قدري أن أحبك الجزء 18 (الفصل الثاني)

هاد الفصل لي غايهزنا لفصل جديد من حياة الابطال مع شخصيات جداد مع صراعات جداد احدات جديدة طبعا ماتخافوش غاتبقا الكوميديا حاضرة بقوة ...

الافيش و العنوان غايقدرو يعطيوكم فكرة على الفصل التاني و شنو فيه .. نتمنا تبقا هاد الوتيرة ديال التجاوب ديالكم على نفس الحال حيت مزااال مشواارنا طويل ... ❤❤

بعد مرور 4 اسابيع من الحادتة ...

جهينة دخلات في فترة اكتئاب و لكن مامنعاتهاش من مزاولتها لانشطتها الروتينية .. ماعاودت والو لايناس و عتمان من غير انها تفارقت معاه و صافي ... حيت كانو مضاربين مع عرسهم لي داز عليه دابا 3 اسابيع ... و تاهي مابينات ليهم والو باش ماتبرزطهومش .. صلحات سيارتها و رجعات لحياتها العادية الفارغة كيف كانت قبل مايدخل ليها ايرتان و الدراري ... توحشاتو بزااف ... غاتكدب الى قالت بلي مابقاش فيها الحال حيت مابقاش رجع هضر معاها و لا حتى طل عليها .. و لا الدراري حتى هما ... و ترجع تقول مزياان حيت اصلا ماكانتش غاتسامحهم و تنسى لي دارو ... صافي ايرتان و الدراري صفحة و طواتها ... اي حاجة كاتعلق بيهم لاحتها بقاو الذكرايات لي صعيب تخلص منهم هما لي باقين كايرجعو ليها و يرجعو معاهم الحنين لايرتان و جماعة الدراري ...

اليوم السبت ..1 النهار ... صابحة ناعسة فبيتها المظلم بحال تعابيرها ... مخشية هي و كلابها فالسرير ... و لا فاقت من شحاال و لكن حيت ماعندهاش الشهية باش تاكل و عجزانة تجمع الدار لي مرونة ... بقات ملازمة سريرها ... جرات كلابها لعندها كتلعب معاهم لي بداو يكربرو شوية ...

جهينة : بومبا ديالي ... كايحغر عليك تيمون القبييح ياااك .. اه ... انتوما الحاجة الزوينة الوحيييدة لي طلعت ليا فديك العلاقة الفاشلة ... مالكم كاتشوفو فيا هكاك .. انا كانقول غير الصراحة .. ماكانكدبش ... انا ماتوحشتوش و ماتوحشتش ريحتو و عناقو و كلامو ... مااتوحشتش ماكلتو ... *كاتبكي* انا كانكرهو من الاعماااق ديال قلبي .. حيت هو راجل كامزيااانش و كذاااب و اخيب حاجة هي كااايقتل ... هو مجرم قتااال .. مزياان منيين خرجتو من حياتو هو وصحاابو .. انا دابا مرتاااحة و مامحتاجاهش ... ياكو .. غانعيشو ب3 حتى نكبرو و نشرفوو .. غير مع بعضياتنا .. يااك ..

*تيليفون كايصووني حتى قفزها *

جهينة : اوووف هاهي غاتبقا تصدعني تاني ...*جاوبت * آلووو

ايناس ؛ باقية مخشية فداك السرير ..

جهينة : اش بغيتيني نوض ندير .. متلا ..

ايناس: اليوم عتمان خرجات ليه خدمة من الجنب .. و بقيت غير بوحدي فالدار آجي ونسيني و تغداااي معااايا دايرة واااحد مووولاتي بسطيلة بالحووت تاكلي يديك وراها ..

جهينة : مافيااش غير...

قاطعاتها كاتغوت : غاااتنوووضي تهززيييي ترمتك من تماااا و غاتلبسي حواااايجك و غاتخوووورجي من الداااااار و غااتجي عندي و تجيبي كلابك نشير بيهم من الشرجم .. نصف ساااعة وتكونيي عندي .. يااااله ..

قطعات عليها ...

جهينة جيدات تيلي من ودنها و حطاتو قدام عينيها كاتشوف و كاتغبن : حتى هو كااان كايعايرني بترمتي 😭😭 و كايغوت عليااا بحااال هكاااا ... عمري ما غانسااااه 😭😭

ناضت كاتبكي للحمام تدوش و تلبس ... وجدات راسها باست كلابها و خرجات ...

هبطات مخشية فقبيتها و دايرة القب ... ركبات سيارتها.. و دييمااارااات .. حتى وقفات فالاقامة ديالها و طلعات .. صونات و دخلات نيشان ..

جهينة : انا راه طلعتي ليل فصحتي .. يسحابلي غير غاتديرو العرس غانتهنا من كمامركم .. الساعة وااالو لا هروووب ...

ايناس سدات الباب و جات عنقاتها : لي جااات من عند دبدوبتي مرحبا بييها ..

جهينة : ماااتقوليييش ليا ديك الكلمة 😠

ايناس : مانقوولهاش يالالا غيير بردي ... اجي عنقيني اجي ..

جهينة : بعدي مني راه غانبدا نبكي ..

ايناس: ناااري ياختي شحااال وليتي حساسة و دغيا تشعلي ... رولاكس احبيبة .. الى مشا يجي ماحين منو ينسيك ..

جهينة كاتغبن : ماتقوووليهاااش حتى بالضحك .. صافي منيين مشا داك الحيوان مابقيت بغيت حتى وااحد ..

ايناس : و مالك اخييتي ... حتى تحكمي على راسك بهاد المصير .. كاين شي واحد كاره شي بنت الناااس بحالك .. مززااال يجي ليعرف بقييمتك و يعاملك كيف تستااهلي ..

جهينة مشات جلسلت و حيدات تجاكيطها : ماااعااارفة واااالو ..

ايناس: اوى قولي ليا بااش نعرف ..

جهينة حدرات راسها و دازت دمعة من عيونها ...

ايناس: قووولي ... اشنو وقع بيناتكم ... خوي قلبك ..

جهينة هزات عينيها دامعين و قالت : انا مابقيتش بنت 😢

ايناس: اويييلي 😱 هادشي علاااش خلااك و مشا .. استغلك الكلب الحيوااان .. كيفاش دااار .. ولكن كان كايبان عليبه كايبغييك .. كيفاش دار حتى ضحك علييك الحمقة .. عطيتيه راسك برضااك ؟

جهينة : اه ... ماشي هو الملام فهادشي .. حنا غلطنا ب2 ... و ماكناااش فوعينا ..

ايناس: مافهمتش ...

جهينة ؛ كنا فالكلووب ... و هكاك حتى دخنا ماعرفتش اشنو شربنا .. منين رجعنا للدار ... كان برا فالصالون و انا لي مشيت عندو ... ماشي هو... هكاك حتى وقع لي وقع ... كنا ناويين نتزوجو ولكن وقعات شي حاجة ماكانتش فالحسبان ... و انا لي جريت علييه ..

ايناس: اشنو هاد الحاجة ؟

جهينة : خدام مع شي عصاابة ... و انا مابغيتش نكون مع مجرم ..

ايناس : هادشي كولو واقع و ساااكتة ..

جهينة كاتبكي : غير ماجابتخاش الوقت و صافي .. *عنقاتها* توحشتو بزاااف .. و الدااار خاوية بلا بييه .. مابقاش عيط ليا و لا سول فياااا .. ماكانهموووش ... ولا كايكرهني ا ايناس ...

ايناس كاتبكي معاها: صااافي احبييبة ... قطعتي ليا قلبي ... مرة تعايريه مرة تقولي توحشتو .. لهاد الدرجة كاتعااني ...

جهينة : تخنقت مابقينش قدارة .. النفس ولا كايطلع بالزز ...

ايناس : صافي صافي .. تهدني .. ضروري ماغايجي الوقت لي غاتنسايه فييه .. الله ياربي و فيين كان مخبي لييك هادشي 😟😟

ايناس: و اشنو غاديري دابا فهادشي ...

جهينة مسحات دموعها : اشنو غاندير .. صافي لي عطى الله عطااه .. مطتااب الله غايتصرف .. ماعندي ماندير ..

شافت فيها ايناس باسى و عنقاتها من جدييد ..

جهينة : بقات فيا غير ماما .. الى مشات حتى عرفات و اللهتا يسكت ليها القلب .. 😭

ايناس: الله يحفظها .. ماتقولي ليها والو مالك حماقيتي .. ماعندها منيين تعرف ..

جهينة : هي كانت قالت ليا انا نطلبو للزواج .. بقات تسول فيه و فالاخر قلت ليها مابغاش .. ماناويش ازواج .. و عاد نسات الموضوع .. عيبت نكتم بكايا ... غير كانسمع صوتها كانبغي نتسطى ..

ايناس: صافي صافي .. خليها على ربي .. ماشي دنبك فداكشي لي وقع.. ماعرفتي المستقبل اش مخبي ليك ..

جهينة : ماتبقايش تجبدي ليا المستقبل صافي .. مابقيت باغية نفكر فوالو .. عييت عيييت ...

عند الدراري فالاوطيل .. قطع عز الاتصال و خرج عند الدراري ..

اشرف : فين مشات ؟

عز : مشات عند صاحبتها ..

فؤاد : اوووف حال ديك البنت مابقاش عاجبني .. و ايرتان اكتر منها ..

عز : اودي ... حرييق الراس و صافي ...

اشرف : اشنو غانديرو نبقاو نشوفو فيهم هكا .. ايرتان كايعيط الف مرة يسمع خبارها و عاطيها فتركيا غير لغارو و السكرة ... راه ولا مايدوزش النهاار بلا مضااربات فالبيران ...و شحاال من مرة كايلقاوه جاي للمغرب و كايرجعووه بالزز منو .. راه حتى جابوه ادراري بزز لقصر البوص عاد قدر يسيطر عليه شوية ... و جهينة غير فالدار ماكاتخرجش غير للخدمة .. انا راه كانفكر نمشي عندها نهضر معاها ماعرفتو تقدر تسمع ليا و تبدل رايها ..

عز : شد الارض ... البوص عطانا اوامر باش مانقربوش ليها .. بلا متبقا تصرف من عندك ... حتى نشوفو اش غايوقع .. وا شوووفو دابا بسباب 2 براهش كايلعبو دمرو حياة 2 ...

فؤاد : خداو لي يستاهلو ... كون عرف ايرتان بلي وقع كون قتلهم ... و هما غير براهش ماقادين علييه ..

اشرف: مزيان منين ماوصلتوهاش ليه ...

عند جهينة جلسات تاكل هي و ايناس لي كاتحاول تنسيها فهمومها ...

ايناس: ها هو احسن طرف لاحسن جهينة فالعالم ..

جهينة : ماعندي خااكر الماكلة والله ..

ايناس: اويلي ... انت اجهينة كاترفضي بسطيلة دالحوت مستحييل واخا تكوني ميتة تخرجي فمك من الكفن تاكليها و ترجعي ...

ضحكات جهينة و قالت ايناس: وا هكااك ضحكي ينعل بوهم الرجااال لي يبكيونا و يمحنونا هكا .. مالنا اختي تخلقنا باش نبكيو عليهم .. لهلا يرضو .. هاكي ..

خدات جهينة من عندها قطعات منو غير شماتها و قالت ليها ...

جهينة : ناري ياختي ريحة مجهدة بزااااف ..

ايناس: اه درت فيه رجلين الاخطبووط .. و تخليطة تما ديال فخوي د ميغ ...

جهينة بعدات طبسيل معوجة فمها : لا لا ريحتو خاييبة ... *ناضت كاتجري للحمام و تبعاتها ايناس *

ايناس: اويلي يا جهينة مااالك 😨

جهينة بعدما ردات (حاشاكم) وقفات كاتغسل و تمسح : مااعرفتش مااالي .. هاد الايام ماشي هي هااديك ..

ايناس : اجي ترتاحي ..

مشات معاها و تكاتها فالصالة ..

ايناس: غانجيب ليك اللويزة تهدنك ..

صاوباتخا ليها فالحليب و جابتها ليها ..

خداتها جهينة شربات شوية و قالت ليها : ديري فيها 3 المعالق كبار ديال السكر ..

ايناس: شحال بغيتي اختي ؟

جهينة غوتت حتى قفزاتها : واا حيبي لياااا السكاااار ينعل طواااسل موووك 😡

خداتو من عندها و مشات كاتجري : اهياا وعدييي و شحاااال ولييبتي مصعوورة يااختي ... الله يعطييك مصييبة ...

دارت لي قالت ليها و جابتو ليها .. هزات طبسيلها و جلسات حداها كتاكل البسطيلة و تشووف فيها كيف كاتشرب و تبنن .. هزات جهينة عينيها فايناس كاتندغ بالصوت و تشوف فيها و قلباتها بريحتو .. عوجاات فمها و هي تشقلب عليها الطبسييل .. حتى ولات كولها شعرية و حوت

جهينة : تهزي من قدامي و انت و هاادشي ديالللك شحااال من مرة كانقولك كووولي بالشوية لموووك واش كاديري هادشي قداام راجلك 😡

ايناس وقفات : لا لا لا انت بيييك شيي حاااجة .. بغيتيني ننتف مك ... منين جيتي و انا هازا ليك هباالك واش حمقك داك المصرفق ...

جهينة بدات تبكي تسكت تشرب الحليب و ترجع تبكي .. هبطات ايناس لعندها كاتشووف فيها .. عنقاتها و قالت : صافي صافي ..

جهينة : بغيت ناكل شي حاجة حلوة ... جيبي ليا السكر ..

ايناس : اويلي اجهينة على سكر واش تسطيتي بغيتي تنفخي تااني ؟

جهينة : صافي غانخرج راسي نشريه ..

ايناس: صافي صافي .. الى شهوتك فالحلاوة انا غادي نخرج مع حبي و نشريو شي غااطو .. اش بغينا حنا بشي بسطيلة .. انا نحيد عليا هاد الويل لي درتي و نمشيو ..

جهينة : ياله سربي ...

عند عز ... كانو جاسين حتى جاه اتصال ...

عز : نعاام ا ايرتان ...

ايرتاان : هي خاارجة علاش تاواحد فيكم ما تابعها ..

عز : الله يهدييك مالك موسوس و كاتكبر الموضووع عير هكااك راها بييخيير .. مشات عند صاحبتها لا غير ...

ايرتاان : وا مااتقووولش ليااا ... منين تخرج نبغي تبقاو وراها حتى ترجع.. حتى نشوف كيف نديير و غانرجع ليهااا ... انا نحضيهاا راااسي ..

عز : ايرتاان .. بلا ماتقسح راااسك ..

ايرتان : قلتو ليا خلي ليها الوقت و خلييت .. انا ماعندي حتى نية نتفرق معاااها .. ديرو هادشي فبالكم .. غانرجع ليها و غاترجع ليا و يدييها فووق راسها .. وا سيفط شي واحد لعندها *وقطع*

عز : و اللهتا تسطى برب .. اشرف نوض سير بقا وراها حتى ترجع للدار .. هاد الموسوس غايسطيني ...

اشرف وقف : واخا ..

عز : شوف نقولك ماتشوفكش و ماتهضر ماتقرب ليها ..

اشرف: صافي فهمنا 😤

خرجات جهينة من الدار هي و ايناس مشاادات... و ايناس كاتضرب و تخمم فحالة جهينة الغريبة ... ركبات هي وياها و مشاو لمحل صنع الحلويات ... هبطو و دخلات جهينة كاتجري بحال شي مقطووعة .. وقفات كتلعب برجليها و تشوف شنو غاتااخد .. و ايناس حداها كاتبت فيها ..

ايناس: ياا ويلي تي هنينا من التزييط ..

جهينة : هنينا انت و خليني عليك .. خويا بغيت هااذي ..

ابناس : مالك اختي على داك الغاطو كامل ... خودي شي حاجة تقدك ..

جهينة : ماسوقكش ...

جمعها ليها و عطاها ليها ..خرجات و خلات ايناس كاتخلص و تسب .. تبعاتها لقاتها طارت ... قلبات بعينيها لقاتها جلسات فكورسي فالجريدة لي قودام الباتيسري ... و قطعات الشانطي عندها كاتجري .. لقاتها حلات البواطة و كتاكل بيديها مزوج و خمجات حالتها بلاكريم و الشكلاااط ...

ايناس: ياااوييلي واش انت حمقة ؟

جهينة : هااادشيي بنييييين ... امممم ...

ايناس: كون غير كليتيها فالطوموبيل شوهتيني المصيبة ...

جهينة ماجاوباتش غير كاتسرط و تبنن بحال شي مدمن فاش كاياخد جرعة من المخدر ...

وقف اشرف بسيارتو من بعيد .. و كايشوف لجهتها ... و كايهضر غير مع راسو...

اشرف : هههه شوف اش دايرة فحالتها هاد الحمقة ... و الله الى توحشتها هي و حماااقها ... يعلم الله شنو احوالها واش قدرات تنسى ... تاعت غير لي يشدها هي و ياه و يسد عليهم فشي قنت حتى يفهمو بلي ماهما غير ديال بعضياتهم ... بحااالي انا و ديك المفغعصة ديال شروقتي واخا مابغات تعتارف و تحني داك الراس و لكن حتى نسالي ليها ...

جلسات كاتشوف فيها ايناس .. مدات يديها تاخد شوية و هي تضربها و خرجات فيها عينيها ..

جهينة : حااايدي يدييك .. شري دياااالتك ...

ايناس: لا لا اقسم بالله انت ماشي طبيعية .. ناااري عنداااك يكون داكشي لي فبالي صحيح ..

جهينة : اش استنتج داك المخ عندك تاني ..

ايناس: شوفي فيا .. شربتي ديك البيلول ديال الطوارئ ؟

جهينة : بيلول ؟

ايناس: اويلي وحدي 😱

جهينة دخلاتها الخلعة : انا ...ماشربت والو ...

ايناس: واش عاقلة مزيان على دااكشي لي وقع ؟ زعما واش العلاقة كانت كاملة ؟..

جهينة : كانظن اه ..

ايناس: و الدورة الشهرية ؟

جهينة : ماجاتنيش هاد الشهر .. بالستريس و حالتي النفسية تعطلت ... هادشي لي بان ليا 😨

دارت ايناس يديها على فمها و عينيها خارجين ..

جهينة : ش .. شنو .. كاتعني ... دابا انا .. ممكن نكون حملت ؟ لا لا .. مايمكنش .. مستحيييل .. من اول مرة ؟ لا لا .. بلا ماتشككيني فراسي ..

ايناس: و علاش لا .. العلاقة كانت كااملة ... و انت عمرك شربتي موانع الحمل و هو اكييبد مادارش الاحتياط ... علاااش اختي ماغايمكنش تحملي.. راه عذراوات و كايحملو ... واش متأكدة انت فرملية و قارية ؟

جهينة بدات تغبن : لااا .. لااا ... مايمكنش يوقع ليااا هادشي ... ناااري ا ايناس هادي الاخرة ليا لا كنت نييييت حاملة ... و اللهتا غانمشييي فيييها ...😨😨

ايناس عنقاتها باسف : صافي تهدني ... ان شااء الله يكوون خيير ...

اشرف جلس مقاد : مالها قلباتها بكا ... اشنو عندها .. زعما ورى هاد الشهر كاامل باقية كاتعدب .. اكيد اش هاد الغباء ا اشرف .. واش بحال دوك المشاعر ممكن يتنساو بهاد السهوولة ؟ ... اوووف ..

ايناس: تهدني دابا ... خاصنا ضروووري نتأكدو ...

ايناس : مسحي دمووعك دابا ... غانوضو نشريو الكاشف بعدا ... و يحن الله .. مسحي حالتك ...

مسحات جهينة فمها و هزات بواطتها مامفاكاش و مشاو لجهة السيارة ...

تبعهم اشرف بالسيارة حتى وقفو قدام الصيدلية ... هبطات غير ايناس تجيبهم و بقات جهينة فالسيارة حيت كانت كاتبكي و هما ماخاصهم شوهة ... رجعات و عطاتها ...

ايناس: هاهما و من الاحسن ماتستعمليهاش دابا حتال غدا الصباح كايكونو الهورمونات مركزين فالبول ... و الجهاز مايغلطش ... و ياااربي نكونو غااالطين ...

جهينة كاتبكي : دعي معايا .. عرفتي الى كنت حاملة راه واللهتا غانمشي فيها ماغايبقا عندي فين نعطي الراس ... و ماما اش غاندير فيها لي مريضة بالقلب .. كيفاش غانقولها ليها .. طيفاش غانواجهها و نقول ايها بنتك حملات بالحرام ...

ايناس: شششش صااافي ... نتأكدو بعدا و مدبرها حكييييم ... ياله تباتي معانا فالدار ..

جهينة : بلااش ماعنديش الوجه لي يشوف حتى فعتمان كرهت رااسي ..

ايناس: ماتقووليش هكا ... عتمان كايعرفك مزياان و مستحيل يشوف فيك شوفة خايبة .. حنا ماشي غير صحااب حنا راه خوووت .. راه عشرة من الصغر .. و ماعرفتي يعطينا الحل ...

جهينة حادرة راسها : لا بلاش ...تيمون و بومبا غير بووحدهم فالدار ...

ايناس: اويلي وااش حنا فتيمون و بومبا ...

جهينة : بغيت نبقا بوووحدي ... غيير عذرييني ..

ايناس: صاافي الالا .. مايكون غيير خاطرك ...

وصلاتها جهينة لدارها .. تعانقو و هدناتها و خلاتها تفائل بكلامها ... رجعات لدارها و طلعات فحالها كاتجري ...

بقا اشرف التحت شوية و مشا للاوطيل ...

هبط من السيارة و دخل ... و مشى للكافيتيريا دازت قدامو إشراق من بعيد كاتسربي و قالبة وجهها كاتخنزر كيف ديما ... عيط ليها و جلس... شافتو و تمات جايا قالبة وجهها ..

اشراق: اشنو بغيتي تشرب ..

اشرف كايغيظها بابتسامة مستفزة : بغيت نشربك انت ...

شافت حواليها و هي تعطيه ببونية للسدر ... و قالت بين سنانها :

اشراق: غاادي تقااد معايا و لا غانخصر لخويا وجههو ...

اشرف شاد سدرو و كايضحك : اكتر حاجة ماتعجبني فيك هي قبااحتك .. اححح نمووت فالقبااحة انا ...

اشراق معوجة فمها : شوف اداك الزهواني ابو البنات ... الى عزيز عليك دير فيها جون ترافولتا ماشي عليا .. شهراين و انت تحوم عليا و تهدد فيا باقي ماعييتيش ؟ اش باغي عندي ..

اشرف: اللعب معاك غير ماكيزيد يحلا ... مانظنش غانمل ..

اشراق فخاطرها : ولايني مصيبة مع هذا ... دوخني ولد الكلب ماعرفت كيف ندير نشدو و هو كايتزريط كتر من الزوااق ... بلاتي نحاول مرة اخرى ..

اشراق هلطات لمستواه و حطات يديها على الطابلة و قربت لعينيه كاتشوف فبهم و قالت: خلينا دابا نهضرو بجدية .. كانهضر من نيتي .. اش بغيتي عندي ؟

اشرف كايبادلها نفس الشوفة: شنو نهضر تانا نيشان و من نيتي ؟

اشراق: ياارييت ..

اشرف: تزعطت فدوك العيون الخوضر و بغيتهم ليا ..

تسرحو حجبانها و رجعات وقفات كاتمة ابتسامة : وعلى لي مزعوط فالعيون الخوضر كل مرة كايدخل البنات الاشكال و الانواع للعندو ... على لي مزعووط كايظل يتحرش بلي جات قدااامو ااه ..

اشرف : هههههه حاضيااني بعدا ... على داك الجناح شادو غير بوحدي ؟ و زايدون منين عرفت راسي مزعوط مابقات تاوحدة كاتبان ليا ... بساالو .. بغيت وحدة ديالي بوحدي .. و نكون لها بووحدها ..

شافت فيه اشراق و هي كاتلعب بفمها ممتلة عليه صعبة المنال و هي غاتطيير بالفرحة .. شحال و هي تحوم حداه و فنفس الوقت كاتصعب عليه و تقمعو باش يعتارف و يبين ليها جديتو ... و هاهو بدا يعتارف ..

اشراق: و بااش غانعرفك كاتقول الحق ..

اشرف : راه انا لي خايف تكوني طالقاها عليا دابا .. ضحكات اشراق و قالت : اوى انا ماتايقاش فيك و انت متايقش فيا .. اشمن نوع ديال الطليات هاذي 😂😂

اشرف: وا اشتي انا زهواني مافيا تقة و انت كذابة و مافيك تقة .. غاتكون علاقتنا شي حاجة ماضايراش ... و ماغايكونش الملل .. 😜

اشراق: بغيتي تقول ماغايكونش فيها النهار الابيض ..

اشرف: هههههههه اوى نتلاقاو خارج الاوطيل و نديرو حل اش باان ليك ..

اشراق : وااخا ... مع 8 الليل نلقاك برى كاتسناني... هزات بلاطوها و مشات و خلاتو ..

اشرف: ههههه شووف بنت الحرااام ماسولاتني حتى واش مساالي .. 😂😂

دخلات جهينة لدارها... تمو جايين كلابها عندها كايجريو .. هزاتهم و مشات لاكوزينة .. عطاتهم ماكلتهم و مشات للبيت ... حطات حوايجها و دخلات للحمام .. دوشات و هي كاتفكر غير فالوضع لي غاتحط فيه الى مشات حتى تتبت بلي هي حاملة ...

نشفات حالتها ... و مشات للبيت لبسات و نشفات شعرها .. حلات المجر تجبد شي حاجة .. لقات الريحة لي كان هداها ... هزاتها و رشات فمعصمها ... شماتها و غمضاات عينيها ... تفكرااات ايرتان و كولشي كايتعلق بييه ... مشات بخيالها لليلة لي وقعت فبها الواقعة لي كانت اغلب احداتها مرسخة فعقلها ... و اكتر حاجة لمساتو و قبلاتو ليها ... و كيفاش كانت دايبة بين يديه .. حلات عينيها و تحررات واحد الدمعة .. حطات العطر فبلاصتو ماقدراتش تخلى عليه .. مشات تكات فبلاصتها و تكمشت فسريرها ...

عند ايرتان ...

جالس فوق سيارتو قدام البحر .. كايضرب فيه ريح بارد ... و شاد غارو كايكميه ...

حيدو من فمو و شاف فيه ... تفكر بلي واعدها بلي غايقطعو و لكن نسا ... لاحو بكره و شاف قدامو ... تفكر الليلة لي خرجو فالفجر و مشاو للبحر ... توحش لمساتها الحنان عليه ..توحش شقاوتها و طفوليتها ... بلا بيها رجع غير جسد بلا روح .. رجع داك الشخص البارد لي ماكاتظهر على محياه حتى ذرة الحياة ...

ايرتان فنفسو : توحشتها و عندي رغبة كبييرة نجرها من شعرها و نخشيها بين ضلوعي ... نلومها و نخاصم عليها و من بعد نبوسها و نحط راسي على سدرها ... واش غاتكون توحشاتني و كاتفكر فيا كيف كاندير ديما ... واش مستاعدة تسمعني و تخليني نبرر غموضي ... مستاعدة تغمر و تنسى كولشي و تعيش معايا ... اكتاشفت بلي انا ماشي غير كانبغيها و لكن ادمنتها و ادمنت حبها و ولات جزء مني و طرف مني ... وليت مريض بيها .. و مامتقبلش نهااائيا نعيشو بعاد على بعضياااتنا ... ضروووري نلقى كيفاااش نتفك من رجال بابا و نهرب و لا اظطريت .. غانجيبها لعندي هنا ...

ظلام الحال ... دخل ايرتان بسيارتو لقصر البوص ...

دخل و تم طااالع لبيتو .. تلاقا مع ااسيد آيدين فالطريق..

ايرتان : بابا .. بغيت نهضر معاك ...

آيدين هابط يدو فجبيو : نفس المووضووع تااني ...

ايرتان تابعو : علاش حابسني هنا .. موقفني ... بغيت نرجع عندها .. غانهضر معاها كانواعدك ماغانغلطش كيف درت قبل ...

دخل آيدين لصالة و جلس دار رجل على رجل ... جلس ايرتان قدامو كايقنعو بيأس ...

ايرتان : بابا انت لي كاتفهمني ... و كاتعرفني .. انا فاش كانقول ليك كانبغي ديك البنت راه كانعنييها... جالس هنا و هي بعيدة عليا كانحس براسي غاناكل لحمي ... مابقاااش فييا لي يصبر .. عافاك خليني نرجع ..

آيدين : ايرتان سمع اولدي ... ماغانخليك تشوفها حتى نتأكد بلي انت ماغاديش تآديها كيف درتي .. خاصني نعرفها هي بعدا كيفاش كاتفكر دابا .. فاش غاتكون هي مستعدة .. غانجيبها حتال عندك ...

وقف ايرتان و مشا طلع و الدخاان خارج من ودنييه .. هذا ديما الرد ديالو ... و قدما تصرف من عندو و حاول كايلقا باه سابقو بخطوة و كايحبسو حيت عاارف مزياان كيفاش كيفكر ...

منين طلع ايرتان .. ضحك آيدين و قال : هههه واقلة باراكة عليهم ... هذا الى بقا ليا هكا غايدير شي مصيبة ... *هز تيلي*

اشرف واقف قدام الاوطيل متكي على السيارة و مربع يديه... بانت ليه خارجة ... شير ليها و جات عندو كانفرنس ..

اشرف : فين غانمشيو ..

اشراق: لي بغيتي ... غير هو ماتبعدش مافيا لي يتصادع مع داك خووويا و مراتو تاني ..

اشرف: ااه قولي منوضة الشياط فعائلتك حتاهما ...

اشراق: نو بالعكس .. انا فتاة مهدبة و ودودة و لكن بنادم ماكيحملنييش دايرة ليهم الحنااااش ...

اشرف: ههههههه طلعي طلعي ..

طلعات اشراق كاتضحك .. و داها لمطعم قريب من الاوطيل ..

هبطو و دخلو جلسو ... خداو الموني و بدات تقرى ..

اشراق اغلب الاطباق ماعرفاتش مناش كايتكونو .. بقات تقلب على شي اسم ساهل و والو .. بقات تدور فعينيها مارضاتش تسولو ..

اشرف : مالك وحلتي ..

اشراق : دابا مالقيتي تجيبنا غير هنا .. انا ماكيعجبنيش هادشي ديال التبعكيك ..

اشرف: اومالي جبتك هنا باش نتبعكو .. راه باش ناكلو .. اري تشوفي ..

عيط للسرباي و طلب ...

اشرف : انا هنيتك ..

اشراق: مرة اخرى ..اناةلي غانختار فين نمشيو ..

اشرف: واخا الالا .. وا قولي ليا دابا اش درنا ..

اشراق : مايمكنش تبنى علاقة على الكذوب و لا على الغذر .. سو انا وياك غانقسمو لبعضياتنا بلي عمر شي واحد فينا مايخسر تقة الاخر ..

اشرف:هههه آااه اذا كاتعتارفي بلي انت موافقة و بلي حتى انت كاتبغيني ..

اشراق هزات وجهها كتلعب بلسانها وسط فمها : يعني .. اكيد .. مادام قبلت .. اش هاد الكالاخ ..

اشرف : ههههه واقوليها مالك غاتخلصي عليها ..

اشراق : اوى قولها انت الاول ..

اشرف : و مالي غاانحشم .. وااا عباااد الله كااانبغي هاد خااايتيي ..

كولشي دار كايشوف فيهم .. ضحكات اشراق و بحال هاد الحماق كايعجبها بل كادير بحااالو ماكايهمها حد ...

اشراق : ههههه و بلاتي ماشي هكاك ...

ناضت بدات تغني بصوت كايهرس الحجر و كاتردد غير كانبغييه و اشرف ديالي .. ناض اشرف كايضحك هز الكيسان و كايضرب فالطباسل و قلبوها راس الدرب تما ... و كولشي كايشوف فيهم بحال الحماق .. حتى جاو السرباية جراو علييهم ..

اشراق : هههههه واللهتا مقطع الورااق بالله ..

اشرف :ههههه على انت بعقلك المسخوطة خرجنا بلا عشا ..

اشراق : ياله غاتاكل احسن بوكاديو فحيااتك ....

🌄 يوم جديد ...

جهينة مانعساتش ديك الليلة... الخلعة و القلق سيطرو عليها .. غير اشرقت الشمس و ناضت هزات التيست و دخلات للحمام ...

قضات المسائل وخرجات من الحمام..جلسات فالصالون حطاتها قدامها كاتسنا ... غمضات عينيها و كاتطلب الله يطلع سلبي ... دازت 10 د و هي هكااك ... حلات عينيها .. و ماقداتش تطل ... جمعات النفس و هزاتها ووقفات بتوتر... طلات غير بطرف عينها .. و لكن ماشافتش داكشي لي بغات ... كانت الاشارة ايجابية ... جلسات فالارض دايرة يديها على فمها بالصدمة و كاتبكي بشدة ...

جهينة كاتندب و تضرب راسها : اشنو غااندييير دابا اشنووو غاانديييير ... كيفاش غانعيش بكرش و من بعد ولد .. كيفاش غانقدر ندير هادشي ... كيفاش غانعيش بهاد الحالة ... كيفاش غانواجه ماما ... ماما لي تايقة فيا ... لي كبراتني و دمرات عليا باش تشوفني بحال قراني ... كيفاش غانقول ليها ضربت تربيتك كولها ف0 ... كيفاش غاانديير يا ربي كيفاااش 😭 ...

يمعات تيلي كايصوني من البيت ...ناضت دغيا للبيت جاوباتها كاترعد ...

ايناس: امضرا ... واللهما نغدعست هاد الليلة بالي كلو معااك .. درتيه ..

جهينة : حاملة ا ايناس 😭😭 حااملة ... عندي رووح فكرشي ... حاملة بلا زواج بلا رااجل ... ياااربي كيف غاانديير لهاد المصييبة 😭😭

ايناس: تهدني ... ماتبكيش عافاك ... كوولشي لييه الحل..

جهينة : الا مصييبتي .. *بدا كايتقال صوتها * الا مصيييب...تي .. *سخفات *

ايناس: جهينة ... جهااااايينة ... عووووتمااان نوووض ...

دخلات ايناس هي و عتماان كايجرييو ... لقاوها فالبيت طايحة و كلابها كايدورو بيها ... هزها عتمان حطها فالسرير و شدات فيها ايناس كاتفيق فيها ..

بعدما رشات عليها الريحة ... حلااات عيينيها ... شوية بشوية رجعات تاني كاتبكي .. عنقاتها ايناس و كاتبكي على حال صاحبتها عتمان لي عرف كولشي كايحس بالاسف لجيهتها ... موقف صعيب تحطاات فيه .. و خاصة الى عندها ام مريضة و حساسة لاي خبر ماشي تال لهيه ..

جهينة : تشنووو غاااندييير ... قولو ليا اش غااانديير فهااد الفضيبحة 😭

عتمان : هادشي علااش كنت كانقول ليك خرجيه من الدار ... هاادشي علاااش .. فين هو دااابا ... خاصو يرجع يتكفل بولدوو و يتحمل مسؤوليتو ..

جهينة غوتاات : ما غايعرفش ... مستحيييل يعرف بلي انا حاااملة ... انا كانتحارب باش يخرج من عقلي ماشي غير من حياتي ... *رجعات كاتبكي* مابغيتش يعرف ..

ايناس كاتخرج عينها فعتمان : صافي صافي .. ماغايعرفش .. اصلا ماعندنا منين نوصلوه ... دابا خاصنا نلقاو حل ... واش تبغي تديري كورطاج ؟

جهينة كاتبكي: لا ... لا ... مانقدرش .. مانقدرش نقتل روح خاصتا طرف مني ... واش درت علاقة حرام و نزيد الكورطاج تاهو ...

ايناس: واشنو غاديري ...

عتمان كان غادي جاي حتى وقف قدامهم بحزم قال : اش بان ليكم اتخبى عندنا فالدار ... حتى تولد و غانديرو بلي ولدنا انا و ايناس ... و اكيد ايناس غاتوهم كولشي بالحمل ... و غاتبقاي عايشة معانا .. اش بان ليكم ؟

ايناس: انا مستاعدة ... الى كنتي نيت باغية ولدك و ماباغياش الفضيحة بين هاد القوم لي ماكايرحمش .. انت مستاعدة ندير هادشي على قبلك انت وولدك ..

جهينة غير سالاو كلامهم رجعات تبكي و عنقاتها : غانزيييدو نعوصو الموضوووع اكتر ماهو معوص ... و غايتعقد ... غانظلم ولدي هكا و غانظلمكم حتا انتوما ...*طلقات منها و قالت بحزم* انا غانهرب من هنا ...

عتمان : اشنو ؟

ايناس: كاتضحكيي ياااك ؟

جهينة : غادي نستقل من الخدمة و غادي نخرج من هاد الدار و غانمشي لمدينة ماكايعرفني فيها حد ... غانعيش بدوك الفلوس لي جمعت ... جا وقت لي ينفعوني .. كانظن 10 المليون قادرة تعيشني حتى نولد و من تما غانكبر ولدي بوحدي و غانقلب على خدمة و غانبني حياتي ... ولدي غانخبيه على الناس ماعندي حتى حل اخر ... هذا حل ماغانظلم فيه حد .. وماما .. غانبقا نهضر معاها هاد المدة و ماغانحسسها بتاحاجة ...

عتمان : هذا حل هذا .. كيف غادير تربيه بووحدك ؟ .. بقاي معانا و فدارنا حتى تولدي و يحن الله ...

جهينة : صافي الحل لي قلت هو لي غاندير ... بغيت نبعد مابقيت قادرة نتحمل وااالو ... من اليوم غانعيش غير على ودو ... ماغايهمني حد ...

ايناس: جهينة عااافاك ماتقسحيش راسك ...

جهينة : خديت قراااري ... غانبدا نجمع من اليوم ...

عتمان : وا بقاي معانا حتا انوفر ليك الدار و نقلو ليها الفراش عاد سيري ..

جهينة : واخا ولكن عافاك فاسرع وقت ممكن ..

دازت العشية كولها بكا و هي معاهم ... كايصبرو فيها و يتأسفو ليها ... كان خاصهم يرجعو و هي نيت طلبات منهم تبقا بوحدها ...

لبسات عليها حوايج دافيين .. ربطات كلابها و خرجات .. وجهها مورم و حالتها منفووخة ... تمشاات مسافة طويلة ... و هي ساهية كاتفكر ... حتى وقفات قدامها سيارة و خرج منها آخر شخص كاتسنى تشوفو ...

وقفات على اعصابها كاتشوف فيه جااي ... وقف قدامها كاشوف فيها بنظرات اسف و قلق ... نطق و قال :

عز : جهينة ... لاباس ..

جهينة ببرود : اشنو بغيتي ..

عز : واش كنتي كاتبكي ... مالك ؟

جهينة : فاش كايهمك ... لاش جاي كلتقلب عليا ؟

عز : انا بصراحة ... ماعرفتش كيفاش غانقول ليك ... ايرتان ..

قاطعاتو : شكون ايرتان ... ماكانعرف حد بهاد الاسم ...

عز : جهينة سمعيني عافاك ... ذاك الراجل كايبغيك و ماعارفاهش شحال كايتعذب و هو وراك .. مابقيناش كانععرفوه .. عافاك حني فيه و سمعي ليه...

جهينة : حتى انا ما بقيتش كانعرفو ... علاش غانحن فشخص حاول يقتلني ... علاش غانحن فشخص ماكايحنش و كايقتل .. قول علاااش ؟

عز : راك .. ماعارفة والو و قسوحية راسك غاترجع بالنداامة ... لي بغيتك تعرفي هو ان ايرتان دابا فتركيا كايعااني مايقدرش يجي عندك داكشي علاش جيت نعطيك هذا ..

خدا يدها و عطاها ورقة ... شافتها لقات فيها عنوان بالتركية ...

عز : هذا هو العنوان لي فيه .. ماجالسش فدارو لشي اسباب ... انا غانحجز ليك فالطيارة و كولشي غير قولي اه ..

جهينة شافت فيه شحال و قالت بغصة : مستحيل ... ماغانمشيش لعند مجرم .. بعد من طريقي ...

مشات كاتجري جارا كلابها و خلاتو واقف .. ابتاسم حيت دات معاها العنوان ... دار تبعها بعينو حتى غبرت ... و قال ..

عز : عالله دوز الامور كيف مخطط ليها ...

جهينة فاش دات العنوان .. ماشي حيت نساتو و انما نيت بغات تعرف مكانو ... للحظة ضعفات و فكرات بديك 10 المليون لي عندها تمشي عندو هو و تقول ليه ماكايهمني والو من غير نكون معاك .. ولكن لا .. هذاك راه قتال وولدها غايكون فخطر معاه ... هي دابا قريبة تكون ام و مصلحة ولدها اهم منها ... كمشات الوريقة و دارتها فجيبها و هي كاتبكي ... تفكرات كلامو فاش قال مايقدرش يجي و هو ماشي بيخير ... اول حاجة فكرات فيها هي ياكما آذى راسو و لا وقعات ليه شي حادتة ...تشوشات من جيهتو و جاها الفضول ياكما نيت واقعة ليه شي حاجة ... هي عارفاه كايبغييها و معتارفة بلي كاتبغيه و لكن الامور مايمكنش تمشي بيناتهم ... الى جات من جهة قلبها ... باغية ترجع ليه .. باغية تكون معاه و تنسى و تلووح كولشي ورااها .. و لكن عقلها كايقول خاصها تنساه و تبعد على مرآه ... و تخبي عليه الولد باش تحميه من خطورة باه ... و ماتنساش حقيقة انه شخص قتال و مجرم ... هادشي لي غير كاتفكرو كاتبوورش ... بقات حتى ظلام عليها الحال و بردات عاد رجعات لدارها ... مشات للكوزينة ... و خدات ديك الحلوى لي جابت معاها و مشات للبيت ... و حطاتها قدامها و جلسااات تاكل و كلابها مقابلينها ..

جهينة : دابا كانتوحم على الحلااوة ... كون كان ايرتان كون قطعها عليا .. و كون عرفني كليت هاد الغاطو كامل كون خشا صبعو في فمي باش نتقياااها .. و لا يخرجني للغابة نجري على قلبي ...هذاك راه مسطي و ماعندوش العقل فداك الراس ... *تنهدات* هانا رجعت كانهضر علييه عااوتاااني ... *حدرات عينيها شدات فكرشها * كيف درتي حتى تخشيتي انت تما ... كنا كانخططو غير انا و هاد 2 باش نشرفو مع بعضباتنا ساعة جيتي حتى انت تونسنا ... شتي حتى انت زهرك كفس من ديال ماماك .... ماماك .. ولدي ...ههه واااشوف على زهر .. عمري كانت تطيح فبالي نقول هاد الكلمات و انا فهاد الحالة ... ناكل الحلوى على قلبي .. هي لي كاتدوز ليا هاد النغصة لي فقلبي ...

عمرات كرشها غير بالحلوة و نعسات هكااك بلا ماتبدل... و لكن قبل .. قررات غدا تمشي تقدم استقالتها و غاتجمع الدار و ترجعها لماليها ... و تمشي لأي مدينة وصلاتها ليها رجليها ... مهم تبعد من هاد الدار حيت مابقاتش قادرة تصبر و ماحدها فيها .. عمرها غاتنساه و تجاوزو ...

اليوم الاتنين ... فاقت بكري .. جمعات حوايجها ... و جمعات الاتات لماتو و صافي ... فاش كانت كاتلمهم لقات كاشف الحمل... دارتو فجيبها دالقبية باش نعسات ... و سدات عليه ... من بعد طفات الاجهزة ... ماسالات حتى لقات العشية تعاشات ... لبسات كويرة فوق قبيتها... خلات كلابها و هزات معاها الاستقالة و مشات للمستشفى ... قدماتها و خرجات و هي كاتفادا ايناس حيت متأكدة غاتحبسها .. خلات ليها ميساج باش ماتقلقش عليها و طفات تيلي ... دازت للسمسار خلصات الشهر و دارت معاملات ارجاع البيت لماليه وواعداتهم ترجع لحوايجها فاقرب وقت ...خرجات من عندو و لقات الوقت وصل ل7 العشية...و ظلام الحال تكمشات وسط فقبيتها و هي فطريقها للدار باش تهز كلابها و سيكانها و تركب لاي مكان ماكايعرفها فبه حد ...

وهي فطريقها لسيارتها لي ركناتها بعيدة لعدم توفر المكان .. حسات بالحس وراها .. و خاصة دايزة من مكان خاوي شوية ... دخلات معاها الخلعة و لكن حافظت على هدوءها ... زربات فالمشي و لمن الخطوات كاتزيد تقرب ... ما أن حطو يدهم على كتفها و هي تشدها دوراتها كاملة و عطاتو للظهر ... كان واحد لابس الاسود و ملتم بكاشكوول ... بعدما طاح بغات تهرب و لقات قدامها 2 بحالو ورجعات لور ... تساطحت مع جسد وراها و هكا حاصروها ب3... شدها لي وراها من عنقها و لوات يدو و رداتو قدامها ضرباتو بمرفقها للسنسول ديالو... و عطاتو للظهر ... تقدم ليها لي قدامها زواتو ب3 الضربات فالجنب و كلهم فنفس المكاان ... و شدات كاشكول ديالو زيراتو تسندات عليه و هي قاجاه و نقزات ضرباات لي قدامها برجليها ب2 لوجهو و ووقفات على رجليها ... حسات بالم خفيف فكرشها خلاها تحبس ... و دوخة و عدم الاتزان... استغلو الوضع .. حط واحد منديل كايقلب بريحة الالكول على نيفها و هي كاتقاوم طاحت مغشي عليها و هزوها داوها ...

دااز الوقت ... حلات جهينة عينيها ... لقات راسها مربوطة فكرسي ... و كان المكان خالي .. بحا شي ديبو ... كان الباب حديدي مسدوود و داخل تحت منو ضو خفيف ماعرفاتو واش عشية و لا صباح بكري حيت ماعرفاتش شحال داز ديال الوقت و هي مغشي عليها .. ماخافتش على راسها قدما خافت على لي فكرشها ... بقات كاتدور فعينيها و كاتفكر شكون لي خاطفها و شنو باغين منها ... عارفة بلي ماعندهم مايبغيو منها هي ... و لكن هاد الحركة لي ولات فحياتها بعدما بان ايرتان فحياتها ماغاتكون غير بسبابو ... حتى داك الهجوم لي وقع فالغابة فتركيا ... و فهمات علاش كان كايدربها و يسلحها و يوريها كيفاش تواجه الاعداء ... و هادشي كامل ماخلاها تستنتج غير ان هادو لي خاطفينها اعداء ايرتان ... و لكن شنو باغين منها بالظبط ...

تحل الباب و دخلو 2 رجال عامرين نسبيا و فورمة وحدة ...من اشكالهم كايبانو جلاخات من نوع جلاختها ..نظرتهم باردة و كايبانو جديين و مامعاهمش اللعب... خلعوها و خوفوها .. و لكن اهم قاعدة علمها ايرتان هي عمرها تبين خوفها لخصمها ...

شافو فبعضهم و عطا واحد للاخر الاشارة يحيد ليها اللصقة ... حيدها ليها ... و رجع لور ..

خنزرات فيهم جهينة بقوة و بحدة و قالت : شكوون نتوما .. و شنو باغين مني ؟

نطق واحد بالتركية : هضري بالتركية عاارفينك كاتهضري بيها ...

جهينة ماتفاجأتش حيت هضرو بالتركية و انما اش جاب هاد التواركة حتال المغرب ..

قاطع تفكيرها لاخر و قال : فين كاتعرفي شافاك كوردو ... لي اسمو الحقيقي ايرتان التازي ؟

جهينة بحزم : ماكانعرف حتاشي واحد بهاد الاسم ..

قرب ليها و قال : حنا عارفين بلي انتوما كنتو مع بعضياتكم .. و بلي تفارقتو شهر هذا .. مادام تفارقتو فهادشي كايعني انه آذاك ... يعني خاصك الزوينة تنتاقمي منو ... و حنا غانعاونوك اش بانلك .. زوينة هاد الصفقة ..

جهينة : باقية ماعرفتش علاش كاتهضرو .. انا ماكاتعرف حتى شي واحد بهاد الاسم .. و عافاكم طلقوني بغيت نمشي فحالي ..

ضحك لاخر و قال بطريقة مستفزة : باينة راسك قااسح و غاتعدبينا معاك .. و لكن ماعليش .. دقة دقة حتى نفهمووك ... داك ايرتان و رباعتو واحل فقرجوطة عرام ديال العصابات ... و منهم حنا .. مابغاش يديها فسوق راسو و يخلي العالم يمشي كيف بغا .. حنا خاصنا نلقاوه باش نصفيوها ليه و نحيدوه من طريقنا... و ماكاين غيرك لي يدير فينا هاد الخير و يورينا فين هو ...*خرج فيها عينيه و بتهديد قال* عطينا عنوانو ..

جهينة : انا ... ماعارفاش تا حاجة على هاد الشخص لي كاتهضرو عليه ..

وقف شاف فلاخر زعما نوبتك ... قرب حتال لعندها و جر ليها راسها ناتفها للور ... هي فهاد اللقطة كانت خداما كاتفك يديها من لور ... كاتشوف فيه و محافظة على الهدوء ديالها ... و كاتدور فعينيها كاتقلب على ابسط حاجة ممكن تعاونها و تهنا من هاد الورطة ...

قال: علاش مصرة تخبيه علينا و تحمييه ... احناةغانخليوك تمشي شرط تعطينا عنوانو ... و الى مابغيتيش .. روحك غاتخرج مفصولة على جسمك من هاذ الباب ...

ماعطاتو حتى ردة فعل ... زاد شدد قبضتو و غوت .. و قااال : هضرييييي .. فييبن هوووواااا داااك ال*****

سرطات ريقها و هي كاتخنزر فييه ... و قالت : مااكااانعرفووووش ...

طلق منها و تقدم لاخر ... : يعني مابغيتيش ترطبي راسك ... علااش كاااتحميييه .. غانعطييك اخر فرصة ...اختاري.. روحك و لا العنوان ديالو ..

جهينة ببرود : قتلوني و لا ديرو لي بغيتو .. انا ماكانعرف حتى واحد بهاد الاسم ..

طار على عنقها قجها .. كانت كاتخنق و هي على مشارف الانتهاء من فك الرباط ... وجهها حمار و كاتشوف روحهاا كاتزهق و لكن كولشي فدااءا ليه .. لهذاك لي مالك قلبها .. على كل حال راها ميتة بلا بيه ... و لكن تذكرت حتى روح لي فكرشها .. علاش ماتكونش طماعة و تحميهم ب2 ... ياله غاتضربو لمسائلو برجلها و شافتو رخف و مد يدو لعندها ... كانت وريقة العنوان خارج نصها من جيبها .. شافتها جهينة حتى هي و تفكراتها و قبل مايوصل ليها كملت خدمتها و عطاتو لمسائلو ... طاح شادهم .. و لكن الورقة طاحت من جيبها .. شافها لاخر و تم جاي ليها و هي ديك الساعة فكات يديها و هي تلاح على الورقة ... كمشاتها فيديها ... شدها و بدت يضارب مع يدها باش تحلها شافتو غايغلبها و هي تلوحها في فمها ندغاتها و سرطاتها ... حل ليها فمها و لقاها سرطاتها ... شدها من شعرها و نوضها ... وقفها قدامو و هز عليها السلاح ...

....: اذا منين انت مصرة تموتي و ماتقوليش فين كاين ... شهدي على روحك ...

بان لبها الكورسي ...هزاتو هرساتو عليه طاح للارض ... و طاح سلاحو ... دغيا هزاتو وجهاتو ليه... و لكن سرعان ماتقلبات الاوضاع و حسات بسلاح موجه لراسها من لور ... قال لاخر : حطي السلاح ...

مالقات كيف دير ... لاحتو من يديها و هزاتهم و قال ليها .. : دابا شهدي نييت على روحك انت لي ختاريتي تحميه .. غاتموتي ...

شدات كرشها و غمضات عينيها باستسلام ... و فخاطرها كاتردد : سمحلي اولدي ... ماقدرتش نحميك اكتر من هكا ...

و فجأة سمعات صوتو لي دغيا بت فيها الامان و الامل من جديد و فنفس الوقت الخوف حيت جا حتال عندهم .. تقدم ليهم كايجري و من تعاابيرو مناويش خير ... هجم على لي هاز السلاح ... لاحو للارض و نزل عليه بالضرب على فكو غير هااانقتلاااك ... و لاخر جا كايفكو ... و كايقول ليه .. ايرتان حباااس ...

جهينة فهاد اللحظة مابقاوش هازينها رجليها .. نطقات باسمو و طاحت للارض و لكن بين يديه حيت سرعان ماتخلا عليه و توجه ليها ..

يتبع