كيف تصطادين عريسا الجزء الثالث

حياة:(رمات لبوكسر بزربة من بين ايديها ودارت عندو كتبسم كأن شئ لم يكن..)ههه دك فؤاد جيتي؟؟

فؤاد:شنو كنتي كديري ؟؟

حياة:والو..كنت كنشوف لحوايج لمسخين باش نصبنهم

فؤاد:صافي تقدري تمشي...

حياة:ولكين مزال مكملت...

فؤاد:صافي ماشي مشكيل...جايين عندي شي ناس دابا تقدري تمشي..

حياة:ياك مبغيتي نوجد ليك شي حاجة.

فؤاد:لا شكرا...

حياة:واخا بسلامة...(خرجات حياة من عند فؤاد متوجهة لدارهم مع دروج تلاقات مع اكرام محنية رجليها وكلها كتسرسر بالدهب..كتمدغ لمسكة يمين وشمال فحلقها وطالعة كتبوطا ...

إكرام:حياة نتي هنا...توحشتكم

حياة:اممم يتوحشك الخير

اكرام:انا غير جيت نسلم على الواليدة وعلى الجيران حيت عصاااام راجلي غادي يديني لشهر العسل

حياة:امم على اساس مديك لشرم الشيخ اولا لمالديف راه حدكم ولاد حريز الى طرتو طرتو «نزالة لعضم»

اكرام:(حسات بنار خارجة من ودنيها)ايوة انا بعدا لقيت لي يخرجني ..كيت شي ناس 30 سنة وهوما فنفس لبلاصة

حياة:اكرام ..خليني مهدنة حسن ليك راك دايزة على ايديا والله متغبري من خليقتي...والله منخلي فيك غير لي نسيت..بدل ساعة بخرا يلاه...

اكرام:(دفعاتها وطلعت )

حياة:ايييخ على بشر كيداير لي تزوجات تنفخ الريش....(دخلات للدار مهلوكة ...مشات لبيتها نيشان وطاحة على فراشها دودة....على صوت مها لي جالسة كتنقر فاقت حياة صيفتها مقلوبة...حلات باب بيتها وخرجات لصالة عندهم لي كانت لقيامة نايضة فيها..)

حياة:اتوما مالكم شواقع:؟

فاطمة:اجي تسمعي اجي...على اخر ايامي نخرج مي عروس من داري

الحاجة:الالة متخرجيني منخرجك...انا نمشي بوحدي نزوج راسي براسي

حياة:اشواقع هنا شي حد يفهمني؟؟

مليكة:الحاجة بغات تزوج من صالح الخياط

حياة:الله ياربي الله كنت حاسة ...عرفتك غادي ديريها اجدة

الحاجة:لحلال مافيه عيب السيد عاجبني وعاجبتو...بغاني وبغيتو..صافي سالينا

حياة:زعمة ماشاء الله وصافي...معرفت منقول ملي جدة...جلدة لاصقة على لعضم تزوج وأنا لا ...

الحاجة:لي بغيتو ديرو ديروه انا صالح كنبغيه وغادي نتزوج بيه..والى منعتو زواجنا نقتل راسي اولا نهرب انا وياه

حياة:والحاجة ..واروتانا كلاسيك....ياك متاترتي بالأفلام..اشهاد الهضرة لي جالسة تقولي...ملي بغاك وبغيتيه معلينا منديرو من غير الصلاة على النبي

سي محمد:لي قالت حياة صحيح..غادي نعيط لعدول وضربو العقد 

الحاجة:هادا كلام....انا نمشي نصوني على صالح.

لعدول:الحاجة زبيدة خيلالي...واش كتقبلي بسيد صالح منصور زوجا لك على سنة الله ورسوله...بدون إجبار من احد.

الحاجة:قابلة

لعدول:الحاج صالح منصور هل تقبل بالحاجة زبيدة خيلالي زوجة لك على سنة الله ورسوله بدون اجبار من احد..

صالح:قابل

العدول:.وقعو هنا

حياة:اييه اسمية قلت ليك جدة طلعت مسهلاش فضرف اسبوع صيدات جدك..كيتي انا يختي 29 سنة ومزال حالسة فبلاصتي

سمية؛يختي معرفت كيدارة ليه جدي كان رافض فكرة زواج من بعدا مامات حنا..

حياة:تي هادي راه الحاجة زبيدة ومن لايعرفها طير طاير ميفلتش من بين ايديها...الله اربي الله الشارفة تزوج والعزبة تكوز....

سمية:لينا الله اختي غاصبري دابا يجي...

حياة:تجيه فراس إنشاء الله

سمية:اجي ...شنو درتي مع فؤاد؟؟

حياة:مزال الوضع كما هو...البارح طيبت لحريرة وديت ليه حقو منها...وكل نهار كنطيب ليه شي شهيوة ونديليه معايا..والدار مكنخرج حتى كنخليها تلمع علاه هاد التكرفيس وتمارا لي ضاربة على كراسن بوه تطلع بشي نتيجة

سمية:متخافيش عندي احساس قوي بلي غادي يطلبك لزواج ونتفكو منك

حياة؛(هزات ايديها لسما)من فمك لسيدي ربي...يلاه نوضي عاونيني فلعشا دابا يهجمو علينا حيوانات العمارة. ...(جمعات راسها بزيف وبدات طيب لعشا هي وسمية للجيران ديال العمارة لي جايين غير على قبل كرشهم...بدات الدار تعمر وحياة باركة فلكوزينة....سالات هاديك اليلة المتعبة ودخلات تنعس ...بينما الحاجة حطات ايديها فيد الحاج ومشاو لاوتيل لعربي المسخ لي فراس الدريبة.)

(فاقت حياة على اشعة الشمس لي بدات تدخل عليها..رمات لغطا ورتبات نفسها وخرجت لعند مها ومليكة لي كانو جالسين فالصالة..

فاطمة:(مزيرة راسها بزيف ولاوية عليه الحامض)الله اربي آلله زوجت مي وخليت بنتي..

حياة:صبحنا على الله ..راه مكاتيب امي المكاتيب. 

مليكة:(فمها عامر بلحلوة وكتهضر)اه اخاااالتي كلشي بلمكاااتيب...

حياة:يلاه انا مشيت تعطلت على الدكتور(مشات لكوزينة وجرات سطل وقفات فوقو وجرات واحد طبيسيل كانت مخبياه فيه طرف ديال اللحم وطرف ديال الدجاج وتفاحة ليمونة وشوية ديال الحلوة..لاوات على الطبسيل السولوفان وغطاتو بزيف وخرجات لعند الدكتور...حلات الباب حيت عندها الساروت وحطات داكشي فلكوزينة وبدات خدمتها تنقي وتمسح...دخلات لبيت فؤاد وبدات ترتب حوايجو ...حتى طاحت عينيها على سترينغ حمر جراتو عندها وبدات ضورو بين ايديها...خرجات تجري من بيتو ومشات تقلب على تيلي ...خلات فيديو وانساب مع سمية وبدات تهضر:

سمية:شنو بغيتي اطحبة...(مدوخها النعاس)

حياة:سمية لقيت واحد الحاجة فبيت فؤاد؟؟

سمية:شنو لقيتي؟؟ياك ميكونو فلوس؟؟اجي ياك ميكون خدام مع لمافيا...لقيتي سلاح ياك؟؟

حياة:يعطيك موصيبة توقضي معايا....(هزات سترينغ لعند الكاميرا)هالي لقيت يختي خايفة يكون فؤاد ثام••

سمية:وباش قلتيها؟؟

حياة:لمرة لي فاتت لقيت عندو بوكسر غوز وفيها حرورات..ودابا هادا ..يعني السيد ثام••ويلي محايني باينة غادي نعدي معاه غير بالشمعة

سمية:امم يختي هادشي فيه إن..خاصنا نعرفو شنو كاين..اجي ياك مبغيتي نجربوه؟؟

حياة:بشنو غادي نجربو؟؟

سمية:مكاين محسن من عصير لافوكا غادي تهيجو...

حياة:جربتها اسمية ...ولكين عادي موقع والو لوكان تعدب كان خلا دار عيشتي...

سمية:امم معرفتش غادي ندوز عليك هاد ليلة ونعرفو هاد سترينغ من فين جا.

حياة:واخا يلاه باي يمكن جا...غادي نقطع..(مشا تجري ردات سترينغ لبلاصتو وخرجات لعندو )

فؤاد:حياة صافا(كيتبسم)

حياة:(يحليلي على ضحيكة استحالة تكون من سلالة ادومة ..ركزات عينيها على لمعلم...لا لا استحالة يكون من هاداك النوع تبارك الله عندو الخير مدفق من السروال..)صافا الحمد لله

فؤاد:الى ساليتي احياة تقدري تمشي عندي شي ضيوف

حياة:(استغربات من الضيوفو لي كل نهار جايين عندو)اه ساليت بسلامة

فؤاد:بسلامة.

حياة؛(ماشية جاية على طول البيت كتاكل ضفارها...)

سمية:(دخلات عليها لبيت)

حياة:على السلامة..

سمية؛شنو؟؟

حياة:سمية هاد السيد مخبي شي حاجة ماشي تلهيه...كل مرة خارجلي كرسون فشكل وزيد عليه الضياف لي كل نهار عندو...مبقيت فاهمة والو

سمية:امم...شوفي خاصنا نبقاو حاضيين شكون كيجي لعندو

حياة:راه دابا جايين عندو شي ضياف..

سمية:ايوة مزيان يلاه نوقفو فالدروج ولي طلع نسولوه عند من غادي

حياة:ياك ماشي عيب...

سمية:تي زيدي قدامي قالك عيب...

حياة:(نزلو لدروج لعمارة وبقاو جالسين لي جا يسولوه عند من جاي بحجة انو السرسار ديال دار فؤاد خاسر ومكلفهم يعلمو الشخص لي جاي عندو)

سمية:(وقفات دري صغير طالع)فين غادي البعلوك؟؟

الدري:سوق مك...

حياة:ويلي على قليل ترابي...

الدري:ايوة قو••نتي وهيا ..بوليس الزنقة الله يحفض

سمية:اييخ على تربية كيدايرة

حياة:خلينا منو...(دخلات بنت اية فلجمال شعر مطلوق ولبس مأنتك...شعر مطلوق والحالة كتهبل..بقاو حالين فيها فمهم..حتى عاقت سمية وهي تنطق)

سمية:ختي عندمن جاية

البنت:علاش كتسولي؟؟

سمية:حنا كلفنا سي فؤاد نطلعو الضيوف ديالو لدارو حيت السرسار ديالو خاسر

البنت:العجب گاع مقالها ليا

حياة:يعني نتي غادية عندو؟؟

البنت:اه..دايما كنجي عندو عمرني شتكم!!

سمية:طلعي طلعي اختي..

حياة:(النار خارجة من ودنيها..الحرارة طالعة مع ذاتها كلها)والله لادوزتها ليه...دابا تشوفي شنو غادي ندير فبو راس...ايديا ركمو بشقى...ولحلوة كل نهار كنصيبها ليه...وفلاخر يختار هاد موكة ...دابا يشوف شغل ايديا ولد العبد...والله لارتاح فيها جلسة.

حياة:زيدي تبعيني!!

سمية:شنو غادي ديري؟؟

حياة:سمعيني مزيان ..غادي طلبي البوليس يجيو لدار فؤاد قولي ليهم دار دعارة

سمية:اويلي تسطيتي..

حياة:غادي ديري هادشي اولا لا؟؟

سمية:ّّّّ.....صافي غادي نديرو

حياة:يلاه سيري..انا دابا نجي

سمية:فين غادية؟؟

حياة:دابا تعرفي..غير سيري ديري شي لي قلت ليك(خرجات حياة من العمارة في اتجاه دار هنية)

هنية:كيطرا وجرا حتى جيتي لهنا...

حياة:جيت نطلب السماح اهنية الموت متشاور

هنية:(مستغربة من هضرتها)

حياة:عارفة راسي غلطت معاك شحال ...وجيت نطلب السماح ونرجعو كيما كنا ...

هنية:معرفتش علاش بالي ممرتاحش ليك؟؟

حياة:واخا اهنية من حقك..ولكين باش نأكد ليك هضرتي انا غادي نعاود ليك واحد لخبيرة مفراس حد ولكين تبقى بيناتنا ..

هنية:(قربات ودنها منها)عاودي عاودي نسمع

حياة:الدكتور فؤاد لي سكن فوقنا...

هنية:مالو؟؟

حياة:يختي طلع ثام••قبيلا جات عندو واحد خيتي وسمعناها كتغوت كتقول ليه معندكش باش تقيم فار بقا غير تقيمني انا....

هنية:اويلي شوهة...

حياة:وايااااه يختي...سمعتهم يختي كيقولو بلي هو اصلا من المتحوليين جنسيا...

هنية:مفهمتش هادي شرحي ليا...

حياة:يعني قطعو ليه لمعلم...وداااارو ليه تقيبة بلاصتو

هنية:ويلي ويلي ويلي ...طلع ولية بحالنا بحالو..ولي يشوف زغوبات خارجين من صدرو ورجليه يقول هنا نبات وهو معدي غير بتقبة.

حياة:ايوة خلينا نقولو الله يستر وصافي...يلاه انا مشيت وعنداك اهنية هادشي يضل بيناتنا...بيناتنا اهنية.

هنية:اويلي سرك فبير مسدود بسبع بيباااان

حياة:يلاه بسلامة.(رجعت تجري لعمارة ضحكة واصلة لودنيها)

حياة:(سدات لباب وشافت فسمية لي كتقففق غادي طلقها فسروالها)

سمية:فين كنتي؟؟

حياة:هههه مشيت لعند هنية...دابا غادي يتشهر سي الدكتور فلمدينة كلها

سمية:ويلي ياطحبة دابا تشوهو

حياة:وراه داكشي لي بغيت...اجي صونيتي على لبوليس

سمية:اه صونيت ليهم

حياة:ومالهم تعطلو...!!!

سمية:سكتي سكتي...هادا الصوت ديالهم يمكن جاو

حياة:يلاه نتفرجو(حلو الباب وخرجو كيتفرجو)

فؤاد:(لابس بوكسر وصدرو عريان...جارينو فالدروج ووراه سليعفانة ملوية فإزار ولكحلة سايحة ليها على وجها وحالتها كلها مجلخة...)

فؤاد:وراه مراتي مراتي اشاف....طلقوني شنو كديرو

حياة:ويلي دكتور فؤاد شهاد لفضيحة لي واقعة ليك...مكانش فراسنا بلي مزوج

البنت:هئ هئ هئ وطلقوني راه راجلي هادا اعباد الله... 

بوليس:زيد لكوميسارية تما غادي نتفاهمو

سمية:صدمتينا فيك اسي دكتور..

حياة:(نزلو مع دروج تابعينهم...دورات حياة عينيها فأمة لااله الا الله لي كانت واقفة كتفرج وهنية واقفة على راسهم...وبدا الصداع ولغوات:

«وفؤاد الثااااامل...عندو تقبة العااااامل....»

«وازغب هااااهو...ولمعلم فينااااهو»

سمية:ويلي ويلي شوهاتو هنية

حياة؛هههه عبرو عليه ..احححح بدرت قلبي مزيااااان الله على راحة

سمية:زيدي زيدي خلينا ندخلو.

حياة:يلاه(دخلو لبنات لدار ..وتوجهو لبيت حياة..ترمات ختنا على فراشها وسمية جالسة حداها...بلا سابق إنظار خلات دموعها مهودين على خدها وبدات تبكي وتخنن)

سمية:بسم الله عليك...اويلي مالك؟؟

حياة:هئ هئ هئ كنبكي على زهري لمكوز...مالي أختي معندي زهر...هئ هئ لي حطيت عليه لعين يطير هئ هئ هئ 

سمية:واصافي احياة راه كلشي بلمكتاب متعرفي ...مكتابك فين موضر...

حياة:هئ هئ هئ بزاااف عليا اسمية صحاباتي كلهم تزوجو ولادهم ولاو قدي فالطول....وانا مزال باركة فبلاصتي

سمية:صافي متبكيش علاش انا حسن منك..حتى انا مكوزة لمي فالدار وتقول واش سعدي بغا يبان...

حياة:هئ هئ حنا زوينات ياك اسمية!!

سمية:اويلي على زوينات...حنا راه فتنا الزين فمراااااحل...اشمنك ياشعر اشمنك ياعوينات اشمنك ي...

حياة:صافي صافي سكتي...

سمية:اجي ..يلاه تفكرت واحد الحاجة بنات المغرب كلهم جربوها...

حياة:شنو هي؟؟

سمية:عندك مسكة فلاش..

حياة:شنو هادي تاني::؟؟

سمية:صبري عليا نجيبها من صاكي ونجي.

حياة:اشغاديري ازبل...

سمية:فين طراساج ديالك لموف...داك لي شريتي من سويقة بجوج دراهم

حياة:راه فلبوشيطة...ولاش هادشي..

سمية:سمعي الالة قاليك لي مشا ليها صاحبها كتكتب سميتو وسميت مو بطراساج فلمسكة وتبدا تمدغ تمدغ تمدغ ...متفوتش 4 سوايع يصوني ليها

حياة:ايوة حنا شدخل حمارنا فاسبوع الفرس...ايمتا اختي تصاحبنا؟؟

سمية:وفتحي عقلك معايا الخرا...دابا غادي نبداو نكتبو اسماء هادوك لي كانو بغاوك لزواج وتراجعو ونشوفو شنو غادي يوقع...شخاسرين حنا.

حياة:ايوة.يلاه بداي...كتبي...اممم محمد ولد فاطنة...عمر ولد عيشة.....صادق ولد ...معرفتش شنو سيمت مو...

سمية:نكتبو ولد حواء...

حياة:يعطيها لوى ولفعة مضلعة...مكدخلش الخاطر يخخ

سمية:زيدي كملي...

حياة:اممم ...اه نسيت سيمو سيكليسي ...سيمو ولد ربيعة...

سمية:صافي...

حياة:لا اويلي مزال..مزال جويلق الخياط...ومزال عوينة مول لكمانجة..و

سمية:واصافي فين غادية..

حياة:صافي باراكا علاه يصدق واحد من هادو

سمية:يلاه بداي مدغي هادي..

حياة:باش بديتي؟

سمية:بجويلق لخياط...

حياة:لا بداي بمحمد ولد فاطنة

سمية:واخا هاكي مدغي مزيان ..

حياة:(بدات حياة تمدغ فكل مسكة بوحدها...سنانها ضروها وحناكها تنفخو عليها...سمية شادا تيلي بين ايديها وكتسنا شي حد يصوني ...حتى عيات حياة ورمات لمسكة من فمها...)

سمية:وعلاش لحتيها ازمر

حياة:والله لانفع معايا شي حاجة بلما تعيي راسك ..

فاطمة:نتوما هنا

سمية:مرحبا اخالتي...

فاطمة:لبنات يلاه جات مروى كتعرض عليكم على عرس ختها ابتسام

حياة:ياربي صبرك شي نهار غادي يسكت ليا القلب..

فاطمة:نوضو تقادو وسيرو دردكو شوية وحطو عينيكم على شي حد متبقاوش حالين فمكم بلا فادية...

حياة:واصافي امي..صافي بلما تبداي

فاطمة:يلاه طلقو راسكم العرس راه فقاعة صابرين...

سمية:واخا اخالتي..دابا نتقادو ونمشو...

فاطمة:منوصيكمش خلو عينيكم على شي عريس..شي عريس احياة

حياة:واخا امي واخا...

سمية:يلاه انا نمشي نتقاد نتلاقاو التحت

حياة:واخا.

حياة:(لبسات قفطان فلبيض مطرز...وصايبات شعرها..وحطات لمسات خفيفة من المكياج جايا مع قفطانها..هزات بوشيط ديالها رماات فيها تيلي ونزلات لعند سمية لي جالسة كتسناها ...)

سمية:على سلامة الأميرة سلمى ومدارتها فعرسها

حياة:تعطلت مع لايلاينر مبغاش يتصايب...

سمية:زيدي طوبيس غااادي يمشي علينا

حياة:(هزات قفطانها بين ايديها ومشاو بزربة لعند طوبيس...شدو بلايصهم وتوجهو لعند القاعة...نزلو من طوبيس وضربو مشية على رجليهم عاد وصلو للقاعة..شدو بلايصهم بعدما سلمو على لعروسة ومها...

سمية:اييه ياختي الفول يعطيه سيدي ربي غير لي معندو ضروس

حياة:ويااه شتي يختي دابا هاد لعريس طولة وتجريدة شنو شاف فهاد خيتي

سمية:والله معرفت ...ايه يا ربي عطينا زهر لخيبات

حياة:امين ياربي..نوضي نوضي نضبرو على راسنا راه مجيناش نجلسو

سمية:عندك الحق يلاه...(وقفو وسط المنصة وبداو يدردكو ويبردو غدايدهم حتى عياو...ورجعو لبلايصهم..)ايي ارجلي شحال مشطحت هكا

حياة:فيا الجوع اسمية...ايمتا غادي يحطو لعشا..

سمية:هاهو جاي...ياربي يكونو دايرين الدجاج..

حياة:كولي بشوية ومتفضحيناش راه الميدة عامرة

سمية:وغير يحطوه بعدا..

حياة:(سمعت لمرأة لي حداها كتهضر مع صاحبتها على قبل ولدها بغات تزوجو...تحلو عينيها مزيان گادت القعدة..وبدات تاكل بشوية...شافت فلمرى ونطقت:

حياة:كلي اخالتي..

لمرأة:ربي يخليك ابنتي كناكل

حياة:مرحبا بيك...

لمرأة:نتي من اهل العريس اولا لعروسة

حياة:انا صاحبة العروسة اخالتي

لمراة:تبارك الله ..زوينة ماشاء الله(دارت عند صاحبتها)يمكن لقيت لبنت لي تليق لمعتز ولدي..

المراة 2:إنشاء الله يوافق عليها كتبان مخلقة ودرويشة...

المراة:خاص ولدي غير ينقص شوية من التدين لي فيه

حياة:(كلشي دار تحت مسامع حياة)خالتي...

المراة؛شنو ابنتي؟؟؟

حياة:مكتعرفيش القبلة فلقاعة فين..تجمع ليا لمغرب ولعشا

المراة:والله ابنتي معرفت...

حياة:ماشي مشكل اخالتي..نمشي نسول ام لعروسة...الصلاة واجب مخاصش الواحد يتلهى عليها ..

خالتي:(كتشوف فيها باعجاب واخيرا لقات لي تناسب ولدها.)

حياة:(دخلات لطواليط..وبقات واقفة شحال على اساس انها كانت كتصلي...خرجات من طواليط وهزات ايديها لسما)ياربي سمحلي يا ربي سمحلي...(رجعات لطبلة وجلسات حدا لمراة)

المرأة:الله يتقبل ابنتي 

حياة:امين اخالتي...

المرأة:احم بنتي معرفتش شنو سميتك!!

حياة:ههه حياة سميتي حياة

المرأة:متشرفين ابنتي...

حياة:الشرف لي اخالتي...

المرأة:ايوة شوفي ابنتي نجيك نيشان..دخلتي ليا خاطري وباينة فيك بنت الناس ومربية...انا ابنتي حياة عندي ولدي سميتو معتز..شحال وهو كيقلب على بنت الناس لي تصونو وتكون السند ديالو...

حياة:(قلبها كيضرب كتسناها تنطق بكلمة زواج)

المرأة:ايوة ابنتي الى بغيتي يلاه معايا نعرفك على ولدي معتز راه معا الرجال فلقاعة لوخرا متعرفي تكوني من نصيبو ..

حياة:(ناضت من بلاصتها بلما تحس)يلاه اخالتي...

المرأة:(كتشوف فيها مستغربة)

حياة:هههه راه غير غادي نمشو لدار حيت تعطلنا...قلت نتعرف على ولدك سي معتز ربي يخليه ليك ويطول ليك فعمرو

المرأة:اييه ابنتي مقلتي عيب..

حياة:سمية تسنايني هنا دابا نجي

سمية:(كتهضر فودنها)الله يحرق طواسلك ضبرتي على راسك وأنا لا

حياة:يحرق شطايطك علاه انا جيت نخشي فوجهي راه جايبني غير لعريس...علاه يصدق هادا...طلبي معايا اسمية 

المرأة:نمشو ابنتي

حياة:يلاه اخالتي.

حياة:(حطات ايدها فيد لمراة ومشاو لقاعة لوخرا لي فيها الرجال...عيطات لمراة على واحد الدري يعيط على معتز...ختكم حادرة راسها وعينيها فلارض ...حسات بيه وقف معاهم ومقدراتش طلع عويناتها فيه..)

المراة:ولدي معتز هادي حياة ..خليك معاه هنا دابا نجي.

حياة:(طلعت عينيها فلمخلوق لي قدامها كان طويل وعريض عندو كرش خارجة ...وصلعة كتبري فوق راسو وزايدهم بنضاضر كعر الكاس وكوستيم لفصالة قهوي تحتو قميجة بيضة محلول نصها ...حلات فمها من الصدمة لي قدامها..نعلت الشيطان وصبرات راسها بلي المضاهر مكتهم الاساس هو الشخصية والتعامل..نطقت بصوت حنين).

حياة:سي معتز كيداير !!

معتز:بخيغ..ونتي ثافا....

حياة:(اويلي على زهر كيداير تي هادا عندو مشكل حتى فالنطق ...وانا نقول هاد خيتي لي باركة عليا عجبتيني بغيتك لولدي...صدقت جايبة ليا كوفرة لازين لامجي بكري..الله يحرق ديلمو زواج..كرهتوني فيه...هزات قفطانها بين ايديها وشافت فيه...رجعات لعند سمية لي كانت كتعزل لحلوة وكتحطها فبلاصتيكة وتخشي فالصاك...

سمية:شدرتي؟؟

حياة:نوضي قودي خلينا نمشو...

المراة:بنتي حياة...فين مشيتي؟؟

حياة:(شافت فيها)غير هنا

المرأة:ولدي معتز قال ليا مشيتي بلما تهضري..معرفش شنو واقع ليك؟؟

حياة:بيني وبينك اخالتي انا فيا واحد المرض موحال واش يوافق عليا شي حد ملي يعرفو

المرأة:شنو هو ابنتي عاوديلي ليا...

حياة:فيا مرض «عدم التحكم في المخارج»بمعنى اخالتي كشدني سريسرة ملي نشوف الرجال..حاولت نعالج هاد المشكلة ولكين والو...ولي قلتها ليه كيهرب فبلما نكرفس ولدك لي ماشاء الله الف وحدة تتمناه...(دارت عند سمية)

حياة:نوضي تقعدي نتي..(جرات بوشيطة ومشات وسط نظرات مستغربة من عند لمراة)

يتبع