المصخوط الجزء 30

دري مقدرتش نخليه بلاما نصحو كاع دوزنا ديك لبلية فهمتيني كتكون خفة ليد وحب الإستكشاف والمطالعة تا كطيح على ثغرة لمهم لبرهوش زاد فيه لبصمات ديال يدو تمسحو غيلقا مشكييييل فاش غادي يبغي يصايب لكارط دبا هدا را مبقاش دايز لشهادة ولمشكل لأكبر مجونب من نهار لمعلوم مسخوط هو سباب والديه كان طالع معاهم مجونب بسيف ميديرو كسيدة أخويا راه كتعيط على نحس جريتو لواحد لقهوة برى مبغاش فلول ولكن معامن هو فيه فقييييه كنت كنتسنى إمتى يولي عندي ولد وندوي معاه فهادشي ولكن ها لله جابلي يتيم نتعلم فيه(يتعلمو لحسانة فراس ليتيم) لمهم لحت ليه واحد (100GB) ديال لخبرة لي كتاسبتها والله باه مكان غادي يشرح ليه وينصحو كيف درت معاه أنا رجعتو لدار يلاه سير لبيتك وتفرق على صابونة راه كنبغيو نغسلو بيها وجاهنا صباح.. بقى تيضحك ودخل لبيتو يقاد حوايجو فعلا قاد على لمسؤولية هانا تنربي لجيل لماجي أحسن تربية.. تندور فدار لفراش ناااضي ودار كتر منو منعرف داك ساط كيفاش سخات عليه بداك ثمن وخا يعرف يهز كريدي من لبنك ولا من عند بنادم غي ميعطيهاش بهاد ثمن.. بارك وهيا تجي حدايا لخويلة بدات داويا معايا تاني فداك لموضوع لي محاملش ندوي فيه ديال واش معاجباكش هاد زواجة وعلاش كتسول فيا علاش بحالا معارفاش نقدر نبقى داوي ليها بلخيب على ديك لعائلة وداك بنادم تال غدا ولكن أنا شنو ليا مرابح والو كي يتزوجو ولا يتطلقو و وخا نعيا مندوي غادي دير غير لي فراسها راه مسكيات بمغرفة وحدا قولها شمال مصالحش سيري يمين ونقطع يدي إلا ممشاتش فطريق لي قلتي ليها متمشيش فيه.. لمهم بدلت معاها لموضوع لبلان ديال لخوادرية لي مربينها موافقين و مها لي ولدتها قالت ليا صافي فين هو لمشكل راه غادي تاخد لحضانة غير بضحك لقاضي كيشوف لبنت فين غادي تعيش مزيان ومع نتا ختك صافي هاد سيمانة نقادليك كلشي غير متنساش هاد لوقفات لي كنوقف معاك راه راجل ميديرهمش معاك تانتا نهار نحتاجك كون راجل.. أول مرة تقوليا بحال ديك لهضرة ديال نهار نحتاجك وكدا حتى هيا عارفا هاد لعرس مغاديش يكمل وغادي يكونو فيه لمشاكل معرفتش علاش مكملا فيه زعما يكون تيخلعها هيا ماشي من داك نوع لي تيخاف سيدة حياتها غير محاكم وحباسات وأصلا ميزعمش مورا ديك تصرفيقة لي خدا ومورا ما وقع ليا مع دوك دراري لي صيفطو موحال زعما واش يعاودو يفكرو يخدمو لعنف معانا لمهم تانا مزربانش تا حاجة مكتبقى مخبيا كلشي كيبان.. لمهم كنقادو فلوراق ديال ديك لبرهوشة كنحلق ليها على لبيت راه معمرها غادي تعاود حياتي كلها مدوزها بوحدي تا طلعات من جنب من حيث لا أدري سو معزتها بوحدها وأصلا لبرهوشة كتدخل لقلب وكتبقى فيا لواليد لي كان يقدر يتهلا فيها مات مها مكرهاتش ليها ولكن متقدرش تخليها معاها وتا سيدة لي رباتها يلاه يلاه مقاتلا مع زمان هيا وراجلها كنت مكالي عليهم غير أنا شويا وتنتفكرها مرة مرة ولكن دبا فاش أتكون معانا مغاديش ننساها.. لغد ليه مشيت مع لخويلة تورينا أشمن وراق غنجمعو أنا و آية ولبرهوش ديال خوها مشا لترويض وغادي يرجع لدار أنا عارفو أيلقا دار خاويا غادي ينوضها فساد هو وديك سميتو عليها لله عطاها أكبر إختبار فاش عطاها ليه وغادي تشهد عليه يوم القيامة(أيييه تا نتا نعاماس أه نتا را غادي تشهد عليك يدك لي شاد بيها تيليفون دبا.. موحال واش غادي تسالي من تعاويد داك نهار هيا لي غادي تحطك فوق شواية) لمهم قضينا لغرض قبل لغدا وصلت ديك بنت ناس لعند واحد لكوافورة وأخيرا دموع كانو غادين ينزلو فاش قالت ليا ديني لعندها داك شعر من نهار نعقل عليه وهو مضفور تقول مجربين فيح سحور.. لمهم ديت لداك ولد ناس باش يتغدا لقيتو عند لباب فبينوار ديال لحمام خلعني تمالك أويلي قاليا خويا ديك دار فيها شي حاجة.. أنا تنجر وهو تيجر وملابس والو خفت غير يولي طايح ليه لبينوار مشوهنا فدرب مع دوك لكيليميني وناس زوينين طلعتو غير بزز قلت ليه مالك؟ قالي أنعاودلك من لول رجعت بزربا من لحصة ديال ترويض باغي نحفظ شويا.. حبس حبس أش غادي تحفظ ياك نتا هاد لعام راحة وكتحفظ عريان؟؟ وااا خليني نكمل ليك دخلت لدار سديت لباب من لداخل ريحت شويا قدام تلفازا وأنا ندخل لحمام بارك وأنا نسمع دقان.. هههه ولا بلاتي بلاتي بشويا بشويا تعريتي ودخلتي لحمام زعما دوش ولكن كتباليا ناشف ولحمام ناشف وقلتي بارك يعني بارك فلحمام عريان هاا سير معايا على قد لمعطيات وعلى قد عقلي قوليا ريما رجعات لعادتها لقديمة هيا شيخة عمرها تنسا هزت لوسط لحجرة تدوب وهاديك* عمرها توب.. وصافي خليني نكمل ليك أصاحبي بروجولا, تنسمع دقان وفلباب ديال لحمام ماشي لي برى أنا يحسابلي تا نتوما رجعتو بزربا لحت عليا هاد شرويطة وخرجت درت دار كلها ملقيت تا واحد وتا لباب مزال مسدود أنا تخلعت و وخا هكداك قصحت قلبي راه عايشين معاك رجال دخلت لبيتي واحد 20 دقيقة تاني تنسمع دقان فلباب تاني خرجت تنجري هاد لمرة أول حاجة شفتها لباب لكبير لقيتو مسدود شراجم راه فيهم حديد دار كاملا تساريتها من لتحت لفوق تا من سطح شوف هاد دار فيها شي حاجة أخويا يلاه نرجعو لدارنا لله يخلي ليك لي عزيز عليك.. وسمح ليا تاني عشرين دقيقة ونتا فلبيت وملبستيش حوايجك واش نتا م*مول ولا غير بغيتي تكمل حياتك مشلول جنون و ولاو خايفين عليك راه مكينش لي يبغيك دير ليه هادشي فدارو راه تشكى منك لخولية ولا لخوادرية فاش تجي بربي تا ندفن ولدي هنا ونتا عارفني قاد نديرها سير لبس حوايجك وسد عليك فبيتك نشوفو واش غادين يدقو عليك ولا لا.. منيتو دخل تيجري لا حول ولا قوة إلا بالله جيل غادي يطلع فاشل هادو هوما لبوليس والمهندسين والأطباء لي معولين عليهم يهزو لبلاد بقيت غير شاد فيه كنتفكر شي نويطة تنلوحها ليه وهو يصوني تيليفوني داك لولد لي مقابل لمحل لي حليت ديك لهضرة ديال ديما سلام سلام قاليا شي فلوس عندي هنا خاص تدوز تاخدهم وبغيت ندوي معاك ليوم ضروري إلا جات على خاطرك..

يتبع