تنفس رياض الصعداء وقال : مهم تزوجو وصافي كفاش وعلاش ماعرفناش... يالاه لبيتك ترتاحي
جرها من يدها دخلها وهوا كيغمز فمروى وسد الباب موراه ...جر ذهب للفراش بلطف حتى دخلات فيه وغطاها وتكى حداها كيداعب شعرها وهي ساهيا ناعسة على جنبها وعيونها مليانة احزان ... محتاجة اللي يبقا معاها ويواسيها ... محتاجة يد دوز على راسها وتخفف عليها ... وهاهيا لقات رياض قريب منها ... هوا اللي عمرها طاقت شوفتو ولا حملاتو من صغرها ... لاكن دابا محتاجة لوجودو حداها واخا يبقا ساكت بلا مايقول حتى كلمة .. المهم ضل وخيال كيتحرك حداها ومونسها فعزلتها وهاز معاها همومها .
روسيا "موسكو"🌃 ليلا
وقفات سيارة فيراري السوداء نفسها اللي دخلات مع اسلام فالطائرة تحت قبو لناطحة سحاب جات وسط شارع كبير وبجانبها ناطحات السحاب اخرى كاملين كيبريو ودايرين بالزاج .. نزل من السيارة بعجرفة كالعادة وخلا موراه نينا كدفع فالباب حتى حلاتو ونزلات ببانطوفتها وبينوارها تابعاه وخلات الباب محلول حتى تسد راسو . دخل فأسانسور كبير ودخلات معاه بحذر ... مداهاش فيها وكأنها ماشي معاه . برك على زر من الازرار المضيءة وحدة فوق وحدة على رقم 86 وتحرك المصعد .. غوتات نينا غوتة وحدة ولسقات ليه فكتفو وهوا واقف غير كينفخ وقالب وجهو للجخة الاخرى مستحملها بزز منو ... توقف المصعد فالطابق 42 ودخلو جوج بنات بلباس فاخر شقروات الشعر .. قفو قدامو علطيينو بضهرو وهوا هاز راسو خاشي يديه فالجيب مكيتحركش ونينا لاسقة فيه ... شافوها بلباس النوم والقناع على وجها وبداو كيضحكو بيناتهم .. حول اسلام عينيه كينفخ مطايقش الوضع .. فتح صدفة القميجة اللي فصدرو كيتنفس حتى وقف المصعد وخرجو البنات كيتعوجو ويتلفتو عندو ويغمزوه ... ابتاسم فوجهم ابتسامة صفراء وهوا يتسد المصعد وزاد طلع لأخر طابق من بعد تفتح باب المصعد وخرج غادي مع الكولوارات الزجاجية كيدوز حدا بيبان السكان اللي فيها .. وقف قدام باب كبير اسود وطبع صبعو على لوحة زجاجية وتفتح الباب ودخل ، دخلات معاه نينا ومع الدخلة تشعلو اضواء صغيرة على الشقة كاملة . . . دخلات بخطوات بطيءة كدور فعينيها وفين ما شافت كتلقا الزاج داير بيها و الناطحات اللي حداها شاعلين الاضواء . خلاها واقفة ودخل لغرفة نوم حتى هيا داير بيها الزاج من كل الجوانب واتات خفيف عبارة على سرير مربع كبير فالباج وارضية خشبية سوداء اللون لامعة . . .
دخل كيفتح فالصدايف دالقميجة وحيدها رماها فسلة واتاجه للحمام الزجاجي الاسود وسد الباب
بقات كدور بحذر خايفة تقرب من الجدران الزجاجية .. داوها رجليها لمطبخ صغير محلول كامل فيه طاولة دائرية مستفة وداير كامل بالزاج حتى هوا ووقفات .. كتحاول تبقا الوسط قدر الإمكان بلا متقرب للزاج .. شافت تلاجة ومشات عندها حلاتها لقاتها خاوية ورجعات سداتها ... كلشي كيلمع .. كلشي مستف ونقي حتى ريحت المالكة مكادور تما ... خرجات كتمشى فالشقة الصغيرة الحجم مافيهاش البيوت . فيها صافون كبير فسيح عريض فيها صالونات مشكلة كامل بالزاج وغرفة نوم كبيرة ديال أسلام ومطبخ كذلك . جلسات مربعة يديها كاتشوف فجنابها شوية خرج عندها بالشورط قصير والصدر عريان مشعر وفخادو كبار كينشف شعرو بالفوطة ... هز عينو شاف فيها ووقف ودار ليها اشارة بيدو دخل لبيت النعاس تدوش . ناضت دخلات ومشا هوا جلس قدام الزاج على اريكة بيضاء شاد التيليفون فيدو كيهضر بالانجليزية كل مرة مع نمرة فشكل . اما لاللة نينا قلبات الحمام سفاه على علاه وكتغوت لداخل بوحدها وكتقز هاربة من الرشاشة عريانة ... طيحات جميع البرودويات د أسلام باش كيدوش والفوطات وضرباتها بواحد الزرقة فاعلة تاركة و فين ما تنوض كترج تزلق فالكريمات و الشامبو والمساحيق الرجالية المزلعة فالارض وريحت النعناع كتعطعط والرشاشة كتمشي من جيهة لجهة بقوة الماء اللي مطلوق مجهد ... شعرها فزك ووجها حتى هوا بغات تخرج من تما وماعرفاتش تحل الباب ومل شوية دق بيديها ورجليها وتم هاربة من قنت لقنت كتغوت .
قطع اسلام اخر مكالمة ليه اللي طول كيهضر فيها وهوا يسمع غواتها وناض بالزربة كيجري دخل لبيت النعاس بانت ليها الضبابة لداخل فالزاج ... فتح الباب لقا الماء كيطوش من كل جهة والضبااااابة ماعرف نينا منين خرجات ليها حتى لسقات فيدو ومهبطة وجهها مخبياه كتغوت وتبكي
داخ اسلام ... كيشوف فيها عريانة كامشي من جهة لجهة وتنقز وتزلق وتجرو معاها حتى كتجي جالسة وتعاود تنوض .. مع النوضة هزات فوطة فازكة من الارض لحتها على راسها مخبية وجها ..زادت كملات الباهية ومابقات كتشوف والو والصابون دخل فعينيها كدخل وتخرج فأسلام وتغوت ... نقز بواحد الرجل طفا الماء ورجع عندها خرجها من تما ... مغطية وجهها كامل بالفوطة وكلها كتقطر ونسات الاعضاء الاخرى خلاتهم باينين وضوح الشمس فنهار جميل .
كان ليها جسم جذاب ومثير وزادتو اثارة بحركاتها وكتكاكها مع يديها ورجليها كتمد البلايص اللي قاسها فيهم الماء سخون ... جر أسلام بينوتر بالزربة وهوا مخيخ من الوضع ومن الروينة اللي رجعات عندو .. غطاها بالبينوار كينفخ وينكر وهي كتهضر بوحدها واحد مكايفهم لاخر
سنح فيها وخرج يفتح لباب للشخص اللي كايصوني ... خرج فازك لقا امرأة طويلة وعامرة صمراء باينة فيها من إفريقيا .. شعرها بحال الولد ودفارها فالحمر طوال . . . عقد حجبانو كاعي وقال بالأنجليزية
المرأة : الحوايج اللي وصيتني عليهم جبتهم ليها ... و غدا غاتلتاحق بنا المساعدة اللي غاتكون معاها
أسلام: بقاي معاها نتي ... نتي كتفهمي هضرتها ماتجيبي حتى وحدة اخرى .
المرأة : اوك
تعامل أسلام مع المراة الصمراء باين كيعرفها وقريبة ليه .. مابيناتهمش رسميات وحتى المراة مطلوقة معاه فالهضرة وهادشي كيوضح انها سنين وهي معاه وكتعرف شنو اللي كيبغي وشنو اللي مكايبغيش . مشا كيسب النهار فين عرف فيه نينا اما المراة الصمراء مشات دخلات عندها لقاتها مكمشة فالبينوار معنقة رجليها وكدوز يديها على البقع الحمراء اللي طابت بالماء طايب . ابتاسمات السيدة وقربات منها .. بالاه بغات تحط يدها عليها وهي تغوت وخبات وجها وبدات كتغوت بأعلى صوت ، المراة رجعات للور مخلوعة ماعرفات مادير ... دخل أسلام ساخط للبيت وهوا يتحنا برجلو عندها وجرها من كتفها بقوة ووجها مدلي للجنب مخبياه بيدعا الثانية
اسلام : سمعي .. غتقطعي عبيا حسك منعاودش نسمع صوتك ... الى سمعتك غنقطع ليك اللسان كتسمعي ...طرجمي ليها هضرتي
المرأة: واخا واخا غير بلاتي عليها
أسلام: بغضب وكيجر فكتفها) طرجمي ليهاااا
المرأة: ااابه ماني ماطو لولو
قالت نينيا وهي كتشهق وميلة راسها على كتفها اللي شادها منو ومغطيا وجها
نينا : مي .مي هء ... مي مي
المرأة بشفقة : طلق من يدها ... راه يدها كدرها
اسلام : تحت السنان ) وا قولي ليها متحركش من بلاصتها ومنشوفش خيالها ... ولا غنقطع ليها لسانها
دفعها من يدها وناض خارج : علميها تهضر بحالنا ... وعطيها تاكل
قربات المرأة بشفقة من نينا بغات تحط يدها عليها وهي تهرب ليها للقنت وبدات كتكحز ودرق وجهها بيدها .
مشا اسلام جلس كيسوط فبلاصتو شاد التيليفون .. باين عليه مشطون مع شي حاجة وبالو مشغول وطالع ليه الدم ... واحد الشوية خرجات السيدة السمراء " اوليفرا " عند اسلام لقانو كيهضر وشارت ليه بيدها .. هز عينو فيها وقطع المكالمة وشاف فيها بتساؤل
اوليفرا : بغات الماسك ديالها ... كتسول على شي ماسك كانت دايراه فوجها
قلب أسلام عينيه للجهة الاخرى كيسوط بنفاد الصبر ورجع هبط راسو شاد جبهتو وقال
خرجات اوليفرا لقاتو باقي جالس فبلاصتو شاد التيليفون ..
اوليفيرا: وقع فويت فالحمام ... الماء مابغاش يتقطع وغيبات هاكاك كيشرشر .. حتى حاجة مكاينة فالدار تصلاح للماكلة ... شنو المعمول ؟
ناض : ضبري راسك . . . انا خارج دابا واحد الشوية ونرجع . عندي شي حاجة ضاروري هاصني نقضيها ومشاكل الدار وداكشي ماشي شغلي انا ... تكلفي واللي عجبك ديريه
دخل لبيت النعاس ومشا نيشان لفيترينة زجاجية جبد دجين وتيشورط في حين ناعسة نينا مخبية فليزار ابيض من بعد ما دوشات ليها اوليفرا ونشفات ليها شعرها وخلاتها ناعسة دايرة القناع على وجها وساكتة كتشوف فيه شكايدير وفين ما يدور جيهتها كتهبط راسها وتسد عينيها خوفا من شي غوتة يغوت عليها .. لبس حوايجو قدامها . حيد كلشي وبقا بالبوكسر كحل لبس فوقو كلشي وخرج زربان مادارش كاع جيهتها . دخلات اوليفرا جمعات حوايجو اللي حيد ومشات كتهضر بوحدها
اوليفرا : اففف ... شغاندير دابا .. ماعليا غير نعيط للشركة يسيفطو شي واحد يصلح داك الماء اللي طرطق ...
هزات تيليفون الشقة تاصلات بيهم وعطاتهم العنوان ونوع المشكل وخرجات من الشقة على نية تاخد بعض الاغراض حيت هي اللي مكلفة بكلشي وفاش كايكون أسلام فشقة مكيحملش معاه الزايد عكس الفيلا او القصر فين كاين الخدم كثير.
خرجات وخلات نينا ناعسة كتسنط لعضامها وماهي غير ربع ساعة حتى بدا الصونيط فالباب . . . سمعاتو نينا وناضت بدفيراتها اللي دايرت ليها اوليفرا والبيجامة الخفيفة القصيرة اللي لبساتها .. مشات حلات الباب من لداخل وشافت راجل طويل اسمر لابس لباس العمل عليه اسم الشركة ... بدا يهضر مافهمات منو والو وهوا يدخل بابتسامة مشا مباشرة للحمام يصلح المشكل في حين رجعات نينا لبلاصتها وتكمشات كما كانت مكمشة ... تصلح الماء وخرج الشخص بانت ليه فنينا اللي ناعسة معارفاه علاش جاي ولا شكون هوا ...قرب منها ببطىء حتى حسات بيه وهي تفتح عينيها مفزوعة لقاتو كيقرب ويستعمل القوة معاها .. تخلعات وبدات تغوت وغواتها كيكسر الدنيا وهوا كيشوف فيها بشهوة وكيبوس فكتافها وعنقها وهي كتركل وتبكي ... عطاها دقة وحدة للراس وهي تغيب على الوعي وفضا ليه الجو وبدا كيزرب باش يقضي غراضو بسرعة قبل ما يدخل شي واحد
رقبة تحت السيف الجزء 20
محتوى القصة
التنقل بين الأجزاء