شرارة حب غامض الجزء التاسع

من تأليف Ghazal trust
2018

محتوى القصة

رواية شرارة حب غامض

.. طلعو لطونوبيل و اسلام بدا تيضحك .. 
اسلام : مكنتش كنظن انك كتخاف لهاد الدرجة .. 
عبد العزيز : و انا مكنتش كنظن انك غاتستسلم لهاد الدرجة .. 
اسلام : هههه هادي هي الحياة خاصنا نعطيو باش ناخدو .. 
عبد العزيز ؛ مفهمتش قصدك .. 
اسلام : خليك من القصد ديالي انا غير داوي .. مهم انا هدرت مع المحامي يوجد اوراق طلاق ديالي من سندي .. غتوقع عليهم .. غانجيبها ليك مباشرة .. و انت تجيبلي بنتي .. 
عبد العزيز : peki ama .. (قاطعو ) 
اسلام : ههههه كنحس بك فاش كتعصب ولا كتفرح كيتخلطو عليك .. 
عبد العزيز : منكدبش عليك ولكن مرتاحيتش لك .. انت ماشي نفس الشخص اللي هددني مهار الاول .. 
اسلام ؛ الامر مختالف دابا .. متعلق ببتي .. المهم بغيت نهدر مع بنتي دابا نتأكد .. 
عبد العزيز : اكيد .. 
دوز عبد العزيز الاتصال برجالو و دوزو لإسلام بنتو اللي صراحة كانت حالتها صعيبة و اثرات فإسلام و هدا اللي خلاه ميتراجعش على الفكرة ديالو .. 
اسلام : توقع لبنتي شي حاجة ن..👊
عبد العزيز : ماشي شرير لهاد الدرجة بالعكس .. بنتك فأحسن بلاصة غير عدم الوجود ديالكم اللي خلاها فهاد الحالة .. و متنساش باللي حفيدتي حتى انا .. 
اسلام : نخليك انا غادي .. 
عبد العزيز : متعطلش عليا خاصني نرجع فحالي .. 
.. طلع اسلام فطونوبيلتو و خلا العجاج نايض موراه .. وصل للدار طلع للجناح ديالو لقا سندي تماك .. 
سندي : كنت كنتسناك .. 
إسلام : ياك لاباس ؟
سندي : كنفكر نهدر مع هداك .. ممم هداك .. 
اسلام ؛ شكون هداك ؟؟ 
سندي : عبد العزيز .. 
اسلام : اييه و علاش ؟ (ربع يديه ) 
سندي : باش ييرجع لينا كنزة .. امكن احن فيا حيتاش انا كنبقا بنتو فالاخير .. 
اسلام : ااه بصح هادي فكرة .. سيري و هو يقولك واخا ا بنتي هاكي بنتك و سمحي ليا خطفتها لك .. 
سندي : (جلسات ) افف واش كضحك عليا .. انا كنحاول نفكر و انت كتفلا .. اوا و شغانديرو ؟؟
اسلام : انتي غير خوي راسك من هاد المشاكل .. انا غانتصرف ..

كيف كل نهار فالصباح .. 
خصوصا بعد التوتر اللي وقع تتفيق سندي و اسلام و يحيى كيفطرو مجموعين في صمت و من بعدها كيخرجو .. سندي كتبقا فالدار و مريم سادا عليها فبيتها .. 
المهم اليوم ماشي بحال قبل .. جا المحامي جايب معاه شي وراق (اكيد نتوما عارفين وراق ديالاش ) .. سيفطو اسلام للمكتب باش ميتيرش الانتباه .. هدرو و وراه فين غايوقع و كيفاش غادي تم الاجراءات .. و يكفي توقيع كيدل على تراضي الطرفين .. اما الباقي غايتحل دغيا .. 
بالفعل سنا اسلام و بقا ليه توقيع د سندي كيف غايدير ليه .. ودع المحامي .. 
اسلام : العشية غانعطيك خبر باش تاخد الوراق موقعين .. 
... : واخا .. نهارك مبروك 
مشا المحامي و سد الباب .. وغير شافو يحيى هبط و مشا لحق على اسلام للبيرو ... 
يحيى : ماغاديش نخرج من هنا حتى تقوليا شناوي دير .. 
اسلام : اصلا كنت ناوي نهدر معاك فهاد الموضوع .. 
(مشا هز جوج كيسان و قرعة و جلس فالفوتوي ) 
اسلام : سد الباب و اجي تجلس .. 
.. نخليو يحيى و اسلام يهدرو و نمشيو نشوفو سندي اللي طلعات عند ماماها تهدر معاها ..
سندي : (كدق ) 
مريم : دخل 
دخلات سندي و كتشوف فيها شوفات ممفهومينش .. اما مريم شافتها و بانو فيها تعابير الحزن .. 
سندي : علاش ا ماما علاااااش .. 
مريم : انا .. (قاطعاتها )
سندي : بغيت جواب مقنع .. انتي كنتي اكثر وحدة نثيق فيها .. و من بعد كنكتاشف ان الانسانة اللي هي ماما و كانت قدوتي فالحياة هي اكثر وحدة طعناتني ف ظهري و رماتني لعافية و جلسات كتشوفيا ..

.. سندي بدات كتلومها على كاع اللي وقع من الاول حتال الاخير و كتغوت و مريم متحملاتش و بدات تبكي .. و حتى سندي مقصراتش من جيهتها جبدات القديم و جديد .. غواتها تقريبا مسموع برا الجناح د مريم و فديك اللحظة كان يحيى جاي للجناح يشوف مريم و بالصدفة سمع الغوات .. و سرع الخطوات ديالو باش يشوف شواقع .. دخل الجناح لقا مريم غارقا فدموعها و سندي غير كتلوم فيها و كتعاود القصة د زواج و بنتها اللي مشاو بسسبابها و كتغوت .. مشا يحيى شد فسندي و كالماها شويا خرجها للكولوار .. 
يحيى : ماشي بهاد طريقة ا بنتي .. راه حتى هي كثر منك و ديما كتلوم راسها .. و تانيب ضمير داير خدمتو و خدمتك .. مكتشوفش نعاس و حتى الا نعسات كتخلع .. 
سندي : انا مكنتش باغا نقوليها هكاك ولكن فاش شفتها توترت و رجعات ليا سينتا لور و مقدرتش نتحكم فالاعصاب ديالي .. 
يحيى : مهم سيري للبيرو اسلام تيتسناك .. 
سندي : 😍 اه واخا .. معرفتيش علاش ؟ 
يحيى : على شي وراق .. سيري عندو هو يشرح لك .. 
سندي : واخا هاني غادا ( فرحاااانة و غادا قربات طير ) 
يحيى : سندي .. بلاتي اجي نقولك .. 
سندي: نعام .. 
تقربو بشي خطواااات و هو يشدها عنقها مزياان .. 
يحيى : (و هو معنقها ) تهلاي فراسك ا بنتي .. 
سندي : (كتعجب ) عيهيهيهيه و راه مهليا فيه .. (طلقات منو ) عتاذر من ماما نيابة عني .. 
يحيى : كوني هانيا .. (مشات سندي و هبطات دمعة من عين يحيى .. مسحها ) .. غانتوحشوك بزاف ا بنتي .. دار غاتكون خاويا بلا بيك .. 
.. رجع يحيى عند مريم و مشات سندي عند اسلام تشوف اش بغا .. دخلات عندو بلا مدق لقاتو واقف حدا شرجم هاز شي وراق فواحد اليد و لكاس فيد خرا .. مشات عندو عنقاتو من اللور .. 
سندي : دغيا توحشتيني و باغي تشوفني .. 
اسلام : (حط الكاس و الملف و ضورها عندو ) .. توحشتك (باسها ف نيفها ) .. ولكن قبل بغيتك ف حاجة خرا .. 
سندي : ههه مم بحالاش ..؟
إسلام : مالك زربانة .. جلسي نشرح لك .. 
سندي : هو الاول (تعابير الحزن على وجهها ) اش درتي فموضوع كنزة .. 
اسلام : على هادشي عيط لك .. 
سندي : (تقادات فالجلسة ) كنسمع .. 
اسلام : مهم هادو شي وراق خاصك توقعي عليهم .. (كيوريها الاوراق) .. 
سندي : اييه و ديالاش .. (قاطعها ) 
ناض إسلام وقف حدا داك شرجم و هز الكاس و بدا يشرح ليها بلا ميشوف فيها .. 
اسلام : انتي عارفا باللي كنزة مزال صغيرة .. هكاك علاش غانديرك نتي الوكيلة على الأملاك ديالها لبين ما توصل ب 18 سنة .. و هدشي غيتطلب منك مجرد توقيع .. 
سندي : اه واخا. . مع انه ماشي هذا الموضوع اللي سولتك عليه .. 
اسلام : نحلو هاد الموضوع و المباقي ندويو فيه من بعد .. 
جبد اسلام ستيلو عطاه ل سندي و حط ليها الوراق قدامها و كيوريها فين توقع و مع هي مكتفهمش بزاف فداكشي محاولاتش تقرا ... اضافة الى ثقتها الزايدة فيه .. اااايييه سندي وقعات على اوراق طلاق و هي كضحك .. و دبا هي رسميا مطلقة من اسلام .... 💔

.. خدا اسلام الوراق و حطهوم فوق البيرو .. 
اسلام : حبيبة سيري بدلي عليك .. خارجين .. هزي معاك شي حاجة من حوايجك يمكن تحتاجيهم .. 
سندي : (غتموت بالفرحة ) مسافرين .. 
إسلام : مزال مقررتش ولكن يمكن نباتو فشي بلاصة .. 
سندي : شحال نجمع ؟؟ 😍😍 
اسلام : اللي قدرتي عليه المهم جمعي شي حاجة من حوايجك .. 😊
سندي : و نجمع ليك حتى انت ؟ 
اسلام : لا ا سندي لا .. غير لك متزيديش تصعبي الموضوع عليا كثر من هكا .. أ مم بغيت نقول انا الا حتاجيت نشري نتي دوقك صعيب .. 
سندي : واخا ا حيااتي (طارت لعندو باستو من فمو و هي كثر من فرحانة ) كنبغيك و كنموووت عليك بزاف ا حياتي .. 
اسلام : حتى انا ا عمري .. يالله سيري .. 
خرجات سندي .. اسلام مشا هز لكاس و جلس فالبيرو كيشوف فالوراق .. شرب الكاس كامل و ناض جبد القرعة و كب كاس اخر و كاس و كاس اخر .. شد راسوو و بدا يدوي غير بوحدو .. 
اسلام : سندي كتصعبي عليا الموضوع بزااااف .. منقدرش نتفارق معاك ولكن هذا هو الحل الوحيد .. و حتى منقدر نقولك والو .. سمحي ليا بزااااااف .. عارفك كتقي فيا و هادي اخر حاجة توقعيها مني .. ولكن غانغامر على قبل بنتنا .. خاصنا نتنازلو .. اه انا عارف واعدتك عمري نخليك .. ولكن بعد المرات الواااااقع تيخلينا نديرو شي حوايج خارج على ارادتنا و باش نحميو الناس خرين .. انا عارفك غاتحقدي عليا و ماغاتحملينيش .. ولكن مبقا عندي حتى اختيار .. ولكن كنواعدك غانخليك تسمحي ليا 😇
استجمع اسلام كاع قوتو و هز تيليفونو و عيط على المحامي يقوليه باللي الوراق واجدين .. موراها عيط على عبد العزيز باش يقوليه فين يتلاقاو .. 
فرح عبد العزيز و طلب من رجالو يقطعو تذاكر للسفر فهاد الليلة لتركيا .. 
اما اسلام بقا ليه اتصال اخير .. 
اسلام : الو 
... : نعام .. 
اسلام : اليوم غايبدا تطبيق 😈 منبغي حتى خطأ .. 

.. لبسات سندي و سالات و جمعات داكشي اللي غاتدي معاها سيفطاتو مع الخدامة تديه لطونوبيل د إسلام جات تخرج من الجناح لقات مريم كتسناها .. طارت عليها (مريم )بلا متهدر تعاااانقو مزيان و بدات كتبكي مريم و شهيقها غادي و كايزيد .. 
سندي : صاف ا ماما سمحت لك .. و كلشي غايكون مزيان بلا متبكي .. (كتمسح ليها دموعها ) و غادي ترجع كنزة و نرجعو فحالنا و كلشي يولي حسن من قبل .. 
ماااحد سندي كتهدر ماحد مريم غادا و كتزيييد مابغاتش تسكت و كتزير عليها .. 
سندي : ماما وا صافي غاتبكيني تانا و كيفما كتشوفي انا غنطير بالفرحة 😍😍🙈 اسلام مخرجني امكن مسافرين .. حتا نرجع و نهدرو يالله بسلامة (باستها و مشات كتجري ) .. 
كانت لابسا سروال كحل و ميني بوط كحل مع مونطو كري طويل و بوط قصير و هازا صاك صغير و نضاضر كحلي .. مكياج خفيف و شعر بوكلي مطلوق .. 
مريم : 😭😭😭😭 اهئ اهئ بنت ..تي 😭😭😭 مووو..ححال تسمحي اهئ ليا 😭😭😭 ها..ااادي هي اهئ اهئ المرة الثانيييي ...ية اهئ اللي غانطعنط ورا ضهرك 😭😭😭😭 ..
بقات كتبكي حتى مقدراتش مزال توقف جلسات كتبكي و تشهق و قلبها كيحرقها .. كتجبد فحوايجها و تزيد تبكي و ضرب جيهت قلبها بحال الا كتحاول تبرد العافية اللي نايضا فييه .. فالاول يحيى خلاها تبرد على حالتهغ ولكن فاش شاف حالتها ماشي هي هاديك .. مشا عندها نوضها و داها لبلاصتها عطاها مهدئ و خلاها تنعس .. 
اما سندي هبطات لقات اسلام كيتسناها ف طونوبيل و هي ماعارفاش باللي الخرجة اللي خرجات من داك الباب هي الاخيرة و موحال مزال ترجع ليه .. و باللي يحيى و مها التصرف اللي صدر منهم عبارة على وداع ماشي غير تصرف عادي .. 
بكل فرحة ركبات سندي باست اسلام و هي الارض ماهزاهاش و كيسحاب ليها باللي راجلها كيدير هدشي باش متبقاش مشطونة مع بنتها .. ماعارفاش باللي هو غادي يمشي يتبادل بيها و يعطيها لباها ف طبق من ذهب .. ديماراو طونوبيل في اتجاه مزال ممعروفش .. كان الحال قريب للعصر .. 
اسلام : نتغداو هو الاول .. اصلا مكلينا والو من الفطور 
سندي : اه اه بصح 😍 .. نمشيو .. 
اسلام : فين بغيتي نديك .. 
سندي : فينما بغيتي ..
اسلام : اللي عجبك .. انتي تختاري هاد المرة .. 
سندي : ممم معرفتش .. اصلا مولفاك انت تختار .. غير ختار كيف ديما .. 
اسلام : لا اليوم نتي اللي غادي تسيريه طيفمل بغيتي .. 
سندي : (كتعجب و الفرحة باينا عليها ) تشهيت ناكل سوشي .. 
إسلام : مم واخا نمشيو .. فكري الا بغيتي بلاصة خرا ..

... بدات سندي كتقول اش بغاو حتى وصلو ريسطو شينواز .. طلبو شغاياكلو .. كلاو و خرجو و بدات سندي كطلب و اللي حلات عليها فمها تيمشيو ليها .. من بلاصة لبلاصة و الي بغات تيحضرو ليها .. فالاخير مشاو لواحد لكافي ياخدو كوتي ليهم .. جلسو هي خدات براوني مع ميلك تشيك و هو خدا كريب بنوتيلا مع عصير ليمون .. 
كيااكلو و كيشوف ف ساعة .. قربات الوقيتة اللي غايتلاقا عبد العزيز بإسلام .. و دوك الاثناء عيط يحيى لإسلام باش يخبرو باللي المحامي خدا الاوراق .. اسلام تيحاول يبقا هادئ و مخبي كاع اللي واقع باش سندي متعيقش ليه و تخرب كاع اللي بنا .. قطع الاتصال مع باه و بدا يضور تيليفون شحال ف ييديه .. 
اسلام : النهار كامل و حنا كنديرو دكشي اللي بغيتي .. 
سندي : اه بصح .. (عنقاتو ).. كنشكرك على كلشي ... دوزت احسن نهار فحياتي .. 
إسلام : (كيصرط فالريق) اه اوا دابا غانديرو داكشي اللي بغيت انا .. 
سندي : ااه واخا هيهيهيه 😍😋 معنديش مشكل اصلا كنتيق فالدوق ديالك و فيك حتى انت (باستو) 😘 
.. اسلام تيتزير عليه الحال و تيشرب فالعصير و الما غير باش يبرد و يبقا هادئ حتى يسالي هاد نهار و ديك ساع ينهار كيفما بغا .. 
اسلام : نوضو نمشيو ؟ 
سندي : اه اه 😍😍 متشوقة نعرف فين نمشيو .. 
حط الحساب فوق طبلة و ناضو شادير يدين بعضياتهم في اتجاه الطونوبيل و نظرات الناس ممفارقاهمش و كلشي كيشوف فيهم بإعجاب و كلشي حس بكمية الحب اللي بناتهم و مدى التجانس اللي مشكلينو .. 
طلعو للطونوبيل و كسيرا بيها و بدا تيبان عليه التوتر .. و ولا كيتمنا يكون كلشي حلم و ينوض يلقا راسو كاين ف السعودية او دانيمارك .. المهم هادشي اللي واقع ماشي حقيقي و غير غمامة و تفوت .. ولكن حس باللي كلشي واقعي و ممنو هروب .. خاصو يعيشو و يتعايش معاه و يلقا ليه شي حل .. 
سندي لاحظات التوتر ديالو ولكن مابغاتش ديرونجيه و حتى فضلات متسمعش شي خبر اللي يخصر فرحتها و لأول مرة حيدات منها الفضول و العناد و كثرت الهدرة و الاسئلة .. 
ولكن هاد المرة اسلام هو اللي غايهدر و بلا حتى سؤال .. 
إسلام : سندي .. احم .. مهم انا عارف من بعد هدشي اللي غانقوليك .. تكرهيني و متحملينيش ولكن قبل حاولي تفهميني .. انا معنيديش خيار اخر .. (سد البيبان دالطنوبيل باش متحلش و طيح ) ..
سندي : (تتجمع ضحكة ) شواقع ا اسلام انا مفهمت والوو .. 
إسلام : ممم حتى نوصلو و تفهمي .. 
سندي : اسلام الا شيحاجة خايبة بلاش .. بلا متخصر لينا هاد الفرحة و اللي فينا اصلا كافي ..

اسلام : واخا حسن بلاش .. 
.. اسلام بقا ساكت معرف باش يبدا ولا باش يتلي و خايف توقع ليها شيحاجة .. و كان اكبر خوف هو ردة الفعل ديالها تخليه اتراجع على قرارو .. لذلك فضل اخليها امام الامر الواقع .. ماشي ليها و انما ليهم بجوج .. تيليفو تيصوني .. 
اسلام : الو .. (سندي مركزة معاااه ) .. 
عبد العزيز : حنا وصلنا و انا وفيت بوعدي .. 
اسلام : حتى انا .. (ضار عند سندي ) ياك احياتي غاديين ف طريق .. (غمز ليها باش تهدر بجهد ) 
سندي : (مافهما والو و الهدرة اللي قاليها اسلام شوشات عقلها ولكن مكتحاوش تستوعبها .. و كتحاول تسمع شكون كيهدر و شكيقول ولكن والو) ااه جايين ا حبي .. 
اسلام : كيفما كتسمع حنا جايين .. كيفما اكدت لك اكد ليا حتى انت .. (كيهدر ضاحك و مكيحاولش ابين ) 
عبد العزيز : بنتك ناعسا .. تعمدت نجيبها ناعسا باش يجيها كلشي بحال شي حلم .. ولكن غانصورها ليك باش نكونو واضحين .. ههه اعلم الله باش تفليتي على سندي حتى جبتيها .. المهم هدشي مكيهمنيش .. المهم جات .. 
اسلام : واخا كنتسناك تسيفطها .. فعلا مكيهمكش ههه(ضحكة صفراء ) المهم جايين .. (قطع ) .. 
كي قطع معاه فالبلاصة نقص ضو لبورطابلو باش ميبانش لسندي شكايدير فيه .. و حتى هي كتحاول تشوف شكاين ولكن مكيبان ليها والو .. (وصلات تصويرة ) شافها و ضرب طم .. تأكد و رتاح بالو نسبيا .. اي انه هادشي باش غامر ممشاش هكاك كاينا نتيجة انه غادي يرجع بنتوو .. 
سندي : شكون صونا لك .. 
إسلام : درت مع شي صحابي نشوفهم تماك .. 
سندي : اه يسحابلي غانكونو بوحدنا .. و علاش غمزتيني نهدر.. 
إسلام : دغيا غيمشيو هه .. أ مم اه باش ناكد ليهم اننا جايين بصح و صافي .. 
سندي : (بينها و بين راسها ) ممم امكن هادشي لاش قاليا ديك الهدرة .. خاف نتعصب .. تعصبت صراحة ولكن هو بالغ شويا .. مهم ماشي مشكل .. حمد الله صدق غير هدشي ماشي خاجة خرا ( رجعات ليها ضحكة ) 😍😍 ..
بقاو غاديين فصمت حتى وصلو للمكان المحدد .. كانو شي ثلاتة طونوبيلات تماك اللي ظنات سندي انهم صحاب اسلام ولكن بينها و بين راسها كتقول باللي شافت هاد طونيبيلات شي مرة .. ولكن هما فالحقيقة عبد العزيز و رجالو .. 
اسلام : (كيحل صمتة) هبطي .. 
سندي : وصلنا ؟!! 😳 
إسلام : لا غانمشي فطونوبيلات لوخرين .. 
سندي : ااه هههه واخا (بلا منكتر الاسئلة ) .. 
هبطها من طونوبيل و مشا فاتجاه طونوبيل د عبد العزيز .. حل ليها الباب و طلعات بلا متشوف شكون حداها .. سد عليها الباب و كتسناه يضور يطلع من الجهة الاخرى .. ضارت تشوف الجهة الاخرى و هو يبان ليها باها ... 
سندي : (كتحرك راسها ب لا ) 😳😳😳😳😳😳😳 (كينيها بداو تيدمعو ) .. 
ضورات وجها لقات اسلام مزال حدا الباب .. هبط عبد العزيز الزاج اللي حدا سندي .. 
عبد العزيز : (كيهدر مع اسلام ) بنتك فالطونوبيل الاخرى سير هزها راها مزال ناعسة .. كانت معايا ولكن بدلت ليها بلاصة باش تجلس حدايا بنتي .. 
سندي : اسلام .. 😢😢 .. واش .. أ أ شهادشي 😢😢😢 .. بصح عطيتيني بيدك لهاد الراجل اللي عمرو عتابرني بنتو .. سخيتي بيا لهاد الدرجة 😭😭😭😭 لهاد الدرجة انا رخيصة بالنسبة لك 😭😭😭😭😭😭😭 (كتغوت ) كان بإمكاننا نلقاو حل اخر .. ولكن انت ختاريتي السااااااااهل .. واش هادو هوما الوعود اللي عطيتيني باش عمرك تخليني 😭😭😭😭😭 لا لا ميمكنش اخر واحد توقعتو يخوني انت .. علاش علاش اللي كنتيق فيهم تيطعنوني😭😭😭😭 (كتحل الباب باش تهبط ولكن عبد العزيز سادو ) .. عمرني نسمح لك بعدتيني على ماما وعلى بنتي .. و عيشتيني هاد الايام فالكدوب و الاوهام .. 
اسلام : سكااااااااات 
سندي : 😭😭😭😭 لا لا يمكن تنحلم .. انت وااااعدتيني متخلينيش .. تخليتي عليا و حنا مزوجييييين .. 
عبد العزيز : راه طلقتو .. 
سندي ؛ 😳😳😳😳😳😳 طلقتي .. اااا ااا متى .. و .. وو .. و كيفا..ا...ااااش 😭😭😭 .. 
اسلام : (كيهدر بزز ) .. هاد .... صباح .. 
سندي : أا ااا ا .. طلقتيني بلا متقولي والو .. كدبتي عليا 😭😭😭😭 الوراق د كنزة صدقو د طلاق .. لا لا لا هدشي بزاف 😭😭😭😭💔 .. شغاتقول لماما و بابا يحيى فاش يسولو علياا .. 
اسلام : فراااسهم كلشي. . 
سندي : (تتخنق بشهيق و صدمة مورا صدمة ) لا لا ميمكنش 😢😢😢 تال هنا باراكا .. يعني انه البكا دماما اليوم و تعناق ديالها عبارة على وداع 😭😭😭😭 و حتى تعناق د بابا يحيى 😭😭😭 هبطات وجها كتبكي 😭😭 و الخريج داليوم تاهو كدووووب .. شفقتي عليا .. 
اسلام : لا احبي.. (قاطعاتو ) 
سندي : سكت حتى كلمة .. 😡😡😡😡 مبقيتش باغا نسمع حتى حاجة اصلا كلشي كدوب .. (حيدات الخاتم دزواج شيراتو عليه ) 😭😭😭😭 .. 

.. تركيا .. و بالضبط فقرية جوليازي .. 
وصلات سندي و باها للقصر (اكيد ماشي بحال القصورة اللي فالمدن ديالنا .. قصر بمعنى قصر ديال آغا فقرية ) .. كلشي كيرحب بيهم و فرحانين و تلقاو ليهم بالدبكة و الاجواء دالفرح .. و العيالات كيطلو من شراجم و سطوحا كيشوفو شكون جا و كيتعجبو فسندي اللي جات بديك تقزيبة .. اما سندي فالطريق كاملا تحاورات مع راسها و وضعات شحال من قررات انه ماغاديش تنهازم و غاتبقا قويا و غاتلقا حل لراسها و في حالة نجحات غادي تكون راسها بوحدها بعيدا على الجميع .. و من اليوم مبقاتش غاتبكي الا على بنتها .. بالنسبة ليها حتى واحد ميستاهل لانهم باعوها كاملين رخيصة .. و الا تيسرات امورها غاتقلب على بنتها حتى تلقاها و تاخدها من اسلام و تمشي لبلاصة بعيييدة .. المهم سندي استجمعات قواها باش تواجه الواقع .. 
سندي : (ضارت عند عبد العزيز كتهدر ليه فودنو ) بغيت نرتاح .. 
عبد العزيز : (شير بيديه لواحد من رجالو و شرح ليه اش يدير و ضار عند سندي ) سيري معاه هو غايديك عند اللي غتكلف بيك .. جبتها خصيصا لك باش تفاهمي نتي وياها .. 
سندي : مم واخا (معفرة ) .. 
.. مشات سندي مع هداك داخلين مع القصر كتهدر معاه كتحاول تجبد منو الهدرة ولكن والو لا حياة لمن تنادي و اصلا اللغة ممعاوناهاش .. بقاو غاديين من باب ل باب و كترت دروج .. شويا دخلو لواااحد بيلاصة كبيييرة على ماكيبان كوزينة ولكن بشكل قديم و فيها بزاف دالخدم و شي عيالات لابسين مختالف عليهم .. كلهم بداو كيشوفو فيهاا و يتعجبو و يبقاو يحنززو اما سندي ممسوقاش ليهم .. عيط هداك اللي سيفطو عبد العزيز على وحدة منهم سميتها عائشة .. هدر معاها و شرح ليها الوضع و شنو خاصها دير و باللي من اليوم هي المرافقة د سندي .. 
عائشة : Merhaba Sindian hanim .. iyiyim sen ?? Benim Aişa .. ve ..(مرحبا لالة سنديان .. انتي بيخير ؟؟ انا عائشة .. و .. {قاطعها لاخر خرج فيها عينيه زعما مكتفهمش عاد طلعات معاها }) مم سمحيلي ا لالة سنديان .. مهم انا عائشة المرافقة ديالك .. (مدات ليها يديها ) 
سندي : (سلمات عليها مع ابتسامة ) ..
مشاو طلعو مجموعين كيتمشاو و كتوريها البلايص اللي فالقصر .. و كتختاصر ليها العدد دالناس اللي فالدار و اي حاجة كتعلق بهم .. باختصار نظام العيش ديالهم .. و باللي عبد العزيز عندو اولاد خرين من غيرها هي يعني خوتها من باها (عبد العزيز كان واضح فهاد ناحية زعما عندو بنت خرا ) .. المهم الخدامة عطات لسندي ملخص د 70 عام ف 10 دقايق ثرثارة مكتسكتش .. وصلو البيت اي الغرفة دسندي .. 
سندي : ممكن تمشي تقوليهم اجيبو ليا حوايجي خليتهم ف طونوبيل .. 
عائشة : ممكن جدا ا لالة سنديان 😄 (عجبها الحال مع سندي )
سندي : غير سندي بلا لالة و بلا رسميات (اصلا ممطولاش ) 😊 .. 
عائشة : 😍 واخة ا لالة .. ا مم سن..سندي .. 
مشات البنت اللي كتبان عليها صغيرة .. يعني العشرينات .. تقريبا قد سندي مكبيراش بزاف .. و فداك الوقت سندي كدور تشوف بيتها للي اكيد معجبهاش .. ستيلو خايب و دكشي اللي فيه ممولفاش بيه هي .. مهم موديل عيان و مشات لقات حمام من الطراز القديم ..

#سندي 
بقييت ساهيا فالحالة ديال هاد البيت .. صراحة حالتها منعرف كيفاش ناس مستحملين العيشة فوضعية بحال هكا .. و المشكل لاباس عليهم .. حنا فاش كنا مزلوطين و الحالة حالت الله كنا حسن من هكا .. منقدرش نبقا هكا خاصهوم يلقاو ليا شي حل .. بقيت سارحة ف هاد الخربة اللي انا فيها تا قفزاتني هاد الموصيبة اللي لصق ليا عبد العزيز جايبا ليا صاكي و كتفرنس .. تانا تنفرنس ليها حيتاش غانحتاجها بزاااااف هي اللي كتفهم لوغتي و هي اللي غاتجيب ليا الخبيرات د اي حاجة بغيتها .. 
سندي : هيهيهيه ماكاينش حسن من هاد البيت ؟
عائشة : كاااين .. 
سندي : و علاش ماديتونيش ليه ؟ 
عائشة : 😳😳😂😅 (تخلطات ليها صدمة و ضحكة ) كاينين جوج واحد د لالة سلطانة الام دالاغا و واحد دالاغا و مراتو .. و كاين واحد مابيهش ديال ولد الاغا اللي هو الاخ ديالك 😍😍 
سندي : يعني .. 
عائشة : يعني ميمكنش لينا نعطيوك حتى واحد من هادو حيت (قاطعاتها ) 
سندي : عيطي لعبد العزيز .. 
عائشة : 😳😳😱 أ أأ .. (تبدلو فيها الالوان ) .. 
سندي : مالك شنو وقع ليك (تخلعت )
عائشة : الا سمعوك غايقتلونا اناوياك .. 
سندي : افف (شادة قلبي قلت شنو واقع ) غير سيري عيطي عليه و متخافيش .. 
.. خرجات من عندي و جلست نخمم انا بيت ناخد .. دعبد العزيز ولا د شارفة د مو ولا نشد زكير مع خويا اللي مكنعرفوش .. ممم فاش دكرات عائشة ولد عبد العزيز خرجو من عيينيها نجوم كيبريو و القلوبا كينبضو .. باينا غايكون شي واحد زوين و دافع عليهم كبير .. اف اش بغيتو .. اصلا انا مكتربطني حتى علاقة بهاد ناس .. يعني نلقا شي حل و نزيد خلفة مع طريق .. ولكن واخا هكاك عندي فضول نشوف خويا و ختي 😋😋 .. غايكونو كيشبهو ليا ولا انا حسن .. انشاء الله انا حسن .. دابا انا الكبيرة 😍😍 هههه (مشيييت سرحت بخياااالي لكوكب زحاال من تخيل لتخيل .. غرقت فالمواضيع و تساءلات الكثيرة اللي جاتني و اللي نسبيا بلعاني كنحاول نتخيبها باش نسا الواقع اللي عايشا فيه و منكدبش .. مكرهتش للحظنة نفيق و نلقا كلشي حلم .. ولكن .. ).. 
عبد العزيز : سنديان شواقع .. 
سندي : (قفزت ) أ أافف (خلعني كنت ساهيا ) معجباتنيش هاد البيت .. مرتاحيتش فيها .. 
عبد العزيز : جميع الغرف اللي هنا دايرين هكا .. (قاطعتو ) .. 
سندي : ولكن على ما شفت كاينين شي 3 ولا 4 مختالفين .. 
عبد العزيز : (خنزر ف عائشة عرفها وصلاتها ليا ) ولكن هادوك بماليهم ميمكنش نخرجهم و ندخلوك نتي .. 
سندي : (كنتعفر ) ماغانخرجو حد .. غير نبقا فشي وحدة بينما تصلحو ليا البيت ديالي .. نظرا انني ممولفاش هاد الاجواء .. على عكسكم نتوما مولفين يعني تقدرو تستحملو (كنمعني على ولدو ) ..

عبد العزيز : منقدرش نخرج مالين دار من بلايصهم باش تبقاي ليا نتي على خاطرك .. استحملي شي ايام لبين ما نقادو ليك شي وحدة على دوقك .. 
سندي : تقدر (غوت شويا بديت نتمسكن و ندير راسي كندمع ) واش انا كيفاش نقدر نعس اولا نرتاح فجو ممولفاهش .. واش بغيتيني نموت ليك هنا بالفقصة ولا نتاحر .. ياك جايبني بزز .. عالاقل وفر ليا جو مزيان اللي يخليني نتأقلم .. اهئ اهئ ولا ولادك الاخرين حسن مني 😢( دموع التماسيح ) .. 
عبد العزيز : (اثرات فيه ) واخا غانشوف كيندير .. فالليل نهدرو .. 
سندي : أ أ و دابا فين غاندوش .. 
عبد العزيز : بلا فشوش و قضي بهداك اللي عندك .. 
سندي : انا كون قدرت نقضي بحاجة من هادشي اللي هنا مكنتش نعيط لك .. ولكن مع الاسف .. (طبخت ليه راسو بالهدرة كندخل و نخرج و مرة مرة كنزيد فيه و نزيد ندمع ) 
عبد العزيز : (ضار عند عائشة ) سيري ديها للبيت ديالي دوش تماك و ترتاح و خبري الزوجة ديالي باش متلقاهاش تم و تصدم اولا تفيقها .. و قوليهم حتى واحد ميصدعها .. بينما نلقا انا شي حل من هنا لليل .. 
عائشة : واخا ا سيدي .. 
سندي : 😈😈 
.. مشا عبد العزيز الله و اعلم فين اصلا عامرا دنيا هنا بالغادي و الجاي .. داتني عائشة للغرفة د عبد العزيز .. عههه صراحة مابيهاش ولكن حسن من اللولة .. دخلت لدوش لقيتو كولو رخام و باينا الادوات اللي كيستخدمو فدوش دالنقرة .. حيتاش ثقال و بلديين (بحال سطل دالما و الطاسة .. ) .. قلت لعائشة تحط صاك و تمشي .. دخلت و دخلت معايا ليبرودوي ديالي (منعرف الا تسالاو واش نلقاهم هنا ولا لا ) .. مهم بديت كنكب عليا الماء و كنخمم فحالتي و هنا لاش وصلت بسبب ناس اللي بغيتهم و تقت فيهم .. ولكن مغنخليش هادشي ياثر عليا .. اصلا ماللي لحت الخاتم فوجه اسلام حسيت بالدم برد فقلبي .. و كاع الحب اللي كنت كنحس بيه من جيهتو تحول لكره .. و هدشي عطاني دافع قوي باش منستسلمش و نحارب على قبل راسي .. و شي حاجة سميتها اسلام و مريم و يحيى غانمحيهم من دماغي عمري نفكر فيهم اولا نجبدهم اولا نبكي عليهم .. حاجة وحدة اللي على قبلها غادي ناضل هي بنتي و انا فقققققط .. بقيت هكاك من حاجة لحاجة حتى ساليت دوش و ضورت عليا فوطة و خرجت لقيت شي واحد حط ليا الماكلة تم و زاد .. بدلت حوايجي لبست بيجامة بشورط قصير شويا (فوق ركبة ) و كلست تندوق .. صراحة ماكلتهم مابنيناش ولكن مابيهاش .. و إنما انا غادي نتفشش و نبدا بعيف و نطلب يطيبو ليا بوحدي .. كليت شويا حيتاش كان فيا جوع و خليت بلاطو تماك باقي فيه باش نبين ليهم باللي معجبنيش .. و انا نعس .. محسيت بتى حاجة حتى ضرباتني الفيقة و لقيت ظلام .. وايلي شحال غانكون نعست .. افف حتى تيليفون معنديش .. تهزيت من بلاصتي ولكن بقيت كالسة و بديت كنسمع الحس .. يعني باقي الحال غير ضلمة اللي طاحت .. بديت كنضرب الحساب فدماغي شحال غاتكون ساعة .. بيني و بين راسي (البارح فالليل كنا فالمطار .. ركبنا فالليل و وصنا قبل الفجر بشويا .. ممم و شدينا طريق من المطار لهنا بعد الفجر .. ممم و وصلنا هنا صباح بكري بكري .. مممم غنكون نعست مع ديك 11 او 10 .. و هادي دابا 6 او 7 ) .. 
جمعت النوضة و انا نمشي حليت لباب كنطل واش غاتبان ليا ديك صكعة اللي بلاني بيها عبد العزيز ولكن والو .. جمعت زعامة اللي عطاني الله و دخلت غسلت وجهي و درت كلاكيطة فرجلي و انا نخرج نتمشى شويا .. اصلا عندهوم تيساع هنا .. بقيت غادا و فينما داوني رجلي كنتمشا بلا منخرج على القصر حتى وصلت لواحد لبلاصة بحال سطاح يعني الفوق كيبان ليك كولشي منها .. شويا بانلي واحد الحيط ماقصير ما طويل قلت جاني لفضول نشوف الا طلعت معاه فين نوصل .. جيت بديت تنتعلق فيه جاني حرش و لكن واخا هكاك اللي فيا ما هناني باغا نكتاشف و خلاص .. شويا حتى قربت نطلع و هي تزلق ليا رجلي و تجرحت جرحة خايبا مستحملتش و بديت نبكي و طلقت .. استسلمت للدقة اللي غانجيب فالارض ولكن حسيت ب شي واحد شدني قبل منوصل الارض .. 

.. سندي : أ أ .. حيد طلق مني .. (كنحاول نبعدو و فنفس الوقت ماقادراش نوقف ) ايي ايي رجلي 😢😢.. 
بديت كنشوف قدامي بان ليا واحد اخر كاين ف سطاح و طلعات معايا الخلعة حيت بانو ليا كيتغامزو عليا و انا حتى رجلي مقدرتش نحركها نهرب (هما كانو كيتغامزو غير حيت مكيفهموش اش كاتقول و البهلة د سندي فهمتها غلط ) .. جا داك اللي شدها بغا يعاونها و هي دير صبااااعها فودنيها و طلقات واحد الغوتة و بدات كتغوت تتقلب اللي يفكها .. و مع اللي و سقيل و سطاح تسمع غواتها من ديك القرية تال اسطنبول ههههه .. اما دراري اللي كانو معاها تخلعو مساكن ماعرفو باش تبلاو .. كاع اللي فالقصر طلع (الخدامات و العيالات دالقصر و الاغا و خوه و رجالهم .. المهم كلشي كلشي .. ) .. اللي طلع تيبقا مصدوم .. اولا الخدامات ف دوك العزارا حيتاش تيدوخوهوم و حتى فديك تقزيبة اللي دايرا سندي .. ممولفينش دكشي .. طار عبد العزيز عند سندي .. 
عبد العزيز : شكاديري هنا ؟؟ 😡 
سندي : والو 😢😢 كنت كنتمشا و رجلي جابوني لهنا بغيت نشوف مور هاد الحيط اشفيه جيت نطلع كنت غانطيح و جا هدا (كتشير ) شندي و تجرحت فرجلي .. و من بعد بغا يتبسل عليا .. و غوت .. 
عبد العزيز : (ضار شاف فيه شوفة ناقصة و رجع شاف فسندي و شد فراسو ) اش خرجك من البيت بوحدك و فهاد الوقيتة ؟ ولا ياكما ناويا تهربي ؟؟
سندي : لا غير كنت كنشوف .. فين غانهرب و بهاد الحالة .. ايي رجلي .. 
عبد العزيز : اه كتنزف .. مهم هبطي نعقمو ليك الجرح .. باينا فيه سطحي .. 
... : babam bir şey anlamadım (بابا انا مفهمت والو ) 
عبد العزيز : süs 😡 (سكت ) 
.. انا غير سمعتو قال بابا عرفتو ولدو و خويا فنفس الوقت و انا بديت نقوليه تبسل عليها ويلي .. بقيت كارمة ف بلاصتي حتى عيط عبد العزيز ل عائشة باش تشد فيا هي وياه يهبطوني يدااويو ليا الجرح ديالي .. دزت من خدا ديك جوقة و كلشي كيشوف فيا و انا دافعا كبير و مطلعة مناخري ممعبراهمش و كنشوفهم كيتغامزو .. 
وصلنا لبيت د عبد العزيز و مشات وحدة من الخدامات جابت صندوقة دالاسعافات الاولية و تبعوها ثلاتة دالعيالات .. وحدة شارفا باينا موو جوجات تقريبا قد قد .. غير شافو عبد العزيز كينقي ليا جرح و بداو تيتغامزو و يوشوشو .. حتى سالا و دارت ليا طن فراسي .. 
سندي : منقدرش نوقف بيها افف (كنتفشش و نمثل ) كيغاندير نتمشا حتال البلاصة فين غانبات .. (كنتحرك باش نوض ) اي اي اي .. 😢 
عبد العزيز : صاف صاف غير خليك اليوم تباتي هنا .. 
سندي : حشومة و انت و مراتك (انا عارفاها شي وحدة من دوك تلاتة ) .. اصلا محال تبغي .. 
عبد العزيز : انا اللي كنعطي الاوامر هنا ماشي شيواحد اخر (شداتو نفس ) .. سيلين .. (كيعيط لمرتو ) .. 
.. هههه هادشي اللي بغيت باش نيت نشوف مالاميحها و هي كتلقى الخبر .. قالهت ليها غير بيناتهم و بانو ليا الالوان فوجها كيتبدلو ولكن دارت ضحكة صفرا و حدرات راسها .. 
عبد العزيز : سنديان بقاي هنا هاد الليلة .. و الا مقدرتيش تخرجي تعشاي غانقوليهم يوجدوه ليك و يجيبوه لهنا .. (ضار عند عائشة ) .. انتي بقاي هما باش الا حتاجات شي حاجة .. 
سندي : 😈😈 ..

.. خرج عبد العزيز هو و دوك الوليات اللي جاو اشوفو و انا نغمز ل عائشة .. 
سندي : حبيبة واخا تمشي تشوفي شكيقولو .. راني خفت نكون درت شي مشكل و بالي ماهانيش .. (كنتمسكن ) .. عافاك .. 
عائشة : سمحي ليا منقدرش .. الا عصلوني غايقتلوني بلا رحمة .. 
سندي : ماكاين اللي يقرب ليك .. راكي شفتي عبد العزيز كيف كيتعامل معايا .. يعني من اليوم نتي ف حمايتي .. غير ديري اللي كنقولك ميخصك خصاص و اصلا منخافش عليك .. 
.. مشات عائشة تبعاتهم تجيب ليا الخبار و انا بقيت كنتسنا و نخمم فهاد الحصلة اللي حصلت فيها مع هاد ناس و منين غانفكر راسي .. ولكن أولا ماخاصنيش نبين باللي ماحاملاهمش و باغا نتفك باش هكا ميحطوش عليا العين و يبقاو مراقبيني .. غانتصرف عادي بحال الا جالسة عندنا فالدار و غانشوف كيفاش نسلك راسي كيف زغبة من العجينة .. خاصني نبان ضريفة و نضرب غير من التحت بلا ميعيق بيا تاحد .. و عائشة هي اللي غاتعاوني بلا متحس باللي كاتعاوني .. اول حاجة خاصني نتعرف على كاع الناس اللي هنا و نبين ليهم البراءة و اهم واحد عبد العزيز .. و ضروري مالقا شي حل كيفاش ندير نهرب .. اففف حتى معنديش صحابات اللي نعول عليهم اجيو يفكوني ههه تفركت سارة اييييه اليام كون غير بقاو دوك اليام و نبقا مع سارة ف بريكولات كون لقيت اللي ينفعني دابا .. يخ حتى الناس اللي كنت دايراهم عائلتي و صحاباتي صدقو غدروني و رماوني بحال شي كلبة .. ولكن انا قادة براسي .. و ممحتاجاهمش .. بقيت كنخمم حتى سمعت دقان فالباب و انا نتنهد .. 
سندي : دخل .. 
دخلات عائشة و قبل متسد الباب دارت شافت يمين شمال ياكما جاي شي واحد عاد سدات .. 
سندي : هيهيهي شواقع مالك كتسكلي .. 
عائشة : ياك سيفطيني نشوف لك شواقع .. اوا هاني شفت و جيت نقوليك اش شفت و اش سمعت 😊 .. 
سندي : اه اه اوا اجي كلسي حدايا .. و عاوديلي بتفاصيل و متنسايش حرف 
عائشة : ههه واخا كوني هانيا .. ممم بلاتي نتفكر منين نبدا .. 
سندي : بداي من الاول .. ولكن قبل عرفيني على الناس اللي ساكنين هنا .. يعني من العائلة .. 
عائشة : اه هادوك ساهلين .. دغيا غانوريهم لك و تعقلي 
سندي : بلاتي بلاتي .. شكون دوك جوج دراري اللي كانو فسطاح .. 
عائشة : اه اي اي (شدات قلبها ) هادوك خوج و ولد عمك 😍😍😍 علي و فولكان .. 
سندي : مم شكون فيهم علي و شكون فيهم ديك سمية الاخرى معقلتش عليها .. 
عائشة : فولكااان فووووولكان هو ولد عمك اللي كان واقف بعيد و علي هو خوك اللي كان واقف حداك .. 
سندي : 😱😱😳😳 .. 
.. (بيني و بين راسي ) ويلي ويلي بقيت نقول لبابا كيتبسل عليا و سيد صدق خويا اهيا ناري شهااد شوهة .. الغلط ماشي ديالي .. انا ماعارفاش هو اللي قرب ليا 😑😑 ..

عائشة : مهم فالدار كاين عبد العزيز اللي هو الآغا و مرتو سيلين و عندهم جوج ولاد علي و رزان اللي هوما فالاصل خوتك .. و كاين خو الاغا يعني عمك سميتو اسماعيل و مرتو زهرة و ولدهم فولكان .. اضافة الى الرأس الكبير و مولات العقل و كبيرة العائلة لالة سلطانة الام ديالهم او بالاحرى الجدة ديالك (تتهدر و تعبر بيديها ضحكاتني ) .. ايوا و رجال ديالهم و الحرس د حدا الباب و الخدم اللي فالكوزينة و منهم شي بركاكات اولا نقولو مرافقات ديال لالة سيلين و لالة زهرة و لالة سلطانة .. 
سندي : ممم قولي ليا كل وحدة و طبع ديالها كيف داير. . يعني واش ضريفة ولا لا ؟؟ 
عائشة : ممممم راكي عارفاني انا عاد جيت القصر .. زعما قبل ميجي سي عبد العزيز يجيبك .. جابوني خصيصا ليك .. ولكن على العموم كلشي تعامل معايا مزيان كخادمة لا غير .. 
سندي : ااه فهمتك ههه (ضحكة صفراء ) .. 
عائشة : اوا هادشي اللي كاين .. مهم هاني مشيت نشوف الا وجد العشا نجيبو لك .. 
سندي : وا لا تسناي .. مزال مقلتيش ليا اهم حاجة. . 
عائشة : (غمزة ) شناهي ؟ (كتساءل بملامح وجها ) .. 
سندي : اش شفتي و اش سمعتي فاش خرجتي ..؟
عائشة : اااه ويلي ههه فكرتيني .. مهم انا غانعاود لك كلشي ولكن نتي متقاطعينيش .. (تقادات فالجلسة و انا درت ليها واخا براسي ) .. اوا يا لالة سنديان اش غانقولك .. خرج سي عبد الغزيز من هنا و سيفط كلشي لغرفة الاجتماعات العائلية .. انا خليتهم تا دخلو و دخلو ليهم اتاي عاد تسلت كنتصنت .. مهم كانو كلهم تماك .. بدا هو الاول ب علي عطاه واحد تصرفيقة تا تقلبو عينيه .. قاليه محشمتيش تبسل على ختك .. و كلما علي تيبغي يهدر لاخر مكيخليهش (انا شداتني ضحكة 😋 ) شرح ليهم الوضع و باللي نتي غاتبقاي هنا و حتى واحد ميقولك كلمة تقلقك .. و هدر ليهم على البيت نعاس و كلف رجالو يجيبو اللي يبدا فالاصلاحات .. اوا و كعقوبة لعلي قاليه باللي غايعطيك البيت ديالو حتى تقاد ديالك .. 
سندي ؛ 😍😍 هوباا
عائشة : وا بلاتي نكمل .. تدخلات سيلين باش دافع على ولدها و هو يسكتها و قاليها الا بقا فيك نخليو ل سندي بيتنا اناوياك .. مازادتش الهدرة و ضربات طم .. شويا و هي تنقز لالة سلطانة قالت ليه كاع شروطك قابلينها .. ولكن حتى انا باغا نزيد حاجة خرا .. راه البنت تتمشا عريانة .. حشومة هادشي معندناش فالاصل .. قاليها شويا بشويا حتى تولف و اصلا هي مكتخرجش يعني كتبقا غير فالقصر ماشافها حد .. و هي تنقز عليه بكثرت الهدرة و بدات تعمر ليه فراسو .. و قالت ليه علاش حنا مكيجيوش عندنا ناس .. والخدم اللي هنا ماشي رجال و .. و.. مهم قنعاتو و هو يقوليها غانحاول نهدر معاها فأقرب وقت .. مهم سالا معاهم الهدرة و هو يقوليهم تفضلو خرجو .. مشاو اخرجو و شد ف خوه اسماعيل قاليه انت بقا .. مهم انا فاش شفت هادوك خارجين مشيت تخبيت تا مشاو باش منتفضحش ... و فاش رجعت نسمع لقيتهوم بداااو الحوار .. 
سندي : افف اعلم الله اش زكلتي 🙄😏 
عائشة : وا غير صبري مالك زربانة .. راه عائشة هادي .. (تتعبر و تقلب فعويناتها تتقتلني بالضحك ) .. راني فهمت المضمون .. مهم عبد العزيز قال لاسماعيل باللي باغي يزوجك لولدو و يزربو بزواج .. 
سندي : 😳😳 اويلي .. 
عائشة : حيتاش ميقدروش يزوجوك لشي واحد براني و نتي فيك العيب (كتحل عينيها و تشير و دير يديها على وجها ) 
سندي : اشممن عيب ؟؟ 
عائشة : اوووووووف .. زعما ماشي بنت .. حنا هادشي عندنا عيب .. و الا عرفو برا القصر غاتنوض روينة و القربالة و يقدرو كاع يوصلو فيها القتيلة حيتاش ضاع شرفك .. 
سندي : اويلي شهادشي راني كنت مزوجة و ... (كتسد ليا فمي ) 
عائشة : شششششش سكتي متقوليها لتاواحد .. راكي غاتعرضي راسك للخطر و حتى لعائلتك .. مهم باك لقا للي يستر عليك .. و غاطويو هاد القضية فأقرب وقت .. سعداتك و العقبة ليا 😫 ب علي 😭😭 ..

سندي : فيا جوع شوفي الا غايتعشاو عيطي ليا نوض نتعشا .. 
عائشة : اه واخا .. 
.. خرجات عائشة و بقيت بوحدي .. و كاليا نولول و نفكر فهاد الحريرة اللي طحت فيها .. اش هاد زهر .. ماكانجي نخرج من مشكل حتى كنلقا راسي طحت فواحد كثر منو .. لا لا ماخاصنيش نبقا مربعة يدي ضروري نلقا شي حل قبل ميزوجوني و نصدق مربوطة هنا عمري كامل و نولي بحال هاد ناس اللي هنا .. نموت و نتاحر و منتزوجش .. افففففف شغاندير و منين غانبدا و منين غانسالي و اش الويل اللي خرج ليا من جنب .. افف افف راسي غايطرطق بقوت التفكير .. كنحس براسي عمرني نشوف النهار البيض الله اسمح ليا .. مكنهزش راسي من المشاكل واحد مورا لاخر اف اف .. الله يوقف معايا نفك هاد الحريرة اللي طحت فيها و خلاص اما راني وحلت هنااا .. 
دق دق (دقان فالباب ) .. 
سندي: نعام .. (دخلات عائشة ) .. 
عائشة : راه طبلة واجدة الا بغيتي نجيب لك عشاك لهنا .. 
سندي : لا عاونيني نوض نمشي .. 
عائشة : واخا .. 
سندي : عائشة بالليل غاتجي تباتي معايا بغيت نهدر معاك .. 
عائشة : لا مستحيل ميمكنش .. 
سندي : انا اللي قلتها لك .. محتاجاك حدايا و انا غانقولها لعبد العزيز .. 
عائشة : هيعيهيهيه واخا .. 
.. قبل مانخرجو هزيت لانجيت مسحت رجلي اللي كانت فيها الغبرة و الدم و سست حوايجي و قاديتهم و درت ريحة مشط شعري و درت خلخال فرجلي اللي كنعرج بيها باش غير نحركو يتسمع .. و عاوناتني عائشة حتى ساليت و لبست كلاكيط و خرجت كنعرج و شادة فيها .. بقينا غاديين تاوصلنا واحد طبلة طويلة عامرة ماكلة .. واخا ناس قلال .. زعما ماشي بقدر داك الكم الهائل دالماكلة .. مهم مشيت جلست فواحد الكرسي و قلت لعائشة تجلس حدايا والاكن مابغاتش .. بقيت جالسة بوحدي بيناتهم كي شي يتيمة و هوما بيناتهم كيتغامزو و بغاو ياكلوني بعينيهم .. 
عبد العزيز : سندي علاش مكاتاكليش .. 
سندي : (هادي هي الفرصة باش نتفشش ) انا ممولفاش هاد النوع د الماكلة .. دقت منو بالصباح و روع ليا خاطري .. 
عبد العزيز : يمكن لك تقولي اش بغيتي لعائشة و تبقا تصاوبو ليك .. 
لمهم بقينا فداك الجو صامت و كلشي كيعطي لتحت مناخرو .. حتى هز عبد العزيز الكاس و ضرب فيه بالمعلقة باش كلشي ينتابه ليه ..

.. كلشي حط فرشيطو و جلس بأدب كيسمع الا انا كالسا نلعب فطبسيلي .. و عارفا واخا نبغي نسمع ماغانفهم والو .. بدا عبد العزيز هدرتو و انا نسمهو قال فولكااااان و تبع ليه سندي .. و انا نتشوكا عرفت باللي الهدرة اللي قالت ليا عائشة بصح .. و حمد الله هي واقفة حدايا باش تسنط و ترجم ليا فاش نمشيو للبيت .. هزيت راسي و ضرت عندها غمزت ليها باش طلق ودنيها .. جيت نضور شفت قدامي و هو يبان ليا داك فولكان كالس قدامي حادر راسو كيسمع .. اي اي مكيهزوش راسهوم قدام باواتهوم و دكشي .. ههههه كيتنا المهم غير سالا عبد العزيز هدرتو و رجعو كاياكلو .. مليت و انا نوض و كلشي حل فيا عينيه مصدوم .. 
الجميع : 😳😳 
عبد العزيز : فين غادة ؟ 
سندي : ضراتني رجلي .. باغا نرتاح .. 
عبد العزيز : اه سيري ..
.. غير مشيت و فهمو باللي عبد العزيز خلاني نمشي وا كلشي بقا حال فمو مافهمو تا حاجة و حتى انا مافهمت والو من ردة الفعل ديالهم .. بقيت غادا و كنعكز ب عائشة اللي حتى هي مصدومة بحالهم ولكن انا متسوقتش بديت كنحرك رجلي باش يتسمع الخلخال و يشوفوه نفقصهم .. بقيت غادا على الوحدة و نص حتى وصلت لبيت و جلست فوق ناموسية .. 
سندي : مالك ؟؟ 
عائشة : 😳😳 درتي دكشي اللي عمر شيوواحد دارو .. 
سندي : شنو درت عاوتاني ؟ 
عائشة : نضتي من طبلة قبل مينوض الاغا 
سندي : لا زدتو فيه بهاد العادات دالخرا ديالكم .. لا بزاف واااه حتى طبلة و الماكلة فيها العادات .. 
عائشة : ااه فيها .. قبل الماكلة متيبداو تا تيقوليهم بصحة .. و فاش كيساليو مكينوض حتى واحد حتى كينوض هو .. 
سندي : انا هاد تخربيق مغانديرش فيه بالي .. اللي قاليا راسي اللي غاندير حيتاش هادشي بزاف .. المهم انا هدشي مكيهمنيش .. قولي ليا شنو كانو كيقولو .. 
عائشة : الا نتي مكيهمكش هما راه دابا يعلم الله شغايكونو تيقولو عليك و غايبداو يعمرو لعبد العزيز راسو حتى يبدل تعامل ديالو معاك خصوصا هو تيسمع من سلطانة ..

يتبع

التنقل بين الأجزاء

صفحة القصة
سيتم تشغيل صندوق التعليقات بعد لحظات
معظم التعليقات تم إخفاءها بواسطة الفيسبوك، نحاول بكل الوسائل المتاحة إستعادتها في أقرب وقت ممكن.