قدري أن أحبك الجزء 20

عند آيدين و الدراري :

اشرف: كيفاش ندخلها لهادشي واش بالزز ؟ مانظنش غاتقبل واخا قويفزة و لكن هادشي رااه كبيير علييها ..

ايدين : و على انتوما دخلتو بالزز .. تختاريتو و تعطاكم الاختيار .. هي اكيد بحالكم ... شخصيتها قوية و كانظن موضرة و ماعارفاش قيمة القوة لي بين يديها...

عز : حتى انا كاتجيني غاتنفعنا .. عندها قدرة على التشتييت و عاد جماالها لي غاينفعها فالعمليات.. ذكية و ماكادارش بيها ...

اشرف : وا حدك تمااا 😤

عز : هههههه بقات لينا غيير غيرتك داابا  😂😂

اشرف دار عند ايدين متجاهل عز : بووص .. انا مابغينهاش تدخل فهادشي

ايدين : تيق فيا ...غادي تشكرني من بعد 😉

ناض و خلاهم جالسين شادين فيه و هو كاينغر و يسب فيهم ...

دازت جهينة شادا فايرتان و دخلو للكوزينة ...

جهينة : شووف اه ... غادي تصايبها و بلا نقاااش .. شحفت و انا كانعاود نفس الهضرة ...

ايرتان : ياااربي تصبرني مع البنت ... مابقيتش فااهمك... اجي واش كاتوحمي ؟

جهينة ضربات جبهتها ؛ ناري ياربي معامن حملت ...

ايرتان : و ماال مك راااه يحصل ليك الشرف تهزي ولدي ... حيدي نشوف ليك هاااد الحرييرة ... باااينة غاتخرجي ليا ولدي فييه شي كارتة بهاد الماكلة ديالك ..

جهينة ؛ ماسوقكش ..

ايرتان : قالت ليك ماسوقيش ... و على سوقمن ... *كايجبد المكونات و يحط قدامو *

دخلات وحدة من الخداامات و مدات ليها كارطونة بحال ديال بيتزا عليها لوغو ديال شي محال متخصص في البقلاوة و بعض البلاستيكات .. حطاهم قدامها و شتات كولشي و فعينيها قلوبة .. جابو ليها كولشي لي بغاات و بالزاايد ...

عضات من التفاح المعسل .. و هزات باليد الاخرى و كمشات غزل البنات كلااتو حلات البقلاوة و بدات تاكل و تبنن و تغمض عينيها و تضحك غير بوحدها .. كان ايرتان كايخلك العجينة ديال الكيك سمع اصواتها ضراتو فراسو و دار يشوف اش كادير ..مع الدورة خرجو عينيها و هو يغوت جهااااااااينة 😠 قفزات حتى طوعات لي فيديها و بدات تغبن .. جا حيد ليها داكشي من يديها ..

ايرتان : واااش لواااالديييك تسطيييتي كاااتاااكلي هااادشي كاامل بغيتي لممكك يطلع لييك السكر.. انت غااااتسكتيي ليا الgلب 😡

جهينة وقفات كاتنقز و تجدب و تنتف شعرها : وااااا عطيييينيييي ..

حط داكشي و شدها من يدييها و زيرها : مااتنقزبيييييش الزماااار ...

جهينة كاتقاااومو و كاتبقا تنقز : واا عطيييني داااكشي دياااالي و لا غاانبقى نقز ياله .. 😡

ايرتان : صافي صافي ... هاهو ... غير رصاااي ..

جهينة : ياله سير حيد كمل شغلك ... 😤

داز يكمل و هو كايغزز سنانو بالفقصة ... كل شوية يضوور .. حتى كايبغي يجي يالوح دااكشي فطااارو و يترااجع .. هي حمقة و زااد حمقها هاد الوحم مافبه ادلي يوحل معاها فشي مصيبة .. هزات داكشي و حطاتو فوق البوطاجي و شافت فيه ..

جهينة : هزني حطني هنا ..

ايرتان : اللهم طولك ياروح ...

تحنى عندها عنقاتو و هزها غير بمرافقو حيت يديه عامرين ... و هو معنقها خشات نيفها طلعاات النفس فعنقو حتى حس بها و باستو ... تبورش و بعد دغية مكمش وسط عنقو و خنزر فيها و هي تغمزو دارت ليه بحال شي بسايكو مهووس...عارفة راسها كاتفقص فيه ... جلسات كاتزعلل برجليها و حطات البقلاوة قدامها و بركات هاك بالاك .. ماعرف داكشي فين دارتو ...

جهينة : هاد الكيكة بانت ليا ناقصة ..

ايرتان : اش بغيتي فيهت مزاال .. ها الشكلاط و المكسرات و الفواكه اش باغا اخر ..

هزات الباكية ديال ابقلاوة و خواتها منها في العجينة و قطعات من شكلاطها و زادتو تاهو ..

جهينة : ياله خلط ...

ايرتان : لا لا صافي ماابقيتش قادر نصبر .. غانلوح مو هادشي فالطارو و غانربط وتلديك فشي ناموسية حتى ديري عقلك ..

جهينة : و حررررررررررربوووش و تقيييسني و الله يااامك حتى نقووولها لبابا ... يهنيني من حكامك و مزااجيتك

ايرتان : ولينا دااابا فتخراااج العينين هااا ..

جهينة : اااايه

ياله جبد يدو ينتف شعرها (كيف موالف يلعب معاها الوضع ماشي جدي عارفاكم دراميات 😂)

قبل مايوصل جهينة شدات كرشها ..

جهينة : اطووونسيووون انا مابقيينش بووحدي .. سوو داك الركيل و النتيف غير حيدهم ... 😌

ايرتان حبس حيت زمتاتو ... داار كايغوت و يفك اعصابو : ايييييييع ..😡

جهينة : ياله زيد كمل شغلك .. مافياش لي يصبر مزااال

ايرتان رجع يكمل و كاينغر : غاابلاتي .. غير غاتولدي و تشووفي هاادشي كاامل غايخرج منك ..

جهينة : I will worry about that later دابا ماكاين غيير شن طن ...

ايرتان : راه انا لي واخد موقف هنا ماشي انت ..

جهينة : و حتى انا واحدة موقف .. ياك قجيتيني و علاين تزهق روحي 😠

ايرتان : اعاذرت و حللينا المشكل ... لاش عاودتي جبدتيه ..

جهينة : اوى تانا اعتاذرت علاش ماباغيش تنسى ..

ايرتان : عرفتي شنو هي تخبي عليااا موضوع حمااالتك .. راه بحااال الى غضرتييني ... فينما كانتفكر بلي فكرتي تمشي ندتبدلي المدينة و تكبريه بوحدك و بلا بيا كانبغي نتسطى.. ماتسنااايش مني نسا دااكشي بحاال الى شي حاجة بسيطة .. 😤

جهينة دورات وجهها و ربعات يديها مخنزرة و رجع كايكمل شغلو ...

حطها فالفران ..و شاف فجهينة : ها حريتك غاطيب و نشوفو هاد المصيبة ميف غاتخرج ..

جهينة قالبة وجهها : طرب لاكريم ... باش تبرد ..

ايرتان : هي لي بقات لك 😤

طابت الكيك و قسمها و هو كايسب و يعاير و هي حدااه غير كاتلمق .. و بدا يدهنها بالكريم

ايرتان : عمرني شفت شي كيك بحال هاد الروينة ...

جهينة : صافي راك نفختي ليا راسي بالهضرة .. طلقني دغيا ..

ايرتان : ها الزمر ديالك ...

شداتها من عندو و حطاتها فوق الطابلة و جلسات هاك بالاك ..و هو جلس فطرف الطابلة مربع يديه و كايشوف فديك المتوحشة ... كلاتها من الوسط ...

ايرتان : غير بالشوية ... ولايني هاد الوحم عجب من عجائب اادنيا ... مافهمتش كيفاش جسمك قادر يتقبل هاد الوييل كاامل .. نوضتي ليا خااطري ..

جهينة : سير من حدااايا ... خليني نتكونصونترا ...

قلب ايرتان وجهو ... كايتأفاف ...

جهينة حبسات السريط حسات براسها ماشي هي هاديك : حاسة براسي ماشي هي هاديك ..

وقف ايرتان و داى عندها كامل شدها : شتي كلامي اش من الصباتح كلنقووول لييك .. هانتي غاتمرضي ..

دازت فيه كاتجري شادا فومها خرجات من الكوزينة و تبهها كايجري لقاها تالفة شادا فمها و ماعارفة منين دووز جرها داخا لاقرب حماام .. و هي تطلق داكشي و الرووح غاتخرج معاهم و هو شتد شعرها و كايمسد ظهرها ..

ايرتان : ها لي ماكيسمعش كلااامي ... ياله حطي موو داكشي كااامل ... باركة دكي فديك الكرش اش يسحاب راسك عندك ميكة كحلة ؟ و كون كانت غير ماكلة بعدا غير السقاطة و الحلااوة ... مالقيتي بووك علاياش توحمي .. الله يعطييك عقل نتهنى من حمااقك .. *ناضت كاتنفس بالزربة* مزياان دابا ؟

رجعات تاني حتى مابقا فيها ماتحط ...

جهينة : مشااات البقالاااااوة 😭😭

ايرتان : زيدي قداامي زيدي ... مزيااان ملي رضيتي كوولشي ...

جرها غسل ليها وجهها و سندها عليه و طلعها .. دخلو للبيت و تكاها فالسرير ...

ايرتان : مزيان دابا ؟

جهينة : باقية مروعة شوية عطيني ريحتك ..

ناض مدها ليها و رشاتها فكفها و بقات تشم ..

ايرتان : بقاي فالبيت و رتاحي شوية ... و ماتبقايش طيري .. شدي الارض شوية ..

جهينة : لا بغيتيني مانطيرش ..

ايرتان : ماغاتبركيش تديري ليا الشونطاج هنايا .. شدي الارض هي شديها .. انا غانهبط نهضر مع بابا فشي موضوع ..

جهينة : فاش ؟

ايرتان : سوقك ؟

جهينة قلبات وجهها كاتعوج فمها و تسب فيه ..

باس راسها و ناض ..

مسحات جبهتها زدو دارت بحال الى طوعاتها عليه ..

جهينة : خوود بوستك زيدها فييك ... قماع جلاتخ ماكايسواااش ... ماعرفت علااش عاجبو راسو .. *شدات كرشها* سمع نقول ليك اولدي من دابا .. الى كنتي غاتخرج بحال باباك بلاش ماتخرج ... خاصك تشبه لماماك فالاخلاق و الظرافات و ماعليش تجي زويون بحال باباك و لكن ماتديش اخلاقو .. اخلاق باك كيف الزفت مايسوى مايصلح .. جلاااخة مجلخ ... خاصني نبقى نعطيك لتشيم تشيم باش تخرج بحالو ..

بقات كاتهضر مع حميلها حتى غفاات ...

هضر ايرتان مع باه على موضوع زواجهم لي تقرر بعد يوماين و غايكون حفل غير بيناتهم و غايجيب عائلتها حتى لعندها ... غايتكلف ايدين بام جهينة و يخليها تفهم الوضع بدون مايكبرو الموضووع ..

بعدما تافقو ... خدا روندي فو على قبل متابعة حملها مع طبيبة و مشا جمع مع الدراري ...

ايرتان جلس كايسووط...

عز : هههه امالك .. قبايلة كان صداعكم واصل لهنا من الكوزينة ..

ايرتان : شحفاتني هادا رداتو هنا (اشار لمقدمة رأسو للور)

فؤاد : هههه وراها في فترة الوحم راه خاصك تسايس معاها ... ماشي تزيد تعصبها ..

ايرتان : على انا اش درت ليها شاد معاها الخاطر ..حتى نشوفو هادشي فين غايوصل .. فين اشرف ..*بغا ينوض * ياكما طلع عندها ؟ 😤

اشرف جاي هاز بلاطو لي فيه حلوة جهينة : ها انا ... غيير محسوووس من رااسك ..

ايرتان شافو جلس حداه و هاز الحلوة ..سكت و ضار قدامو ..

اشرف : جاني الجووع و لقيت هاد الحلوة فاكوزينة .. ماعرفت شكون دار ليها هاد الحالة ..

عز : هضرتي مع شروقتك 😂

اشرف : مخاصمة معايا حيت سافرت ... هاذ الحلوة فشكل اش هادشي وسط منها

ايرتان : كول و غاتعرف لاش كاتصدعنا حنا

قطع اشرف و دارها في فمو و دفلها سير بلاص ..

هضر مخصر سيفتو : اش هااد الحزاااق 😣

ايرتان : هههه شفتي المدام ديالي علاش كاتوحم ..

هاديك راه فيها خايلوطة ديال الويل الكحل حتى من البقلاوة كاينة تما 😂😂

عز و فؤاد : هههههههههه

اشرف : و لااايني حمقة هاادي و ندوزو هاد البقلاوة و لكن اش هااد الحلاااوة .. واش صايبتو كيكة و فيها السكار .. و لا السكر و فييه كيكة ..

ايرتان وقف : نوووض لووح الزبل دابا تفييق و تقلب علييها تاني ... انا غانخرج .. عز بلا مانوصيك .. هاد بنادم مايوصلش لجيهتها حتى نكون معاهم ... و ماتخليهاش توصل للسكر و الحلاوة ... ساعة و نجي ..

اشرف : وا عيقتي مانوصلش ليها راه عشيرتي باغي ندردش معاها و شحااال و انا كانربط راسي باش مانوصلهاش نهار تكون معانا مانوصلهاش

ايرتان : ماكانحملش صدااقتكم عندي منها حسااسية .. بغيتي تدردش معاها حتى نكون معاكم .. انا خرجت ..

خرج ايرتان و قال اشرف ..

اشرف : مصييبة مع هاد الموسوس...

عز : هههه اوى عندو الحق .. السكيين شيب ديالكم راه شوية ..

اشرف : واش كاينة شي صداقة غيير من بعييد لبعييد ... ولايني راكم مرااض ..

فؤاد : وااايلي انت دابا الى شي حد من رجال عنق اشراق قدامك غاتبقا ساكت ليه ..

اشرف : نخرج ليه عينيه و نكمل بيها هي ..

عز : اوووه ها الماااء طاااب .. بحال وااالو يكوون شي واحد فشي قنت كااايضوور بيها و انت ماجايب للدنيا خباار ..

اشرف : ههه لا .. مستحييييل ... محلف علييها ماتخرجش من الاوطييل غير للدار .. ومن الدار لاوطيل ..

فؤاد : وا الاوطيل هو اكبر مصييبة ... على مافيهش غير ..

ناض اشرف وقف مقاطعو :ا.. انا .. تفكرت واحد البلان ...😤

مشا كايجري للجردة و كايجبد تيلي و الدراري تلااحو كايضحكووو حيت وصلو لداكشي لي بغاو ...

اتصال بيها .. بقاتوشحال عاد جاوباتو ..

اشراق : اش باااغي 😤

اشرف : علااش لمك ماجاوبتيش .. اش كنتي كاديري ..

اشراق : خداامة .. اش كاندير فنظرك ؟

اشرف :اش لابسة؟ ... دايرة الماكيااج ؟ معاامن هضرتي هاد النهار كامل ؟

اشراق : ااابشوية علييك مالك اخويا داخلني طوول و عرض يااك لاباس .. هاذي هي تسول فيا و تقول ليا توحشتك احبييبة .. على ماشي تعرضو ليا واحد 3 ماهربت لبوهم غير بالزز .. وا سخفوني و فشلو لجدي الركاابي ..

اشرف : احم .. بالصح ؟

اشراق : و اللهمااا طاللقها و الله حتى طانهضر من نيتي ..

اشرف : متيقك ..

اشراق : مهم راه مابقاوش باانو ليا .. هاد المرة غانركل لباباهم التر*** الى بقاو تعرضو ليا ..

اشرف : هههه ماتبقايش تقولي لي ماتقديييش عليبه ..

اشراق : و مالك حغرتيني ..انا راه فايتة واخدة دروس فالكراطي واخا ماكملتش ... على ديك العصا كاملة لي كليتي من عندي ... جاتك عادية ؟

اشرف : هادشي غيير ما مكملأاش .. تباااركله عندي فااندااما .. 😂😂

اشراق : اجي شتك كتدي و تجييب معايا فالهضرة .. انا راه اصلا ماخااصمة مععاك .. سافرتي و خليتيني .😠

اشرف : وراه عندي خدمة .. غانتشاوفو قرييب بلا كاتقلقي ..

اشراق : قريب ؟ سيير بعد مني الله يرحم باك و ماباقيش تعيط ليا .. عندي مايداار حتى انا ..

اشرف : ماتقطعييش لمك .. شدي تيقارك و نعرف والديك كاتديري شي حاجة ورايا ناتعرفيني منين وقفت علييك 😠 ...قطعات الحماارة ... غابلاتي على موك حتى تجي ..

داز الوقت رجع ايرتان هاز فيديه شي ساشياات حطهم فاالبيت لي غاينعس فيه .. و بدل حوايجو .. و مشا لبيت جهينة حداه يطل عليها .. لقاها باقية نااعسة ..

جلس حداها ... هز يدها بااسها و باس راسها ... تحركات و قال ..

ايرتان : جهينة ؟؟ نووضي باركة علليك ..

جهينة كاتحرك : اممم ...

ايرتان :النهاار كولو ماكليتي واالو من غير داك الزبل لي رضيتي ..

جهينة كاتجبد و تكسل : شحااال السااعة ..

ايرتان : 9 ديال الليل هادي .. جبدتي علييها ..

جهينة ناضت جلساات : هاد النهاار دااز طوييل ..

ايرتان : ماشي غيير علييك انت .. حتى انا .. و احسن نهاار فحياتي ..

جهينة : واش فرحان غايجييك ولد ؟

ايرتان : كاضحكي معايا ... الولاد هما الحلم الوحييد لي كنت متأكد عمرني نحققو .. و منين عرفتك و لا حقيقة بالنسبة ليا .. الوقت كولو لي كنا ب2 و انا كانفكر و نتخيل النهار لي نكونو تزوجنا و تجي تقولي ليا ايرتان غايجينا baby .. واخا جا قبل وقتو ... و حرقنا بزاف دالمراحل و لكن انا فرحاان بيه و متحمس نشوفو .. ماعندييش مع الدراري الصغاار حيت ماكانعرفش نتعامل معاهم و لكن متأكد بلي انت و ولدي غاتعلموني ...

جهينة جمعات الضحكة و حدرات راسها... شافت كيفاش كايهضر على هاد الحلم ديالو ماشي غير فهمات و انما تأكدات بلي من حقو يغضب عليها حيت كانت ظالمة فحق حلمو و انانية ...

لاحظ تعابيرها و شقلب الموضوع ..

ايرتان : ياله الغزاالة .. نوضي نهبطو التحت .. راه كيتسناونا للعشاء ..

جهينة : وااخا ..

هبطات جهينة معاه .. تجمعو على الطابلة حول آيدين و الخادمة كاتسيرفي ...

اشرف : جهينة .. فين غبرتي العشبة كاملة و انا كانتسناك تفيقي ..

جهينة : واهانتا قلتيها .. كتت ناعسة .. او نعاسي ولا تقييل

ايرتان : و على من ايمتا كاان خفيف ..

جهينة : ممكن ماتبقاش تهاجمني الله يرحم الوالدين😑 ..

اي تان : اما ماهجمتكش انا قلت اي كاين ..

جهينة : لي كاين عاارفاه .. علاش غاتقولو ..

اي تان : حيت قلتي غكرة ممكن يمشيو فييها غالطين و انا صحححتها ..

جهينة : شكون طلب منك تصححها انت ماشي سوقك ..

اي تان ياله حل فمو و هو يقول آيدين ..

ايدين: هدنة هدنة .. مالكم ... واش متأكدين انتوما كوبل قريب يتزوج و قراب يجيهم مولودهم الاول .. حيت هادشي مباان ليا حتى جزء من التانية منين جلستو ...

اشرف : ماشفتي وااالو دابا راه كايهضرو و مهدنين .. طل عليهم منين كاتكون القردة طالعة ليهم ب2 .. هو يركل و هي تنتف .. ماعرفتش كيفاش عاشو فديك ادار 4 اشهر ...

عز : هههه بصراحة واللهتا هاد 2 فشكل ماكايتشابهو فوااالو .. كيف القط و الفاار و ماعرفتش كيفاش بغاو بعضهم ...

ايرتان : وا تما خلاوتها ..

جهينة : بالعكس .. غانبقاو حياتنا كاملة و حنا نتناغرو عمرنا نتافقو على شي حاجة و غايبقا الصرااع دائم ..

ايرتان : هكا ماغايكونش ملل ... و حنا راه كنكملو بعضنا الى كنتي كاتشبهي ليا ... و لا انا كانشبه ليك ... حياتنا غاتكون روتينية و دغيا غانملو ..

جهينة هزات صبعها: سمح ليا مامتافقااش معاك ..

ايرتان: حيدي داك الصبع من قدامي 😤

جهينة خشاتو فوجهو : هاهو ..ياله ..

شدو ياله غايطرطقو و بدات تغوت و عتقها عز لي كان حداها ...

جهينة شادا صبعها : الحمااار لاخر .. الله يلgيها ليك كحلة زحلة ... 😭

ايرتان : تلgات ليا منين تلاقيت مع كماارتك ...

جهينة : و شكوون قااال ليك جي عندي من الاول ياله😠 ..

ايرتان : كولي و سكتي 😑

اشرف : بلا ماتشوف فيهم هكاك ابووص .. راه لا أكل منهم 😂

ايديين : ههه هادشي لي باان ليا ..

كملو عشاهم و هما في الحرب .. حتى سالاو .. بقاو مجمعين شوية حتى عياو و ناضو ..

دخلات للبيت و تكات فبلاصتها .. و كذلك بالنسبة لايرتان لي غير حط راسو مشا بالعيا ...

جهينة شعلات الفيوز ماجاهاش النعاس .. بقات شي ساعتين غير كاتقلب و تشقلب فبلاصتها .. نعسات 2 مرات فالنهار دابا طاار ..

جهينة : وايني وحلة هااذي .. اش جا مانعسني داابا ...

خشات وجهها تحت الوسادة كاتطيب فيه ..

جهينة تحت الوسادة و كاتهضر : ريحة الجلاخة فينما حطت كاتلصق ... احح توحشت نعنقو ونعس على كتفو ... يكوون نعس داابا .. زعما الى مشيت عندو غايفهمني غلط ؟ و اللهتا يجري عليا بالله ... خااصة بعد داكشي لي وقع *تفكرات ديك الليلة و هي تزنغ* ناضت لاحت المخدة و بدات تندب ..

جهينة : زعما يكوون حتى هو عااقل على داك المسخ .. اوييلي حي على شووهتنا .. لا لا مووحال واش عااقل .. *طلعات النفس و هبطاتو* دابا غانعس و غانحيد هاد الافكار من راسي ..

رجعات لبلاصتها و غطات وجهها و لكن ريحتو و بلاصتو كولشي كايفكرها فيه و فكولشي داكشي لي وقع.. حتى عرقات و سخناات .. بدات تسرط ريقها و تسرفق راسها باش يمشيو دوك الافكاار .. و والو .. ناضت جلست تاني و بدات تندب ...

جهيتة : اويييلي اش هاد الز*** طاحت فخطرة وحدة 😭.. مايكونش هادشي دااخل فالوحم ..مامولفااش ليا 😶 اصلا هاد الايام كاملة و انا كانتخيل و نتفكر فيه .. *كاصرفق راسها* رااه حراام لمك حرااام .. ماقدك داك الذنب لي فايتة دايرة تزيديك واحد آخر .. لا لا هاذشي غيير من الوحم اكيد عندي عذر .. نوض نقرى القرآن يبعد عليا هاد الوساويس ..

ناضت شعلات الضو كاتقلب على شي مصحف .. بالحرام واش لقات شي واحد ..

جهينة : اويلي على قوم قريش ماعندهمش مصحف .. و لا يمكن السي آيدين مسيحي ... نهبط فحالي نكمل حلوتي هي لي غاتنسيني ...

مشات خرجات من البيت حفياانة كاتسلت ... بانوليها بين ايرتان مردود .. عضات ظفارها و مشات تطل عليه بالتسلاات .. لقااتو نااعس ..

حلات الباب و قالت : ياااربي تسمح ليا ... و اللهما ناوية شي حاجة بغييت غير نطل عليه و نعنقو غييير شوييكيكة و نمشي فحااالي .. ياااربي عافااك سمح ليا .. ماشي فعايلي فعايل هرموونات الويل الله يقطعهم... و انت ادرى بكوولشي ...

سالات الدعاء ههه و دخلات كاتزحف بالشوية اي حركة ذات صوت غاتلقاه فوجهها ..

مشات لجهتو ... طلات عليه و دوزات يدها فوق عينيه .. قالت فراسها صافي .. خورجي فحالك .. جات دور و شد يدها ..

ايرتان : جايا تقوتليني ؟

دارت عندو و بدات تمتم : انا .. ا.انا...

ايرتان : مالك *ناض شعل الفيووز * بغيتي شي حاجة؟

جهينة : لا .. غير نعس انا غانرجع ..

جات تمشي و شدد يدها : بااينة فيك باغية شي حاجة .. غير قولي مشهية شي حاجة ؟

جهينة : هو .. بصراحة .. داخلة فالوحم ماتفهمش غلط ..غير بحال قبايلة .. عنقني ..

ضحك ايرتان و قال : و لكن الليل هذا ماجاتش ...

جهينة : عاافاك غيير ديير ليا خااطري ..

ايرتان:ههه باقي لمك مابغيتي تووبي ..

جهينة : ماغانباتش غير حتى نقنع و نمشي ..

ايرتان : ياله اجي .. امري لله معاك ...

فرحات و دغيا ضارت لاجهة الاخرى و تخشات فيه ..

ايرتان : كاتوحمي على الحلاوة .. و العنااق و شنو آخر مزاال ؟

جهينة : ماشي غير العناق .. كانتوحم علليك كوولك ..

ايرتان : هههه كيفاش هاد كولي ..

جهينة : ماغاديش تفهم ..

ايرتان : جربيني ..

جهينة مع راسها : اش غانجرب فييه هذا بغااني نتعرى على مو و لا اشنو *قالتها بالجهد * استغفر الله ..

ايرتان: هادييك اه .. فاش كاتفكري ..

جهينة : ماتدييش عليا ... كانتوحم على ريحتك و عناقكك و تبقا غيير معايا .. صافي ..

ايرتان : و كاان ؟

جهينة : اه ..

ايرتان : اياه علايش كاتوحمي آخر ..

جهينة هزات عينيها فيه و قالت : سايكووك باللبن البلدي و البلبولة 😍

ايرتان : منيين غانجييب ليك انا هاد سايووك واش تسحابي راسك عند مك فاجبل ؟

جهينة : ماسووقيش ... ضبر ليا فييه ..

ايرتان : و لايني خاص ديلمي الفلفة .. انا لي جالس نسول فوالديك ...

جهينة ؛ وا نووض ..

ايرتان : ها نتي غيير شوفي فيا .. منيين غاانجيب ليك هادشي لي قلتي ... وا كوون كنا غير فالمغرب بعدا مانحيرش ..

طلقات منو و ناضت جلسات كاتغبن .. ناض جلس حداها كايسوط و قال ليها ..

ايرتان : كاينين لي كايديروه بالروز .. تبغيه بالروز ؟ اما اللبن غانديرو غير لي موجود ماكاينش البلدي ..

جهينة : صافي .. نصبر.. غااع ... ولكن غدا غاضبر ليا ..

ايرتان : غانوصي شي وحدين غايجيو من المغرب و يجيبوه لييك ..

جهينة : و ياله نوض دير ليا هاد الروز باللبن نشوف كيف دااير ..

ناض ايرتان و تبعاتو لاصقة فجنبو .. هبطو للكوزينة كايضورو غير بوحدهم كيف الجنون .. جبد الروز يصلقو ليها .. و هي جلسات تما تسنى .. ايرتان كان خدام و كايتفوه بالنعااس ..

جهينة : بونع بونغ .. امتى غانرجعو باش نتزوجو ..

ايرتان : غانتزوجو بعد غذا .. و هنا فتركيا ..

جهينة : اويلي على بعد غذا ؟

ايرتان دار عندها : و على ماالك .. اش عندك ..

جهينة : انا اكيد باغية من دابا غااع.. و لكن ماما .. اشنو غاندير معاها .. مايمكنش نتزوج بلا خبارها ..

ايرتان : ماماك غاتحضر هي و خالك .. و بقية عائلتك حتال عندك .. و كولشي الامور مكلف بيهم انا و بابا .. غير هني بالك انت و ماضربي حساب ..

جهينة ناضت لعندو : كيفاش مانضرب حساب لحتى حاجة .. واش كاتقول ليا ماما جايا للهنا .. كيفاش غادي نشوف فيها .. واش مخلية بنتها فكازا غاتجي لعندها حتال توركيا .. و من الفوق مع شحال من راجل فالدار و من فووق هادشي كااامل حاملة .. راه انا كانقول هادشي و لحمي كايبوورش واش يسحابلك غاتقول ليا الله يرضي علليك ابنتي ..

شد حناكها و قال : اكيد ماماك ماغاتبغي غير مصلاحتك .. و بابا غايهضر معاها .. اكيد غاتحشم منو و تسمع ليه و عااد ماماك كانعجبها و ماتبغي غير مصلاحتك .. علااش غاترفض ..

جهينة : اكيد ماغاترفضكش و لكن راني حاملة واش عاارف اش كانقول ليك ..

ايى

ايرتان : واخا واشنو نديرو .. نخبيوه على ماماك .. شحال قدك ..

جهينة : اه غانخبي الحمل ديالي .. من ورى شهر غانقول ليها حاملة .. غايكون عند بالها حملت ورى الزواج مباشرة ... و منين نولد غانقول ليها ولدت قبل الوقت .. و هاهي تحلات .. و لكن دابا نفضل نموووت و مانقوولهااش ليها .. نفضل نموت و مانشزفش خيبة الامل فوجهها ..

ايرتان : واخا .. على خاطرك انا كانحتارم قرارك .. مادام صعييب تواجهيها صافي و لكن ديري فبالك بلي حبال الكذوب قصار ..

جهينة : ماكاينش لي غايقولها ليها كون هاني ..

ايرتان : ضبري لراسك ..

ضار كايسرح الروز باش يبرد ...

جهينة تكات على البوطاجي و بقات كاتفكر: ناالري انا خايفة ..

ايرتان شاف فيها .. طلق لي فيديه و جرها عنقها ..

ايرتان : ماكاين لاش تخافي انا فجنبك ...

جهينة : عاارفة...

ايرتان : و ياله شوفي واش كاين شي لبن فالتلاجة و اريه ..

مسحات دموعها و مشات قلبات التلاجة.. لقاتو و جابتو مداتو ليه .. دارو مع روز لي بردو خلطو و عطاه ليها ..

ايرتان : الى ماكليتيش غانطلسو على كمارتك ...

جهينة : ماديرش فيه واحد معلقة ديال ..

ايرتان : غاندير عزااك 😤

جهينة : صافي هاهي ..

مشات جلسلت كتاكل و جلس قدامها ..

و هي كتتاكل .. هزات عينيها فيه بتردد .. و كاترجع تحدر عينيها ..

ايرتان : مالك ؟

جهينة : بغييت ... نسولك ..

ايرتان : سولي .. مولفة طلبي اذني ..

جهينة بتردد: ديك .. ديك الليلة .. واش .. واش عقلتي .. اش نو كان ..وقع ؟

ايرتان تصدم مم سؤالها .. حدر عينيه و دوز يدو على على عنقو من الخلف .. و قال ..

ايرتان : فلاول لا ... من بعد بديت كانسترجع الذاكرة كاملة ..

جهينة حدراات راسها بالحشمة .. و حتى هو دور وجهو .. ايرتان حتى هو كان كايتساءل واش عااقلة .. ب2 ارتاحو من ناحية انهم احتافظو بذكرى اول مرة ليهم و لكن حشمانين من بعضهم لأن الطريقة كانت غير صحيحة و ماكانوش مستاعدين ليها ..

ايرتان ؛احم .. ياله .. كولي .. اشتي فالعشاء شحاال كانقول ليك كولي ..

جهينة : ماكانش فيا ماياكل .. و لكن هاد السايكوك العجيب .. عجبني ..

ايرتان : احسن ما توحمي ليا على الحلاوة و المرض ..

جهينة : اوى مالو لخاطري ؟

ايرتان : ياله .. واكولي ونوضي نعسي .. غدا غاتفبقي بكري ..غانمشيو للطبيبة لي غاتبع معاك ..

جهينة : واخا ..

ايرتان : شهيتيمي فييه واخا عمري كليتو حتى انا ..

جهينة : ههه اجي توحم معايا حتى انت 😂

جاب معلقة و جلس حداها كياكل و يضحكو ب2 ...

بقاو هكااك حتى سالاو .. غسل داكشي فاش خدمو و طلعو ب2 للبيت ..

ايرتان : ياله بيتك الانسة ..

جهينة عنقاتو : شكراا حيت شاد معايا الخاطر و هتز هباالي .. 😄

ايرتان : و على الى ماهزيتو انا شكوون غايهزو .. ياله المشعكة ... دخلي تنعسي .. تصبحي على خيير ..

جهينة : و انت من اهلو 😊

كل واحد دخل للبيتو .. ضحك على راسو .. كيفاش نساتو بلي هو مقلق منها و هي عجبها الحال حيت واخا مقلق منها مامبينش ليها و مهتم بيها عوض مايتجاهلها و يلومها ...

اصبح الصباح ... فاق ايرتان دوش و لبس حوايجو ... و مشا ليها نيشان .. لقاها باقية خامرة ..

جلس حداها كايفيق فيها ..

ايرتان : وا لالاهم جهينة ... *ماتزعزعاتش* واتي نووضي راك غاتعطلينا ..

جهينة كاتكسل : اننن

ايرتان : شتي النعاس معطلة ..

جهينة : خليني غيير شوية عاافاك ..

ايرتان كايجرها من يديها يجلسها : ياالاه ... دوشي باش تصحصحي .. و لبسي و هبطي عندي للتحت تفطري باش نمشيو ..

جهينة : فين حوايجي بعدا ...

ايرتان : دابا نقول ايهم يسيفطوهم ليك غايكونو تصبنو و نشفو .. حتى نكونو راجعين و ندوزو نشريو باش تبدلي ..

جهينة جراتو عنقاتو و نعسات على كتفو ..

جهينة : فراسك بلي كانبغييك بزااف ..

ايرتان باداها العناق و خشا وجهو وسطها و قال ..

ايرتان : وشنو مناسبتها ..

جهينة ؛ فينما كانشوفك كانبغي نقولها ليك ..

ايرتان : حتى انا كانبغييك ..

حيدات منو و شافت فيه مصدومة : عااود اش قلتي ..

ايرتان : هههه كاانبغييك ..

جهينة : سلم شي يهودي و لا غاتشرق الشمس من مغربها .. اش وقع ليك ياكما فيك السخانة *شدات جبهتو *

ضحك و شد يدها من جبهتو و قال : فراقك علمني درس ... من ديما كنتي عارفاتدني مانبغيم و لكن غير من اهتمامي و تصرفاتي و لكن عمري عبرت و انت عزيز عليك لي يعبر .. فاش ماكنتيش فجنبي كنت كانقول علاش مانقولهاش ليها ... انت رضيتي بيا كيفما انا خاصني نرضى بيك ميف ما انت .. و مادام باغا تسمعيها .. نبقى ديما نسمعها ليك .. غير تبقاي جنبي ...

جهينة بدات كاتغبن و عنقاتو ..

ايرتان : وليتي بكاية ...

جهينة : عمري ماغانتفارق معااك إلا الى انت بغييتي ..

ايرتان : هههه حمقة .. ماغاتفرقني منك غير الموت واخا انت تبغي تفرقي معايا ماغانخليكش ..

جهينة : هههه واخا نشرف وامانبقاش زوينة .. واخا من هنا لشي شهورة غانغلاض و غاتولي عندي الكرش ..

ايرتان : ااه غانبقى نبغيك واخا هادشي كولو ..

جهينة : وااعدني ..

ايرتان : كانوااعدك و غانوفي بيه ..

جهينة : حتى كانواعدك عمرني مزااال نقلقك و لا ندير شي حاجة لي تجرحك ..

ايرتان : وياله الكسولة .. 10 د .. تكوني التحت ..

جهية : واخا ..

خرج ايرتان وناضت ماقاداها فرحة ...

بعدما فطرو و سالاو ...جالس ايرتان فالسيارة و كايتسنى فيها تجي ... حلات الباب و دخلات كاترعد ..

جهينة كاتكمش فيديها : انااري انااري عللى برد 😵

ايرتان : هههه هادشي غندك هو البرد و على ميين يطيبح التلج اش غاتقوولي ..

جهينة : على كايطيح التلج فهاد المدينة ؟

ايرتان : بطبيعة الحال ..

جهينة: ماكرهتش نبقاو حتى نشووفو .. 😍

ايرتان : واخا الالا ب2 مشومرين هاد الساعة ماعندنا مايداار ههه

جهينة : هههه ياااس

ضحك ايرتان و ديمارا بالسياارة ...

بعد مدة قليلة وصلو .. هبطو و دخلو معانقين ... و مشاو للجناخ المخصص لهاد الاختصاص .. هضرو مع الريسيبشن و مشاو يجلسو يتسناو ..

جهينة : تصور مانكونش حااملة ..

ضحك ايرتان و جمعها و قال : و الله بووك اليوم مايفكني منك غير لي خلقك ..

جهينة : هههههه ناري انا متأكدة بلي حاملة ... و لكن دابا دخلتي ليا الشك و درتي فيا الرعب 😂😂

ايرتان : و على لمك البارح كامل و انت مشطحاني ها البكا ها السخفة و زيدي عليها كل شوية موحمة ليا على حاجة ..

جهينة : اوى هذا هو الوحم .. اش بغيتي ندير ليك و لا كاتسنا البيبي ناضي ماتمحنش علييه ..

ايرتان : لا الالا .. نتمحنو معااك .. على حتا اش كاانديرو هنا ..

جهينة شافت فواحد المرأة حاملة و كرشها منفوخة : لحد دابا ملمايقاش بلي انا حاملة و قريب كرشي غاتولي قد هكاك ... اوووف عرفتي شحااال ديال تمارة تابعااني ..

ايرتان : واا كون لقيت كيف نديير كون هزيتو فبلاصتك هههه

جهينة دارتها يدها على كتفو معنقاه و كاتلعب بشعرو لور: هههه كاتطنز هليا ... هاد المهمة عطاها ربي لامرأة حيت هي لي تقد بيها .. انتوما باركة عليكم غير توفرو لولادكم العيش الكريم ..

ايرتان : وا من هاد النحية حمد الله ولادي غايعيشو أمراء معايا ..

جهينة : ههه اوى سعداتهم اسيدي ..

ايرتان : وعلاش سعداتهم على ماشي انت هي الملكة ديالهم ..

جهينة شدات كرشها : اووكووك اش هادشي ..

ايرتان بفزع : مالك واش حسيتي بشي حاجة ؟ 😨

جهينة : ااااه الفرااشااات ديالولك ...

ايرتان: هههههه مسطية و اللهما عند بووك العقل .. غاابلاتي هاد الولااد لي غانديررو غايطلعو لوالدينا فووق الرااس

جهينة : هههه و علااش ..

ايرتان : انا غانكون متساهل معاهم و انت غاديري حمااقهم معاهم و هكا خلات على ديلمي انا ويااك ..

جهينة : ههههعه .... عادي عادي

ايرتان : دابا تشوفي عادي كيف دايرة ... ياله نوضي نوبتك المدام ..

شدات فبه و دخلو ب2 عندها .. عطاتهم إذن الجلوس و شافت فيهم ...بعد السلام و ديك الهضرة الروتينية بدات كاتسولها

الدكتورة بالتركية : مدام درتي تحاليل الحمل ؟

جهينة : اختبار منزلي فقط .. و لكن كولشي اعراض الحمل موجودين ..

الطبيبة ؛ واخا .. انا غادي ندير ليك الكشف و نيت نعرفو اوضاعك انت و الجنين ديالك .. تفضلي معايا ..

ناضت جهينة و ناض ايرتان حتى هو معاها ... تكاتها فالباياس ...

الدكتورة : حيدي التجاكيط ديالك و عري ليا كرشك ..

دارت داكشي لي قالت ليها .. و هي غير كاتشووف .. متحمسة تشوف اش كاين ...

عاينتها و من بعد دازت للسونار ... شافت الجنين لي بدا يتكون ...

الدكتورة كاتشوف فالشاشة و كاتهضر : اممم كولشي مزياان ... هاهو ...هو هاد الكتلة الصغييورة لي هنا...

بقات جهينة كاتشوف فيه ... و علامات التأتر بادية علييها ... ايرتان حتى هو كان متبع و كولو اذان صاغية .. كايشوف فجهينة و يرجع يشوف الشاشة .. قلبو كايرفرف و فرحان بلي غايجيه ... تلاقات عيونو معاها .. بغات تبكي و هو كايضحك ليها بحب ..

بعدما سالات الطبيبة ناضت و خلاتها تمسح و تقاد حوايجها و ايرتان معاها ... باس راسها بحب و شد فيها خرجو عند الدكتورة ...

دكتورة : ها انت ضروري ليك من هاد الفيتامينات ... الراحة تم الراحة تم الراحة ... ماتحركيش بزاف .. من الاحسن ماتسافريش هاد الفترة لان الشهور الاولى كايكون الوضع حسااس و الخطر واارد ..

شاف ايرتان فجهبنةزعما سمعي مزياان و قال : و بالنسبة للوحم .. هي كتاكل غير الحلااوة .. تصوري دارت البقلاوة فالكيك ... ممكن تنصحيها و تقولي ليها خطورة هادشي عليها ..

جهينة بدات تخرج عينيها فيه .. ضحكات الدكتورة و قالت ..

ماعليش مرة مرة و لكن ماشي تفوتي الحد ... خودي فواكه حلوة و لا تميرات و لا شي حاجة هكا.. و حاولي تبعدي على السكريات السريعة .. حيت مع الفترة الجاية غايولي عندك مشكل فافراز الانسولين و غايولي يطلع ليك السكر الى بقيتي هكاك ممكن يتزاد البيبي فيه السكر و لا غليض و ممكن حتى انت تبقاي تعاني منو حتى ورى الولادة .. يعني خاصك تاخدي الحيطة و الحذر ... و ماتخافوش فترة الوحم ماغاتستامرش فالحمل كامل .. غير الشهور الاولى صافي ... ردي البال لماكلتك و .....

بقات الدكتورة كاتعطيها النصائح و توصيها .. حتى ودعاتهم الى اللقاء الماجي ..

خرجو و ركبو السيارة و قال ليها : يااك سمعتي مزيااان شنو قالت ..

جهينة بملل : واااييه سمااعت ..اسيدي .. غانرد البال لراسي و نرد البال لماكلتي و نبعد من السكر ..

ايرتان قرص حنكها : هكااك نبغيييك

جهينة ضحكات فوجهو ضحكة بالزز و دورات وجهها كاتبرغم و تحلف ..

ضحك و ديمارا بالسيارة ... وقفو فالمول و دوزو وقت طويل فالشرياان ... جاها الجوع و جلسو ياكلو .. ماخلات ماسرطاات حيت شهيتها محلوولة و هي اصلا قبل اوحم كانت وكالة ... كلا معاها هو شبع و هي باقة كاتطحن ...

كيف عادتو جلس شاد التيلي و سيفط ميساج لعز يتأكد من شي امور ...

شاف فجهينة و قال : فاش غانرجعو لدار .. غاتلقاي مفاجئة ..

جهينة : اشمن مفاجئة ؟

ايرتان : ماغاتبقاش مفاجئة لا قلت ليك ..

جهينة : انا شبعت نوض نمشيو ..

ايرتان : هههه وا كملي ماكلتك ...

جهينة : لا صاافي غانتفرغع .. اصلا حاسة بالماكلة واقفة فحلقي ..

ايرتان : واخا الالا .. ناض دفع الحساب و رجع عندها .. شد يديها و خرجو ..

رجعو للقصر مع 3 العشية ... خرجو من السيارة و دخلو ... مع الدخلة كايسمعو كترة الهضرة و كاينة الحياة فالقصر ..

شافت فيها و قلبها كايضرب ..

جهينة : ش..شكون كاين ؟

ايرتان : هههه تهدني الحب دخلي و غاتعرفي ..

دخلات جهينة و قلبها بين يديها ... اول شخص طاحت عينها عليه هو ماماها ... لي كانت جالسة وسط بزاف ديال الحاضرين لي مابانوش ليها .. بقات واقفة كاترعد كاتسنى ديك ردة الفعل من امها لي اكييد ماغاتكونش خير بالنسبة ليها ... ماحسات غير بيدين ايرتان لي ردو عليها احساس السلم .. و دفعها بلطف باش يدخلو

الام زكية غير شافت بنتها و وقفات ... تبسمات و حلات يديها لبنتها ... تقدمات هاد الاخيرة ليها و ترمات بين احظانها و ماقدراتش تشد ديك الدمعة لي دايزة تجري ورا ختها...

الام : توحشتك الحبيبة ديالي ..

جهينة : حتى انا اماما ...*شافت فيها* واش لاباس علييك ..

الام باست حنكها و مسحت دموعها : حمد الله احبيبة ديالي بيخير .. انت لي واش بيخير مالك كاتباني عيانة ..

جهينة : ماعيانة واالو .. اناا بيخير و احسن غااع منين شفتك ...

رجعات عنقاتها

ايناس: احم احم .. وا مابقينا غااع لنا لشي ناس ..

جهينة ضارت عندها كاتضحك عنقاتها و قالت: انت شفتك غير ولالبارح ... ماما راه شحال ماشفنها ..

دازت لعتمان .. عاد قشعات خالها ... باست يدو و سول فبها ... دازت لحنان بنت خالها و عبد الرزاق لي سلمات عليهةغير من بعييد ماحملااتوش و هو نيبت قالب وجهو زعما بدلتيني بواحد من غير ولد خالك ...

رجعات حدا ماماها و جلسات لي كانت نيت حدا خوها و السيد آيدين و عاد ادراري فاواخر الصف ...الا اشرف لي غابر ...

شافت جهينة فآيدين و ابتاسم ليها زعما كولشي تحت السيطرة ..

زكية : قالو ليا مافخباركش بلي انا جايا ... و قال ليا بلي ولدي ايرتان جابك حتى انت لهنا بلا خبارك و بغا يتزوجك و يديرها مفاجئة ...

جعينة:ها ؟ اه ... ههه شتي اماما على مفاجئة كيف دايرة

الام؛ اوى شتي انت لي كنتي تظلي تبكي عليا فالتيليغون.. اماما مابغتش يتزوجني ههه

جهينة كاتغز فيها : اويلي سكتي شوهتيني ..

*كولشي كايضحك *

الخال: اوى اولدي ... كان على الاقل تطلبها مننا ... واخا انت اولدي تركي ولكن الاصول هي هاذي ...ورته حتى انتوما عندكم نفس تقاليدنا تقريبا ..

ايرتان : غير سمح لينا اسيدي .. ولكن انا زربان .. و بغيت الامور دوز فخطرة وحدة .. و نيت راه جبتكم كاملين حتال لعندنا على قبل هادشي ..

عز بدا ضرب فيه من جنب حيت هضرتو كانت شوية قااسحة و جهينة بدات تعض ظفارها و خافتو يعكس و هو كان باغيها لولدو ...

نطقات زكية و قالت : انا بنتي عاارفاها كيفاش كاتفكر .. هي لي غاتكون قالتها ليه و ماباغياش دير العرس ..

جهينة : وراك عارفاني اماما ماعنديش مع كترة الزواق و خسران الفلوس .. و زايدون ماعنديش المعارف باراكة عليا غير حباابي معايا اش بغييت اكتر ..

زكية : والله ابنتي ماهامني غيير فرحتك و ضحكتك ... و لي بغيتيها هي لي تكوون مادام جا من الباب الواسع و طلب اذن واالييك .. اوى هادشي لي بغينا ...

الخال: هذا هو المهم ...

آيدين بالتركية : كيف قلت ليكم عرسهم غايكون غذا و بيناتنا ... كيفما بغااو هماا . واخا كنت باغي نديرو كبيير و علااش لا يهضرو علييه الصحاافة ..

ترجماات ايناس لي من الاول كانت هي لي كاترجم ليهم ...

الام : هههه حتى انا كنت باااغية و لكن الغالب الله .. مابغااوش ..

ترجمات جهينة ..

ضحك آيدين و كملو كلامهم و قدرو يتسترو على حمل جهينة ... و قدرو يقنعوهم غير بالكلام .. و حتى الدور ديال آيدين فأنه رجل قوي و كايبان ذو نفوذ خلاهم يحشمو منو و يتغاضاو على شحال من تفصيل .. مادام جابوهم حتال عندهم و طلبو بنتهم فراه ماناويين غير خير و حتى فرحة جهينة و تحميها للموضوع خلاهم يوافقو على قبلها ...

دازت العشية و هوما هكاك مجمعين .. حتى جرات ايناس جهينة و طلعو كايتسلتو ..

دخلو لبيتها و جلسات ..

جهينة ؛ مالك اختي جااراني هكاا ياك لاباس ..

ايناس: هااادشي كووولو لمك و كاتقولي ياك لاباس ؟ نهار كامل لمك و انا غانتسطى على قبلك حتى جاو شي رجال و قالو لينا انتوما معروضين لعرس جهينة فتروكيا .. تي كييبف درتي لييها ... *دقان *

جهينة : دخل

دخل عتمان : الناس ماابقااوش ساهلين ... كيف درتي ليها يابنت العبد ...

جعينة : شنو دابا غاضوروني ؟

ايناس: واللهما نفااكين مععاك ..

جهينة : واسمعو اسيادي .. *عاودت كوولشي الا على خدمة ايرتان و الخطف قالت بلي خطفها ايرتان و جابها *

عتمان : دابا انت راضية تبقاي معاه واخا ماعاجباكش خدمتو ..

جهينة : اه بدلت رأيي

عتمان : ومااال مك ماديرها من الاول ... و بقيتي شهر و انت تفرعي لينا فراسنا ...

جهينة : والله كزن كاكنت حاملة كون بردت فييك جنووني اصلا انا عللى اعصابي ..

ايناس: ههههه بردي العشيرة علاش على اعصابك واش صافي غاتزوجي و رجعتي لبوركابيك و عائلتك موافقة و هانتي معاه فتركيا .. انت لمك اش باقي معصبك ..

جهينة : الحمل ديالي .. انا اصريت عليهم باش مايقولو والو .. و غانكدب عليها ..

ايناس: و كيف غاديري الانسة ..

جهينة : يااء .. ساهلة .. غاقولها ليها من هنا لشهر غايسحابها حملت ورى الزواج و من بعد غانقول ليها ولدت قبل الوقت ... ذات اييزي ..

عتكان : احياااني علييكم اللفعاات ..

جهينة و ايناس : اللفعة هي طاطاك 😤😤

عتمان : ياك ا انووستي تقلبتي على راجلك .. هي معذورة بالوحم و انت اش عذرك ...*ضرب كتفها كايغنجها* ياكما درتيها حتى انت العفيريتة ..

ايناس دغيا تقلبت و بدات تلعب بشعرها : وااش ... بغييتييني نديييرها...

جهينة شافت فيهم بتقزز و هي تدفعهم لبرى : روعتو خااطري .. خرجو عليااا الله يخرج لييكم الروووح ...

داز الوقت ... تعشاو فجو عائلي و زوين و كل واحد مشا للبيت .. جهينة باتت مع ماماها فنفس البيت لي غاتنعس فيه ..

كانت هي و ماماها و حنان و مرات خالها و ايناس مجموعات عليها ..

حنان : وا شفتي كنت عااارفينك كاينة بينك و بينو شي حاجة منين جيتو ب2 .. كاانت واااضحة وضووح للشمس ..

جهينة : شحاال من مرة كاانقووولك ماكان وااالو فدااك الوقت .. منيين كاتفهم هاذي ..

مرات خالها : وا ماتعصبيش ابنتي حنا غيير كانهضرو ..

زكية : بنتي وااقلة مخلوعة غيير من غذا تفرقو ليا منها .. *عنقاتها*

جهينة : و علااش غاانتخلع ..

ايناس خرجات فيها عينيها و بدات تندب غير بالريط ..

جهينة : ا. ااه .. اماما... انا خايفة من غذا ..

مرات خالها : مكاين لاش تخافي و تخلعي ... هاذبدي هي سنة الحياة ..

حنان : اوى بصرااحة هاذي هي التزويجة و لاحيد بالاك .. اجي ماتشوفيش ليا تانا شي واحد من دوك العزارا لي مستفيين التحت ..

جعينة : كولهم مزوجين ..

حنان : اوييلي ... و فين عيالتهم ما شفت واالو ..

جهينة : ماكاينيينش .. نوضي اختي ترغدي الله يرحم جدك ... واش هاذي بنادم و لا جاوشة ... اوووف لوكلوكلوكلوك .. ماكاتعياايش ..

حنان : يااك ابنت عمتي ..

زكية : صافي فرقو المجمع .. غذا خاصنا نفيقو بكري راه غذا عرس حبيبتي خاصنا نفيقو و نكونو حاضرين و نعاونو ..

العالية : اش غانعااونو الله يهديك ماكاتشوفيش هاد الناس كيف داايرين و شحال ديال الخدم ضاير بيهم ..

جهينة : قولي غير مشاء الله .. دابا ترزيو الراجل فرزقو توما مالكم دايرين كيف الجراد لي دزتو عليها تخليوها صحراء كاتصفر ..

ايناس: هههه جهينة .. تي تكايسي مالك اخبتي مقندشة .. *كاتغمز فيها*

زكية : ياله ياله خليوها تنعس .. ياله ...تفرتكو ..

ناضو خرجو وحدة وحدة ...

جهينة بدات كاتشوف فماماها بنصف عين ..

زكية : بنتي ..

جهينة : نعام اماما ..

زكية : توحشتك احبيبتي .. حتى جيتيني مبدلة ..

جهينة : ك .. كيفاش مبدلة ..

زكية : مااعرفتش ... كاتباني يحال الى كبرتي .. هاهي بنتي غاتزوج و تولي تاهي بدارها و بولاادها ...

جهينة باست يدها : خاصني ندير عقلي دابا ياك 😂😂

زكية : و على شنو بغيتي تبقاي حميمقة يرجعك ليا من الشهر الاول ..

جهينة : لا ماتخافيش على بنتك ... مالما كانلعبو عنا ههه

زكية : الله يرضي عليكم و يسعدكم ياربي و يبعد عليكم ولاد الحرام ... تهلاو فبعضياتكم .. انا دالبا عاااد ارتااحيت ... و تهنا بااالي معااك .. و الله الى كنت باغااياه ليك ..

جهينة : اوى هاهو غايولي راجل بنتك كيف بغيتي ..

ضحكت زكية و قالت بملامح جدية : بصراحة ابنتي انا مخبية عليك شي حوايج ..

جهينة : اشمن .. حوايج ..

هادي شهر تقريبا .. جا عندي عمك و ولدو ...

جهينة : عمي .. وولدو .. على انا عندي عم ؟

زكية : اه ابنتي .. عندك ...

جهينة : فين كانو من شحاال هاذي .. و علااش اصلا جاو عندك بعد هاد العمر كااامل ...

زكية : جاو ابنتي كايقلبو علييك ... بغاو يحييو صلة ارحم معانا و خااصة انت ..

جهينة : علااش انا خاصة .. مافهمتش ...

زكية : عندهم شي حاجة من حقك ... ورت بااك ..

جهينة : اشمن ورت اماما .. ياك بابا ..

زكية قاطعتها : سمعي ابنتي .. هاذي شي 27 عام تقريبا ... كان باك و خوه و احد اخر صديقهم ... صحااب آنتييم ماكيتفارقووش .. لدرجة انهم كانو يجيو عندنا للدار و نجمعو كاملين مجمووعين كانو ب3 خووت .. قررو يخرجو من الخدامي من عند عباد الله و بغاو شي مشروع ديالهم هما .. حطو كل واحد رأس مالو بالتساوي و بداو على مشروعهم لي هو تأسيس شركة ... مهم كانو عندهم الافكار و لكن بااك كان هو لي كايخطط للمشاريع .. كان ذكي و سريع البديهة... و الدراري كانو تايقين فيه و عارفين المشروع ديالو غايصدق ... قدرو يكونو شركة صغيرة و لكن كانت ناجحة بداكشي على قد حالهم .. حتى دفع صاحبهم لواحد الشركة تركية بنفس التخصص باش تبنى مشروعهم و تمولو ... و غايوليو شركاء فاش ينجح المشرووع .. عجبهم هادشي و مشاو فيه ... مع الوقت .. داك صاحبهم بدا كايدخلو الطمع و بدا يتبدل عليهم .. مابقاش كايشوف لجيهتهم و لا معاشر غير شكون و شكون .. حتى جا واحد النهار ..

زكية : جا واحد النهار دخل عندهم و طلب نصيبو و خرج فحالو ... صافي الخوت قطعو معاه ... باباك تعصب و مابقاش حامل يشوفو مزال.. و من بعد عرفو بلي كان كايضور بالمدير ديال الشركة لي مولاتهم ... وكسب تيقتو حتى زوجو بنتو ... و من تما صافي مابقينا عرفنا عليه والو .. باباك و خوه تفصلو من الشركة التركية و رجعو لنقطة ال0 ... و لكن باباك ماستسلمش و حلف حتى يكبر الشركة من الجديبد و لي بغا يوقع يوقع .. باباك كانت شخصيتو قوية .. و ماكانش كايتهد .. بعد وقت طويل قدرو يهزو شركتهم و ولات احسن من قبل .. مشاريع باك ماكانتش كاضور .. كانت نقطة قوتو هي الذكاء ... اوى منين استقرو هو و عمك .. تفاجأ بالغذر من خوه .. ااه ابنتي .. عمك لعب على خووه الكبير و خدا ليه كوولشي .. خلااه بحال الى عمروو دمر و ضرب تماارة .. تدمر بااك و ماتقبلهااش .. 2 من اقرب الناس ليه غذرووه و طعنوووه و كل وااحد بووحدو هاذا هو الطمع ابنتي لي مشا حتى صاب شي واحد مكايبقى يفرز بين الصديق و لا العدو .. باك ماتحملش و مات غير بالفقصة .. و بقيت وااحلة بوحدي ... مرات عمك كانت مرة مامزياناش و مشرارة .. هي لي كانت كاتعمر ليه راسو من ديما كانت كاتدخل بين الخووت ... دابا راها ماتت الله يسمح ليها ...بابا مشى عند الله و خلاني حاملة بيك ... و ضعيفة ماقادراش ندافع على حق راجلي و حقك .. ماقلت والو و خفت ياخدك مني .. سكتني بشي ملاين .. خديتهم و غبرت فحالي .. حتى ولدتك و ربيتك .. و الباقي راك عارفاه...

جهينة بقات غير كاتصنت ... حسات بعضب كبيير .. بشمتة ديال باها لي ماكانت عارفة عليه غير انه مات بسكتة قلبية ... عمر ماماها ماعاودات ليها شي حاجة علييه ... كرهات هاد عمها و هاد صديقهم .. لي دارو هاذشي فباها و حرموها منو و سرقو طفولتها معاه ... وقفات كاتبكي ... ووجهات كلامها لامها بعتاب ..

جهينة : علااش اماما ماقلتي لياا والو ... علااش انا ماااعارفة واالو و حتى بانو عاد عاودتي ليا هاادشي ..

زكية : مابغيتش نربي فيك الحقد ... مابغيتكش تكبري و انت قلبك كحل من جيهة شي حد .. بغيتك تكبري و باالك هاني بلاش من دوك الاحاسيس الكحلة لي غاتاكلك شوية بشوية ... وانا وياك غير وليات ماغانقدو على حد ... ربي لي كايخلص و هاربي جابو حتااال بين يدييك ..

جهينة و هي كتبكي : ماكانش علييك تخبي عليا اماما ...

زكية : غير سمحي ليا ابنتي و لكن خوفي عليك حكمني.. كنتي صغيرة ماغاتفهميش ... و انا دابا وصلت ليك التقليد ابنتي انت كبرتي دابا و غدا غاتولي براجلك ... الى بغيتي تلاقايه و تاخدي حقك .. ماغانحبسكش ... مادام كاين لي يوقف جنبك ماغانخافش علييك ...

..جهينة :هادوك الفلوس يديهم معاه للقبر ... انا لي ضرني فخاطري .. بااابااا لي ماشفتو ماشمييت رييحتو ...

ماضت دغيا خرجات من البيت ... تنهدات زكية بعدما نادت باسمها ... و هينيها مغرعرين على الم بنتها .. عارفااها من دييما كانت منشوقة من جبهة باها واخا عارفاه ميت .. كانت من ديما تهضر علييه و تسول امها عليه .. كيف كان و كيفاش كان كايلبس شمو كان كايعجبو .. و لكن كولشي الذكرايات لي عطاتها تخيلهم كانو زويينين .. و لكن منين عرفت سبب موتو ... حسات بلي كان ممكن تشوفو لولا انانية دوك الطماااعين ..

هبطات جهينة كاتجري من الدرووج باغية غير تخرج للجردة تبكي فالهواء النقي ..

فنفس الوقت كان ايرتان خارج من عند باه و شافها هابطة كاتجري .. تبعها كايغوت و لكن بصووت خااافت ... وصل عليها و جرها من دراعها دورها عندو و هو ناوي يوبخها على اهمالها .. حتى شاف دموعها و تخشات فيه كاتبكي ... عنقها حتى هو و ملامح القلق بااديا علييه ...

ايرتان : جهينة ؟؟ مالك ..اشنو عندك ..

ماجاوباتوش بقات على حالها مخشية فييبه و كاتبكي ...

ايرتان : هضري معيا قوولي ليا ماالك ... *جرها* اجي لهنا اجي ..

جرها ودخلو للصالة .. جلسها و جلس حداها .. بقات حاطة راسها على كتفو و كاتبكي ...

ايرتان : واش قال ليك شي حد شي حاجة ؟

جهينة : ماما ... عاودات ليا شي امور ..

ايرتان : شنو هما هاد الامور لي غايهبطوك كاتجري و كاتبكي هكا ...

جهينة مسحات دموعها و شافت فيه : قالت ليا جا عمي و ولدو لعندها ..

ايرتان : عمك .. و ولدو ؟ فين كانو حتى جاو حتال دابا ..

جهينة : ماعرفتش .. ولكن قالت ليا ماما جا يسول فيا و يحيي الرحم معايا ... تلقاه حس بالموت و جا يصفي الخواطر باش يمشي مرتاااح .. و الله لا كانت لييه .. عمريي نسمح ليبه 😭😭

ايرتان : تهدني البنت .. و قولي ليا علاااش اش دار ليكم ...

يتبع