تائهة أنا الجزء الخامس

من تأليف Yassmine Yass
2018

محتوى القصة


رواية تائهة أنا بقلم ياسمين

نورسين : (متكية وراسها فالسقف وكدوي بوحدها) كيفاش كان مزوج؟وتا حد من العائلة ميدوي على الموضوع...وحتى ريما كتهرب مني...كبغاش ماتت؟ وعلاش هو فهاد الحالة؟ واش حيت مزال مانياهاش وماصبرش على فراقها زعما؟ لا اا مكنضنش هادشي يوصلو لديك الحالة!! اكيد كاينةشي حاجة اخرى مخبينها خاااصني نعرفها!!(بتقة فالنفس) وغادي نعرفها... (تخشات فراشها وطفات الضو خلات غي. ضو الڤيوز خافت ونعسااات من بعد ماعزمات انها تعرف السر ورا هادشي الي طرا والي ماباغي تاحد يعاودلها عليه)
سيف خرج من الدوش لابس شورط قصير وكينشف شعرو ...زاد وقف قدام المراية وبقا ساهي كيفكر فداكشي الي وقع هاد الليلة وفنورسين الي على شوية كان غيقتلها كون مالطف الله...حس بالنذم لاول مرة ...وحس بحسرة...حسرة على حياتو الي كضيع قدامو..وعلى نغسو الي معدبها...وعلى قلبو الي باقا شاعلة فيه العافية....جات هضرة مي عيشة فبالو زادت حسساتو بالنذم ..مي هادشي ماشي بيديه ...باغي يخرج من هاد الدوامة مي كيفاش مزال ماعارفش...بقا فترة وهو ساهي قدام المراية كينشف شعرو...لاح الفوطة ومشا جبد سوفيطما سميطات بيضا لبسها جات لاسقة على جسمو وعضلاتو بقات مفروزة والوشام باين...خرج من البيت وسد الباب وتوجه جيهة بيت نورسين...وقف حدا الباب كيتصنت..متسمع والو السقيل وضو خافت مشعول فبيتها....بقا متردد واش يدخل ولا لا...مي احساسو بالنذم على ديكشي الي دارلها زعمو باش يحل الباب...دخل بانتليه مددة فناموسيتها ناعسة على ضهرها وشعرها منشور فوق المخدة ...زاد قرب منها تا وقف عند راسها كيمعن فيها النضر ...تا بانوليه ليطراس ديال صبعان يديه مطراسيين فعنقها و حمرين...كلس فجنبها غي بشوية ..هز يديه حيدليها خصلة كانت نازلة من شعرها على عينيها ودوز يدو على راسها بحنية ..شحال وهو على داك الوضع ونضراتو مركزة عليها....عمرو حقق فملامحهت ودبا تاحت ليه الفرصة منين ناعسة....كاتبان بريئة فوجهاا..بشرتها ناعمة وبيضا واخة باين عليها الارهاق ولونها مخطوف مي علامات الجمال باقيين حاضريين...سالا التبرگيگو فيها وفطن براسو وهز يديه بسرعة وناض غادي بحالو تا ستوقفو صوتها:
نورسين: غاتمشي بلا ماتگولي سمحيلي على ديكشي الي درتي؟؟
سيف: (بقا واقف بلاصتو مادارش تصدم فاش دوات توقعها تكون ناعسة..دور غي راسو شاف فيها بنص عين ) ماشي المهم تسمحيلي ...المهم انك باقا حية..وخرجات طريفة...المرة الجاية كنصحك تبعدي من طريقي...
نورسين: (بتحدي) علاش ؟ (ضحكات بسخرية)ههه.. تالهاد الدرجة طريقك مكتخرجش وزناقيك مقطوعة؟؟
سيف: (دار عندها حتى هو وقال بنبرة تحدي) ايلا كان عندك الشك جربي!! (دار يديه فجيبو ودار مشا بحالو)
بقات نورسين عينيها كيدورو فبلاصتهوم...متفاجئة من جرأتو وتحديه وقالت :
نورسين: ايلا كان عزيز عليك التحدي السي سيف ..فانا عنيدة ومكنتفاكش (ضحكات بشر) غانشوفو هاد الطريق ديالك واش مغتسرحش....كنواعدك السي سيف حتى غندوز فدروباتك وزناقيك ونتسارا فيهوم بكل حرية...(بتحدي) دبا تشوف....
جرات عليها الغطا ونعسات .....

☀☀اعلن الليل انسحابه بعباءته السوداء ....وذهب القمر بضوءه الساطع لتحل مكانه اشعة الشمس الذهبية لتعلن عن يوم جديد☀☀
اصبحنا واصبح الملك لله ------
فاقت نورسين كتجبد وتفوه وعضامها تقاال عليها واللحم مقطعة فيها مكتقدش تزيد...بقات تجبد.فبلاصتها ..شافت الساعة فجنبها لقاتها 11:30 ديال الصباح نعسات بزاااف وماحساتش..من كترة الارهاق ومن بعد ليلة البارح الي كانت صعيبة...ناضت بتتاقل دخلات للدوش تقابلات مع المراية بانولها ليطراس فعنقها زرقين بقات كدوز يديها على عنقها وتقلب فيه ...مشات حيدات حوايجها ودخلات تحت الرشاشة دوشات ...عاد حسات براسها خفافت شوية ...خرجات لبسات بيجامة سخونة شوية بسروالها حيت اليوم صابح بارد...رشت بارفانها وخرجات...مادازتش عند ريما حيت عارفاها مشات تقرا..هبطات نيشان لتحت لقات مي عيشة واقفة مع واحد.الخدامة كتوصي فيها مشات عندها سلمات عليها وقالتلها صباح الخير...
مي عيشة: (كتشوف فيها بابتسامة) بنتي!! كيصبحتي شوية؟؟
نورسين: الحمدالله ا مي عيشة ..بيخير
مي عيشة: سيري رتاحي فالصالون انا غنسيفطهوم يحطوليك الفطور..
نورسين: (بابتسامة) واخا..شكرا مي عيشة..(تمات غادا وهي تفكر شي حاجة ورجعات دارت عندها) مي عيشة!! سيف خرج؟
مي عيشة: (تفاجئات من سؤالها وجاوباتها ببشاشة) لا ابنتي حتى هو مزال مانزل...يمكن مانعسش بكري البارح...وديكشي الي داز منو ماشي ساهل...
نورسين: (واخا ضرها راسها مازعماتش تسول مي عيشة على الموضوع د بسمة) اه بصاح...الحمدالله على لطف الله
مي عيشة: ربي دار خير ابنتي..والله يرضي عليك حاولي تبعدي عليه ..راه شوية عصبي وراسو سخون على مايدير ربي شي تاويل الخير
نورسين: واخا ا مي عيشة...هانا فالصالون 
مشات جلسات فالصالون تا حطوليها الخدامات الفطور...بدات تاكول بدون شهية...الدغمة كديها من جيهة لجيهة ففمها وتلعب بيها عاد.تسرطها..عقلها مرفوع وتفكيرها مشوش...وعينيها فالدروج كتسناه يهبط باش تشوفو...يمكن ولات عادة عندها..سالات الماكلة ومزال ماهبط بقات كالسة شدات معلقة كتلعب بيها بيدها فكاس..واليد لوخرا دايراها تحت خدها...وكتسنا بنفاذ صبر..تا بانليها هابط...بكل اناقتو كالعادة هاز ملف فيدو..ومعاه شي واحد.كيوريه شي حاجة فداك الملف...هابط كيدوي معاه ومشغول..وهي مراقباه عاد تحلو عينيها وتوگضات تا وصل لتحت على عينو بانتليه كالسة عاى الطبلة دالفطور وكتحرك بالمعلقة فالكاس ونسات راسها...شاف فيها وقال:
سيف: مورنينغ..(مع ابتسامة)
نورسين: (بادلاتو الابتسامة) مورنينغ... 
رجع شاف فالسيد الي معاه وكمل معاه الهضرة وزادو خرجو برا.نورسين بقات معجبة فيه كيفاش تا قالها بونجوغ...ناضت بسرعة من على الطبلة مشات للنافذة كطل على برا متبعاه...بانليها ركب فالطوموبيل وتبعاتو طوموبيل وحدة اخرى..بقات متبعاليه العين تا درگ...دارت صبعها فمها كتغز ضفارها ودورات عينيها يمين شمال ...وطاحتلها شي حاجة فدماغها...شافت واش مكاين تا حد وطلعات كتجري فالدروج نيشان لبيت سيف.دخلات وسدات الباب ..وتفاجئات بيه مقاد على حقو وطريقو تقول ماشي هنا قامت الحرب البارح...دغيا رجع كولشي لبلاصتو والزاج كولشي مقاد الكراسة بلاصتهوم ..التلفزة تبدلات وكولشي رجع كيما كان

...سارات عينيها مزيان فالغرفة ومشات نيشان للماريو حلاتو وبدات تقلب تحت الحوايج وبين اغراضو ...و فالمجورة كتقلب عالله تلقا اي حاجة ترضي فضولها بخصوص هاد بسمة وشنو قصتو معاها...بقات تقلب تا حلات واحد الباب فالماريو لقات صندوق جاي لتحت فواحد الجنب ...تحلو عينيها وزاد فضولها هزاتو ومشات كلسات فوق الناموسية وحطاتو حداها وبركات على واحد البطونة وهو يتحل...بانولها بزاف دالاوراق والملفات وحداهوم البوم ديال التصاور …هزاتو بزربة وحلاتو اول صورة فيها سيف ومعاه بنت جميلة بشرتها بيضاء وشعرها مابين كحل وقهوي مصور معاها كتبوسو من حنكو وكييانو فرحانين...خنزرات نورسين فالتصويرة ماعجباتهاش...خصوصا فاش بايساه..قلبات بزربة مابغاتش تزيد تشوف فيها ولقات تصاور ماكتر كولهوم ديالو مع ديك البنت 
نورسين: (كتقلب صفحات الالبوم وفكل صورة كتخنزر ودوي بوحدها) شو كيدااايرة؟؟ يخخ ماعرفت اش عجبو فيها...لا الصراحة زوينة!! (قلبات لقات تصويرة معانقين فيها فشي حفل) بففف سعداااتها (بقات كتخايل راسها بلاصتها فكل فوطو تا سالات وسداتو وقالت)...واش غيجي شي نهار ويكون تا انا عندي البوم صور معاك اسيف؟؟ اااااخ كنتمنا من كل قلبي (رجعاتو للصندوق وهزات ديك الاوراق والملفات الي فيه كتقلب بيناتهوم واش تلقا مايفيد...الاوراق كولها بالانجليزية واخا هكاك كانت كتفهمهوم نورسين...هزات الملف الاول كان تقرير من مستشفى الامراض العقلية وفيه سميت سيف ..على مافهمات انه دوز فترة فمصح...الشي الي صدمها ...زادت هزات ملف اخر قراتو ...وكانت ورقة كتفيد بدفع كفالة مالية القيمة ديالها جد غالية لصالح سيف والتهمة هي جريمة قتل...بقات نورسين كتقرا وتعاود وتأكد من هادشي واش صحيح وكل متعاود تقرا كتزيد تصدم...سدات دوك ابملفات ورجعاتهوم للصندوق...وبقات تحلل وتناقش ديكشي الي شافت...
نورسين: (كدوي بينها وبين راسها) اوراق مصحة نفسية !! ومتهم بجريمة قتل !! اش هادشي؟؟ مافهمت والو انا !! ناري ياكما يكون قتال؟؟ عنداك يكون هو الي قتل مراتو!! وعلاش دخل للمصحة؟؟ زعما يكون قتلها وباش يخرج منها سالم دار راسو احمق؟؟ لا لا مانضنش هو عندو نفوذ واخا يقتل يخرج منها بحال الشعرة من العجينة بلا مايحتاج هاد الحيلة!؛! بفففف راسي ضارني! كيغاندير نعرف دبا؟؟
بقات كدوي مع رايها تا سمعات صوت تيايفون كيصوني...ناضت طافجة من بلاصتها مشات تشوف منين جاي الصوت لقات تيليفون محطوط على الكوافوز قربات ليه عرفاتو ديال سيف تفافات ماعرفات مادير ...عرفاتو يقدر يرجع فاي لحضة ولالقاها تماك غي تشهدعلى روحها...مشات كتجري هزات الصندوق رجعاتو لبلاصتو وتمات خارجة تا تخل الباب ووقفات مبلوكية فبلاصتها...غي تحل الباب شافت سيف ..تبدلو فيها الالوان وبقات كترعد بالخوف...تفاجئ هو حيت لقاها قدامو وفبيتو سد الباب وقرب عندها وقال بجدية:
سيف: اشنو كاديري هنا ؟؟
نورسين:(تلفات ليها الهضرة وبقات غي كتقفقف ماعىفات ماتقدم ولا توخر) انا...انا...كككك
سيف: (قاطعها ودوا بنبرة معصبة) ككك.....اشنو؟ دوي؟؟
نورسين: (زاد وترها فاش غوت) والو ...والو...كنت جيت غي نشوف واش قادو البيت من بعد ديكشي الي درتي البارح ولا لا ...وهانا دبا خارجة بحالي..
تمات خارجة بالزربة باغا تسلت منو...يالله دازتو شدها من دراعها ولواه ليها ودورها قدامو وهو موراها قبالت المراية لاوي ليها دراعها تا قصحها...قرب وجهو لعنقها...سدات عينيها وقربو منها وترها...زاد لودنيها وهمس:
سيف: واش عارفة ااخر واحد دخل لبيتي بلا خباري اش درتليه؟ هاا؟
نورسين: (واخا خافت مابغاتش تبين ليه وجاوباتو بتحدي) لاء ماعارفاش ومكيهمنيش نعرف!!

سيف: (مصدوم من تحديها ليه...زاد قرب لودنيها وخاشي وجهو فعنقها وكيدوي) اممم...عزيز عليك تلعبي بالنار؟
نورسين: (ضحكات بتحدي) هه...لعبتي المفضلة!!
سيف: (زاد زيرليها على يديها وهمس) تعقلي فاش قتلك البارح بعدي على طريقي!!(زاد زيرليها على يديها) اممم؟؟
نورسين: آآي!! (كيوجعها فيديها) وسولتك واش لهاد الدرجة طريقك مقطوعة وزناقيك مكتخرجش...گلتيلي جربي وهانا كنجرب..ولا ياكما رجعتي فكلامك؟؟ (ضحكات بسخرية) ههه
سيف: (كيشوف فيها من المراية كدوي بتحدي وبشجاعة) هممم!!قوية مع راسك!! ماعارفانيش راني خبيت ومكنرحمش؟؟
نورسين: (كتشوف فيه من المراية وباقي مزيرليها على يديها وخاشي وجهو فعنقها..قالت ) وانا عنيدة وعزيز عليا التحدي!!
سيف: غتحرقي!
نورسين: خليني نجرب نارك!!
سيف: جحيمي لا يطااق ..انورسيييين (كان اول مرة ينطق سميتها)
نورسين:(فاش نطق سميتها خلا قلبها يرجف..تنهدات وقالت) اااخ...مغيكونش كيحرق بحال جحيم نطقك اسمي على شفتيك.....
سيف: (حيد راسو من عنقها وشاف فيها من المراية وطلق من يديها دارت عندو وكيشوف فيها بنضرات حيرة واستفهام) فين باغا توصلي؟
نورسين: (قربات عندو كتر وتعلات على صبعان رجليها حيت طويل عليها تا طلاقات عينيها بعينيه هزات صبعها وحطاتو على قلبو وقالت) هنااا!! (ضحكات وحيدات يديها ودارت ضرباتو بشعرها تا غمض عينيه وخرجات خلاتو مشوكي واقف فبلاصتو ومدار تا شي ردة فعل...ماينكرش ان هاد البنت قوية وعجباتو شجاعتها وتحديها ليه...وكيفاش وقفات فوجهو ومخافتش منو....من هضرتها عرفها معجبة بيه ..حيت الجرأة ديالها ماشي طبيعية) 
مشات نورسين كتجري لبيتها بحالا تابعها شي واحد سدات الباب ودخلات عاد تنفسات مزياان وقلبها كيضرب ف 90
بقات واقفة ورا الباب وشادة البوانيي بيد واليد لوخرا دايراها على قلبها وكتلهت...
نورسين: نااااري..اش درت!! ويلي مي ماعرفت مين جاتني هاد الجرأة....لا...لا صافي قودتها...ناري كنتحداه وتخراج العينين...وگالسة كنشعر علييييه....هيييييي 😱 دبا كيغتدير نعاود نشوف فوجهوو...صافي قودتها والله....هاك افمي..هاك افمي(كاضرب ففمها) ....
سالات العتاب ديالها لراسها ومشات تلاحت فوق النموسية وسهات كتفكر...تا دقات عليها وحدة من الخادمات..علماتها بالي الاستاذ الي غيقريها اللغة جا كيتسناها لتحت...ناضت بتتاقل لبسات بانطوفتها وهبطات عندو هكاك...
هبطات كتجر رجليها تالتحت دخلات للصالون فين كيتسناها الاستاذ دخلات بانليها ولد ...توقعات تلقا الاستاذ شي سداري بوكربشة تاني مي هدا زدق شاب فمقتبل العمر...زوين ولابس مزيان ومهلي فراسو ...شافت فيه طلعاتو وهبطاتو ...ورجعات شافت فحالتها باش هابطة عندو وحشمات من راسها...مي هو كاع ماداها فشنو لابسة حيت القالب غلاب...جمالها الطبيعي وانوتتها مغطيين على كولشي...قربات عندو وهو باقي مضهشر...ودوات معاه بالانجليزية

نورسين: (مدات يديها) السلاااام...انا نورسين..
الاستاذ : (جاوبها بالداريجة المغربية) اهلا لالة نورسين...متشرف بمعرفتك...معاك...يوسف الاستاذ الي غيقريك الانجليزية نشاءالله
نورسين: واااو ..زدقتي مغريبي ههه مزيااان
يوسف: ههه اكيد خاصني نكون مغريبي والا باش غنتفاهمو وانا جاي نقريك لغة مزال ماشاداهاش مزيان
نورسين: ههه احسن مادارو والله ...نعرف بعدا غي كينتفاهم معاك...(شافتو مزال واقف) اه سمحليا...تفضل گلس بعدا
يوسف: (گلس) شكرا (بابتسامة) نبداو؟
نورسين: (گلسات تاهي وقالت بحماس) اه..نبدااو
يوسف: (جبد الشنطة ديالو حلها وجبد شي كتوبة وشي مراجع وشاف فيها مافيديها تا ستيلو) ماجبتيش فاش تكتبي؟؟
نورسين: (حلات فمها وعينيها) على ضروري خاصني فاش نكتب؟
يوسف: (ضخك على سداجة نورسين) ههه اه ضروري...من غير لاكنتي غتنوطي فوق الطبلة فهاد الحالة مكاين لاش...
نورسين: (انفاجرات من الضحك) هههههه..لا لا صافي هانا غنمشي نجيب فاش نكتب (ناضت مشات وخلاتو كيضحك غي بوحدو على سداجتها وبراءتها)
مشات كتجري لبيتها جبدات دفتر وستيلو وهبطات عندو...
نورسين: (حطات ديكشي الي جابت على الطبلة) هانا 😊😊
يوسف: (بابتسامة) دبا مزيان....اول حاجة غنديروها هي غنديرلك تيست...نشوفو النيڤو ديالك بعدا عاد نبداو...(بابتسامة) واخا؟؟
نورسين: (بادلاتو الابتسامة) اوكي...
دخلو فجو الدراسة ودغيا نساجمو..شوية دالقراية مع شوية ديال الضحك...وكيفاش المجمع مايكونش فيه روح الدعابة وهو فيه نورسين....
دازت شي 4 ساعات ...كاع ماحسو بيها ....كانت الساعة تشير الى السادسة مساءا...دخل سيف ومعاه ريما يالله جايا من الجامعة ...مع الدخلة بانتلهم نورسين فالصالون ومعاها الاستاذ وكالسين كيقراو ويضحكو...وقف سيف كيشوف فيهوم وهوما ماعلابالهومش بالي جا
سيف: (دوا مع ريما) شكون هاداك؟
ريما: ماااعرفت...غالبا غيكون غي الاستاذ داللغة الي غيقريها الانجليزية....انا غنمشي نشوف فين وصلو (مشات وخلاتو واقف كيحقق ويطلع فيهوم ويهبط وهوما كيضحكو...خلاهوم وطلع لمكتب ديالو الي جاي فالطابق التالت ديال القثر...گلس ودار رجليه عاى المكتب وهز الطيلي بركلو عاى بوطونة وعيط لمي عيشة من تحت طلع عندو...ماكاملاش تا 5 تلدقايق ودقات دخلات..
مي عيشة: (بابتسامة) ولدي سيف..بغيتيني؟
سيف: (نزل رحليه فوق المكتب وتكا بيديه ) شكون الي جاب داك الاستاذ لنورسين؟؟
مي عيشة: المسؤولة على ادارة القصر...علاش كاين شي مشكيل؟
سيف: (بجدية) غتمشي تگوليها تبدلو ...تجيب استاذة....مراا..اوكي؟
مي عيشة: (باستفهام) علااااش..واش كاين شي مشكيل فهاد الاستاذ؟
سيف: مي عيشة!! ماموالفاش تناقشيني فشي قرار خديتو!!
مي عيشة: حاشا اوليدي كلامك هو الكبير...هانا دبا نهبط نگولهالهوم...(بغات تمشي) تبغي مني شي حاجة اخرى؟
سيف: اه..غنمشي نگلس فالدار الي فالجبل نرتاح شوية شي يوماين ونجي...ردي البال لراسك والبنات...
مي عيشة: (بخوف) كون غي اجلتيها اولدي...الجو قالو غيضطارب هاد الايام ..الشتا داخل مجهد هاد العام...قالو غطيح الشتا والتلج هاد اليوماين...والگلسة فالجبل دبا ماصالحاش..عافا ولدي خلي تال من بعد...
سيف: مخنوق ا مي عيشة ...غانمشي نبدل الجو شوية...(ناض عندها كيطمنها) ماتخافيش ..غاندير احتياطاتي...والجو فامريكا راه ديما متقلب ماشي عاد

مي عيشة: (باستسلام) الي بانلك اوليدي غي رد البال لراسك...واش تبغي نجيبولك العشا دبا؟
سيف: لا ..بلاش ...عيان ماعندي شهية للماكلة دبا
مي عيشة: على راحتك اولدي...تمسا بخير
سيف: تلقاي الخير...
خرجات مي عيشة مشات نيشان عند مديرة القصر امرتها باش تبدل الاستاذ تحت طلب سيف ...واخا استغربات الامر فالاول مي ماعطاتوش اهمية...
ريما فاش مشات عند نورسين للصالون تعرفات على الاستاذ جاها ضريف ...سالاو وبقاو گالسين شي ساعة غي كيضحكو ويبسطو بيناتهوم...عاد استأذن من بعد ماقال لنورسين بالي غدا غايجي فالصباح حيت هي قارية العشية ومشا خرج...سرحو معاه البنات تالباب...سلمو عليه وركب فسيارتو ومشا...رجعو البنات دخلو للقصر...
ريما: يالله طلعي معايا لبيتي!!
نورسين: لا لا غي سيري...انا غنمشي للكوزينة اصاحبتي فيا الخرا دالجووع...راني مني فطرت مع 12 دالنهار..مصارني لصقو..
ريما: ههه وايلي ومالك على حالتك؟
نورسين: والي تبع القراية يبقى بلا ماكلة...صافي حايدي من قبالتي...راه بداو يبانولي منك جوج ههه
ريما: هههه سيري سيري..الله يمسخك
مشات ريما طلعات فالدروج ونورسين مشات نيشان للمطبخ...هادي تاني مرة كدخل ليه...المرة الي فاتت كان الضلام مي هاد المرة بانلها فشكل..مع الدخلة بانلها المطبخ عامر بالناس...3 ديال الرجال لابسين البسة دالطبخ فالابيض وطربوش طويل ..كانو هادوك ليشاف...ومعاهوم شي 8 ديال البنات كيتسخرو عليهوم ويقربو ليهوم لابسين لبيسات ديال الخدمة فالغوز وطربوش ابيض..و 3 الدراري تاهوما مساعيديي ليشاف...دخلات من بعد مابرگات مزيان..
نورسين: (بابتسامة ووجه بشوش) سلااااام....بونصواااغ..گود ايڤنينغ...بوينوس نوتشز..
قالتهالهوم بجميع اللغات حيت ماعارفاش جنسياتهوم اةها بزااف..اللحضة الي دوات كولشي دار كيشوف فيها بلي شاف بالخدامات بالمساعدات...استعجبو لهاد البنت الي دخلات عليهوم فجأة...و غي من حوايجها ووجها عرفوها من اهل القصر..الشي الي زاد فاستغرابهوم حيت ماموالفينش يجي عندهوم شي حد من القصر...وقفو مسمرين وردو عليها السلام كل واحد.بلوغتو وبقاو واقفين مكيدويوش..استعجبات من الحركة الي دارو...وقالت ببراءة
نورسين: هههه ناري مالكوم درتو بحال مدينة الاصنام لا تتحرك ولا تبين اسنانها البيضاء...1,2,3 قف ههههه
تا حد مافهمها...الا واحد الجوج الي ضحكو عرفاتهوم مغاربة...وناضت ضحك معاهوم...ولوخرين مافاهمين والو...سالات الضحك وقالت...
نورسين: غتبقاو واقفين هكا...عرفتي تزيدو غي دقيقة غنطيح ليكم هنا بالجوووع هههه
تاجهات عند البنات الي فهموها..مشات عندهوم..وقالت ..
نتوما مغربيات ياك؟
جاوبات وحدة منهوم: اه الالة...
نورسين: (بابتسامة) بلاش ديك لالة... (قربات لودنيها) كتشرفيني...وانا مابغيتش نحس براسي شارفة (وضحكات بصوت عالي)
ضحكو البنات بجوج..لعفوية وبراءة نورسين...وتواضعها وكيفاش كدوي عادي بدون اية رسميات او بروطوكولات...بقاو كيهضرو ويضحكو تا دخلات مي عيشة ..تفاجئات من وجود نورسين فالكوزينة ومشات عندها
مي عيشة: بنتي ...خاصك شي حاجة
نورسين: اه امي عيشة غنموت بالجوع والله
مي عيشة: ههه لهلا يحوجك ابنيتي سيري لقاعة الاكل انا غنسيفطهوم يحطولك تاكلي..
نورسين: (باعتراض) لا..لا..غي حطوليا هنا ..توحشت ناكول فالكوزينة..ههههه
مي عيشة: (ضحكات) هههه...واخا ايلا كان هكا اجي نكلسو لهيه على مايوجدولك البنات متاكلي
نورسين: اوكي يالله...(شافت فالبنات وقالت بابتسامة) بسلامة البنات..
بادلوها التحية ومشاو لشغالهوم وهي مشات مع مي عيشة لواحد الگليسة كاينة بليفوطوي فالكوزينة وكطل على برا...گلسات مي عيشة وتبعاتها نورسين تقابلات معاها...بقات تساري عينيها فديك الكوزينة ونطقات..
نورسين: (كتشوف فجنابها وكدوي بشوية )مي عيشة! واش هاد 20 واحد كولها جايبينها باش تسربي 3 دالناس؟؟
مي عيشة: (ضحكات لسذاجة نورسين) هههه...لا يا هاد الحمقة...واش يسحابلك كاينة غي نتي وسيف وريما هنا...راه القصر عامر بالناس..وهادو الي شفتي فالكوزينة يالله يتكافاو معاهوم...راه كاينين...تلحراس الي فالباب والي دايرين بالقصر وليگارد كور الي ديما هنا...والخدامات ديال القصر والي كاينين فالادارة
نورسين: (كتصنت ليها يانتباه) الادارة؟

مي عيشة: ايييه...الادارة راها ورا القصر ...فيها مسؤولين على القصروكل مكايخصو وكاينين خدامات مسؤولين على التنضيف وليجاردينيي وهاد البنات الي شفتي هنا مختصين فقط فالكوزينة وكاين الدوبل ديالهوم فكل مجال هنا وهاد الناس كاملين الي گتلك راهوم عايشين هنا ورا القصر ...ههه..دبا نتي كتعرفي غير الصالون وبيتك والدروج والكوزينة..مزال ضربي دورة فالقصر مع الجناب ومن اللور راه مدينة وعايشيين فيه كتر من 100 واحد...
نورسيين: (معجبة) وااااو...100؟؟ گاع مكيبانو لينا !!
مي عيشة: ههه...لا ممنوع ...كاين اوقات محددة كيدخلو يديرو خدمتهوم ويخرجو...بلا مايزعجو الي ساكنين فالقصر ....
نورسينعوجات فمها) اممم!!.هادا مايكون غي داك الشيطان الي داير هاد القانون !!
مي عيشة: (بجدية) ولدي سيف ..ماشي شيطان...الضروف الي خلاتو يكون هكا ابنتي!!
نورسين: (تحلو عينيها بصدمة حيت مي عيشة عرفاتها كدوي على سيف زعمات وبغات تسولها) مي عيشة....
قاطعوها الخدامات فاش جتبوليها تلماكلة حطوهاليها قدامها...واستأذناتها مي عيشة قبل ماتبدا الماكلة...مشات وخلات راسها كيحرقها تاني ضيعات فرصة وحدة اخرى فانها تعرف اشنو قصة هاد بسمة...قالت بسمالله وبدات تاكول تا لحسات الطباسل وناضت خرجااات
خرجات وخلات الخدامات كيدويو وراها
البنت واحد: نااري هاد البنت شحال ضريفة..وعفوية وبسيطة...
البنت 2: وايييه...كدخل للقلب..شفتي كي متواضعة..متگوليش عليها من اهل القصر..
البنت1: اه...احسن من ديك المتعجرفة ديال بسمة...كانت غي كدخل كولشي كيقطع الحس..ومتكبرة وهازة خنافرها للسما..ماقادها تا واحد
البنت2: شتتتت....واش حماقيتي...غيسمعك شي حد...وزيدون راه كيقولك اذكروا امواتكم بخير
البنت1: اودي بحال هادوك غي خلي ربي يقبط رواحهوم ماعندهوم لاش يبقاو متقليين على البشرية
البنت 2: صافي سكتي مي عيشة جايا...يالله...نشوفو شغالنا
مشاو البنات كلها فقنت...اما نورسين طلعات نيشان لبيت ريما لقاتها كدوش...وصاتها فاش تسالي تجي عندها لبيتها يتحتتو شوية
خرجات ومشات لبيتها ..خرجات للبالكون بانتليها السما حمرا ورياح مجهدة كضرب ...جاها البرد ودخلات ...مشات للمجر وهزات مذكرتها وستيلو ومشات گلسات فواحد الكرسي متحرك كيمشي ويجي وتقابلات مع النافذة ...حلات المذكرة ديالها ودارت اطلالة على صورة سيف وككل مرة كتشوفها كتكون بحالا اول مرة ابتاسمات لا اراديا ورجعاتها بين صفحات المذكرة وحطات الستيلو على الورقة وتكات على الكرسي يدا يمشي ويجي وهي كتكتب....
احساس رهيب...شعور غريب...عندما اراك...يداي ترتجفان...وحرارتي ترتفع....يا لصعوبة النضر الى وجهك الجميييل....ااااه..صوتك الرجولي والخشن ...عندما يتسلل الى مسامعي تصمت كل حواسي ويسكت كل من حولي....هل تعلم انه عند قربك مني بضع سنتيمترات...كفيل بفقدان ذاكرتي ..وان سألوني عن اسمي....اقسم انني لن استطيع النطق به....ما اسم هذا الشعووور؟؟...هل هو جنون؟ حماقة؟؟ احاسيسي ملخبطة! ايعقل ان اسمع صوت صراخك في وجهي واعتبره سمفونية عذبة تريح اعصابي؟ اوا يعقل النضر في عينيك...يحرقني؟ حتى وان كنت بحيرة مائية في القطب المتجمد..لذاب صقيعي...ودفأت مياهي...فما اسم هذا الشعور؟؟......

ماحسات تا طارلها الكتاب من بين يديها..تلفتات لقات المذكرة فيد ريما الي دخلات بلا ماتحس بيها نورسين حيت كانت مركزة فالكتابة
نورسين: (ناضت من فوق الكرسي) خلعتيني...الله يعطيك الويل...(مدات يديها) اري ديك المذكرة لهنا...
ريما: (هربات يديها) لاااءح تسنا نشوفك فاش كنتي خاشية راسك الي عييت نحنحن ماسمعتيش...(حلاتها)
نورسين: (بغات تنترها عاوتاني) اري مافيها والو...راه غي فاش كيجيني الالهام كنكتب ديكشي الي فبالي
ريما: هممم..واخليني نقرا نشوف اش كتكتبي...ولا خايفة نضربوك بالعين ا احلام مستغنامي؟
نورسين: (ضحكات) ههه لاواه نزار قباني...صافي قراي
حلات ريما الكتاب وقرات اخر حاجة كتباتها نورسين...حنى وصلات لاخر كلمة فالسطر الي فيها ما اسم هذا الشعور...علات راسها وشافت فيها بنضرات شك وصدمة فنفس الوقت...خدات من عندها القلم ونورسين متبعاها اش كدير...جات للتالي وكتبات...."اسمه الحب"
وعطات لنورين تقرا..شداتها نورسين وقراتها وشافت فريما بنضرة عدم فهم...قربات عندها ريما وشيراتلها بصباعها لداكشي الي كتبات وقالت:
ريما: هااادشي كولو الي كتبتي وهادشي الي كتحسي بيه..سميتو الحب...فهمتي دبا؟
نورسين: باش عرفتيه؟؟
ريما: (ضحكات بسخرية) هه وايلي وهل يخفى القمر؟ الحب هو اسمى حاجة فهاد الوجود...ايلا جربتي هاد الشعور فانتي من بين المحضوضات الي حصلهوم الشرف يذوقو طعمو ...الاحساس ديال ان قلبك يكون ملك واحد اخور كتفكري فيه غي هو ..تفرحي لفرحو وتبكي لحزنو...وتشعري بآلامو...وتمناي تمرضي ولا تشوفيه عليل قدامك طريح الفراش(كدوي ودور فالغرفة وكدوي وعينيها كولهوم حب) الحب هو فاش تبقاي تصنتي لاحاديتو لساعات بدون ملل..الحب هو فاش كتشوفيه كتمحا گاع احزانك وآلامك...الحب هو..
قاطعاتها نورسين: (دوات وعينيها فيهوم بريق الحب) هو فاش كيقرب مني كنحس بالزمن وقف ورجلي مكيبقاوش هازيني...قلبي دقاتو كتزعجني...صوتو ..لحن عذب...كيريحني ...بمجرد شوفتو مع وحدة اخرى ولو غي فصورة كدمرني...(تنهدات ) ااااخ...ااااخ..فاش مكنشوفوش...الاكسجين كيقلال من رأتي ...كنتخنق...كيولي صعيب عليا نتنفس..وغي تجي عيني فعينيه..كنعاود نحيا من جديد...بحال الوردة فاش كيسقيها الساقي....كتبعتر كلماتي...وكتنسا عليا حروفي...وكيقلال حديتي وكتكتر نضراااتي وصمتي
ايلا كان هدا هو الحب فسمحيلي نعتارفلك با اني كنبغيييه ...

ريما: (مشات عندها وگلسات حداها فوق النموسية وقالت) سيف ياك؟
نورسين: (شافت فيها وعينيها كيلمعو وحركات راسها تحت وفووق بمعنى اه)
ريما: (بخيبة امل...شداتليها فيديها بيد واليد لوخرا حطاتها على وجها ودوات بتاسف) اااخ..يا نورسين...اااخ...رياح الحب فين رماتك!!
نورسين: ماشي لخاطري اختي!...
ريما: عارفة ...القلب مايشاور...مي نصيحة..غي حاولي تنسايه..احسن ليك وليه...
نورسين: (ضحكات بسخرية) ههه يالله ديك النهار كنتي كتنصحيني بالي ايلا مشيت تالقيت الحب مانفلتوش من يدي ونشد فيه باسناني...ونجري عند الي كنبغي ومنخليهاش فقلبي...فين تبخر هادشي كولو؟
ريما: (كتشوف فيها بحسرة وباقا حاطا يديها على وجهها) غتعدبي!!
نورسين: العذاب معاشر معايا من زمان...
ريما: غتحرقي!!
نورسين: النار گدات وفات الفوت...
ريما: غتغرقي...
نورسين: انا اصلا فقاع البحر دبا....
ريما:(بحصرة) اااخ.يا نورسين..قدامك طريق طويلة...وعامرة مطبات
نورسين: (شداتلها فيديها ودوات بحماس) مستاعدة نسلكها!!
ريما: (حنات راسها باستسلام) الي بانلك اختي...
نورسين: (علات ليها راسها وشافت فيها وقالت) انا معولة عليك توقفي جنبي..ونتي استسلمتي من البداية؟
ريما: (ضحكات) ههه (حضناتلها وجها بيديها بجوج وقالت) انا ديما فجنبك الحمقة...ههه
نوسين: (دارت نفس الحركة ديالها...وحضنات وجهها بيديها بجوج وقالت بابتسامة) ههه...هكاك...مانايضش منايضش..زطمو عليه...ههههه
ريما: (ضحكاات وعنقاتها) اجي اديك الهبيلة اجي

بقاو معانقين شحال وكيضحكو ويهضرو تا شافو الساعة لقاوها تلطناش دالييل...شدو بلايصهوم وبقات ريما باتت معاها ونعسو معانقين ...كيدويو..تا نطقات نورسين..
نورسين: ريما!! دويليا شوية على سيف؟
ريما: (توترات) اش بغيتس تعرفي؟
نورسين: بلا ماتخافي مغنسولكش فديك الموضوع..غي خليه عليا هداك.عاوديليا على طفولتو وشبابو ..(بترجي) عافاك بغيت نعرف كولشي..
ريما: ههه...حمقة...شوفي خويا سيف والله تا ضريف ..القلب الكبير...وطبعو مم صغرو وهو معصب.ومكيحملش الي يقيصليه فحوايجو..ناري..كان ديما هالكني عصا ..لا مشيتليه لحوايجو...كان عنيد..وصعيب بزاف...عدب ماما فتربيتو فالتالي لاحتو لمي عيشة والمربيات..غلبات عليها ترابيه...ديما جابد الصداع فالزنقة ..فالمدرسة...فين مامشا محيح..ههه
نورسين: (ضحكات) ههه..صعصع وصافي من صغرو.هههه
ريما: هه غي صعصع وسكتي...ناري فاش كبر وولا شاب ..ولاو يموتو عليه البنات..التبوگيصة..والعضلات وداكشي..العينين زورق..ولحية...والزعورية هههه
نورسين: هااااح...سكتي سكتي ماتفكرينيش...ياااي
ريما: (دارت شافت فيها)ههه الرجوع الله..عنداك نتخايل ليك سيف وتنوضي تغتاصبيني ههه
نورسين: (ضرباتها لكتفها بالضحك)ههه يعطيك الدل...راه واخا تشوفيني هكا...راه يقرب ليا نذوب بلاصتي...
ريما: ههه..ناري يالزغبية زعطة خايبة هادي ههه...اه ونسيتك..فخبارك تا هو كيكتب..وعزيز عليه الشعر وديك التخربيق ديالكوم؟ ههه
نورسين: وااايلي!! ههه مابايناش فيه!
ريما: ههه وراه شحال من حوايج فيه وماباينينش فيه ههه
نورسين: (ضحكات) هههه.ايوا زيدي زيدي اش اخور؟
كملات ريما الهضرة على سيف عاوداتليها كولشي تقريبا شنو كيبغي شنو الي مكيعجبوش..اش كيبغي ياكل...الوانو المفضلة...شنو هواياتو..وزيد وزيد بقاو كيدويو تا داهوم النعاس .بجوج فدقة..
☀☀صباح جديد من دون شمس...فقط غيوم وضباب..وسماء غاضبة☀☀
فاقت نورسين بكري ..ضرباتها الفيقة مع السبعة عن غير عادتها..هي من محبيي النوم وقليل فاش كتفطن بكري من غير منبه...وكانت هادي ديك 1% من عدد المرات الي كطرا فيها هاد الضاهرة فصباح نورسين....ناضت شافت الياعة حداها لقات 07:00 درات راسها للجنب لاخور بانتليها ريما غارقة فستة وستين نومة....رجعات غطات على عينيها باش ترجع تنعس وعيات تقلب ووالو ...تا ستاسلمات وناضت..دخلات للمرحاض قضات حاجتها وغسلات سنانها ووجهها وحلات الباب..وخرجات...ماعرفات مادير جاتها فكرة انها دير دورة شرفية فالقصر...مغتلقاش ماحسن من هاد المناسبة باش تستكشف گاع الركاني والقنوتة الي فيه...بقات غادا..كولوار كيديها لكولوار ودروج لدروج...كولو عامر بيوتة وصالونات...وصلات حتى فين قاتليها مي عيشة كاينة ادارة القصر عاد بدات تسمع اثوات اشخاص وماكينات خدامين...وبالي كاينة الحياة فهاد القنت من القثر عكس لهيه الصقير والذبانة مكتزنزنش..بقات غادا تا بداو يبانو ليها الناس..شي غادي وشي جاي...بنات...ودراري...هالي لابس لباس رسمي..هالي لابس لباس دالخدامة...وشي غادي وشي جاي بخال الذبان ومكاينش الي كيعلي عينو فيها ولا حسو بيها تا واش كاينة...حياة اخرى هنا...سمعات هدير ديال شي ماكينات...زادت قربات ولفاتهوم ماكينات دالصابون...مقابلينهوم شي 6 دالناس..كولهوم دايرين وخدامين وحداهوم محطوطين اغطية ويزور ومنادل ...وكل مايخص الفراش ..كل نهار كيتبدل الغطاوات دالقصر والي غطاو بيه اليوم مكيبقاش لغدا ....كملات التبرگيگ ديالها فديك القنت...وتمات راجعة منين جات ني خطات الطريق وتاهت..تا دخلات لواحد القاعة كبيرة...فيها الات رياضية بجميع الانواع..وحلبة مصارعة...وخشبة بحال ديال المسرح للشطيح...قاعة رياضية بكل معنى الكلمة..جاية فالجهة الخلفية من القصر...دخلات وسدات الباب...وتوجهات للخشبة هي الي تارت انتباهها وتفكرات يامها فالمغرب والبار الي شطحات فيه تا عيات ...وفبحال هاد الخشبة....توحشات الرقص...وناضت فيها اللولة باش تشطح...مشات لوحد الباف لقات حداه سيدي...شعلاتو وهي تبدا موسيقى ديال الهاوس...بقات تقلب ...تقلب فيها تا طاحت فموسيقى شرقية ..والدربوكة كتكلم...جاوها هوايشها وبغات تشطح...علات عينيها بانوليها دوك الموزونات باش كيرقثو الشرقي معلقين واحد بيض..وفالاحمر...وفالاسود...مشات هزات الي فالابيض...وحزمات بيه ...ديجا كانت لابسة غي كولون...حيدات الفوقي ديال البيجامة وبقات بسوتيانات كانت لابساهوم بخال سوفيطما فوق الصرة وكيجيو جامعين الصدر....حزمات وتقابلات مع المراية وبدات تميل يمين شمال...وتلعب بطرمتها وصدرها..وفرحانة...والموسيقى مجهدة بزااف والبيفان تاقبين الحيوط.....

سيف كان داخل من الباب الخلفي راجع من الصبور كيخرج يجري كل صباح ويجي يكمل فلاصال....مع الدخلة كبسمع موسيقى مجهدة والدنيا غاطيح...قرب وهاز صاكو على كتافو وكيقطر بالعرق...طل غي من الشقة دالباب بانتليه نورسين كتمايل على نغمات الموسيقى..وشعرها كيمشي ويجي مع تمايل خصرها...بقا غي حال فمو فيها وفكيفاش كتشطح...زاد شقق الباب كتر وحط صاكو وبقا متبع معاها الريتم...وكيشوف فيها وفحركاتها وكيفاش كتقنهوم..وكبشوفها كتشطح وفرحانة وابتسامة على وجهها...دارت فواحد اللحضة بزربة..ولمحاتو....وبغات باش تأكد بالي هو ودارت حركة براسها وهبطاتو لتحت وشافتو مبين رجليها وشعرها مدلي...تأكدات انه هو..وضحكات..وكملات الرقص....كيما بدات واحسن گاع...الفرحة ديال انها شافتو وعلى الصباح زادتها لونڤي باش تزيد ترقص بغض النضر على تتبعو ليها عن بعد....حيت الرقص بالنسبةلها ماشي غي هزي يا نواعم..لا بل كتعتابرو تعبير صادق لمشاعرها...كتعبر بيه على غضبها وفرحها...الرقص ديالها فاش كتكون حزينة لا علاقة له بالرقص فاش كتكون راشقة ليها...ودبا كانت موحشة الشطيح وزادت نضرات سيف ليها عطاوها شحنة اضافية...رقصات بكل جوارحها ووضفات انوتتها وجمالها...عجبها راسها وعبرات على حبها من خلال هاد الرقصة...هو ماحيدش عينو من عليها..وهي كتختلس النضر غي بنص عين ...تا سالات وحبسات الموسيقى دارت مالقاتوش مشات كتجري لباب وكتنهج طلات برا لقاتو مشااا....رجعاتدخلات والضحكة واصلالها تال ودنيها...وهو كان جاي باش يكمل التدريب ديالو..خرج بلا رياضة هاد الصباح...ياترى اش الي خلاه يبقا متبعها واش عجبو الرقص ولا صاحبة الرقصة!!
لبسات بيجامتها وخرجات من بعد مابردات هوايشها...ومشات...كتقلل منين ترجع شي ربع ساعة عاد لقات الطريق لبيتها...دخلات لقات ريما مزال ناعسة ..دخلات بشوية للدوش ..كدوش وفرحانة ..سالات ورجات نشفات شعرها وبدلات حوايجها..وطلات لقات ريما باقا ناعسة ...بقات كدور فعينيها وطاحت عليها فكرة من افكارها الجهنمية...شافت فيها بشر وبقات تقرب بشوية بشوية تا وقفات عند ىايها وقربات لودنيها وغلضات صوتها وقالت....
نورسين: رييييماااا!! فيقييييي(مابغاتش تفيق وزادت قربات ليها وغوتات) واااااااااع!!!
ناضت مسكينة طافجة ماعرفات باش تبلات
ريما: (كدور فعينيها وتنهج) وااع...(كدور راسها يمين يسار)شكون...شكون؟؟
نورسين: (نفاجرات عليها بالضحك) وااااااههههههه....الي كواك..ههههههههه
شافت فيها ريما بغيض وعرفاتها هي مولات الفعلة وناضت ليها ...لوخرا غي شافتها جايا هربات ولوخرا كتجري موراها تا احقاتها شداتها شبعات فيها عضان وقريص بردات فيها الخلعة الي طفجاتها على الصباااح...وفالتالي قلبوها ضحك...
ريما: ههههه وااااع وامي كرشي ...الينعلدينمك...غتركبي فيا بوصفير مع بوزلوم نتي
نورسين: ههههه ماتخافيش كاين الي يكويك(وغمزاتها)
ريما: (كتموت بالضحك) هههه الكوى الي على بالي وبالك ولا بالنار؟
نورسين: هههه وابحال بحال اصاحبتي بجوجهوم كيشعلو فيك لعافية ههههه
ريما: هممم...صابحة ناشطة هاد الصباح...اش تما؟
نوريين:هههه واختي ..انا القردة صابحة شاداليا الريزو مزيان اش غندير نعطيها صبع باش تهبط؟! ههههه
ريما: (ككتشتت بالضحك) ههههه ديك الصبع الله يجعلو فكرك هههه...حايدي من قدامي خاندوز(دفعاتها من قبالتها ودازت وخلات نورسين كضحك عليها وعلى منضرها....

مشات ريما دخلات للحمام تقضي حاجتها ونورسين هبطات سبقاتها للطبلة دالفطور على مالحقات عليها فطرو فجو من الضحك.كالعادة..تا نسات راسها نورسين .. علات عينيها فالساعة لقات 10:00
عاد تفكرات الاستلذ يوسف غيعطيها الدرس دبا...لاحت السيرڤييت من يديها..وناضت طافجة..
نورسين: هييييه!! نسيت الاستاذ غيجي دبا..
ريما: (كتاكل حلوة) هههه ..نتش شي نهار تنساي راسك فشي قنت ...سيري سيري جري..
نورسين: هانا مشيت تلاحي
مشات طلعات لبيتها...ومابغاتش هاد.المرة تهبط عندو مبهدبة بحال المرة الي دازت..لبسات...سروال جاي قصير فالاكحل وتيشرت بيضة وصبيبط بلا كحل وطلقات شعرها خلاتو بوكلي ودارت ماسكارا وگلوص وهزات دفترها وقلم وهبطات كتجري...تاجهات للصالون فين قراو البارح ..دخلات...فاذا بها كتفاجئ من وجود مرا...گالسة حاطة شانطة قدامها وشعرها شايب دياراه كاري ودايرة نضارات طبية وحاطينلها عصير وگالسة كتسنا....بقات نورسين كطله وتهبط فيها..ودارت شافت فارجاء الصالون مالقات تا حد..ورجعات شافت فيها ...وقالت:
نورسين: (دوات يالانجليزية) صباح الخير
السيدة: صباح الخير مادموزيل...
نورسين (باستفهام) : يمكنلي نعرف شكون نتي؟
السيدة : ،(بابتسامة) انا...كارلا..وجيت هنا باش نقريك اللغة الانجليزية...بلا شك نتيا هي مادموزيل نورسين؟
نورسين: (تصدمات فاش قالتلها جات تقريها الانجليزية) متشرفين...واخا تعطيني 5 الدقايق ....هانا راجعة
خرجات نورسين كتجري...مشات دخلات المطبخ...وتاجهات نيشان عند مي عيشة الي كانت گالسة كدوي مع واحد جوج خدامات وكتعاتبهوم حيت ماداروش خدمتهم...مشات وقفات حداها وقالت:
نورسين: مي عيشة...شكون بدليا الاستاذ دالانجليزية..فين هو الاستاذ يوسف؟
مي عيشة: (شافت فالبنات الي كانو وقفين معاها ودارتلهم اشارة باش يمشيو براسها ورجعات شافت فنورسين) الاستاذ مابقاش غيقريك وجبنا استاذة بلاصتو...علاش؟
نورسين: (بغضب) علااااااش؟؟
مي عيشة: (استعجبات لردة فعلها) تحت امر ولدي سيف..واش كاين شي مشكيل؟
نورسين: (تصدمات فاش قالتلها سيف) كيفاااش!! سيف!! وعلاش اش دخلو؟
مي عيشة: بنتي انا قاليا هضرة نفذتها وماقاليش علاش...الله اعلم
نورسين: صافي واخا...(دارت مشات بعصبية...ومشات طتلعة فالدروج كنمشا بزربة وترمي الخلفة فيها كيلومتر ومعصبة مغلغلة وكدوي مع راسها)..اهاه مزيان..السي صعصع بدليا الاستاذ ديال؟ علاش؟ حيت هو بغا؟ تسنا السي سيف هانا جايا نتفاهمو....مشات بعصبية وكتمشا بالزربة وكتشالي بسدها تا وصلات لباب بيتو وحلات الباب ودخلات بحال شي اعصار...وزدحات الباب موراها...وقالت..
نورسين: شكون..عط..(سكتات فاش دارت لقاتو واقف عريان من فوق ...صدرو منفوخ وعضللتو باينين...ومفروزين...كان كيجمع حوايجو فالصاك...بقات غي حالا فمها ومكملاتش الهضرة وبقات ساكتة تا نطق:
سيف:هيييي!! مالك داخلة طافجة..وجاية بحال شي عاصفة؟؟
نورسين..باقا خالا فمها فمضهرو ماسمعاتو اش قال قرب عندها وهي مخرجة عينيها فيه مصدومة وهو يهز يدو وبقا كيلوحلها بيها جيهت عينيها..والسيدة مبنجة..

سيف: (كيشر بيديه جيهت عينيها) هييي!!واش صاڤا؟
عاد فطنات براسها وتوگضات وشافت فيه طلعاتو وهبطاتو:
نورسين: (غمضات عينيها بحركة طفولية وبزربة) ناااري!! مالك عريان بحال طرزان؟
سيف: (غلباتو الضحكة لاول مرة ومابغاش يطلقها) واش نتي حمقة؟ واقيلة راه هدا بيتي ..ونني تلي داخلة هاجمة عليا وزايداها يالهضرة...واش ماتعلمتيش تستأذني عاد.دخلي؟
نورسين: (حركات راسها يمين شمال وهي مزال شادة عينيها بمعنى لا)
سيف: (شاف فيها ومخلاتليه ما يقول ونطق بتعجب) دبا علاش مغمضة عينيك؟
نورسين: (باقا على نفس الحركة) حيت نتا عريان...سير لبس شي حاجة راه البرد محرك
سيف: (دور عينو فانحاء الغرفة وقال) هاد.البرد واش كتحسي بيه غي نتي؟ 
نورسين: (دوات بشوية)ااااخ هاد الساعة كنحس غا بحرارتي الي ارتافعات ونتا مزبط قدامي!!
سيف: (بعدم فهم) اش گلتي؟
نورسين: (علات صوتها وباقا سادة عينيها)گتلك لبس حوايجك..
سيف: بففف...داخلة طافجة بحال الاعصار! ومن دون اذن وكدوي معايا سادة عينيك وزايداها باغا تلبسيني حوايجي وفبيتي....اصلا نتي اش جيتي ديري هنا؟؟
نورسين: (عاد تفكرات لاش كانت جاية ورجعاتلها حالة الغضب وحلات عينيهت فيه ودوات بالغوات) علاش بدلتيليا استاذي ؟
سيف: (شاف فيها وعاد فهم سبب غضبها ودار رجع للصاك كيدخليه حوايجو وخلاها واقفة ودوا ببرودة) بغييييت!!
نورسين: (خرجات عينيها وتعصبات حيت فقصها ببرودتو) كيفاااش بغيتي!!
سيف: (مزال كيجمع حوايجو وبيرودة قال) كي كتسمعي...
جعرها حيت كيقتلها بالبارد..
نورسين: (غوتات و حكات رجليها مع الارض بحال الدري الصغير فاش كيتجنن) ااااااعهننن!! (بغضب وصوت عالي) مغروووو!...(سكتات شوية) متعجرف....(سكتات شوية وشافتو ماداهاش فيها وكملات) مغفل.....متسلط...وسكتات...شاف فيها وهاز كبوط كان باغي يدخلو للصاك وقال: 
سيف: وااكملي مالك سكتي؟؟
كيزيد يجننها غوتات وضربات رجليها مع الارض ويدات:
نورسينبغضب) نرجسي...
سيف: (كيقرب عندها) اهاه زيدي؟
نوىسين: ( راجعة باللور وبتحدي مخرجة عينيها) ديكتاتووور...
سيف: (كيقرب بخطوات تقال وهي راجعة باللور) ايااه واش اخور؟
نورسين: (شافتو مزال كيقرب عندها وبدات ترعد ونقصات من نبرة صوتها وقالت) صعصع....
سيف: (كيزيد يقرب) اممم!!..زيدي
بقات راجعة باللور وهو كيزيد لعندها تالصقات مع الباب ومابقالها فين تزبد..ومزال مابغات تستسلم ..قالت بشوية وبصوت مرتعش وعينيها كيغليو) غبي...
سيف: (زاد خطوة تا وصل عندها ولصقها مع ااباب ...قرب كتر ومشا جيهت ودنيها الشي الي زاد من توترها وحس بيها...وهمس بصوت خافت) اهاه ...كملي!!
نورسين:(ماقداتش تزيد دوي..قربو ليها وترها ..حراىتها رتافعات وقلبها كيخفق بسرعة ورجليها فشلو وهو باقي حاشي راسو فعنقها بحالي غيبوسها..غمضات عينيها وقالت بصوت متقطع) صا...صا...صااافي!!...( وكتبعد وجها منو)
سيف: (هز رايو شاف فيها وحط يدو على الباب حاصرها بمعنى ماعندك منين تهربي..شاف فيها بنضرات مبهمة...طلعها وهبطها ولاحض الخوف فعينيها..وتوترها وهي كتشوف فيه محاصرها وهازة يديها دايراهوم على صدرها...ودوا بغرض انه يلعب على اعصابها) همممم....علاش خايفة؟؟ عاد دبا كنتي مخرجة عينيك!!
نورسين:(كتشوف فيه بنص عين وكدوي وعينيها كيبريو..قالت بصوت خافض زهي كتشوف فعينيه) ماعرفتش!!...قربك مني كيوترني!!

سيف: (زاد لودنيها ودوا بصوت حنين) واش بغيتيني نبعد؟( و رجع شافيها)
نورسين: (غمضات عينيها حيت مابغاتش تزيد تشوف فيه وحركات راسها فوق وتحت بمعنى اه)
سيف: (ببرودة) اوكي..(هز يدو الي كان محاصرها بيها ف الباب ...وبعد منها بجوج خطوات وقال) هانا بعدت...(ضحك بانتصار ورجع الماريو كيجبد الحوايج...وهي يالله تنفسات الصعدااء ورتاحت فاش مابقاش محاصرها وقلبها مزال دقاتو مجهدة...بقات شحال واقفة ميمرة حدا الباب كتراقبو شكيدير وهو كيشوف فيها واقفة ومدواش معاها...تا نطقات هي:
نورسين: (فضولها قتلها بغات تعرف علاش كيجمع حوايجو) فين غادي؟!!
سيف: (شاف فيها وخنزر ودوا بجدية هاد المرة) كنضن ان الامر مكيهمكش..( حمر فيها) وماتزيديش تختابري صبري انورسييين؟!
شافت نورسين فعينيه خافت عرفات راسها عيقات عليه وصبرلها بزااف...شدات فالبواني دالباب وقالت:
نورسين: صافي!!صافي!!غي بلا متخرج نيابك ..انا غادا بحالي...(سكتات وعاد كملات كلامها وكاتمة الضحكة) وفين عندو مايمشي طارزان غي الغابة و الادغال ) هههه ضحكات وحلات الباب وخرجات قبل مايتبعها ويفوت فيها شي دقة
سيف: طرزان؟غابة؟ادغال ههه (خرجات ابتسامة عفوية من فمو) ههه حمقة هاد البنت !! 
خرجات نورسين مشات كتجري للبيت دخلات عند ريما..لقاتها يالله خرجات من الدوش مزالة بالبينوار دالحمام...ودهلات عليها كي العاصفة تا هي وجراتها من يديها بزربة وگلساتها فوق النموسيية وگلسات..
ريما:(كتسوف فيها يتعجب) اويلي مالك..جاية كي الرعد؟
نورسين: (كتنهج بحالا طالعة فشي عقبة) اففف...اجي نعاودلك اش طراليا عاد دبا!!
يدات نورسين تعاودليها منين لقات الاستاء تبدل حتى لفاش خرات من بيت سيف..وريما كتصنت ليها وحتلة فمها!! تا سالات؟
ريما: (بتعجب) دبا سيف هو الي بدلك الاستاذ؟
نورسين: اه...
ريما: وگلتيلو ديك الهضرة كووولها ومادوااش؟
نورسين: وايييه...
ريما: نورسين!! 
نورسين: شنو؟
ريما: خويا سكنو شي جن مافيهاش!!
نورسين: ههههه ...الله يمسخك يسخابلي اش غتگولي!!
ريما: وراه بصاح شفتي تعاودي هادشي لشي حد كيعرفو غيگولك يا اما كتحلمي ولا مقرقبة هههه
نورسين:وباراكة من الطنيز وگوليلي اش بانلك فهادشي؟
ريما:وااختي اش غنقولك انا مابقيت عارفة منقول. مهم..شوفي انزيدو نشوفو تصرفاتو من دبا لفوق واش غيبقا مهدن هكا ولا لا!!
نوريين: وافين غتشوفيه..راه كيجمع حوايجو ماعرفت فين غادي!!
رينا: (ضحكات) هه ماغادي فين الحمقة غيمشي غي الجبل واحد اليوماين ويجي راه يلله قالتهالي مي عيشة الصباح
نورسين: (فرحات) اه ..مزيان..
ريما: (كضحك عليها) ههه...اممم...غتوحشييه؟
نورسين: اااح اقلبي ..توحشتو من دبا قبل تا مايمشي...
ريما: هههه...ناري يالصگعة طحتي على زنافرك...حايدي خليني نبدل حوايجي...سيري شوفي ماديري...(ناضت مشات جيهة المراية) 
نورسين: اش غندير..دبا اصلا الاستاذة غتكون مشات..وانا قارية فالعشية..ونتي لا...غانمشي بوحدي؟
ريما: (كتشوف فيها من المراية وكدهن مرطب لوجهها وكدوي) ماتمشيش...ضربيها بنعسة العشية!!
نورسين: (تجبدات فوق النموسية) ااااه...واقيلة ديكشي الي غندير نيت فقت بكري
ريما: (حطات الكريم ودارت عندها) اهياتا...شفتك عجباتك الراحة؟ استحليتيها...نوضي سيري تقراي على ولادك نوضي....يالله
نورسين: (ناضت كتجبد) بففف..واهاهي نايضة..(مشات وصلات جيهة الباب يالله بغات تخرج ودارت شافت فريما) اه...وولادي راه باهوم خدااام..هههه (ضحكات وخرجات)
بقات ريما كضحك على عفويتها زسرعان ماتمحات ضحكتها..فاش فكرات ان نورسين كدوي على خوها...
ريما: (بحسرة كدوي مع راسها) ااااخ يا نورسين...نني ماعارفاش..فين دخلتي راسك...معركة صعيبة..يا تخرجي خاصرة..ولا رابحة نني وزهرك...الله يعاونك وصافي

مشات نورسين..دخللت لبيتها ...مشات حلات البالكون وخرجات...وهو يقرصها البرد ..كانت باقا لابسة غي تيشورت والقصر كليماتيزي مكيحسوش يالجو الداخل....شافت السما كحلة ورياح قوية كضرب ...وبرد قارس...ورجعات دخلات بزربة...لبسات حوايجها..ولبسات لباس سخون شوية وزادت مونطو وخرجات...
هبطات لتحت كلات ...وخرجات ركبات مع الشيفور فكاطكاط كحلة وتبعوها ليكارد كور تالجامعة....دخلات مع الوقت نيشان...دازت العشية عادية ...غي قراية وستريس بحال المرة الي فاتت مزال كتلقا صعوبة فالتواصل...خرجات فالعشية رجعات لدار مسخسخة ..معالدخلة طلاقات مي عيشة سولاتها على ريما قالتلها راها خرجات...كانت شي الستة دالعشية ديك الساعة ..طلعات لبيتها تلاحت فوق النموسية نعسات بصباطها من شدة العيا...
طاحت كومة تا فاقت على صوت الرعد والبرق مجهد ورياح قوية كتصفر...ناضت مفجوعة..من بلاصتها..طلات الساعة لقات التاسعة ليلا...ناضت بخوف حلات النافذة وهي ضربها رياح قوية معاها قطرات من المطر...سدات النافذة فالبلاصة وطلات غير من الزاج....جو مخيف...سماء غاضبة...وصوت الرعد كيرتاعش ليه القلب...وبرق فاش كيضرب بحالا شرقات شمس....صوت المطر غادي وكيجهاد ورياح غي مكتزيد فالوتيرة ديالها كانهم كيعلنو على ليلة عاصفية بامتياز...من صغرها وهي كتخاف من صوت الرعد ودبا كتر ...دوزات الريدو وشعلات الضو دالغرفة كولو ومشات گلسات فالسرير وجمعات رجليها عندها وتكمشات بقات ساقلة و كتشوف جيهة النافذة والمطر كيضرب فيها مجهد ....بقات ساهية فداك المنضر تا دخلات ريما هازة بواطة فيديها وقالت...
ريما: السلاااام...هانا جيت
نورسين: (نقزات من بلاصتها وشافت فيها بعينين خايفين) 
ريما: (شافتها هكاك مكمشة وخايفة ومشات كتجري عندها) نورسين!! مالك؟؟
نورسين: (بصوت مرعود) كنخاااف!! كنخااف من الرعد!!
ريما: (انفاجرات بالضحك) هههههه...اويلي...دبا هدا لاش مكمشة هنا كي دراري الصغار هههه ضحكتيتي!!
نورسين: ماعمري شفت بحال هاد الحو ...تقلب فجأة!!
ريما: ههه شمن فجأة راه البارح دارو نشرة انذارية .رياح قوية وعواصف رعدية وغيطيح تالتلج...(بعدم اكترات )مهم خاصك تولفي على هاد الجو من دابا لفوق هادي هي امريكا..ههه...خلينا من هادشي دبا...شوفي اش جبتلك!(عطاتها ديك البواطة ليديها..
نورسين: شداتها وكتشوف فيها مغلفة ودارت حركة بعينيها زعمة اش هادي؟
ريما: حليها وتعرفي...
حلات البواطة نورسين فاذا بها كتفاجئ بهاتف كيلمع وسط البواطة ...هزاتو بقات تفلب فيه...بانليها تيليفون اخر موضيل...مذهب واللور كامل مرصع بالالماس...عجبها بزااف وتحلو عينيها من الفرحة وشافت فريما وقالت:
نورسين: هدا ديالي؟
ريما: بطبيعة الحال ديالك..
تلاحت عليها نورسين بتعنيقة حتا خنقاتها...
نورسين: شكرا بزاف اختي..لهلا يخطيك عليا ..
ريما: بالصحة والراحة ...راه داك الحجر الي فيه حقيقي ..جاي من خدمة سيف لعندك
فرخات نورسين بزاف بالهدية وشكراتها وهبطو بجوج يتعشاو ...لقاو مي عيشة واقفة كطل من النافذة وعلامات القلق والخوف عليها
ريما: (مشات عندها) مي عبشة مالك؟ ياك لباس وجهك مخطوف؟
مي عيشة: (بقلق) شوفي الجو برا كيداير وسيف مشا للدار الي فالجبل ...خايفة عليه...
سنعاتها نورسين ودوات:
نورسين: علاش...خايفة عليه؟
مي عيشة: مكيناش تغطية تما..والجو عاصفي ايلا مشا تا طاح التلج مغيلقا مين يدوز..گتلو مايمشيش يأجلها مي مكيسمعش...شوفي الشتا والبرد الي برا 
نطقات ريما: واخلاص امي عيشة واش سيف غتحفاليه فالجو...زيدي زيدي نتعشاو وهني بالك من هادشي (شافت فنورسين لقاتها تاهي مخلوعة من هضرة مي عيشة ..طمناتها بعينيها وقالت) متخافيش..مغايطراليه والو...غي تهناي
مشات جراتها وگلسو يتعشاو..نورسين هاد العشا ماعىفاتو منين دازلها...قلبها تقبط ومشاتلها الشهية والهضرة دمي عيشة خلعاتهل وزيد عليه تا صوت الرعد الي باقي برا مابغاش يحبس..هاد الشي كان كافي باش يهبطلها المرال ل 0 استأذنات من ريما وماكملاتش ماكلتها وقالتاها تصبحي على خير ومشات..بدورها ريما مابغاتش تزيد تحكر عليها وخلاتها على راحتها عرفاتها اش بيها...
طلعات نوريين لليتها ومشات نيشان للسرجم كطل لقات الجو مزال مضطرب..وضلام مخيف ..تكات على جانب النافذة براسها وسهات كتفكر...فسيف..واش يمكن يكون كيدير دبا...ماكاملش تا نص نهار وتوحشاتو...

عند سيف ----------
واقف قدام نافذة فمنزل جاي فقمة الجبل وسط اضواء خافتة ولا صوت يسمع من غير صوت المطر والرعد..هاز كاس دالشراب فيديه وواقف قبالت النافذة تا هو كيراقب قطرات المطر وكيشوف جهة البوابة الرئيسية الي كاينة قبالتو وساهي كيفكر ويشرب ....
سيف:(واقف فديك البوابة نيت) حبيبة كيجاتك الدار؟
البنت: (عينيها خرجو من الفرحة وكدور عينيها فالدار من برا وتشوف) وااااو غزالة....وحتى الموقع زوين...كالم والهوا والطبيعة ...زوينة بزاف...
سيف: عجباتك؟
البنت: بزاااااف...
سيف: من اليوم هاد الدار ولات ديالك
البنت: (تحلو عينيها نن الفرحة ومشات قربات عندو ) واااش بصاح؟..
سيف: (قرب عندها كتر ) اه بصاح..
البنت: (طارت عليه عنقاتو وماقاداها فرحة) شكرا بزاااف...كنموووت عليك....
رجع الواقع وباقي واقف قدام النافذة ...ضحك بسخرية ودار مشا جهة المدفئة وگلس حداها فوق فوطوي تكا براسو وعلا عينيه للسما وبقا ساهي تاني....
دوزو الليلة كاملة فالتخمام...سيف كيفكر الناضي والذكريات ديالو فديك الدار مع ديك البنت...بحيت كل ركن فيها كيفكرو بحاجة ...ونوىسين كتفكر فيه وبالها مشغول عليه....
نورسين غفات فوق الكرسي المتحرك قبالت الشرجم...وسيف قدام المدفئة ....
👑👑اصبحنا واصبح الملك لله👑👑
يوم جديد...والجو باقي على حالو ...
فاقت نورسين كتجبد حلات عينيها وتحركات ضروها جنابها بالنعسة فوق الكرسي...عنقها تشنج ورجليها ماقداتش توقف عليهوم...ناضت بالزز..نيشان طلات مم النافذة لقات كولشي بيض...طاح التلج والاشجار لبسات عباءة فاللون الابيض...والقصر اكتاسب حلة جديدة...تحلو عينيها لجمتل المنضر..من صغرها عزيز عليها التلج تمشى فيه وتلعب بيه...ومن بين هواياتها توقف تحت المطر وتحل يديها ...مي الي معندهاش معاه هو الرعد والرياح القوية والسما فاش كتكون غاضبة...بقات شحال واقفة كتفرج للتلج كيتساقط...عاد مشات الحمام دوشات وبدلات حوايجها..وهبطات لتحت....
سيف....ضرباتو الفيقة حس بقشعريرة دالبرد...لاح عينو على المدفئة لقاها طفات..حل عينيه بالزز ومشا غسل وجهو وصحصح...ولبس حوايجو ومشاعيط اسيد الي مقابل داك الدار عاود شعليه المدفئة ...ومشا...دخل سيف للكوزينة..قاد فطور لراسو بزربة وگلس ياكل... هاد المكان الوحيد الي كيرتاح فيه سيف..وكيبعد عليه على الحياة الروتينية وتلخدمة والستريس وصداع الراس..هادشي كان شحال هادي مي دبا ولا كيجي ليه حيت فيه كترجع ليه ذكريات الي مزتل عايشة معاه ومرو عليها 4 سنوات...ماضي الي كان جميييل...وتحول فالاخر لكابوس...الي قلب حياتو رأسا على عقب...ولحد الان مزال تابعو شبح تلماضي وطيف الذكريات واش هو الي باغي ييقا عايش ومقيد.بيهوم ولا عقلو وقلبو الي رفضو ينساو بلا مايشاوروه...
كمل فطورو ...طل من النافذة بانليه الجو استقر شوية والتلج حبس من التساقط..وناض طلع لبيت ابس گاط وجاكيط ببوماغين سخونة مع سروال جينز زرق مفتوح ودار القب وسد الباب وخرج..مايمكنش يجي لهنا ومايمشيش لواحد المكان الي اعتاد يجي ليه....بقا غادي داير يديه فالجيب وكيتمشا خطوات تقال ورجليه كيدخلو فالتلج ويخرجو بصعوبة...بقا غادي تا وصل لواحد الشفق كبييير كيطل على سهول وهضاب ووديان ...منضر طبيعي رائع..ودبا زادو التلج جمالية...وقف فوق من واحد الحجرة زجبد سيجارة شعلها وبقا يكمي وساهي لساعات...تا بدات تقطر عليه قطرات المطر زعجاتو وخرجاتو من دوامة التفكير ديالو ..وسرعان ماتقلب الجو على غفلة واكتست السماء بغيوم سوداء...جهدات الشتا ...هرب يدرق تحت واحد الشجرة مي ماقدات والو وشد طريق الرجعة كيخطي خطى متسارعة وكيلعن الزهر داليوم ...وصل للدار بحال الفلوس ...فازك من قاعو لراسو كي دخل زول الجاكيط لاحها ومشا دغيا لبيت حيد حوايجو ودخل دوش وخرج من الدوش كيعطس ويكح...بدل حوايجو لبس ملابس سخونة شوية وهبط الكوزينة يطيب ماياكول.....صونا تيليفونو مشا يشوف لقاه السي ابراهيم الي كيعيط ...جاوب...

سيف: (كيكح) كح..كح..الو الواليد..صاڤا!
ابراهيم: (تشوش فاش سمعو كيكح) ولدي سيف ياك لباس؟ واش مريض!!
سيف: كح كح...واقيلة ضربني البرد...كح
ابراهيم: فين راك؟
سيف: فبيت الجبل..(عطس) ااتسوو...
ابراهيم: لا ..حالك ماعاجبانيش..اش مشيتي دير تما...فهاد الجو راه شفت نشرة انذارية كانت عندكم..
سيف: وا صافي الواليد ...مجرد نزلة برد...كح..كح...علاش عيطتي؟
ابراهيم: اه ...نسيت گاع..عيطت باش نفكرك فعيد ميلاد.اختك...بعد غدا ..عارف ايلا مافكرتكش معمرو يجيك البال..وراك عارفها ايلا مادرناهلهاش كديرلينا حالة..
سيف: مكاينش الي خرج عليها قد الفشوش ديالك...دبا اش المطلوب مني انا؟
ابراهيم: بما انها هاد العام ساكنة معاك اذن نتا الي غتكلف بيه..وخاصك تبدا التحضيرات من دبا...حنا غدا جايين..
سيف: الواليد..واش بنتلك مسالي لهاد التخربيق؟..
ابراهيم : (بتذمر) نتا اي حاجة كتخص اختك كتولي مامساليش...مافهمتش مالك معاها؟...تگول عدوتك ماشي اختك.نعل الشيطان اولدي وحنن قلبك على اختك...اييه اسيدي حنا فششناعا..مي تانتا كتزيد فيه..نفرات منك غي على هاد الحكام الزايد والعثبية الي ماليها لزوم..
سيف: (نفخلو راسو بالهضرة وقال باستسلام) صافي...صافي...بلا كترة الهضرة..انا غنرجع هاد اليلة ونشوفو حريرة هاد عيد ميلاد...يالله تهلا الواليد...(قطع عليه ولاح التيليفون ورجع كيطيب...وكيكح..بقوة...صوتو دعدع...ومرة مرة كيعطس...
نورسين...منين فاقت وهي ماعندها خاطر...غي كامشي وتجي من قنت لقنت ودور كي الحمقة فالقصر خصوصا ريما مكيناش قارية ..تليوم عندهوم التوقيت معاكس هي قارية الصباح ونورسين العشية..بقات غي كتلف الوقت تا جات وقيت الجامعة لبسات عليها وكلات وخرجات...
تعاشات العشية...وقرب يطيح الضلام...وشعلو ضواو فالقصر...نا دخلات طوموبيل سيف..كان سايق بيديه..نزل منها..وعينيه حومر..ونيفو كيسيل..وراسو تقيل وكيكح بقوة..دخل بخطوات تقال..تلاقاتو مي عيشة..خلعها منضرو..من الشوفة عرفاتو مريض ومدخوول..مشات كتجري عندو كتقلب ليه فوجهو ويدو لقات حرارتو طالعة..
مي عيشة: (بخوف) هييييه!!مالك اولدي اش طرالك؟
سيف: (واقف وكيدوي بزز وكيسعل وصدرو مدعدع) كح...كح...ماعرفت راسي تقيل وصدري مدعدع..واقيلة البرد
مي عيشة: الله يا وليدي...ياك گتلك ماتمشيش..كنت عارفة غتوقعلك شي حاجة
ريما هابطة فالدروج شافت حالتو كيدايرة ومي عيشة واقفة مخلوعة وكتعاتب فيه..هبطات كتجري شدات فيه..وكتقلب فوجهو...
ريما: (بنبرة خوف) سيف..خويا مالك؟
سيف: (ماعجبوش هاد الاهتمام الزايد) اااوف..صافي يراكة راه معندي والو..انا طالع لبيتي (داز فيهوم وزاد لحقات عليه مي عيشة وغمزات ريما..وفهماتها...مشات كتجري عيطات للطبيب الي فالقصر.جا كيجري ،طلعو عندو لبيت لقاو مي عيشة معاه وهو تزاد عليه الحال وحرارتو كتزيد وترتافع...فحصو الطبيب...وضربلو واحد الشوكة وعطاه دوا وامرهوم يخففو عليه حوايجو ويخليوه يرتاح.خرج وخرجات معاه مي عيشة وريما...وصلو معاه تالدروج...ودار معاهوم غيرجع يطل عليه من بعد.مايفيق..ويلا تزاد عليه الحال يعيطوليه...
دخلات نورسين لقاتهوم واقفين فالدروج مع الطبيب..وعليهم علامات القلق ...تساءلات اش واقع!!شافتها ريما جات عندها ومي عيشة مشات مع الطبيب...
نورسين: اشنو طاري..علاش الطبيب هنا؟
ريما: غي سيف..عيان شوية..
نورسين: (تبدلو الاوان فوجهها ) مالو؟ اش طراليه؟
ريما: غي تهدني...جاتو نزلة برد حادة..وجبنالو الطبيب راه عطاه الدوا دبا كيرتاح الفوق...بلا ماتخافي عليه..
نورسين: (متاقتش بيها) تسناي خليني نمشي نشوفو...(دازت فيها ومشات كتجري طلعات نيشان لبيتو وتبعاتها ريما كتجري...دخلات لقاتو ناعس ففراشو وعريان من فوق..مشات عندو كتجري كلسات على رجليها فالارض جنب النموسية...وبقات تقيسليه فجبينو ...لقات حرارتو مرتافعة بزاف...تهلعات عليه وشافت فريما...
نورسين: (بصوت مرعود) ريما!! مالو سخون بزاف؟
ريما: (كتهدن فيها) متخافيش اثاحبتي راه الطبيب قالنا مكاين تا خاجة وعطاه الدوا ودبا سي نوغمال يبقا سخون راه يالله خرج من عندو...(دوزاتلها على وجهها..تهدني عافاك ..ماتخافيش احبيبة
نورسين: (شافت فيه وعاودات شافت فيها ووجهها مخطوف) لا..لا عنداك يتزاد عليه الحال..عاودو عيطو لطبيب ..شوفي كيداير..قيسي حرارتو...شوفي شنايفو زرقين ووجهو اصفر...
ريما: (شداتليها فيديها كتهدنها) نورسيننن...حبيبة تهدني عافاك راه معندو والو..واش ماعمرك مرضتي بالسخانة؟ عادي ..هانتي يالله تبدلي خوايجك وكولي شي حاجة ورجعي شوفيه غتلقايه ولا لباس..تيقس بيا
نورسين: لا مابغيتش ناكل ..غي خليني معاه..يقد يفيق ويبغي شي حاجة...(شافت فيه) لا ...لا منخليهش فهاد الحالة..
ريما: على راحتك...خليك..انا نسيفطلك حوايج لبسيهوم وماكلة بلا ماتمرضي تانتي وتزيدي عليه..واخا؟
ماجاوباتهاش نورسين..كتشوف فسيف والخوف فعينيها...شافتها ريما هكاك خلاتها على خاطرها وخرجات...

هزات يديها نورسين وكدوز عاى وجهو بحنية ..وكتقيس حرارتو وهي غي مكتزيد ترتافع...قلبها كيتقطع عليه..ما ولفاتش تشوفو فهاد الحالة ضعيف وهازمو المرض..وطريح الفراش...ولفاتو ديما واقف شامخ بحال الجبل ...بقات شحال غي گالسة حداه ومركزة فيه الشوفة...تا دخلات الخدامة..وجابتليها حوايجها والماكلة...ناضت بزربة دخلات للحمام بدلات لبسات عليها بيجامة اما الماكلة ماداتهاش فيها...ورجعات گلسات هاد الخطرة فجنبو وشوية شوية كتقيسلو حرترتو ..متزعزعاتش من قدامو وماحيدتش عينيها عليه..تا بدا يتحرك...والعروقات كتصب عليه..وكيصدر انين...بدا بحالا كيفيق..وكيقول كلمات مامفهوماش...ناضت تقابلات معاه وكتقلب فيه مالو والخوف فعينيها هو كيتالم وهي كتألم معاه...بداا كيتحرك راسو يمين شمال...والعرق نازلة عليه..وكيهضر ...
سيف: انننن....امممم...ماقتلتهاش ماقتلتهاش!!!...بسمة...انننن...
نورسين: (شافتو هكاك بحالا كيشوف شي كابوس وكيهبرت فمنامو بقات كدوزليه يديها على راسو وشعرو بحنية وكدوي) شتتت...تهدن عافاااك....متخلعنيش عليك....
سيف: (باقي كيحرك فراسو وكيمش فعينيه وكينين..ويدخل ويخرج فالهضرة) اننن...ماقتلتهااااش!!...ماقتلتهااااش....بسمة!!
نورسين: (كتسمع سميت بسمة بحال الموس كيقطع فقلبها) شداتليه فيديه بيديها بجوج وجمعاتهوم عندها...عاصرة عليهوم...يادلها نفس الشدة وعصرلها على يظيها بقوة...وتهدن ومتبقاش كيتحرك بزاااف....شافتو سكت...هزات يديه قرباتها لفمها وسدات عينيها وباستهوم بحنية ورجعات حلات عينيها وهبطات دمعة كتسلت منهوم وقالت بصوت خافت...والدموع فعينيها) اعطيني ألمك....(كتبكي) نقدر نخبعو عندي...مي مانقدرش نتحمل نشوفو عليك....مستاعدة نعطي اي حاجة مقابل منشوفكش هكا ضعيف..وشاد الفراش...(كدوي بحرقة وصوت مبحوح مخلط مع الدمووع) واخا مجرد نزلة برد مي ماقدرتش نتحمل نشوفك هكا!! قلبي كيتقطع من الداخل والله...
شافت فيه ومدات يديها لجبهتولقاتو مزال سخون...مسحات دموعها وعاودات قربات يديه لفمها وباستهوووم وبقات شاداهوم وهو ناعس ...مابقاش كينين..بقات گالسة معاه حتى دخل الطبيب وريما...لقاوها شاداليه فيديه وعاصرة عليه بحال الولد الصغير الي كيشد شي لعبة عزيز عليه وخايف يحيدهاليه شي حد...قرب الطبيب عندهوم عاد.حسات بوجودهوم تحركات غي شوية من جنبو مي ماطلقاتش من يديه...وبقا الطبيب كيفحصو تا سالا..ودوا
الطبيب: غنسيفط ليه ممرضة تيقا معاه هاد الليلة...
نطقات نورسين: لا يلاش مايحتاجش...(شافت فيه بحب وقالت) انا الي غنبقا معاه...
الطبيب: الي بغيتي ا انسة..ايلا كان هكا ..غتجيبي منديل وتفزگيه بما بارد وتبقااي تحطيهلو على جبهتو...واخا الطب مطور والادوية كاينة مي كتبقا هادي احسن طريقة لتخفيض الحمى...دبا ماتخافوش عليه...غتستقر حالتو انشاءالله...ليلة سعيدة...
خرج الطبيب...وقربات ريما من نورسين وشافت عينيها حومر وقالت:
ريما: (كدوي بشوية) كنتي كتبكي؟
نورسين: شافت فيها وحركات راسها فوق وتحت بمعنى اه
ريما: ماتخافيش عليه هانني سمعتي اش گال الطبيب...يالله ترتاحي وخليني نعيط لممرضة تقابلو..
نورسين: (زيراتليه على يديه وشافت فيها وقالت) مايمكنش نطلق من يدو من بعد ماشدلي فيها (هزات يديها مع يدو و دارتلها حركة بعينيها زعمة شوفي)
ريما: (شافت فيديها لقاتو بصاح شاد فيها..استغربات امرهم بجوج...شافت فيها وابتاسمات ليها ومشات خلاتها على خاطرها)
سدات الباب...وخرجات....
نورسين: (كدوي معاه وهو ناعس) غتسمحليا غنطلق من يديك حيت ايلا مادرناش هكا مغتنزلش حرارتك..(ابتاسمات وسلات يديها بشوية وناضت هبطات عند مي عيشة قالتلها بالي هي الي غتبقا معاه هاد اليلة ...استغربات لامرها مي شافت لمعة فعينيها ونضرة الي ماخفاتش على مي عيشة انه كاينة شي حاجة تما حيت كبيرة وداية وجايبة فالزمان ومغيخفاوش عليها اموور القلب...متبغاتش تناقش معاها الموضوع حيت ماشي الوقت المناسب باش تأكد من الشكوك ديالها.عطاتها ديكشي الي جات على ودو طاسة فيها الما و فوطة صغيرة وطلعات كتجري رجعات عندو لقاتو فنفس الوضعية ماتحركش...فزكات الفوطة وحطاتها على جبينو ...ودورات عينيها فارجاء الغرفة وشافت فيه وقالت...
نورسين: مزال خاصنا نديرو واحد الحاجة...ناضت من حداه بسرعة ..كتقلب على المكيف فين جا باش طفيه ويبرد البيت ...باش تساعد فانخفاض حرارتو.لقاتو وطفاتو ورجعات گلسات حداه..
نورسين: (بابتسامة) دبا مزيان...

بقات كتبدليه الفوطة على جبينو كل مانشفات والغرفة بدات كتبرد ...بقات هكاك لساعات شافت الساعة فجنبها لقات الربعة دالصباح..دوزات يديها الباردة على جبينو لقات الحرارة نخافضات شوية عاد فرحات..وحتى حرارة جسمها انخفضات حيت ملابساشمزيان وفاش طفات المكيف بردات خصوصا الجو برا تلج وشتا...تبورش لحمها...شداتليه فيديه وگالسة جنب السرير على ركابيها فالارض...وتكمشات فراسها وحطاتو على السرير عينيها عليه وشادة فيدو تا غلبها النعاس ونعساااات...ماكاملاش ساعة وفاقت تاني كتراقب حرارتو وتغفا وترجع تنوض بقات على هاد الوضعية تا صبح الحال ورجعات غفات تاني وهي شادة ليه فيديه...
بدا كيحل عينيه سيف..بتتاقل...حس بشي حاحة فوق جبينو وشي حد شادليه يديه...تلفت لقا نورسين ناعسة على ركابيها فالارض وراسها فجنبو على النموسية ومكمشة ولحمها مبورشة بالبرد والغرفة باردة...استغرب من وجودها بجنبو...عاد ذكر اش طرا البارح...وحتى شنو كان كيحلم..وتفكر تا الهضرة دنورسين عند راسو وفاش شداتليه فيديه حيت واخا كانت حرارتو مرتافعة ومأترة عليه الحمى مي كان نص فايق ونص ناعس..
غمض عينيه ورجع حلهوم وشاف فيها...ويقا كيحاول يسل يديه باش ينوض بلا مايفيقها يالله حرك يديه بشوية ناضت طافجة وحلات عينيها فيه...وقالت بخوف...
نورسين: سيف!! خاصك شي حاجة؟ كضرك شي حاجة؟
سيف: (كيشوف نضرات الخوف فعينيها وكيتفكر هضرتها دالبارح) لا انا لباس..اش كديري هنا؟
نورسين: (بابتسامة ونابغاتش تبين خوفها عليه) البارح كانت حرارتك مرتافعة بزاف..وانا بقيت معاك هاد اليلة
سيف: (حيد الفوطة على جبهتو وشاف فيها ببرود) مكاينينش ممرضات؟
نوريين: (واخا قصح معاها الهضرة مابغاتش تبين ان هضرتو جرحاتها هزات الفوطة والطاسة الي كانت حداه وقالت) كنضن ان تطفلي على خدمة الممرضة هاد الليلة سالات ...(ناضت وقفات) مايكون عندك باس...نهارك مبروك...( وتمات غادة جهة الباب)
ييف عرفها تقلقات وعرف راسو قصحها بهضرتو...هي باتت الليلة كلها جنبو وهو ماراعاش تالدقيقة بقات معاه فيها..مابغاش يخليها تمشي زعفانة)
سيف: (عيطليها قبل ماتوصل لباب) نوىسيبيين!!
نورسين: (وقفات ودارت غي بوجها لعندو وشافت فيه بمعنى شنو)
سيف: شكرا
نورسين؛ (عجبها الحال فاش شكرها واخا ديكشي دارتو عن طوع قلب وماتحتاجش عليه شكر حيت روحها الي كانت كتألم يلاصتو...مي بغات تردليه الصرف شافت فيه بنص عين ومزال واقفة يلاصتها مادارتش) المهم ماشي شكرا...المهم انك بريتي ووليتي لباس...(ضحكات بانتصار وخرجات)
ضحك سيف بسخرية...عرفها رداتليه الصرف ديال ديك الخطرة فاش جا عندها باليل وقاتلو يطلب منها السماحة وقالها ماشي المهم تسامخيني المهم هو انك وليتي بيخير...ضحك..ورجع تفكر الهضرة الي كانت كتگول البارح وكيفاش سمعها كتنخصص وتبكي عليه...تنهد وناض راسو تقيل دخل للحمام دوش وخرج شعل الكليم ولبس حوايجو وهبط يفطر...
نوىسين خرجات كتجر رجليها وعينيها كيلصقو بالنعاس وكترة التعب الي مرات بيه هاد الليلة وكتفوه ....مشات عند ريما دخلات لقانها كتوجد راسها تمشي للمدرسة دخلات بعينيها ميدودين كتمشا بحال شي زومبي..لقاتها حدا النرابة كتقاد الميكاب...بقات واقفة فالباب وتكات على جنب الحيط وقالت بصوت نعسان...
نوىسين: صباااح الخيير(وكتفوه)

ريما:(كتشوف فيها وفمنضرها كيداير من المراية وجابتلها الضحكة) هههه...صباح النوور مالك الساطا بحالا طايحة من طيارة ...باينة مانعستيش...(ناضت كتقاد خوايجها وكدوي) مهم بلا ماتمشي هاد النهار غا سيري تنعسي باينة فيك بايتة عساسة على حبيب القلب هههه (مشات الناريو تهز الصاك وكظوي ومكتشوفش فيها ولوخرا غي ساكتة) اه حقا غدا عيد ميلادي..هانا گلتهالك باش تجيبي المادو...والعائلة اليوم غايجيو...(كتقلب فالماريو وتهضر تا سمعات صوت شخييير جاي من حدا الباب ...دورات عينيها لقات نورسين متكية على الباب وناااعسة كتشخر ....بقات حالة فمها وغلباتها الضحكة اول مرة تشوف شي خد ناعس واقف...قريات عندها بشوية وزادت لودنيها وغوتات
ريما: نورسييييين..
قفزات من بلاصتها ومبجقلة يالنعاس وشافت فريما الي حابسة الضحكة بالسيف
نورسين: اااه...اه..شنو ؟ شنو؟
ريما: بسمالله عليك واش سمعتيني اش كنت كنحاجيلك من الصباح؟
نورسين: كتحكزفعينيها) لااء..اش گلتي
ريما: بففف (ضربات جبهتها) معامن انا...اكيد مغتسمعنيش اش گلت ونني ناعسة واقفة
نورسين: (كتنفض راسها كتوگض زعما) لا...لا..هانا معاك هانا معاك اش گلتي؟
ريما: گتلك غدا عيد ميلادي والعائلة اليوم جايين..
نورسين: (تحلو عينيها وفرحات) بصاااح؟ غدا عيد ميلادك! واااو (احي نعنقك..جراتها عنقاتها وقالت) عيد ميلاد سعيد حبيبة 
ريما: (باقا معنقاها) لهلا يخطيك احبيبة ديالي...غدا نشاءالله غنحماقو شوية الله شحال هدا مافوجنا..توحشت النشاط والحفلات...و...(سمعات صوت شخير على كتفها عاود..بقات كدور فعينيها ..عاد كتاشفات بلي نوريين نعسات على كتفها وهي معنقاها...بغات تأكد وقالت) نورسييين؟؟
نوريين: (جاوباتها وهي فستين نومة على كتفها) انننن!!
ريما: انننن؟ لا صافي خلف الله فهاد البنت...
شداتليها فيديها وجراتها مسندة عليها وماشية ناعسة لاحتها فوق النموسية وغطاتها وهي تجمع رجليها لعندها و نعسااات...بقات ريما واقفة عند راسها وقالت:
ريما: ايييه..هدا هو الحب ولا حايد بالاك...حسدت داك المعقد ديال خويا فهاد اللقطة مكرهتش نلقا شي حد ييغيني كي كتبغيه...الحاجة الوحيدة الي كنطلب ديا هو تخرجي منتاصرة من هاد المعركة الي دخلتي ليها انورسين...كنتمنى ماتخرحيش بحال الطائر المكسورة جناحو...تنهدات
وخلاتها ناعسة فبيتها وخرجات

هبطات لتحت لقات سيف كيفطر جرات الكرسي وگلسات وقالت:
ريما: صباح الخير!! كيبقيتي شوية؟
سيف: (كياكل) صاڤا حمدالله...(شاف فيها)نورسين ماغتهبطش تفطر؟
ريما: لاء ناعسة..مسكينة بايتة فايقة هاد الليلة...يمكن مابغاش يجيها النعاس (هي عارفاها باستة عند سيف مي غي كتمعني عليه)
سيف: (شاف فيها بنص عين وقلب الموضوع) فالعشية غيجيو الواليد...وبالنسبة لعيدميلاد غدا غنوصي الي غيتكلف بكولشي..وفالعشية غيكون عندك البروگرام ويلا كانت شي حاجة خاصك كتبيها نزيدوها...
ريما: (تحلو عينيها من الفرحة) ياااااس 😍
سيف: (شاف فيها وقال لا حول ولا قوة الا بالله وناض)
مشا لبس وخرج للخدمة...وريما سالات فطوىها وناضت مشات تقرا.....رجعات فالعشية مع الربعة دالعشية دخلات لقات باباها وماماها وفيروز ومرات عمها جاو ...مشات سلمات عليهوم وتلاحت على ماماها كتبوس وتعنق فيها...
ريما: (گلسات ودوات مع باها) امتا وصلتو؟
ابراهيم: يالله شي ساعة دبا...كيدايرة ابنتي مزيان ؟ القراية صاڤا؟
ريما:وا يالله بدينا ابابا...مهم صاڤا حمدالله
ابراهيم: (بتساءل) فين نورسين گاع ماجات معاك!!
رينا: (بتعجب) اااو..نورسين خليتها ناعسة مامشاتش اليوم...واش مزال ماشفتوهاش؟
ابراهيم: لا مزال ماهبطات...ياك ما مريضة؟
ريما:لا لا متخافش...غي عيانة شوية وصافي باش مامشاتش.(شافت فمها ومرات عمها وحتى فيروز لقتهوم كيميقو وماحاملينش الهضرة على نورسين ....كملات الحديت مع باباها ولوخرين بقاو مجمعين بيناتهوم وكيضحكو ..حطوليهوم الضيافة اتاي والحلوة والمملحات كياكلو ويهضرو...واخا عابشين فامريكا...مي التقاليد المغربية مزالين محافضين عليها...واخا العقلية گاورية...باقين شادين 
فتقاليدهم وعاداتهوم....وختى الهضرة بيناتهوم فالدتر كيدويو غي مغربية....اما الانجليزية تا يكونو برا..وحتى الخدامات دالقصر اغلبيتهم مغاربة ...باش يبقاو يحسو بالاجواء المغربية فالمحيط ديالهوم...السي ابراهيم كان متعمد يربي ولادو بهاد الطريقة..واخا تخلقو وكبرو برا مي زرع فيهوم تمغريبيت...بقاو گالسين فالصالون تا دخل سيف...كالعادة بكل اناقتو وفخامتو ...توجه نيشان للصالون غي دخل شافتو ماماه طارت عندو كتجري تعنق وتبوس وتقلب فيه حيت قالها ابراهيم راه كان مريض....
عايدة: ولدي حبيبي..كيبقيتي شوية؟ خلعتينا عليك..
سيف: (هز بديها باسها عندو) ماتخافبش الواليدة..غي نزلة برد ودازت
عنقاتو وباستو وخلاتو مشا سلم على باباه ومىان عمو وفيروز...الي كعادتها ماحيداتش عينيها عليه..مني دخل..وقلبها غينقز من بلاصتو...كتمنى غي شوفة من عندو مي ديما كيعاملها ببرود
گلسو كاملين..كيهضرو ويدويو فالتحضيرات...وسيف كيدوي مع باباه...تا نطق السي ابراهيم...ووجه كلامو لريما..
ابراهيم: بنتي...سيري شوفي مال نورسين ماهبطاتش..واش هادشي كولو نعاس..عنظاك تكون عيانة ومخبية عليا!!
ريما: هانا غنمشي نشوفها ونجي...
مشات ريما وبقا سيف حاضيها بعينيه...وكيتسناها تهبط..حيت عرفها مانعساتش البارح وبقات مقابلاه وتشغل بالو لا تكون مريضة بسبابو 
عند نورسين..الي ضلامت الغرفة وتشعلو الاضواء وهي مزال ناعسة...دخلات ريما لقاتها ناعسة على كرشها ومفرقة رجليها..كل رجل فقنت ويديها وحدة تحت الخدية ووحدة فوقها وكتشخر مجايبة لدنيا خبار....مشات نورسين بشوية وقفات عند راسها لقاتها فستين نومة ...حركاتها شوية بصبعها كتفيقها وتعيطلها بشوية...
ريما: (كتهززها بصبعها) نورسين...واااا نورسين!!
نورسين: (ناعسة) اننننن؟
ريما: (ضحكات بشوية) ههه...واتي نوضي شمن اننن...(قربات لودنيها وغوتات) واافيقيي..
نورسين: (حلات عين وعين ساداها) شكون نتي؟

يتبع

التنقل بين الأجزاء

صفحة القصة
سيتم تشغيل صندوق التعليقات بعد لحظات
معظم التعليقات تم إخفاءها بواسطة الفيسبوك، نحاول بكل الوسائل المتاحة إستعادتها في أقرب وقت ممكن.