قدري أن أحبك الجزء 23

دوزو العشية كاملة مع بعضهم ...

رجعات مدام وفاء مع الشيفور ديالها و ايرتان رجع و جهينة لدارهم ... دخلو عيانين ..كانت جهينة كاتبدل حوايجها حتى دخل ايرتان عندها .. تكا فالسرير و هي جات جلسات حداه ..

ايرتان : غدا غانديك عند ماماك..

جهينة : و شحال المدة لي غاتحتاج باش تقنع ماماك ..

ايرتان : ماعرفتش بالظبط ممكن بزااف نجلس معاهم فالدار باقي ماعرففت .. مهم انت غاتبقاي عند الوالدة ديالك ماغانتبرزطش معاك ..

جهينة : انا ماعنديش مشكل نكون معاك .. بغيت نبقى معااك

ايرتان : كلمة وحدة قلتها ..

تنهدات باسف و قالت : واخا اسيدي .. راحتك ..

ايرتان جرها لعندو عنقها و باس راسها : ماعرفش حياتي بلا بيك كيف كانت غاتكون ..

جهينة : و اش داايرة لييك غااع .. راه غير مبرزطاك بصدااعي ..

ايرتان : واش كانبغي فيك اكتر من صداعك .. الالا طليني بيه ..

جهينة : هههه انت لي الله يخليك ليا و انا لي حياتي ماعرفتش كيفاش كانت غتكون بلا بيك .. بدلتيني .. وليت كانحس براسي نيت امرأة بحال العيلات زوينة و عندي علامن نعول ماشي كيف قبل .. كنت عوالة غير على راسي .. و ديما مخبية فشراوطي و ماتيقاش فراسي..دابا يكفيني نسمع المديح ديالك .. كافيني و مابقا كايهمني رأي حتى حد فيا من غييرك ..

ضحك ايرتان و رجع شعرها لور خلا قبل فحناكها و فشفايفها شد فخدها و قال : فرحانة معايا ؟

جهينة : ههه اغبى سؤال سمعتو منك .. انا ماشي غير فرحانة .. انا مرتاحة و عايشة السعادة الحقيقية معاك ... لدرجة هاذ الايام وليت خايفة ... خايفة كولشي هادشي يتقلب علينا .. و

ايرتان سكتها: شششش .. مابغيتش نسمع هادشي .. ماغايوقع والو .. غانحافظ عليكم و على سعاادتكم .. و الى جا النهار لي غضبتي و بكيتي بسبابي .. فغايكون غير بسبب مووتي ...

جهينة : الله ينجيك و يخليك لينا .. ان شاء الله نمووت انا قبل منك باش مانتعذبش وراك ..

ايرتان : و لايني راك انانية مع راسك .. و انا نشعل فراسي ..

جهينة : اوى فهادي اسيدي ضبر راسك .. مهم قلبي انا رهيف و بلا بيك ماغاديش يستحمل ..

ايرتان : و على قلبي انا غايستحمل .. ماغايقدش يصبر و غايوقف باش يتبعك ..

جهينة : ههههه الله ينجينا اويلي اش وصلنا لشي مووت .. خلينا نستمتعو بشبابنا و صغرنا و داكشي لاخر خليه للي خلقنا و هو لي عالي و عالم ..

تيرتان : عندك الحق .. و عليها نيت نوضي سدي داك الباب بغيتك فشي حاجة ..

جهينة هزاات راسها كاتضحك و قالت ليه : ههععع و هاد الحاجة ماكاتبغاش و الباب محلول ..

ايرتان : لا ... ضروري يتسد ...

جهينة تمددات : اوى لي بغا الحاجة ينوض يخدم عليها .. انا مافيا لي يتحرك ..

ضحك ايرتان و قال : خودي رااحتك دااابا .. غير غاتحطيها و تشوفي والديك اش غاندير فيك ..

جهينة بدلع حطات يديها على راسها و تقلبات على جنبها كانت بملابس خفيفة كاشفة جسمها و سدرها ..شافت فبه شوفة مغرية و خصلة فيديها كاتلويها قالت : اشنوو غاديير ... اآاا بوونغ بووونغ ...

هي كاتحلون و هو مقابلها على وجهو ابتسامة منحرفة .. جهلاتو و انقض على عنقها ماعرفاتو واش كايبوس و لا كايعض و هي كاتهر و تضحك و كاتقول ..

جهينة : اويلي بشوية الرااجل سد غير الباب بعدااا .. تكااايس على البنت هههه اويلي هذا غايولدني بلا وقت ...

⛅اصبح الصبااح ...

فاقت جهينة كاتكسل حتى زدحات ايرتان بيديها ... شافت فيه و تفكرات اش دار ليها البارح ..هزات رجلها و هي تعطيه بركلة لاحتو من السرير .. و هي تجر عليها الغطا جلسات ..

ايرتان :صبحنا عالله .. مال مك ..

جهينة : اشنو غايسحاااب ليك .. نصبح نبسوك و نعنق فييك ..

ايرتان :هههه نااري على امرأة عطاني الله .. *ناض عندها فوق السرير يراضيها *

هزات الوسادة خبطاتو بيها : لمك انا تحغر عليااا ااه ..

ايرتان : تي رصاااي ههه صافي كنعتااذر زدت فيه شوية و لكن انت المسؤولة .. كانقولك ليك ماتجعرينيش و انت كاديري لي قال راسك ..

جهينة : انت لي مامعاكش اللعب المهاوش ..

ايرتان : هههه و على سهلتي الرجل البتووول .. اش كايسحاب ليك لمك انا راه ديما كانقولك شاد معاك الخاطر على حملك و لكن فاش غاتولدي غاتولي هضرة اخرى ..

جهينة : لا لا انت غايخصني معاك شي حل .. نوض تغعد بعد مني ...

ايرتان ضحك و عنقها رجعها لور متبتها من الحركة ..كايراضيها بطريقتو و جهينة دافعة كبيير ...

ايرتان : غانتوحشك المشعكة..

جهينة : اوى هي الى قضيتي الغرض دغيا ..

ايرتان : و دعي مع راجلك لا يدير شي مصيبة فهاذاك ..

جهينة بجدية : ايرتان ماتنساش باي هاذاك باك .. و زايدون ماخايفاش عليك عاارفااك ماشي ساهل يستافزك شي حد و كاتخد الامور بروية .. ماخايفاش عليك و تاايقة فييك .. و سل شوكة بلا دم ..

ايرتان : نفس كلام البوص .. بغيت نقول بابا ..

جهينة : اوى شفتي .. تايقين فشافاك كوردو ديالنا ..

ضحك ايرتان و ناض و نوضها معاه للحمام ..

دوشو و خرجو لبسو حوايجهم و مشاو للكوزينة يوجدو الفطور فطرو و مشات جهينة للبيت جمعات لي غايخصها فساك ..

سالا ايرتان كملو لبسهم و خرجو ..

كانت ام ايرتان باقية في فرااشها .. حتى قفزت منين سمعات الباب تخبط .. ناضت جلسات و شافتو جاي لجهتها .. خافت من تعبيرو لي ولات حافظاه حيت ماكاتشوف غيرو ...و اكييد متأكدة بلي امو وصلات ليه كولشي و قالت ليه بلي رجعات معطلة البارح ... جرها من دراعها بكل قسوة وقفها قدامو و غوت فوجهها قائل :

عمر : فين كنتي البااارح ؟

وفاء بذعر: ا.. ماكنت ..فيين ..

عمر شد ذقنها بشدة كاينفت غضبو و قال : ماتجرئيش تكذبي عليا و الا رااك عاارفة شنو غانديير فييك .. رااك مااكبرتيييش علييها ..

شافت فبه بعين دامعة و حدراتهم ... جسمها كايرجف و عقلها مرون .. كاتفكر فولدها و الى قالت ليه اش ممكن يدير فيقها من تفكيرها فاش شدد قبضتو و ضرب راسها مع الحيط و قال : هضرييييي .. فييين كنتييييي .. معامن تلاااقيتيييي ... مع داااك صحااايبك .. رجع تاااني اااه ؟

بدات كاتبكي و قاالت ..

وفاء : لا .. لا .. ا..انا .. تلاقيت .. بايرتان .. ولدي .. والله ايرتان لي جا ..

طلق شوية و قال بسهوة : ايرتان !

هزات راسها بخوف و رجع شدها : علااش مجااااش هنا لعندك ... من امتى كاتخرجي تلاقاي بولدك بلااا خبااري ..

وفاء: والله .. عاد اليارح جا .. ماكان حتى حد و انا عيطت ناخد اذنك و ماجاوبتينيش .. و خليت ميساج .. و الله تلاقيت غير ايرتان ..

عمر : و علاش ماجاش .. فين هو .. و شنو بغا منك .. ماتقوليش ليا عاد تفكرك فين كان غابر هاد الشهورة كاملين ..

وفاء: ك .. كان .. غير هنا .. كا..كان باغي .. غير ..

صرفقها : هضريييي

شدات حنكها كاتبكي و قالت : ب.. بغا يعرفني على مر..مراتو ..

توقف و على محياه صدمة خلاتو مخرج عينيه اكتر وقال : مرااتو !

شافت فيه من طرف عينها و كانلب الله غير يفكها منو ..

شاف فيها و رجعات تقبطت انفاسها و قال : علاه تزوج ؟

هززات براسها و شد شعرها : امتى هااااادشي .. و من امتى و انت عااارفة .. علاااش خبيييتي عليااا ..

وفاء كاتبكي و شدا يدو كتخفف الالم : والله ما كنت عارفة .. تزوج غيير هادي 5 اشهر .. و اللهما كنت عااارفة

طلقها و تم غادي جااي : مزيااان .. ولد عمر التااازي كايتجوج و بااه ماسايقش الخباااار .. هاد الكلب بااغي يشوهني اكتر مااهو مشوهنييي ... باااغي بوطي راسي للارض و يدمر السمعة لييي سنييين و انا نبني و نصنع فييها ... خرج من داري يسحاب ليه خرج من بين يديااا و يدييير ليي بغااا ... يكفي انه داير يدو فيد عدوي و مشوهني مع عديااني (عمر عارف ولدو خدام مع آيدين فسوق الشغل فقط و ماعندووش علم بالمنظمة )... ماااحد كنييتو التااازي .. ماحدو ولد عمر التااازي عمرووو يحلم يخرج من بيين يديا ... غادي يخصو يكون مع بااه و فجنب بااه... متشي فجنب دااك التركي ... محارب بووحدي و عندي ولد قد السخط و مالاقيش فجنبي .. لااش وااالدو الى ماكانش يسخن جناابي .. و زااايدها مزوج بلاااا شوااري و لااا خباااري .. معيط لييك غير انت .. وااش غير انت لي كاااتجييه فهاااد الدااار .. انا ماشي بااه و لي التحت مااشي جداااه و ختوو .. نكرناا صااافي .. هذاا خييري نكبرو و نقرييه فالاخر .. يزيد خلفة .. هاذي لي مااغاتكووونش ليبه .. غيير بلاااتي ..

تقدم ليها .. ووقفها مقادة و قاد ليها شعرها بحال الى ماشي هو لي كان كايغوت دابا .. و قال : مااعلييش كوولشي غايتبدل .. ولدنا غايرجع يعيش بيناتنا و غادي يولي فجنبي انا .. هو لي غايورت خيري لي دمرت علييه .. ولدي انا هاذاك .. ياك ؟

هززات راسها بخوف و قال : مزياان ... شربتي دوااك البارح ؟

اشارت بلا و هي خايفة و قال بتهدييد : اشنو قلنا على نسيان الدوااء .. بغيتيني نتعصب علييك تاني و نشربو ليك بطرييقتي؟

حركااات رااسها برفض تااام و نيشااان جلسات و جبدات حبة و شربااتها كاترعد حتى كبااتو عليها .. تبسم بشر و قااال: .. مزياان .. هكاااك نبغييك ..

وصل ايرتان و جهينة بعد طول طريق ... و هبطو من السيارة .. هز ساكها و دخلو معانقين

ايرتان : غاتفرح بييك ..

جهينة : توحشتهاا بزااف ..

ايرتان دق : هانتي غاتشووفيها ..

تحل الباب و كانت العالية لي تفاجأت بشوفتهم و قالت ..

العالية : اهلااا اهلاا مرحبا و الف مرحباا ..

سلمات علييها ..

جهينة : كيداايرين ..

العالية : حامدينو شاكرينو .. دخلو دخلو ..

دخلو للصالة و لقاو حنان و زكية كايتفرجو .. غير شافتها و هي توقف فرحاانة .. دغية عنقاتها جهينة و تخشاات فأمها ..

زكية : الله الله على بنيتي حبييبيتي ..

جهينة : توحشتك بزاااف اماما ..

زكية : كوزن شفتي انا ابنتي .. كنت باغية نااكل جنابي و انت حاملة و بعيدة عليا ..

جهينة : اوى هاني جييت و غانجلس معاك شي يامات ..

زكية : مرحبا ابنتي مرحبا احسن مادرتي .. ولدي ايرتان مرحبا بيك ..

تقدم سلم عليها و قال : الله يبارك فيك اخالتي ..

زكية : جلسو جلسو ..

شدات فبنتها حتى جلسات و شدات فكرشها ..

زكية : مااشاء الله واتاك الحمل ابنتي ..

حنان : على هي واتاها غيير الحمل *غمزاتها*

خنزرات فيها جهينة و قرساتها مها و قالت ليها تنوض تعمر اتاي و ناضت كاتنفخ ..

زكية : اوى .. اشنو خباارك و كيف غاديا مع شي حمالة ..

دوز ايرتان معاهم العشية بعدما تغداو مجموعين .. و معاهن خالها و ولد خالها .. حتى وصلات 5 العشية و نااض .. ودع الجالسين و مشات معاه جهينة للباب وحتى ماماها ..

زكية : واسير و رد بالك اولدي للطريق الله يرضي عليك و حتى تسالي شغالك و ترجع كون ماعندك الخدمة و اللهما نخليك تمشي ..

ايرتان : ههه عارف اخالتي .. نساليها فاقرب وقت و نرجع .. انت ديك المرة وصيتيني نتهلا فيها .. دابا انا لي كانوصيك تهلاي ليا فهادي ..

زكية : كاتوصيني على بنتي ههه راه عويناتي هاذي ..

ايرتان : رااه عارفها كاطير .. ماتخليهاش توصل للحلاوة .. و ماتكترش الخبز و اللوبيا و الليمون و موناضا ممنوعة .. السكر ممنوع .. عشاها يكون خفييف و والوجبات قطعيهم ليها ماتخليهاش تكتر ... و من الاحسن تنعس خفيفة .. و الى ماعندكش مع الروايح المجهدة ماتخليهاش تنعس حداك راه كاتطرطر ..

ضحكات زكية و جهينة ضرباتو لسدرو بغيظ ..

ايرتان : ههه مالك .. نسيبتي عزيزة عليا و مابغيتش ليها المضرة .. هههه

جهينة: كاتقلب عليا نعطيك شي ركلة تاني .. 😠

زكية : ههههن لاواه ابنتي حشومة حتارمي رااجلك .. راه حتى هو دايز رضااه بحال والديك .. هاذشي راه موصينا بيه الرسول عليه الصلاة و السلام ..

عوجات جهينة فمها و ايرتان بدا يضحك و قالو ب2 : عليه الصلاة و السلام ..

زكية : الله يرضي عليك اولدي و الله يوصلك على خير ..*غمزات بنتها و ضحكات فوجهو و دخلات*

ايرتان : سمعتي الي تظل تركل و تعاير راجلها .. تبقاي هكاك غانسخط عليك ..

عوجات فمها و بلقات عينيها فيه .. ضحك و عنقها ..

جهينة : باات معنا و غدا سير فالصباح ..

ايرتان : لا ابنت اقلبي غانمشي دابا ... تهلاي فراسك و فهيفين.. لبسي مقاد راه معاك ولد خالك فدار ... شربي دوتك فوقتو ...راه غانبقا نعيط ليك كل نهار ..

جهينة : وااخا اسيدي .. غانتوحشك ..

خطف بوسة و قال : انا لا .. انا عااد غانتهنا من واالديك ..

جهينة هزات عينيها فبه بتهديد ؛ باغي تموت ...

ضحك و عنقها : الى كانت على يديك مرحبا هههه .. ياله دخلي فحالك .. و يااربي نجيك على غفلة و نلقاك كاديري شي مصيبة و لا مادايراش بوصايا و اللهتا ناكلك حية كاتفركلي ..

جهينة ؛ مالي دجاجة .. سير فحالك سير ..

ضحك ايرتان باس راسها و باس كرشها و هبط حل السيارة و دخل فيها .. شير ليها تدخل .. دخلات عاد ديمارا و خرج ..

وصل للدار مع 9 الليل .. هبط من السيارة عياان دخل للدار دوش و خرج دار باش يتعشى .. و عيط لجهينة يعلمها بلي وصل .. عيط لآيدين حتى هو ... تعشى و مشا تكا فالصالة يتفرج اولا نقولو كايخمم للغد و اشنو هازو ليه..

تكات جهينة حدا ماماها ... و هي شادا ظهرها ..

جهينة : الله ياميمتس و ظهري شحال و لا يظرني ..

زكية : بديتي تقلي ابنتي ... اجي قدامي نماصيه ليك شوية ..

جات قدامها .. عراتو ليها و ذهنات يديها و بدات تماصي ليها ..

جهينة : الله اماما يديك شحااال حنااان ..

تبسمات زكية و كملات ليها ..

زكية : ياله بديتي ابنتي .. بلاتي توصلي لتامن و التاسع و غاتعرفي بحق الميمات ..

جهينة : عرفتوو اماما .. غير من الوحم و لي داز عليا فييه .. من تما قلت بااز لماما و الله يسمح لينا منكم ..

ضحكات زاكية و باست كتف بنتها ..

سالان ليها و دازت تكات حداها .. دخلات حنان بطبسيل فواكه و مداتو لجهينة ..

جهينة : جبتيه فوقتو ..

حنان جلسات حداهم : ههه غير بشوية لا توحل ليك واهياناري ..

جهينة : اش قالك راسك قبايلة تقولي هكاك قدام الراجل ماحشمتيش ..

حنان : هههه ياك غير راجلك عاادي .. اصلا موحال فهم .. هادشي راه متداول غير بين العيلات ..

زكية : هاد الجيل مابقيتو نحشمو ..

حنان : و لكن راه نيت .. زيانت العفريتة وواتاتها الحبالة و غلااضت شوف ولات قد الحلوفة .. غاتبقااي هكا حتى ماتبقايش دخلي من الباب و يهرب عليبك الرااجل .. هانا قلتها ليبك

جهينة : الحلوفة هي مك .. فال الله و لا فالك .. فمك لاحسو كلب ...جيتي تصعرييني تااني ..

حناان : هههه بلا ماتجيبي عليا مسبتك .. انت لي علا سبة .. انا غير نصحتك ... دابا نهبط نقول ليها قلتي ليها حلوفة ..

جهينة : نوضي تهزي دردبي مع الضرووج .. يعطيك مصيبة ..

خرجات حنان كاتضحك و ضارت عند امها : يااخ اماما شحاال كاتعصبني و كلتطلع ليا السكر ...

زكية : اويلي رجووع الله غير ضحكات معاك ا مالك شعلتي ..

عوجات فمها و ضحكات زكية كتقرص فيها بالضحك .. دارت جهينة عند امها و قالت ليها : بالصح غلاضيت ؟.. واش خيابيت .. بالصح غاينفرني ايرتان ..

زكية : وعلى كاينة شي حاملة ماكاتغلاضش .. عادي ابنتي دابا تولدي و ترجعي كيف كنتي .. و ماخيابيتي واالو .. بالعكس ماشاء الله على بنتي ديما غزاالة ...

جهينة : ااوى صااافي قنعتيني اصلا عمر ايرتان ماتشكا كايقول ليا غلاضيتي و عندو عادي ..

زكية : ابنتي راجلك بعقلو و مرزن ماشاء الله عليه.. ماشي برهوش لي غايبقى يقولك ديري و لا فعلي .. و انت راك بشر ماشي منيكة...

جهينة :ههه وااخا اماما .. و هاكي تفاحة ..

⛅يوم جدييد ..

فاق ايرتان على اتصال امو .. جاوبها بتتائب ..

ايرتان : نعام اماما ..

وفاء: باباك .. بغا يشوفك .. راه عرف بلي تشاوفنا ..

ايرتان تنهد و حك راسو : اشنو بغا ..

وفاء: بصراحة .. هو منظم هاد الليلة حفلة و بغاك تحضر كولدو و تكون فجنبو ...

ضحك ايرتان و قال : كولدو و فجنبو .. من نيتو ههههه

وفاء: عافاك اولدي .. ماتحطنيش فموقف خايب .. طلب مني نقنعك .. ماتردعتش فوجهي الله يرضي عليك ..

ايرتان لاقا فكيه بغيظ و قال : واخا ... غانجي لهاد الحفلة .. فين فدارو نيت ..

وفاء بفرح : اه .. اه اولظي .. عافاك .. ماتجبدش معاه الصدااع اله يرضي هليك اولدي ..

ايرتان : تقي فيا و ماتخافيش .. ماغانجبدش الصداااع

وفاء: حمد الله .. شكرا اولدي .. مراتك حداك عطيني نهضر معاها ..

ايرتان : لا .. ياك قلت ليك غاتمشي عند ماماها ..

وفاء: اه سمح لي مشات من بالي .. مزيان تفوج شوية .. انا خاصني نقطع نتبلاقاو الليلة ..

ايرتان : ان شاء الله ..

قطع ايرتان و شاف شحال فالساعة ..

ناض للحمام غسل سنانو و غسل و جهو و خرج .. صايب قهوة كحلة و جبد تيلي كايعيط لجهينة .. لقا تياي مشغول و قال ..

ايرتان : معامن كاتهضر هاد المشعكة على الصبااح ..

خرج يجري واحد السااعة .. رجع لادار دوش و بدل و هز تيلي تاني .. عيط ليها و جاوباتو ..

ايرتان ؛ معاكن كنتي تهضري قبايلة ..

جهينة : عيطتي ليا ؟ هضرت مع ايناس و علمتها بلي انا غالمغرب .. هاذي هي صباح الخير احبيبة داخلني طووول و عرض ..

ايرتان : اوى انا غير سولتك .. توحشتك ..

جهينة : حتى انت ..

ايرتان : البارح نعست مفشكل ..

جهينة: ههه حتى انا ..

ايرتان : نعستي حدا مك ؟

جهينة : وييي .. دردشت معاها و نعست معنقااها ..

ايرتان : اااه لقيتي البديل ...انت عندك مك و انا شكون غانعنق ..

جهينة : عنق المخدة 😄

ايرتان : ههه .. عيطات ليا الوالدة و علماتني بلي بغاني نجي لحفلة منظمها ..

جهينة : حفلة ؟

ايرتان : اه .. غايكون باغي يبين لصحابو بلي عندو ولد و يتفاخر بيا قدامهم .. من ديما خاادو فعايلو كاتهمو المظاهر اكتر من اي حااجة .. و انا غانلعب على هاد النقطة ..

جهينة : امم و اشنو غادير ..

ايرتان : حتى لتكا و يحن الله .. ياله قطعي عندي مايدار ..

جهينة : واخا تهلا فرااسك و الله يعاونك ..

ايرتان : يخلي ليا بنت قلبي انا .. حتى انت تهااي فراسك ..

قطعو ب2 و كل واحد دوز نهارو ...

وصل الليل .. ايرتان وجد راسو للحفل .. لبس لباس مناسب و خرج و هو مستاعد و مؤهب لهاد الحرب الباردة لي غايشنها على باه ...

ركب سيارتو و مشا .. وصل قدام اكره مكان لقلبو .. هبط و كيف العادة .. ماحدو داخل و هو كايتفكر كل مرة خرج منها كيفاش كايخرج .. و هاد المرة داير فبالو بلي قريب غايخرج منها و معاه امو و غايخرجو فمرة ... دخل للباحة فين منظم الحفل .. بحال كولشي الحفلات المملة البروطوكول و البريستيج و الماركات ديال اللبس و افخر المشروبات و المأكولات .. جات امو عندو كاتجري باناقتها المعهودة .. عنقاتو و قالت :

وفاء: تعطلتي اولدي شحااال و انا نتسناك .. حتى قلت موحال يجي ..

ايرتان : انا عندك كلمتي الوالدة .. فين هو ..

وفاء: اجي ..

جراتو معاها للحفل .. كان عمر واقف مع شي 2 رجاال و بنت انظمو ليهم .. غير شافو و تعلات على وجهو ابتسامة ..

عمر عنقو بفخامة .. و ايرتان مابادلوش بل ملامحو كانت كاتوحي غير للاشمئزاز .. كمل مسايرتو ليه .. ماقال والو و ماتبسمش نهائيا ..

عمر : مرحبا بولدي .. واخيرررا وصلتي .. *دار عند صحابو* هذا هو ولدي .. ايرتاان التاازي *ودار شاف فيه بفخر*

السيد لطيف رجل طاعن فالعمر : ماشاء الله امتى كبر وولا قد هكا ..

ضحك عمر و قال : ههه شفتي .. انا براسي كنتاساءل كايغبر و كل مرة كايرجع اكبر من لي سبقو ههه

السيد احمد ولد لطيف رجل قريب لعمر فالسن : سمعنا بلي مستاقل و داير مشاريعو منها لي مع آيدين تيكينز فتركيا ومنها فامريكا ...

ضحك عمر و قال و هو كايربت على كتف ايرتان : بطبيعة الحال .. ولدي ربيتو على الاستقلالية و يعول على رااسو .. و ماخيبش ظني ..خلا راسي الفووق .. قدر ينجح و يمشي بعييد وخا بااقي صغيير .. الله يرضي علييه ههه

ايرتان كايدير ليهم ابتسامة جانبية مساير هاد النفاق و هاد البريستيج ديال الاغنياء .. ديما كايمتلو السعادة على بعضهم و الحياة المتالية و ماكايجريو غير على مصالحهم ..

السيد احمد : اممم .. تباركالله علييه .. و لكن علااش ولد عمر التازي .. خدام مع آيدين تينكيز .. على ماشي هو الذ اعداءك ..

تقرص اب ايرتان و بدا يضحك ضحكة صفراء ..

تدخل ايرتان و اخيرا و قال : أفضل وسيلة باش تخدع عدوك هي تخليه يظن بلي هو لي كايخدعك ... نتمنى نكون جاوبتك ..

بداو كايفكرو فكلامو و قلبوها ضحك ... و ايرتان وقف بشموخ كايبادلهم ابتسامة جانبية من الفوق .. و هو كايقيس و يعبر كل واحد فيهم ..

نطق احمد و قال : كنت عارف بلي ولدك ذكي .. و لكن راه فالحقيقة نابغة .. و ماتخافش عليه .. كانظن بلاصتو فجنبك .. غاينفعك بززاف ..

عمر بفخر : ههه اكييد ولدي بلاصتو ماهي غير حدا بااه ..

احمد دار لعند بنتو فجنبو : شفتي ابنتي الذكااء و دقة و التفاني فالعمل .. بما انك الوريتة الوحيدة فخاصك تكووني بحالو تمااماا .. اولا ؟

فيقها من سهوتها .. من الوقت لي انظم ليهم ايرتان و هي حاضية داك 6 اقدام و نصف من الرجولة الطاغية..داك البارد الوسيم .. لي حركها صوتو اول ماسمعاتو و لي جذبها غير من ريحتو المميزة وطبعو الغامض ..

احمد : نيرمين ؟ !!

فيقها من سهوتها .. بعدت انظارها على ايرتان الغير مبالي بالموقف .. و رجعات شعرها البني ورى ودنها و قالت بارتباك ..

نيرمين : نعم ابابا ..

احمد : كنت كانقول ماكرهتش تكوني بحال ايرتان و تخدمي بجد و دكاء تماما بحالو .. *شاف فعمر* ماكرهتوش يعلمها و يعطيها نصائح .. هي واخا خداما معايا لسنين و قرات فاحسن الجامعات ولكن باقية كاتفتاقر للخبرة فهاد المجال ..

عمر : علاش لا ... كانظن غايكونو صداقة مثمرة تماما بحال والديهم هههه

ضحكو البقية معاه ... شافت امو فيه بداك الوجه المخشب ... و لعنات زوجها و على دوك الافكار لي كاتدور فراسو ... اكيد كايخطط يستاغل ولدو كيفما استاغل باها و استغلها و ها الدور جاي على ولدها .. كانت نيرمين كاتبسم و تشوف فيه بإعجاب .. غير من مجرد فكرة تجمعهم صداقة .. تحمسات و بدات كاتخيل المواقف لي ممك تجمعهوم .. اما ايرتان غير مبالي و نسا الغكرة غير من مجرد انتهى الكلام عليها ..

لطيف : بصراحة انا زدت اقتانعت بالشراكة لي غاتجمعنا .. و اكييد غاتكون صفقة مربحة ..

عمر ضحك بتفاخر و قال : ههه اكيد اسي لطيف ... غاتكون ضربة قوية لاعداؤنا ... و صفقة مربحة من جميع النوااحي ..

احمد : انا متفائل .. هه

هزو كيسانهم كايشربو و هما كايضحكو ..انساحب ايرتان في هدوء هو و امو و دخلو للداخل .. لقا جداه جالسة مع بعض العاقسات من عمرها .. كانت امرأة طاعنة فالعمر لكن باقية شادة راسها .. بلباس راقي مناسب ليها بشعر ابيض قصير ... وقفات و حلات يديها لحفيدها بابتسامة عريضة ... وقف ايرتان كايشوف فيها ببرود .. كايفكر فهاد النفااق لي ولاو ملفيفين بيه ... شددات امو قبضتها على ذراعها بتحدير من نضرات جداتو لي بداو يتغيرو خوفا من الشوهة قدام ضيوفها .. قرب ايرتان بعينين مظلمين .. عنقها حتى تخللات وقفتها ... شدات فبه حتى رجعات توازنها و قلبانها ضحك ..

الحاجة تورية : هههه العفرييت توحشني .. و نسا بلي جداه ولات صحيحة على قد الحال .. ههه

ضيفة : ههههه ماشاء الله فين كاان مخبي .. عندك حفيد هكا و مخبياه .. ياكما خفتينا نخطفوه لشي وحدة من بناتنا ..

ضحكات و قالت: هههه حفيدي ديما مشغول مع شغاالو بعيد علينا داكشي علااش .. و لكن هاد المرة رجع فخطرة و اكيييد غاادي نشوفو ليه عرووسة تليق بيه و بالعائلة .. ياك احفيدي ..

ضحك ايرتان ضحكة خالية من المرح و باااردة .. و حاجة وحدة لي كايتشوق ليها .. هي وجه اجداتو و باه فااش غايقوول ليهم تزوجت و خربت مخططاتكم ...

سالا الحفل ...في وقت متأخر من الليل.. جالس عمر و الحاجة تورية فصالة و معاهم ايرتان و وفاء ..

نطق عمر بنظرة باردة لولدو قائل : كون ماقنعاتك هاذي ماكنتيش غاتجي .. اشنو دابا .. ولينا حنا اعذائك و هادوك عائلتك ..

ايرتان : احنا ماكانختاروش العائلة لي كانتزادو وسطها .. و لكن المسألة غير مسألة وقت ... و من بعد كايولي بإمكانك تختار واش تبقى منهم ..*دار رطل فوق رجل و رجع مسند لور و محاوط دراعو على امو و قال بابتسامة مستفزة* يعني هاذشي شيء عاادي ..

ضحك عمر كايخبي غيظو و شد غرافاطتو قادها فوق كرشو و قال : ههههه ... سمعت بلي تزوجتي ..

خرجو عينين الحاجة تورية و بدات وفاء كاترجف ..

كانت طريقة رد عمر فيها شيء من التهديد و من رد على الحرب الباردة .. ايرتان كاتفاجأش حيت اصلا كان ناوي يسممو بيها .. خساارة فلت يشوف وجهو فاش تصدم ..

ضحك ايرتان و جاوب : اكيييد تزوجت و كونت حياتي .. مالك ؟ بقا فيك الحال حيت ماعرضتش عليك للعرس ..

تصلبت تعابير عمر و نطقت الحاجة تورية : كيييفاااش ؟ امتى تزوجتي ؟ شكووون هااذي .. شكووون هااد قلييلة العفة لي تقبل تزوج بلا ماتعرف عائلتك ؟

ايرتان: هاذيك ماشي قليلة العفة .. و زايدون انا راه بالفعل عرفتها على عائلتي ... *ضرب هلى كتف امو بحناان*

عمر بشدة : احتارم جدااك ..

تبسم ايرتان ابتسامة جانبية شللاتهم بالغيظ .. و يديه على امو كاتهدنها حيت اكيد وصلو شعورها بالخوف و التوتر من لي جاري ...

تقاد عمر فالجلسة و قال : اسمع .. انا غانعرض عليك واحد العرض... علااش مانديروش واحد الهدنة .. كيفما كان الحال انا راه باك و انت ولدي و هاذي حقيقة مايمكنش ليك تبدلها .. حنا غادي نتقبلو زواجك .. جيبها و سكنو معانا معززين مكرمين.. و دخل لشركة بااك و عاوني فييها ... منها نيت تستاقر وسط عائلتك و ماماك غااتفرح بهاادشي *ورك بهاد الجملة بإصرار* ... ها ؟ اش قلتي ؟

رجع لو كايشوف فيه بمكر و كايتسناه يلتاقط الطعم ...

ايرتان اكيد ماشي غبي .. عارف باه و جداه كاغايسكتوش لهادشي .. و استعدادهم لاستقبال هاد العروس الغامضة ماهو غير تضحية بسيطة فمقابل داكشي لي باغي .. ضحك فوجه باه و فالداخل ديالو كايشوف بلي ذكاء باه بدا يتآكل بسباب الشراب و الساقطات .. ماحفظش الدرس لي عطاه فالسهرة لي متمتل فقولو " افضل وسيلة باش تخدع عدوك هي تخليه يظن بلي هو لي كايخدعك .." فكر ايرتان دغية بلي هاذي فرصة ماكاتعوضش .. خاصو يقبل ويدير راسو التاقط الطعم حيت ظااهر بلي استعمل امو باش يضغط عليه ...و فالمقابل غادي يضرب عصفورين بحجر .. ياخد امو و يهد املاك باه فوق راسو و يخليه ينال جزاؤو ..

يتبع