض .. طلع عليه و مشا مع جنب البحر الصافي ورمالو البيضاء ...
شاف حوايج مرمين فوق الرملة ووقف الكواض .. نزل مكمش عينيه من الشمش كيقلب بعينيه ومستغرب .. شكون من غيرو يقدر يكون فالجظيرة وبالاخص فهاد الجهة ؟ الجزيرة جاصة بيهم وملك ليهم و واخا عايشين فيها ناس اللي هادمينها هما والاسر ديالهم لاكن بعتد على هاد المنطقة .. وهوا سارح فالبحر بان ليه راس تهز من فوق الماء كيمسح شعرو ... تأكد انه إسلام وشار لي بيدو .. خرج لاخر عندو عريان لابس بوكسر والماء وقف ليه المساءل
إسلام : شكادير هنا؟
مسلم : نتا اللي شكادير هنا؟
اسلام : انا هنا كونجي .
مسلم : حتى انا كونجي!
إسلام : اامممم ... سبحان الله ... ذهب تاهيا كونجي هنا ... شدينا كونجي دقة وحدة
دار يدو على جنبو وبدا يضحك
مسلم : ربع يديه) شنو درتي تا سيفطك لهنا؟
أسلام : ونتا شنو درتي؟
سلام : نتا عارف وانا عارف ... اففففف شنو دابا غنبقاو هنا ؟ على الاقل كان يخلي لينا الريزو نتواصلو بيه
أسلام : منقدرش نبقا هنا ... ومستحيل نكمل كتر من سيمانة واحل فهاد الجزيرة
سلام : وشنو ؟ ناوي تقطع البحر عومان ولاشنو
أسلام : واخا نعرف نصايب فلوكة نمشي فيها ومانبقاش هنا
خرجات من الدوش لابسة بينوار ابيض وكتنشف شعرها وجلسات على طرف الناموسية كتفكر شنو دير ... ناضت لبسات كولون تسود فيست سبور فيها الالوان وسبرديلة وخرجات تمشى شوية فالجزيرة ... مكاين مايدار ... الماكلة والراحة فقط ... وهي غادية كدور قربات من واحد الجهة فيها عرف خشبية بلا سرجام وبلا بيبان ... دازت من حداهم شوية وهي تسمع شي صوت ماشي هوا هاداك .. رجعات خطوة اللور وطلات بشوية من السرجم وهوا يبان ليها إسلام شاد واحد الهندية فالقنت كيبوس فيها ويهضر معاها بشوية .. طلقات ودنيها وطلعات حاجبها .. من وشوشتو ستنتجات انه باغيها تجيب ليه السجاءر و الحشيش .. خرجو عينيها وشدات على فمها .. تأكدات من انه حشايشي مقطر وجالس يكدب ويضحك للبنت باش تبدا تسخر ليه حيت بءمكانها هي تنقل من الجزيرة لبلاصة اخرى وتسخر ليه
رجعات للور ذهب وكملات طريقها سارحة فالغابة ... ماحاملاش تجلس فيها .. زشحال ها تبقا تما .. تاكل وتنعس وتسرح ... بان ليها واحد الكلب ومشات عندو تحنات حداه كتلعب معاه وغادية بيه وسط الغابة
..شوية وهي تخرج ف سلام حاني كيحفر فالارض ويجبد شي زريعة من الجيب وجالس كيغرس فيها ويرشها بغبرة كحلة ... بقات بعيدة عليه كتشوف فيه حتى سالا وناض نفض يديه وهز قرعة دالماء سقى بيها داكشي اللي غرس وعلمها بواحد العود غرسو واقف ومشا .. خلاتو حتى بعد وقربات بشوية للبلاصة فيه كان جالس وخبشات فيها بصبعها كتقلب على شنو عرس .. بانو ليها شي حبات وهزات منهم ورجعات داكشي كما كان ومشات بحالها غادية وكتشوف فيدها مستغربة لداكشي اللي زرع تما وشنو بغا يصنع بيه
رقبة تحت السيف الجزء الرابع
محتوى القصة
التنقل بين الأجزاء