رجعات مستغربة غير بوحدها ... كفاش سلام هنا؟ وعلاش هوا هنا ؟ مافهماتش وكملات طريقها راجعة للفيلا .. دخلات وتكات على واحد السداري سارحة وكتخمم ، حتى لأمتى غتبقا فهاد الجزيرة اللي اصلا طالعة ليها فراسها ... توحشات صحابتها واياماتها ... اشنو دير وهي حتى وسائل التواصل مقطوعة عندهم .. او بالاحرى قدطعها عليهم باهم ، وهي كتخمم دخل عليها اسلام ، اسلام اللي من الشوفة تحسو ما مسوقش للعالم ... بحال الى عايش غير بوخدو وحتى الى بغا يدير شي حاجة ماكيضربش حساب للي كيشوف فيه او اللي جالس حداه ... تكى قدامها ساهي ولاح ففمو واحد الكارو شعلو .. هزات ذهب راسها وقالت
ذهب : منين جبتي داكشي؟! الى عرفك بابا كادير هادشي يصفيها ليك
رد عليها بلا مبالات : اصلا عارف ... كن ماكانش عارف ماغايرمينيش هنا ... ياكبغا يخليني هنا وصافي حتى انا عاااجبني نبقى هنا (نشر يديه ) بيييس اند لوووف ... اللي عندو باب واحد الله يسدو عليه
اسلام : هادا اللي كاين هاهوا قسمتو معاك .. سير قلب عليه المرة الجايا ماتجيش طلب مني
سلام : ونتا منين جاك؟
أسلام : اللي كيقلب كيلقى ... وا تحرك تا نتا
ناض طلع لفوق وسلام بقا جالس فبلاصتو كيشوف تا هوا المخرج اللي يخرجو . . . حارو ماعرفو ما يديرو .. واش يصنعو فلوكة يحركو فيها ولا يستوردو السيارات والبنات و المامنوعات للجزيرة .. وكفاش يقدرو يدخلو داكشي و باهم داير حراسة مشددة . وحلة وحلو فيها .. 3 ايام وهما على نفس الحال .. كل واحد ساهي بوحدو ، ذهب كتقيل سارحة برجليها كل مرة فين وأسلام غادي جاي كيقلب على حل راسو .. اما سلام قطع الياس وعارف مغايخرج من ديك الجزيرة الا الا اذن ليه باه .. لهاذا قرر يدير فيها شي حاجة يستنفع منها .. هادشي علاش نهار ومطال وهوا حاضي زريعتو امتى تنبت .
فجهة اخرى من الجزيرة غادي إسلام على الكواض داخل للسوق اللي دايرين سكان الجزيرة ... اللي منهم عاءلات الحراس اللي حارسينها والفلاحين وبزاف ديال الناس .. عندهم اكواخ صغيرة فوق الرمال البيضاء وعايشين عيشة اخرى مختالفة ... غير البحر والصيد و الاكواخ الخشبية والطبيعة والفواكه .. وحتى اكسيسواراتهم مصنوعة من الورد ولباسهم واسع بألوان فاتحة ... الجزيرة بيهم بحال شي لوحدة فنية جميلة ، حط إسلام الكواض وتم غادي بواحد الشورط قصير وكلاكيطة وتيشورط بيضاء كيقلب على نفس البنت اللي قنت المرة الفايتة .. واللي هي نفصها ضبرات ليه فكارو ... غادي كايتسارى فسوق عامر خضرة وفواكه وسط الطبيعة .. حتى واحد ماعارفو شكون لان ديك الساكنة بعيدة على المنطقة اللي كيجيو ليها اصحاب الجزيرة .. شاف عالم اخر .. عالم بسيط كولو الوان وحياة ودراري صغار عريانين كيجريو حفيانين مغطية عوراتهم بدائرة من الورد وعلى عنقهم اكليل الورد وكيلعبو وينقزو .. بشرتهم سمراء ونساءهم مزينين بالورد ولباسهم بحال الغجر .. بقا كيدور من هنا ومن هنا حتى وصل للشاطئ فين كيعومو البنات ووقف كيسرح عينيه ... كانو عريانين من الصدر ولابسين غير سليبات .. وبحكم الحياة اللي عايشينها على البحر خدات بشرتهم لزن برونز راءع ... ماستغربش للعرى ديالهم ... كان همو فقط يلقا البنت اللي كيقلب عليها .. وهمو الوحيد ينشط المزاج اللي معكر وبلا الخشيش ديالو مايقدرش يصبر للحياة اللي تحكم عليها يعيشها فالجزيرة بزز منو ... دار يدو على جنبو وتنهد وكمل طريقو كيدور .. فجاة خرجات فيه بينت طويلة شعرها حرير اسود كالليل وبشرة سمراء وعيون زرقاء بحال لون البحر ... آية في الجمال ... طويلة ومتناسقة وصدرها مهزوز لابسة صاية بيضاء وسوتيان من الفوق فالازرق مزين بورود طبيعية ملسقاها عليهم وعلى راسها تاج من الورد وغادية زربانة ... تزادحات معاه بالكتف ومنلات طريقها ماتسوقات وهوا يدور عندها معصب
الشيلا هي البلاصة الخاصة بيهم وفين جالسين ومكيوصل ليها حتى واحد من غير اللي خدامين فديك المنطقة واللي كيتمناو سكان الجزيرة يقربو منها ويدخلو ليها.
البنت مافهمات والو ... بقات غير كتشوف فيه وهي تهز يدها عيطات لوحدة من صحابتها تمات جايا عندها كتجري تا هيا عريانة .. ومن موراه تجمعو عليه البنات كيضحكو ويهضرو بيناتهم
قالها وهوا كيضور فعينيه ويقلب ... عيا يدور وكيسمع فالناس كيهضرو مع بعضياتهم وهوا مافاهم والو ... رجع ادراجه منين جا ودخل مع السوق ... سوق نقي وختلقين فيه السعادة .. كايبيعو فيه البنات الديسير والعاصير بالسوتيان والصايات والورد على راسهم ... وهوا غادي حط يدو على حلقو وتكا على واحد الطبلة خشبية بيدو شحفان .. السهد والحرارة والنسمة دالبحر كدير الجوع .. قلب عينيه جيهتو يدو وهوا يبان ليه الديسير مقطع اشكال وانواع ومحطوط فالجناب فواكه تشهاها النفس ... هز راسو قاءلا
أسلام : شي كاس د ..
جمع فمو مباشرة من بعد ماشاف نفس البنت اللي دخلات فيه واقفة فالطبلة ومعبسة ... اه معبسة حيت متكي ليها على طبلتها .. وعلاش يتكا عليها ؟... جمع فمو و عقد حجبانو
أسلام : بابا ميمي خاخا ... نانا ... زيدي نانا تا هي .. ياربي تفهمي هاد التخرميزة باش كتهضرو وتعطيني شي كاس نشرب
ابتاسمات ليه وهبطات راسها حشمانة ... ابتسامة اكثر من جذابة خلاتو حتى هوا يضحك ليها بدون شعور .. هزات يديها شيرات كتعيط
البنت : ناانااا نااانا ...
تلفت يشوف لمن كتعيط وهوا يشوف راجل اسمر كبير عينيه زورق عندو شطيطبة ديال اللحية تحت فمو طويلة ولابس سروال واسع ابيض وديباردور واسع وداير طربوش ديال الدوم على راسو ... بقا إسلام غير واقف كايشوف ويسمع ليعا كتهضر فرحانة
البنت : نااناا بيبي اااا مممي كاكوو
بالفرحة مد الراجل يدو كيسلم على إسلام اللي مستعرب مافاهم حتى حاجة ... بقا الراجل كيتمتك بالحروف ويدير ليه الطريق يدوز .. مشا معاه اسلام بابتسامة واخا مافاهم والو .. لاكن الفرحة ديال الراجل خلاتو يبتاسم ... دخلو لواحد الكوخ على البحر فيه ناموسية وحداه طبلة وفجذرانو الخشبية معلقين ماعن .. وحدا الكوخ كراسة وجلسة وطبلة وزعلولة فواحد الشجرة قريبة حداهم .. واضحة انهم مسكن داك الراجل ... تلفت شاف حتى البنت معاهم ... جلسو على واحد الكرسي طويل من الخشب وبقا الراجل كيتمتم .. في حين مشات البنت كتجري جابت مها اللي بدورها كضحك وفرحانة ولابسة تا هيا كسوة طويلة .. وطويلة بحال بنتها وسمراء وجعرها مدفور طويل ، جلسو معاهم كيهضرو بيناتهم وفرحانين والبنت واقفة حدة الزعلولة وشادة فيها .. خدودها توردو وحشمانة غير بوحدها ... اسلام كيشوف فيها ويبتاسم ويرجع يشوف فواليديها ... شدو ليه باها يدو وعيط ليها تاهيا شد ليها يدها وشركها مع يدو .. هنا اسلام جمع الضحكة وشاف فالبنت اللي كتأمل ملامحو وفعينيها براءة وسعادة لا توصف ... ماجا فين يدور حتى كان الاب لبس ليهم خيط من الورد وجمعهم بجوج ، من بعد جمع يديه بحال الى كيدعي ... عقد اسلام حجبانو وجمع يديه بالزربة وناض نتر داك الورد ووقف كيهضر بعصبية مع البنت
اسلام : بابا ميمي خاخا .. و نانا تاهي عندكم هي الزواج !!!! من نيتك ابنت العبد
خرج كاعي من الكوخ خلاهم مضهشرين مافاهمين والو .. البنت وقفات متبعاه بعينيها والدنوع محجرين ... بغات مها تشد فيه بحزن وهي تنتر يدها وخرجات خاطة يدها على عينها كتبكي وكتجري بين النخل غادية مع الشاطىء وشعرها كيتناتر موراها .
فطريق اسلام تصادف مع ذهب جاي كتجر رجليها وتسارا وغاديا وتقرب من الفيلاج الصغير ديال الجزيرة فين مجموعين الأسر والسكان .. وقف عليها معبس وقال
إسلام : فين غادا ؟
ذهب : كندور .. دور غير نتا ؟
إسلام : مهم ... راه كيهضرو بلغة فشكل ... بابا ميمي خاخا نانا عندهم كتعني الزواج ... عنداك تمشي تجبدي هاد الجملة هانا علمتك
طلعات حاجبها و بقات متبعة ليه العين وهوا غادي كايتمايل بدوك الكتاف . كملات ذهب طريقها وغاية وكدفر شعرها للجنب حتى دخلات للقرية ... استعجبات للحياة اللي عايشينها تما والعالم الي عايشين فيهم .. بحال الى اسرة وحدة ... كييتعاونو مع بعضياتهم وناشطين .. دخلات معاهم حتى هيا كضحك عاجبها الحال .. مشات عند وحدة كدخل الورد فالخيط و عطاتها واحد دارتو على عنقها وجلسات دور من قنت لقنت .. واها مافاهماش هضرتهم وهما مافاهمينش هضرتها لاكن الابتسامة كانت كتشرح كلشي ... سرحات رجليها حتى وصلات للبحر وبقات كتفرج فالبنات كينقزو ضاحكين ناشطين ... زادت مع الشاطىء كتسرى شوية وهي تسمع صوت بكاء حدا واحد النخلة .. دورات وجها ومشات فجيهت الصوت كتقلب حتى كتبان ليها البنت صاحبة العيون الزرقاء جالسة جامعة رجليها ومهبطة راسها .. شعرها مغطي ضهرها العاري ونازل قدامها ... قربات منها ذهب باغا تستكشف الامر وحطات يدها على كتفها برفق .. هزات البنت راسها والدموع نازلين على وجها وكتهضر بحال الى كتعرف ذهب .. لاكن القلب طايب وكانت باغا تشكي علامن ما كان
وقفات البنت كتشهق وتمسح عينيها بيدها وتبكي وتهضر وكتشير بيديها لراسها والتاج المورد اللي على راسها .. دارت ليها اشارات كنيرة لاكن ذهب مقدراتش تفهم .. والبنت فهمات اشارتها ... تحنات على الرملة وهزات قصبة كتبكي .. رسمات ليها عروسة وعريس مشادين اليدين وفرقات بيناتهم بزيكزاك وقلب مهرس ... هنا فهمات ذهب كلام البنت وتأسفات ليها وبقات فيها ... عنقاتها وجلسات تسكت فيها والأخيرة كتبكي بغات تسطى بالبكى .. بقات جالسة حداها حتى سكتات شوية ودارت ليها اشارة شعاع مع ابتاسمة وكتهضر
ذهب : انا ذهب ... ذهب ... سميتي ذهب
بصعوبة فهمات البنت وقالت
البنت : نينا .... ااا ني ... نينا
ذهب : اااااه ..ههه نينا ! نينا
حركات ليها نينا راسها بالايجاب وقالت
نينا : نينا 😄
ذهب : شارت بيدها ) ... ذذهب ... نينا .اوك .. ذهب نينا
نينا : دهب ... نينا اوك
ذهب : هههه (حركات راسها بالنفي ) لالا .. ماشي اوك ..... لا....ذهب نينا ... نينا ذهب
حركات نينا راسها وبصعوبة قدرو يتفاهمو وعلى الاقل يعرفو اسماء بعض ... جلسو بالاشارات مقاتلين شي كيفهموه وشي مكايفهموهش ... فكرات ذهب انها تقرب من نينا .. خصوصا انها دخلات ليها لخاطرها وبغات اللي يتوانس معاها وماتبقاش مقطوعة بوحدها .. شدات قصبة رسمات بنت وحداها بنت اخرى وبدات توريها
ذهب : نينا .... ذهب
حركات نينا راسها بالايجاب وبدات ذهب ترسم فدار كبيرة وطريق وكشير لنينا باش تمشي معاها .. فهمات هاد الاخيرة بمشقة النفس وبدات عليها بالحروف والرسوم لاكن ماقدراتش ذهب تفهمها .. فالاهير ناضت نينا وجرات معاها ذهب وداتها للكوخ ديالهم ... كان حدا الكوخ صياد جايب الحوت لابس شورط ولونو اسمر برونز وكيفرق الحوت هوا وباها . مشات عندو نينا وقفات عليها فرحانة وبدات تهضر معاه بينما ذهب واقفة كتشوف فيهم .. عاد فهمات ان نينا كان خاصها تشاور واليديها وكتشير ليهم لجيهت ذهب وفرحانة . شوية بدا الاب بخال الى بغا يتعصب وماقابلش انها تمشي .. لاحضات ذهب ردة فعلو وتدخلات كتهضر ودير اشارات .. حتى واحد مافهم لأخر شنو بغا يقول حتى تدخل الصياد وقال وهوا كيقلع الحروف بلغة ذهب
الصياد : قال ليك مامكنش تمشي حيت يالاه تزوجات ... وماشي من عادتهم الزوجة تمشي لشي بلاصة حتى يدوز النهار اللي تزوجات فيه
ذهب : اااه . . . قوليه انا بوحدي هنا .. وبغيتها تمشي معايا ل الشيلا .. تما كاينة انا
طرجم الصياد كلامها لاب نينا ورجع طرجم ليها مرة اخرى
الصياد: مايمكنش ... قال ممنوع .. حتى لغدا عاد تقدر تمشي
رقبة تحت السيف الجزء الخامس
محتوى القصة
التنقل بين الأجزاء