قدري أن أحبك الجزء 29

اشرف شاف فجهينة و رجع شاف فاشراق غمزها و قال : ديري pause لهاد الconversation حتى ترجعي من الحمام .. 

اشراق ضحكات و هي كاتلعب بشعرها .. و طملو طريقهم حتى وصلو لعند ايناس .. لقاوها فالباب كاتسنا .. حلات الباب و طلعات بسطولتها .. 

جهينة : تي حطي الويل فالمالا .. واش انا تكافيت حتى مع كرشي تزيديني سطولتك .. 

ايناس: صبحنا عالله .. 

اشرف : ههههه مديهم ليا انا نحطهم لور .. 

عطاتهم ليه بساكها و عاد جلسات تسلم .. 

اشراق : كيف صبحتي .. 

ايناس: حمد الله .. مزيان منين عيطتو ليا كنت غانمشي ليه و عغزت .. 

جهينة : فين عمرك ماعغزتيش عليه .. 

اشراق : هههه تلاقينا اختي غير سيرو عالله .. 

طلع اشرف و ووصلهم بعدما وراتو ايناس منين .. هلطات اشراق و ايناس و عاونو جهينة تهبط .. هبط اشرف و عطاهم شغلهم و قال .. 

اشرف : نتيف و المدابزة لااا .. سمعتي اديك فليفلة .. 

اشراق : اوى انا لاش جايا للحمام لا ماكنتش غاتناتف .. 

اشرف : واديريها لاماندخل لمك نجرك من شعرك .. 

ايناس لجهينة : اويلي حي اش كايقول هذا .. 

جهينة كاتضحك : سكتي خليني نسوف الرومانسية .. 

ايناس: هاذي عندك هي الرومانسية .. فاش نكونو نتحابو انا و عوت عوت ديالي كاتحرميها فينا .. و هاذي مسكينة كايهنزر فبها جاتك رومانسية .. 

جهينة : انا هذا هو مفهومي ديال الرومانسية .. احح هاذسي شحال كيووت .. 

ايناس: لا لا اخيتي هذاك الجلاخة لي ساط ليك فداك شوية المخ لي كان عندك .. هراتك عصا حتى مابقيتي تفرقي بين الرومانسية و التهنزير .. 

جهينة : زميه خليني نركز .. ياختي تشيم تشيم حتى صدق بخبيزتو .. 

اشرف : ياله لحقي صحاباتك .. فاش تحرجو عبطي ليا نجيبك .. حيت المدام الاخرى غاترجع مع راجلها .. 

اسراق : واخا .. ياله باي .. و سير نيشااان ماتشوف لا هك و لا هك .. 

اشرف : واهي لا رحمتيينا .. و

اشراق قتطعاتو : الزوااج الغزااال .. الزوااااج .. 

اشرف : هههه كاتحسسني بلي كانلعب معااك .. انا راه تخطيت دووك المراحل ديال دوك لي كايلعبو و مايوفيوش بوعودهم .. انا عندي غير نيشان .. ماشي داكشي لي غادي يبدل رأيي فيك .. 

اشراق : واااخا تكووون كاتمووووت ماغاتصور مني حتى قد هكااا .. انا ماسميتيش جاكلين .. و ماكابراش مع الاوروب كيفك انت .. بغيتيني جيني نيشان تلاااح .. 

دخلات و جرات صحاباتها و خلاتو كايشوف فيها و يتبسم و يعض على شفايفو.. 

اشرف : اااح على لبوؤة عندي ماكاتهد ماكاتروض ... بان ليا ندير مادار الذيب و ديك الساعة ارى برع ههه 

مشا لسيارتو دمارا و زاد لشغالو .. 

دخلو البنات .. خلصو و دخلو الداخل .. جلسو يحيدو حوايجهم و هما كايهضرو .. 

جهينة : اش كان كايقول ليك .. 

اشراق : ههههه مالك ماسمعتيش .. 

ايناس: انا سمعت .. عبرتي على موو .. هكاك نبغيك .. 

جهينة عوجات فمها فيها و قالت : شو شكون كاتهضر .. على ماشي انت لي غير عقد عليك نضتي مشيتي معاه بلا عرس و مازيدتي معاه حتى كلمة .. 

ايناس: اوى انا راه كان حلااالي راااجلي .. كيتك انت المكبوتة لي مشيتي عندو و بديتيه و حملتي من الدقة الاولى .. بلا زواج بلا حتى خطوبة وا شكون المدلولة فينا دابا هاا ... 

جهينة : ويلي ويلي على بنت الهم .. و على انا كنت فوعيي .. كاضربي بيا الطرر دابا ياااك لمك .. بقيتي غير انت لي باقي مانتفتكش .. 

اشراق : لعنو الشيطااان العيااالات .. واش حنا لحقنا ندخلو .. بديتو ببعضياتكم ..

جهينة : ماسمعتيهاش اش قالت .. 

ايناس: و شكووون لي جبد .. 

اشراق : غاتسكتو و لا غانسطح مك انت و ياها ... 

جهينة شداتها هي و ايناس من شعرهم و هبطاتهم لعندها .. 

ايناس: اي لمك شعريي 

اشرااق : نااااري اش دااارت .. ناااري ماعندي كيف نديير ليك و انت حاااملة و راجلك جلااخة .. 

جهينة : شنو دابا لمكم .. انا تدوروني .. 

ايناس: صافي لعني الشيطااان ماقلنا والو .. 

اشراق : غانخرجهم منك غير صبري عليا .. و رخي الويلة راه راسي على سبة .. 

جهينة طلقاتهم :واهكااك ... اححح رصااي حتى انت .. عرفتو البنات فينما كانكون مضاربة كاتبقى تركل هههه 

اشراق : هههه تي شوفي كرشها كيف كاتنخض .. 

ايناس مسااتها : هههه سبحاااان الله .. 

اشراق : غاتخرج عيشورية بحال طاتي اشراق .. ياك الالة هيفين .. 

جهينة : ههههه حتى انا كانقولها 😂😂 

ايناس: هههه وانوضي ندخلو قبل ماينفخنا البرد .. 

هزات ايناس السبكان تعطيهم للطيابة و دخلات اشراق هازة السطولة و شادة فيها جهينة و يد فظهرها مسندة بيها .. 

دخلو و ضربهم الصهد .. 

اشراق : اححح على راااحة .. كيفمااا كايعجبني .. ترمتي كاتصفق بالفرحة فهاد اللحظة .. 

جهينة : هههههه باان ليا كايعجبك احماام .. 

اشراق : وييييلي العشق .. كنت مدمنة عليه قبل مانتلاقا داك العتروس .. فين نجلسو .. 

جهينة : لي عجبك .. ماشي مشكل عندي .. 

اشراق : نجلسو فالوسط باش ماتسخفيش دغيا .. 

دخلات ايناس حداهم و علقات البينوارات و بداو يفرشو و يوجدو ... بعدما غسلو بلاصتهم جلسات جهينة و اشراق و ايناس مشاو يعمرو .. 

جات اشراق بعدما كملات جلسات حداها .. و بداو يديرو الصاابون البلدي .. 

تزبقات للجهينة و ماداتهاش فيها حيت مشات مع الماء .. جات ايناس كاتجر السطل بالزربة ماحسات حتى تهزت و تحطت و السطل تفرع عليهم بالماء سخوون .. 

جهينة : ويلي ويلي ويلي ويلي ويلي البلااااا .. 

اشراق : الخلااا و الجلااا .. لمك جايبة هاد الماء كايصلق تصحابي راسك غاتنتفي الدجااج .. 

ايناس: و عتقوو يحرق طواسلك انت و ياااها .. مييمتي ترمتي .. 

ناضت اشراق عاوناتها تجلس ... و بقات شاداها .. 

ايناس: مااتكوون غير دعوة عتماان هاذي فيااا .. خليتو بلا فطوور

جهينة : هههههه مسخوووطة .. 

اشراق : هههه اوى هاذي تربيك... ديري ليا ظهري انت ديري ... 

جهينة : زيدي الصابون .. انت باان ليا غير ظهرك بوحدو خااصو عشرة صابون كاملة .. 

اشراق : احتاارمي راسك .. 

بداو يحكو و تاوحدة ماسكتت ... بطبيعة الحال رغي النسوان لاينتهي .. 

داز شوية دالوقت و قالت جهينة : انا عييت شي وحدة تحك ليا .. 

ايناس: اجي عندي انا ساليت .. 

اشراق: صافي غير خليك انا غانحك ليها .. 

جهينة : اححم سعدااتي .. *تكات و حطات راسها على رجلين ايناس * ياله ديرو نوبة .. 

اشراق :انت لي جات معااك الالة .. 

بدات اشراق تحك ليها .. و هي غمضات عينيها مسترخية ..

جبدات ايناس برودوي و دارت غوماج لوجها و دارت لجهينة حتى هي .. 

جهينة : الله ريحتو غزالة .. 

ايناس: جبت معايا الماسك المعتاد ديالي بغيتي .. 

جهينة : ديري .. اهيا وعدي اشرااق تكااايسي .. 

اشراق : ايهاي هاي .. سباااكيتي هادي ماشي وسخ .. 

ايناس: هههههه اليوم يتبدل ليك الجلد 

جهينة : الله اميمتي صاافي خلي ايناس تكمل .. 

اشراق : و صامي جلاختك .. حشومة نرضها فوجهو .. 

جهينة : الله يلغيها ليك انت و يااه .. 

كملات ليها اشراق غير بالكشايف .. طلقاتها حمراء و ذاتها كاتزدح .. جلسات و غسلات وجهها من الماااسك .. 

جهينة : بغيت نخرج شوية .. سخفت .. 

اشراق : بلاتي نخرج معاك ... 

خرجو شادين جهينة لي مابقاوش هازينها رجليها .. 

ايناس: قلت ليك خرجي سبقينا راسك قاسح .. 

جهينة : غير نجلس و تفوتني الدوخة .. مهم تحمحيمة هي .. 

اشراق : و الله واخا سخون و لكن بردت غدايدي ..

جهينة : عيطي لهادوك يجيو .. بيدما جينا .. 

جبدات اشراق تيلي ديالها .. و عيطات لاشرف يجي و قالت ليه يعلم ايرتان حتى هو .. 

لبسو حوايجهم .. و لبسات جهينة كاب طويل من الفوق و دارت فولارها فوق البونية .. 

اشراق : ياختي و ياختي على الحنيكات طلع ليبك السر .. 

جهينة : فركتييني اختي ماشي غير السر لي غايطلع .. حاسة بجلدي تبدل .. 

ايناس: هههه خاصنا ديما نبقااو نعااودووها .. 

اشراق : الكلااكسون .. هاهما جااو .. 

ايناس: غايوصلوكم رجالتكم ؟ 

جهينة : بطبيعة الحال مالنا غانرجعو على رجلينا .. 

ايناس: و انا ؟ 

اشراق : يا ويلي على انت .. ضارك تقدري تمشي ليها غير على رجليك .. 

ايناس كاتجبظ نيلي : لا .. ماشي قضية القرب .. انتوما يجيو ليكم رجالكم و انا نضرب الكعطة بووحدي .. يجي دااك الحلووف نييت .. خليتو غير متكي فالداار .. مااالي مانستااهلش .. بديت كانرخي ليه الحبل .. 

جهينة : هههه وا تسنايه .. احنا غادي نخرجو .. 

ايناس: وا بربي لاتحركت شي وحدة حتى يجي عوت عوت .. آاالو .. فينك .. غادي تنوض تهز و تجي ليا سخفانة مافياش لي يجي .. و الله و ماتجي حتى نمشي من هنا لدار مي ... ياله هكاك .. غانتسناك .. *قطعات* ماكايجيو غير بالعين الحمراء .. 

اشراق : الحكااام ابنتي .. و اشنو دابا غانتسناوك حتى يجي .. وهادوك لي فاضحينا برا .. 

ايناس: يتسناو .. 

*عيط ايرتان * جهينة : ها هو غادي يخرج ليا منو تاني .. الو ... واخا واحد 5 د و نخرجو .. واخا .. 

ايرتان قطع : مصيبة مع هااد العيالات .. 

اشرف : باقيين ... 4 السوايع اصاحبي .. واخا يكونو عمرهم شافو بعضياتهم .. 

ايرتان : ماغاتكون غير ديك اشراق لي معطلاهم .. 

اشرف : و مالها ماتكون المشعكة .. هاذيك غير بوحدها فم ماكايسكتش .. 

ايرتان : احتارم راسك .. انا لي نقول ليها مشعكة .. 

اشرف بتحدي : مشعكة .. دبدووبة .. قزوومة .. 

شنق عليه ايرتان : بباااغي تموووت 😠 

وقف عتمان بالسيارة مشقلب .. شاف ايرتان و فكو من اشرف لي كان كايضحك .. 

عتمان : امالكم اصاحبي .. 

اشرف : خليه .. السيد موسوس فراسو .. خاصو غير معامن .. 

ايرتان : زمو احسن ليك .. فييبن عااادو واش غانبقاااو هنااا .. 

عتمان: انا غانعيط .. 

عيط ليهم و ناضو البنات خرجو .. 

خرجات ايناس هي الاولى .. و خدا من عندها عتمان : اوى بالصحة ... ضروري تجرجرينا .. 

ايناس: زيد قدامي و انت ساااكت .. عندنا شلا فااش نهضرو .. 

عتمان : فين هي .. ماتكون غير ديك العوجة نفخاتك عليا تاني .. 

جهينة : خرجات هي و اشراق : بلا ماتجيب مسلتك عليا .. سير فحالك قبل مانتفك حتى انت .. 

عتمان : هههههه ماكاتسوااايش بحااال ديما .. ياله بصحتكم .. الله يعاون ...

مشا عتمان و ايناس بعدما سلمو على الكل .. 

عاد تقدمو عند الدراري لي كانو واقفين كايشوفو .. 

اشراق : وا سبحان الله .. 

اشرف : شكوون انت .. عااد بان فيبك الضو .. 

اشراق : على كاان طافي .. سخفاانة مافيا لي يتجااابد معااك .. 

اشرف باس يدها : هههه بصحتكم .. *شاف فجهينة* بصحتك امامي .. 

جهينة : الله يعطيك الصحة .. 

اشرف : اوى احنا مشينااا .. 

دارت جهينة عند ايرتان لقات عينيه خارجين فيها ماكايرمشش .. 

جهينة : احم .. مالك كاتشوف فيا هكاك .. 

ايرتان كايقرب بنظرات اعجاب قال : اش هااد الزيين و اش هااد التزنييغة و اش هااد الجمااال الطبيعي و اش هااد الروااايح ... لمك بغيتي تهاوشيني .. 

جهينة : مالك حماقيتي .. اشمن زين الله يهديك و نا ملوية فحوايجي كيف الكبالة .. 

ايرتان جرها لعندو و هي تضربو : حشم حنا فالزنقة .. حيد من قدامي ... 

حيد و هو شبه لاصق فيها .. ركبات و سد السيارة و عينيه عليها .. دار و ركب فبلاصتو و قرب ليها .. باااس حنكها و قال .. 

ايرتان : اووووه ... باان ليا ماكاين خدمة اليوم .. 

جهينة : و علاااش بالسلاامة .. شووف ااه .. ماضاارباااش هااذ التماارة بااش تجي انت و تضربها ليا فال0 .. تحرك دغيا رااه جااني الجووع .. و لكن قبل دووز شري ليا شي حاجة نشربها .. 

ايرتان : هاااكاااك شطحيني لوالديك على وحدة و نصف .. 

جهينة : يااله ياله راه شحفانة .. 

هبط ايرتان و هي بقات كطل عليه و تضحك .. 

جهينة : قالك ماكاينة خدمة .. الضساارة هادي .. 

رجع ايرتان و عطاها عصير .. 

جهينة شرباتو و هو جالس حداها ديمارة و مرة مرة يدور يشوف فيها .. 

جهينة كان عاجبها الحااال .. بنظراتو لي هازة مشاعر الحب و الاعجاب .. قالت و هي كاتشرب عصيرها و حابسة ديك الابتسامة : وحلتيها ليا .. عمرك شفتيني .. 

ايرتان بحب : لا .. 

جهينة : اويلي على الراجل .. واش تبدل فيا .. حاسة براسي بحال شي 2 عمرهم كانو مزوجين ..

ايرتان : اوى بالظبط هادشي انا ديما كانحس بيه كولما بعدت عليك .. 

ضحكت جهينة و قالت : عمري شفت شي راجل بحالك .. 

ايرتان : اوى باش تعرفي راااسك عندك الزهر .. 

جهينة : من ناحية الزهر .. عنديييي .. 

ايرتان بغمزة : اوى شفتي .. 

دخلو للفيلا .. سلمو على وفاء .. و خبراتهم بلي الغداء موجود .. 

ناض جلسو يتغداو تحت نظرات الحاجة الحاقدة .. ماتكلمات ماقالت والو ..لوصايا عمر ... منين سالاو طلعات جهينة للبيت ترتاح .. دخل وراها ايرتان و تكا حداها كايخشي وجهو فعنقها .. 

جهينة : نوض لخدمتك .. 

ايرتان كايشم ريحتها : انت خدمتي .. 

جهينة : بعد مني .. و الله حتى نعطيك بهدا للراس *هزات كاس *

ايرتان بخبت : ههههه و ماشي حشومة تسيفطي راجلك هكا مهاوش .. 

جهينة : ايرتان ماكانضحكش معاك بعد مني .. 

ايرتان ياله غايتكلم و قاطعو اتصال : اووووف .. هذا وقتك .. 

جلس و جاوب : الو .. 

موظف : سي ايرتان .. الانسة نيرمين كاتسناك فالمكتب .. 

ايرتان : اوووف .. هاني جاااي .. *قطع* حياتي عذااااااااب .. 

جهينة ؛ هههه اوى سييير تخدم عللى ولاادك .. 

ايرتان قرب من جديد و قال بخبت : حتى هنا كنت غانخدم على ولاادي .. كاين شي واحد يخلي هاد العسل و يمشي للخدمة .. و لكن كوون ماكانت خدمة ضرورية و اللهما يشوفوني .. و عااد خااصني نقاد الطريق لاشراق .. 

جهينة : هههه اوى نووض تغعد راااك غير كاتعذب رااسك دابا ... الله يعاونك ا بوونغ بووونغ ديالي .. 

ايرتان : لالة .. غادي نديير بناااقص نيييت .. 

جهينة : هههه ايرتااان .. نوض من البسااالة .. سير راه كايتسناوك .. 

ايرتان وقف كايتنهد و بان عليه الانزعاج و دار لاجهة الاخرى قرب ليها و قال : واااخا الالا .. حمدي ربك قاطعوني اما ماكان غايفكك مني فكااك .. الليلة نتلاقاو 😉

جهينة : احلم .. 

ضحك ايرتان و باااسها و خرج .. 

تقادت ففراشها كاتضحك و غفاات ... 

بعد يوماين ... 

كان عمر جالس خدام فمكتبو كيف العادة ... حتى تدق عليه الباب .. 

قال دخل بدون ما يعز راسو .. 

دخلات اشراق .. بحلة غير حلتها .. تنورة سوداء قصيرة مع شميزة بيضاء بتوب شفاف مبين الديباردور فالابيض من الداخل ... صباط طالو عالي فالاسود و شعرها البني مطلوق على راحتو بماكياج متير مبين حدة نظرتها و نضجها و قوة شخصيتها .. كانت كاتمشى بتركيز و بكل انوتة و فيدها ملف .. 

وصلو عطرها لي كان جديد عليه .. هز راسو و تبهر بجمااالها و بديك الهالة ديال الكاريزمة المحيطة بيها .. 

بابتسامة خفيفة على وجهها و صوت رقيق على مسامعو قالت .. 

اشراق : موسيو التازي .. هاذ الملف كايتسنا التوقيع ديالك .. 

عمر بعدما كان ساهي فتحركات شفايفها الحمرة .. قال : مديه ليا .. 

مشات لجنبو و مداتو ليه و عينيها فعينيه كاتبتو .. 

خداه من عندها و كانها منوماه مغناطيسيا .. فتحو و هو كايسيني و كايسول : بان ليا انت جديدة معانا ؟ 

اشراق؛ وي موسيو .. انا سوكغيتيغ الجديدة ديال موسيو ايرتان .. 

عمر : اممم .. ايرتان .. هاكي .. 

اشراق : ميغسي موسيو .. 

مشات قدامو بخطوات متعمدة بطيئة كاتعوج .. حاسة بنظراتو التاقبة وراااها ..

عمر فنفسو : شكيل جدييبد هذا ... خاصني نشوف كيفاش نجيبها عندي .. خسارة تبقا حدا داك بارد القلب .. 

ما ان خرجات اشراق حتى عوجات فمها .. 

اشراق : ابلاتي اشيبة العاصية ... الا ماربيتك على ايديا ... ماولدات فيا سعيدة غير الخلااا .. 

مشات اشراق للمكتب ايرتان تعطيه الملفات .. دقات و دخلات .. لقات نيرمين جالسة معاه فطابلة الاجتماعات .. هو حادر عينيه فالاوراق ز الاخرى حالة فمها فيه كاتحلم .. 

اشراق عطاتو الملفات يسنيهم حتى هو .. 

اشراق : محتاجة ااسينياتوغ ديالك اموسيو .. 

ايرتان : اري .. 

خدا من عندها .. و هزات اشراق عينها فنيرمين .. تفحصاتها من راسها لرجليها .. 

اشراق فخاطرها : اجي تشووفي المشعكة شكون كايظل مع راجلك ... هي ماالها حاالة فمها فيه.. عمرها شافت الرجااال .. 

ايرتان قاطع تفكيرها : هاكي ... جيبي معاك شي كاس ديال قهوة قاسحة بلا سكر .. 

نيرمين : مامزيانش ليك تشرب قهوة تقيلة بزااف .. خايب لصحتك .. 

هز فيها ايرتان عينيه ببرود .. كانت قمعة بالبارد .. رجع شاف فاشراق و قال :كيف قلت ليك... قعوة قاسحة بلا سكر .. 

مشات اشراق كاتفرنس ...و نيرمين رجعات شعرها لورا ودنها بالحشمة .. لوكان تشق الارض تبلععا و لا تبقى بهاد المنظر قدامو .. 

نيرمين فخاطرها : اوووف .. كيف غانديير معااه .. حاسة براسي قدام سوور عااالي ... و ماعندي كيف نتسلقو .. و لكن هاد حروشيتو و قبااحتو جاتني على غاانتي و حمقنيي .. ماشي بحاال دوك لحاسين الكابة لي نظل نتلاقااهم .. غيير بلاتي ا اييرتان .. ضروووري نلقى كيفاش نتسلل لقلبك .. يا بيا .. يا بييك .. 

كمل خدمتو مع نيرمين .. شاف شحال الساعة و قال .. 

ايرتان : هاذا الوقت .. نكملو غذا ان شاء الله .. 

ني مين : باقي الحال .. ماتابعنا والز مالك زربان .. 

ايرتان : انت ماعندك والو .. انا عندي شي امور مهمة .. ممكن تنصارفي دابا .. 

ناضت جمعات و راقها و قالت : واخا .. حاول فذا نجي بكري عافاك كانبقى نتسناك بزااف .. 

ايرتان ؛ و علاش نجي بكري .. جي انت معطلة ..ساهلة . 

ضحكات ضحكة صفراء و جاولت ؛ ااه .. واخا .. مهظ خليتك على خير .. 

ماجاوبهاش .. خرجات فحالها .. دتزت قدام اشراق لي دخلات عندو من بعد .. 

ايرتان : اش داكشي .. طيف غادية الخطة ..

اشراق :افضل من لي تصورت عيط ليا 2 مرات من بعدما ماشافني .. و لاسباب تافهة .. 

ايرتان مخسر وجهو : حيوااان حاكمو تحتو .. ماعرفتش واحد بحال هذا بهاد نقطة الضعف المفضووحة .. باقي ماجات لي تجيب ليه التمام .. 

اشراق : انا لي غانجيبو ليه على يديا .. تييق فيا .. مهم القضية بان ليا غاتكون ساهلة .. 

ايرتان : واخا هكاك ردي البااال مزيااان ...اي حاجة توقع قوليها ليا ... 

اشراق : ولا يهمك يا كابتن .. 

ايرتان : ههه ياله .. دردبي راه العتروس ديالك صاعر التحت .. خليني نمشي عند بنت قلبي .. 

اشراق : الله على بنت قلبي ... علم دااك المسخوزط ديال صااحبك .. ياله لصق ليا فشروقتي و فليفلة .. 

ايرتان : هههه هاذاك راه يعلم قبيلة .. 

اشراق : هههه ياله بسلامة نتلاقاو غدا .. 

ايىتان : الله يعاون .. 

خرجو و كل واحد لحال سبيلو .. 

دخل ايرتان لبيتو .. كانو الكلاب لي كبرو لحجم متوسط كايدورو فالبيت .. غير كايدخل كايبقاو يتشعبقو و يلصقو فيه ... هبط لمستواهم كايلاعبهم و قال .. 

ايرتان : فين ماماكم ... ااه .. فااحماام .. 

ناض حط الجاكيط ديالو و حيد سباطو ... خرجات جهينة من الحماام .. و عنقاتو من ظهرو .. 

جهينة : امتى جيتي توحشتك .. 

دار عندها و شاف فيها ... كانت مسرحة شعرها و مصايباه و لابسة بيجامة خفيفة حد الركبة و معرية دراعيها .. 

ايرتان باس حناكها و قال : اش هااد الزيين كاامل .. امتى صاوبتي السوالف .. و منين جاتك هاذ البيجامة عمرك لبستيها .. 

جهينة : خرجت انا و ماما نتسراو شوية .. 

ايرتان : خرجتو ؟ و معامن تشاورتي .. 

جهينة : عيطت ليك مجاوبتيش و سيفطت ليك ميساج .. 

ايرتان جبدو و شاف بلي كان سيلونسيو و ماشافهمش .. 

ايرتان : اااه بالصح ... و اشنو درتو .. 

جهينة : اوى دزنا للصالون تهلينا فراسنا شوية .. 

ايرتان شد شعرها : ياكما قطعتيه ..

جهبنة : هههه لا .. ماساخباش بيه .. و لكن عدبهم هههه .. ماما لي شرات ليا هااد البيجامة و شي وحدينات اخرين .. 

ايرتان شظ يدها و دورها و قال : ااح على خاد ماما و ذووقها .. 

جهينة : هههه عجباتك .. 

ايرتان : عاجباني لي لابساها.. 

جهينة: ههههه يخليك ليلي .. 

ضحك ايرتان و عنقها .. 

جهينة : بدل حوايجك نجيب ليك ماتاكل .. 

ايرتان كايحل ثدايف الشوميز : غير خليك مافياش ... 

جلسات جهينة قدامو كاتشوف فيه و على وجهها ابتسامة .. بعدما بدل جا جلس حداها و تكا على رجليها .. 

حنات راسها كاتشوف فيه و دارت يدها فشعرو كيف عادتها ... 

ايرتان : ايامي ولات كيف الزفت .. ماكانشوفك غير من ليل ليل .. 

جهينة : حتى انا بحالك .. و لكن ماعندنا ...مانديرو .. و زايدون لابقيت فوجهك النهار و الليل غانطلع ليك فراسك .. اللهم هكا ههه 

ايرتان : غير كاتخرفي .. امادمتي .. 

جهينة : غيير كيبان ليك .. 

ايرتان : بدلي الموضوع و لا سكتي .. 

ضحكات جهينة و قالت : ارا يدييك .. 

عطاها ليها ايرتان باستغراب و قال .. 

ايرتان :هاهي .. اش بغيتيها .. 

مدات جهينة يدها للمجر .. حلاتو و جبدات بواطة صغيرة .. 

تبعها ايرتان اش كادير حتى جبدات خاتم عريض و كبير بوجه ذئب .. و خشاتو فصبعو السبابة فاليسار .. 

خشاتو فصبعو و راقبت تعابيرو .. لي كانت عبارة على ابتسامة عريضة ... هز يدو سرحها قدامو كايشوف هديتها .. بكل حب .. بحال الى عطاتو جزء من روحها .. شاف فيها و زادت ضياقت عينيه بفعل الابتسامة لي زادت عراضت .. 

ايرتان : جبتيه ليا ؟ 

جهينة : و لمن ؟ ليا .. 

ايرتان : تفكرتي راجلك و جبتيه ليه هدية ؟ 

جهينة : انا عارفة راسي مقصرة من جيهتك ... و مدة مع بعضياتنا و عمري تفكرتك بشي حاجة .. و لكن عمري فكرت بهكا .. يعني من ديما كانطلب منك دير و دير ليا و لكن انت عمرك حددتي ليا شنو كاتبغي .. انت ماشي متطلب ... داكشي علاااش .. واخا هكاك هادشي ماشي مبرر .. هاذشي لاحظتو قبايلة و انا كانختاار ليك .. سمح ليا ... حسين براسي ماكانستاهلكش ... كادير كولشي على قبلي و انا كادو هو الاخر ماعمري جبتو ليك .. 

ايرتان كان كايتصنت ليها ...من تعابيرها حس بيها كتأسف و ندمانة و كاتعني كل حرف ... ناض جلس حداها و مد يديه كايلعب بين وجنتيها و شعرها و قال .. 

ايرتان :و فراسك انا براسي عمري فكرت هكا ... عمري ديتها فهاد القضية .. حيت اصلا انت كانعتابرك هذية .. عرفتي شنو انت شنو كاتعني ليا .. راه واخا نهضر مغانوصل ليك واالو من داكشي لي فقلبي ... انا ماباغي منك والو .. الهدايا كاتبقى غير شيء رمزي ... و زايدون شكون قالك انت ماكاتهدينيش .. على ديك الضحيكة لي نصبح بيها و نمسي ليها ماشي كادو .. البنيتة لي هازة ليا و محنة هليها ماشي كادو .. احترامك ليا و حبك ليا ماشي كادو .. وقوفك معايا و صبرك عليا ماشي كادو ... هادشي كااافيني .. انا ماباغي غير وجودك جنبي و سلامتك و نبقاي ليا العمر كولو .. 

جهينة و كانت عينبها دامعة بتأترها بكلامو : واش بالصح .. هاذشي باش كاتحس .. 

ابتاسم ايرتان و مسح دمعتها و قال بعيون هايمة فيها : انت كاتعني ليا العالم كولو .. قلت ليك انت هديتي .. عرفتي شنو كنت قبل ماتدخلي حياتي .. مجرد جسم كايتحرك .. كايكره و يحقد و يدخن و يقتل و ماهامو وااالو .. ماكنت نآمن لا بحب و لازوااج ...و لكن دابا .. وليت بنادم .. وليت نبغي وليت نعبر *كايهضر و يقرب و يبعد شعرها من وجها* و لا قلبي يرفرف ... و لا عندي علمن نحط الراس و نشكي و نبكي بلا مانهز الهم .. و لا عندي لي يتسناني كل ليلة .. و لا عندي لمن نتشوق و نكمل شغلي غير باش نشوف عيوونها و ننعس فحضنها .. ولا عندي حلم للمستقبل و عندي اهداف ... ولييت باااغي نعيييش اجهينة .. انت يمكن هادشي جااك عادي و لكن انا راااه كايعني ليااا بزااااف .. الى بغبتي تفرحيني بهدية .. كوني ليا غير فرحانة و مرتاااحة .. هاذشي لي بغيت *وختمها بقبلة طويلة على خدها * 

طاحت عليه دمعتها .. مسحها و على وجهو ابتسامة .. قربات اكتر و عنقاتو ... كان بكاؤها بصوت خافت وسط صدرو ... كان كايضحك و يعتاصرها بين ضلوعو ... و يدو فشعرها .. 

ايرتان : انا قلت بغيت ضحكتك مااشي بكااك .. 

جهينة : و انا كاانبكيي حييت فرحااانة 😢😢 

ايرتان ضحك و جدبها لقدااامو .. 

ايرتان : ربي يخليك ليا و يبارك ليا فيك و يخليني ديما قادر نفرحك و نهنيك .. 

جهينة : براااكة هااادشي كتييير علياااا .. 😭😭 

وقفات و شدات وجهو نزلااات علييه بوسان و هو كايضحك حتى عنقاتو و طااحو فالسريير .. 

ايرتان سد كرشها : بشوية على كرشك الحمقاااء 😂😂 

جهينة : هههه نسيت رااسي ... 

ايرتان : عجبني الكاددو ديالي .. عرفتي ذوقي ماعندي مايتسالك .. 

جهينة : كنت حايرة شنو نتخد ليك .. و لكن تفكر بلي مايهازبند اصلو بااد بوي و عندو مع هادشي .. و غير شفت هاد الخاتم و هذا الذيب لي منقوش فيه تفكرتك .. حسيت بيه مصنوع ليك خصيصا .. 

ايرتان : اححح على الحب ديالي لي كاتفكر فيا .. 

جهينة : و على مافكرت فراجلي فيمن غانغكر .. 

ايرتان : هكاك .. فكري فيا غير انا .. 

جهينة : اوى حيد نجيب ليك تاكل .. تلقاك من غذاك .. 

ايرتان : غير خليك حدايا .. مابغيت والو .. 

جهينة : لا .. ضرووري نجيب ليك ماتاكل شوف كيف وليتي اصفر .. 

ناضت من حداه و قال : زيديك شي حاجة فوق كتافك .. 

لبسات تريكو و خرجات .. بقا متبعها كايتبسم حتى خرجات و هز يدو شاف فالخاتم و الفرحة مرسومة فمحياه .. 

هبطات جهينة ... نيشان للكوزينة .. و بدات توجد ليه ماياكل وو قفات حداها هدى .. 

هدى : مدام *حيت مع خدامات اخرين* اشنو بغيتي انا نوجد ليك .. 

جهينة : ماعليش .. انا بغيت نوجد لراجلي بيدي .. 

هدى بابتسامة ؛ واخا الى بغيتي شي حاجة علميني انا نعاونك .. 

جهينة : واخا .. ميغسي الزيين .. 

بدات جهينة كاطيب ليه .. حتى دخلات الحاجة كاتدور فعينيها كيف عادتها .. لمحات جهينة واقفة كاطيب و طلعات و هبطات فيها و قالت .. 

الحاجة : اش كاديري انت هنا .. 

جهينة : و .. والو .. كانطيب لراجلي .. 

الحاجة : و هاد الويلات اش كيديرو .. و لا انت دايا على شغل الخدامات .. ااه نسيت عمر الرقااص ينسى هزت الكتف .. غير منين باقية تمشي للحمام و تعومي مع المسخات فالوسخ ... سمعي نقوول لك .. اخر مرة نسمع بلي درتي شي تصرف بحال هذا ماقادة على شووهة .. 

دخلات وفاء : الحاجة .. خاي عليك البمت .. هيرحرة و دييير لي بغاات .. مافيها ب..

قاطعتها : سكتي حتى انت مادخليش فشغلي ..*خسرات وجها* اصلا بحالك بحالها .. هاد الايامات مابقيتيش عاجباني تحل لييك الفم .. زيدي قدااامي .. 

وفاء : بلاتي ن..

الحاجة :سبقييني لبيتك تحركي .. 

مشات وفاء و خنزرات الحاجة فجهينة و مشات ... 

يتبع