المصخوط الجزء 37 و الأخير

بارك أنا ولخويلة و آية كنتسناو داك لكوميسير يجي وحاااقد محاملش لحوايج لي فوق لحمي غادي نرجع لحبس تاني.. جا خونا تبدل ديال بصح كبر سلمت عليه قلت ليه لمدام و خالتي راك ديجا عارفها قاليا أاه اجي دخل معايا بغيت ندوي معاك بوحدنا.. لخويلة بقات لا لمحامية ديالو آا قلت ليها بقاي هنا ودخلت معاه لداك لبيرو بدا كيسول فيا كيداير فاش خدام.. تنجاوبو وخا معنديش لخاطر.. قاليا لمهم عيطتليك تجي لعندي باش إلا كانت شي حاجة نفكوها قبل ما تكبر لقصة سيد لي سولتك عليه غابر قبل ما تولي نتا توقف على رجليك واقيلا ملقينا عليه تا أتر تا جابلنا واحد سيد بزطامو هاد ليوماين وكيقول بلي لقاه حدا دارك وفاش سولنا لقيناه كان تيعرف لواليدة ديالك وماشي غير كيعرفها لمهم لبزطام مكانش حدا لعتبة ديال دار من ديك لوقت شي واحد جبدو عيطتلك باش نسولك شنو كتعرف على هادشي حيت ليوم غادي نخرجو نقلبو دار ولأرض لي ضايرا بيها باك معندك تا دخل بهادشي حيت إلا كنتي شفتيه غير فين كين ورجعتيه راه لابدة متكون خليتي شي حاجة وراك بصمات ولا شعر راه غادي تكون شريتي لراسك صداع وشي سنين فلحبس فابور اللهم قوليا شنو كين دبا محد لقدية مزال فيديا.. لا مفخباري والو وحق الله. كنبغي نكدب كنبدا نحلف لمهم رتاحيت دار مفيها والو وحتى لأرض لي ضايرا بيها وأصلا دوك ولاد ناس عمروها تراب وحجر و وخا يمشيو لديك لمقبرة لي حولتو ليها راه وسط لمقبرة ومستحيل يبقاو يقلبو فيهم خرجت مرتاح شويا رجعنا لدار قاليا بلي غادي يلحقو علينا لدار لمهم رجعنا لدار كنتسناو و كتسول فيا شنو قاليك شنو قلتي ليه؟ قلت ليها لي قرصو لحنش يولي يخاف من لحبل معمري نعاود نقوليك شي حاجة خليك بعيييدة على لمشاكل ديالي أنا قاد بيهم.. قمعة متبغيهاش لعدوك ولكن تا هيا تستاهل لمهم بقينا باركين تنقلب دار شبر شبر لا تكون شي حاجة مشفتهاش وهوما يوصلو وجايبين معاهم طراكس دخلو لدار قلبوها مزيااان رخام ولحيوط كيبقاو يضربو فيهم تقول غادي يطلعو لكنز لمهم خوتنا ملقاو والو فدار خرجو لبرى طراكس كتنقي ليهم وهوما كيقلبو لأرض ب بحال ديك لعيبة لي كانت عندي و واحد لقضبان ديال لحدي تيضربو فالأرض كنت باغي نقوليهم غير كتعدبو ريوسكم راه مغادي تلقاو والو ولكن غادين يشكو فيا اللهم سكات عياو ما يقلبو داك نهار رونو ديك لبلاصة وبنادم تجمع كيتسناهم يطلعو لكنز.. ولكن مزيان قادو واحد طريق تال دار, ملقاو والو مشاو تحركنا تا حنا لدار آية معايا ولخويلة سابقانا وداوين فيها كنقوليها فاش نسافر نتي مولات لعقل فدار هانتي كتشوفي دماغها شنو كيقوليها و إلا جا داك خونا لدار تاني راه منوصيكش وخا موحال يعاود يطل فدرب لي ساكن فيه أنا.. لمهم وصلت عيطت على عماد نقوليه بلي فكيت لمشكل ونقدرو نخرجو من غدا قاليا صافي أنا جاي لعندك وبصح غير واحد شويا وهو يجي لدار عاودت ليه لبلان لي وقع وشنو دارو قاليا صافي معليكش معندك مناش تخاف غدا غادي نتحركو مع ديك ل10 صافي درنا وقيتا حوايجي مجموعين غير تزادني نهار مع دار كنمشي عند داك لبرهوش كنقوليه نتا راجل ديال دار نتا لي معول علك كندور عند ختي لا نتي لحمي ودمي ومعول عليها فهاد دار, لخالة ديال لعديان نتي لكبيرة داك داكشي ديال لمراهقة حيديه وخا غير تا نرجع حيت لمرة جايا والله ما نعاود ندوي معاك, كندور لديك بنت ناس كون مكنتيش نتي فدار منقدرش نخرج منها عارف راسي مخلي رجال ورايا انرجع وغادي نسافر غي أنا ونتي ولكن حضي غيبتي كيف كيقولو بزاااف ديال لحب فهضرة حرشة إنما الحب أمم ان راحت الأمم حب ما بقيت☺ لمهم لغد ليه يلاه فقت مع ديك 8 فطرت وتأكدت من صويك ديالي مفيه والو وهو يوقف عليا خونا خرجت لعندو مبغاش يخلينا ندوي طوموبيل قالك باش نحسو بالطريق وكدا بقا طالقها عليا درت صاكي فكتافي(فكرني فشي ديسك؟) شدينا طريق وداوين كيعاود ليا شي حاجة ومتيكملهاش كيقوليا تال من بعد وصلنا للمحطة ركبنا فلكار لي غادي يخرج ديك ساعة معارفين تا فين غادي طريق كلها مزيكا وحتيت مرة بايتين فوطيل مرة عند شي ناس ساط من مدينة لمدينة مرة مرة تنعيط على دار نسولهم واش كين شي مشكل شي واحد من ديك لعائلة طل عليهم واالو حتى لخويلة مبقاتش شافت شي واحد فيهم من نهار تطلقات هيا وخونا.. لمهم ضربنا ديك 13 يوم خونا مزااال باغي يسركل أنا توحشت دار وفراشي أنا راه إنسان مكيخونش لمخدة ديالو مكيدينش نعاس إلا وراسي فوقها تا خرجت وندمت علاااش مهزيتهاش معايا لمهم ولد ناس كنت عارفو علاام وفشكل ولكن زاد عز عليا مورا دوك ليام لي دوزنا ساط مخلانيش نخلص ريال أنا كنحلف وهو كيحلف من غير شي لعيبات خديتهم لدار وليا لمهم بلادنا زينة غا حنا مجموعين فلبلايص لي فيهم لخدمة(مخلصاني وزارة سياحة) لمهم كملنا ديك 28 يوم بدينا كنوجدو باش نرجعو لدار نقدر نقول أقود شهر غندوز فحياتي أنا كنقول ليه امتى غادين نعاودوها خاصها تعاود قاليا لعام جاي فبحال ديك لوقيتة راجعين لدار قربنا نوصلو وهو يقوليا ديجا قلت ليه بلي كان كيحساب ليا بلي غادي نخرج انلقاك مزوج بالخوادية ولا خاطبها.. أه ديجا قلتيها ليا ولكن منقدرش نغدرك ختك بحال ختي.. والله إلا كنت انفرح ليكم ومن هضرتها باينا كتعجبها.. ساط طاح من عيني نغزة زعما أوبن مايند ولا منعرف ديك ختو اتبقى تحكني عليها يدي لبقية لحياة ديالي زكلتها على بونة ندمت أشد ندم ولكن هانية جبنا رجااال ب 1000 من ديك ختو.. وصلت لدار تندق وهيا تحل ليا ديك بنت ناس ناس كتعنق هيا كتشنق تراه رجليا مبقاوش كيقيصو لأرض مع لعلم أنا طويل بعض لمرات كتخلعني لواحد هو لي يخاف على شرفو إلا الشرف.. لمهم كلشي كيما خليتو لقيتو ختي غاديا مزيان مع لمدرسة داك ولد ناس تصاحب معايا عنوووب فدار وأنا مفخباريش مقالهاش ليا غا لقيتو داير تصويرتها فلفون ديكرو دراري تيكبرو بزربا💔 تانا شي نهار نلقا تصاور لبرهوشة فتيليفون شي واحد وكيقوليا نموت على ودك نارييي يا ربي نموت قبل من داك نهار أنا بغيتها تبقى غا صغيرة لمهم تا لخويلة دارت عقلها صراحة تانا لعبت دور كبير بقيت غير كندور وكنهدد والله ونشوفك مع داك بنادم تاني تا نرجع عليه لحبس ومتعاوديش تشوفي وجهي وصافي مبقيناش شفناهم ولا سمعنا منهم شي لعبة من نهار دويت مع خوه وقلت ليه ها ودنب منك حدااااري.. عرفتي فاش قاليا عماد بلي ختو تخطبات تراه كنت أنبكي بقى فيا لحال ولبنت كانت عينها فيا أاودي قدر الله وما شاء فعل لمهم خوها بيخير معايا ولات بيناتنا خدمة سو ديما ملاقين وغا كندور ونتفرج ف(the shawshank redemption) كنتفكر يامات لحبس.. مرة فشهر كندي ختي لمها تشوفها وكنضرب طليلة فدار تا أنا كنتفكر كي كانت يامات لواليد بحال جنة دبا ولات زبالا ضايرا بيها كنتخايل يرجع ويلقاني داير ديك لحالة بدون تفكير غادي يزيدني مع ضحايا لي قبل مني ولكن دبصح وخا منعرف شحال نزيد نعيش راه معمري غادي نتيق بلي دار داكشي وخا كيتعصب ولكن باش يقتل موحال وتاني كما قلت ليكم فلبدية ميمكنش تعرف بنادم شنو مخبي عليك ولا علك ولا كيف داير هو حيت ببساطة بنادم تيبغي يخلي عندك ديك صورة زوينة حتى من والديك معارفهمش كيف دايرين عارف عليهم غير داكشي لي باغينك نتا تعرفو هادو غير والديك لي يحيدوها من لحمهم ويعطوك وتخايل معايا داك بنادم لي كتقول عليهم عشراني وصحابي لمهم منطولش عليكم خوتي نشوفكم من بعد 😉❤