(رجعات حياة لدار كتجر رجليها فدروج...كان باقي فيها الحال بزاااف حيت الحلم ديالها مكملش...طلعات وعلامات الحزن على وجها ...معاقتش براسها حتى حسات بكتفها غادي يطير من بلاصتو...
سمية:وصافي احياة ديري ليا خاطري ..راه ضروري يمشي معايا شي حد نخاف نسخف من تاثير البنج
حياة: اووف انا عارفة هاد العالم غادي يضيع بلا بيا ...صافي غدا دوزي عليا ولكين بشرط....
سمية:شنو هو ؟
حياة:لفطور على حسابك...
سمية:هههه واخا مشات...كنموت فيك انا(طارت عليها بتعنيقة)
(على اصوات عويشة لمضاربة مع هنية على حساب لحبل...فاقت حياة كتحك لمسعودة وكتسد ودنيها بلمخدة...حيدات عليها لغطا وحلات الشرجم ...شعرها واقف مكهرب...عينيها منفوخين ...جامعة هادوك لحويجبات وطلات عليهم:
حياة:سيرو الله يعطيكم لقوة..ملاقين على شنو تدابزو غير على لحبل على زين حوايجكم لي غادي تنشروهوم فيه...كراسنك اعويشة من عهد لفينيقين حفضناهم فلحي..ونتي اهنية ممصبنا ممخريا غير شادا الضد مع عباد الله تفزقي فلحوايج وتنشري وهادشي كلو باش حياة متنعس على خاطرها وتفيقوها على نقيركم....تفو على كنس كيداير..
عويشة:اشوفي فيا اهاديك لفيعة ...مجبدناااااك مطرنا عليك...ونزيدك شتي هاديك الضربة لي جاتني فراس والله لابقات فيك ابنت فاطمة..
حياة:حررربش تقربي لجيهتي اخانزة الرجلين...والله ميفكك من ايديا غير جنون ...
عويشة:اشهدو اعباد الله....شهدو كتهدنني هاد البايرة ....راه الى وقعات ليا شي حاجة غير فعايلها..
هنية:اشوفي احياة الدودة لي فيك سيري برديها مع الحيط..حنا منليقوش ليك اجابك تدخلي بيناتنا
حياة:ايوة الله ينعل الساعة لي شافتكم فيها عينيا..على اساس نتوما طفرتوه...وحدة مزوجة بسكايري كرشو خارجة كترمة....(كتقصد راجل هنية)..ولوخرا تزوج وطلق ....
حياة:(الدخان كيخرج من ودنيها وجها تزنق ولقردة فوق راسها كتلعب....خرجت فيهم عينيها...ودورت وجها فلبيت كتقلب على شي حاجة تشير عليهم بيها...مجات عينها غير على سلة ديال لخيوط جامعاهم جداها على حساب تواب كتخيطهم...بدات ترمي عليهم كرات لخيط وتنقر وتبربر عليهم حتى دخلات عليها سمية...دخلاتها من الشرجم وسداتو....
سمية:الله يعطينا وجهك على الصباح مدابزة معاهم!!!
حياة:خليني عليك ...غادي نتف ديلمهم هاد الصباح
سمية:ورساي الزبل...خلي عليك المرض...يلاه غسلي حالتك خلينا نمشو راه فات عليا الوقت
حياة:ولفطور؟؟
سمية:خرا واغازيدي مغنمشو حتى نفطرك
حياة:من هنا ديري حسابك...كرواصة وعصير لافوكا ورايب وبيضة مسلوقة هادشي لي موالفة باش كنفطر فدارنا....
سمية:غتقودي تغسلي كمارتك عليا...والى والله متشوفي ريحة نعمة..على اساس انا جايا من نرويج معرفاش باش كتفطري....نص محراشة مغسمة ديلمها فزيت لعود ..الى فطرتي فطرتي لخبز وسمن
سمية:(كتهضر فودن حياة)تهنيتي هانتي جبتي على راسك لبلى...
حياة:راكانت لحضة غضب...ملقيتش باش نضربهم من غير لخيوط ديال جدة.
جدا:(سمعتها كتوشوش لسمية عرفاتهم فعايلها)وانا جالسة كنقلب من نيتي...وباينة واضحة ماكين لي غادي يغبرهم من غيرك اجرادة...بغيتليك ابنتي سريسرة على الصباح شداك تشدي حاجة غيرك شنو ندير دابا باش غنخيط...
حياة:ولي سمعك اجدا يقول ايلي صعب عندنا...راه غير خويطات الى بقاو فيك نشروهوم..
جدا:شوف الكلبة جالسة طنز عليا...راه فصالتي هي باش رافعة راسي قدام نسا .الدوار..
حياة:اربي اجدا مسكتي...هادوك قفاطن بعدا يفصلهم شي حدا غير لوان لي كتختاري كيجيبو الرضان...باركا على النسا الدوار بلكدوب هاد لعقيق جاني من الإمارات..هاد السفيفة تصايبات فلهند...اربي خليني ساكتة حسن ..
جدا:خرجي خرجي غادي طيحيلي سكر خرجي بغيتلك سريسرة
حياة:يلاه دعيتي عليا بيها اجدة فيك زهايمر...
سمية:مسحيها فوجهي اجدة هاد المرة وكانت غير على كرات لخيوط عشية نديك أمي عند محل جدي خودي لي بغيتي على حسابي...
جدا:واخا ابنتي نتسناك عشية..
سمية:واخا..يلاه تلاحي نتي. قدامي(دفعاتها)
حياة:سبحان الله دغية تهدنت...شتي هاد جدة وحق الرب المعبود حتى حاطة العين على جدك راني عارفاها طير مع الطيور الله يحفض.
سمية:وزيدي خرجي...(جراتها من دراعها وخرجو يتسناو طوبيس...وصلو لعيادة شدو رونديفو ونزلو لقهوة لتحت يفطرو...شدات حياة لفطور على كانتها وسمية بقات غير كتبرقق بعينيها...خايفة لاتشاد معاها تصدق دايرة لها فضيحة....فطرو لبنات ورجعو طلعو للعيادة.وهنا حياة غادي تزعط فطوطوز لي غادي تشوف قدامها.😍😍)
(دخلو لبنات لغرفة الانتظار...كيتسناو نوبة سمية...حياة شادا تيلي بين ايديها طالعة هابطة مع القصص كتقراهم وسمية مسيكينة الخلعة غادي تقتلها....جات نوبة سمية جرات حياة ..ودخلو لعند طوطوز لي كيتسنى فيهم....مع دخلة تحلات ختنا...مخرجة عويناتها فطيطيز لي قدامها كان طويل وجسمو رياضي بامتياز سنيناتو بيضين ومستفين جايين مع الضحيكة لي عندو...لحية كانت خفيفة على خدودو ولكين كان وسيم بدون منازع....دخلات سمية وتكات على لكرسي لخلعة كتزعزعها
بينما المصيبة ديالنا بقات واقفة مسمرة كدير ليه سكانير من راسو لرجليه...حتى شافت سمية كتغمزها بعينيها..عاد باش تبتات IIIوبدات تحلوينها....
دك:حلي فمك مزيااااان...
سمية:هاااااا
دك:حلي مزيان.متخافيش....
سمية:هاااا عافاك بشوية متقصحنيش...
دك:مغاديش نقصحك غير حلي مزيااااان
سمية:متقصحش عافاك...
حياة؛(طارت على سمية بقرصة)تي حلي لراجل فمك..جالسة تبعكي...(هبطات لعند ودنها ونطقات)حمدي ربك غير طبيب سنان عرفتي كو كان طبيب طيييييط وكتبعكي عليه هكا قدامي.. كنت دخلت فمك هاداك الملقط لي بين ايديه حتى تغوتي بحر جهدك...توقضي الطحبة وباراكا من التقحبين ...
دك:مدام...مدام
حياة:(ضارت عندو بعدما ردات شعرها ورا ضهرها بشوية)مدموزيل ادكتور...
دك:ديزولي مدموزيل...واخا تخليني نشوف خدمتي
حياة:ههه وي بيانسيغ تفضل...(رجعات تكات على الحيط كتلعب بخصلة من شعرها وكتشوف فيه بحب...بينما طوطوز مركز مع فم سمية وخدام خدمتو...(بعد لحظات)
دك:على سلامتك...شتي شحال بسيط هادشي
سمية:يااااه محسيت بوالو...
دك:دابا حنكك غادي يتنفخ شوية من البنج ولكين غادي يرجع عادي ..
سمية:واخا شكرا بزااف
حياة:يلاه يلاه نوضي تهزي خليه يشوف ليا انا...
مساعدة:ختي خاصك حتى تشدي رونديفو...
حياة:(شافت فيها وجرات سمية وجلسات فلكرسي بلاصتها)
مساعدة:ولكين..
دك:(تبسم من تصرفاتها)صافي خليها ..نشوف شنو عندها
حياة:هانتا شوف فمي مكرفس بلمعقول تقول مزبالة ..انا ضروري نحل معاك ضوسي كل نهار تنقي ليا سنينة...
دك:واخا...حلي نشوف؟؟
حياة:(بدلع وتبعكيك)واخا ..ولكين شوف غير بشوية عليا...راه نخاف نتقصح
دك:ههه متخافيش مغاديش نقصح عليك
حياة:يحليلي على سنينات عندك...ا...قصدي مشاء الله عليك.ضحكتك زوينة..
دك:واخا تحلي فمك...
حياة:هااااااا
دك:حليه كتر...عاونينيني باش منقصحكش..
حياة:هاااااا
دك:زيدي حلي شوية...
حياةهاااااااا....
دك:مبان ليا والو عندك بلعكس سنانك نقيين
حياة:لا...شو...شوف مزيان...قلب لفوق راه عندي واحد سوسة بنت لحرام مكتبانش بحال زواق...طير هنا ولهيه
دك:الالة معندك والو سنانك نقيين...
حياة:لا ميمكنش...اربي لما شوف مزيان راه فيا سوسة لبيضة...
دك:(ربع ايديه وكيشوف فيها حابس الضحكة بزز)
سمية:(جراتها من دراعها...)نوضي احياة خلينا نمشو راه سنانك بيضين...(كتغمزها بعينيها)
دك:ممحتاجاش لعناية... خاصك غير تبقاي تغسليهم...
حياة:(ساهية فيه وكتحرك ملامح وجها بدلع)واخا..لي قلتي هو لكاين..
حياة:احححح على طيطيز...اححح على توووت ...قتلني يختي قتلني...
سمية:انا لي قتلتي ديلمي بهاد الحركات....
حياة:سدي سدي دلقوشك حسن ميدخل ليك البرد..
سمية:تفو على ماركة لقاني بيها سيدي ربي..(مشاو لبنات للحومة مناقرين..وصاحبتنا مرفوعة كتفكر فسي دكتور لي حطاتو فراسها وحالفة حتى طيحو...غير الله يحفض من هاد المصيبة)
فاطمة:على السلامة...مشيتو تركبو فم؟؟
حياة:اه ه خليني عليك اماما...متنكديش عليا اللحظة لي عايشاها...
فاطمة:(حاطة راسها على طبسيل كتنقي لوبيا)مرات خوك جايا اليوم...
حياة:(دوزات ايدها على عنقها)..هههه ويلي معرفتنيش انا حياة
دك:شكون حياة؟؟
حياة:حياة البنت لي جاتك اليوم مع العوجة سمية..
دك:(كيشوف فيها باستغراب)
حياة:هههه صافي خليك من هاد الشي انا نصاوب ليك عصير
دك:لا شكرا ختي انا نصايبو
حياة:(تي مال هاد الزبل لي هضرت معاه يقول ليا ختي)لا والله منمشي من هنا حتى ندير ليك عصير حق الجار على الجار هادشي باش وصى الرسول
دك:(بتردد)واخا سمحيلي غادي نعدبك معايا
حياة:لا بلعكس...(خرج دكتور ونفضات لالاكم حياة على ايديها شافت فلماكينة نضرة مكر وتبسمات باينة ناوية على خزيت...حطات حفنة من المكسرات فلماكينة وزادت عليهم لافوكا وبنانة وحليب ...وطحنات داكشي مزيان ودارتو ليه فكاس كبير..وخرجات لعند فؤاد لي كان كيهضر فتيلي فصالون)
فؤاد:(شاف فيها)ساليتي:؟
حياة:اه ..بالصحة إنشاء الله يعجبك..وشربو كلو راه المكسرات زوينين فهاد البرد
فؤاد:واخا شكرا عدبتك معايا
حياة:ههه مبيناتناش..يلاه نخليك دابا(خرجات المصيبة ديالنا من عند فؤاد كتتبسم بمكر ...حلات باب الدار ودخلات غادي تنفاجر بالضحك )ههههه باش تعلم مرة اخرى تقول لي ختي ...والله يابوك حتى تضل تحكو من الحيط ليل كلو...هههههه
فؤاد:(شرب هاداك الكاس لي كانت طعمتو زوينة ولكين نتيجة ديالو معاكسة...حل تلفازة وبدا يدور فلقنوات حتى حس بلحرارة فجسمو...لمعلم تنفخ وبغا يخرج من السروال...معرفش شنو واقع ليه كيحس برغبة فشكل....بقا ماشي جاي على طول الصالة كيحس بلمعلم غادي يطرطق...مشا لدوش وحل عليه الرشاشة وحط راسو تحت لماء البارد لي خلاه يبرد شوية من الحرارة لي كانت طالعة ليه.
«مع اشعة الصباح الاولى ناضت حياة كتجبد فوق فراشها...رمات عليها لغطا وناضت لدوش غسلات حالتها وخرجت تفطر وفبالها الف بلان وخطة خاصها ديرهم..لقات عائلتها المعروفة جالسين يفطرو جرات مخدة وجلست فوقها....وبدات تخشي فوجها:
مليكة:(مرات خوها)(حاطة فوق كرشها المنفوخة زلافة فيها لببوش وجالسة تبنن مع كل ببوشة كتاكلها )
حياة:(شافت فيها)اربي اميلكة ملقيتي على شنو توحمي غير على لببوش كتبني فيه بحال الى كتاكلي لحلوة اوجه زفت..
مليكة:ولد خوك لي بغاه احياة ماشي انا...
حياة:باين وجهو كيغيخرج ...لواحد يتوحم على توت على لفريز على لحلوة...لببوش ابنت الهم لببوش..
مليكة:خالتي قولها تسكت...
فاطمة:اسكتي اهاديك الجحشة فيك غير لسان..
حياة:يخ على دار كيدايرة حرية الاراء معندكومش فلقاموس ياربي تحفض....
فاطمة:ايوة فطري فطري ونوضي لكوزينة راه تابعك لغدا...
حياة؛(دورات وجها يمين شمال)اجي فين الحاجة؟؟
فاطمة:مشات لعند الحاج صالح يبدل ليها شي خيوط
مليكة:وتشوفي لمسمن لي دات ليه مخلاتني حتى نضوقو
حياة؛هي هي هي على لفريفرة ...وهي لي عطاتها لحقيقة.
حياة؛بااااي....(طلعات حياة لعند فؤاد بعدما تغدات وجمعات الدار...طلعات لعندو ..ووراها الدار وشنو خاصها دير ..خرج لخدمة وخلاها مضاربة مع تمارا...مسحات ايديها بعدما غسلات لماعن وسيقات...دخلات لبيتو وبدات دوز ايديها على لفراش وتشمشم من هنا ولهيه...حلات لماريو ديال لحوايج وبدات تمنضر فحوايجو ...جرات مجر لتحتاني كانو فيه ملابسو الداخلية...بدات تحل فكراسنو وتشوف ديكوراتهم والوانهم حتى طاحت عينيها على بوكسر غوز وفيه حرورات حمر مرسومين فيه..)
حياة:ييع على ديكور... طحتي من عيني اسي دكتور...ملقيتي من لكراسن من غير هادا...ومرسوم فيه لحرور من لفوق ..شنو باغي تقول من هاد الكرسون شنو الميساج لي باغي توصل(كدور البوكسر بين ايديها حتى حسات بشي حد وراها غمضات عينيها وغرقت فحوايجها موقف متبغيه لعدوك.)
كيف تصطادين عريسا الجزء الثاني
محتوى القصة
التنقل بين الأجزاء